Saturday, April 08, 2006

رياض التي رأيت ...

اقوم من نومي يوم الخميس الضحى ..على مسج .. من صديقتي في السعوديه .. تقولي ان والد فلانه الفلاني متوفي ..
ادق عليها .. اعزيها و اعظم اجرها ..
اقول حق امي !! اتفاجأ ان امي اصلا ناويه السفر للرياض بعد اقل من ساعتين !!
اقولها من صجج يما !! تقولي اي والله برووح حق خالي في العنايه المركزه ..
اقرر فجأه خلال دقيقه وحده بدون تفكير اني اروح مع امي الرياض
اتصل في اخوي يودينا ..نسوي جنطتنا من غير تخطيط بسرعه بسرعه
ربكه .. نوصل المطار الساعه 2 الظهر ..نسأل اذا في حجز ..للرياض .. نلاقي حجز .
اتصل في صديقتي المقربه لي بالرياض..
انا : الووووووو ريما بليز انا الحين في المطار ابي حجز في الفيصليه غرفتين و سياره بأسرع وقت ممكن..
والله ما تقصر ..
اوصل مطار الرياض الاقي ليموزين الفيصليه ينطرنا ....
نروح الفندق ...
الرياض الي شفتها غير عن الرياض اخر مره
التحليه غير .. شارع العليا غير .. الناس غير .. المقاهي غير !!!
نوصل الفندق .. الحريم الي في اللوبي و الاختلاط و الانفتاح على مصراعيه غير تمام..
فندق فخم .. ضيافه عجيبه ..
حراره استقبال ما نلاقيها في ولا بلد اخر ..الا اذا دفعنا بخشيش ..لكن في الرياض غير
بدلنا بسرعه بسرعه ..اتجهنا للتخصصي .. انا خابره المستشفى التخصصي من كم سنه اهو بعد كان غير
و الطالبات و الطلبه غير و الدكاتره و التقنيه و الطاقم غير !!
قلت انشاء الله ما يدش اي سعودي مستشفى كويتي و يشوووووووف البهذله الي في مستشفياتنا!!
تطور عمراني .. اقتصادي ..انفتاح .. تطور تقني ...
زرنا المريض و بعدها رحنا شوي بيت خالي الدكتور جمب المستشفى على طول في العليا ..
شفت بنات يصيرون لي ما شفتهم من اكثر من 16 سنه !!!
يالله هالكثر كبرنا !!
ارووح المحمديه .. اعزي ... اطلع من المحمديه على طوول من العزا .. لي مطعم الجلوب .. في الفيصليه .. سويت فلم مصري عشان احصل حجز فيه ...بدها طلعت فوق للمقهى و كانت امسيه روعه
صبحت الصبح يوم الجمعه .. الحيات ميته في الرياض صباح الجمعه .....
اقوم بزياره عائليه سريعه على وجبه الغدا ..
من العصر يبدأ مشواااااار المقاهي ..
قهوه عجيبه مدري شنو اسمها لها منظر خيااااااااال ... ما كأني يا ناس في الرياض .. لو كان قايلين لي دبي قلت ميخالف .. بس مقهى في فندق المملكه ..في الدور 77 مرتفع تشووف منه منظر الغرووب العجيب ...
و اتمشى في جسر المشااااااه شي فظيع
حسيت اني طايره ...
اجلس في القهوه ويا صاحباتي ..
الطاوله الي يمنا بنات يدخنون و الي يمهم بنات متغطيات من فوق لي تحت .. و احنا وسط لا كذا و لا كذا
قمه التناقض و اعتقد هذا الشي لا يوجد الا هنا !!
ياخذنا السوااق يودينا شارع التحليه
الي اهوو الشانز ليزيه ...
مقاهي اشكال و الوان مطاعم عجيبه ..
عزمتنا صاحبتي في مطعم اسمه عبدالوهاب
لذيذ وايد انصحكم فيه ..
.. بعدين اطلب منهم ان نكمل السهره عندي في الفندق قبل لا يـتأخر الوقت لان امي ما ترضى
نروح نشرب القهوه و نحلي في المطعم البرازيلي الي في الفيصليه
القعده وايد حلوووووووه الجو خيال
و اسلم عليهم و اودعهم لاني ماراح اشوفهم الا بالصيف
اطلع غرفتي ..
اقعد مع امي و خالاتي
و من باجر الضحى الي اهو اليوم السبت .. نسوي جناطنا و نرجع الكويت ...
كانت الرحله جدا سريعه
روووووووووووووووووعه
يا ناس الي وده يساافر الرياض ياخذني معاه
لان الرياض الي شفتها ماهي الرياض الي تركتها من كم سنه
شفت ناس غير
مجتمع تغيرت افكاره بسرعه البرق
مفاهيم غير
وناااااسه غير
ضحكت ضحكت ما بحياتي ضحكته
ملاحظه : للجياكر الي مثلي الي تعاني من قحط عاطفي و اخر رومانسي عليها ان تزور الرياض لمده 24 ساعه
راح تتأكد انها اجمل من هيفاء وهبي على كميه المغازل و الكلمات الحلوه الي تجيها
انا ما دريت اني حلوه الا امس في الرياض
انواااااااااااااااااااااع الكلام الحلو
ههههههههههههههههههههههههههههههههههههه
قلت لصديقتي اني راح اصدق نفسي
رجعت بلدي و بيتي و انا محمله بذكريات من الرياض عجيبه
و ممتعه
و يا ريتني ارووووح هناك كل شهرين على الاقل

