هذيان قبل النوم

مطر امس كان قاتل غسل قلبي و مسح عليه
عسى الله يغسل قلوبكم و يمليها بالفرح
لابتوبي وصل اخيرا من الورشه
فقعدت اعيد و ازيد في البرامج بس مليت الحين خلاص
و انا انزل لقيت صور لندن
من قبل 3 اسابيع تقريبا كنت في لندن كانت رحله سريعه و جميله في نفس الوقت

اول ما وصلت كنت احن وايد على ان اول شي اسويه اروح دار الساقي

بس ما مدانا فرحت من باجر و دشيت خمطت اشكثر كتب و روايات

الي اعتقد ان نص الوزن كان كتب

ابيه انا هالايام عايشه مع كتبي

حياتي كلها العصاري و بالليل مجابله الكتب و لا راضيه تخلص

اروع لحظات حياتي تلك الاوقات الي اتسحب فيها من امي و انزوي في داري افتح كتابي و اعيش جو القراءه

احس بعدها بهدوء و راحه

الحياه جدا جميله مع كتاب و اولونج تي

..

بعد لندن رحت برشلونه

(( ماراح اتكلم عنها الحين عشان ما يخترب المود))

الي عرفته خلال هذي السفره حقيقه وحده

الله يخلي لي ديرتي بس لازم لازم اشتري عقار بره الكويت

لاني احب الخضرا و البريدات

و ابي بيت في الجبل و ابي فيه فيو و حديقه اشكبرها

و ابي بقر

اي اي اي ابي بقر و ابي صخيلات

و ابي حديقه

و ابي اعيش الدنيا ريلاكس

فيني نقص من نظام بيوت الكويت

الي انعدم من الحوش و البيوت المسكره

فيني نفاهه

في السفر مجابله السكوير و اشرب قهوتي الصبح و اتنطع في خضار ديرتهم

ليش في السفر اذا من فير الله تمشينا نشم ريحه الخضرا و الندى و الضباب و المطر

و في الكويت اذا طلعنا الصبح نشم ريحه بيض و حمسات؟؟

و اذا صار الضحى و الظهر نشم ريحه طباخ

و بالليل ما يصير نفج الدرايش يكشفونا الي برا !!

و تاليتها يعني

...

رساله الى اي شخص عايش او موجود الحين في لندن

انكم اذا صار الساعه 7 الصبح

تاخذون باص 15 و تنزلون عند النهر و تتمشون و تاخذون قهوتكم

وتجابلون لندن بريدج

و اتثوبولي

نداء اخير لاصحاب القلوب الرحيمه

لو سمحتوا ابي الميموري كارد مال الكاميرا بنزل باجي صور لندن

و بس بروح انام

تصبحون على خير

........

حرضتني لندن على كتابه هذه القصه

كتبتها و رميتها في ارشيفي

وستكون قريبا في مدونتي

Grosvenor House
فندق الحب
فندق الخطايا
ومن منا عاش حب بلا خطيئه

خطابات في دوامنا لوووول

دوامنا الخطابات فيه اكثر من الموظفات
شي شي عجيب نماين
خطابه توزع كروت
و خطابه اتيكم كاشخه بتايير و عبات جنها رايحه عزا
لاااا و الضحك يعني منخشه في نظاره شمسيه
المهم صار اليوم موقف لا يحسد عليه
ابيه ترا شباب الكويت مساكين
انزين الي ما يبي يحب و لا يبي يتعرف يبي زواج عادي شسوي؟؟
لازم ينقرد ويا الخطايات؟؟
اعوذ بالله
ترا انا اهني مو قاعد اذمهم بس ترا صج في الكويت الخطابه شغله نصب
اليوم انا شفت فيلم فيلم
صبحت الصبح في مكتبي على الساعه 9 جذي الا وحده تحوس واتدور مظيعه
مدري ليش انا شكلي بالويه فكلا ايوون عندي
الخطابه: اقول اختي اتعرفين فلانه الفلاني
انا : اي
الخطابه : وين مكتبها
ودليتها المكتب
شوي والا الخطابه راده
و مستانسه و الويه يضحك شكلها يازتلها
ردت اتشكر مني و تسألني انتي متزوجه ؟؟
انا : وعنديييييييييييييي عيااااااااااااااااااال بعد الله يخليهم لي

سلمت و راحت
بعد ساعه او يمكن اكثر
ردت الخطابه وياهااا مرة ثانيه و طاايره هههههههههه داله الطريج
يتني ضحكه وهم فيني بلاغه الشف
سويت نفسي بدش على المدير و بروح اطمش
يوووووووم رحت والا انصدم
الخطابه و يا المره واقفين جنهم رقيه و سبيجه يخزون بس مايعرفون
لان مجابلين البنت
والمره الثانيه تأشر حق وااحد و تروح
فشي طبيعي ان هذي الخطابه يايه ويا الام و الولد
والام يعني جاكه الحركه بتشوفها وادلي ولدهاا
ماوعيييييييت الا الخطابه يتني طايره
انحشششششششششت دشيت مكتبي

الخطابه : اشلونج بنيتي
شفنا رفيجتج الي قلتي عنها والله اشحلوها اتهبل
انا : علاااااااامه استفهااااام و 600000 تعجب!!
((رفييييييييييجتي )) انااااااا
والخطابه اسمعها بصوت واطي اتصفصف حجي حق الام ان البنت سنعه و تهبل و خوش بنت و الكل يمدح فيها
وانها سألتني اناااااااا و مدحت فيها لين قلت بسسسسسس!!!
الحين انا متى مدحت !! متى عرررررررررفتج اصلا واااااااااااااااااي جذاابه

