قمت الصبح وانا احس بالضياع
شي بصير يضيع حسبه هالدنيا في بالي
هو وانا اتفقنا في كل الشي
الا الزمان عيا الزمان لا نتفق
في حسابات المشاعر الرابح اهو الخسران
والخسران اهو الرابح
احساسي بالضياع شعور يخنقه اهو مو انا
لانه متعود على الشقا قلبي
هذي الدنيا لقا و فراق
اصعب مكان تعيش فيه المرأه هو المكان الي ما بين عقل الرجل وقلب العاشق
فقلب العاشق يجرها للحب و ياخذها و يطيرها السما فوق و تعيش بين النجوم
و من ثم يصحوا عقل الرجل و يحدد يوم الفراق لان هذا الحب موؤد
انا فنجان قهوه ووانت صباح بارد
انا اهرب منك بالتهام اكل لم اعي كمه
وانت تهرب مني بدخان
انا صوت عالي وانت همس و حس
انا قلت لهم بشوفك
وانت قلت لهم وحده تنطرني هناك
انا بساعتك تحسبني
قامت
نامت
طلعت
دشت المحاضره
تكلم نفسك للمره المليون
"الحين راح تدزلي ايميل "
تسمك اي فونك
تلاقي مني ايميل
ترد على نفسك بنشوه
"قلت لكم ماراح تخليني " و لو مارديت راح تدزلي ثاني و ثالث
اعرفها حبيبه قلبي ...ماتخليني
انا بمحاضره اعطيهم فيها كلام عن الالم في العمل و قصدي موجع ثاني
اقولهم بدال البوست ..عشر و ملزومين يسمعوني ..
اطلع
الاقيك وراي .!!
اطلع اروح بيتنا و انت مازلت وراي
اسفط
تناديني :ركباي معاي
التفت ..مو جدام بيتنا روح
ترددها مره ثانيه ركباي معاي
اركب
عيوني ترتعش بعيونك ..
"تدرين من سكرته منج اشسويت..؟ رحت المطار و ركبت اول طياره و جيتج
فتحاي الدرج
بوردينج و جواز
بترجع بنفس الطياره ..
اسكر الدرج و بيدي جوازك
عيوني على الشارع
برج جاسم
مطعم
حلاق
كراج
وانت ماسك ايدي و اتكلم
واتكلم
اتصدق اني ما اسمعك شتقول
لان في حسبه الحب الي عندي ما اقدر اسمعك شتقول
طريج مامنه امان
التفت عليك
فلان انا حتى لا غفيت شفتك
انا اسمعك
احسك
اتألم معاك
اتنهد كثرك
احتاج مثلك
فلان انا بعدك يمرضني
امرض من فراقك
انا ماني رقم تتصل عليه وبس
انا صدر يشيل كل الي بيوفك
انت اخترت اني اكون امرأه هالشهر وانا عشان اختار احتاج عمر و اخترتك بيوم !
انا الحب عندي جسر ينبني سنين
نشكي
ونبكي
و في النهايه انتوادع
ارد البيت
تركب طيارتك
اشوفك او ما اشوفك مدري
تدخل بيتك
تشمني بكوتك
واكون انا طلعه تدخني فيها
واتكون انت زقاره احرقتني سنين
الوداع يذبح
لاصار الدمع من الاثنين
قال الوداع ... و تصافحنا و توادعنا ... و كل واحد مننا قلبه على الثاني
سالت دموع الموادع من مدامعنا ... و الكون كله امتلى تعبير و اشجاني ...
انا و حبيب بكينا من مواجعنا .. من غادر حبيبي ابقيت وحداني
دون اللقى مانع الايام يمنعنا ... يا نكبه جاتنا من صرف الازمان
ما احس بالوقت و الايام تخدعنا ... و لنا تبيت شقا و هموم و احزان
الله قادر بعد الفراق يجمعنا ... و نذوق طعم اللقى من بعد حرماني
15 comments:
يعطيج الف عافيه على هالبوست
ابدعتي في ختمتها حق بو عبدالله :)
بانتظار المزيد ..
