الجزء الاخير

و يروح الدوام حق ياسمين
يدش عليها ..من غير ماتدري
تنصدم ...
يسلم و اهي مبهوره ..ترد و تسأله: فيك شي ؟؟

خالد: اي ياي ابيج تقدمين اجازه

ياسمين : شنوووووو ليش ؟؟

خالد: اي اجازه مرافق زوج في بعثه دراسيه !!

ياسمين افهمت قرار خالد في زواجهم ..ابتسمت
انصدمت
بس تنحت اكثر
القلب يرقع

ياسمين : عطني فرصه افكر !

خالد: شنوووووووووووووووووووو شنوووووووو بعد بتفكرين

ياسمين : اي شنووووو عساني بنهبل في الدوام و بستانس و بطامر جدامك ..لا هذا بس جدام رفيجاتي
وبعدين لازم انطرك اسبوع اسبوعين شنووووووو بس انتي منطرني..لألألأ روح توكل على الله ماعندنا بنات للزواج

خالد: هاهاههاها والله صج ..صاجه ماكو بنات ..وين بنات

ياسمين: خوييييييييلد احترمني احنا في الدوام

خالد: مو لو انتي محترمتني جان انا من زمان ماخذج بس انتي السانج طويل

ياسمين : هاهاهاهاهاهاهاهاهاهاها يمكن صح

و تروح ياسمين تبلغ مديرتها انها بتطلع
و تروح ويا خالد في قهوه قريبه من شغلها
و تطلب منه انها تعرف ادق التفاصيل اشلون قرر انه ياخذها و ليش و اشحقه و اشلون

ويقعدون لي العصر في القهوه ..ترجع البيت
واهي طايره من الفرحه

تبشر رفيجاتها
و امها
و امها تقولها انا ماراح افرح الا لما تتصل امه تو الناس الحين
و وفعلا تتصل امه..و يحددون موعد للحريم
و الرياييل و ايون الرياييل و بعدها في جم يوم
تعارف الحريم
وبعد شهر و نص الملجه وبعدها في يومين العرس

و في عصريه الملجه ..

الرياييل متيمعين في ديوان المعرس
ياسمين تتصل 20 مرا على اخوها و على ابوها

الابو ما يرد
الاخوو يهددها لو ما بطلت تدق راح يسكر الجهاز

بس قلبها ما صبر
دقت على اخوها و الا تسمع
كلمه الملاج للمعرس قبل الملجه
تسمع كلمه
امساك بمعروف او تسريح باحسان

تقول حق اخوها خلني بسمع مراسيم الملجه

و تسمع صوت خالد يردد ورا الملاج
و تسمع صوت ابوها
و تسمع صوت عمها يطلب من الخال بطاقته
و تسمع الشهود
و فجأه صار هدوء
تسأل اخوها اشفيكم

يقولها نطري الملاج قاعد يكتب العقد
ياسمين :اشوه عبالي فيكم شي اشدرني سكتوا كلكم خمرتوا

شوي و الكل يبارك
يقولها اخوها الف مبروك ...
اهي ما تقدر تسوي كنترول على دموعها

وبعد دقايق

تسمع يباب امها و خواتها و خالتها تحت

شوي و الا خالد يتصل عليها

ياسمين ترد : ألووو..
خالد: الف مبروك ..
ياسمين: الله يبارك فيك ...
خلصتوا؟؟
خالد: خلصنا بس الناس موجوده ..الحين بيمشون ..بحركون الوالد و العمام بيروحون يباركون ليدتي

و اهلج توهم طالعين ..
..لو سامعه كلام الملاج من شوي ....تكني العرق ..بغيت اخليهم و امشي سكتي هونت الا شوي

ياسمين : هاهاهاهاا سمعت كلامه توني كنت مع عزيزان اخوي على الخط..
انا اخترعت..

خالد: سكري التلفون دقيقتين و اكون عندج ماني صابر لي الليل
ياسمين :صصصصصصصصج !!! يالله بسرعه

ياسمين توها سابحه الفوطه على راسها الكوافيره لي الحين ما وصلت و لا مالت الميك اب تو الناس موعدهم الساعه 6

تطلع من دارها تشوف امها و خالتها من المنور يباركون و لاهين في الاتصالات و التباريك

تتصل على خالد
ياسمين : خالد تعال من الباب الي ورا امي و خالاتي تحت عفسه عندهم
تعال تهريب..لحظه لحظه..كاهووووو ابوي دش و اخواني
يالله تعال بسرعه

يوصل خالد ..ينزل بسرعه اخوانها برا في الكراج
يباركون لخالد مرا ثانيه
و يدخلونه ..يبارك لوالدتها و خالاتها
و ابوها

تشوفه من المنور ..
تركض له تحت
و لما شافته

وقفت
حطت عينها في عينه
شافها و اهي في قمه سعادتها
خالاتها يتناغزون
هو هو هو خلوه نازلتله بخلاقينها يوم انه انها تدري بيلها تسنعت من الظهر
نازله جذي عروس

يبوسها على راسها

تحبه

تدخل معاه الصاله الداخليه

تلمه و يلمها حييييييييييل
تصيح بين ايده
يحب راسها

يقولها قولي وراي
بارك الله لي و لج و جمع بينا على خير دنيا و اخره
و يحفظنا لبعض
و يبعد عنا كل عين
ياسمين : امين امين امين و تلمه حيل

يدخل اخوها الملقوف

يحب راس اخته

وتبوس ابوها و امها و خالاتها

و اختلط الحابل بالنابل دموع فرح
دموع خوف الام
دموع الاب

دموعها اهي لحبيبها
دموع خالد لها
و ان الله قدره و فرحها و ارتاح

كانت عفويه في اظهارها للفرح
و كان اهو اكثر سعاده لان شاف الراحه بعيونها

يستأذن خالد مودعهم على ان انشاء الله اي ياخذها الساعه 10 بالليل يروحون يتعشون برا


و مر يومين الملجه و الثالث كان العرس

كانت ياسمين تسابق الزمن في تجهيزها
و خالد بعد

كانت تعبانه وايد تجهز للغربه و السفر و الا تجهز جهاز كويتين

كشخات و بدلات

و عفسه
و كانت محتره ان كل الي جهزته بيروح عليها بعد شهر بتقطه و بتسافر عنه

كانو الخوات يجهزون لها حاجات امريكا
و الا و الخالات و العمات للعرس

و كأي عرس كويتي
الزعلان اكثر من الراضي
و البطاقات اوصلت و ماوصلت
و على شان ترتاح ياسمين اسكنت في الفندق
قبلها بيوم
بس على شنو؟؟ 24 ساعه راده البيت عشان ناسيه اغراضها

تجنيد
و ليس تجهيز

محد يعرف لويه العرس الا اهل العرس نفسهم

و في يوم العرس
احلى يوم لياسمين و خالد

تكرس الخالات كل طاقتهم لقرائه الرقيه عليها
ويعلن الدي جي دخول العروس ياسمين

و اتوجه الكاميرات و الكشافات الي تعكس في العين
شعور مرهق
مربك
الفلاشات من صوب
الاضاءه من صوب
الصوت العالي من صوب

تاخذ نفس عميق
و بخطوات متردده
مرتجفه

تدخل و قلبها كل ماله يزيد في الضربات

تتسحب على انغام هب السعد
و من شافت امها تبجي
و اهي تدمع
تقعد في الكوشه

تصور
الدقيقه تمر ساعه

تنطر

و تسمع صوت الدي جي معلن دخول المعرس

تنقز اختها

تركض اختها اتييب لها كلاص ماي

تركز نظرها في خالد المرتبك
لما شافتها و كأنها شافت احلى منظر في حياتها

حست الحين في الراحه بدخول خالد

زادها ثقه
تألق
عدلت من قعدها
شدت ظهرها
و وبنظره وحده على خالد
و ما شافت منو معاه

يقرب خالد منها
يبوسها على راسها

يوقف
يسلم على الوالدين
الاخوان
و الاهل
و كل من زفه

و اخيرا يحب راس امه
و يقعد
يساسر ياسمين

خالد: ماعرفتج شالهزين

ياسمين : تبتسم
و تلمع عينها

خالد يسمك ايدها ..تشد ايده حيل ..حست فيه يرجف..

خالد : سكتي اتنافض
ياسمين : حاسه فيك
خالد: انتي اشلون جذي قاعده واثقه انا حدي اتنافض
ياسمين : عادي خلك طبيعي

تقاطعهم المصوره
و التصرير

خالد يساسرها : شربيني عصير وايد حدي عطشان
ياسمين : تضحك حسبي الله على بلسيك لا تضحكني الناس تخز

خالد: الله يلعنهم هالحريم من شفتهم و اهم يخزون بغيت اطيح

ياسمين : خالد ترا صرنا مسخره اسكت

خالد: اول مرا مرا تصيرين ثقيله ..اووه موديل تزوجت انا عروس ..ديكوور

ياسمين : خالد اشفيييييييك

خالد : بطلع لاعت جبدي من الحريم

ياسمين : اول مرا ادري انك تحن

خالد: عاجبج الوضع ؟؟

شوي
و الا زميلات خالد في العمل يتوجون للكوشه بسلمون عليه

و اهو مخترع
مو عارف شالسالفه

خالد : طاعي هذيلي بنات الدوام و المديره
شكو يايين لي
اقوم؟؟
ياسمين : لألألألأ اقعد بسلمون عليك و انت خلك قاعد

خالد: اش مالا يايين يسلمون ..