الشهد لله ام الولد ما فجت حلجها شكلها مدبسه في الخطابه
وشكلها اول مره اتيييي اتشوف بنت في الدوام .. و شكلها وايد كلاس مدري اشلون حاطه حق ولدها خطابه
يتني ام الولد تسلم و تتشكر !! على شي انا ما سويته
و طلبت مني اني انادي البنت يشوفونها ويكلومنها
اعتذرت لها ان ما اقدر لان مالي شغل في شغلها بس
اقدر ادبر طريقه ..
قلت لها خالتي انا ماعندي بين هذا القسم اي شغل مشترك
وانا اصلا قسمي ماعندي ولا مره ولا شغل مع حريم يعني مشكوفه السالفه
بس هل المهم عندكم انتو تكلمونها او الولد يشوف ؟؟
الخطابه الملقوفه : لاااااا احنا مهم
الام السنعه : لا المهم ولدي
قلت لهم خلاص خل يتفضل الولد يقعد و انتو خلكم بره بس بعيد عشان محد يحس
مسكييييييين دش الولد سلم
مسسسسسسسسسسسسسسسسستحي و منحرررررررررررررررررررج
و مبتلششششش في هالي يايبتهم
الريال قعد وانا استأذنت اني بروح اسوي شغله دقيقه و ارد
رحت داخل و اتصلت على مسؤله البنت لاني امون عليها قلت لها فلانه انا ما امووووووووون على الي عندج بس بليز انا عندي واحد بشوفها قوليلها اتييب ملف و اتيني بس شوفيها خترتب روحها و اتييييي

و بدش مكتبي الحين بدق عليج اطلبها جنج ما تدرين

اشتتتتتتتتتتتتتتتتتتتتتتتتغلت خطابه اخر عمري !!!!

رجعت المكتب و بكل رسميه دقيت على رفيجتي قلت لها ابي الملف الفلاني ياريت تدزينه لي ويا فلانه الفلاني
دقيقتين والا الاخت يااااايه ماده البوووووووووز
و عاقده النونه
البنت: استااااااذه انتي طالبه القرارات !!
انا : هلا فلانه اشلوونج ؟؟ وانا مبتسسسسمه جوود الاخت تبتسسسسم
ماكو فايده ... اي انا طالبتهم عشان اقارنهم .. (( كلامي ماله معنى ابدا ))
البنت معصبه حطتهم و راااااااااحت و اهي طالعه عطتني نظره و قالت : اذا خلصتوا خلي احد يردهم
و مشت !!!!!!!!!!!

تشكر الولد بكل ادب و قام
و يت الام تتشكر و الخطابه مستانسه و مدحت في البنت
و الولد كلش البنت ماعجبته لا شكلا و لا اسلوبااااا و عقد النونه على امه الفقيره و مشى راح دوامه على قولته مستعيل ههههههههههههههه
و قاموا يتناقشون عندي الام و الخطابه .. هههههههههه
وراحواا
ما سكت ولاخليت في قلبي
رحت حق البنت و يوم شافتني مدت البوز و رحت يمها قلت لها فلانه مشكوره على الفايل انا مابي منه شي
انا بس اببج انتي تيين لان الي كان عندي بشوفج ذاكرينج له و مادحينج و ياي الدوام يشوفج و كنت بسولف وياج و اهو يسولف عشان تاخذين و تعطين احسن عرفتي و عطيتها ظهري و مشيت

ابيييييييييه لا تشوفون ويه البنت
مصدوووووووووومه
وحدهاااااااااااا متحسسسسسسسفه
و عرفتوا الي فجأه بثانيه وحده عطتني وووووووووووويه البراءه
و التمسكن

ترا صج سوالف ووهقه سالفه
الشوفه في الدوام

يالله خنروح اكمل شغلي ويا هاللويه
بس صصصج سولي جووووووو

ثلثت وغدا الشر

يوم الحواث العالمي امس

سبحان الله انا ما كنت اصدق مقوله ثلثت و غدا الشر الا امس

بالدوام و انا قاعده و الا فجاه ينفجر الواير الي تحت ريلي زين ما صااار فيني شي

ابيه صج الله عداني الشر شكل الشرار يخرع و الواير المحترق يمااا

عمى بعينه من واير صرعني اشوه في جهاز الفاكس مو فيني

رديت البيت الظهر و يت تتغدا عندي صديقتي

توها مسكينه داشه و الخدامه تحط غدانا و رفيجتي تطلع من جنطتها جيس كلا ادويه فيتامين و حديد و ملوت بشره و شعر

وامدحتلي دوا مال الشعر و الاظافر .. يوم كلت جان تعطيني .. بعد دقيقتين من كليت الحبه

الا معدتي تحرقني تذبحني تعورني حيل

شوي شوي يزيد الالم

اشرب ماي بارد اشرب و رحت قلت لها يالله قوماي اكلاي

الفشله البنت راده من الدوام و تعبانه و نكدت عليها غداها ..

احاول اقوم ماني قادره

الالم يزيد و اول مرا ايني ألم بطن و معده الي اصرخ من قمه راسي

و فجأه الجسم كله ينمل يعور التنمل و اهي تصرخ براطمج زرق براطمج زرق

ركضت الحمام و بعد قلبي اهي وراي و عزكم الله .. استفرغ المعده كلها

ابي شوي و الا انا طايحه و اسمعها تصرخ و بتنادي امي و انا اقولها لألألأ امي تخاف

امي تخااف لا تنايدنها و يزيد الالم ماوعيت الا هذي الي تصرخ و شالتني و دخلتني الدار

قصييت عليها قلت لها خفيت و اانا بموت بس مابي اخرعهااا

و اقولها قومي ييباي اكلج و لا رضت و يزيد الالم و مابي اروح الطبيب

شقوله شمغبره بروحي متليقفه و ماكله الدوا

يالله على الساعه 5 هديت شوي و مسكينه نكدت عليها الغداا

اول مرا ايني شعور الي فجأه ألم يذبح و تنمل و خدوور ما احس في شي و رقعه مو طبيعيه

ابي يوم صحيت شوي اقولها واي بلحظه الانساااان جذي ممكن يروح !!

