صباح الخير

اصعب شي ان الانسان يقرر يكتب شي بصياغه معينه ماتجرح الي حواليه او أصدقائه و لكن الحمدلله  اهني انا ادري اني اكتب فقط لنفسي

 

امس صارلي موقف خلاني ماني قادره اسكت .. كلمت رفيجتي تحلطت عليها

ولكن "عامل السن" خلاني ما اكتفي في شخص واحد اتحلطم عليه

 

الموضوع الي بتكلم فيه اهو لقافه الخالات والعمات و رفيجات الام و جيرانهم  في ان يدورون عروسه لولدها الي صار عمره فوق الثلاثين

 

يعني انا امس قاعد اشرب قهوتي مع زميله لي والا توريني صوره واحد خاطب بنتهم !!

 

الشخص هذا اعرف اهله ( ادري جو خالاته وعماته خطاطيب !) انصدمت مو من الاسم    انصدمت اني خلال ثلاث شهور الاخيره اشوف صوره الولد عند ناس مختلفه !

 

ياني الفضول سألت رفيجتي :اشرايكم فيه

اشقال عن البنت

قالت لاا اهو الولد ماشافاها ولا امه دقت !

بس هذي جارت عمتهم !!

 

بصراحه كسر خاطري وايد الولد

لازم يرفع على امه قضيه تشهير !!

لان صوره الولد و الستين منصب والتدرج الوظيفي الي يدزونه مع الصوره شي جدا محرج

والله لازم البنات و الشباب بعد الثلاثين يقعدون مع امهاتهم و يسون معاها اجتماع امني مغلق وسري

ويقولها اذا شفت صوري والا سمعت انكم متكلمين عني ياويلكم

يمكن الولد يبي الفكه من حنه الام و يقولها دوريلي

بس ماتوصل انهم يتعاملون من بياناته " انشر تؤجر "

يعني الي انا اعرفه عن هذا الولد لي الحين   متقدم ل 4 بنات اهو أصلا ماسمع حتى في أسمائهم ولا يدري ان اكو خليه ارهابيه في بيتهم تتعامل مع موضوع عدم زواجه و كأنها حاله اعاقه ذهنيه و سباق مع الزمن !

والله انا حاسه في الأمهات .. ادري ان ودهم يفرحون بعيالهم بس والله حرام مو جذي ولا بهالطريقه  موجذي يتزوج الواحد

 

ولازم اهني الابو يفعل دوره بالبيت و يسيطر على فراغ الام و  منيبوزها الظارب نحو تزويج أولادها و بناتها

 

والله انا اعرف أبو  يدق شخصيا و يوميا على صديقه العايله " الخطابه " و يشقل و ينقل لها هدايا و يحرصها يوميا بتقديم عروض خياليه في حاله انخطبو بناته .. و بالصدفه انعزمت يوم وكانو البنات موجودين و شفت البنات ..والله العظيم خليت العزيمه و الناس و صفنت في البنات

طلعوا مشهورين جدا بالكويت بجمالهم و شهاداتهم و رقيهم و سنعهم !!! أصلا أتوقع ان اهما ماتزوجوا لان من جمالهم و مواصفاتهم  الواحد يخاف يتقدم لهم  من الذوق و الرقي و أي انسان يتمنانهم بس

النصيب

صفنت فيهم ان اشلون انت كأب اتهلق في بناتك في سبيل تزويجهم لان وصل عمرهم الثلاثين

اهما وايد اسنع من السناكيح الي انت ميت عليهم !!

الصراحه الخوف والرعب الي داخل الاهل من موضوع عدم الزواج مع كميات الانفصال مخليهم مهسترين !!

 

البنت او الولد بعد الثلاثين له ابرستيجه

له مكانته اذا بغى يتزوج بيلاقي .. بس موبطريقه التشهير !!

 

 

 

أي شخص يقرا كلامي هذا سواء متزوج او غير متزوج خل يراجع موقفه مع اهله يقعد معاهم يشوف شنو مسوين من وراه

او يمارس طريقه الكبسه

يدش البيت يخرع امه يقولها يما انتو منو معطين صوري ومدوريلي !! رفيجي صدمني

راح تخترع الام و تعترف له ان في السنه الاخيره اهي موزعه بيانته على نص الديره !!

 

وأخيرا احب اقولكم اني تكلمت وفضفضت  وتحلطمت والحمدلله خفت الحاجه لاني أتكلم مع احد ثاني

همممم

لا والله ماخفت خنروح بعد اتحلطم بالسناب !!

" العمر له احكام "

 

كاسر خاطري الولد ياناس !!

