Sunday, August 31, 2008

مبارك عليكم الشهر



بمناسبه الشهر الفضيل اعاده الله علينا و عليكم بالخير و الصحه و العافيه
و عسى الله يغفرلنا و يرحمنا و يباركلنا في وقت هذا الشهر ..
و يعينا على نفسنا و على الطاعه..
في هذا الشهر راح تكون بوستاتي عباره عن جدول متابعه
لاعمال رمضانيه و اقتراحات لكم لاماكن و اوقات العباده
و صله الرحم و انشاء الله اقدر اقدم لكم مقترحات مفيده

**************


هني فقره انشالت لان بتكون حش !!
فقلت يا معلم علم نفسك
فطيم انتي مامنج فايده ابد

***************

اليوم الاول :
يبدا بالسحور
قال رسول الله صلى الله عليه وسلم تسحروا فان بالسحور بركه
و اهم شي لا تنسون النيه في انكم تنوون هذا الشي ..النيه تكون بالقلب وليس بالنطق يعني ..
عيش مشخول و روب
تمر
ماي
او سحور مصرين فول و شاي و روب
انا احب الروب ترا فلازم ادخله في كل شي
بس سحوري انا عباره عن توست جبن و لبن بارد و بعدها تمر ..
اهم شي في اليوم الاول لمدمنين القهوه و الشاي لا تنسون تاخذون حبيتين بندول على السحور .. عشان صداع اول يوم ..

قبل صلاه الفجر
قراءه شوي من القران
او تسبيح
او استغفار
صلاه ركعتين
بعدها صلاه الفجر ..
اذكار بعد الصلاه
بالنسبه لربات البيوت او الي في اجازة يقدرون يقرون قران الفير
و يابختهم
والي مثل حلاتي انا بروح انام يالا الحق اناملي ساعتين قبل الدوام

يوم عمل
الي يقدر يقرا شي مفيد في الدوام
او الي ما يقدر يتابع عمله و يخلص فيه
لا تنسون الابتسامه صدقه
و هذا شهر عباده و طاعه
مو شهر اعصاب و تكشر
لا يقص عليكم الشيطان
..
صلاه الظهر ..
ما اعتقد في احد يقدر يمشي العصر قبل الفطور في هالحر
بس عندي اقتراحات
الافنيو
او المولات البارده ..
الي في منطقه العاصمه عندكم الافنيو
المارينا
المهلب فوق
الي في فحيحيل مالكم الا المنشر والكوت
اهم نصيحه لا ادشون مركز سلطان او جميعه وانتو يواعه

اهم شي اهم شي
الصلاه في وقتها
القران
الاستغفار
والتسبيح
حطو في الاي بود قران لصوت مقرأ تحبونه
للبنات الي مثلي انا العصاري اعجل في المطبخ
و ارتب الطاوله
و اسوي العصاير
و كل شي
الله يعيده علينا وعليكم
لا تنسون دعاء الصايم مستجاب
ولا تنسون تدعون وانتو على الفطور
وادعولي

الفطور
خلوه خفيف
عشان تعبرون على التراويح
وعقبه صله الارحام و الدواوين
وقبل النوم حاسبو نفسكم
و شوفو شنو سويتاو و شنو لازم تسون
ولا تنسون احتاج اقتراحاتكم ..

اهم شي النيه
النيه
النيه

وعسى الله يتقبل منا و منكم صالح الاعمال يارب
ويعيده علينا و عليكم بالف خير ..
وعسى الله يجعلنا من عتقاء هذا الشهر الفضيل
لا تنسون صوم الجوارج
وصفاء النيه
التسامح..
مساعده الفقراء
والاحسان اليهم
************
رساله : حق كل الناس الي منعتني الظروف
او مشاغل الحياه من التواصل وياهم
اقولهم سامحوني على القصور
و يبقى دعائي لكم بالقلب
*******
اللهم اسألك بأسمك الفتاح ان تفتح علينا يارب
***************
هذا موقع لكل المسلمين في العالم
فيه مواعيد الصلاه و الامساك و الفطور و فيه عنوان جميع المراكز
الاسلاميه القريبه في كل انحاء العالم
و تقدرون تحطون رقم تلفونكم و توصلكم مسج من الموقع
بوقت كل صلاه
عشان تبلغكم و تذكركم
هذا يصلح حق الي برا الكويت
لان مو كل من بشوف الوقت على طول و تدرون مواقيت الصلاه تتغير
يوم بيوم
اتمنى اقدر افيدكم اكثر
***
*****
تحديث
توني كنت قاعد اقرا بوست لاحدى الخوات
و الا ادش بلوق الغاليه
الزين وكاتبه عن والده فسكره
ام سليمان
اسجد لربي سبحانه وتعالى
الذي قال في كتابه و اذا مرضت فهو يشفين
ام سليمان اوعدج من اليوم و رايح
اني ماراح اوقف دعائي لج
وبدعي ربي في صلاتي و سجودي ان يردج بين احبابج
ربي سبحانه رحيم
كريم
عزيز له حكمه ما يعلم فيها الا هو
له بلاء لا يعرف الميزان و المكيال
فبلائه يرفع صاحبه دراجات العلى من الجنه
ام سليمان اوقفااااااي
بقوتج راح يوقفون الي حوالينج
ولا تيطيحين
ورااج ناس عيونهم تبي رضاج لو مره
ام سليمان يمكن لا اعرفج ولا تعرفيني
بس ادعيلي
لاني انا محتاجه دعائج اكثر منج
ام سليمان الله يباركلج في الي يحبونج
شوفي رحمه سبحان سخرلج عبيده كلهم
ارجوكم قراء مدونتي الافاضل
لا تنسون ام سليمان بدعائكم
هي مريضه في بلد الغربه
ماتبي منا شي
و لكن حقها علينا كمسلمين واخوان
ان ندعيلها من كل قلبنا بالشفاء
وانشاء الله بتردين بالسلامه
و بلتقي وياج
اليوم انتي
وباجر ماندري منو الي محتاج الدعاء
صبر جميل و الله المستعان
رددي دايما حق اي احد اييج
اعلم من الله مالاتعلمون

Thursday, August 28, 2008

كل ماكبرنا

من فتره بسيطه كنت اقرا روايه و من بين الاحداث
كان الكلام عن استعداد رمضان قديما.. كان الاستعداد وايد حلو
قمت اقارن استعداد الناس الحين للرمضان و استعداد الناس قبل
مثل ما كانت تقولي يدتي ويدي الله يرحمهم و مثل ما انا قريت ..
و مثل ما نشوف في المسلسلات..
يابخت اول و بساطتهم و يا همنا الحين وشقانا ويا السرف و الترف في الاستعداد
الناس كلها لاهيه استعداد رمضان يعني مواعين يديده صواني يديده دراعات غاليه
اكل اكل اكل وكأنه مانسوي شي غير الاكل !!
و هدايا رمضان الي مالها علاقه في رمضان ابد
و تسجيل الناس لمواعيد المسلسلات و الحجي كله عن الفن و الفنانين !!
و كأنه مو شهر عباده جنه شهر الاوسكااااار
بحيث يكرس المسليمن حياتهم لمتابعه المسلسلات وتقيييمها

انزين وبس هذا رمضان
مسلسلات
غبقات
زوارات
اكل !
سهر
دواوين
و استعداد غير طبيعي للقرقيعان و حفلاته