بلحظه بني ادم ينهد جذي سبحان الله ..

بس شي مو طبيعي صج لعبت في عمري و قعدت تسببت على عمري

يوم صار بالليل قالت امي الا تغيرين جو عقب الي صارلج امشي نقعد عند خالتج

وكنت حدي ما ابي بس مابي اضيق خلقها

توني داشه وقاعده ادش الخدامه في مطاره الشاي و حدها شوقتني ييت اصبلي و حاطه القفشه بوسط الاستكانه

و اصب و الا تنبط الاستكانه بوسط ايدي و تحترق و اصرخ يما يما يما و امي تبريدت لا اهي و لا خالتي اقدروا تشنجوا في مكانهم

وااي مأسااااااااات الحرااااااااق اصابعي حدها تعورني

اشوه دهنتهم في ستين شي بس ستيل وايد وايد يعوروووون و الاستكانه مالقت الا تنبط في ايدي !!!

وانا ما يتني الفطانه كلش اني احذفها

مسكينه امي قامت تصيح

وعفست عليها الطلعه

بس اشوه عدت السالفه على خير

و على قوله القايل ثلثت و غدا الشر

ابيييييييه دوامي اليوم مو صج مو صج
صرخت على المندوب
سكرت الباب
طلبت قهوه تركيه و قلت حق المصري ما ابي احد يدش علي
لا ادخلون احد
و قولولهم مابي استقبل احد
ترا مو كل مره الواحد له خلق
جد جد جد
بطططططططططططططططططططططططططططططططططلع من طوووووووووووووووري
ابيييييييييييييه اغبيااااااااااااااء المصرييييييييين اغبااااااااااااااااااااااااء

واااااااااااااااااااااي

ابي اطلع من الدوام و بنحاش من الي هني
و ابي يومين ما اداوم فيهم

دقيت على ابووووي و هددته باني برفع عليييييييييييييييه الف قضيه اذا ما فتتتتتتتتتتتح التكييف
وربي بموووووووووووت من الحر
مو حاله هذي
داري جنهااااااا حوش عزوبي
كل شوي ارشش مااااااي عشان تصير بارده
ببجيييييييييي
و برد البيت انام الظهر
ياويله يا سواد ليله الي يطق علي الباب
و ياويله يا سواد ليله الي يدق علي تلفون
و ياويله يا سواد ليله الي يفج علي بااااااااااااااااااااااب الممر

بنااااااااااااااااام
و بطق هالمصري الي طق علي الباب و اانا قايلتله لا يدش

احتاج اطق تذكرتي و اروح دبي يومين

اسكن في القصر و اسكر جهازي و اعيش على الروم سيرفس و لا اطلع من الدار

بس انا بروحي ويا البلعه و اي اكل ايس كريم كثر ما اقدر و لا امتن

اذا ماسافرت بروح اوتيل المارينا باخذ غرفه على البحر

بجابل البحر و بسكت

بتأمممممممممممممممل

هذي اغنيه سمعتها الصبح عجيبه

بتغييييير المود

دويتو نوال و رويشد اتينن

حتى جمال العمر عند نفسه وطني

تحديث

قبل ما كنا نسولف عن الانتخابات وايد
لانه المفروض بين فتره و فتره
لكن الحين لألأ صارت الانتخابات كروز ..
السنه الي فاتت كروز 2008
هالسنه كروز 2009 !!

و احنا نبتلش في التخلف الي نشوفه وعدم التوعيه
البلوة يا ناس مو في الانتخابات
البلوة ان كل من يعتقد ان يحب الكويت
جمال العمر لما يرشي و يرتشي كان يعتقد انه وطني لانه اخذ و شرا لمصلحه الكويت
عشان يمشي البلد
و علي الخلف لما يحول نص اهله من الجهراء لي الخالديه ما كان في نظره تلاعب كان يعتقد انه هالشي وطني
وانه بزيد كفه الناس الي تخليه يفوز عشان يصير نائب خدمات لانه يحب الكويت
و منظور هذول هالناس ان دام الشيوخ تحبني
و تبخني
و تعطيني سيوله عشان اوقف و اوزع على خلق الله
فشي طبيعي اني وطني ..
لما المرشح يكون معارض لكل صور البوق والحرمنه و الطرق غير السويه للوصول للمقعد
هذا في منظوره انه يحب وطنه و يحب الكويت

لما البدوي يوقف مع ولد عمه ويقدمله خدمات و يستفيد من الكويت و يشفطون البلد شفاط
هم هذولا عند نفسهم وطنين..
مثل ما الحريتي يوم سمع في الاستقاله قبل لا يقدمها
وظف له في هذاك اليوم 15 واحد غير العشرين الي كان موظفهم في اليوم الي قبله
و لما ديوان الخدمه المدنيه يرشح موظفين و يجحتهم الوزير و يقول غير صالحين للعمل عشان يوظف عيال عمه
هذا عند نفسه وطني لانه اهو فاج بابه للناس و اهو زير فهذا قاعد يخدم البلد


المشكله ان الكل في مفهومه الخاطئ يعتقد انه يحب الكويت
و انه وطني و انه يعمل من اجل الكويت و الكل عند نفسه صح

لكن الدور و الباجي علينا الحين
هل نصدق اجذوبهم؟؟
و هل احنا مقصه
و لي متى ؟؟
في ظل هذي الظروف الصعبه شغلوا مخكم يا ناس
منو بتعطون؟
الاسلامي الي يتكلم عن الامانه و اهو يسحب من تحت الطاوله؟
والا الي شارينه الشيوخ و حاطينه في مخباتهم و يدفعون له بدال الالف مليون
والا الليبرالي الي كلا معارض و بس على الزين و الشين معارض
والا البدوي الي لو شنو ماراح يخلي القبلي الي مثله
والا التاجر المناجر الي من يصرخ يدفعون له و يسكتونه

لا تخلون الديره ظايعه بالطوشه معاكم
وتعلموا تفكرون صح
وتعرفون منو بتعطون ..