 

 

 

 

سأضعف وستندمون هاهاهاها

صباح الجمعه المختلف 

صباح القهوه المنعشه مع نسمات البحر الدافي 

والهواء المدلل 

ورجل يدللني بسؤاله 

هل تريدين قهوه اخرى سيدتي 

فاجيب نعم من فضلك

الفندق هنا غير 

او دبي الجميله كلها غير 

رحابه الاستقبال و الاستمتاع بكل تفاصيل الكرم

اتسلل من غرفتي لاذهب الى التراس 

لاقرأ 

ثم تنعشني الفكره واكتب 

فوجدتني اضحك من ما سأكتب 

عن معاناتي في الاشهر الاخيره 

هههههه

تلك الفكره لا تليق ابدا بفخامه المكان

ولكن سأكتبها

قهوه اخرى من فضلك 

مع الحساب 

واوقع 

واحضر الفكره 

قولو ﷽ اولا 

الله يسلم عمركم طول عمري عشت ضعيفه 

مابحياتي مر علي المتن 

ممكن اتيني ايام ازيد كيليو او اثنين واتأزم

لكن ماينقال عني متينه

بعد ولادتي 

ولظروف صحيه قاعد اعيش حرمان قاتل لمده شهر او شهرين ، ماينزل وزني

لا دكتور بدر النصرالله 

ولا برايم بايت

ولا هبه بن سلامه قادرين ينزلوني حتى كيلوين 

فاحبط  واتعب و اخذ بريك يومين من لريجيم ،و ارد مره ثانيه لنظام متعب 

محبط

يكره الواحد عيشته 

وماكو حل

سويت تحاليل

عندي بعض المشاكل الصحيه الي تمنع وزني من النزول 

وسبحان الله لاسباب صحيه اخرى ماقدر اخذ ادويه 

اكتئاب السمنه اليديد مخليني اعيش حاله متعبه 

احاول اطلع نفسي منها بكل وسيله

بس للعلم فقط ماعندي اي استعداد اني اتحمل اعيش عمري بهذي الطريقه 

والاحباط هو سيد الموقف

ترا والله المرأه كائن مسكين 

محارب مقاتل 

في هالدنيا 

مجرد فكره المثاليه المسيطره علينا اتخلينا بهم كبير 

عشان جذي في الايام الاخيره احس وايد ارتاح في البيت  او مع الناس المقربين فقط 

ومالي خلق المناسبات ولا المجاملات الاجتماعيه 

خلوني بس اطلع من هالمود 

واطلب قهوه ثالثه 

واستمتع بالفيو الخيال

مصيبه صابتهم هالاجانب  في شهر نوفمبر يسبحون 

واحنا بهالشالات مستتبردين 

الزواج الاداري

اي نعم احنا بالكويت مانعاني بس من سوء بالاداره 

ولكن نعاني من معضله الزواج الاداري 

  

مدير سرسري - متزوج- يخاف من مرته .. يضبط له وحده بالدوام ومايقدر يتزوجها!! فشنو يسوي!!؟ يتزوجها زواج اداري ويعيشها جو ان الاداره بيت ابوها والموظفين خدم عندج 

و الموظفين الي اتحبينهم عيالج!! 

لا يا بابا انتي وياه 

هذي دائره حكوميه وانتو موظفين لخدمه البلد 

فلا اتميزز ( ....) على الشرفاء من الموظفين لمجرد انك عاجز من الزواج منها فتتزوجها بالدوام والي اتقوله لك اتقولها حاضر!! 

تنقل الي تبي

تودي دوره الي اتحبه 

المناصب والامتيازات برضاها!! 