ووين استعداد العبد للخالق؟

وين استعداد الروحانيات؟


كل شي ضاعت حلاوته و كل شي فقد قيمته من يوم ما فقد بساطته
نسينا ان هذا شهر عباده
طاعه
شهر صيام و صدقات
شهر افطار الصائم
و
محاسبه نفس
امس بالليل قاطه قبل لا انام قعدت افكر
قررت اسحب برنت كامل من مخي
شنو سويت و شنو ما سويت هالسنه
اكتشفت ان الدنيا بسرعه البرق اركضت
وان رمضان ياااا بسرعه
راجعت حساباتي
حياتي
اغلاطي
انفعالاتي
دايما كنت اقول اذا صار عمري 30 خلاص بلتفت حق نفسي واعدلها
اكتشفت ان احنا كل ما نكبر ننفتن في الدنيا اكثر !!
كل ما نكبر صعب علينا كل شي
متى بحط حق نفسي حدود؟
كل ما نكبر ننفتن موبس في الدنيا لأ
وبعد نستبيح محارمها و تزيد الكبائر فينا
وكأنه الكبائر مرتبطه في كبرنا
قبل لا يدخل علينا رمضان
لازم اكون صفيت حساباتي مع نفسي
وراجعت كشف حساب اعمالي
وسكرت ميزانيتي
وتبنا
احنا في البدايه لابد نعرف شنو اغلاطنا عشان نعدلها
ووين قصورنا
والاهم نحمد الله على كل خير ونعمه و يوم مر علينا
ونطلب الله يعينااا على طاعته


ناس وايد راحوا منا هالسنه
احباب
اهل
خلان
اصدقاء
نحمد الله على رمضان جديد بحياتنا
ونعاهد الله فيه ان هالسنه بنحاول نخليه رمضان صيام عن المعاصي
صيام نفس على هواها و فتنها
ونشحن نفسنا
ونستغفر ربنا
كل عام وانتو بخير
كل رمضان و انتو بصحه وسلامه
رمضان هذا بكون من احلى رمضان بحياتي
واروعها
تدرون ليش؟
لان %70 من ادعيه رمضان السنه الي فاتت تحققتلي هالسنه
احمدك ربي على كل خير

Tuesday, August 26, 2008

طقوس الحب

الساعه 8 الصبح :قهوه امريكيه
""
""
""
الساعه 9 الصبح :بخور
مع القهوة التركيه
""
""
""
كاكاو اوبرا
جالكسي
او فليك
طقوس العمل عندي
""
""
قاعد احاول اودعهم قبل رمضان

Sunday, August 24, 2008

ابي اطير...

taken by mohammed

اقولكم شنو ودي
ودي اطيييييييييييييييييييير
ودي ارووح السمااااااااااااا
فوق هالغييييييم اصررررررررخ
فوووووووووووق هالغيم اركض لدنياااااااا غير هالدنيا
لمكان اصرخ فيه انااااااااااديك والاقيك عقب صرخاتي
اركض لك و التقي وياك
احسااااااااسي فوق هالغيم ابجي و اغني هالاغنيه لك
ترااااااا بنضيع
بنضيييييييييييييييع من بعض حيييييل
من اغلطانا
من عنادنا
من تكبرنا

واذا ظـــــــــــــــــــــــعت

ولا فهمتني

اســـــــــــــــــــــــــــــمعها



Saturday, August 23, 2008

سوالف ويك اند









(1)


هذره ويك اند
فيني هذره مو طبيعيه
بس ملوع جبدي ان كل ما ييت اكتب بوست
ادوخ و اروح انام
عايشه حاله كسيفه من عفسه النوم
المهم امس عشتو طلعت بس ياريتني مارحت هالموفي التعيس
قطيييييييييييييييعه ظيم .. يخرع
المهم انا من ردت امي من السفر
و ياربي اول يوم او من باجر
اششششششم ريحه مو طبيعيه
واين وااااااااين يا ناس
المهم
عادي شي طبيعي ان امي من تروح محل كاكاوات تخمط الي اكو وماكو
ويطلع كلا فيه كحول و بعدين اقطه و يعورها قلبها ههههههههههه
هالمرا لأ ريحه ريحه
احوس احوس
المهم قلت الظاهر انا عندي حاسه الشم فيها شي
قلت حق الخدامه شبي فحم بخور
تبخرت
توني ببخر شعري
والا وييييييييييييييييييييييع
الرييييييييييييييييييييحه من شعري
الرييييييييييييييييحه فيني انا !!
اشلون ما لاحظت من الشامبو
وانا في عفسه هالشاور علامي ما ثبت ان من الشامبو
اروح اشوووف الشامبو والا على بلو بيري
يااااااااااااااربي
شي شي شي لا يطاق
رحت قلت حق امي
يمااااااا شنو هالشامبو الظيم ريحه خايسه
قالت لي اي الاماراتين الي وياي في الاوتيل امدحووو لي
شريته يوم شفته ريحته خايسه قلت لها تنزله حماااامج !! تحسفت عليه
!!
طبعا شي مو يديد في بيتنا
كل بقطونه يعطوني اياه!!
واين واين يا ناس احد يسبح في واين !!






(2)


هالايام قاعد افكر اشترك في نادي يديد
مليت مو رويال حياه
لان بدا يصير زحمه ..
مابي سي كلاب مختلط
ولا ابي كورنيش لان مكان الحريم يقمت
ليش النوادي الحلوة الي في الكويت صايره مختلط
نبي نادي على البحر و فيو حلو و كبييير كلاس
بس بدون رياييل لان بصراحه لو شنو الناس كانت هناك كلاس
الريال الكويتي يبقى كويتي
حتى لو بنت سنعه و تلعب
اهو في عالم اخر ويا الزوووووووم على جسمها
رحت روتانا المنشر يقولون الجيم مالهم حلو
دشييييييييته اينن كووووووووووووزي
و شرح و يطل على اليخوت في الكوت و البحر مو طبيعي
و مافيه ناس ولا فيه احد
ماغير شايب انجليزي ما يدري عن احد
بس مشكلته البعد
طريج فحيحيل بعيد
انا الجابريه يم بيتنا و اتعييز هالنوبه فحيحيل
اي كانت !!



على طاري رويال حياه اول مافج قالولي عن المساج هناك
رحت جربت المساج
انا خو ترا مو مال مساج ....احب المساج بس انا اخاف من امهات عيون امقطه !!
ياربي والله ترا صج اهم يفكرون بصوت عالي و الا هذي سياسه عندهم ان بس تمدح في شكلج و جذي
المهم قلنا بنجرب
يالا يافطييييم صيري خوش ادميه و جرباي
دشيت الا هذيج الغرفه الي تونس
و الحمام الي يشوق
و كل شي مرتب
انسدحنا
جاااااان تقولي تبي فول مساج قلت لها يس
فل ريلاكس مساج
جان تقولي حتى بلا بلا بلا و بلا
قلت لها لا طبعا
ايدي و ريلي و ظهري هذا حدج
انسدحت ماوعيت الا هالبريعصيه
مدري اشلوووووووووووون طمرت
لا تخافون انا سميتها بريعصيه
تخيلوووووووووووووو
موديلهم الاخت تربعت في الفراش !!
اناااااااااااااا اقولها
واااي !؟؟ يوووووووووووو مني اب !!
ليش مو حالج حالح باجي المساجات
لا حووووووووول الله
بدال لا يصير ريلاكس مسااااااج صار تششششششنج
خفت على عمري
يعني مو اخر عمري
هالمنقووووووووزه تسوي شي فيني
لوووووووول
خلصنا مسااااااااج
تسدحناااااااااااا
شربت شويها
رحت سويت اظافري
ولا شفت قطو في السبا كلش
الحين يوم رحت له من يومين
يخرششششش من الزحمه
مابي ابي مكان هادي
طبعا انا فلكس و هالسوالف ماحب
لويه و بنات و ازعاج
و ميووووزك و طاخ طيخ
ابي مكان سنع وين ؟
اذا قلتو ماكو
اقولكم مشكورين لان اصلا انا متبرعه بفلوسي
حق اي جيم في الكويت اشترك 3 شهور و اروح اسبوع

