قالت لي وحده من رفيجاتي

انها قرت خوش مقاله في الشرق الاوسط امس

و رحت اقراها حبيت حبيت انكم تقرونها

لانها عجيبه

احنا مو بس نحقق الديمقراطيه في بلدنا احنا اكبر مثال لدول الخليج

الانطلاقه منا و البدايه من الكويت

الكويت وش صاير

سؤال حارني

ها يالكويتين بتردون تعطون نفس الناس الي عطيتوهم؟؟

بتردون تعفسون الديره مرا ثانيه

و هذا فيصل المسلم الي فاز باكتساح ! على شنو

هاا يالامته بتردون الكره مرا ثانيه !!

اعضاء التأزيم و ربع الطبطبائي و حدس مالت عليهم هم بتردون تعطونهم !!

الي يشوف حرقه الكويتين من يومين و حالتهم

يقول ناس صج بتغير و تبي التغيير

بس سوري يالكويتين انتو ماتبون تغيروون !!

بقولكم شغله

ترا اسوء فتره عاشتها اوربا

ايام البابا و السيطره الدينيه

بليز بسنا تخلف

على الهامش

حق الي يبي يضحك

صكت هوشه بين العمير

و الشايجي على موقع المقر !!

العمير يقول هذي ارضي

كل سنه انا اهني

و الشايجي يقوله هذي ارض الدوله

وانت كنت العام

مو هالسنه

يقوله العمير ليش تكلمني جذي انا زميلك

يقوله الشايجي كنت زميلي !!

وانا اقولكم مالت عليكم انتوا الاثنين

ياللي انتمائكم ابدا مو وطني ولكن انت لاحياء التراث الي رزتك

وانت حق حدس الي غرقت بالملايين

انا انسانه طبيعيه ..

توني وانا اعلق عليكم تذكرت شغله اني انطر مكالمه من الشركه
عشان يقولون لي شنو العله الي في لابتوبي
اتفاجئ وللمره الثالثه !!!!
ان السبب !! الماذر بورد
ابييييييييه ماذر بورد مرا عاشره ليش!!
وبنطر اسبوعين
و على ما يطلبونه و على ما يوصل !!
كلش مالي خلق شي يعسرني بروحي متعسره من امس
ابيه على طاري امس
انا انسانه يمكن مو وايد حساسه
ممممممممم
لا وايد حساسه
لألألألأ
صبر اشرح عدل

انا ماعندي شعور واحساس ابدا و اطلاقا مع الناس العاديين
فيشوفوني الناس اني طبيعيه

و حساسه جدا جدا جدا بطريقه مو طبيعيه
مع الناس القراب حيل مني والي احبهم
ولاني اذا حبيت احب وايد و اسوي وايد فاتوقع ان اكو مقابل
واذا كان اكو مقابل بس هذا المقابل عكس تصوراتي ازعل
يعني انا مو دلوعه بس امس كنت اعسر مخلوق في الدنيا
و سويت جنازه محد عارف شنو فيني
و جرحت مشاعر اقرب الناس لي و الي كلهم كانو المفروض يكونون سبب في سعادتي
بدال ما اشكرهم عكننت عليهم

ياربي انا انسانه طبيعيه
وانا امس كنت متعسره
من الطبيعي اني لما اتعسر و يضيق خلقي بكون خارج حدود العقل و المنطق

غير اهلي
اقرب الناس لي شخصين..
شخص الله ابتلاني و خذاه مني
و انا مؤمنه في قضاء الله و قدره و كان امس اول مناسبه تمر بدونه
فكانت الدنيا سوده جدا من قبل شهر و كنت اكره هذا اليوم ايي مو عشان الكبر و الخرابيط
لألأ بس لاني ما ابي هاليوم ايني يذكرني في السنه الي فاتت ..
وشخص ثاني كان من المتوقع جدا و كالعاده ان نكون ويا بعض او في الاحرى انا كنت ابي اكون معاه اهو فقط ...
و عشان انا انسانه ماعندي خرابيط ان يوم ميلادي و لازم يدقون فانا من الصبح دقيت.. و محد رد
صار بعد ساعه دقيت محد رد
شوي و الا داقين علي بوصلون لي هديه للبيت .. من هذا الشخص و حدي استانست
فدقييييييت للمره الثالثه هم محد رد
فعادي
سويت شغلي و طلعت صارت الساعه 3
مو شي طبيعي ان الساعه 3 ومادق !
المهم اتصلت و حدي مشتطه
اندقرت ان هذا الشخص طالع من الصبح و لويه ومعاه ناس و طالع و عفسه
واهو اقرب الناس و ماقالي كل عام وانتي بخير و لو في مسج و لا حتى رد علي
قلت له اوكيه اخليك..
بس انا مندقره
و لا شعوريا دموعي تصب
دزيت مسج .. شدعوه فلان انا يور فريند ليش ماتقولي كل عام وانت بخير ولا اتصلت علي
يتني مسج ..
لازم ندق يعني دزينالج احد !!