ياسمين : لانهم زميلاتك ياين لك انت

و يوصلون البنات
و يسلمون و تطلب منهم ياسمين يصورون وياها

و يباركون و يردون

خالد: شفتي هذي ام الاسود هذي المينونه الي قلت لج عنها تتحرش

ياسمين : ويوم انها تتحرش ليش عازمها

خالد: و من قالج انا عازمهم ..اهم يحنون عازمين نفسهم

ياسمين : يمه منك مشتهي اتعزمهم

خالد:لا اتيبين طاري مصطلحات تأثر على الصحه في هالوقت ..الله يخلي الي اخترع البشت للمعرس

ياسمين : شحقه

خالد: بعدين اقولج

وبعد دقايق

ياسمين : يالله افراج امسك ايدي
خالد: الحين نقص الكيكه

ياسمين : اي بعدين العشا تالي نروح الدار

خالد: لج خلق كيكه انتي مشتهيه كيك ؟؟

ياسمين : هوووووو اشفيك اتحن لازم!!

خالد: بعرف منو الي أألف مراسيم العرس الغبي

ياسمين : مدري ما فكرت ...اضحك للصوره

خالد: تعسرت بروح اناااام

ياسمين : ورانا عشاااااا

خالد: خيبونه فووق

ياسمين : ايبون بوفيه الدار ؟؟
انا ميته يوع مو ماكله من 3 ايام

خالد : ياساتر و انا تعبان من 3 ايام مو نايم
هذي فزعتي من الصبح ما بقا تسليف ما بقى مدنيه
ما بقى عفسسسسه

ياسمين: كلش مو وقت هالمواضيع
استاااااااااااااااااااانس في العرس

يقربون من الكيكه يقطعونها
يصورون ياكلون
و يروحون السويت ينامون

عند الباب تقول ياسمين حق خالد ..

ياسمين : شيلني ..
خالد: يا معوووووده زين شايل عمري

ياسمين : هاهاههاهاهاهاهاهاها اشدعوه بخليك اتشيلني ما تقدر
بس بضحك حاسه انك هلكاان

خالد : بدش الحمام انا قبل اغسل و ابدل
ياسمين : لا انا بدش ابدل

خالد: خووووووو بدلي براا بروح اسبح لايعه جبدي من عمري

ياسمين: انزين انزين ..حبيب قلبي تعبان هلكان من 3 ايام مو نايم و لا ماكل

اكيد بتاخذ شاور الحين و بتنام ...انا بعد هلكانه بنام

يعطيها نظرره و ده يذبحها

خالد: انا تعبان هلكان مو نايم
نغزااااااات ما علي لو فيني المووووووت هم فيني شده

ياسمين تضحك باعلى حسها تلمه
و يلمها

الله يخليك



يقضي خالد و ياسمين شهر عسلهم في الكويت
و بعد اسبوعين يروحون امريكا
و تروح وياه
و في الطياره
يقعد ساعات يفكر في الي صار
ويحمد ربه
و يتذكر الايام الي مرت
يلتفت على ياسمين
يساسرها
اتصدقين ولهان عليها
ياسمين : على منو
خالد: على الي كانت اتأذيني في المسجات

تبتسم ياسمين و يبتسم اهو
و تمشي الحياه فيهم
و فينا

النهايه

الجزء الثاني

يسحب خالد جريده يتصفحها على ما اتيي ياسمين
خلال 20 دقيقه توصل ياسمين
بسرعه بسرعه تقط سيارتها في ممنوع الوقوف و تنزل
تدخل مهروله ..تزرق محل الشايع للعطور
ياسمين : عندك بخور كمبودي ؟؟
الهندي : اي في التوله 18 و في 30 شنو تبين؟؟
ياسمين : ثلاثين خنشمها بسرعه..
على ما يطلع البياع بخوره و ينفخ الفحم و يحضرها ..ترشرش ياسمين
سطوور ..حروف ....على شوي من الخلطه الفضيه..
تتبخر ..تفل شعرها ..تبخر شعرها .. ترد تربطه

ياسمين : سلااااااام رفيق مشكوور
..تركض تروح ستاربكس و عيونها تلمع ..تدور خالد تلاقيه مندمج في الجريده
تسحبها بسرعه...
و تصااااااافحه
يبتسممممم
يتلفلت حوالينه اغلب الموجودين من الجيش الامريكي
يبوسها على راسها
ياسمين : قرت عيني شلووووووونك ..طبعا هذي اخر مراااااا بتسافر بروحك !! من غيري ترا فراقك لو يوم يذبح لان احساس انك مو موجود
يطير النوم مني..
خالد : ثقلي ثقلي امشي السياره بسرعه ...

الله يسلمج انا زين
تمسك ياسمين ايده ...و تسحب الجيس منه
خالد: ياسمين في السياره مو جدام الناس ..
ياسمين : طززززززز في الناس ماهمووني ..
اهم شي اشلون سفرتك استانست!!؟؟
خالد : اوووووه الله يا هي ونااااسه
ما بقى ديسكو ما سهرت فيه
ما بقى مطعم ما بقى مكاان !!
و بنظرات عياره يقولها مو تعرفت على وحده هناك و حبيتها جان اخطبها
و الملجه الاسبوع الياي ..تبين اعزمج؟؟
ياسمين تحذف علييييييه الجيسسسسس
هااااااااااااااك مابي شي وده حق مرتك مالت عليييييك و عليها
خالد : ههههههههه يا حلات الي يغارون
انزين عطيني السويج ... امي تنطرني في البيت ماني مستغني عن روحي عشان تسوقين انتي..
يركبون السياره
يسووق خالد
و تفجج ياسمين جياس الدراريع
و يتعبث خالد في السي دي
ياسمين : ماعندي شي اتحبه ..
ماعندي لا عبدو و على عبدالكريم لا تخاف
خالد : اي كالعاده ماكو ذوق
ياسمين :ماتشوفني اخترتك .هاهاههاا
خالد يسحب ايدها
يبوسها
خالد:ريحتج خيال .... ياسمين تدرين من شوي ذبحتيني
تتعجب ياسمين وتفرح على كلمه ريحتج عجيبه ..

خالد : اي ذبحتيني ..لما قلتي هذي اخر مرا تسافر من غيري
لاني انشاء الله بسافر بكمل الماستر و الدكتوراه..
فتعودي اني بكون بعيد..
ياسمين : لا شعوريااااااا تشهق ..شنو بتسافر !!!!!
ليش مو في الكويت !!
تسااااافر تكون بعيد عني ...
تسافر
تقط ياسمين روحها على الكشن مهدود حيلها
نلف ويها الصوب الثاني
تغورق عيونها
دموعها تسبقها
يسحب خالد كلينكس و يمسح دموعها و يعطيها الكلينكس
خالد: تعوذي من بليس
انتي تدرين من عرفتيني اني بسافر
و هذا وقت السفر ..
ياسمين : خلاص خالد ممكن تسكر الموضوع لو سمحت حتى في طلعتي وياك و هذي احلى شي عندي بالدنيا
تبي تنكد علي
انت ما تعرف تحب و لا ترضى اتخليني استمتع في لحظاتي معاك
خالد: ترا راح ادش من الممشى وراا عشان محد يشووفناا ..

ياسمين : الي يريحك..
و ظلوا ساكتين لين وصل البيت
نزل ياخذ اغراضه من الدبه
تنزل ياسمين و عند الدبه
ما تقدر اتحط عينها في عينه
يمسكها من حنجها و يرفع ويها
خالد: حطي عينج في عيني
مرا ثانيه ما تبجين على شي ما يسوا انزين؟
ياسمين ساكته ..
تركب سيارتها
تحرك
و في الطريج تبجي بصراخ
و بحرقه ..لين تحس نفسها وصلت لمرحله انها ما تشوف الطريج من دموعها
توقف السياره