عطوني رايكم في النيولوك

Thursday, August 21, 2008

abercrombie and fitch


واي يوم في حياتي صج صج يوم في حياتي
المكان : لندن بالتحديد اكثر محل..
abercrombie and fitch
تدق علي رفيجتي
هي : الو انتي وينج
انا : هاو انتي وينج شالديسكو الي من الصبح
هي : تضحك علي و تقولي تعالي تعالي دشيت ابريكرومبي و قلت لازم اتين الحين اتهدين الي في ايدج و اتيين
انا : هاو و النهر مو بنروح النهر !!!
هي : اي نهر انتي تعالي و بتروحين النهر بس تعالي
طلعت من رالف لورين في بوند ستريت كسرت يسااااار مشيت شوي
و الا ما وعيت لويه عند الباب و ناس تصور و عفسه و صووووووت ديسكوووو
وشي شي اصبحنا و اصبح الملك لله تووووونا الساعه 12 الضحى !!!
دشييييييت و الا ششوف هالبنات الي يضحكون علي ناططريني
وتعالي يالله صوراااااي و الا المحل موقفيين هذا المزيوووون مفصخ
و تعالو صورووو وياه
فطييييييييم هسترت ضحك من صج هذا صج؟؟
اتناااااااديني المرا تعالي تبين صوره وياه؟؟

اطالع شوي استوعب الدنيا هذا مفصخ في هالبرد من صج؟؟
يا زييييين بطنك بس !!

كان ودي المسه اتأكد هذا بطنه صج والا يايبينه من متحف الشمع..

الي قبلي ارتزت صورت و ضحكت و مشت

يااااا دوري انا سنعت عمري شديت الظهر جود اطوول يعني!!
ما قايشش طوله 190!!!

التفت عليه و ضحكتي من هني لي هني قام لممممممممممني وصووورت وياه

رفيجتي منصدمه وانا منصدمه بس مستاااااااانسه
لمه ابلاااااااااش انزين فطيييييم وخري خلاص !! خلصت الصوره
اطالع رفيجتي اسألها بس خلصنا؟؟

تقولي بعد اشتبين
ماااااااااني موووووووخره بعد لمني هههههههههههه

ضحكت حدي و ابتسمت له و قلت لو انا حلوة عزمتك على العشا وطلعت وياك

قالي انتي قورجس بس ممنوع اقبل الدعوة اثناء العمل
مدري شنو قصده يعني انطره برا اذا خلص مثلا؟؟
والا يعني ذلفااااااي و عطينا مقفاااااااج ؟؟

عرفتووو الي رايحه اقول حق رفيجتي قالي قورجس مابقى احد من رفيجاتي ما قلت له قااااااااالي قورجس
و الكل يقولي لا تصدقين لا تصدقييييين !!

المهم كملت التسوق دشيت
الي رايح المحل عارف ان نظاامه كالاتي
ديجي يصرع و ظلمه و الي يبوعون كل واحد يقول الزود عندي
و فطيم اترقص ما اتسوووووووق
و كل ما مسكت قطعه ناديت الريال بجم؟؟ ترا اعرف اقرا السعر بس بتحرششششش
مشكلتهم يدوودهون من حلاتهم

و سياااااستهم عجبتني يرشوووووووون عطور رجاليه على كل هدووم الحريم
في سكشن الحريم يمشووووووووون و يرشوووووون و العكس صحيح


و انا اصرخ على رفيجتي اقولها ليششششش المرا حرام تحط عطر تصير زانيه

و الريال حلاااااااال احنا ندووخ من عطوراتهم
حالنا من حالهم يازينهم بس خووووووووش محل عجبني كل يوم برووح له
والله عيل نقط فلوس و انتسوق و مخاسير و بس
على الاقل مخاااااسير ووناااااااسه و لامييييييينا و مونسينا و مرقصينا يازين البلاش بس


ابذمتكم مو حلو؟؟









ملاحظه : هذا البوست كنت منزلته في شهر فبراير بس ظرب بلوقي ..
وتسكر بلوقي بعدها..
فقلت انزله الحين ..

Wednesday, August 20, 2008

كل عام و انا و انت ... بخير


في هاليوم روحي تحوم حوالينك ..
اهمس باذنك

احسب الجيات كم مره اجي و احسب النظرات لي ضاع الحكي روحاتي و جياتي و نظراتي الحزينه تحكي لك مدى حبي

وبغفى انا بحضن السما الليله وبنام ..

يا لايمي في الهوى ..زاد العتاب
ماتدري ان الهوى ...ليله عذاب
و أشواق فيها انطوي ..عمر الشباب..
واسرار قلبي
...

لاحظ و شوف يا منيتي كيف الشعور لما انتلاقا و الحكي بينا يدور
الوقت يخلص و السوالف تنتهي و انا عيوني في عيونك تلتهي


قلت لك على حضن السما الليله بغفي و بنام ..
وعلى حضنك انثر اوراق همي
جرحي الي بعدك
وفرحي يمك..
ولي حاولت ونسيتك..
اتعثر انا فيك..

كتبتك اليوم الف مرا
وكتبتك اليوم احلى قصه
مسحتك
ونسيتك
و طويت ذكراك
ابنساها
ارد امسك قلمي و اكتبلك..
استأذن انا من جروحي
من سهري و نوحي

اخطلك كلام عشاق
يمسح كلامي اخر رساله منك

مابين جروح
مابين هموم
مابين عواصفنا
ادوس على جرحي
وقلبي و كل الي صار
واقول على الحلوة و على المره
بظل انا بذكراك..وبذكرك

قلت لك حوالينك اليوم روحي تحوم
..

يا غايتي يا كل شي انتا بحياتي و دنيتي عندي كلام وايد ،
وايد كلام وايد كل العواطف فيه لا جيت اقول القى الظروف تمنعني لا اجيك

ودامي وصلتك ..عيل بغفي انا الليله بحضنك و بنام..بروحي
20/8/2008







Monday, August 18, 2008

يوميات زوجه تعيسه ...الجزء الثاني

يوميات زوجه تعيسه ..
هي يوميات لقصص بنات حلمن بالزواج كأي بنت تربت وكبرت في صحراء قاحله كبلدي جرعوها الامومه منذ الصغر.. علموها ان الحياه زوج و ابناء .. و ان المرأه هي فقط الانثى المتزوجه .. اما غير المتزوجه ماهي الا عاله على المجتمع.. زياده عدد فيه ..فأخذنا نحن الفتيات نسبق الزمن للزواج.. وخابت امالنا فيه .. واصبحنا بسببه زوجات تعيسات