بين اي اثنين حيل حيل حيل قرااااااب
تكون هذي المسج تضحك و حدها عاديه و بين اي اثينين وايد ميانه حيل على بعض و اخوان او خوات
انها مسج طبيعيه
بس لاني اصلا امس كنت غير قابله لاي تصرف او كلمه ولاني مدقوره و مجروحه وايد
ولاني صج حسيت الدنيا مافيها خير ..
عصبت و انفجرت بالتلفون وصرخت و تهاوشت
بس كنت مو في وعيي من الي فيني
دقيت على الي بوصلون الهدايا وصرخت عليهم واهما مالهم ذمب
و قلت لهم انا مو قابله الهديه ولابي شي ولا بي من احد شي
و هم في قلبي حره
دقيت عليه و طلعت الانفجار الي في قلبي كله
للمره الالف اقول اني ادميه طبيعيه فيني حره
فيني غضب
فيني الف و ستميه عله و فجرتها في المكان الغلط
ونادر ما انفجر جدام الناس لاني ما اعرف انفجر مع الناس الي حواليني حاليا
ففيني غضب مو عارفه اوديه وين..

و لاني صديقي وايد انسان من الداخل
ووايد يفهمني ووايد انا ادري اني شي كبير عنده بس اهو امس مصدوم انه اهو في هذا الحجم عندي
طيب خاطري في هديه روعه .. وصلتني بالليل متأخر مع السواق
بس لاني كنت صج في بقايا انهياري
ظليت طول الليل اصيح ولا قدرت حتى اتشكر على الهديه
ووديتها حق امي تشوفها
و تقولي ليش تبجين
قلت لها يما مابي شي مادي
مابي هديه مع سايق تتوصل و تنقط
ولا ابي فليبيني يدق يقولي هابي بيثرداي
يما تعبت من التعامل المادي بين الناس
يما كانت احلى هديه راح توصلني من هذا الانسان
لو انه داق و قايلي اشدعوه فطيم ماصار الا العافيه ماكو شي يستاهل انج تبجين
وكلمتين طيبه خاطر لو في مسج

انا ادري اني انسانه طبيعيه
لي وقت اكون وايد زينه
ووقت انفجر
والحمدلله لي ناس تتحملني اذا انفجرت

اعتذر لكل انسان انفجرت عليه دون قصد امس
اعتذر لنفسي اني خربت عليها هاليوم
اعتذر لربعي الي مو مطلوب منكم تفهموني ولا ملزومين انكم تتحملوني
بس هذا تسونه كله من طيبكم



انا انسانه طبيعيه

بس انفجرت

قالها الخرافي حقي اليوم ..كل عام وانتم بخير

يعني مو وقته الصراحه خلو الناس تستانس

قمت اليوم الصبح و الا خوش مسجات
اشوه في احد ذاكرني !!
ابوي قاعد بالصاله و يسمع الاخبار
و يعطيني موشح الصباح عن الحليب و العسل
و اني اروح الدوام متأخر
قبل لا اطلع ..
انا : يبا يبا ترا اليوم عيد ميلادي ..
ابوي: بحلون مجلس الامه نزلاي انتخابات رشحاي نفسج!!
خوووووووش فال من الصبح يعني صرتاي عيوز !
ييت دوامي و الا خالي يتصل علي من الصبح يقولي
ان سوالي الموعد مع الدكتور و اقدر اروح الحين الرازي اراجع
بس ضااااااااق خلقي مابي اروح اعالج ظهري في يوم عيد ميلادي الثلاثين
و فقرات و تمصع و ديسك و خرابيط !!
يكفي الي كنت اعانيه طول الشهر الفات
مابي
عيوز اي بس ماني داشه الرازي النهرظه

اليوم عيد ميلادي و الناس لاهيه و يا الاستقاله و العافور السياسي
وجنه محد متفرغلي


اقووووول ربعي
العمر ثلاثين
و الجسد سكراااااب
بس القلب شباااااااب
وترفع الجلسه

كل عام و انتم بخير

قالها الخرافي ترا بس عشاني اليوم

اوسكارهم و خلاجين لبنان

لما اتابع حفله الاوسكار اكثر ما يبهرني دقه اختيار اللجنه من تفاصيل جدا مبهره
تخليني بعد كل حفله ارد اشوف الافلام المرشحه لمتابعه تلك التفاصل
واكثر شي احبه في الاوسكار
الرد كاربت واحب جدا ان اتابع شكل الفنانات و متابعه ازيائهم و تسريحاتهم
و كل تفاصيل اللوك الجميل
واجمل ما يميز فنانات الرد كاربت في هوليود انهم يظهرون بشكل جدا جميل
يبهرنا و على كثر جمالهم على كثر بساطتهم في الجمال و الشكل
بعكس فناناتنا وخصوصا هالسنه
امسك الريموت اقلب المحطات اتابع حفلات ليالي فبراير
انبهر في وحش طلع على الشاشه
اسمي بسمالله الرحمن الرحيم و اكتشف انها احلام!!
لفت الجسم بطاقه خام ترصصت فيه بشكل مؤرف
و مقطت الويه و تفخت الشفايف
وطيرت الحواجب
مو بس احلام
وايد فنانات عربيات و لبنانيات ..
السنين الي فاتت كنا ننطر حفلات هلا فبراير و غيرها من الحفلات عشان نشوف شكل نوال الزغبي
ونجوى كرم و لوك اليسا و نانسي عجرم و ملابسهم و مجوهراتهم
ولكن للاسف الان انتفى الجمال منهم
ومابقى الا بواقي عمليات تجميل .. و تسريحات شعر داثره ..