تبجي
يرن مو بايلها
ماترد
تحرك
توصل البيت
تنزل من السياره
تنسى موبايلها في السياره
...
خالد صاق خلقه
تمنى انه ما نكد عليها و فاتحها في موضوع الدراسه
لكن هم ما قدر يسكت
يتصل في عماد
يقوله الي صار
خالد: ذبحتها ..البنت حيت و ماتت الف مرا جدامي ..تدري شنو يعني تذبح وحده و انت تحبها
و تشوفها جذي تعبانه.. و عشان شنو عشانك؟؟ و انت منت قادر تسوي شي..
عماد: لا تقدر يا خالد تريحها و ترتاح..
خالد: مو بالسهوله ...مو مثل ما انت متصور طول عمري اخطط اروح اخذ الدكتوراه تالي ارد اكون نفسي ..
احقق الي بالي .. راسم لحياتي صوره .. ستب باي ستب
بس خطواتي مافيها زواج ابدا..
مافيني شده مسؤليه انا بسافر بروحي دراسه و شغل بطلع من
الصبح لي تالي الليل .. طول يومي مو في البيت
ماقدر اكون مسؤل
انا في زحمه شغل
دراسه
مخطط حياتي مافيه زواج الحين ابد
تخيل تزوجت الحين
و تحمل
و تمرض و احنا في الغربه
اجابلها او اجابل دراستي
انا مو اناني بس انا ماني قادر اكون مسؤل
عرفتها ..هقيت السالفه شي بسيط
ماهقيت هذي الي بحبها و بتحبني
يقاطعه عماد: يمكن خيره يا خالد تعرفها الحين و الله حطها في طريجك
عشان تروح وياك و بدال ما انت تشيل مسؤليتها اهي تشيلك في غربتك
اهي الي تساعدك و تريحك ..و تخليك هناك مرتاح
لو الانسان يفكر شوي في قيمه الي عنده و شنو الي عنده و ليش
صار عنده الحين مو بعدين
جان عرف حكمه الله في العطاء و الهبه...
خالد: والله مدري شقولك انا احبها ..احترمها .. مرتاحلها ..بس زواج ما اقدر الحين هذا الي اعرفه..
عماد: لا تضغط على نفسك الي في الخير ربك يجدمه انشاء الله ..
و هذا حال خالد بين حانه و مانه
يوم يريح ياسمين.. و يوم اييب لها طاري السفر
و ياسمين مخليته على راحته
بس ما غيرهالشي في حبها و لا مسجاتها و لا اتصالاتها
الامور ماشيه طبيعيه
خالد في الدوام
يفتح ايميليه
يلاقي رد من جامعه رود ايلاند
يكلم زميله في العمل بخصوص هذي الجامعه
يقوله انطر لي اييك رد من جامعه ثانيه
و فعلا بعد اقل من اسبوع اييه رد

يدق على ياسمين ..
خالد : ياسمين وينج ؟؟
ياسمين : انا في داري
اوكيه فتحي ايميلج الحين
ياسمين: مفتووح ! ليش؟
خالد: بطرش لج موقع جامعتين
شوفيهم وياي و عطيني رايج ؟؟
ياسمين : وين هالجامعات؟
خالد: وحده في رودايلاند و هذي حيل قويه ..الثانيه كلارادو
ياسمين : اكيد كولارادو ماكو نسبه !
ليش تروح تقمت قلبك في رودايلاند
خالد: انتي شوفي و حكمي..
ياسمين تفتح المواقع..تشوف الجامعات
وتسأله ...: صليت استخاره ؟
خالد: لألألأ كلش ما طرا على بالي
ياسمين: صل احسن ..استخير ..
خالد: اي والله انا ويني عن الاستخاره ..اذا صليت الظهر بعد شوي اصلي استخاره
بس تعالي ما اعرف الدعاء ؟؟ تعرفينه ..
ياسمين : روح جوجل تلاقيه
خالد: صاجه ..الحين اسوي له برنت و اقراه ..خلاص اخليج الحين اذا طلعت دقيت لج..
و يفكر خالد في الاستخاره..اي والله ليش انا ما اصلي و استخير في ياسمين !! انا ويني عن الاستخاره
و يصلي خالد الاستخاره ..
و بعدها في اربع ايام يسأل امه..يما اذا صليتي استخاره ..اشلون تعرفين الصالح لج؟؟ تحلمين و الا اشلون؟
امه: لا يا خالد الي الله يسهله اهو الي ربك مقدره لك خير
يصفن خالد في كلام امه..
خالد: يما ترا السفره قربت انشاء الله بعد اقل من 3 شهور ..
امه: خالد ماودك تسافر و انت معرس؟؟
يخترع خالد!!
خالد: شالطاري يمه؟؟
امه: و الله ماكو طاري بس انا ام و احاتيك ..ودي انك تسافر و انت معرس تصون نفسك
ترد بيتك مرتاح..مرا ترعاك..و انت كبير منت صغير و الله منعم عليك ..و بتروح و راتبك وياك..يعني مو قاصر عليك شي
من غير ما يرد عليها خالد .. و من غير ما يحس في نفسه
يطلع الحوش
يفتر
يدخن
يصفن
وبعد يومين يقرر

يتبع

قيود رجل

عماد و خالد في الدوانيه يتناقشون بخصوص الوضع السياسي التعيس للبلد
خالد يطلب من عماد ان يطلع يتمشى وياه في السياره يشترون عشا..يقعدون ويا بعض
اكيد خالد عنده حجي ..شكله مو خالي...

خالد: عماد انا انشاء الله نويت خلاص و قاعده اراسل الجامعات بخصوص الماستر و الدكتوراه..

عماد: الله يوفقك انشاء الله و اذا تبي اي مساعده انا حاضر..

خالد: اتهقى اتزوج و اروح؟؟ و الا شسوي ..دبرني يا اخوي تراني من اسبوعين ماني قادر انام

عماد: اهي اشقالت؟؟ بتروح وياك؟؟

خالد: تبي الصج ما فاتحتها ما ابي اعطيها المجال ان يكون لها راي في حياتي
انا صاحب القرار ..اذا باخذها اخطبها و اتزوجها و اتوكل على الله و اذا ما اقدر اخذها ليش احر قلبها؟؟

عماد: والله مدري انت ابخص في روحك.. انت شتشووف؟؟ انت متعلق فيها ترا و الا جان ما فكرت فيها ابد ..
خالد: مشكلتي اني مو مبين لها شي ابد .. و لا مبين لها اي شي يريحها.. اهي تصرخ و تشيل و تشدخ و انا مخليها و ساكت
طول يومها انت ما تدري عني .انت ما تحبني .. و انا ساكت .. ماقدر اقولها حجي و ما افعل ..مو من طبعي..
ماقدر اقولها بالعكس احبج و ابيج و انتي و انتي و انا قاعد في بيت ابوي .. لاني لو قلت لها احبج يعني اكيد ابيج
و اخاف ماقدر اخذها و هذا الشي يذبحها...
انا ساكت و مخليها بس اهي تحس ..

عماد: تدري اشلون عيل ..جرب نفسك! اي جرب نفسك اطلع دوره في دوامك لدبي او البحرين او اي مكان قريب ..
سافر و سكر جهازك و اقعد هناك جم يوم ..شوف نفسك ..

و بعد يومين يكلم خالد مسؤله في العمل و يطلع القاهره لحضور مؤتمراقتصادي عربي ..
خالد ما قدر يسكر جهازه بس حول جهازه.. و خلاه مفتوح ..على ما وصل الفندق الا 4 مسجات من ياسمين .. و 6 مرات داقه ..
خالد يصبر نفسه ...ياخذ نفس عميق في وسط زحمه جسر 6 اكتوبر و في وسط زحمه و ازعاج القاهره و النيل .. الا ان صوت ياسمين
ماقدر ينساه ..
يدخل لوبي الفندق
يلقى نظره على الناس ..
ياخذ كروت الغرفه من الرسبشن
يصعد الغرفه
يدخل ياخذ شاور
و مازالت المسجات مستمره...و الاتصالات..
يطلع يطلب اكل ..
يقعد في البلكونه على انغام التلفزيون و صخب نيل القاهره
و زقاره ورا زقاره ..يسحب التلفون
يدق عليها ..
هلا ياسمين شلونج...
ياسمين : خــــــــــــــــــــــــــــــــــــــــــــــالد وينك احاتيييييك عيزت اتصل فيك ابد ما ترد خبصت قلبي عليك يا بعد قلبي
خالد: توني داش الدار زحمه الطريج تدرين توصل الكويتيه القاهره 4 العصر مع طلعه الدوامات ..و بعد تعرفين الشبكه اهني
ياسمين: حمدلله على سلامتك ....ولهت علييييييييييييييييييييييييييييييييييك
خالد: الله يسلمج ..مامداني ...سافرت يعني ما افتكيتي مني ..الحين ما احن عليج وين رايحه ووين يايه
ياسمين : ياحلوك و يا حنتتتتتتتتتتتك تسوا الدنيا و مافيها عندي..
خالد: انزين يالله تبين شي ما اقدر اطول الشباب عندي ..
ياسمين: لا حياتي انتي ابي سلامتك ديربالك على نفسك.. و رد على مسجاتي بلييييييز
خالد: انتي بعد ديربالج على نفسج..ماني راد على مسجاتج لاني على ما افكر ارد على مسج تكونين دزيتي عشر
ما الحق وياج..
ياسمين : اوكييييييه حبيبي يالله باي ..احبك يا جييييييييييييييكر
خالد: احبج يا شيفه..