تعيسه وسكران

انا تعيسه كنت موظفه في احد البنوك.. زوجي كان مراجع عندنا في البنك.. شافني و قرر الزواج مني بعد ماتردد علينا اكثر من مرا .. لي الحين اذكر تفاصيل معاملاته الي كنت انجزها له في البنك..حاليا عمري 36 سنه.. متزوجه من 8 سنوات .. زوجي من اقرب الناس لي و احب الناس لي .. زوجي انسان بسيط في كل شي .. سهل بعد في كل شي.. متسامح .. وطيب و عمره ماردلي طلب.. علمني اشلون اكون زوجه مناسبه له ..
كانت اول سنتين بحياتنا عباره عن شهر عسل ..
من الصعب جدا في هالدنيا ان تستمر السعاده او الراحه
حياتي ماكانت سعيده جدا بس كانت عاديه و هاديه لي لدرجه كبيره من الراحه..
بعد شهر العسل طلب زوجي مني ان استقيل من البنك و كان عذره ان مايبيني اشتغل صبح و عصر.. و فعلا قعدت في البيت.. كنت ساكنه مع حمولتي ولكن طلعنا بعد 4 سنوات وذلك لتعبي النفسي و حس زوجي ان هذا الشي بدا يأثر على نفسيتي..
بعد سنتين من الزواج .. بدأت القصه ..
كنا مسافرين انا وزوجي في رحله عمل له
كان بعد العشا ينزل تحت .. يقولي انه بشوف مبارات
تحت في اللوبي لان في وايد ريايل متيمعين..
كان الوضع عادي بالنسبه لي و لو انه كان اول مرا ..

رجع بعد المباراه .. استنكرت ريحته
عرفت انها ريحه البيره
بس طبعا سويت نفسي ما ادري
المرأه الي زوجها يشرب تعاني جدا من ريحته
معاناه كبيره .. ريحته لما يكون يمها
ريحته في فراشها وريحته لما يقوم من النوم معرق و جسمه متشبع
بالبيره او الواين...
هل فكر اي ريال قبل لا يشرب ان يخلي مرته تشرب حتى السكر وبعدين يشمها !!
احنا الحريم نأرف من ريحه المشروب و لا يلوم الرجل اي زوجه تكره فراش زوجها لما يكون شارب...

بدأ زوجي يكرر النزول لبار الهوتيل .. يوميا
و انا اسوي نفسي ما ادري ولا اعرف ولا احس
من داخلي كنت ألوم نفسي ..ليش زوجي بدا يشرب
وبديت اتعب نفسيا ..
شكيت في نفسي
شكيت في موضوع العيال
وتحول الموضوع الى تعاسه
رجعنا الكويت و صار كل همي مراجعه دكاتره النساء والولاده
واخذ علاجات مكثفه للحمل ..
ادويه الحمل و اضطراب الهرمونات و الاستمرار في المحاوله
شي يخلي اي مرا تنهار ...
كنت اتحاشى الزوارات و كنت اتحاشى سؤال خالتي المتكرر بموضوع الحمل..
وكان زوجي يقدر هالشي
الي يذبحني ان زوجي عمره ما فتح الموضوع وياي او حاول يجرح مشاعري
وبدا يشرب زوجي
اشياء وايد ممكن ان هذا المخلوق الطيب يقدر يخشها عني

حياتي مافيها مشاكل بيني وبينه
بالعكس انا محتويه جدا موضوع الشرب
ماعمري رضيت فيه يوم
ولكن انا على يقين ان هذا الانسان راح يتغير اليوم او باجر
ولكن اهم شي ان يكون زوجي في عيني احسن الرياييل
واني استمر في احترامه
واني اسوي نفسي ما ادري و اعطيه طابع ان احسن ريال بالدنيا

شي يعذب نفسيا
عدم حملي
حبي لزوج يشرب و ابي استمر في الحياه وياه وفي نفس الوقت اخاف من ربي

في يوم من الايام شفت زوجي داخل بكيس فيه كرتون على طول راح المكتب
ومن يومها زوجي بدا يقفل المكتب
عرفت ان في بطل في المكتب ..
سكت يوم
يومين
بعد اسبوع انفجرت
كنت في الفراش ابجي بكل انهيار
لان الدوره الشهريه يتني بعد انقطاع شهرين كان من الممكن يعطيني امل
ومن منظر البطل الي في المكتب ..
دخل زوجي علي ..شافني بمنطر عمره ماراح ينساه
اشلون ألمه وانا في قمه انهياري و اصرخ عليه وانا لامته
قووولي ليش انا ماعندي عيال
شوفني ..جاوبني
انا مو زينه ؟؟
انت رد علي
ربي شنو شايف مني الي ماعطاني عيال
انا كل يوم ادعي ربي في ولد واحد
يفرحني و يفرحك
كل الي تبيه اسويه
ماقاعد اسوي شي غلط بحياتي
احب اليهال و اموت عليهم اكثر من اي ام ثانيه
اشمعنا انا ماعندي عيال
شنو مسويه
ليش ما يستجاب دعائي
انت قولي ؟؟
انا و انت اسره مو زينه ؟
فيك شي؟؟
فيني شي ..؟؟
ليش محرومين
ليش احبك وتحبني وانت احسن الرياييل و محرومين ..
انت احسن ابو في هالدنيا لعيالي
احسن ابو صح؟؟
قولي صح؟؟
كانت اول واخر مرا انهار فيها جدام زوجي بسبب العيال
ووبخته ليش احنا محرومين بسبب شي معين ؟؟
فهم زوجي او حس اني ادري...
من يومها صرت اروح مكتبه اذا طلع و اشوف البطل اذا قل
او اذا مثل ما اهو عليه..
اسبوعين زوجي ما شرب فيهم بعد انهياري...
فانتهزت الفرصه و طلبت منه نروح العمره ..
بدون اي تردد وافق وحجزلي باسرع وقت ممكن
ورحنا العمره
اعتمرنا و خلصنا
بعدها وقفت ادعي عند الملتزم وكان زوجي واقف وراي بالظبط .
مسكني من جتوفي و يردد
""يالا يارب اشهدك اني راضي عنها دنيا واخره..
يارب انا ادري ان من احد اسباب دخول زوجتي الجنه هو رضاي عنها
اقرلك ياربي واشهد علي حرمك ..ان مرتي عمرها ماكدرتني يوم
ولا نومتني زعلان ولا قصرت بحقي..راضي عنها ياربي
راضي عنها.. فلاتردها من بيتك الا رافعها و مستجيب دعائها""

نرجع من العمره
وترجع حياتنا كما كانت
زوجي يتم زوجي
وبعد 8 سنوات حالي مثل ما اهو
انا مو تعيسه لان عندي مشاكل مع زوجي
والتعاسه ماتكون في زوج فيه عيوب غير قابله للاصلاح
ولكن التعاسه تكمن في الظروف المحيطه في هذا الزواج
ما راح اقص عليكم مثل الافلام و اقولكم حياتي تغيرت

حياتي مثل ما اهي
بعد 8 سنوات مازلت اعاني من زواج خالي من الابناء
متعب اجتماعيا في الكويت .. وزوجي مازال يشرب
ولكن الي يومكم هذا ما حاولت أأذي مشاعره ..
مو عشان اغطي عيوبي
ولكن لاني فعلا مابي اظغط عليه ..
مع الكبر
و المحاتات الشي الوحيد الي يسيطر علي ان مابي زوجي يستمر في الشرب
لاني اخاف عليه من الاخره..
واخاف على صحته
واخاف على كل شي بينا...
ولاني على يقين ان الصبر باب كل فرج

Sunday, August 17, 2008

يوميات زوجه تعيسه


يوميات زوجه تعيسه ..
هي يوميات لقصص بنات حلمن بالزواج كأي بنت تربت وكبرت في صحراء قاحله كبلدي
جرعوها الامومه منذ الصغر.. علموها ان الحياه زوج و ابناء .. و ان المرأه هي فقط الانثى المتزوجه .. اما غير المتزوجه ماهي الا عاله على المجتمع.. زياده عدد فيه ..فأخذنا نحن الفتيات نسبق الزمن للزواج.. وخابت امالنا فيه .. واصبحنا بسببه زوجات تعيسات..