الصراحه مو مدحا في بنات الكويت ولكن لو دخلنا الان عرس راقي من اعراس الكويت
نلاقي بناتنا ينافسون فنانات الرد كاربت في حفلات الاوسكار

والا الفنانات العربيات راحت عليهم

حبي الاول و الاخير

جنون احسااااس حياج تعالي سيراااي علي و جابلي القواري

شكرا دين اند ديلوكا

my wish list




وبعدين يعني وبعدين !

!اشتاليتها؟؟

ماصااااااااار حب هذا

في ناس اتحب ابلاش وفي ناس مقاريد يحبون بس حبهم يخسر

و كلا مفلسين للعلم فقط انا طول السنه مفلسه في حب او بدون حب
المهم

عشقي و حبي انا غير الناس

يعني الوحده بايره في عمري المفروض تذلف تحبلها واحد

امااااا انا كلاااااااااو لألأ و فلاااااا

انقردت و منو حبيت؟؟

مطابخ

اماااااااااعيييييييين كفرااااااااات

كوابااااااااااستكاناااااااات

مطاطير خماجيرمفارش
واي شي يخلي الادمي 24 ساعه مفلس

يعني خلوني اقولكم القصه من البدايه انا من صصصصصصصصصقرتي وانا احب ااطبخ و احب كل السوالف الي متعلقه في البيت المهم من اكثر من سنه رفيجتي ما سوت فيني خير و قالتلي فطييييم عندج قناه فتافيت؟؟قلت لها لألأ بس من اسمها مايازتلي

وحطيت هالفتافيت من سنه ونص تقريبا و جابلتهاااااااا وادمااااان للعلم فقط متنت 8 كيلو خلال سنه

فقط لاني بس اطبخ ولما اطبخ ما القي احد يبلع ويااااااي فاتحسف على الاكل و ازرطه اناااااا عشان ابووي ما يزفني

الحين يوم انا حبيت فتافيت حسيت ما اقدر اطبخ في مطبخنااااااموكشخه مثلهم رحت طريييييييت مطبخنا الي فوق

وسنعته ورحت هذا مطاااابخ الرياض صممتلي مطبخ جنه صج جان يقولي بحدود 2000 طلعت و من يومهم ما طبيت من ويييييييينلي 2000 المهم الحين مايااااازلي الخلاط مالناااااااولا جدووووورنا رحت فجيت مخزن امي و طلعت ست جدوووووراذتني شهر و اهي تسب و تدعي فيني مستخدمه جدورها من ايطالياااااااا!!!
سألت امي الجدور من متى شاريتهم اكتشفت انهم مو من ايطاليا
بس الجدور ايطاليه !! و يدتي شاريتهم لها من 25 سنه!!اولااااا اولااااااااجان اتهاوش وياها كالعاده و اقولها يما انا بنتج الوحيده ووريييييثتج الوحيده

بسيييييييي ورث بسي ورررررررررث

كل هذا مردي انا باخذه فلا تعورين راسنا استخدمهم و ادعيلج الحين

ابررررررررك من اني استخدمهم بعدين و اقووووووووووول واي مابقيناااااااااا

المهم رحت كينوود ابي خلاط طلع في 300 دينار
وليييييين شالبلششششششه
جان اهون باخذ هذا كيتشن ايد

المهمممممم

شريييييييييت نص كتب امازون ملوووووووت الطبخ

اطبخ و اوزع على خدامتنااااااااو طباخناااااا
هذاك اليوم سويت اكله لذيذه جداا بس حسيت ان اخوي الصغير 3 ايام نام عقب الاكله
والا المفروض انا احط رشه جوز الطيب
لانه مخدرااااااااات جوز الطيب انا بااشره جوزتين طيب

و هذا شكله تسمم و نااااااااااام

وعادي اتهاوش ويا مركز سلطان ليش ما ايبون الصوص الي ابيه

الحين تطورت من الطبخااااات ومن تغيير المطبخ ومن مابقى شي و تولز بالمطبخ ما شريته

لي ادوووووووور اطقم مواعين ماركااااااااات بخاطري طقم طلع ب 3000 دينار تقريبا قلت انشاء الله اذا خذيت

فزاااااااع عادي بمهري اشتريييييييه واي شالبلششششه شالقراده
توني راده من السفر ايدي اليمين فيها مواعين و اليسااااااار فيها كوابه اخااااف يتكسرووووون الحين مواعين و عندي و مطبخ و عندي هبيت في كل شي بسرررررررررعه فكروا ويااااااي شنو اسوي

ابي شي يديد او هبه يديده

اي نسيييييييييييييييييت اقولكم هابه بعد بغير الصاله و الدووووووووور بشتري صبغ من رالف لورين و لورا اشلي و قاعد اكسر حساباتي على الوول بيبر شوي صلخ بس ميخااااااالف الحين اذا سويت كل هذا الشهر الياي اشيبقاااااااااااا عندي كل الهبااااات خلصتهم شسوي بعمري؟؟

فكرووووو وياي لان هواياااااااتي انا كلها مخاسير

ملاحظه طقم الجدور الي فوق سعره مع التوصيل لي الكويت 3000 دولار
للعلم فقط عشان الي وده يعطيني هديه و بالمره يبولي المطبخ من مطابخ الرياض و

على الماشي سوولي برنامج مثل مارثا بقلدهاا

اووه نسيت نوف متى بتشترين لي ارض الخالديه

ترا الاراضي طايحه هالايام

:DDDDDDD

ألم .. فراق .. وله..