قلتي ..يوول ليك ات
قريت ..و يمكن سهيت ..قعدت اجمع بالتفاصيل ..احسها متناثرة ..في كل مكان ..اغمض عيوني ..انا ا دري اني اجهل هالبوست ..بس وصل ..رغم غموضه ..فطومة ..البوست صادق لدرجة ما تتصورينها ..قتلج لدرجة انه يعور القلب ..خلصته و هذاي ثالث مرة اقراه ..غمضت عيوني ..قلت كثر ما عورني قلبي على البوست ..عسى ربي يمسح على قلب المودع .. مو سهلة ..بس يكفي تفاصيل اللقى ؟ صح ؟
:*
صباحي و مساي احلى
بحروف صادقة ..تخنق العبرة
************************
الله قادر بعد الفراق يجمعنا ... و نذوق طعم اللقى من بعد حرماني
امــــــين
خوش قصة والله حلوه حلوه وتلخص واقع غريب
اشششششكرج
:)
جان خذيتي جوازه وما خليتيه يسافر
:p
يعطيج العافيه
:)
Lawyer , a7S gLtii 7chi wayed B56ri agOla bs mani 3arfa a3ber 3na ;')
Love LOVE LOVE LOVE kel Klma Ktbteha ;'))))
ااااه
طاري الوداع عندي اييبلي غيمة حزن سوووودا
قصة حلوه،،،، حزينه
):
قال الوداع وقلت ريّع لي شوي
اصبر ترى عمر السعاده ثواني
قال الظروف وقلت عن ظرفها عي
تعال وقف ساعتك في زماني
<3
زين طلعنا من فلونزا الخنازير بشي حلو
:)
بشرينا عن صحتج الحين
؟
أثقل شي بهالدنيا هو الوداع
الله يا ثقله
:(
شلون يحصل اني الاقيك بجزء من البوست
وما الاقيج بالباجي
اعرف هالمشاعر
اعرف ونة القلب هذي
حتى الدمعة عرفتها
ادري جم وحده لحقتها
وجم وحده بتيي عقبها
شلون تكونين بقمة السعادة وتكتبين شي بقمة الحزن
وشلون تكونين توج قبل شوي باجية ومكسوره
وتكتبين شي مليان فرح
منو منا الصج
اي ويه هذا
انا
انتي
اللي انكتب هناك
واللي ينقال هني
محتارة
وبوستج زرع الف سؤال براسي
ماهي قصه
هي واقع فلانه وعلانه
والمؤلم اني اشوف النهايات جدامي
واكون صدر يلم الكل
بس ما يدرون شكثر انا اعيش قصصهم واتأزم عشانها
خربطت صح
وشطيت صحااات
بس بوستج عفسني
شتسوين الحين؟؟
تدرين شنو معور قلبي اكثر شي
حسيت اني ما كنت يمج اليوم
:**
تسامحيني
!!
أااخ بوستج قاتل لأنه حقيقه يتجرعها الكثير من الناس .. أحس بدوخه من كلمات تنفض مشاعر غايرة
حبيبتي صدقي أخيتج الحب يحرق يطير ويسفر ويهاجر فيج ويردج مع دموع وضحكه وضياع
ألقي نفسج اختاري قرار بعقلج جمدي مشاعرج وسمي بالخطوات لمستقبلج جدام راح تبجين وايد وراح تتذكرين مليون مره وراح تقولين شسويت بنفسي بس صدقيني كل هالمشاعر يبقى فيها مستقبل أنت رسمتيه مستقبل مبني على العقل ومع الوقت المشاعر راح اطاوعج راح ترد تحسب دموعها سهرها ونظرة رجل ينطر الدنيا تنفتح له عشان توصلين له بالسهاله بدون مايستذبح ويبي العالم ويقولي هذي الي اخترتها
حبيبتي وأخيتي اختاري فطامي من بين هالدنيا راح تكسبين استقرار مشاعر وهدوء بعد العاصفه حتى لو كانت المشاعر مافيها قوة رجفة القلب ولا نفضة وتعرق ادين ورنة تنسيج العالم بس تبجى مشاعرج يصبرها أنج عزيتي كرامتج وعطيتها أبسط حقوقها الي غيرها والي تمنيتي يكون أهوه الي عطاها ومات عشان يوصل لها هالحق
فطايم أقولج من قلبي فكري بعقلج وحب نفسيج وشوفي مستقبلج حتى لو قسيتي على ذاتج بفتره .. ونبقى طول عمرنا ماراح نرضى بقراراتنا بالكامل فيه من يطيرنا بالسماء وفيه من يخلينا نبتسم للعالم واحنا مستقرينا
الله يكتب لج الي فيه الخير ويسعدج دنيا وآخره .. سلام يالغاليه
ابداع وروعه
تسلمين يا محامية الشعب
بس رجاءا العنوان قول الى فى قلبك
غلط غلط غلط والصحيح
قول اللى فى قلبك
ارجو تصحيح العنوان
خاصة انتى تكتبين باللغه الفصحى ولازم نهتم بالاملاء
شكرا محامية الشعب
على تصحيح العنوان
وهذا يدل على ذوقك
والاخذ باراء الاخرين
وهذا اللى نفتقده فى كثير من الناس
والمشكله انهم على خطأ
وعناد ما يبون يصلحون اخطائهم
لو كل الناس بمثل اخلاقك ومبادئك
جان الدنيا بخير
تحياتى لك ولكل من يتابع ابداعاتك
ذاك اول
الله يعافي الجزيرة الحين
التذاكر ببلاش يقدر يسفرها معاه :)
-----------
سؤال سفسطائي
هل يمكن للمرأة ان لا تكون لزقة
!
جميل ما قرأته في مدونتك
رائعه بمعنى الكلمة
..
كونِ بخير
في إحدى الكتب التي تتحدث عن العلاقات بين الرجل والمرأة ... تقول الكاتبة أن المرأة هي وحدها التي تستطيع تقدير موعد انتهاء الحب وعليه أغلب العلاقات تنتهي من جانب المرأة .
البوست مؤلمُ لتكرار الفراق فيه .. نحن نستوعب الفراق مرة واحدة ونتعامل مع القادم بعده بألم ثم نعتاد عليه ... أما تكراره بهذه الصورة؛ هو إعلان مسبق لشدة الشوق مرة تلو الأخرى ...
من وجهة نظري .. التعبير عن الحب من الطرفين يتم بـ قدر متساوٍ ومتسامح بشكل لا يطغي شعور أحدهم على الآخر أو يسهب في عطائه الودّي ....التوازن مطلوب .. على الأقل يعطي الآخر فرصة التعبير أيضا .. وهذا ما يفسر ردة فعله معها .
فاطمـــة
صباحج كما تحبي وأكثر ...
دمتِ لمن تحبي
روميه
Post a Comment