والباجي مركونين مجمدين 

فقط لانها ماترضى عنهم 

وتدور الدائره عليك 

وايي مدير عقبك 

و يطلع متزوج " اداريا" وحده خريجه ثانويه عامه ... عشان اتيي وتجلط باجي الموظفين 

خافو الله بالبلد 

واذا ماتخافون 

تذكر ان بنتك باجر 

بييها واحد يتزوجها ادارياا مثل حضرتك 

ديره مايطلع فيها الا الردي 

المتسلق 

كخه يا بابا 

اين انا مني

يأتيني صوتها من بعيد ملحا  يدعوني لاحتساء قهوه معها 

ارتب اشيائي 

استعجل بتجهيز نفسي 

اذهب  الى المقهى الذي تحبه 

انتظرها  ولا تأتي 

اطلب قهوه مع حليب 

اشرب القهوه سوداء كما تحبه 

انتظرها 

اعيد التفكير مرارا وتكرارا 

وهي لا تظهر

امسك نوت هاتفي 

ادون خربشات تحب ان تقرأها هي 

اكتب   واسترسل و استمتع بسلاسه الحرف معي 

وانتظرها  وليس لها امل للعوده

هي من ؟

هي ذاتي التي تعودت الاختلاء بها

كنت في السابق اتفنن الاختلاء ومجالسه نفسي وحسابها وتوبيخها

اما الان وقتي ليس ملكي

نفسي ليست لي

انا لست انا 

اذهب بها الى الاماكن التي اعتدتها 

ولكني اجلس مشوشه 

كثير من المسؤليات

ترتيب الاوليات 

ماعدت افهم ما المهم وما الاهم

انا صارمه جدا مع ترتيب مسؤلياتي كأم  و زوجه

ولكني بذات الوقت لا اريد اهمالي 

ليت اليوم ٢٩ ساعه 

حينها سيكون لي وقت 

قررت كثيرا بتركيز طاقتي على امور كنت احبها 

ولكن دون جدوى

يفقز سلم الاوليات لاسرتي الصغيره

ولا اجد وقت لي  ولا لها 

وان وجدت لا اعرف ماتريده حقا في الفتره الاخيره

كيف لي ان ارتب اولوياتي او وقتي لاثمر بتقسيم عادل 

كيف لهؤلاء ان يقسموا وقتهم و يمارسوا هواياتهم و ينجحو 
انا متأكده ان كل انسان بفتره من عمره .. يضيع  بجدول الوقت .. ثم يلتقي بنفسه 

لذا قررت ان اجتمع بنفسي صباح كل ويك اند على البحر 
ان اعاود فعل بعض الاشياء التي كانت تستهويني 

لعلي القاك 

باريز

مساء الخير 

صارلي اسبوعين مانزلت بوست لظروف سفري 

ولما رجعت مابغيت اكتب الا يوم الثلاثا على العاده 

سفرتي كانت الحمدلله جميله  و بسيطه طبعا رحت العشق  مونترو 

وجددت ذكريات الطفوله 

كنت كل يوم الصبح اقوم مبجر قبل الشروق و اتجهز لرحله قريبه ولاماكن اعتدت اني اروح لها  لكن في بعض الاماكن كانت مسكره بحجه ان مو سيزن !!

ورحت ميونخ وللاسف كان عندهم مناسبه "فيرست اكتوبر " وهذا مهرجان نحرص انا واهلي ان انتجنب زحمته كل سنه بس ماهقيته جذي 

وايد اشياء تبينتلي من هالسفره ان فعلا ماني قادره احب الهدوء الزايد الي تتميز فيه اوربا العجوز 

واني مالقيت المتعه الي ابيها الا  في المدن مثل باريس الي حيل استانسنا فيها 

اعمارها و ناسها  و سواحها الاجانب 

 انا من الناس الي ماواطن ،و لا اطب الشانز لزيه ولا امره كلش 

ولا احطه بالخطه ابد  لان من اتعس معالم باريس الراقيه 

واستغرب تمسك الخليجين في قهاوي الشانز  و فنادقها 

اتخلون الريفولي او سان جرمان ، وتسكنون الشانز ليش !

المهم انا قبل اي سفره لازم اخطط للسته مطاعم امرها 

منها شي يديد وبعضها مطاعم سبق اني زرتها 

ولظروف وجود بيبي معانا كنسلنا مطاعم العشا الي تحتاج "دريسي "

المهم مريت محل البرجر المفضل لي في باريس 

والا ورانا طاوله خليجين 

يمكن لو انزل مقاله في الشرق الاوسط اعبر فيها عن غضبي ،واستيائي من هالمجرمه الي كانت  وراي هم ماراح يهدى غضبي 

انسانه قليله ادب ووقحه  و عجوز شمطاء بكل ماتحمله هالكلمه من معنى 

الاخت السحيله عيوز متشببه لوعت جبدنا بالحنه  وصوتها مستفز لمده ساعه وربع اتلعلع على انها بتدخل عيالها المطعم  ومالهم مكان  وسوت فيلم !!

موهذا موضوعي الي حرني يتني وحده ودزت كرسيي  وزفتني ان ادني  وانا فعلا ماكو مكان ادني واهي قليله ادب 

طبعا الشي الي مخليني غضبانه لي الحين اني ماتهاوشت وياها لان ريلي معاي 

لو بروحي جان فيديو هوشتنا منتشر لي الكونجرس !!

وقعدت اتحلطم وموعارفه اذا انا كويتيه والا شنو 

فرفعت حسها تقول حق ولدها و الحريم الي معاها 

شنو هالقرف الي في جالري لافييت القطرين الهيلق تارسين المكان 

اترد عليها اختها اي هذولا بدو!!!

انا اهني شبت عندي الحمرااا 

يرد عليها ولدهاالاماراتين مو خليجين اصلا !!

و القطرين بدو

والكويتين ناس مختفين ماتلاقينهم في مكان !!