في عز حبنا و مجارات متعنا في الدنيا
مع احبابنا و اهلنا و اصحابنا
نعتقد ان الدنيا مطوله و انها مستمره على وتيره وحده معانا
ونعتقد بجهل منا ان الدنيا خلفت لنا الفرح
وفي ساعه غفله منا
نبتلى بفقد حبيب
صاحب
خليل
او احد من اهلنا
نكون فعلا في غفله و غفله كبيره
قبل يومين تهتر صديقتي على فقد واحد من زملائها وياها في الدوام
مصري الجنسيه
خفيف طينه
الدنيا كلها تحبه
حتى انا الي ماشفته الا مره وحده من كلامها حبيته
الصبح في الدوام بينهم
يتعب من ألم في راسه
يغيب يوم و يدخل المستشفى
يتفاجئون ان مرتفع ظغطه و اكل بندول ادى الى انفجار 4 شرايين في الراس !!
يدخل الحين في غيبوبه و يكون تحت رحمه الله
صبرتها
قلت لها هذا الانسان وايد ربي يحبه الي كل الناس تحبه
وانسان وايد خايف الله
لا تزعلين عليه
زعلي علينا احنا الي لي الحين في غفله
الله يعينه على يومنا احنا ماندري اذا بنلقى احد يترحم علينا
ماندري اذا بنروح مستورين ؟
والا اذا بنروح و احنا متحليلين من الناس وربعنا
اذا بنروح و محد زعلان علينا

قبل سنه كنت دائما في حاله عدم توازن و انهيار لحبيب
اخذه الله مني وسكن عند ربه و انشاء الله يارب يكون بالجنه
من يومها و انا على استعداد يوميا مع الموت
وعلى وسواس دائم بالموت
ولكن بلوتي اني لم افعل شي استعداد للموت من اعمال طيبه!
من سنه كنت اخاف ألم الفقد و كنت انهار الليل مع النهار
كان شبح موته ينام معي كل يوم
كان ألم مرضه يعذبني انا اكثر منه
كنت اصيح لربي الليل و النهار اسأله ما الحكمه من تعذيب شخص للتو بدأت اعيش معه حياه حلوه؟
وكنت في كل مره اتعوذ من بليس و اقول لعلها خيره
وسامح ادراكي الضعيف ياربي
اليوم هو رحل
ولم احلله
ولا اعلم ان كان محللني
لم نفترق ابدا كطريقه الافلام
سلام و ووداع و تحليل
بل افترقنا بفاجعه هزتني انا اكثر منه
وكان على الرغم من انه يذكرني كل يوم بموعد قرب موته الا اني كنت اقاوم
و اقاوم
ذهب قبل ست شهور مني و هز خارطه وجودي بهذه الدنيا
فانا اليوم ليس هناك اي طعم او معنى للحياه عندي
اتصال صديقتي و بكائها المستمر على فقد زميلها و فاجعتهم
ذكرني بفجعتي
و بكائي وانهياري
ولكن لا الحزن يغير الزمن و الاقدار
ولا البكاء
احبتنا من رحلوا قبلنا او من هم في معيه الله
هم الان عند الله ارحم الرحمن
فنحن اولى ببكائنا على انفسنا
المسكين مو من طاح
المسكين من شاف حبيبه يطيح

لا شعوريا لقيت نفسي اقول
بكائج الحين على حالته و الي قاعد يصير فيه
راح تبجين شهر عليه و بتبجين عمرج كله على نفسج من دونه
الوله بذبح
و الفراق يعور
وكل شي تشوفيه بالدنيا حلو تلاقين نفسج تبين تقولين له و ما تلقينه تردين تبجين


واي هالدنيا تخرع
وما المفروض تستانس في خيرها ابدا
وكثر ما نقدر بنعيش لازم نفكر في الخير الي نسويه لنفسنا فيها
والخير الي ممكن نقدمه للناس
دائما ارددها لنفسي قبل لا انام
انا مرتاحه من شي واحد
اني عمري مابخلت ابدا معاك في شي
وكنت زينه في كل شي
وعمري ماقصرت في اي شي ممكن اسويه
وعطيت اكثر بكثير بكثير من الي المفروض اعطيه
بس الحمدلله اني عطيت
ولاني متحسفه ابدا دام الدنيا فراقها سريع
مرات صج من كل قلبي ودي اطلعك من تحت الارض عشان احاجيك
بس استغفر

لا تبخلون ابدا على انفسكم باي خير تسونه لها
الدنيا جدا قصيره
بطريقه مرعبه

بسكم استحوا .. حشموناا عاد

وااي عيب عليكم والله عيب عليكم استحوا فشلتونا جدام الله و خلقه !!

فيني تسفل و تشره و امتعاظ (( استكانه وخري عني اليوم و عن اخطائي الاملائيه محد له شغل فيني )) انزين

المهم انا مندقه من امس و محتره على الوضع بالبلد حالي حال الامه الكويتيه

بس مقثوثه مو من الحكومه!! و لا البرلمان التعيس !! مقثوثه من عيال ديرتي

الي كل واحد مسوي نفسه فطحل زمانه بالسياسيه

و كل من مسوي نفسه اسكت و هات يا افتاء !!

ياني اتصال هاتفي الصبح فجرني

اتصال هاتفي من احد اصدقائي

هو: هااا وش ذالحوسه الي عندكم ؟

و سالفه مني على سالفه منه

جان يتمطع (( لحظه لحظه)) تعرفون شنو يتمطع هاذي الحركه الي في اللسااان و يقول : والله ابد ماعندكم رجال !!

صرخت عليه و سفلت فيه

و سبه جميله مني على اعتذار منه

على رقعه تلفون مني

على 30 ميسد كول منه

حطيت حرتي في البلوق و قمت اتمشى

قلت والله صاج

طاع رياييل ديرتي كل واحد فاج له بلوق و يسب في الحكومه

والي يسب في الشيوخ

والي يقول ماكو رياييل بالبلد !!