يتنهد خالد و يحظف الموبايل بعيد..
و يقول انا اشسويت بروحي
على الاقل في الكويت دوانيه و ربع انساها
الحين اهني في السفر
بروحي و اهي متوحده فيني في مسجاتها
يارب ريحني يارب
يقطع حبل الافكار ..رنه مسج
يفتحها ..تطلع من ياسمين
(( حبيب قلبي الغالي خالد..بما انك بخيل .. و ماتندي ..وبما انك تموت على الفلوس فوجودك في مصر فرصه انك تبحبح مخباتك و تشتريلي صوغه..
ابي منك بدلات رقص من الحسين.. اي شي على ذوقك عشان اقص عليك و اغويك و البسهم لك.. و ابي صاجات وياهم.. وابي بعد دراعتين من الدكان حقي و دراعه حق امك عشان اذا قصيت عليك و تزوجتك اعطيهم امك هديه ))
يقرا المسج
يبتسم
يصرخ على المسج و يقول
يا كلبه صدي عني شوي طخي ..طخي..
يحضر خالد المؤتمر ويخلص منه يرد الفندق يسوي جيك اوت
لاني مافيه صبر ينطر لي باجر
يطلب من السواق يروح ملحق رمسيس
يدخل محل الدكان
يدق علي ياسمين من هناك
خالد: الو ياسمين اشلونج هااج هااج كلمي البياعه طلبي منها الي تبين.. انا قلت لها اختي تبي اخر الموديلات بس انتي شرحيليها الي تبين
ياسمين ما سمعت ولا شي قاله خالد بعد كلمه اختي !! الله يا هي تجرح هالكلمه ..لما الحبيب يقول حق حبيبته اختي ..تقول في قلبها يوم انك جاذب كمل دربك و قول المدام ليش اختي ...من صجها ياسمين يضيق خلقها..
ياسمين: الوووو اهلا ازايك انا مش شايفه حاجه انتي اديلوو اي حاجه جديده الوان فاتحه مقاس ميدياام
و تسكر التلفون بسرعه ياسمين و اهي زعلانه
خالد شرا الاغراض .. حرك راح المطار على امل ان يلاقي عوده
يغير حجزه
يرد الكويت
يدق عليها
ماترد زعلانه
يدز لها مسج ..ياسمين الهبله ادري زعلتي على كلمه اختي لانجصارلج اربع ساعات ماصدعتي راسي في ولا مسج
لكن حبيت اقولج اني في الكويت توني واصل المطار
تدق عليه بسرعه
ياسمين :يااااااااااااااااااااااااااااااااااااااا جيييييييييييييييييييييييييييييييكر
ماني اختتتتتتتتتتتتتتتتتتتتتتتتتتتتتتتتتتتتتتتتتتتتتتتتتتك
اكره هالكلمه اكرهاااااااااااااااااااااا
خالد: هاهاههاهاههاهاها هلا هلا اختي ياسمين اشلونج شريتلج الدراعات يالله تعالي مريني المطار اخذيهم ماني راد فيهم البيت و بعدين تعالي وصليني البيت
بسرعه مو تبطين مو تقولين كشتي و مو كاشخه و ما يمدي .تتأخرين علي 10 دقايق اخذ تاكسي و ارد بسرعه تعالي
ياسمين: يالله يالله ...جااااااااااااااك (تسكر التلفون من الطياره)
تلبس الترينينج ..تربط شعرها بسرعه ..تسحب الجنطه ...طيران المطار
يدخل خالد ستاربكس ينطرهااااااا و قلبه معوره
بين يحبها و بين قاعد يأذيها
بين مايقدر يتزوجها و بين لازم يتزوجها
تعبان خالد و اهي تعبانه ويااه
بين هموومه يسرح
و بين مستقلبه
وبين هالحب الي ما يدري من وين طلعه


يتبع ....

التقاعد و ما ادراك ما التقاعد !!!!!!!!!

قبل لا اقولكم سالفتي ويا ابوي خلوني اعطيكم نبذه عنه
ابوي الله يسلمكم هادي جدا جدا
ماله حس بس نسمع صراخ الي يتهاوشون في الجزيره او المستقله
ابوي تقاعد بعد مرض
كان دبلوماسي ..ما يقار ب اكثر من 20 سنه
جنتل زياده عن اللزوم
زره اسم الله عليه
من تقاعد تبدل حاله مو هذا ابوي الي اعرفه
سمعوا السالفه و اخترعوا مثلي

يرن تلفوني في الدوام
و الا ابوي مو عادته يدق علي كلش
اكيد شي جايد
ارد عليه ...
انا : الوووو!! هلا يبا
ابوي : الوووووووو وين اخووج عيزت ادق عليه ما يرد علي ليش ما يشيل التلفون ؟؟ تعرفين رقم مكتبه !؟؟
انا : عسا ما شر اشفييييييك يبا ؟؟ّّ لا والله ما اعرف رقم دوامه بس ادق عليه موبالي ادوره لك و تالي ارد اكلمك!!

اسكر الخط بسرعه بسرعه
ادق على اخوي مرا مرتين ثلاث
ما يرد !
ادق على ابوي الوو يباااا ما يرد على دقيت عليه بس ما يرد !!
ابوي : اشلوووووون يعني ابيه ضروري ضرووري شي مستعيل ..دقي على مرته سأليها وينه فيه و جم رقم مكتبه بسرعه و دقي علي
ادق على مرت اخوي تنخبص مثلي
و تجاوبني انها ما تعرف رقم دوامه
ارد ادق على ابوي اقوله كلام مرت اخوي ما يصدقني!!

دقي عليها مرا ثانيه قوليلها ما تعرفين اي اداره اي قسم اي بداله
ادق على المسكينه مرا ثانيه .. تنخبص اكثر و اجاوب انها ما تدري !!

ادق على ابوي هم ما يصدقني
ابوي : انتوووووووووووو كلا ما تدرون دقي على مرت اخوج خليها تدق علي بسرعه
ادق على مرت اخوي للمرا الثالثه !!!!
انا: الووووووو بليز دقي على ابوي يبييج

تالي ارووح اكمل شغلي
ادق عليها بعد ساعه
اسألها اشفييييييييييج اشيبي ابووي قوليلي الصج امي فيها شي مغبي عني ابوي
فيهم شي اخواني !!
ترد علي مرت اخووي لألألألألألأ ما دريتااي!! عمي كل هالخبصه يبي موديل جيب طراد اخوووووووووج !!!
انا بشششششششششششششهقه قاتله !!
شنوووووووووووووووووووووووووووووووووو كل هالخبصه جيييييييييييييييب
طراااااااااااااااااااااااااااااااااااد
ترد علي مرت اخوي اي عمي هالخبصه كلها لان في شويخ قاعد يشتري قطع غيار حق الجيب !!

انا: اقووووووووووووول مرت اخووي وااااااااااااي اشوه انهم مو حموووووووووووولتي جان ذبحت ولدهم

سكرت التلفون منها
و انا مخترعه و اضحك و منبهررررررررررررررره من تصرف ابوي

يدق على اخوي المسكين
اخوي: فاطمه بليز قوليلي اشفيكم بس لا تخرعيني ما حبيت ادق على مرتي و لا ابوي و لا البيت لاني ما ابي اسمع اخترع اكثر قلت ادق عليج انتي اول !
منووووو مات !!؟؟

انا : جييييييييييييييييييييبك و طراااااااااااااااااااااااادك الي عفسوونا !! هههههههههههههههههههههه ماكو الا العافيه كل هالخبصه الي خبصنا ابوي
يبي يعرررررررررررف جيب طرادك السكراب موديل اي سنه !!
يرد علي مخترع !!
من صجج انتي !! قولي غير هالحجي !!
ايييييييييييي والله عفسنا ابوي ويا سكرابييييييك
ههههههههههههههههههههه

بصوت مخترع يقولي اخوي مدري جم موديليه جيب سكراب حلي مصدي شاريه في 200 دينار تبيني اعرف موديله
هههههههههههههههههههههه

اقول اخوي اشوه انك ما رديت على ابوي لان لو سامع هالجواب يذببببببببحك
ههههههههههههههههههههههههههههههههههه

وااااااااااي عفسنا ابوي على ابونا فااااااااااضي و متقاعد و يدور براغي في شويييييييييييييييييخ و انا ابتلش

طبعا بعد ما قلت السالفه حق كيتي
فطنتني في شغله
قالتلي بس وين امج !؟؟ لان لو امج تدري في السالفه جان مو بس دقت جان يتكم دواماتكم
هههههههههههههههههههههه
رديت البيت سألت امي
وينج فيه و ابوي يعفسنا
قالت انا طالعه و موبايلي في البيت لاني اذا طلعت الضحى ما خذ موبايلي عشاااااااان ياذيني ابوج
اخي التلفون يرررررررن عنده بالصاله ههههههههههههههههههههههه
لألألألألألألألألألألألألألأ
حالتك قاتله يبااااااااا
تكفا سااااااااااااااااااااااااااافر

السعاده ..الراحه..احلى شي في هالدنيا

راحه البال تنشرا في الملايين
كلمه دايما نسمعها من اهلنا او الكبار
من فقدوا هذا الشعور نتيجه انشغالهم باعمالهم
و الحياه و الامور اليوميه
في الفتره انشغلت وايد
تعبت نفسيا لان ماعندي وقت اقعد مع نفسي
دوام
التزامات اجتماعيه
استقبالات
طلعات
وناسه
مواعده فلانه و فلانه
و ووايد ناس اعتذرت منهم
يخليني احس بالضغوط
عرفت اني انا انسانه ما اقدر اطلع جم يوم را بعض
صج اتعب نفسيا
مو سالفه كسلانه
لألأ السالفه كل انسان بحاجه الى الراحه
مرات يكون التنفيس عن النفس بالراحه
مو بالطلعه و الوناسه
خصوصا هالايام نقول بنطلع عشان نغير جو
نتنكد و انرد
بوستي هذا ابوح في لنفسي
ان متعتي في داري
في فراشي
في بيتي
في بجاماتي
اليوم كنسلت كل المواعيد
رجعت البيت
حطيت راسي و نمت
قمت المغرب
احتاج انسدح في الصاله
اشرب قهوتي
اتابع الفريه
اكتب بوست
اعلق
استمتع معاكم
صج راحه كبيره
و سعاده
انا سعيده معاكم
و فيكم
عطوا نفسكم راحه
من ضغوط الحياه
و مشاغلها
لان صج مرات وايد
يكون الاستجمام و الترفيه عن النفس
مو بطلعه و لكن في قعده مع النفس