جان التفت واكسر ارقبتي 

واقول الحمدلله و الشكر صج امراض نفسيه 

استغرب من بعض الخليجين الي من صجهم مافيهم حب للخليجي الي مثلهم

احنا اذا ماحبينا بعض عمر ماحد راح يحبنا

وبعدين نطلب من الاجانب يحترمونا  واحنا ماعندنا ادنى احترام لقوانيهم

لاتقولون مو الكل جذي

ترا اهما مايذكرون الكل

يذكرون الانطباع السيء فقط 

وحاليا حايشتني الحاله ان ودي لو الموقف يتكرر واتهاوش معاها

وارد عليها بكل غضبي 

"بدا الغضب يخف عقب الفضفضه "

لكن هم ابي الزمن يرجع فيني  واتطاقق وياها حرتني 

ماراح اتكلم عن الشوبينج في باريس !! واذكر نفسي ان نص الي اقيسه مو قدي واني اطلع من المحل احس في كآبه شديده اتخليني اروح اقرب بيكري اكل سويت وكوفي وافكر متي انزل وزني عقب الانفجار 

فيآتيني صوت شيطان قزم من بعيد اكلي  واستانسي اخر العمر موت

فافرح  وابتهج واقوله صح صح صح صح انت شاطر يالله عيل اطلب سويت ثاني 

:))))))

هاش تاج الكتب 

كتاب اليوم اسمه 

بلعوا العافيه 

مسافره مع ياهل ماقدر ابد اقرا 

يالله اغير بامبرز  واسوي حليب 

الاسبوع الياي انشاء الله في ديره العز ياكويت عزج عزنا 

مصرف ورد

يازين الانستجرام بس 

سنع اماعين الاوادم 

وطلع الصحون من الكبتات 

اول المراه تمووت و محد درا عن اماعينها 

الحين لا وعليه  البوفيه و الكبت كله اتحطه 

عشان التشيحط 

يالله ميخالف هم زين 

بس الي موزين وعليه مصرف هالورد

انتوا مصدقين ان الكويتين و السعودين في بيوتهم كل هالورد !!

طول عمري لي حطيت الفازات الكل يعيب علي

الحين عشتو صار موضه 

 وصارو يعرفون ماركات الاماعين الانجليزيه السنعه  بس عشان التشيحط لان فعلا الكويتين مايعذبهم الا راي البيت الي يمهم فيهم ومحد ربحان الا  هاليهال الي يبيعون هالاماعين بالانستجرام 

 انا مو ذابحيني الا وحده من ربعي والله اذا دشيت عليها  البيت

في الكاونتر الي بالصاله صينيه ستيل عويه ظيم ، قلاصات جبن على قلاصات هديه من لبتون  الحين شي شي بالانستجرام !! حق المزامط جدام النسايب والكناين خو يدرون  الناس ليش اتزامطون على الخرطي حمدلله والشكر

ماعلينا مابي احش انا قايله ماني حاشه باحد 

المهم انا محتره و منبطه جبدي من اسعار الحضانات وعليه 

كاسره خاطر نفسي  وكاسرين خاطري اولياء الامور

شنو يعني حضانه بالسنه 1200 حرام اشدعوه هارفارد !!

كلها تراب  و طين  اشتبون تعطون الياهل  والا اشبتعلمونه 

اشدعوه الدوله قاعد تراقب الحضانات او الاسعار ! كل من يرفع و يسعر على كيفه 

شي موطبيعي نصب !! مبالغ فيه 

و بلد ماشيه بدون اي قانون اصلا فمايت على هالحضانات 

 تذكرون معهد فولتير الفرنسي ؟ انا سنه ٢٠٠٦ مشتركه اخر مره فيه كانت الرسوم ب ٧٠ دينار الحين ١٤٠ !! الدبل 
ويقولون ليش الشعب مايتطور ولا يتعلم ويفتر بالافنيوزو ينحاش دبي كل ويك اند 
من الغلقه  
ولا احد يقولي عن التعليم الحكومي لان دمار للاخلاقيات ، 

ويبيله بوست بروحه بكتبه بالمستقبل ان شاءالله 

هاش تاج الكتب 

اسم الكتاب : عندما حكمت اسيا العالم 
 للكاتب :ستيوارت غوردن 
ترا بالصدفه صار اختياري للمره الثانيه كتاب نوع ما تاريخي يسرد تاريخ اسيا في العصور الوسطى

انا في الفتره الي فاتت اول مره اعرف ان اليهود والحكومات الاجنبيه والديانات المسيحيه كلهم يتوحدون نحو خطر واحد و هيبه واحده هي " الاسلام"

وكل اهدافهم تتمحور نحو تفتيت قوى الشرق 

الكتب هذي كانت تقرا بدون رؤيه الحين نقراها ونطبقها على الي يصير في الوطن العربي

نرجع للكتاب 
اهو فكرته رحاله تنقلوا وكتبو مذكراتهم حول اسيا و امبراطويه الكم بها وايد حلو الكتاب من الناحيه الانسانيه 
وانا عن نفسي احب اعيش في اسطوره بن بطوطه و الهند و السلاطين من الناحيه الواقعيه ....


