نور هالدنيا........ بدرها

نورهالدنيا ...بدرها


كيف احبه؟؟

دعني اعدد لك ..كيف

احبه ملئ كل يوم

اسعى اليه بحريه كما يسعى الرجال لحقوقهم

بطهاره المتعبد بعد الصلاه

باحزاني القديمه ..وبايمان الطفوله


بكل القديسين الذين رحلوا

بدموعي و ابتساماتي

وان شاء الرب

سأحبه اكثر بعد الممات

...........


تاخذني الايام

و الساعات

انشغل عنك

وابخس بحقك

ولكن صدقني لو اقعد عمري كله اكتب

ما اوفيك حقك

الي حبيبي

الى هوى الفؤاد

الي جوى القلب

الي حياتي

و نظر عيني

الى احلى ماضي

الى ابتسامه اشرقت حياتي

الى رووح روحي

احبك
........


الى حنيني ...صبري

غيرتي

اعصابي

اليكم عني
.........


باختصار

اسطر اعترافي هنا
.......

تاخذني هالدنيا

انشغل

انسى

الهى

و ارد لبيتك

ارد لاحضانك


ارد لقلبك

لعيونك

لانفاسك
......

ما سبب هذه الكلمات

و لماذا اخفي الكثير بين السطور

.......
اليوم و انا اسمع قصيده لاسير الشوق و الي يقول فيها

اقوم من ليلي و اصبح على ليل .. حسيت ان حياتي كلها ليل مظلمه

ينقصها بدر يضيئ

بيتي بحاجه لعامود اساسه

انشغل عنه و ينشغل عني

بعيد هو بالمكان

لكن بداخلي موجود

بعيوني هايم

اخذ نفس عميق

اسحب بعض ابيات لنزار قباني

اليوم عاد

كأن شيئا لم يكن

وبراءه الاطفال في عينيه

ليقول لي اني رفيقه دربه

وبانني الحب الوحيد لديه


حمل الزهور الي

كيف ارده!!

وصباي مرسوم على شفتيه

ماعدت اذكر و الحرائق في دمي

كيف التجأت الي زنديه

خبأت رأسي عنده
وكأنني طفل اعادوه الى ابويه


حتى فساتيني التي اهملتها

فرحت به ..رقصت على قدميه


سامحته و سألته عن اخباره

وبكيت ساعات على كتفيه

وبدون ان ادري

تركت له يدي

لتنام كالعصفور بين يديه

و نسيت حقدي كله في لحظه

من قال اني قد حقدت عليه

كم قلت اني غير عائده له....ورجعت

ما احلى الرجوع اليه
......



آه يا نزار سامحك الله على هذه الكلمات التي ابكت قلبي

احتضن وسادتي .....آه بقايا عطره موجود

و اتذكر ابيات اخرى لاسير

حنيني غصب يدفعني و ياخذني الوله يمك و ابد ما اظن تمنعني مسافات الضما عنك

تراك انت الوحيد الي بقا لي و..همي .. ليتني همك

......

حياتي

روحي

عمري

قلبي

عشقي

جنوني

حكمتي

سعادتي

دنيتي

بدايتي

نهايتي

جمعت لك كل الكلمات

ولم تفي بحقك

للاسف

فلا شي يقارن بنور البدر


لذا انت نور هالدنيا يا بدر


احبك

ابكتب

ابكتب ليلتي كلمه و بنزف ما احس سطور

حروف صاغها دمعي و نثرها في مسافاتك



وقفت بعبرتي مخنوق اصارع دمعه المقهور

بكيت احساسي الصادق وحلمي و كل كذباتك



كسرت بداخلي قنديل ضويته من بقايا النور

كسرته و انا من بعدك رميته في مسافاتك



انا يا صاحب البالين حويتك ,,بالحنايا شعور

زرعتك في شراييني وتبعت بحب خطواتك



وهبتك كل ما املك ,, وجيتك هايم مسحور

حضنتك ضعف بايديني ومسحت بدمعي عبراتك




انا مالوم احساسك ولا انت بالعطا مجبور

ولا اعتب على عينك ,, الا حنت لنزواتك



انا اعتب على انك تمثل دورك المبتور

وتلبس لي قناع الود و انت تنكره لذاتك


تبي مني العطا دايم و انت بالعطا معذور ؟؟؟

تبيني بعض من يومك و فصل من رواياتك



اسفه ما اقدر اكون العاشق المغدور

و لا انا مثل غيري اجاري بخبثي غايتك



و لا انا اللي بهرها الصيت و لا من سكن القصور

و لا انا اللي اسوم الود و ارفع زيف راياتك



ابرحل و انت بتلاقي ملايين تباري السور

ولكن ما اعتقد تلقى ,,بلسم يجلي ظلماتك

بلسم الروح

تناقض رجل .....

قفلي انا اكلمك
...و يأتيني اتصااله سريعا

انا: الوووووووووو هلا و غلا طويل العمر اشلوونك افا عليك اشدعوه ...
عمي : هلا بشييخه الزين كله لا مو القصد بس تدرين فيني انتي و الهنا ما احب ابد انتو تكلموني لاني اطول كثير و استرسل في حديثي و الا ما تبين اسولف؟
انا : افا علييييييييك حلالي كلا لك بس لا تخاف ماعندي حلال
هههههههههههه انا تمام بخير طيبه زينه
كل شي زين فيني بسسسسس حدي ولهانه عليك
هو: نصابه انتي طالعه للنذل خويك ..انتي كلا ما تسألين و لا تفكرين تكلمين الا من السنه لي السنه و هو ما يفكر يكلم الا اذا يبي قروش
انا : عمي بدون مقدمات ... شنو احلى شي في هالدنيا
هو: والله شوفي طال عمرك احلى شي في هالدنيا المرأه
بس مش اي مرأه عرفتي