احتاج سبا

احتاج ريلاكس
لكن الي اهم من هذا
اني سعيده
بالراحه
الله يريحكم
و يسعدكم دوم يارب

طقوس غريبه ...بس اهم شي لا احد يشوفها

ليشش؟؟
ليش المرأه تتصرف تصرفات مالها سبب؟؟
ليش المرأه عندها اسرار
تخفيها؟؟

ليش احنا انجابل المنظره ساعتين اندور شيبه في راسنا؟؟
ليش انجابل المنظره ساعات انطالع تجاعيد عيونا
اوو الخطوط الي تحت العين

ليش كل يوم انطالع ضروسنا؟

ليش كل مرا نطلع من الحمام بعد الشاور نجابل المنظره ساعه
نشوف جسمنا و خطوط الستريش مارك و السولولايت؟

ليش مو راضين نعترف ان جسمنا مو لون واحد!
ليش نخش وايد شغلات عن الرياييل
ليش اخش حبوب التخسيس و خل التفاح عن الاهل و الرفيجات

و اذا احد سألنا قلنا ضعاف خلقه !!
ليش وايد انشمم اشعورنا؟؟

كل هالشغلات نمارسها في بيوتنا
امام رجالنا
و مع هذا نخفيهاااااااا
!
صديقاتي العزيزات ..

شنو تصرفات تمارسونها بروحكم

من غير ماحد يحس؟

الرومانسيه لحظات مو كلمات

الجو ماشاء الله هالايام روعه
عجيييييب
صج مال قعده على البحر
و قهوه و دونات
مال نروح الكوت انتمشى

حلاته يمعه حلوه ويا رفيجات تحبينهم
وقعده اتونس و ضحك و مناقشات

هذا بصراحه احلى شي في هالجو

خذتني رفيجتي و رحنا المارينا
كرسبي دونات
خذينه شغلنا و قعدنا

قلت لها مريم اشرايج في الجو قاتل

قالت أي والله حدا رومانسي !
و خذتني رفيجتي في خيال عجيب مع الرومانسيه
بصراحه ماشدني من الي قالته شي

الرومانسيه شي نسبي
يختلف من شخص لي اخر

عشان اوضح لكم الصوره
انا محدثتكم لوير
كلش كلش مو رومانسيه
و لا فيني ذره منها

خلصت
مافيني لا حب و لا رومانسيه
و لا احس قلبي ينبض لمثل هالشغلات ابد

يعني و صديقتي تشرحلي عن الاثنين الي يمسكون ايد بعض
و واحد يحب وحده

ما حسيت شي يشدني

انا الرومانسيه عندي موقف

قمه الرومانسيه

لما الشخص الي يحبني
تصك فيه الدنيا و يلجأ لي انا يفضفض

هذي الرومانسيه

الرومانسيه مو قعده حلوه و فيلم حلو

الرومانسيه عندي

ضحك و سوالف
و غشمره و نجره

فوضحت حق رفيجتي
و اتهمتني اني انسانه بعيده كل البعد عن شي اسمه حب و رومانسيه

فانصحتني

يا فطييم يبيلج دروس باجر تتزوجين
مو تصيرين جذي ويا ريلج

لان اول ايام الخطوبه و العرس

لازم تكون كلها رومانسيه

اهني طقني عقر بقر !!

رفيجتي
صديقتي الصدوقه
احد قالج انا الممثله يسرا!!

اذا الله كتب و انقرد الريال المسيجين وخطبني

ما اعرفه من وين بيبله مشاعر !!

ترد علي رفيجتي
فطيييييييييم يا حسره قلبي عليج يبيلج دروس تقويه
هههههههههههههههههه


وبعدها غيرت الموضوع
وو تهربت منه

رجعت البيت
سألت امي
يما انا رومانسيه!؟؟

ادقرتني امي

ردت علي امي بكل جعااااااااام

انتي وين و الرومانسيه وين

سكت
و انطميييييييت
امري لله

يا ربي ما احس ان الريال لما يقولي كلام حلو يشوقني و يونسيني

بالعكس انقد علييييييييه
استغرب
اشك في نواياه!!

بس صج غريبه
وقفت مع نفسي

صج انا مو رومانسيه!!

و شنو الرومانسيه

و متى تكون؟؟

يعني الرومانسيه مو حلاااو

لاني اشوف رفيجاتي يلبحون على رياييلهم
يوميا في هالموضوع

و انا على قناعه
ان هذا الشي يصير بروحه
من غير طالب او مطلوب
يعني ما يصير اتيي وحده تقول حق ريلها قولي كلام حلو؟؟

خل تتصرف تصرفات يحبها
تسعده
تالي بتطلع من قلبه

من غير ما تطلبها

الريال يحتاج انثى في بعض الاحيان
ولكن يحتاج الصديق في كل وقت
قمه الرومانسيه عندي
اني اكون صديقه

يحترمني
يفضفضلي
اهوو الي يبيني

اشوف شنو الي يحب
و اجذبه فيه

يعني ليش ايي حق ريلي اقوله عن بنات الدوام الساعه 11
وبعدين اقول ريلي مو رومانسي

ليش مثلا لما يدخل البيت اعاايره في فريقه ايسي ميلان الفاشل
هههههههههه

و افتعل هووشه اناجره فيها
على الانتر و الايسي

و استفزه و اضحك عليه
و يستوعب اهو ان ما المفروض يزعل
اهني تكون عندي قمه الرومانسيه

الحب و الرومانسيه
لحظات مو كلمات

جريمه في حق الموضه ..جريمه في حق الذوق العام

جريمه في حق الموضه

جريمه في حق المجتمع
جريمه في حق الذوق العام

انا في هالبوست مو قصدي اتطنز على الناس
او على بعض المجريمين
لألألأ

انا اهني اتكلم عن مشكله ازليه عجيبه

قبل ايام السبعينات و الثمانينات كان اللبس

يأتي من مصممين
يعني ما يتدخل فيه احد
الحين الي صاير الكل قصب مسوي نفسه مصمم

يا ناس التخصص شي حلو

ياناس المسخره الي تصير جريمه
والله جريمه


يعني الحين في مكان العمل

قامو البنات يلبسون لبس جريمه في حق الرياييل

اشذمبه الريال يشوف جذي من الصبح


عشان افصل المهزله
لازم اقيمها من عده نواحي

فئه المتحجبات

خواتي لازم تقتنعون في الحقيقه المره انكم متحجبات
ليش اتناضلون قصب في انكم تتطفلون على لبس السفور

اختي انتي متحجبه

يعني لبسي لبس محتشم !!
ليش متحجبه و لابسه بنطلون ضيج و بدي و قصير

هالمكوه ليش طالعه

الرقبه ليش طالعه

ليش تلبسين بلوزه نص جم و تحتها بدي جم طويل
مووووو قصب هالبلوزه

من قالج تلبسين 30 لون مرا وحده

بدي قميص
تنوره قصيره و تحتها جينز
6 قطع !!! للدوام

شي متعب


فئه العباءه

يا بنات ترا العبايه الغرض منها الستر

متى ماكانت ضيجه و مخصره انتفى عامل الستر

انتو تلبسون العبات ليش؟؟
عشان التوفير

مالكم خلق كل يوم بدله

اذا مالكم خلق و عشان ما تبون تخسرون كل يوم بدله
مو مشكلتنا اداوموون في عبايه تسحب مترين وراج
خامه الطريج

و ليش الالوان الفاقعه
و ليشششششش الدانتيل

و ليششششششش الموديلات الي عافسه الدنيا

الرجاء احترام عيون الناس
و احترام الذوق العام

يعني دينه لابسه عبايه !!
كلها فصوص
ضيجه
مخصره
مكياج اوفر !!

فئه السفور

ليش ما صار هناك تخصص
لو سمحتي
البنطلون الضيج
و البدي الجابنيز
و الليجنج الابيض الي يشف كل ريولج

ليشششششش

صاروا يلبسون الترينينج في الدوامات ليشششششش!!

و هابين في النفانيف القصيره الي كت و تلبس تحتها بلوزه و ما تصلح لان
الكرش يخرع
و الزند افظع
و اخر شي مو مال دوام

اختي حبيبتي

النفنوف هذا يبيله خصر

اللبس القصد منه ستر عيوب الجسم
ليشششششششش

تلبسيييييين شي يطلع زغاديد الزمن

ليششششششش الثقه


من ويييييييين الثقه تكفون علموني من وين !!؟

كلمه اخيره

الي كل قصابه
عفوا الي كل مو راضيه بحكم القدر

و قصب تلبس الحزام الموضه الي يتك على الجبد

الحزاام الي ينلبس في المعده
له شروووووط

و شروط قاسيه للبسسسسس

بس اشوف الكل يلبسه

بنات الحمايل الكرام
لا ترتكبون جريمه في حق الموضه
و لا جريمه في حق الشباب الي حاطينا مطنزه

و عندي سؤال
من وين شارين المنظره الي تخفي العيوب ؟؟

رغبه في التغيير !