اتمنى لكم قراءه موفقه 

ذاتي البسيطه

صباح الخير 

لاحظنا في السنين الاخيره كميه دورات ومحاضرين في مواضيع اجتماعيه متعدده 

 منها الطريق الى تغيير الذات ... وتغيير انماط السلوك

 صراحه  اخذت اكثر من ٤ دورات لتنميه مهاراتي سواء بالحوار او غيرها و لكن ابدا مو قصدي اقلل منهم 

او اقلل من قيمه المحاضرين  وادري ان هذا علم 

لكن وضع الدورات بالكويت "تجاري " اي والله تجاري 

واحد مفلس يبي يصير عنده فلوس ياخذ دوره تدريبيه و عقبها ينزل اعلان ان مدرب معتمد 

منو معتمدك ! 

 اهو الاخ اعتمد نفسه او الدكتور الي شركته مضروبه  

دكتور شنو   لوسمحت ؟
الله اعلم 
دخلت مره دوره مرشحيني لها دوامي 
عن فن القياده
  والمحاضر  دكتور بالطب البديل 
ليش لان بالكويت الهدف تجاري بحت

تابعوا صباح الوطن لمده شهر بس كل يوم مقابله مع هالنماين 

تجار الذات 

الشخص وده ياخذ الدورات لتطوير ذاته 

يعفسون له ذاته 

مسكينه وحده بالمحاضره اشتطت وقامت تشكي حالها للدكتور 

المفروض يقولها الحل 
او يقولها بعد المحاضره اكلمج

الاخ قالها تعاليلي العياده !!

انزين وعليه المره حل قصتها بدقيقه ليش بتربح زود غير ربحك من الدوره !!


انا انصح اي شخص بطور من ذاته و حياته المهنيه او الاجتماعيه  ان يروح مكتبه جرير 
و ياخذ له كتاب او سيديات للدكتور بشير الرشيدي .. لانه دكتور فاهم ان التغيير نابع من الذات 
وعباره عن قرار وتحديد مسار و هدف نسعى له ..بقليل من التركيز و كثير من العمل 

وايد افيد من الهدر المالي لدورات ابدا ماتسمن ولاتغني من جوع

وبصراحه والله عن تجربه افيد دوره ياخذها الواحد ان يستشير شخص كبير بالعمر 
كجد او جده 
انا من الناس الي ارتاح و شخصيتي تتماشى مع المدرسه القديمه 
خصوصا في الامور الاجتماعيه 

لان الي يتم ترويجه في هالدورات 
" عيشي حياتج "
ضربي المجتمع بالطوفه 

لا يابابا انا ابي حل انا عايشه بهالمجتمع عمره ماكان التوحد هروب 

او على سبيل المثال لو واحد فيكم يفتح اليوتيوب ويسمع اي نصيحه من دكتور للحياه الزوجيه 
بصراحه كلها نصايح اتخرب البيوت 
تركيه عنج
 استخدميه كجهاز للصرف  وياريت الصرف على اساسيات 
لاطبعا .. على كماليات الكماليات من سفر و مجوهرات و جناط 


علموا الناس على الاستغلال حتى في العشره الزوجيه 
وغيروا مفهوم الاسره!!


ليش ! 
لانهم مايهمهم الاصلاح الحقيقي 
يهمهم يسمعون الحريم الي اهما يبون يسمعونه

مايقول للمراه انتي عويه و غلط
مايقول صبري في البدايه 
لاا 
كلا حلول هدامه 

في دورات قاعد تصير اسمها " نحو انفصال ناجح"

يعني اذا ناويه اتطلقين بس ناويه 
تعالي واحنا انظبطج

ويطلع لنا مجتمع مشروخ بالنص 
وتعال يالريال يالله تشحطط بالمحاكم 


بصراحه انا كنت ناويه ما اطول 
 ..بس اشتطيت

المهم انا بعطيكم اقوى دوره الحين 
اسمها "كيف تصبح مليونيرا بالكويت في غضون سنه "

سيدي سيدتي ماعليك الا التوجه الى المكتبه و شراء كتب القصار
و عبير الراشد للطبخ 
وطبخوا و بيعوهم  مع زياده المقادير بالفقع المفقع 
وعليكم بالعافيه 




هاشتاق الكتب 

اسم الكتاب : العرب "من الفتوحات العثمانيه الى الحاضر "

للكاتب يوجين روجر

انصح فيه وبشده  بصراحه انا في البدايه ترددت في قرائته لان حجمه كبير و شكله يمكن يكون ممل لاني متعوده على الروايات 
بس لما بديت فيه ماقدرت الا اني اكمله 
دايما نقرا كتب اجنبيه تتكلم عن نقمه العرب على اوربا بمنظور شرس او سطحي ولكن هذا غير ..

تسلسل الاحداث في الاستعمار البريطاني و الفرنسي و الدوله العثمانيه وقوه الاسلام .. شي ممتع اتمنى تقرونه وتستمتعون 

كبرت ونسيت

كبرت  و نسيتني ...