انا : شنو احلى لحظات تكون فيها مع المرأه عمي؟
هو: احلى شي في هالدنيا يا بنتي ان جسمك يلامس جسم امرأتك الي تحبها
انا : اوكييييييي (يعني كمل)بصوت مستغرب
هو: شوفي يا الشيخه الرجل بعد عمري هذا يكون شاف جميع اصناف الحريم و جميع اشكالهم الحمرا ..و البيضه و السمرا بدون استثناء
و صدقيني في حريم ندفع لهم من غير ما نلمسهم من كثر ما الواحد يتقزز منهم
انا : ويييييي!!
هو: طبعا على زمنا ووقتنا ماكان في شي في شبابنا قبل ما غير بنت عمك و بنت خالك و بس و لما تزوجك ام دحيم و هي بنت عمي هايم فيها قبل لا اشوفها
كنت وقتها انا في حايل عند خوالي و هي في الرياض و كان سفري للرياض مثل الحلم
رحت و سافرت و تزوجتها و كانت هي كل الدنيا في نظري
حبيتها حب لا يوصف و كل سنه احبها اكثر من الي قبله
لكن الحين بعد هذا العمر بعد 38 سنه زواج يكون الحب الاحترام اكبر و التقدير و اموووووور الحياه الي غيرت الحب و خلته شي اكبر و كل يوم يكبر
انا : اشلون؟؟؟؟؟؟؟؟؟
هو: طبعا يابنتي الدنيا هذي دروس و عبر ...بعد ماشفنا الخير ولعبنا في الفلوس لعب ولعبنا في الحريم اكثر من الفلوس
كنت اخونها جنسيا كثير بس يشهد ربي ما قد خانها قلبي
انا : نظريه جديده هذي عمي ؟؟؟
هو: لا يا بنتي .. الشباب و طيشه و الفلوس و السفر و الشرب كان لازم مع كل ليله تمر فينا
مزاج يديد مع وحده جديده
و كنت في كل مره ارجع فيها من السفر القى ام دحيم هي هي زيها ما تغير حبها و ما تغيرت معاملتها لي على الرغم من انها كانت تدري اني اخون و اني ازنى بس كانت تسمعني صووت دعائها كل ليله و اهي تدعي ربها لي بالصلاح و الثبات على طريق الخير و هي ماشافت فيني خير بس ثقتها فيني باني احسن رجال في الدنيا و كانت تقول عني اني احسن واحد بين رجال العايله و كانت تسميني بختها و ماتناديني الا يا يا بختي ..
كنت لما اشرب ... تقولي بكره ربي بيصلحك
انا: الله يعينها
هو: فعلا ربي عانها علي و عاني انا لخدمتها
اسمعي القصه هذي تستغربين منها .. من ست سنوات و انا كنت موصلها مع الخدم لباريس .. و انا رايح باريس على اساس اهي قريبه من المغرب .. و قدام الناس انه هي مسافره معي و انا مبيت النيه لاغادير.. و اهي تدري اني اسافر لشغل بس حي تحس .. طيب
قلت لها يا ام دحيم تراني مسافر بعد يومين للعمل و بتركك لحالك مع الشغالات هنا لين يجونك البنات
قالتلي سم و ابشر و عسى الله يعطيك على قد نيتك....
اتعرفين و ايش الي صار؟؟
انا : شنوووووو؟؟
هو: في نفس اليوم رحت سهرت و شربت كثير على الرغم من انه الاطباء ناصحيني كثير..
شربت لين الصبح .. استفرغت دم ... جتطني جلطه 3 ايام ما غير بس افتح عيني الاقيها تقرا قرآن او تصلي جمبي او تدعيلي
طبعا انا مستحقر حالي كثير لاني كنت بروح العب في المغرب و انبسط و هي هنا جالسه تحت رجلي تقرا و تدعيلي
و اعيالي الي هم اولادي مافيهم واحد فكر يكلم
يقولون و اش انسوي به هو كذا طول عمره سكران!!!
و من بعدها يابنتي و انا ما اناظر في هالدنيا غير رضاها
و تعلمت درس كبير في الحياه
الحين اقدر احط عيني في عينها
بالاول كنت لما اغلط في حقها و اهي تقابل اسائتي باحسن من الاحسان والله كانت تكسر عيني
يا بنتي و لا يغرك الرجال تراااااه يبان في عينه
الزين و الشين يا بنتي يبان
انا: اي اشعقبه بعد ما يضيع شبابها
هو: لا ضاع و لا شي قسم بالله هي في عيني احلى من ذي الودره هيفا التلبينيه
انا : عمي فيلبينيه مووو تيليبنيه
هو: الي هوووووو
انا : عمي ييعني ليكون انت مستانس بس !!! اشعقبه بعد ما صك عمرك تسعين
هو: تسعييييييييييييييين جني يركبك قل امين .. هو ولدي منحاش منك من شوي من طوولت السانك
معذووووور لما يقول عنك قصيميه ما ينكسر باسها
انا : احم احم
والله ولدك لعووبي اكثر منك و سرسري
داشر مافي امل ينصلح ابد
هو: ادعيله الله يصلحه
انا : الله يصلحه و يخليه لشبابه بس بعيد عني الله يعافيه
هو: صدقيني والله انا داري انك مثل امه معدنك ذهب و غيرتي فيه كثير بس مو وجهه نعمه
بس خلاص هو عارف قيمتك من زمان
انا: ادري فيه اشووفه يدززلي مسجات يقولي بتجين جنيف هالسنه
هو: الاااااااااااااا على هالطاري عرفتي اخر خبر؟؟
انا: خير لألألألألأ؟؟!!!!
عمي: ماقالوولك عارض البيت للبيع ..وبشتري في ايفيان
انا : اكووووو احد يبيع بيت في لوزان و يشتري في ايفيان !!
هو: اييييييييي اسكتي يا شيخه ما صدقت قالتلي بيعه
انا :منو.. خالتي ؟؟
هو: اييييييييي هي كل خواتها شروا في ايفيان ..طيب.... جتني قالتلي انا كبرت و ما ابي اجلس لحالي في لوزان و مافيها الا ضيقت الصدر
قمت قلتلها ابشري و سمي ماطلبتي الا عزك و ايش تبين ؟؟ ابيع بيت لوزان و احطلك احسن شقه في ايفيان .. هي مستغربه
و ماتدري اني بفتك من ضرايب هالبيت ايفيان ما تجي ربع الضرايب و ارخص اشجاب الي جاب
بسسسسس خليها على فالها
مو تقولين لها
خابرك زين ترفعين عليها السماعه الحين و تقولين لها صايره يا كافي ام هلااااال
ماتصدقين تسمعين خبر الا طرتي صليتي في اذنها
انا : اااااااااااااااناااااااااااا حرااااااااااام علييييييييييييييييييييييك يا عمي
ليش اشوف انا ماقلت لها على سوالف الخط الثاني و لا قلت لها على رفيجتك العراقيه
عبالك بتمشي علي دووووووووووووور الزوج المناضل من اجل الاخلاص
هو: الله يلعنك من قالك ؟ قسم بالله هذي العراقيه مدري عنها و لا شفتها هي مكلمه بالغلط
قسم بالله والله احلف لك جد و لا ادري عن احد
انا : اقووووووووووول عمي هااااااا طلعت ام هلال انا ؟؟
هو: يا شيييييييخه قسم طلعتي انتي عمتي و تاج على راسي بس حسك تجيبين خبر لام دحيم والله تروح فيها
انا : هووووووووووووو اشقالولك مينونه خبله
بس انا اقول يوم انك صرت شريف روما اضبط الدور عليها مو علي
اخراجك ضعيف عندي انا عارفه البير و غطاه
هو: والله اقولك ما اعرفها اشفيك انتي ....
انا : اشدراني عنك انا خايفه على خالتي تحط على راسها مرا
هو: يخسوووووووووووووووووون كل حريم هالدنيا ما عاشت و لا كانت الي تكون لا حشى ما احط عليها مرا ثانيه و انا بعقلي
و حيلي
يابنتي والله اذا الله بلغك و حبيتي و حبك رجلك انشاء الله
بتشووفين ان في اشياء اكبر من الحب اهو احترام لقدرها
لا اكثر و لا اقل
بعد هالعمر ما اسوي في بنت عمي ابد كذا
هذي ام دحيم
اهي جنتي في هالدنيا
انا : عمي اتصدق انتوا الرياييل غريبين ...
و يقطع حديثنا ان دخل عليه ضيف
سكرته منه على عجل
مدري حتى اذا قالي مع السلامه
بس خلاني استغرب من شغلات وايد
الحب القديم
تركيبه الرياييل
تناقضهم
يموتون على حريمهم
و يحبون باجي الحريم للنظر و المتعه و تكحيل العين
اسأله تدور في بالي وايد راح اعرفها من العم بودحيم
بس في اتصالي مرا ثانيه


على هالطاري ترا اهو مو عمي بس احتراما له اناديه عمي
اهووووووووو صديقي اكثر من انه عمي
بس لانه عمره فوق ال 66 و كلا قاص علي يقولي 30
هم هذا شي ثاني الحين في الرياييل وايد يخفون اعمارهم

البيت
الزوجه
المال
الاستقرار
النساء
المتعه
الحب
كلها تناقضات يعشقها الرجل
الله يصبر قلوبنا

انا وعبدالمجيد

مرات الواحد يمشي في طريجه لا له و لا عليه

فجأه يفتح الاف ام تطلع اغنيه اتأجج المشاعر

و هذا الي صار فيني امس

تهاوشت ويا عبدالمجيد هوشه مو طبيعيه

صرخت عليه صراخ لين قلت يا ستار

هوشه عنيفه

دمووووع

بجي

بس كلش ترا البجي في الشارع عشان اغنيه موقف بايخ

خصوصا اذا تطور الموقف و احتجتي كلنكس و كان قوطي الكلنكس المفقووص في الكشن الي ورا

و بغيت اسوي حادث لاني ما اطول

و عيزت اتمقط

يالله بالزور

طلته

ويييييييييييه عمى صج القصر شين

و انا امسح الباجي من الدموع

اي باااااااااااجي

انا لي الحين ما قلت لكم اشصار اصلا

فتحت الاف ام على المارينا

و الا اغنيه صدقني مالت عبدالمجيد الي انا اصلا هابه فيها هاليومين

عبدالمجيد : صدقني ماهي في صالح قلبك الفرقا ..صدقني انك بتتعب لو تفارقني..جرب و ابعد و انا الي بنتظر و ببقى عشان لا قلت لك كلمه تصدقني

انا : اي صدقني ما هي في صالح قلبك الفرقا

بسسسسسسسسسسسس مو بكيف ابوي شسوي مو بكيفي رقعت التلفون في ويهه

اهووووووووووووو جليل حيا ما يستحي

ما يبين في عينه

لا لا لا مووووووووووووكفوو

ميخالف اتعب

بالطقاق

ميخالف ابعد هم بالطقاق

كلشي يهوووووووووون بس البقاء لكرامتي

خو عبدالمجيد هم انت ما يهون عليك الي صار فيني

و لا يهون عليك اللي سوااااااا فيني

مالك امل عبدالمجيد لا تساحلني في اغنيه

عبدالمجيد:ان رحت يعني انا بالله و ايش بلقى؟؟ اقلها يعني من قسوتك بتعتقني

انا : اي ووووووووووالله من قسوتك بتعتقني

محسووووووووووووووووووب علي ماراح القى شي و لا بيضيع شي

عبدالمجيد : لا تحسبني بذوق المر بك و بشقى و الا دموعي على شانك بتسبقني

انا : لا مسكيييييييييييييييييييييييييييييييييييييييييين استرييييييييييييييييييح في المقر بس استريح

مدري ليش

لا لا لا لا لا عبدالمجيد فج عني شوي

عبدالمجيد : ادري بتيجيني و عينك بالشقا غرقى و بتحاول قد ما تقدر ترجعني

انا : التفت على عبدالمجيد و اقوله هذا اهوووووووووو مو انا

اهو الي بيجيني و اعيونه غرقا

لااااااااااهي وايد ادري بس مو ناسي

اهو الي فاقدني مو انا

لان ماكان موجود وايد كثري

انا الي 24 ساعه كنت موجوده

عبدالمجيد : الله يسهل لقلبك سكه الفرقا .. و انا على قولتك ربي يوفقني

انا : ارد على عبدالمجيد و اقوله

صدقني ماهي في صالح قلبك الفرقا ..صدقني انك بتتعب لو تفارقني

.... و اخذ الكلينكس

و امسح دموعي

بعد هوشتي و تحلطمي على الاغنيه

و بعد ما شلع قلبي عبدالمجيد

الله يسامحه

اهداء لكم الاغنيه للمرا الثانيه

بس هذي كانت قصتي مع هالاغنيه و هوشتي ويا عبدالمجيد

شعووووووور بايخ ان الواحد طالع و مستانس و اتنكد عليه اغنيه

تشلع القلب

اهـــــــداء

هلوسه وحده ميته من الحر

بدا الصيف بدا ....