رغبات
اتييني ايام صعبه في حياتي

تمر هذي الايام و انا على قناعه انها فتره و بتعدي
و تالي راح اتغير كل التغيير

عندي حاليا رغبه بتغير كل شي من حولي
و بسوي جذي و بروح مني
و بحط جذي

بغير شغلي
بغير شخصيتي
و اسلوب تعاملي

بغير من شكلي
بغير حتى غرفتي

لسته من تغييرات عجيبه
وايد
و مينونه

نمسك على الصعيد المهني

خلاص الحين راح احقق رغبه امي
و افتح مكتب بروحي
و راح اكون صاحبه قرار

و على الصعيد الاجتماعي

راح اتغير
ما راح اصير هذيج البنت المقصه

الي الكل يقص عليها على ابو انها طيبه

رفيجاتي يعيشون في حاله غموض

يسافرون اييون
وبسكات

و انا الوحيده الي قبل لا افكر في الشي انشره

و اعلم الكل

ما راح اصير خدومه مثل اول

اذا صار عندهم شي
قمت فيهم و كرفت كرف وياهم

و اخر شي

يعطوني طاف ! و خصوصا لما احتاجهم

و راح ابطل اروح استقبالات ويا امي مالها داعي

و من اليوم و رايح ما راح اروح تعزي ناس ما قدورني


الي احبهم بروحلهم

ما ابي احد يسويلي شي لمجرد تسديد فواتير


و على الصعيد الحياتي

راح ابطل اسراااااف و تبذير زايد
راح ابطل اشتري كل شي تافهه

راح اغير داري

راح اكسر حماماتي

راح اتغير !!

بس على رغم الرغبه العجيبه بالتغيير
هناك كسل و ملل عجيييييييب

بغير كل شي لكن مالي خلق
بسوي كل شي و انا قاعده على هالقنفه بالصاله

بسوي و بسوي وبحط
و وبييب و برووووووح

و انا مالي خلق شي
و لا اسوي أي شي

!!
احسااااااس غريب

رغبات اغرب

حاله كئيبه
خمول
ملل

بس هم بتغير !!

منين أبدي ! مدري !!

المرأه تسعى الى الحب ..والرجل يهرب منه

بسؤال بريئ اسألته..
اتحبها ..؟؟

قال أي بديت احبها!!

ردت مرا ثانيه و قالت....
جاوبني اتحبها ..؟؟

سكت شوي يفكر

وقال بصوت مخنوق
طالما اني انام افكر فيها

و اقوم افكر فيها.. و بين كل لحظه و لحظه افكر فيها

في اكلي
و في شربي

و حتى بصلاتي
و بين ركعاتي

افكر فيها!!

اتسمين هذا حب ؟؟

اذا كل تصرفاتي
يبرهها الحب
فأكيد انا احبها

فرحت
ضحكت
استبشرت خير


سكت اهو شوي
و قال
عيل من باجر لازم الاقي حل

اضحكت اكثر
و بدغدغه قالت

اشبتسوي

قال و بدون تفكير

عيل اكيد بهدها !!!

و لازم اهدها
قبل لا احبها اكثر
و الاقي نفسي ما اقدر اهرب منها!!

ليش المرأه تحس في الحب حياه و حريه

و الرجل يحسه قيد

و عبأ؟؟

ام هلال و ابو هلال لوعوا جبد جبدي

ام هلال و ما ادراك ما ام هلال

ام هلال كنيه حق شخصيه مرأه عندها اخبار الكويت كلها
فلانه الفلاني
ريلها فلان
طلق فلان
سافروا مني

ردوا مني

فلان الفلاني طق مرته

و خذا عيالها منها!!

و كل خبر خطبه عندها و كل قصه في الكويت ابطنها!!
دايره على جميع يمعات شاي الضحى

و و في عمره كل جمعيه تلاقينها موجوده

ان جانها عمره جمعيه الشاميه رزت ويها!!

ان جانها عمره جمعيه الروضه رزت ويها

مابقى جمعيه من مناطق العاصمه تلاقينها !!

و اخر شي بيتها في محافظه غير !!

تعرف كل صغيره و كبيره

كل بيت و كل خدامه
و حتى المعاشات اتنبر عنهم

اذا وصلت مسج فلانه الفلاني خطبها فلان
لوت بوزها
وييييييي قطيعه اشطيح بيت عباس على بيت درباس

و مدخله روحها في كل شي

جدولها يبدي الصبح
من شاي ضحى لي عزا

و العصر عزاا
و المغربيات تسيووره
و اذا صار الساعه 8 لي الساعه 12
ياااا بحديقه النافوره
يا في شاطئ شويخ

لويه لويه

هوايتها شنوو؟؟
التنبر عن خلق الله


ام هلال في الحياه موجوده وايد

لكن الغريبه ان يكون هناك ام هلال في البلوجز!!

تعبت نفسيا من ام هلال البلوجز!

و البلوه انه ريال !!

من امدح بوست او بلوج
يتحسف

يطيح الناس من عيني


يدش المسنجر

انا : هاااااااا بليز جيك بلووج فلانه ايين فصصصصله حدا يختك هالبنات يونسون!!

يرووح يشووف يقط شوي و يرد

والله انتي مصدقه انهم بنات!!

اصلا هذولا شباب !

انا: هااااو لا مستحيل

هو: لا شباب و جنوس و مسخره بس مسوين نفسهم بنات لان يدرون محد يقرا للشباب!!

و يعرف عن كل صغيره و كبيره


يوم ثاني ايي اقوووووله فلان بليز رووح اقرا بوست فلانه ايين بووووووستها!!

يقولي فطييييييييم انتي قديمه حدج !!

ما تدرين ان فلانه ولد و لا وطايحين عليها

و فلان البلوجر ولد فلان

و هذي رفيجه هالبلوجر فلان مو تعلقين عنده موديلها ترفع السماعه عليه في الدوانيه تشخله

تقوله اشبينك و بين لوير شكو تمون عليك و تقولك جذي

يحلفلها الريال ان لوير مجرد بلوجر بس انتي تدرين لوير اهي طريقتها جذذي تضحك ويا الكل و الكل ربعها!!

المهم لاعت جبدي من ام هلال

عفوا بو هلال

و صكيته بلوك و ديليت عور قلبي

ما احب تنقل الحجي و الباب الي ايييك منه الريح سده و استريح


لكن انا فعلا استغرب

هل في شلليه في البلوجز؟؟

ليش انتحال الشخصيه؟؟

و اذا وااجد سوا نفسه بنت
بليييييز لا تقولون لي خلوني

ما يهمني المهم اقرا و استمتع بسسسس

ليش الناس صارت ادش في اخلاق الناس!!

انت تشوف فيني عيوني ..و انا اشوف الدنيا فيك

أنتظرت أزمان في ظل الوعد

احسب الخفقات يا أغلى وعد

انتظرت و الظاهر انك يا وعد ما جيت

عيّا عليك الوقت و إلا يا وعد عيّيت

انتظرت لكن النجمة سرت

والقمر راحوا أصحاب السمر

ونسمة وفا مرّت

ولفّت مكان الوعد ضمّت

تعتذر

وانتظر

خــالد الفيــصل

شغلات بسيطه بس اتنرفز !!

في قصيده للمرحوم طلال الرشيد
يقول فيها ....شباب و السيره بنات !!

فعلا صار في اغلب اليمعات هو تحلطم على الجنس الاخر
يعني تلاقي الرياييل تيقرطمون على بنات هالوقت

و الحريم نفس الشي يتحلطمون على ريالهم

هالمرا انا ماراح اتحلطم وايد

لكن الي بقوله لكم

متى اتحس ان شريك حياتك ما يحترمك؟؟

او شنو التصرف الي يبدر منه اتحسسه انه ينرفزك؟؟

كل وحده من صديقاتي كان لها راي بعيد كل البعد عن رايي

و فجأه اسألتني وحده فطيييييييييم متى تستفزين؟؟

كان جوابي كالاتي:

لما اشتط في السالفه و اهوو عاقد النونه على التلفزيون و انا اتحلطم و اهو يزيد تركيز في الاخبار !!

لما ادخل الحمام بعده و الاقيه مو منظف المغسله بعد الشيفينج ((حالق لحيته او شاربه))

مدمر الحمام و الارضيه شاق شاق شاق و اكو سله ملابس بس قاط اهدومه في الارض!!

يترك المعجون مبطل ما يسكره

ولو بتكلم راح اقول وايد شغلات

باختصار شنو شي يومي اتحس انه يضيايقك او يضيايقج؟؟

خراب بيوت

الزواج هو علاقه شرعيه بين رجل و امرأه
و الشرعيه يعني تحت ظل شرع الله سبحانه
و على كتاب الله و سنه رسوله

لما توصلني مسج من رفيجتي بخطبتها استانس ما اهتم للوقت او الحزه او اهي ويا اهلها
لا شعوريا اتصل و اصرخ و استانس..و يمكن مرات يوصل صراخي البيت كله
نفرح
نحتفل
نترقب الحمل
نتيمع عشان نشوف البوم الصور
و احداث شهر العسل
الي نصها جذب و خيالات بس مستانسين و احنا نسمعها

ولكن الي الاحظه سرعان ما يعكر فرحتنا خبر الطلاق

الطلاق الي صاير هاليومين بزياده
و بين جميع فئات المجتمع
يعني المعاريس و الي صارلهم اكثر من 20 سنه زواج!