29 comments:

esTeKaNa said...

حمدلله على السلامه
صاجة السفرات السريعه لو كانت لمنطقه قريبه تكسر الروتين وتونس
:)

lulu said...

حمدالله على السلامه يا بعد عمرى توه مانورت الكويت مكانج خالي والله فقدتج وايد
انشالله اشوفج باجر حدى مشتاقتلج

يالله باى :)

Lord Bin Sleet said...

ههههههههههههههههههههههه
والله اني اقول وش قصة العج اللي جانا فجأة اثره بسببك

الرياض مدينة الكوفيات والمطاعم والشوارع ، وانتم يالبنات ممكن تنبسطون اكثر من الشباب والسبب ان ثلاث ارباع الاشياء للعوائل فقط

وبالنسبة للمغازل صدقيني انه موب منك الا من العباة لأن الشينه بالعباة تطلع حلوة فيا مالك من الغزل والكلام الحلو ، ولا لو بالجينز كااااان مااحد عبرك :P

تحياتي ياقميل

Unknown said...

حكمة اول امس (اعرف السبب) علشان جذى حبيتى الرياض مو لله من الكلام اللى سمعتيه لوووول بس ماشى شبعي شوية كلام ممكن يكون شوي مغذى للحياة العاطفية

Diver said...

يلا الحمد لله على السلامة
و ابي اقولج شي ترا لو الناس و خاصة الشباب يعرفونج عدل جان الكل يغازلج و بكل بلاد العالم بس انتي الي ما تعرفين نفسج عدل

ii said...

فطوم @@
ليش ما عزمتيني على العشا كان اجي والله؟؟
كل هذا خايفه تدفعين!! لا تخافين انتي ضيفه وبنعشيك على حسابنا

احلى شي انك رحتي لسبازيو .. من جد هالمطعم خطير

بس جد الجو الايام اللي راحت كان شين .. عاد ماودي اقول مين السبب
:P

طائر بلا وطن said...

^
^
^

لا تذكريني .. كل مرة بدشه يكون للعائلات
الشباب ما لهم الا البخاري و اذا اكشخو
بيتزا هوت

المهم .. الحمدلله على السلامة

و الاهم استانستي

سلام
:)

Unknown said...

umnaser: ما تطلع منج كلمة حلوة ابد حق الناس بس صج ام ناصر كنت اتمنى ان اشوف فطحلة كتابج ولكن مع الاسف شكلج مسوية ريجستر بس علشان تعلقين على الناس ومن راقب الناس مات هاما مثل ما عندج الجرأة انج تعلقين على الناس طرحى افكارج وخلينى ننتاقش مو منخشة ورى عباتج وتقرقين هذا اذا كنتى تعرفين شكلها
Diver :تكفة لا تخليها تصدق نفسها يا معود بروحها مايقة وخالصة بعد هالدور تمدح

lawyer said...

استكانه
اي اوووووووف والله صاجه

وايد تكسر الروتين صرت انا مثل هوم الون لما سافر بروحه و 24 ساعه شغال طلبات م الروم سيرفس و اوقع على حساب امي
ههههههههههههههههههه


لولو حياتي انتي انا اكثر والله حدي بعد ولهانه عليج
مييييييت بووسه الك يا جميله

لورد بن سليت

لااااااااااا انا اصلا عباتي مفتووحه و من تحتها الجينز عرفت الحين ليش المسيرات الشبابيه وراي هههههههههه
انواع الحركات

lawyer said...

مشاري
ايييييييييي حدي احتاج كلام حلوووو
انت حاس فيني


ام ناصر
هلا هلا نورتي
اي انتي تدرين العوايل الي من نجد نصهم في الكويت و نصهم في السعوديه
اذا احنا السعوديه او نحب امريكا او باريس مو معناته نشيل شلايلنا و نعيش هناك جان نص الكويتين في لبنان و اسبانيا

lawyer said...