يعني راح يبدا عندي البيات الصيفي

جهزت عدتي

المشاي في الدار ...

طلبت افلام ..

سويت فورمات للاب توب

و بديت في الركود الصيفي

الصحه مازالت في تدهور

ولكن الحمدلله على كل حال

باجر لازم ياخذون مني اربع قراش دم!!!

مدري وين بودونهم يا حسرتي

الله كريم

اذا عندكم اقتراحات للافلام بليز عطوني افلام دراما و رومانسيه لاني من الصيف الي فات ماشفت فيلم سنع

خلاص الحين راح يكون جدولي عباره عن دوام

تسدح

نووم

فيلم

نت

بلعه

نوم

رفيجاتي العزيزات كلش مالي خلق قهاوي و لا طلعه

مالي خلق مجاملات اجتماعيه في الحر

بدأت الاتصالات الهاتفيه بشأن الانتخابات و زياره المقار الانتخابيه

بصراحه لا اسوي نفسي كلش و مهمه

محد عزمني غير مرشحين و كلهم مو في دائرتي

وتبون الصج لما قالتلي رفيجتي يزاها الله خير قلت لها

عسى الخيمه مكيفه

لان ضغطي مرتفع هاليومين و احتاج برد برد مافني حيل اسيح

امس كنت معزومه على العشا

و كانت العزيمه اغلب الي فيها من السلفيات

نطيت انا باستفزاز

هااا ام براك انشاء الله بتعطين السعدون؟؟

تبقق عيونها ام براك !! مخترعه

السعدوووووووووووووون !!

لااااااااا مستحيل اسم الله علي !!

اصلا انا مو على قرطبه مدنيتي على النزهه لي الحين ..

ارد انا اقط روحي على القفنه و بخبث اقول

اهااااااااا النزهه .. عسى احياء التراث طرشولكم مسج قالولكم منو تعطون؟؟

ترد علي ام البراء : و اشفيها اذا اتحدنا احنا يا السلف و اشفيهم احياء التراث!!

ارد عليها انا

لا مافيها شي بس انا ما اعطي عقلي لغيري

ما انطر اوامر عليا من احد

الي مقتنعه فيه اسويه

من الحين اقولكم انا صوتي مقطوع للسعدون

تلطف امي الجو ( مسكينه امي كلا انا مفشلتها عند الحريم ) بس عادي تعودت امي

امي: انا الحمدلله للحين على شويخ يعني بعطي الصقر

بنت خالتي : لااااااا خالتي بيعي الصوت على الصقر ب 6 الاف دينار

امي : هوهوهو هو استغفرالله الصقر يشتري اصوات بعد ؟؟

بنت خالتي : حتى لو ما يشتري انتي بيعي

انا : اي يما تكفين بليز بيعي صوتج و عطيني الفلوس عشان اذا سافرت مو انتي اتحرمين ههههههههه عطيني اياهم انا اخذهم

بدال ما اسكن في فندق 4 نجوم اسكن في 5 نجوم

امي مسكينه كلا تصدق

امي: لا لا لاحراام و الصوت امانه

انا : يما اشفيييييييييييج انتغشمر انتغشمر

امي : منو اتهقون يفوز في النزهه عندكم ..؟؟ هالمرأه الحريم اكيد بغيرون النسبه

ام ناصر : هالمره يقولون حامد الطبطبائي قوي

و الكل يحب عبدالله الفارس له شعبيه قويه

انا : اكيييييييييد عبدالله الفارس منو ما يعرفه مخه نظيف .. فكر .. و ربعه وايد و له قاعده كبيره

و اكييييييييييد اغلب البنات بيعطوونه .... خوووو منو ما يعرفه و تبون الصج ملينا من الي معجعجين في الكرسي و ماسو شي

خلو الشباب .. هالمرا عطوهم فرصه

قطع حديثنا صوت صاحبه العزيمه تنادي على العشا

و كان حديثتنا يدور على الطاوله عن حر الصيف

و الانتخابات

و السفر

و انا في بالي شنو اطلب افلام اشوفها تصبرني على هالحر و تشد من ازري و اقعد في البيت

صدقني

حر حر هالصيف درجه الحراره في القوايل 48

صيف حار جدا


احداث ساخنه

تدهور في الحاله الصحيه


رغبه في اني احذف المستشار بأكبر ماعندي

و يسألوني ليش ما تكتبين

بذمتكم احد له نفس يسوي شي بهالحر

تتصل علي وحده
بذمتكم شوفوا بس الحوار و حكموا!!

يرن التلفون اشيله...انا : الووو هلا شوشو
شوشو : هااااااي وينج اشقاعده تسوين؟؟
انا : والله ماكو توني قاعده من النوم حاطه قهوتي و جريدتي
و قاعده اقراااا الجرايد ...
شوشو: اي جريده ...
انا : القبس ..
شوشو : وييييييييه هالجرايد ..مافيها شي .. تكفين شنو فيها شي يديد ؟؟
انا : والله ماكو قاعده اتابع منووووو الي سجل في هالدوائر و اقرا هالمقالات ..
شوشو : اي دواير؟؟
انا : الدوائر الانتخابيه زلييييييخه
شوشو: اي انتخابات تو الناس الانتخابات في 2007 !!
انا : شنووووووووووووو شنوووووووو شنووووووووو اي 2007
الانتخابات بعد شهر !!!
شوشو : ليشششششششششش من قال مو قالو الانتخابات 2007 يختي هالحكومه مالهم حجوه !!
بعد ما ارتفع ضغطي و قمت اصرخ عليها انا :
اشفيييييييييييييييييييييييييييييج انتي مو انحل المجلس و الانتخابات بعد شهر و الحريم بيدشون المجلس و راح انرشح و ننتخب !!!!!
... شوشو : حللللللللللللللفي حركات !!!!!!!! شنو يعني انحل المجلس ...انحل وين راح ؟؟؟؟
انا : شووشوووووووووووووووووووووووووووووووووووو ترا رفعتي ضغطي بس بس بس خلاص ما اقدر اكمل بليز

بسكر التلفون اكلمج بالليل ...اوكيه
شوشو: انزين نطري انا داقه عليج اقولج ترا نزلت جنطه لوي فيتون اليديده!!!!!!!!

انا : بلييييييييييييييييييييييييييييييز اكلمج بالليل


اذا هذا حال الناخبات و اذا هذا حال بناتنا المثقفات الجامعيات عيل اشحال الحريم الكبار الاميات الي مايقرون و لا يكتبون
اشحال بعض ربات البيوت الي ما يعرفون شي

انا خايفه من هالمجلس
تدرون ليش
لان الحريم عددهم يفوق الرجال
مثلا في دائرتنا 11
عدد النساء 8066 و الرياييل 4000
يعني فرق

المفروض من الحين يقروون ماده الدستوري و يعطونها لاعيالنا في الثانوي
عشان الواحد يكون عنده و لو ثقافه بسيطه
اما الحريم لي ما يعرفون شي و على اولهم طابين رواسي في المجلسسسسس مشكله والله

... على الهامش

اعجبتني نكته ابشروا يابنات كشف باسمائكم و اعماركم يفتر بالدواوين
ههههههههههههههه
بليز من عنده نسخه من هذا الكشف يعطيني اياااااه احتاج اعرف عمر يدتي من عرفتها و اعرفتني و اهي عمرها 25 !!!!!

حق بعض الناس الي تطنزو علي ترا انا سنعت البوست

21/5/2006

يوم تاريخي
يوم النصر
يوم الحل
صج ما صارت خمس دوائر بس
نجحنا
تحركنا سوا شي

الف مبروك

سؤال

كل شوي معورين راسنا في الدستوريه و ما الدستوريه

و احاله الامر الي المحكمه الدستوريه ....

انا بعرف و سؤال بسيط يدور في راسي الخبير الدستوري الدكتور عادل الطبطبائي شنو دوره ؟؟

مو اهو الي كنا نستعين فيه في كل امر دستوري؟؟

يالله يا دكتورنا طول عمرك تنادي في الخمس دوائر و تنادي و تنادي

ليش لما مسكت كرسي في الحكومه ماصارلك اي دور؟؟

تعلمنا الديمقراطيه منك

تعلمنا ابجديات الدستور منك

و يا يومك يا دكتورنا

اثبت لنا ان الي زرعته في عقولنا ماكان حشو كلام

ترا انت كنت مثلنا الاعلى

و اليوم كلنا مصدومين

ماصارت ....حاسونا!!

لا طبنا و لا غدا الشر

لعبوها !!!!!!!