المشكله على منو؟؟
الرياييل الي ما يخافون من الله
الي لما يتزوج ما يعرف يفرق بين الزوجه و الصاحيه
الي ما ياعرف يفرق بالاحترام و الحقوق الشرعيه ما بين الزوجه الي يايبها من بيت اهلها
بعلاقه شرعيه موثقه بكتاب الله!! علاقه شرعيه ...يعني اتحط الشرع امام عينك

اصحوا يا الرياييل بنات الحمايل ما يبتوهم من بيوت اهلهم عشان تطلب منها تتصرف و اتعاملها مثل الصاحبه
لألأ و الف لألألأ
في فرق كبير
عدم تحمل المسؤليه
عدم الاحترام
عدم تقدير الظروف النفسيه
عدم احترامها لا في التعامل و لا الالفاظ و لا حتى احترامها بالفراش

و منو ضحيه استهتار الازواج ! و عدم احترامهم و عدم تربيتهم
مو بس الزوجه لألأ
الزوجه و اهلها
البنت لما تطلق الي بينهار مو بس بنت
بنت مع اهلها !!
السنه الي فاتت صادفت 3 من صاحباتي تطلقوا
سألتهم ليش..؟؟
وحده قالت ماكو نصيب
و ثنتين قالوها اشكره
كرهتته في الفراش
كرهته في كل شي!!

يعني شنو!!
ليش؟؟

لانه يعاملني كحيوانه

كلمه اوجها للشباب
خافوا الله في بنات الناس
خافو الله في حريمكم
خافوا الله في نفسكم
احترم ذاتك و احترم شرعيه العلاقه

ادري بتسؤلون نفسكم شي الي خلا لوير
تفتح هالموضوع

ثاني يوم العيد
اتصلت في رفيجتي
اول ما قلت لها اشلونج
قالتلي دريتي
تطلقت !!!
قبل رمضان بسبوع


و اليوم و انا توني خالصه من الفطور و حاطه الشاي و القهوه
و قعدت انطر الفريه

و الا طلع فيلم هندي
سكرت التلفزيون و رحت الصاله فوق
و الا رفيجتي تتصل
فاطمه انتي فوق ؟؟
قلت أي

قالت أي انا تحت عند بيتكم
قلت اذا لقيت سيارتج برا بدق و ادخل و اذا مالقيت سيارتج بروح

ادخلت رفيجتي
سالفه على سالفه

قلت لها سارا اشفيج !!

كان ردها صاعقه
فاطمه انا راح اتطلق و حبيت اتكونين انتي اول من يدري
انا من ليله العيد في بيت اهلي
و احتمال باجر ارد بيتي قبل لا يردون اهلي من السفر
و انشاء الله هالاسبوع راح ننفصل في اسكات!!


ليشششششش عسى ما شر!!

ماكو قلت حق اخوي الكبير السالفه
قالي هذا ريلج ستري عليه
و ريلج ولد خالي
و لو ولد الخال طلقج
ابووووي راح يعفس امي و اخوانها
و يمكن ابوي يطلق امي وراااج

قلت لها فووووضه!!!
قوليلي شنو قصه انفصالج مو قصه الي صاير في بيتكم!

بدموع و بكاء
تقولي
ابد ماكو سلامتج
ماقدر اتحمل الحيونه الي احنا فيها

ريلي سخي
طيب
يصلي
يسمي
شهاده
بيت
فلوس
بس حقير
أي والله حقير
لا مو حقيررر حثاله
ريلي من سنه 92 يصيف في لندن و متعود على البنات الي كروتهم مقططه في كابينات التلفون

الي متعود على الحرام
طول عمره يبي الحرام
او يطلب الحرام من زوجته

في بدايه زواجي
طلب مني ان نغير و نحط شي نشوفه
ما اتسوعبت !!

صرخت صراخ هستيري

و خذيت السيدي و كسرته و عفست الدنيا و قعدت

والحمار بعد يومين قالي اشوه انج تصرفتي جذي كنت بختبرج و بشوف رده فعلج!!!!

طبعا مبينه السالفه لا اختبار و لا بطييييخ

بس الرياييل جذي اذا توهق قال اختبار

وبعد فتره لازم يصير هواش بينه على هالمواضيع

لين طفح الكيل الحين صارلي 7 شهور ماني متحمله
بسسسسسسس
حياتي كلها صراخ
هواش

حيوان
وصخ مؤرف

رفيجتي تسولف و انا دموع و افكر
تقولي انتي مو ويااي صافنه
بس كنت ساكته
محتره
مااقدر اقولها شي بس قلت لها صبري
لازم تصبرييييين
و اتلاقون حل

لازم تلاقون حل!!
قوليله حسناتك وايد بس الخلل الي فيك مو مخليني اشوف شي زين
بعيشتي وياك
قوليله لا تهدم بيتنا عشان هالشي !!
ردت علي وقالت
انا لازم اهدم هالبيت الي انبنى مع ريال غلط!!
مو معقوله بيت ينهدم عشااااان تصرفات مثل هذي
و المأساه الثانيه سالفه الاختبار هذي الي تضيع فيها بنات وايد!!

بس يبيلها بوست بروحه !!

وعليه وعلى حالي ..رحت اصلي باقوا نعالي!!

اليوم على الفطور
يقوولي ابوي فطيييييييم شنو تتوقعين صارلي اليوم!!

قلت له شنووووو

قال باقوا جوتتي اليديد في المسيد
طلعت من الصلاه
و الا الجوتي مبيوق
مو بس انا

انا و مع 8 مصلين!!

مسكيييييييين ابوي في رمضان مبيوق منه نعالين !!
و هذا البوووووووقه الثالثه باقل من شهر

عاد انا صج احتريت
لاني انا شاريته هديه حقه

المهم
و قالي ابوي ان هذي ظاهره منتشره !!
و كل المصلين يعانون منها
ان البنجاليه يبوقون و يروحون يبيعونهم في خيطان على دينار

و التجار الي في خيطان يبسطون فيهم بسووق اليمعه !!

و الي ضايعله جوتي او نعال عزكم الله
يرووح سوق اليمعه يدوره !!


انزين انا بعرف
مراقبين الشؤن مادري التجاره مادري البلديه
ما يسؤلون اصحاب البسطات
من اين لكم هذا

ليش اذا صارت أي بوقه في الكويت يقولون دوراو عليها بسوق اليمعه!!

عاد انا فتنت على نفسي !!

مشكلتي جذبت و نسيت جذبتي!!
قلت حق ابوووووووي
وييييي حسافه عاد غالي !!
ب 75 دينار
قالي هااو مو انتي قلتي ب 30 !!
قلت أي مالي خلق اتزفني
تقووووولي تفسفسين فلوسج اول يومين وبعدين
تقولين يبا عطني!!

قلت اقول 30 و خلاص

بي يوم انباق و اطلعت الصجيه لا والله بقول
ابووووووي مات ضحك علي!!
بس هم احتريييييييييييت
شنو هالظاهره!!
ليشششششششش تنباق النعل في المسايد!

لقطات في العيد

اللقطة الأولى من كإمرتي

وانا رايحه صلاه العيد مشي
شفت سيارتها من بعيد
واقفه عند مصلي الحريم
انا ادري انها مو اهي
لانها راحت بلا عوده
بس ليش السياره اصفطت اهني
ثقلت خطواتي
دموعي سبقتني
طليت بسيارتها

هذي كوشيتها موجوده !
لي ماشالوها

دخلت و عرفت وقتها اني في هالعيد بروحي
صليت و طلعت بروحي


اللقطه الثانيه

أي عيد هذا الذي اقضيه
بين فراشي
و كنبتي

أي عيد هذا الذي اعيد به نفسي فقط


اللقطه الثالثه
اول يوم العيد ما سويت شي
رحت الصلاه مواصله
تالي بدت و استقبلت المباركين

الساعه 9 ولهت عليها
لا السالفه صارت صج

حتى اهوو وينه؟؟
رحيله هزنا
و اخل بتوازن العيد و طقوسه

شاف ابي دموعي الي ما وقفت
صد عيني

اكلمه من بعيد
و يكلمني ما يطالعني

التقت عيني بعين ابي
و شفت دموعه

؟؟
ولهان عليه يبا
ترا انت تحطمني جذي
دموعي تعودت عليها
بس دموعك عندي بالدنيا

ماتحمل طلع

قعدت على سيادتي ادعيلهم بالرحمه
لي صلاه الظهر

رحت تغديت في البيت الكبير
دخلت الساعه 12 ونص و طلعت الساعه 1 ونص
ماقدرت اتحملهم

رجعت البيت نمت لي نص الليل

صمت ثاني يوم

و هاذا انا بصوم الثالث
!!!