سووووووري بس اذا واحد ريال يقول بلد مافيها رياييل

يعني انت شنو !!

لوسمحتوا يا ناس يا شعب يا مواطنين

هوووووووب

بسكم عاد استحوا انتخوا

حشموا هالبلد

حشموا هالديره و شعبها

شنو يعني ديره مافيها رياييل و شنو يعني مافيها شيوخ

شنو يعني الكل قام يلعب في اعصابنا

شنو قمتوا اتمسخورونا على ابونا برلمان بينحل

بطقاااااق يطق الدنيا بس لحد يقرب صوب الكويت

وانتوا بالذات يالكويتين بسكم غلط على الكويت

بسكم غلط على الكبير قبل الصغير

اذا انسب الكبير

ينهان الصغير

ابد ماكو حشيمه حق الديره و شعبها !!

كل من مسوي نفسه وطني و سياسي على ابو نصب و بوق

كل من مسوي نفسه اسكت عشان يلط

عساااااكم الحراق الي يحرقكم انشاءالله

بس انطموا و حشموا ديرتي

الي بسب يسب حزبه

والي في خير خيطلعه على الحراميه الي لاطين الديره

لا تقربون يم ديره شاربه المر منكم

وفي خوش مقاله كتبها الكاتب مشاري الذايدي في الشرق الاوسط عن الكويت اقروها

يامالكم الويعه

ليش نستغل بعض ؟

اتصلت علي صديقتي اليوم الصبح بالدوام و طبعا لاني وايد مشغوله فهروبا من الواقع المرير في عملي قطيت الشغل و جابلتها ..رفيجتي مستائه جدا من بنات دوامها .. و من كميه الاستغلال الي في الدنيا فقترحت عليها انها ابدا مجرد تسلم عليهم و ما تقعد وياهم

ولاني اعرف رفيجتي عدل اهي ما تقدر تقعد بروحها او ما تقدر تكون مو حليويه لانها جدا طيبه ومعطائه لاقصى درجه .. فالناس وايد مستغلين حبها للعطاء في انهم ياخذون منها كل طاقتها في المشاعر و العمل..

فهونت عليها بالاول وقلت لها شوفي حبيبتي .. اذا صار الصبح شيكي ايميلج و جابلي شغلج و سلام سلام ياربي اذا هذولا ناس سئين مو مجبوره تعاشرينهم لانه ماكو غيرهم

اعرف وايد من رفيجاتي جذي مستحميلن صديقاتهم او بنات في شغلهم على ابو انه اذا ما قعدت ويا فلانه عيل من بقعد وياه؟؟

واعرف وايد بنات ما يتواطنون و بينهم وايد مشاكل و كل وحده شايله في قلبها على الثانيه بس لا يتصافون ولا يتواجهون و لا يفترقون فقط لانها تعودت عليها و من عندها بعدين احد تطلع وياه؟؟

انا احس ان في طرف في هالعلاقه يكون استغلالي و الطرف الاخر مستغل ..

الدنيا صارت تخرع و الناس كل مالها و نكتشف ان في نماين بالدنيا وايد وايد لئيمه و يعرفون يخشون خبثهم و يستغلون الي جدامهم فقط لارضاء اشياء في نفسهم

مسكينه رفيجتي زدت عليها في الجيله اليوم قلت لها شوفاي فلانه هذي ما تحبج ولا تدري عن هوا دارج هذي فقط اتحس انها عايشه و ابديت في الحياه و تستغل فيج انج وايد تلبسين و تكشخين و مسنعتها و لازقه فيج فقط لانها تغيرت 180 درجه من رافجتيها فانتي اثريتاي حياتها و انقلتي الجانب الايجابي منج لها واهي مايابتلج الا الهم و الكدر

واي فعلا اتنرفز لما اشوف ناس طيبين وايد و مستغلين شي يعور قلبي
هذاك اليوم وحده من البنات سوتلي ادد في المسن اهي بلوقر و توها كانت داشه عالم البلوقات وايد ياهل مدري فظيخ مدري انا النسره

يتني بكل هيمان تسألني عن فلان وهم بلوقر و عايش بينا هالريال متزوج و طايح وياها ليل و نهار مجابلها و منجذبه اهي له وايد واهو معطيها ويه قمت انا خبقت الزبيل قلت لها فلان ترا متزوج !بغت البنت تنجلط ! قلت بقلبي ويه انا شالله بلشني و قلت لهااااا مسكينه الحين بستاثم فيها

فكانت تقولي ليش متزوج و يسوي جذي؟؟

بكل هدوء قلت لها عااادي الكويتين ما يصيعون الا اذا عقب ما يتزوجون

تلاقين مرته طاقته بنعال و عندها صاير ديايه فمو قادر يصير ريال الا عندج

ولا يشعر برجولته الا معاج فعشان جذي مجابلج

ومسكينه بعدين البنت ماشفتها من يومها

وقعدت افكر صج مو بس في الرياييل حتى في الحريم في البشر ككل ليش في ناس تستغل ناس ؟ فقط لارضاء غرورهم و اشباع حاجاتهم بضرر لا يتناسب ابدا مع كم العطاء الي من الطرف الاخر ..
ليش في بنات يستغلون حب صديقاتهم لهم و مايراعون لا احساسهم ولا مشاعرهم فقط المهم ياخذون و ما يعطون و اخذ بلا مقابل

ليش الاستغلال في العمل

في البيت و حتى مع الام المسكينه

ليش نستغل بعض ؟؟