رئيس مجلس الامة يرفع الجلسة نهائيا لفقدان الجلسة نصابها القانوني
سياسي/كويت/امة/مقدمة6.جلسة رئيس مجلس الامة يرفع الجلسة نهائيا لفقدان الجلسة نصابها القانوني
الكويت - 15 - 5 (كونا) -- رفع رئيس مجلس الامة جاسم الخرافي الجلسة نهائيا اليوم اثر فقدانها النصاب القانوني على ان تستكمل غدا .وقال الخرافي انه نظرا لعدم توافر النصاب ترفع الجلسة نهائيا على ان تستكمل عند الساعة التاسعة من صباح الغد .وكان الخرافي قد رفع الجلسة لمدة نصف ساعة لاخلاء القاعة من الجمهور بعد اخلالهم بنظام الجلسات
وكاله الانباء الكويتيه كونا

امصخت

15/05/2006
الحوار السياسي الراقي شيء والصراع السياسي الخفي شيء آخر.اذا صدقت الأنباء بان الحكومة ستتجاوب مع بعض النواب لاحالة مشروع قانون تعديل الدوائر الانتخابية الى المحكمة الدستورية للبت في دستورية المشروع، فان ذلك يعتبر امرا 'معيبا قانونيا' للحكومة للأسباب التالية:1- ان الحكومة نفسها هي التي احالت المشروع الى المجلس، وهي التي تملك جهاز الفتوى والتشريع وتمتلك جيشا من الخبراء الدستوريين، وبالتالي فان مشاريعها يجب ان تكون مدروسة دستوريا بدرجة كبيرة وموافقتها على التحويل يعني:أ- انها لا تثق بخبرائها الدستوريين.ب- انها لا تثق بخبراء الفتوى والتشريع.ج - انها تضع المشاريع دون استشارة احد! وهي الطامة الكبرى ان فعلت ذلك.2- ان الحكومة تريد من تحويل المشروع الى المحكمة الدستورية:أ- إرضاء مجموعة من النواب لحاجة في نفسها!ب- تريد إضاعة الوقت لحين موعد الانتخابات المقبلة كي تبقى الدوائر الانتخابية على ما هي عليه.ج- تريد إضاعة وقت المحكمة الدستورية وهدره بطريقة غير مسبوقة من أي دولة في العالم من قبل.3- الحكومة لا تستطيع امام المد الاصلاحي الدولي وامام برنامج الأمم المتحدة الانمائي الذي يطالب الدول النامية بالتنمية السياسية والاصلاح السياسي، لا تستطيع امام ذلك كله الامتناع، ولكنها في الوقت نفسه تستخدم كل وسائل الدولة القانونية وحقها في اللجوء الى المحكمة الدستورية للظهور امام العالم بمظهر الاصلاح من جهة، ولتضييع الوقت من جهة اخرى.واذا قامت الحكومة بهذا المسلك فانها بالتالي تعلن عدم التعاون للنصف الآخر من الاعضاء الذين يمكنهم حينها استخدام الادوات الدستورية التي منحهم الدستور اياها ويقومون بالاسلوب نفسه الذي تمارسه الحكومة.وعندها فان التوتر السياسي في البلد سيصل الى مداه ويكون المتسبب فيه هي الحكومة بالدرجة الأولى من اجل ارضاء مجموعة من النواب، وسنكون يومها 'فرجة للعالم'. وان كانت على المستوى السياسي ستكون قمة الممارسة الديموقراطية في دولة من دول العالم الثالث يستخدم المجلس النيابي اعلى درجات المساءلة الدستورية للسلطة التنفيذية وسيكون حينها اما 'من وأما فداء'.

عبدالمحسن يوسف جمال

15/5/2005

ورَكـوبٍ تعـزفُ الجـنُّ بِـهِ
قَبلَ هَذا الجيـلِ من عَهـدٍ أبـدْ
وضبـابٍ سفـرَ الـمـاءُ بِهـا
غرقَتْ أولاجُهـا غيَـر السُّـددْ
فَهِيَ موتى لَعِـبَ الـمـاءُ بِهـا
فِي غُثـاءٍ ساقَـهُ السَّيـلُ عُـدَدْ
قـد تبطنْـتُ بطـرفٍ هيكـلٍ
غيـرِ مربـاءٍ ولا جـأبٍ مُكـدّ
قـائـداً قُـدّامَ حـيٍّ سلَفُـوا
غيـرَ أنكـاسٍ ولا وغـلٍ رفـدْ
نبـلاءِ السّعـيِ من جرثـومـةٍ
تتـركُ الدّنيـا وتنمـي للبعـدْ
يزعـونَ الجهـلَ فِي مَجلسِهِـمْ
وهمُ أنصارُ ذِي الحلـمِ الصَّمَـدْ
حُبُسٌ فِي المَحلِ حتّـى يُفسِحـوا
لابتغـاءِ المَجـدِ أو تـركِ الفنَـدْ
سُمَحـاءُ الفقـرِ أجـوادُ الغِنَـى
سادَةُ الشَّيـبِ مَخاريـقُ الـمُردْ

الطليعه

خيبة أمل كبيرة في حكومة الإصلاح..!!
·
كتب عبدالله النيباري:


إن المأزق الذي تمر به الكويت في شأن تقليص الدوائر إن كشف عن شيء فهو يكشف عن خلل جسيم في آلية صنع القرار على مستوى مؤسسة الحكم وإدارة الدولة، فقد انقضت ثلاث سنوات منذ إدراج موضوع تقليص الدوائر على جدول أعمال مجلس الأمة وإقرار مجلس الوزراء واعترافه بفساد نظام الخمس والعشرين دائرة إلا أننا حتى الآن لم نر النور في نهاية النفق، وكلما اقتربنا من الحسم تحركت قوى الفساد المعارضة لأي إصلاح أو تصحيح في وضع العصا في العجلة، وإفشال الوصول الى أي صيغة تعالج السلبيات والمثالب في نظام الخمس والعشرين دائرة·
الكويت بسبب الخلل في آليات اتخاذ القرار والميل للانفراد بالسلطة تخلفت الى مؤخرة دول الخليج وتراكمت المشاكل التي تعاني منها على مستوى الاقتصاد أو توفير السكن أو الوظائف للداخلين لسوق العمل، أو معالجة تخلف التعليم أو ضعف مخرجاته أو تدمير البيئة أو اجتثاث أو الفساد ومكافحة التعدي على أملاك وأموال الدولة أو انتشار الجريمة·· إلخ·
ومما يدعو للتساؤل إذا كانت مؤسسة الحكم أو الجهات المتقدمة عاجزة عن حسم مسألة تقليص الدوائر والتي لا يتطلب حلها غير تعديل مادة في قانون الانتخاب، فكيف يطمئن الى قدرتها على معالجة المعضلات الأكثر تعقيدا والتي لا يكفي حلها بتعديل وإصدار قانون، كالقضايا المشار إليها أعلاه والتي تحتاج الى تشخيص سليم وبرامج علاجية ناجعة·
والأمر الغريب أن الجهات المتقدمة أو من بيدهم الأمر حسب تسمية جريدة "السياسة" لا يستمعون إلا لفريق التعطيل والإعاقة التي لا ترفع إلا قراءات محرفة ومعلومات مغلوطة وتحليلات مضللة وإلا كيف نفسر اعتراضها على توصية اللجنة التي كلفت بقرار من مجلس الوزراء عندما كان برئاسة سمو الأمير، وبذلت هذه اللجنة جهدا شهد الجميع بأنه راعى أقصى درجات الموضوعية الممكنة وأعلى درجات الحيادية، وإذا كانت هذه اللجنة قد حظيت بثقة صاحب السمو الشيخ صباح الأحمد ومباركة سمو الأمير الراحل الشيخ جابر وسمو الأمير الشيخ سعد وحظيت توصيتها - بتقليص الدوائر الى خمس - بتأييد ثلثي أعضاء مجلس الأمة (29 نائبا) ومساندة القوى الحية في المجتمع الكويتي من مؤسسات المجتمع المدني بما فيه الشباب عدة المستقبل·
إذا كان الأمر كذلك فما هو وجه الاعتراض على هذه التوصية، وكيف تتقبل الجهات المتقدمة ومن بيدهم الأمر تفسير موقف كل هذه الجماعات التي عبرت عن رأيها وموقفها وفقا لآليات الدستور على أنه تحد أو إملاء أو فرض أو تحريض أو أنه استضعاف للجهات العليا·
وكيف تغب رأي الأقلية قراءتها المضللة وتفسيراتها المغرضة على رأي عقلاء الناس ممن نقلوا لها النصح الصادق والرأي السديد·
وهنالك سؤال يطرحه الناس لماذا تختار مؤسسة الحكم أن تضع الأسرة الحاكمة في مواجهة مع قوى الشعب التي عبرت عن وفائها وتمسكها بالشرعية إبان غزو عراق صدام لوطننا وقدمت الشهداء والأسرى، ومرة ثانية أثبتت تماسكها عندما واجهت البلاد أزمة انتقال السلطة، التي لولا موقف مجلس الأمة بالتمسك بآليات الدستور آنذاك لبقينا حتى اليوم نعاني من إفرازات أزمة صراع الأجنحة·
وموقف مجلس الأمة آنذاك لم يكن مضمونا لولا مساندة ودعم فئات الشعب كافة· فكيف يكون موقف هذه القوى موضع تقدير وثناء ويوصف بأنه موقف يتسم بالصدق والأصالة، ويوصف اليوم بأنه موقف تحد وتحريض وإملاء واستضعاف للسلطة·
ولمصلحة من يزج بالبلد الى مستنقع التوتر والتأزيم وإعادته لأجواء حل المجالس وتزوير الانتخابات ومحاولات تعديل الدستور·
إن الحديث اليوم عن تعديل الدستور كمخرج لتعديل الدوائر لا يمكن أن يفهم إلا أنه محاولة عبثية لإجهاض كل معالجة جادة لمسألة تقليص الدوائر·
ثلاث سنوات مضت رفضت فيها الحكومة الاقتراح المقدم من النواب عند عرضه على مجلس الأمة في بداية عام 2004، طالبة التأجيل وإعطاءها فرصة للدراسة وشكلت لجنة من خمسة وزراء برئاسة وزير العدل آنذاك أحمد باقر، وأصدرت بيانا قالت فيه إنها لا تعارض مبدأ تعديل الدوائر كمدخل لتصويب العمل البرلماني والحد من الممارسات الضارة غير السليمة المتمثلة بتكريس القبلية والطائفية وشراء الأصوات والتدخل في الانتخابات والتأثير على الناخبين·
وعندما تقدمت اللجنة برئاسة باقر بتقريرها موصية الأخذ بنظام العشر دوائر، تحركت قوى التعطيل والإعاقة لتطعن في حيادية اللجنة ورئيسها· بالرغم من أن أحمد الفهد عضو فيها·
وتم ابتداع مشروع مجلس الأمن الوطني وبعد لأي ومناقشات عقيمة في مجلس الوزراء آنذاك أحيل كلا المقترحين، اقتراح اللجنة الوزارية واقتراح ما سمي بمشروع مجلس الأمن الوطني، إلى مجلس الأمة، وعندما عرض الاقتراحين على مجلس الأمة وحانت ساعة الحسم بمباشرة المجلس التصويت الذي كان من الواضح أنه يسير لصالح مقترح اللجنة الوزارية وقف رئيس مجلس الوزراء ليعلن طلب الحكومة التأجيل مرة ثانية لإعادة دراسة الموضوع، وهكذا كان·
وفي 10/10/2005 أعلن مجلس الوزراء عن تشكيل اللجنة التي قدمت تقريرها مؤخرا برئاسة النائب الأول لرئيس الوزراء وزير الداخلية وعضوية خمسة وزراء بمن فيهم محمد شرار وأحمد الفهد وخمسة من خارج مجلس الوزراء جميعهم وزراء سابقون وفيهم اثنان نواب رؤساء مجلس الوزراء· وتقدمت اللجنة بتقرير من 247 صفحة بناء على دراسة معمقة ومقاربة موضوعية أوصت فيه بالأخذ بنظام الخمس دوائر وإذ لم يؤخذ بهذا الاقتراح أوصت بالعودة للأخذ بمقترح اللجنة الوزارية السابقة التي ترأسها وزير العدل آنذاك أحمد باقر وأحمد الفهد للاعتراض على تقرير وتوصيات اللجنة التي كانوا أعضاء فيها بل تجاوز الأمر ذلك للطعن في حيادية زملائهم أعضاء اللجنة·
وإذا كان لدى شرار وأحمد الفهد اعتراض جدي أو اقتراح بديل يختلف عن رأي غالبية أعضاء اللجنة فلماذا لم يطلبوا تثبيت اقتراحهم البديل في تقرير اللجنة، بحيث يأتي هذا التقرير شاملا رأي الأغلبية ورأي الأقلية وهو الإجراء السليم والتقليد المعمول به في الدول الديمقراطية· بل لماذا لم يطرحوا مقترحهم البديل منذ تقديم تقرير اللجنة·
إنهم يتحدثون عن اقتراح عشر دوائر دون أن يفصحوا حتى الآن عن أي عشر دوائر يريدون، مما يؤكد أن أطروحاتهم هي لإجهاض الوصول الى تعديل الدوائر الانتخابية التي سبق أن أقر مجلس الوزراء بضرورة إجرائه لتصويب الممارسة البرلمانية وتعزيز الديمقراطية·
واليوم يطرح علينا فريق شرار الفهد عبر وسائل إعلام قوى الفساد فكرة تعديل الدستور لزيادة عدد أعضاء المجلس الى 60 كمحاولة لخلط الأوراق ووضع العصا في عجلة إصلاح النظام الانتخابي، لأنهم يعلمون أن مشروع العبث بالدستور لن يمر لأن ثلثي أعضاء المجلس (29) نائباً مؤيدون لنظام الخمس دوائر، مما يعني أن المحصلة لاقتراحهم ستكون بقاء نظام الخمس والعشرين دائرة الذي يتيح لهم السيطرة على الانتخابات والتلاعب فيها وفتح الباب على مصراعيه لمزيد من شراء الأصوات وإنتاج مجلس كسيح تسيره وتسيطر عليه قوى الفساد·
وهكذا تقف الكويت اليوم على مفترق طرق إما التوافق على حل مرض وهو التمسك بتقرير اللجنة الوزارية وتقديمه لمجلس الأمة ليقرر ما تراه، الأغلبية أو المجازفة بدفع البلد الى أجواء التوتر والتأزيم·
إزاء هذا المشهد فإن ما ينتظر من الجهات المتقدمة ومن بيده الأمر أن تفسح المجال للآليات الدستورية بأن تأخذ مجراها وعدم استباق أو مصادرة صلاحيات السلطات الدستورية، السلطة التنفيذية والسلطة التشريعية·
عندما اعترضت أغلبية المجلس عام 1964 على تشكيل الحكومة طلب من الحكومة التي كان قد أصدر مرسوم بتشكيلها أن تستقيل وأصدر مرسوم بتشكيل حكومة أخرى، تمسكا وتوافقا مع الآليات الدستورية·


حوار بين الحق والباطل

تمشى الباطل يوماً مع الحق :-

فقال الباطل : انا اعلى منك رأساً .
قال الحق : انا اثبت منك قدماً .
قال الباطل : انا اقوى منك .
قال الحق : انا ابقى منك .
قال الباطل : انا معي الاقوياء المترفون .
قال الحق : وكذلك جعلنا في كل قرية اكابر مجرميها ليمكروا فيها وما يمكرون الا بأنفسهم وما يشعرون
قال الباطل : استطيع ان اقتلك الان .
قال الحق : ولكن اولادي سيقتلونك ولو بعد حين .
اللهم اعلي كلمة الحق وانصره إنك على كل شيئاً قدير

دقيقه حداد على روح الدستور

دستور دولة الكويت
مادة 6

نظام الحكم في دولة الكويت ديمقراطي ، السيادة فيه للامة مصدر السلطات جميعا ، وتكون ممارسة السيادة على الوجه المبين بهذا الدستور .
مادة 50
يقوم النظام على اساس فصل السلطات مع تعاونها وفقا لاحكام الدستور ولا يجوز لاي سلطة منها النزول عن كل او بعض اختصاصها المنصوص عليه في هذا الدستور .

مادة 51
السلطة التشريعية يتولاها الامير ومجلس الامة وفقا للدستور .
مادة 80
يتالف مجلس الامة من خمسين عضوا ينتخبون بطريق الانتخاب العام السري المباشر ، وفقا للاحكام التي يبينها قانون الانتخاب .
ويعتبر الوزراء غير المنتخبين بمجلس الامة اعضاء في هذا المجلس بحكم وظائفهم .

مادة 81
تحدد الدوائر الانتخابية بقانون .

مادة 108
عضو مجلس الامة يمثل الامة باسرها ويرعى المصلحة العامة ، ولا سلطان لاي هيئة عليه في عمله بالمجلس او لجانه .

بعد ما عرضت عليكم بعض من نصوص الدستور الكويتي
الي كفل لنا جميع الحقوق و الحريات و الاهم منها ديمقراطيه الرأي
و لكن تعالو انشوف اشقاعد يصير في الكويت من بلبله
مدري هل مصلحه الكويت هي مصلحتهم
او انهم يعتقدون ان الكويت عباره عن مصالحهم فقط!!
الكويت اكبر من هذا كله
للاسف صار الكل يبي يغير الدستور و لا يحترمه
انا اعتقد ان الدستور صار عندهم ارخص من ورق المحارم الي في التواليت
كل من ياخذ منه على قد حاجته
يخلص اموره
و يرميه
لا تزعلون
بس في ناس اعفست الحسبه كلها
اعفست البلد وياها

فكرا اشويه و خلونا نعبر عن راينا
الكويت لو ماصارت خمسه
ترا احنا نبيها خمسه
احنا الكويتين
يا ناس نبيها خمسه
اما الدخيلين على الكويت
الي ما يعرفون عن الكويت غير الجواز و الجنسيه اليديد
و القروض و الحكوميه
ترا هذول مو كويتين
الي يبونها مليون دائره
لمصلحتهم و تخليص معاملاتهم
ترا هذول مو كويتين

الكويتي الصح ولد الديره ولد هذا البلد ابا عن جد تربى على الارض الطاهره
يبيها خمسه
اما عوير وزوير و المنكسر و الي مافيه خير
الي توا ياي من عشيرج و مغسل سياايير الشيوخ
و يحسبونه علينا كويتي
ما يبيها خمسه

فكروا صح

اذا تبونها خمسه

قبل النوم

حر ...ملل .. شغل وايد .. او بالاحرى ضغط شغل ..