اخر البوستات الي نزلتها سنه ٢٠٠٩ 

وبعدها تراخيت ، ماكتبت شي 

كان جم عمري حزتها ... صبر احسب لاني فعلا نسيت 

كان عمري ٣٠ 

٣٠ هذا الرقم الي تقراه بس ابد ماتحسه 

ندخل فعليا في الثلاثينات مع بدايه ال ٣٣

وهالعمر جدا متعب يحذف علينا بالمسوليات الي ابد ماحسبنا حسابها 

يكود علينا الهموم  الي محد بلغنا عنها ولافتح موضوعها معانا 

هل اهلنا في عمرنا كانوا مهمومين ! 

ابدا 

 كانوا في عز الرخا المادي و المعنوي 

الدنيا كانت بسيطه علي وقتهم 

علي عكسنا تماما

مشاكل اجتماعيه 

ارتباطات 

بلاوي و يا العمل 

لا مسكن 

ولابيت 

و لارواتب اتكفي 

الواحد منا متقلقص في لسته طلبات ماتخلص ولابعد عشرين سنه 

الحياه جدا ماديه !! كل شي صار بميزان الفلوس 

الناس باعت اسمها ، اخلاقها عشان الماديات 

بنات الحمايل تفصخو و صارو عارضات 

لهطه  ورا هالماديات بشي خيالي 

انتفی الادب..

تلاحظون ان فجاه الانستجرام انترس  "فاشن بلوقرز " عمرهم مامرو علينا ولاعندهم اصلا بلوق !!

بس عشان الفلوس و الماديات   

 هالعمر خنقنا في برواز المسوليه وخلانا ننسا انفسنا ... 

 من سنه كان  ودي فعلا اكتب واكتب وايد بس من ضغوط الحياه و الانشغال  مالقيت الا هالوقت  

وباذن الله ماراح اوقف كتابه 

لحاجه لي انا ... بعد ما الحمدلله الكل اعتزل المدونات

راح انزل بوست كل ثلاثا ان شا الله ...

وهالثلاثا راح اتكلم عن  ماهو البحث عن الذات !! الي كل شوي يدزولي دوره  يبوني اشترك بالبحث عن الذات 

مع اني لاقيه عمري من زمان 

#مع كل مقال اكتبه راح اسوي هاش تاج لاخر الكتب الي قريتها و تعليقي عليها 

احبني 

هو( موكل شي)..

بدون مقدمات فيني حش وتحلطم 

كتبت مقدمه طويله عريضه 

بس حسيت اني صرت وايد ذربه جني قاعده  اكتب في جريده 

تالي حرفت في الاحداث جان اعصب من نفسي وامسح كل شي 

اي بحش لان الوضع صاير لايطاق

ماتلاحظون ان بنات الكويت والمتزوجات خصوصا صايرين وايد وايد يعيشون حالات اكتئاب؟

اقولكم ليش؟؟ من المعسكر الي مدخلين نفسهم فيه 

الجيش و الشرطه والحرس اشكثر يجندون الطلبه ؟ 

شهر صح؟؟

اخر خمس سنين تقريبا وتحديدا 

بنات الكويت المتزوجات اغلبهم اغلبهم مساكين معصقلين بطريقه غير طبيعيه !! عشان الريل 

عايشه حياتها كله بالجيم !! على حساب بيتها وعيالها والتربيه والتدريس

الي تبي اتيب اعيال لازم تفهم ان السالفه مو ايب واقط !واعيش حياتي 

لألأ السالفه اعيال ومسؤليه وتربيه وعنايه و تدريس

استغرب استغراب تام من بعض البنات ومنهم صاحباتي بس موقصدي اتكلم اهني عشان احش كثر ماقصدي اني فعلا مستغربه من الموضوع 

من الساعه 8 لي 3 دوام من الدوام لي الجيم دايركت لي الساعه 7 !!  والعيال وينهم !!

العيال عند الخاله او الأم 

انزين سؤال ؟ هل الريال يخصص لج 3 او 4 ساعات باليوم لج انتاي بس يسويلج شي عشان يرضيج انتاي؟؟ طبعا لأ

سوري بس طززز بالريل اذا مايهمه اني ادري عن بيته وعن عياله وعن حياتي و عنه اهو اذا بالمقابل عشان البس شورت او مايوه وما    و افشله جدام الناس بشكلي لان فيه هوس كشخه !

لان يحب يتمنظر فيني 

وين كلكم راعي وكلكم مسؤل عن رعيته 

انا موضد ان الوحده تحافظ بالعكس هذا شي وايد زين 

بس اسوي بلانس توازن 

اخفف اكل .. او امشي ويا ريلي او اروح الجيم ويا عيالي 

امشي الضحى 

احطلي جهاز مشي بالصاله و امشي بين عيالي  

او انومهم وتالي اروح 

بس ما اهيت بيتي طووووووول اليوم عشان اعجب انسان !!