تعيسه ووسواسي..
انا تعيسه تزوجت وسواسي .. لا خطبه اهل و لا حب .. وسواسي ريلي دكتور .. ذكرني له ريل رفيجتي " ماسوا خير " بحكم صداقتي بزوجته.. خطبه تقليديه كأي خطبه كويتيه
فيها الكثير من الكذب و قليل من المجاملات .. و مليون حلم براسي بحققه ..
مثلت في البدايه دور سندريلا .. العاشقه الولهانه .. يومين بس و الثالث احباط!
ماكو رده فعل كلش.. دايما كنت اتمنى الزواج برجل هادي .. ولكن ماطلبت رجل شبه ميت !!
مراسم احتفال بسيطه .. و بعدها شهر عسل .
. و اعتقد ان من دخلت الفندق معاه و كأني اول مرا اتعرف عليه .. في المطار ..
و بالاونج تحديدا اشوفه مندمج يدز ايميل !
قطيت ويهي و بطالع عبالي اهتماماته ايميل و خرابيط مثلي !
طلع يراسل الفندق و ايميل اشطوله اشعرظه للفندق ..
قلت بقلبي ياحليله رومانسي يبيهم يجهزون الغرفه لنا و يضبطونها ...
اسأله بكل سعاده
تعيسه : يدرون ان هوني مونر قلت لهم ؟
وسواسي : اي طبعا طبعا .. و قلت لهم يجهزون الغرفه و بتشوفين انشاء الله

تعيسه ترسم الاحلام الورديه .. و سعيده وايد بحلم ليالي شهرزاد مع اميرها شهريار..
لاحظت ان زوجها كل شوي ينظف ايده في انتي بكتريال.. و الويت نابكن ديتول بمخباته
في الطياره يغسل الشوك و القفاش.. و ماياخذ ولا يشرب اي شي .. من احد
وصلو الاوتبل خذو غرفه ..
الغرفه دبل روم عاديه ! وين جناح الهوني مونر !!
مع شيتز احتياطي مغلف من اللوندري !!
تشوفه مشتط ويا الفرونت ديسك يسألهم ان طلب الغرفه تتعقم ! و الدار تتنظف
بس فيه بقايا غبار في كل مكان و يمشي و يمسح !!
و ايون الهاوس كيبينج و يغيرون الشراشف .. و يحطون احتياطي غير هذولاك!!
ساعتين يعقم الحمام و يمسح فيه .. و ديتول في كل مكان و مواد معقمه غير ديتول
تخيلت اني في غرفه عمليات مو شهر عسل!!
بقلبها تقول " شالمريض الي متزوجته "
بعد ساعتين من التنبر و التعقيم .. يطلب منها ان تغسل ايدها و تعقمها عشان يسبحون و تنام عقب الرحله الطويله ..
تعيسه: انا بسوي الجنطه بعدين اغسل انت دش الحمام قبلي
وسواسي : بطلعين هدومج تحطينهم في الكبت من غير ما تنظفيه
تعيسه : هاااو كبت فندق شنظف فيه مسافره انظف !!
وسواسي : جم واحد مستخدم الكبت قبلج ! تدرين اذا منظفينه عدل او لأ
انتي مشكلتج ماتشوفين .. ترا البكتريا والجراثيم معانا في كل مكان تنتقل من مكان لي مكان
تعيسه : " تقول بقلبها شالبلوة الي ابتلييييييت فيها " اقول وسواسي اذا بتفكر جذي ترا مانخلص !! يعني جم مليار من البكتيريا كانو بالطياره و على ارضيه جناطنا و على السير و بالتاكسي و يبناهم الدار نقلناهم ويا جناطنا !! المفروض قبل لا تعقم الكبت عقم الجناط قبل لا يدشون الدار !!
بعدين ترا ماحب هالمصاخه ولا وسواس النظافه خلك طبيعي !!
وسواسي : بلوتج ما شفتي شي ولا تعرفين ولا تدرين شنو الامرا ض الي ممكن تنتقل !!

ايييب بخاخ تعقيم ينظف الكبت و يوم يخلص ارتب هدومي
" لا تنسوووووووووووووووووووون انا في شهر العسل و هذا اول يوم بصل لي "
عقب ما خلص مهمه تعقيم كل مكان و قعدنا و خلصنا و متنا يوع طلبت اكل و هم سوالي قصه على الاكل و الصحون و التعقيم و النظافه ...
جان اقول بقلبي انا ان ماخليتك مينون ما اطلع تعيسه !!
تعيسه : اقول حبيبي .. عادي بتنام يمي و الا بعد بنقلك جراثيم !!
ابخر الدار عقب الاكل .. و اترتب و اسطر ! عروس لا تنسووووون ..
و هالوسواسي يحوس !!
سكر باب الحمام
سكر الستاير
سكر الليتات
الابجورات !!
تعيسه: وسواسي شالظلمه !! قمت قلبي ليش جذي
وتفتح الابجوره الي يمها
وسواسي : سكريها بنام ! منتي نايمه ..
وعدا اليوم على خير طلع يحب ينام بالظلمه !!
اكو ريال ينام بالظلمه !!
اكو ريال حياوي و يستحي ! شالقمته !
عدا اليوم الاول سكتنا
الثاني نص مستحيه
الثالث تعيسه طقت جبدها من هالظلمه !!


تعيسه: اقول وسواسي .. تعرف فيلم سهر الليالي ؟؟
وسواسي : سامع فيه ليش ؟
تعيسه: في واحد اسمه علي ابن الناس الكويسين .. ذكرتني فيه !!
ينام ويا مرته بالظلمه و بهدومه بعد !! بس انت زود عنه حتى لمس ما تلمس و لا تجيسني
عشان مكروباتي ماتنتقل لك !! اشرايك تفكر عدل في الزواج و تعيد النظر ترا المعاشره الزوجيه انا اعتقد انها تنقل ملايين من الجراثيم و البكتيريا ما تشوووف الحريم و الرياييل اييهم التهابات ... فانا انصحك يعني انصحك .. انت بدار وانا بدار عشان حتى الهوا الي انتنفسه ينتقل وماتدري شنو الجراثيم الي في صدري لما اتنفس من هالسوقه و الاماكن العامه الي اروح لها !! تلاقيها تارسه الدار الحين !!
ومع الوقت تعيسه تطفر من وسواسي و بتنبط منه ووسواسي مشكلته ان عند نفسه صح
بدت احلامها تتلاشى
و عرفت ان الزواج واقع مرير جدا من هذا الانسان
ولها خيار يا انها تتأقلم
او انها تنفصل ..
ولكن احد يتطلق بشهر العسل الحين..
وقامت تتحاشاه لان اهان الكثير من انوثتها بسبب الوسواس
و قامت من تشوفه دش الحمام بعد يوم طويل من الرحلات تسوي نفسها نامت
وسواسي: تعيسه .. تعيسه .. نمتي؟
تعيسه تحقره ..
وبقلبها قصه..
ليش نحلم بحياه حلوة اذا الحياه خاشتلنا مصيبه مثل هذا الانسان
ليش نعتقد ان السعاده بشهر العسل اذا هذي اتعس ايام حياتي ..
مافيها مشاكل بس مافيها الاحلام الي حلمت فيها ..
ادور في ملامح وسواسي بقايا رجل حلمت فيه وتمنيته و يكسرني واقع مرض كبير
وبعد 3 ايام
يتقرب مني وسواسي
وتكون الصاعقه ردي له
كلام من مشاعري
وكبريائي المهزوز