مود تعبان

نرفزه

على اقل شي اتنرفز

ابي شي يضحكني

اشعلامي مدري !!

هذا اليوم الثالث و انا احاول اعدل مزاجي و ينعفس اكثر

و لا قاعده اجامل

و لا قاعده اغير من طبعي

الي حواليني كلهم يسألون

اشفيج

مدري لحد يسألني

اشفيني بالضبط مدري

يمكن قلق

نرفزه

ناس اتقط كلام ما اتثمنه

ناس تتعامل معاك على اساس الميانه و اهي تجرح

ناس ماخذه عليك

و يعني مسوين نفسهم يمونون وايد

يجرحون وايد

امس و انا طالعه من المستشفى

شفت وحده من صاحباتي

حامل و تنطر الظاهر بولدونها

مت انا عليها من الخوف

شفت غرفه العمليات

انصعقت

شفت وحده ملحفينها

بغيت اموووووت

يا ناس مو ناقصه انا

مووووت

ليش اشوف هالموت جدامي وين ما اروح

ارجع البيت

اخوي متضايق

واحد يعز عليه وايد

توه طالع من دوانيتهم و توه كان شايفه

يطلع من دوانيه ثانيه بلحظه يحترق بحادث سياره و يموت

اخوي متأثر لانه شايف الريال قبل وفاه بساعه

لألألألألألألألألألأ بليز مو وقته طاري الموت

توني انا شايفه شي يصروع

افتح التلفزيون

مناظر ذبح و صراخ في الاخبار

اسكر التلفزيون

اروح فراشي

اغطس في كفري

انخش عن الدنيا كلها الا ربي

ظلام

عتمه

وحده

وحشه

اتخيل نفسي في القبر

لألألألألألأ

فطيم لو ياج ملك الموت الحين مستعده للقبر!!

لا بليز ربي

الله يخليك لا تاخذ امانتي الحين

للحين ما شبعت من الدنيا

اسأل نفسي

ليش فطيم !؟؟

اشتبين من الدنيا

ابي يا ربي اعيال ؟؟

عشان ما اموت وحيده

عشان اكو احد يدعيلي

ارد على نفسي

هذا منطق بالله !!

بالله عشتي مليون سنه و ماعندج اعيال !؟؟

يعني نهايه العالم بتروحين جهنم

لألألألألأ

لان ما عندي علم احد ينتفع فيه

و لا عندي ذريه تدعيلي

يا حسرتي

بمووووت بروحي

و محد يدري عني

ياربي وايد ذنوووب

وايد

وايد فتن وايد

اخطط حق الصيف بس ما اخطط حق القبر

ياربي ارحمني

بس تعبت وايد من التفكير

اتقلب على الويه الثاني

بسم الله

ما بقى ايه ما اعرفها ما اقراها

بس ما يتني النومه

اكيد ما اتييج النومه

من ذنوبج

قومي استغفري

صلي

سوي شي حق قبرج

سوي شي حق عمرج

بس تتحلطمين

ما يدري شيفيدج هالتحلطم

من تصبحين لين تمسين و انتي

ذنوب

تجاملين فلانه

و تقصين على فلانه

و تزعلين فلانه

و كله حش

و قرض

فجأه اتذكر صراخ امي كل صبحيه قبل لا اطلع و اهي تقولي

زاااانيه

زاااااااااانيه

الي تتبخر و تطلع من بيتها

ويشمها ريال

زانيه

اووووووووف

بس نامي فكيني

و انام

اقوم الصبح

متعسره اكثر

افش خلئي في السياااااره

اقص على نفسي

اسمع قران الصبح و انا رايحه

يعني موديلج يا فطيم تقصين على عمرج

متبخره و طالعه و تسمعين قران مدري ليش

بسسسسسسسسسسسسسسسسس تعبت

فكيني اشوي

خفي عني

ادخل الشغل

تعب تعب تعب

اطلع في الزحمه و الحر

45 دقيقه على ما اوصل البيت

ادخل

اشوفه جدامي

قاعد ينطرني

يعصب علي

ليش لما دخلت ما بسته

ابوسه على راسه

يناديني

قطيييوتي

ترا يبتلج المنجا الي قلتي لي عنها

و سوينالج الزبيدي بطريقتج

و يبتلج البرد الي تبينه

و ترا الانانس الي تبينه ماكو

و شريت لج سيريلاك

فشلتيني

اشكبرج

للحين تاكلين سيريلاك!!!

اتغدا

احاول ارتاح اشوي

امي تتصل مليون مرا

تقولي انها صارلها يومين مو نايمه

لانها حاسه

ان فيني شي

و تحن علي اشفيج

مزاجي

متعكر يما

مدري اشفيني

كل شي ابيه

ما احصله

و كل الي عندي ما ابيه

تسكر التلفون في ويهي

و تنزلي تحت

هذا يسمونه بطر

بطر

لان كل شي عندج

تدورين الي ما عندج

اقرر اني راح اسافر

اقدم على بعثه

و على امل تطلعلي

طبعا بدون استشاره احد

لان ادري لو تم الموافقه عليها

راح ارووح

حتى لو الكل معارض

ارجع اقلب المحطه

منطر مووووووت

و قتل

و تشرد

دم

و هذي الدنيا

لما نكون مضايقين

ما نشوف الا الجانب الي موزين

و لما نكون منحاشين من نفسنا

نبي نسوي كل شي عشان ما نواجه عمرنا

نفسي تبي وايد شغلات

بس لو تموت ماراح تحصل عليها

مو عشان ماعندي ثقه بالله

بس عشااااان ماراح اخليها تمشى ورا هالدنيا و تنسى الاخره

هذرت اليوم وادري كلامي كله خرابيط

بس هذي شخابيط زمن فيني لما احس اني بموت بروحي

لا يطول غيابك

لايطول غيابك ... ثم اخذ عليه

لو تخليت عنى ... عنك قلبي ماتخلى

العذر والتعلل والحكي ... مانبيه

من تحرك فؤاده ... بالهوى ماتخلى

طبعي الصبر لكن وش عليه ارتجيه

من طويل الصبر يعقوب وايوب ملا

دامني حي عطني وش بقي نحتريه

مابي دموعك ...اللي عقب موتي تهلا

مابقي بالعمر مقدار ماراح فيه

كل مازل يومٍ ... يوم بالعمر ولى

مايعرف الجمر مثل الذي يكتويه

احد يدفا بناره ... واحد فيه يتصلى

يامن القلب حطيته براحة يديه

مارضى له مكان غير كفك محلا

كم تعذر وعيا عن هوى محتويه

لين طاح بيمينك بالغرام وتجلى

خالد الفيصل

اهـــــــــــــــــداء

الحياه بحاجه الى رجل بس اكيد مو بوضاري

بعد ما خلصت من صلاه المغرب

انادي على ام الخير اقولها يجهزون عمرهم و السياره عشان نطلع انتمشى شواي و اشتري اغراض باجر اختي و اعيالها و ريلها و اخوي و الاهل كلهم اهني

....

اخذ ولدي من غير الخدامه اخليها اتريح شوي

ننزل انتمشى اشتري بعض القروضات و الحلو ...

الجو عجيب .. يالله يا ريت الجو عندنا في الكويت طول السنه جذي

ام الخير اتناغي فهودي و اتلعبه

انا عيني على برا

اسرح شوي بخيالي

و ارجع اندمج في ام كلثوم

وارد ابتسم ابتسامه بارده لام الخير و فهود

لاني فعلا ما ادري شتقوله

كلش انا مو وياهم

و احنا في الرده

نمر ناخذ كنافه من حبيبه

نرجع الوقت متأخر

حياتي هالياهل نام و قعد عشر مرات

يداد حق هالخدامه مسكينه اشلون اجتوفها ما طاحت انا ساعتين زمان ماني قادره

..........

ارجع اخذ شاور و اسحب كفري و انسدح في الصاله

اتيني الشغاله اتقولي ان فهودي نايم

و تسألني اذا ابي شي او شنو ابي باجر على الريوق عشان اتوصيهم

اقولها مشكوره ام الخير عارفه شنو يبون باجر غدا

بس ريوق ما ابي

انتي روحي نامي مالج شغل فيني

او اذا تبين تطالعين تلفزيون تعالي قعدي

تقولي انها بتدخل تاخذ شاور و بتريح ..لان فهودي يتفزز وايد في الليل

...

اقعد انا اجابل فيلم دعاء الكروان الي شايفته مليون مرا

و كل مرا اشوفه ابجي اكثر

...