رفيجتي صرت لما اقعد وياها كلا سرحانه دايخه هلكانه 

ذايبه ..موقادره ابدا تتعايش او تستمر في المعسكر الي مسويته حق عمرها 

ماتاكل كلش

ماتروح مطاعم ابدا

ماتزور ولاتروح يمعات عشان ماتاكل 

هوس جسمها غير طبيعي عشان جينز سايز 4 !!

انا اسولف واشتط وهايبر واهي ولا صوبي لانها ماكو طاقه !!

تفكيرها مكرس على هالريل تماما !!

ترا الريال ما يطير من جسم والا من متن !! هذا عذر بس 

ماتشوفين الامريكان كل وحده فيله تمشي وريلها يلمم فيها لم!!

لاترضون انسان على حساب عيال و حياه 

الدنيا وايد حلوه 

استمتعوا بعيالكم صغار جابلوهم 

طلعاي اكلاي استانسي طبخيلهم 

بسكم هوس في فكره وحده "اشلون استمر وياه واشلون اكون دايما حلوه عشان ماتخمطه وحده ثانيه"

اذا بينخمط فهذا شي ربي كاتبه 

بس ما اعيش تعاستين 

حرمان و اهيت بيتي طول عمري واطامر من كلاس لي كلاس عشانه واهو مستانس من كافيه لي كافيه ويا ربعه ..ومشششطب على منيو المطعم ويحرمج من الاكل

الحياه الصحيه مهمه 

والعلاقات الصحيه اهم

والاسره الصحيه اهم واهم 

العيال ابرك من الفلبن بالجيم 

nice -menton - milano

صباح الحب " انا ما اشوف الغبار بس اشوف الحب

وقهوتي و الورد الحلو

اكمل سالفه ضيعه الجنطه و السفره

طبعا قمت ادور ادور و احوس وعفست الدنيا والا اثاري انا ناسيتها على السكانر كاونتر قبل لا ادش الجيت

انزيييييييين انتو يوم شفتو الجنطه ناسيتها ليش محد يعطيني خبر ! ماسوت خرعتي بس

قبل لا اتكلم عن وصولي لمطار نيس ..

احب اعترف في شي

احنا ليش انحب انتسوق في المطارات و احنا ندري ان البضاعه مو واو

وان كل شي شايفينه و ماكو شي يديد

يمكن احنا الحريم نقتل توتر السفر بالتسوق !

والا نقتل الوقت بالتسوق

او انحب انسوي اي شي يستفز الرجل !!

لان كل الكويتيات الي اشوفهم يتسوقون بالمطار اشوف وراهم ريال يتحلطم او ريال واقف عند البوابه يزف

احلى شي بالشعب الكويتي ان كلنا نمون على بعض الحمدلله ما نستحي

جدا عادي و طبيعي انشوف ريال يزف مرته

ومرته مو مفتشله عادي

و احنا الي انتطمش انقول بقلبنا هالمره انتي يمكن المره اليايه احنا

المهم مابقى كاكاو و خرابيط ماشريتهم من المطار و مع جم نوع ادويه من بوت

وركظه لي الطياره

والحمدلله طرنا من لندن  ..واخيرا لي نيس..

وصلنا نيس بالليل متأخر تعبانين  نزلنا الاوتيل تعشينا و نمنا

صبحت الصبح والا اتفاجئ في الشروق الجميل من منطقه نيس

وايد حبيت المكان الي سكنه فيه وايد حبيت  نيس تفاصيل البيوت و الجبل البسيط

على البحر و كل شي مغطى بالورد

نيس ما كأنها في فرنسا انا اشوفها انها منطقه ايطاليا اكثر

تمشيت و في قلبي قررت اني ارحم الناس الي وياي و ما اقعدهم نفس كل يوم من الصبح واني اصير خوش انسانه و اخليهم يرتاحون ومتى ماقعداو اقعدوا

مجرد وساوس بسيطه مع نفسي لاصلاحها ..

ولكن ماعبرت !! يووووم صارت 9 ونص بلشت ادقدق على الغرف اقعدهم من النوم

طبعا على ماقعدو ونزلو تريقو جود انا من الفير طالعه و متمشيه و خالصه

ورحت استلمت السياره

اول دقه في نيس ان النيفجيشن فاشل او انا ماعرفت استخدمه ولا ابرمجه لان حضرات اليورو كار  حزه الاستلام ما  برمجولي الدرب

المهم توكلت على الله و انطلقت من نيس لي موناكو وتمشيناا

وبالنسبه لي كانت اهني البدايه

للمره الالف ارددها واقول 

ماشفت بحياتي اجمل من منظر طريق كان لي موناكو او من كان لي جينوفا .. 

ساحل الليجوريا سي ..اهو مزيج بين كل شي جميل 

اهو الجمال بحد ذاته 

البحر ..والمرتفع 

الجبل الاخضر الممتد والبحر من تحته ..

والورد بكل الجوانب ..والبيوت المبعثره بطريقه عشوائيه 

المناطق السكنيه الفرنسيه الي اتحاول اعلان تحريرها من الريف الايطالي ولكن ماقدرت 

كل الجمال مرسوم بريشه ايطاليه ولكن باسم فرنسي..