تعيسه: وسواسي انا بطلع الصبح او بتأخر في الريوق او اقدر اروح اي مكان وانت تعذر بان عندك شغل وخلك بالفندق و اتصل على الريسبشن يدزون لك وحده ترتاح معاها باسلوب نظيف جدا .. لا تلسمها ولا تكلمها ولا تجيسها ولا اي شي مجرد تواليت تقضي حاجتك فيه .. بعدها قوم تغطا لف نفسك و دش الحمام غسل ساعتين و اربط ملابسك عشان الجراثيم و غسل ايدك حيل و يفضل تحرق هدومك .. عشان تكتمل عمليه التعقيم مثل ماحرقت مشاعري

ينطفئ بريق تعيسه
ترجع من شهر العسل ..
تستمر في الحياه مع وسواسي ..
تحاول تتأقلم معاه مقنعه نفسها ان مو كل العلاقات الزوجيه مبنيه على حب و احلام
وان كل الرياييل فيهم عيوب.. وسواسي احسن من شي ثاني..وانها مع الوقت بتتكيف



Saturday, August 16, 2008

متى بنسى؟؟

نبتعد
و نفترق
و نرووح من بعض حيل
كنت اعتقد اني نسيت
او ان مشاعري تغيرت
و بلحظه يمر الطاري
و يسألوني عنك...
يفز القلب
تدمع العين
اثاريني لي الحين ما نسيت
اداري عنهم عبرتي
اسوي نفسي سليت
بس هذا انا لي الحين
ليش كان عبالي قدركم مو غالي
ليش كان عبالي النسيان سهل
لو سمحتي يما لا تسأليني عن احد
لان الاخبار بتبين من عيوني

Friday, August 15, 2008

يلا يا شطار قولولي شنو هذا؟؟

تحديث الاجابه







يلا يا حباااايبي يا شطار هذا شنو؟؟
شي انا احبه
و اموت عليه
ما نحصله بسهوله كلش ..
يستحسن استخدامه في الويك اند لاني اتعشا عشا ثقيل
و عقب اخذه عشاااااااان ارتاح

شنو هذاااااا
واضحه صورته صح؟؟

خمنووو وياي يا شطار
ولكم لفه :Pp





تحديث
يلا ارد على سؤالي
الاجابه هذا علج لبان اصلي
ههههههههههه
هذي عود شجره لبان
والصوره الاولى الي حاطتها فوق موريتكم العلج واضح
شي انا احبه
انا كلا بجنطتي علج لبان
هذا نادر
لان مو مو من الكويت
ايبونه يا من اليمن او سوريا..
و اليوم الوحيد الي اتعشا فيه يوم الخميس في الزواره
ارررررررررد هلكانه من البلعه
ذابحني الحارج
احطلي علج لبااااان وزعتر تالي..
وينباع بالحبه بعد ..
واللبان تلاقونه ملفوف سبحان الله داخل مثل الصوره الاولى
ههههههههههههههه
محد فيكم فاز

Thursday, August 14, 2008

لا انام


هو : شنو الاغنيه الي تذكرني فيج و كل ما سمعتها اذكرج..؟؟
انا : (جاوبته صح)
هو: والله يا فاطمه من يقول محمد عبده نامت عيوني .. اذكرج
انا : ابتسامه
هو : مع الايام صرتي صج الفجر البعيد !
بس الحين قربتي ... الله جابج


هل يعلمون الان اني لا انام؟

يبدأ يومي الساعه الثانيه فجرا

اتقلب
الساعه 4:19 مسج
اخاف افتحه
صار صوت المسج الفير يسببلي رعب

مسج من البنك!!

خيبه امل كبيره


نامت عيونك
وصحى الليل مظنونك أغاني
قصّت جناح الثواني غيبتك
وصارت الساعة أماني
أنا حروفي في غيابك
لا هي حكي ولا هي قصيد
أكتب الظلمة وأعيد
وإنت يالفجر البعيد .. نامت عيونك

اسكت دائما عند هذا المقطع

قم نادني .. يالله عسى تحتاجني
إن زاد ظلمك ما عدلت
وإن مر ليلي ما سألت

Tuesday, August 12, 2008

و ان كانت خاسره

اردت ان اكتب
فوجدك تحدد مسار سطوري
اخذت الروايه المهمله لاكملها
وجدتك بطلها
مزقتها
لعلي امزق ايامي معك
روحك تخنقني في عتمتي
سوط عتابك يضربني
و انام
اهرب منك بالنوم
احلم بك
مرة
مرتين
و ثلاث
اصحى من نومي
ابدأ يومي
وخيالك يصحو قبلي
يكلمني حتى في استحمامي
اصرخ في وجه طيفك
اذهب
سأبدا من بعدك
و سأبدأ قبلك
انام
و انام بعمق
وعندما اصحو لابدأ يوم جديد
تكون انت يومي
و نومي
و صبحي و امسي
اني ألعن شبحك الذي يطاردني ليل نهار
وان كنت رجلي
فلا اريدك
وان كنت قضيتي
فاني خسرتك
لذا الرجل قضيه بحياتي و ان كانت قضيه خاسره

Monday, August 11, 2008

وااي بموت من الوقاحه !!!

واااااااااااااااااااااااااااااااااااااااااااااااااااااااااااااااي
بنفجر
بنفجر
واااااااااااااااااااااااااااااااااااااااااااااااااااااااااااااااااااااااااااااااااااااااااااااي بنبط من الاعصاااااااااااااااااب
انا شفت نااس وقحه
شفت ناس مجرده من الاخلاق بس ما شفت نفس البنت الي وياي في الدوام !!!!
قليله ادب بشككككككككككككككككككككككككل مو طبيعي
من اهف مني او مني او اغيب يوم او اطلع نص ساعه
ارد الاقيها قاعده بمكتبي ! و مسكره الباب بعد
و طايحتله رضاع بالتلفون بمكتبي !!
للعلم المكتب خاص فيني مو شروكه هاا!!
الي صااااار اليوم الصبح يدق واحد علي يطلبها !!
اقوله نعم منو انتي
يقولي انتي مالج شغل نادي فلانه
اقوله و شكو ما تدق على مكتبها !!
يقولي هذا مكتبها !
اقوله لا اخوي غلطان هذا مكتبي
و ارقعه
الحين رحت شوي البنك و رديت ماوعيت الا الاخت سايحه بالكرسي !!
و يوم دشيت وقفت
وتسولف عطيتها نظره الي يلا سكري التلفون !!
تطالعني بكل بقااااااااااااحه تقولي تبين التلفون !
قلت خلصي بسرعه اي
سكرته قلت لها فلانه مرا ثانيه لا اسمحلج تقعدين في مكتبي و تمدين ايدج على تلفوني
و لا ابي شباب اشكال و الوان يدقون علي !!
عطتني نظره من فوق لي تحت و مشت !!
ششششششششششششششششفتوا وووووووقاااااااااااااااااااااحه اكبر من جذي
تكلم شباب من تلفون دوام بس ما تبي تدبس فيهم تكلمهم من مكتبي بس
الي قهرني ان اقولها خلصي بسرعه
والي على الخط مو راضي يسكره
تعرفون لماوحده تترجى واحد بتسكره و اهو ما يرضى !!
مسسسسسسسسسسسسسسسسسسسسسسسسسسسسسخره
شكو ايبووووووون خياسهم الدوام !!
اشلون اتجرأ اخلي احد في الدوام ممكن ان يلتفت لي بنظره اني اكلم او اييب مزبلتي الدوام
FUUUUUUUUUUUUUUCK