دايفر
هلا هلا باطشششش والرش
الله يجبر بخاطرك دنيا و اخره يا رب مثل ما تشجعني و تجبر بخاطري دوم
الله يحفظك
بسسسسسسسس دايفر شي شي الكلام الحلو
خلني اقولك شغله قبل لما كان عمري 18 سنه لو احد يقولي كلمه عادي ازفه واتنرفز و يمكن اشيل الكعب على راسه
بسسسسسس الكبر شين انطر الكلمه الحلوه صررررررت

lawyer said...

سعلوه
وووووووووووالله يا سعلوه اني بغيت ارسلك ايميل عشان اشوفك هناك و اعطيك جوالي بسسسسس خفت انتي تنحرجين و اسبب احراج لك
... بس ترا انا عادي لاني عندي صديقاتي في المسنجر شفتهم في مملكه المرأه تواعدنا هناك .. و جوو عندي و سلمت عليهم و قعدنا ساعه .. طبعا البنت جايه مع امها .. ههههههه بس خوش بنت ذهب
لكن اهي الي كانت قايله من قبل هذا رقمي اذا جيتي الرياض كلميني

عرفتي بس اوعدك مرا ثانيه انك تعزميني انشاء الله

lawyer said...

طائر بلا وطن
صصصصصصصج

مدري بس كل مكان اروح له كلا في مكان للشباب

المقاهي و المطاعم الي في المملكه و الفيصليه و قهاوي التحليه

مدري انا وايد شفت شباب
رحت واتر لمون هناك ؟؟

lawyer said...

ناديه
بما انج حلوه و جميله بالصج
فكلششششششش محد راح يغازلج بالرياض
هههههههههههههههههههههه

انتي مالج حظ ابد
ههههههههههههههه لا لا لا لا
تبييييين الصج ما اوديج وياي الرياض يطيييييح سوووووقي
انا كعب 12 سنتي و مو ملحقه وياج تبين اتيين وياي بعد !!!

ليششششششششش الاحباط

kazmawy said...

عظم الله اجركم وحمدالله على السلامة

Anonymous said...

أحسن الله عزاكم و عظم الله أجركم..

و الحمدلله على السلامه..هههههههههه

هذي أحسن الرحلات.. الي ما فيها أي تخطيط... كل ما زاد التخطيط للرحله كل ما خربت :P

qalm-jaf said...

اللى راح الرياض وماراح
روضة خريييييم
غلظان مره
مومشكله انت رايحه بالصيف اخذي السعلوه وانشالله راح تكون رحله جميييييييله
.
.
.
.
الحمدالله على السلامه

Яeema said...

reema from spain is talking to you!
جني فؤاد الهاشم لما يسافر

لوووووووووووووووير
ولهانا عليك مرة

مرة ثانية محد بسافر وياج إلا أنا
إحتكار
و بنطرش ايميلت حق ربهنا السعوديين حريم و رياييل
عشان محرم
و بيصير حالنا مثل قصة بنات الرياض
أمبيييييييييييييه
أنا وياج

بالكويت و مو خالصين
هاهاهاهاهاها
أنا أحتاج أشوفها بعد

لحظة!
المثلث ناقص
نبي نادية ويانا

و بعدين مو تسمعين كلامهم إتروحين بالصيف
السنعين يسافرون
15 أغسطس
في أسبانيا
3 سبتمبر باريس

يالله ضبطي حجزج

lawyer said...

كظماوي
مشكوووووور الله يسلمك

احمد
يزاك الله خير

اي والله من اروع الرحلات

قلم جاف
الي راح الرياض و ما قعد وياي انا وي رفيجاتي في المملكه و الفيصليه و التحليه كلش ما شاف الوناسه ف الرياض


00
انا دخلت سبازيو و بعدها سألت الجرسون شنو اشهر شي عندكم قال مكاياتو و كابتشينو و هوت شوكلت
و كل وحده فينا طلبت شي بس انا طلبت كابتشينو
انشاء الله مرا ثانيه اطلبه

ريما
ههههههههه اي والله جنج فؤاد الهاشم

اكيييييييييييد انشاء الله سفرتي اليايه حقوق الطبع محفوظه عندج بورييييييج اشياء و اماكن ووناسه ما تصدقين انج في عاصمه المملكه
هههههههههههههه
وااااااااااااو خربنا يدها

و على طاري السفر
شهدوا يا ناس انا بنت قاعده في حالي
لا لي و لا علي
يتني رفيجتي ريما خربتني
قالتلي عن حجوزات الصيف
ناويه ابيت النيه من الحين حق الصيااااااعه
!!!
اخذ اثم 4 شهور قبل السفر ليش
خليني ااخر النيه الشينه شويييي

خرااااااااااااب رفيجتي
ههههههههههههههه مدري منو الي مبدع و عافس الدنيا و بعدين اقطها في راسج وعليه عليج

layal said...