كنت ماني قادره امسك الهاي واي عشان انطلق لي ميلانو

ماكنت قادره افارق البحر ..

مابي اروح 

مابي ابتعد

في كل منطقه صغيره امر عليها ارد انزل من الجبل وادور السنتر فيل..

الي اهو سنتر المنطقه نفسها 

وتغدينا في مكان روعه 

بيتزا ايطاليا في منطقه فرنسيه 

عيايز ايطاليات يحيكون مفارش الدانتيل الابيض

و دكاكين زيت الزيتون الطبيعي..

مع اكشاك بيع العسل ..

وقبل الغروب ودعنا منطقه  menton 

وكنت اردد هذي الاغنيه على البحر حزه الغروب..

ليلة خميس
طرز بها نور القمر .. شط البحر .. نصف الشهر 
و الليل من فرحه عريس .. ليلة خميس
ليلة خميس .. ليلة لقانا
موعد الساعة ثمان
كان الندى موعود مع رمش الزهر 
هو الزهر سهران عطر بالحنان 
ليلة لقانا
كان الفرح ثوبي الجديد 
لقياك عندي يوم عيد
موج البحر مغنى و قصيد
و الليل من فرحه عريس .. لية خميس
ليلة خميس 

ركبنا السياره وانا ماودي اروح ميلانو كلش !!

اهني عرفت المعنى الحقيقي "وعسى ان تكرهو شيئا وهو خير لكم"

على كثر ماضاق خلقي من الاضراب وعفسه الطيران 

بس ربي كاتبلي ان اروح في هاليوم عشان يكون اضراب لان ربي بوديني هالمكان الجميل ..

الي ماكنت راح اروح له بنفسي 

كانت هالرحله من اجمل رحلاتي صج..

وكل شوي اوقفهم في محطه بنزين واشرب قهوتي واسبرسو ..وارتاح من الدرب..

بس من ظلمت الدنيا ..ماسقت ..ونزلت الكشن و بلشت امزج في اي بودي باغاني محمد عبده..

قلبي بدقاته إذا رحتي يناديكِ : اسمعي 
و يقول بآهاته : دخيل الله .. دخيل الله .. ارجعي 
انتي في هالدنيا نظر عيني .. منايا .. و مطمعي 
في موعدي ليلة لقانا مولدي 
يا قمرى و يا نجوم اشهدي 
إني معك .. منك .. و لك 
أرخص لك الغالي النفيس 
و الليل من فرحه عريس .. ليلة خميس 

ورحت اطير بخيالي واسرح ان  انشاء الله قريب راح ارجع نيس و هالمكان باجازه مع نفسي انا وكتابي وبس..

ووصلنا ميلانو بحمدلله و قعدنا في ميلانو جم يوم 

استانسناا في احتفالات ميلانو بحدث بس شنو اهو مدري لووول

و عروض الازياء بالدومو والعفسه عفسه 

كان اكو صيحه والدنيا بعالم اخر 

والناس من كل مكان يايه ..

انا ماحب ميلانو فماراح اتكلم عنها ولا احب اتسوق فيها لانها مو مرتبه كلش

وكانت شغلتي بس افتر من قهوه لي قهوه و اقعد ويحطون عندي الجياس..

الي اذكره في ميلانو اني قريت جريده الشرق الاوسط كلها وفليتها تفلي وتعرفت على كتاب ماكنت افكر اقرالهم بس بقزر الوقت

وشربت قهوه تترس راسي عشر سنين جدام ...

وانا انسانه عنصريه ان السوق بلندن وبس 

وبعدها رحت باريس..

وراح اخلي بوست ثاني لباريس 

بس ماراح اكتبه بوست عادي

بخاطري شي رومانسي

خصوصا بعد ماذكرت لكم اغنيه السفره واشلون يكسرني احساس محمد عبده واهو يقول 

كان الندى موعود مع رمش الزهر
هو الزهر سهران عطر بالحنان
ليلة لقانا

يمكن اركب رحله باريس على قصه رومانسيه في اماكن يديده وانتو تعرفون من خلالها 

الاماكن الي استمتعت فيها في باريس

لان اكثر شي ولهانه عليه في البلوجز 

البوستات الرومانسيه والقصص ..

لان الدنيا والناس صايرين جدا جافين ..او عملين مدري بس المهم ان انا 

قلبي بدقاته الى رحتي يناديك اسمعي 

و يقول بآهاته : دخيل الله .. دخيل الله .. ارجعي
انتي في هالدنيا نظر عيني .. منايا .. و مطمعي
في موعدي ليلة لقانا مولدي

ملاحظه :البوست كاتبته يوم الاحد الصبح 

بس نشرته نهايه الاسبوع  بالليل لان كان يحتاج تنسيق عشان جذي كاتبه صباح الحب