Sunday, August 10, 2008

ما اختلسته انا من الروايه



في البوست الي فات كتبت مقتطفات مختاره دون مناشقتها او كتابه من هو الروائي
لكي انهي البوست بقول ان كل هذه الاختلاسات كانت لـ هاني نقشبندي وهي سيره حياته
استوقفتني الروايه

كثيرة هي ليس بزخم مفرداتها ولكن لقدرتها على ان تجعلني افكر ساعات بعباره واحده كتبت ..
ان تعرف شي للمرة الاولى يجعلك تفكر لماذا لم تعرف هذه الحقيقه من قبل
الروايه تتخلص في ان الظروف الاجتماعيه و البيئيه لها الكثير من السلبيات على الفرد مهما كان سواء انسانه احكمت الابواب اغلاقا عليها ام شااب في سن الثلاثين يعيش في لندن على قدر كبير من المساحات الحرة ...
كلهم حريتهم في تفكيرهم
اترك لكم السطور المختاره من الروايه ....


" الكلمات الجميله مثل المرأه , لا تثق ببقائها في انتظارك ان اهملتها , او تركتها وحيده "

" العنف ليس الضرب بالعصا .. العنف ليس ان تكسر ضلعا أو ضلعين .. العنف الحقيقي ما يجرح الروح لا الجسد .. و اذا كان العظم يجبر بعد الكسر والجرح يلتئم بعد قطع , فان جرح الروح لا يجبر و لا يلتئم"

" نحن نرى أن المرأه ناقصه عقل و دين ..ولكن من قال اننا نحن الرجال مؤمنون وأذكياء ..نحن لسنا أكثر من مجموعه حمير تجيد الكلام "

" لماذا قررت الزواج فجأه !!؟؟ وتخليت عن العزوبيه
اجاب : سأل تلميذ معلمه سقراط أتنصحني بأن اتزوج أم أبقى عازبا ؟
قال سقراط : ستندم في الحالتين يابني !
وفكرت واني قد جربت مرح العزوبيه , فلا ضير ان جربت ندم الزواج "

" اجمل ما سمعت منه تلك الليله تصبحين على خير ! مال الى جنبه الايسر جاعلا ظهره تجاهي
و مرة اخرى تصبحين على خير
أطفأ النور و نام
ما رأى ثيابي
ما اشتم عطري
ما تلمس نهدي
ما اشتم رائحه احتراقي ما رأى الدخان الصاعد من شفتي
ضوء الشموع الذي انطفأ كان اقوى من حضوري
احلام تلك الليله سقطت في لحظه !!
انوثتي عادت الى زنازينها
رغباتي عادت الى قبر الذي اخرجتها منه قبل أوان بعثها
الشموع الثلاث انطفت الى الابد ! اللتان في طرف السرير و انا
!


"الرجال لا يهدون زوجاتهم بلا مناسبه الا عقب احساس بالذنب , او خطأ يكفرون عنه "

" لست أبحث عن لذه جنسيه او معاشرة جسديه , بل الى صديق يستمع الى شكواي"

و اخيرا اهديكم هذه العباره الاخيره منذ فجر امس لم تكف دموعي بسببها ..

" المحروم ليس من تسلبه الحياة والده او والدته , المحروم ليس من لا يملك مالا , المحروم الحقيقي هو من لا يملك حبا , و المحروم أكثر من ذاق الحب ثم انقطع عنه الى الابد "

Saturday, August 09, 2008

اختلاس


ما خفف عني وطئه حر هذا الصيف هو انشغالي او استمتاعي بروايه ذات وزن كبير بمعناها و محتواها
روايه من نوع مختلف
اسمها " اختلاس"
عندي هذي الروايه من سنه و مافكرت افتحها
و من الملل الزايد اخذت اقلبها
فتحت اول صفحه شوي شوي
لقيت اني وصلت الصفحه 150 !!
بدون توقف من روعه الروايه
لان فعلا من زمان ما قريت اسلوب و متعه في الوصف و اسهاب في الحوار
مثل ما لقيته في الروايه
هناك فرق ما بين ان يكتب الرجل بخبرته ومابين فتاه عجبتها قصه و ارادت ان تكتب
كنت دايما افكر في كتابه روايه
و فكره روايتي تختلف تماما ولكن بعدما قرأت هذه الروايه
قلت حق نفسي استريحي !
الاسلوب
والابداع في الكتابه المتمرسه شي لا يوصف عند هذا الكاتب
سأكتب لكم قليل من الاسطر التي استوقفتني
و في البوست الياي راح اكتب لكم مضمون او فكره بسيطه عن الروايه
لاترك لكم الحكم على بعض الاسطر

"فكرت ساره كيف ان الرجال لا يعرفون كم تكره المرأه ان تأتي حريتها من زوج لا يهتم متى تروح او تأتي . اهتمامه يبدأ مع غرائزه مرة في الاسبوع احيانا او مره في الشهر غالبا ..."

" تحب المرأه أن تشعر بحاجه الرجل اليها كما هي حاجتها الى هديه صغيره منه أو كلمه أصغر بكثير , لاسعاده في حياه المرأه تعادل سعادتها بزوج لا يستغنى عنها .لازوج يشتاق اليها لحظات ثم يتركها قطعه محترقه على فراش مبتل "

" المرأه الحقيقيه هي التي تحب ان تتدفأ بحنان رجل أقوى منها ,فتكون له مكملا لا تابعا
لا اقوى من شخصيته ولا ادنى من كرامتها
"

" الوحده هي الشي الوحيد الذي يشعرنا ان وجودنا كان خطأ جنسيا "

" لم يكتشف هشام الا متأخرا ان لندن ليست هي المكان يخفي فيه العشاق اهاتهم . هنا يجتمع الضد بالضد "

" ياله من مجتمع طافح بالتناقض , يسجد فيه الرجال لاجساد النساء في الليل
ثم يرجمون تلك الاجساد ذاتها بلعنات الله في الصباح "

" قلب هشام الرساله في يده و هو يفكر كيف لا يفهم الغرب ما تعنيه المرأه للرجل العربي ؟؟
كيف لا يدرك انها هي الساكنه دوما في عقولنا و عقولنا ساكنه بين افخاذنا "


و من اورع ما شدني

" فما اراه انا الزوجه و الام , ان الخيانه ليست جسدا يخون جسد ! بل تلك نتيجه لا اكثر
الخيانه الحقيقيه تكمن في السبب الذي يدفع الى فعل الخيانه لا الخيانه ذاتها ولا الفعل ذاته
"

و اخير اليوم اختم بوستي بهذي السطور اقرؤها جيدا أيها الازواج!