عليج بالعافيه علي السفره شجعتينا نروح الرياض وانا من زمان ودي ازورها علي الاقل مطاعم حلوه وكشخه من غير شرب ولا يحزنون غيرنا احنا قبل ما نروح لازم نتأكد فيه المطعم حركات وله لا
سؤال في بالي يدور : تغطيتي في الرياض قصدي الوجه وله صار الموضوع عادي
تطلع البنت بدون ...؟
تره باجر اركب السياره واروح . بس
لو يسمحون للنسوان لسواقه هناك

بس نقطه تثار هني هل التغيير اللي صار تغيير شكلي في الرياض والعقول نفس ما هي ؟-- هذي هي المشكله -عذرا علي الصراحه

meo said...

حمدالله على سلامتج

lawyer said...

اخت ليلى

حياااااج الله
انا ما شفت وحده مغطيه ويها الا نادر
في المطاعم و المقاهي اغلب البنات يحطون الطرحه الي اهو الملفع على الجتف

اما بالنسبه للعقول حدث و لا حرج
سكتي اخترعت انا
قبل السعودين يتكلمون عن السفر و باريس و اورلاندو الحين السعوديين كلهم حتى اليهال فيهم
ماعندهم الا الكلام عن الاسهم و البورصه و المحافظ الاستثماريه
و التعميير و سوالف الاستثمار و الفايننس
و حتى على مستوى الجريمه
قبل تلاقين الجريمه المتفشيه اهي شرب الخمر و غيرها
لكن بعد التغيير الي حاصل و خصوصا الاقتصادي
صارت الجريمه الشنيعه الي اهي محور الحديث
عن غسيييييل الاموال

lawyer said...

meo

الله يخليييك و يسلمك

3ateeja said...

انتي من قلتي لا كذا و لا كذا انا عرفت على طول انج رايحه الرياض صج
والله يا وخيتي مع احترامي للجميع
لكني ما احب اروح السعوديه اتسيح الا الحرمين وهذي ضروره بعد ما يصير يتغير مكانهم واذا رحت العمره تلاقيني امعجعجه بالجرايد لكويتيه
ما احب الكبت الاعلامي لأن بالنسبه لي كأني مربوطه ...
يمكن لأن عندج اهل وصديقات الوضع يختلف عندج
وخاصه وبشكل اساسي ان ما فيها بحر
:(
اذا ما شفت زروقه والله اييني قامت
ما يطوف يوم ما اشوف البحر بلكويت طبعا
حبي الثاني البحرين الديره الوحيده اللي ما احس فيها بغربه
والثانيه مكرر عمان
وغير جذي ما ارتاح حتى لو بفينا

Anonymous said...

انا عمري ما زرت الرياض لكن مصدقه كلامج المشكله ان مدونات
السعوديه خصوصا اللي بالانجليزي مافيها اي شيء حلو عن الرياض
ولا الناس فيها شي عجيب يجي الحكي السنع عن الرياض من غير اهلها
مادري شني سالفه مدونات السعوديه اللي بالانجليزي.

Hashemy said...

7emdela 3al salama lawyer o welcome back ;)

lawyer said...

عتيجه

حياااااج منوره حبي
اي كل الناس تحب البحر صاجه يشرح القلب و بعدين ترا لو تلاحظين الكويتين سياحتهم دايما تكون في مكان بحر في الصيف مثلا يروحون اسبانيا و لبنان و دبي و استراليا و من هالدول الي وين ما تروحين اتلاقين البحر جدامج

البحريييين دار الزين
و الخليج كله بيت واحد
اي بس انا وايد احب السعوديه مو بس عشان اهلي ما تصدقيني اذا قلت لج ان اهلي الي هناك مو زايرتهم من الغزو
لكن صديقاتي هناك و معزتي لهم بصراحه اكثر من الاهل

الرياض بالنسبه لي نجد الي ما عشت فيها و سمعت عنها ..
رياض بالنسبه لي ريحه اجدادي و اهلي
مع ان اهلي مو من الرياض من بريده و من حايل
لككككككككككككككككن لو شنو ما اروح بريده
هههههههههههههههههههه
يطقوووووون هناك

بس انشاء الله يا عتيجه المرا اليايه بسفط باص عند باب بلوجي و باخذكم رحله لسووووق الرياض
والله يا عتيجه في ساندل جيمي شو بالكويت سعره 230 والله ما تصدقيني اذا قلت لج في الرياض لقيته في 100 ديناااااار
فرق شاسع للسعر

lawyer said...

eye1

هذا الكلام موجهه للاخت سعلوه و الاخ لورد بن سليت
عشان يكتبون عن الرياض

:)

سنعه مسنعه
شكراااااااااا اختي
اول شي نورتي
و حياج الله
ثاني شي كلج سنه
و ثالث شي ترا انا صلحت الغلط المطبعي
الي كان اكبر من شنيييييييع
:)

lawyer said...

هاشمي
حي الله هالزوووووول
شخبارك ويييين هالغيبه