انام

اتقعدني ام الخير لصلاه الفير

ارجع انام لي الساعه 10 الصبح

اقعد اسنع و ارتب وياهم اشرب قهوتي

ابخر المكان

و على الساعه 2 الظهر يتحول هذا البيت المهجور و المكان الميت الهادي

الي جنه

اخوي و اعياله

و اختي الحنووونه

و بناتها

زوجها صديق العايله

و الاب الروحي لي

اسلم عليهم بهدوء و ابوس فيهم

بس لما شفت اختي

حضنتها حيل

لميتها و بجييييييييييييت بجي الايام و السنين الي فاتت

ابجي بحرقه و قهررررررررر

ابجي و على لساني كلمه وحده

طلقني

طلقني

طلقني

الغريب الي في الموضوع

ان محد من اهلي يدري ان من اسبوع استلمت ورقه طلاقي

ما بغيت اخرب عليهم عطلتهم ووناستهم

كل من كان عنده امل في العوده

الا قلبي المجروح ماكان يبي الرده

بس لا تسألوني ليش ابجي على طلاقي

تكسر كل شي جدامي

اطيح من طولي

ام الخير و خدامتي و اختي ياخذوني لي غرفتي و على فراشي

اتشربني اختي الماي بيدها

ياسمين اختي: تعوذي من بليس تعوذي من بليس هذا الشيطن يبيج جذي يقص عليج

وين ايمانج وين ثقتج في الله

ربي ما يضيع حق احد

تبجين على هذا ؟؟

الي باعج بيعيه

و ليش زعلانه انتي الي طالبه الطلاق

تعوذي من بليس

اشرب الماي و ابجي

مقهوره

يرن التلفون

ابوي يتطمن على اختي و اعيالها

أأشر لها اني ما اقدر اكلمه قوليله مو يمج

...

و ارتاح مع اختي اشوي

و اعطيها تفاصيل قصه الطلاق الاخيره

و اجرائتها

و اقولها عن كل شي

و اقولها ان الحين اهو اخذ اعياله و سافر فيهم في الصيف بعوض

وبسوي نفسه الاب المثالي فجأه

...

اقعد مع اختي من طول الوقت

لي صار بالليل

ترجتني و لزمت علي نطلع

اعتذرت منها

و بصراحه حبيت اقعد في هدوء شوي

فانتهزت فرصه طلعتهم و قعد ويا ام الخير

نشرب قهوتنا

و نستمتع

انا حاسه ام الخير فيها شي

قلبها مقروص بتموت تعرف تكمله القصه

اصلا انا ادري اهي جهزتلي القهوه و البرنده و الفاكهه

عشان تقعد وياي و تعرف كل شي

..

انا : ها ام الخير مستعده تسمعين الباجي طبعا

ام الخير: اكييد

بدون مقدمات

اكمل لها عن خيانته الثانيه لي بس هالمره في السفر ...سافر على اساس مهمه و عنده سفر و تعرف على وحده هناك للاسف عاش معاها 10 ايام بالحرام

كانه يعرفها من سنين

هذا الوقح الي اهو زوجي

صار عنده الامر جدا سهل

استمرت علاقتهم..لين بعد السفر

كشفت انا الامر

و ناضلت اكثر و اكثر

و اخذته في سفر لمده شهر اناوياه بروحنا ضنا مني ان بينساها

بس صرت انا احس ان نهايتي وياه قربت

او حياتي قام يدخلها عنصر خطير

مافي استقرار ابد

اول ما رجعت الكويت

فاتحت ابوي في الموضوع

شرالي على طول بيت في الروضه

يديد بس اجرته

من غير ما يدري سالم

ابوي يبي ينسيني السالفه و الموضوع

شرالي ابوي سياره يديده

قامت القيامه عند سالم

قلت له ... ابو وبيهدي بنته فيها شي!!!

قالي يا انا يا السياره

شوفي يا ام الخير اذا الريال وصل لي هالمرحله

عرفي انه بايع

و يتلكك

قامت تصير مشاكل بسيطه

لكن المرا الي كانت معاه في السفر

مازالت موجوده

عرفت انا هالشي بعد سنه !!!!

انا اهني عزمت على الطلاق

و الانفصال

لازم يا انا يا اهي

و طبعا ظليت اعايره انها بنت مو زينه

و انها اي شي

و انها دخيله

لانها لو زينه مو معاك بالحرام

بس لانك وصخ و قذر فهذا مستواك انت

قمت اخاف على اعيالي

صار مافي استقرار في البيت

بس لان ادري زوجي ما عنده مكان غير هذا البيت فمستحيل راح يطلع من البيت

تدخل ابوي

قام يقوله اهي شافت حالها

و اهي ما تحترمني و اهي و اهي

حط كل بلاويه و اعيوبه علي انا!!!

ليش بالله انا قلت لك خون او خربط!!

و الا انت الي صرت ما تبي الا الحرام

صرت تتلذذ فيه

الحين اهو درا ان موضوعه صار مكشوف

فقام وتزوج حيزبونه

و لما تزوجها

انا اهني استعجلت في اجراءات الطلاق

و ما بين المحاكم و هالسوالف

اخذ الموضوع شوي وقت

طلعت المؤجرين

سويت بيتي

طلبت منه ان نبيع بيتنا و كل من فينا ياخذ نصيبه

فعلا بعنا البيت

لانه انا كرهت البيت

و اهو ما كان يقدر يشتري نصيبي في البيت

و انا سكنت الحين في البيت اليديد

و لما كان اهو مسافر ويا الاعيال صدر الحكم

و تطلقت بالتوكيل

ماتحملت الوحده

ييت اهني الاردن مع فهد

.......

و هذي زبده الموضوع و القصه باختصار

ما اقدر يا ام الخير ادخل في تفاصيل اكثر

لان راح تنبش جروح وايد

و انا ماسكه نفسي و دموعي و لا ابي اطيح

ابي الله يخليني لاعيالي

ما ابي يرجعون من السفر على بيت كئيب و حزين

و ام تبجي الليل و النهار

عشان جذي خليتهم يسافرون بروحهم

ابيهم يستانسون في الصيف بعد ما عاشو سنه كلها مشاكل و بلاوي

و ايد اثرت على نفسيتهم

انا اهني الحين

عشانهم

ابي انسى الجرح

او اخفف منه

....

استمر على هالحال

اكثر من اسبوعين

مابين ضحك و بجي و في الليل كل الذكريات تطلع

عشان ما انام

الظاهر عيني تعودت

.....

بس مثل ما يقولون

اول الغيث قطره

مفاجأه ما بعدها مفاجأه

ولدي خالد مع ابوي

واااااااااااااااااااي

خالد ولدي في حضني

يا شقوووووووووووووووول ولهت عليك

خنشووف

خالد: كاني هذا انا يعني اكيد خالد بالله منو!!

ابوج بدلني في صعيدي مثلا!!

انا : يا كرهك انت للحين السانك طويل ما تقول ولهان على امي

خالد: طالع على ابوي

انا : المه اكثر اي والله صاج ما جذبت على ابوك

بعد يومين في الاردن اخذ خالد و نروح العمره

انا وياه و ابوي

استمتع في الكعبه يومين مروا

كانهم حلم

في العمره شي مسح على قلبي

شي انغسل

في كل مرا اغسل فيها في ماي زمزم

همومي كلها تطيح

في كل ليله اصلي فيها اطلع من الحرم بعد الشروق و يطلع هم السنين كله مني

يالله ياربي اشلون جذي الواحد

كنت دايما ادعي ربي و انا في صحن الكعبه

يا رب عبيدك في دارك

فقيرك بفنائك

يرجوا رحمتك و يخشى عذابك

كنت لما ادعى اسمع الطيور تسبح فوقي

استبشر خير

و ان الله بعوضني انشاء الله

ارجع من العمره

على الكويت

مع ولدي خالد

بعدها بيوم توصل اختي و معاها ولدي فهد و الخدامه

ولدي ضاري راجع الكويت قبلي بيومين

يومها لما شفت ولدي ضاري

زال همي

و حسيت فعلا

ان معاي رجل للزمن

معاي سند

معاي حبيب

معاي كل سنين عمري و لا ضاعت

يرجعون باجي اعيالي

و بعدها باسبوع

تبدا المدارس

و انشغل وياهم في المدارس و اللويه و الطلبات

و التدريس

و هواش الصبح

و صراخي عليهم الظهر

محد يغير ملابسه قبل الغدا !!

مدري ليش اعيالي انا بس الي يتغدون في هدوم المدرسه و الا الكل جذي!!!

و تمر الساعات و تمر الايام

و يمر الوقت

انا ما نسيت

بس انشغلت

ربي عطاني العيال الي نسوني شوي

مو بيدي ما احزن على نفسي

بس ما عندي وقت احزن على ذاتي

لاني مشغوله فيهم

الحياه مو مثاليه

انا مثل ما انا

و ابو ضاري عايش بحياته و يمكن يكون مستقر

اييهم كل خميس يتغدا معاهم و انا اطلع في هالوقت

لانهم ما يبون مرت ابوهم

و هذا شرطي في انه يشوفهم

يطلعون معاه يوم الجمعه العصر

بس مو كلهم

..

في امور وايد في حياتي و فراغ في حياتي يحتاج الى رجل

بصراحه كل شي في هالدنيا يحتاج الى رجل

غريب امر الحريم الي يقولون ممكن العيش من غير رجل

ابسط شي .. البيت هذا يحتاج رجل يديره و رجل واقف على الخدم و السواق يهابونه

ألسنه الناس تحتاج الى رجل تسكتهم

كل امرأه في هالدنيا محتاجه رجل

بس اكيد مو انت يا ابو ضاري

بكاء ام

على انغام اغنيه سألتك حبيبي لوين رايحين
تدندن
سألتك حبيبي لوين رايحين خلينا خلينا تسبقنا السنين
.......