"كأيه متزوجه في الليالي الطويله , تشتاق المرأه الى مهرجان من التأوهات
اللعنه على زواج محروم من صرخات لذه
ليست كل متزوجه زوجه بالضروره !؟ فرق ان تكون المرأه متزوجه و ان تكون زوجه!!
ان تكون متزوجه فهذه صفه ماهي عليه ..
اما ان تكون زوجه فذاك يعني زوجا و عاطفه و سرير "


و البقيه تأتي

Thursday, August 07, 2008

صييفن اقشششششششر علي !!


كعادتها السنويه لوير لازم في وقت بالصيف اكون بروحي في البيت
و اكون هوم الون !! و اعفس البيت عفيسه
و اصير مرت البواب !!
ليش مرت البواب لان كل ادمي يمر بيتنا عامل صباغ مدري منو لازم يحصله حجوة مني !!
هالسنه بعد ما سافرت امي حملت الرايه من بعدها !!
و طحت مريضه و اعابل باذوني و اسناني
لان الكبر شين و بوادر الشيخوخه بدت تظهر علي
الشي الحلو الي قزر علي هالصيف هو ان شهر رمضان قرب
و حطيت حرتي في الطباخ
و يوم كامل يلف في هالسمبوسه !!
ليش سمبوستنا بس جبن كرافت و فونك !!
مابي ليش احنا مو حالنا حال الاوادم عشر انزاع جبن
قمت مابقى نوع ما شريته !! ويلا تجنيد
خلص السمبوسه
يوم ثاني كبه !
يوم ثالث افخاذ الدايااي
يوم رابع لف دولمه و وحطه بالفريز !!
الاخ طباخنا مو عاجبه لاني كل يوم مكدشته !!
بس انا ما علي منه خيولي
المهم ما يقعد
هذا غير ان قلبت بيتنا دوانيه
يوم بنات خالتي
يوم رفيجاتي
يوم بنات عمي
يوم موفي نايت و قازرة
انزين الشر الي فيني ما هيع !!
شسوي شسوي
يتني رفيجتي تشوف موفي عندي و من يومها اوقظت الشيطان براسي!!
تقولي فطيييييييييم دارج حدها اتزرقين فيها واحد!!
قلت لها عشان مداخل بيتنا مهيه!
ابشرررررج عندي مدخل من الكراج لي داري بروحي بعد
بس انتي سمعتي في المثل الي يقول البنت سنعه مو عشان سنعه
عشاااااان ما لقت احد تصيع وياه هذا انا !!
لوووووووووووول
المهم الخدامه ما سوت شي باطه جبدي خليتها اهي و الصبي يغسلون الكنابل كلهم
!!
خلصوووووو
يوم ينفظون الدور
يوم كبتات
يوم امشي و اطفح الحماماااات بجميع انواع المنظفات و اناديهم يفكرون
قبل امس ارتكبت جريمه في حق نفسي
ولكن ما قلت حق احد عشان محد يزفني !!
دقيت على الي يرشون ملوووووت الصحه
الي يرشون المطابخ ذبحنا النمل
وياريتني ما دقيت
الصبح اعطي امر بان جميع المواعين تطلع من المطبخ عشان يرش المطبخ
ايووووووون الصحه مدري منو هذولا الي بالجريده دقيت عليهم
و يرشوووووووووون
صار باليل
صار من باجر
صار اليوم
ابي الريييييييحه تروووووووووح مارااااااحت !!
لزقت ويا الرطوبه
ياحسرتي
ماني قادره ادش المطبخ تسببت على عمري !!!
الله يعدي هالصيف على خيييييير
بصير فيني شي
بمووووووووووت من الغلقه
اذيييييييييت الخدم !!
صرت عيووووووز بس احن
ربعي الي مسافرين
ماتبون كبه
سمبوسه
اغراض رمضان
اي شي المهم بس اقززززززززززر الوقت
اييييييييييييييييييه
تعبت نفسيااااااااااا صج


*******
مسجات صيفيه
ربعي الي تنقصولي اكله سمج من محلي المفضل في تانون
ثانكيووووووو اذا كليتو انتو جني انا الماكله
((جذااااااااابه الله ياخذكم شوقتوني )) هههههههههه



الغالي الي في ماربيا
الله يخليك مرا ثانيه لا تعطيني رقم حسابك ما اشتغل عند ابوك
سنع جناطك
و اطلب من الكونسرج ميزان و اوزن جناطك و شوف اذا تحتاج هاندباج

حبيبي الغالي
شوفتك ردتلي روحي
يوم كامل و دموعي تطير فرح
بس لي الحين محتره من الحماره الي رازه عمرها !!

شهر اوغست ممكن تعدي على خير
لانك ثقيل و كئيييييب


Tuesday, August 05, 2008

عندما يتخرج السرسري!


من سنه بالظبط نفس هالحزة وصلني مسج خطبه فلان الفلاني
على فلانه الفلانيه ... انا انصدمت
فلان الفلاني هذا اعرفه
ياااااااااااحليله والله خطب يااااااااااا حليله كلش مو لايق عليه
المهم من فتره شفته اهو و مرته يا حليلهم صج لايقين على بعض
اطنز طبعا !!
قولولي ليش فلان الفلاني هذا ما يمثل سين من الناس يمثل شريحه وايد شباب
كويتين ... درس الف سنه برا الكويت
خربط خربط خربط لين قال بس ..ولكن هاااااا خربط ويا امريكيات
اسبانيات واسكوتلانديات خليجيات ولكن مستحيل يقرب يم كويتيه !!
والهدف الستر و عدم الفضيحه
درس بلندن و درس ماستر بمصر عقب
ولان كان من المعارف فانا
كنت ازورهم اقضي النهار مرات عندهم
اتسدح قبل الغدا الاقي سعوود داش ويا وحده !!
بالليل وحده ثانيه
هوووووب هووووووب هذا بقى بنت بالدنيا ما طقت عنده كرت !!!
التلفون ما يطيح من ايده ثانيه !!
من بار لي بار من نايت كلب لي نايت كلب
يفج ريجه الصبح في بيره !!
ويرجع الكويت محاسب قانوني اد الدنيا ولا جنه شي صار برا !!

الي قتلني في الموضوع مو انه بس تزوج وحده وايد سنعه
الي قتلني في الموضوع ان هذي البنت عندها هذا قسيس !!
من الاخلاق و المثل و السنع
الي قتلني ان شباب الكويت يجذبون على نفسهم جذبه و يصدقونها
ويردون الكويت جنه ماكو شي صار برا
ولا يتزوج سنعه
و هالسنعه عبالها ريلها نبيل العوضي!!
جد جد


اهم الي في مثل هذي الحاله راح يتسنعون ؟
وهل وايد بنات تشوف الي تحبه وبتزوجه اسنع ماخلق ربي و عندها قناعه فيه
واهو سرسري !
على هامش النقاش تقول خالتي و الي انا صج صج اؤؤمن في كل كلمه تقولها
امووت غبيه ولا اموت بحرتي
هههههههههه
وتبقى المعادلات في الكويت معفوسه جدا
حتى في مواضيع الزواج
جم وحده عبالها ريلها اسكت ؟
وماكو مثله؟
وجم وحده خبله مثلي تحب التنبر و وهم ما تلحق راس!

Monday, August 04, 2008

عورتني كلمه تعبان ..وعورني اكثر ان راحتي ماوصلت


Love means making the other happy, even from a distance