شوفي يا حجه مريم يا ام الخير قبل اي شي و قبل كل شي لازم تعرفين اني انا و زوجي كنا زملاء في الجامعه
مو نفس التخصص بس نلتقى في مواد مشتركه

طبعا ام الخير ما افهمت شي .. قامت بنتها و ترجمتلها
..
زوجي بوضاري اكبر مني بثلاث سنوات بس تعرفت عليه في اول سنه من خلال نظراتنا
في الجامعه ... اه يا حلوها من ايام كنا نكتفى في العين و النظر و كانت عيونا توصل كل الي فينا من غير ما انتكلم
كنت دايم ادن دن في الجامعه اغنيه امشي و قلبي حزن امشي
... كان حزني و همي هو
لاني كنت اعتقد مجرد الاعجاب في رجل هو الحب
و فعلا مرا من المرات ابوي كان ياخذني من الجامعه
انصدم انه لاحقني لي البيت
بعدها بفتره بسيطه
تقدملي و تزوجت و انجبت ضاري و انا في الجامعه
كانت من احلى ايام حياتي
عشت مع سالم حيات وايد هايده و حلوه
مشاكل عاديه بين اي زوجين
لكن ماكان هناك شي يذكر
اتحسين ان ممكن يهدم هذا البيت
سالم اصلا يموت علي
و انا ادري الحين اهو وايد فاقدني
اصلا محد يعرفله و يفهمه كثري
الزوجه اليديده يجاملها و راح يجاملها وايد يبي يثبت لذاته و يبي يثبت لي اكثر ان اهو يقدر يستغني عني

يقدر بس ما يرتاح
المرأه تعرف زوجها
تفهمه اكثر من نفسه
بدليل ان وايد مرات يقولي فيها انتي فاهمتني صح اكثر من نفسي
خليني اقولكم سالفه صارت بشهر العسل
كنا في مصر بالتحديد في هيلتون النيل
كنت انا وقتها مولعه بشي اسمه افلام اسود و ابيض و شاديه و كمال الشناوي
كان يوديني كل مكان يمكن اشوف فيه مطرب او ممثل و كنت اصور مع اي مصري ظنا مني ان فنان او مشهور
حتى طبال الفرقه الموسييقيه اصور معاه

وداني لتسجيلات كيلو بترا و اخذلي صندوق عبدالحليم كامل و ام كلثوم و اخذلي كل اغاني الافلام
كنت كل يوم اسمع معاه اغنيه و انا في حضنه
بس ماكان يسمع معاي الا ام كلثوم و عبدالحليم
كان يغنيلي كل اغنيه
ادري تعتقدون اني غبيه لو اظن مجرد ان الواحد لما يغني لزوجته يعني يحبها ولكن انا الي ابي اوصله لج يا حجه اني موجوده معاه في كل ذكرى حلوه
معاه في شغله وشبابه انا ناظلت معاه الي وصل الي اهو وصله
انا ام اعياله
انا 22 سنه من حياته ما ينساها
يشوفني في بنتي و في اعياله
يشوفني في المنظره كل يوم لما يشوف وجهه لاني لازمته 22 سنه
فماصار يفرق بين عيوني و عينه لان شاف عيني اكثر من 22 سنه

غباء جدا ان حيزبونه تعتقد انها بتاخذ مكاني
... يقاطع الاسترسال في الذكريات
رنه تلفون البيت

ترد عليه الحجه مريم
تجيب و تسكر الخط بعد ما تاخذ الاخبار

ترجع مرا ثانيه تقعد جبالي ..
يمر زوجها في هالوقت
تقوله ان اختي و زوجها و اخوي وزوجته و اعيلهم باجر واصلين الظهر فلازم يحضرون بيوتهم
بستانا او حديقتنا عياره عن 4 بيوت صغيره مجابلين الاراضي و الحدايق و عند السور السكن الخاص في الحراس و ام الخير و اعيلها و الربع كلهم

يالله اشكثر احتااااااااج اختي
ولهانه عليها وايد
ترد علي ام الخير: ان انشاءالله باذن واحد احد راح تكون الظهر موجوده
وراح اتدلع عليها و انام في حضنها العصر كله
ام الخير الله يخليييييييج باجر نبي غدا شي محترم و راهي عشان اليهال و الخدم و ازواجهم
ماشاء الله

تنط ام الخير الي موقادره تصبر
يالله ام ضاري كملي
اسألها وين وصلنا؟؟
اي عاد اقوووولج ان قصتي بدت معاه من وزع ابوي الاملاك
و صار يعطينا فلوس و بمبالغ كبيره
صرت انا احاول اعرف اشلون استثمرها و كنت اتعلم اشلون استثمر و اشلون افكر في اني اشتري بيت و اشوي شوي شريتلي عماره
ساعدني فيها ابوي كثير
زوجي اهني حس باني مستقله عنه ماديا
مع اني والله ابد ما كنت احسسه في هالشي بدليل
اني كنت اصرف على الولاد اكثر من اني اصرف على نفسي
ماعمري حسسته اني احسن منه
بس صار عنده اهو احساس بالنقص
صار يعبر عن هالشغلات في ان يخلق مشكله من لاشي
صار اهو الي يبعد عني
صار يتعرف على ستات من طبقات اقل منه بوايد عشان يحس انه اهو احسن منها
صار يبي وحده مبهوره في صيته او منصبه
بيني و بينكم انا تعودت عليه فماصرت اغذيه من هذي الناحيه صارت الحياه روتينيه ما اقدر امثل اني فخوره في شي و انا ماعندي احساس في هذا الفخر
انا فعلا فخوره في اسرتي
في تفوق ابنائي
قبل اربع سنوات
كانت الخيانه الاولى
انصدمت انهرت انهيار غير طبيعي
حسيت ان كل شي في الكون انمسح و تحطم جدام عيني
سنين عمري ضاعت اعيالي راحوا
خيانه
سالم يخون
انا حشره في نظر نفسي و اصغر من الصغيره لما عرفت ان الي يخوني معاها صغيره و ياهل و وحده ولا شي
البلوه هذا مو ستايله
بس ليشششششش يسوي جذي!!
طبعا اهني انا بعد ما تحطمت انا
حطمت الباقي من حياته و ناضلت و سويت المستحيل عشان الحشره هذي تطلع من بيتي و في السرعه الممكنه

لكن يا ام الخير مجرد ان يكون زوجج في بيتج و فراشج و انتي عارفه ان عينه يوم من الايم طالعت برا تكرهينه كل مرا تذكرين فيها عذابج
تتقطعين في كل مرا تذكرين ان ايده امسكت غير ايدج
تموتين في اليوم الواحد الف مرا لما تدرين ان زوجج في فراشج الحين مو عشان اهو يحبج
لألألألألألألألأ
عشان انتي سحبتيه و سويتي المستحيل عشان يكون موجود
بس من يقول هذا نجاح
يكفي اني من داخلي ادري اني خسرته
..

اخذ نفس عميق عشان اكمل
اخذلي قطعه مناقيس زعتر حاره
الزعتر يتناثر في كل مكان
الشاي بالنعناع تطغى ريحته على كل شي موجود عندي بالطاوله
احاول اخفي دمعه يمكن انزلت بالغلط
عبره موجوده من زمان من باقي ليله امس
تقولي ام الخير اكلي الحين و كملي بعدين
اخلص اكلي
اخر ساعه من العصر
اسـتأذن منهم
اني اروح غرفتي
ارفع ايدي لربي
اسأله ان يحفظ اعيالي
يارب يا جامع الناس الي يوم لا ريب فيه اجمعني مع اعيالي في بيت واحد
يا رب
اللهي اشتد الضر و فقد الصبر و انت المستعان

الهي يا من لا تراه العيون و لا تخالطه الظنون و لا يصفه الواصفون و لا تأخذه سنه و لا نوم اجعل لي من امري فرجا
يا غياث المستغيثين يا ارحم الراحمين

اللهي
يا من لا يشغله شي عن شي يا من احاط علمه بما ذرأ و برأ و انت عالم بخفيات الامور و محصي وساوس الصدور و انت بالمنزل الاعلى و علمك محيط بالمنزل الادنى تعاليت علوا كبيرا
يا مغيث اغثني و اكشف ضري
فقد نفد صبري

يا اللهي انه قد تيقن قلبي ان لا اله الا انت
و اني لا اهلك و انت معي
يا رجائي فارحمني بقدرتك علي
يا عظيما يرجي لكل عظيم
يا عليم يا حليم
و انت بحاجتي عليم
و على خلاصي قدير و هو عليك يسير
فامنن علي بقضائها
يا اكرم الاكرمين
و يا اجود الاجودين يا ر العالمين

انهار في مكاني من البجي
اصرخ على الخدامه اتييب ولدي فهد
اضمه حخيل في صدري ابجي علييييييه
و اضمه اكثر
الم فيه كل اعيالي
الم فيه ضاري و خالد و سعود و حنين و ضرار
يارب انت قلت و قولك الحق
المال و البنون زينه الحياه الدنيا
يارب اعيالي عندي اغلى من كل مالي
يارب اجمعني فيهم
يارب
يارب بلغهم بري يارب

بكاء لا يحس فيه الا المحروم
بكاء لا تعرفه الا الام

يتبع