اللقطه الاخيره

اقرر الساعه 10 بالليل اروح الفرع
اشتري بفك
امر راعي السمبوسه

اطلب منه
يعطيني الطلب اشكره و اطلب منه ينادي بنته
بنته صغيره اسم الله عليها عمرها 7 سنوات
تتنطط فرحانه في لبس العيد

اناديها اتيي تركض عند بابي
توقف على اطراف اصابيعها
اعطيها عيديه رمزيه
و اقولها عيد مبارك
تصدمني برده فعلها
تحاول ترفع نفسها اكثر لاني راكبه جيب رفيع
تبي تبوسني !
تشكرني على العيديه
فتحت الباب
لميتهاااااا
و بوستني بكل عفويه على الصوبين
و خمطت ايدي بتحبها!!!
سحبت ايدي

حبيتها
سكرت الباب
اراقب عينها في المرايه
تطالعني

يالا برائتها و فرحتها

تذكرت كم طفل عايدت عليه في البيت الكبير
اكبر و اصغر منها
و مو عاجبهم
او يادوبك اسمع كلمه مشكورة

و هذي الطفلة
هزتني برده فعلها
و دمعت عيوني
على فرحتها
!!
يالله البساطة شنو راحة

و اخيرا اتمنى لكم قضاء عطله سعيده
ادري مستغربين من تغير بلوجي المفاجأ
بس مليييييييييت من هذاك
و عفست الدنيا و قعدت

و هذا ابيض و بسيط

عيدكم مبارك

ياني مسج شفته
من رقم غريب
فلان الفلاني خطب فلانه الفلاني

الرقم غريب
و الناس ما اعرفهم
يا شين مسجات خطب حق ناس ما اعرفها
شكو يدزون مدري
بعد شوي و الا ولد خالي

الووووو فطوم
شفتي المسج
هوو منو
سعود
شلونك
اي شفته بس ما عرفتهم و لا عرفت الرقم
اي مرتي قرتلي المسج
قلت دزيها حق فطيم
اي يا حليلها مرتك
سلم عليها
هذا رقمها خوش عيل بسويله سيف

اي بس ما اعرف منو هذا
يرد علي ولد خالي
فطييييييييييم
هذا احمدووووو
صديق الطفوله
انا : هووووووو احمدو ولد الفلاني

لألألألأ فطيم امه بنت الفلاني

و احنا لما كنا اناديه على بيت يده
صصصصصصصصصج
والله مدري معلومه يديده

المهم سكرت التلفون من ولد خالي
وسرحت
ياحليلك يا احمدوووووووو
والله و تزوجت
لوووووووووول

احمدو هذا صديقي الصدوق ايام الطفوله
تعرفت عليه و انا في الروضه او الابتدائي
و بما اني كنت بريئه و صبيك اكثر من الازم
ربعي كلا شباب

احمدووووووو ذرب
سنع
كلا كاشخ
و موديله كلا شورتات
و تي شيريت
و انا وقتها
لما كان يزورنا احمد
كلا خلاجين

دراعات ان ان و اتش اتش و حلاوه
الطباعه
الحمرااااااااا
و الصفرااااااااا

دراعات مصر
مقصمله
و تراجي ذهب
و شحاطات بيبلوس
و الدراعه فيها شقه من الصوبين
و كلا واصلين لين الركب من الركض


كنت مأساه في شويخ
و ربعي
احمدو زقرتي
من نفسه ما ينطر امه تطقه عشان يبلس مثلي

و سالم اجناعي كشخه
و امه انجليزيه
بسسسسسسس لا تسألوني اشلون طبقنا


كنت كل يوم القوايل اخليهم يطلعون الظهر
نلعب
عندنا
او في السكه
نخطر سور المدرسه و نلعب في الاقوال
و نخرب التراب عليهم

كنت دايما اشقح الاسوار
و كلا متعلقه في السور

و اروح العب في الحديقه و الدوارف حديد تحرقنا
بسسسسسسس كان ما يهمني

مرا من المرات ما انساها
كنت اسوي وقوف الايد على السور
و احمدو
كان يخاف
ما يركب معاي
احمد بس يشقح
اما وقوف على ايد مستحيل

و سالم لألألألأ
كان عالم اخر

انا: سالم تعاااااااال سو مثلي
سالم: ما ابي ليش اسوي جذي ؟؟ شنو بستفيد
؟؟

و كان تخروعتي شي اسمه اذان العصر
من يقول الله اكبر
اصرخ
ابييييييييه ابييييييييه
الحين امي اتيي
بروح اغسل و ابدل
و اذا امي جكتني
في الحديقه و انا بخلقونتي
او مو لابسه عدل
تصفط السياره
و تنزل
و تسحبني
و تقطعني طق
يا الهيليقه
يا ام كشه
و طق
فكنت اخاف
ارد البيت ابدل
و امشط كشتي
و كان شعري
ماساتي لانه طويل وايد


المهم
العصر كل يوم نروح ناكل كورن فليكس في بيت سالم
و نشوف باباي

بيت سالم
مو مثل بيوتنا
مرتب وايد
كله لوحات
و ستايل انجليزي
و امه انجليزيه
بس ما اعرف اكلمها
مو طيبه
ما تحبني

و كلا كنت اقول
سالم سالم
بيتكم جنه مسلسل فل هاوس

يسكتني احمدو
و يعظ على شفايفه
يعني عيب

و كانت عندهم وحده
اموت خوف منها
هم انجليزيه
من ادخل
اسلم عليها
و ابوسها
وبعدين اقعد
و احمدو وياي في كل مكان

مرا من المرات
سألت سالم

انا: سالم هذي منو خالتك؟؟
سالم:لألألألأ هذي الناني
انا: اي ادري ناني بس شنو اتصيرلك؟؟
سالم يفج عينه
احمدوووووو بعد عمري مبتلش فيني
يساسرني
ناني يعني خدامتهم
اصرخ من قمه راسي
خدامتكم
ويع
ويع
ويع
و امسح ايدي في بلوزه احمود
و اتفل
تف تفتفتف تف تفتف
توني بستها
مدري انها خدامه
يعصب سالم
لألألألأ مو خدامه ناني

!!!!!!!!!!!
راحت الايام و يت الايام
و انا و احمدو ويا بعض
كنت غير عن باجي البنات
ماعندي اهتمام في المكياج و الكعب
و لا عندي هالسوالف


بنات الجيران
كانوا غير
حب و غراميات

و اشرطه
ومن هالسوالف
و كانو يكتبون رسايل الحب

مممم
هالكلام لما كنت في رابعه ابتدائي

تناديني
شيخه
و تقولي وصلي
رساله الحب
حق
جاسم
بس مو تشوفينها
و اتحلفني

و كنت احلف
والله العظيييييييم
ورب الكعبه
ما اشوف
و انا بداخلي اقوول والط
مدري منو معلمني

اني اقول واللط
!!

كنت انخش و اقرا الرساله

سخيفه
مافيها الا
اكتب لك بالرصاص لتدوم محبتنا باخلاص

اكتب لك بالمقلوب لتدوم محبتنا بالقلوب!!


و اوديها
حق جاسم
و انطر جاسم يرد عليها
و اقرا رد جاسم
و اوديه
و اروح اقول حق احمدو كل شي


احمدوووووو قول و رب الكعبه و راس امي و ابوي وعساني اموت اليله اني ما اقول حق احد!!


يحلف احمدو
و اقوله السالفه
و يسألني احمدو
ليش شيخه يتها العاده؟؟؟


شنو يعني العاده
بلغت؟؟
شنو يعني
و يفهمني احمدو شنو اللبلوغ!!

و لا عمري حسيت احمدو ان ولد
و انا بنت
حياتنا طق مطاقق
معافر
جراقيات
اتاري
و كمبيوتر
صخر
اشرطه سباحه
و الاميره
و انتبادل!!


كل اهتماماتي
حبال
و كنت كلا ابوق نعال ابوي التميمه
اسوي منها نباطه حق ربعي

و كنت احبل
والله ما تصدقوني اذا قلت لكم
انا اصيد الزهيويه


المهم


و انا على هالحال ويا احمدو لي الغزو
رجعت في التحرير
الكويت
احمدو مو في الكويت
كل يوم اطق بابهم اسأل عنه

لين وصل احمدو الكويت
متغير علي
ما يعطيني
ويه
بلغ
كبر
شواربه خطت
طاال وايد
سلم علي
بس سالم جدا بارد
نظراته تغيرت
في الجمعيه
كان اهو واقف وراي
سلمت عليه
احمدو ليش ما اتزورنا
يرد علي احمدو
لألألأ بس خلاص
كبرنا
انتي اخت رفيجي ما يصير !!!

مازلت اشوف احمدو في جمعيه شويخ
او عند الحلاق
او عند الصمون
و نتبادل
نظرات باسمه
كل واحد في قلبه يقول هل فلان ذاكرني
بس بسرعه اصد

اما سالم
راح درس في امريكا
و كنت اشوفه كل سنه في مونترو
و هالسنه شفته في مونترو معاه زوجته
وبنتين
يشوقون

الله يوفقهم
و يسعدهم

مسج الهمني لكتابه هذا البوست



عيدكم مبارك
و عساكم من عواده

سبحانه ربي عليم

سبحانه خبير

سبحانه بصير

سبحانه عليم

اليوم و انا اتابع صلاه المغرب و الافطار في مكه

سألت اخواني و اهلي و قلت لهم

سبحانه ربي عرف وين يحط مكه

تخيلو الكعبه في بلد مسلم ثاني؟؟

شوفوا اشلون من تخلص الصلاه مكاين التنظيف

و التجهيزات الامنيه

و شوفوا العلم و العلماء

شوفوا الكرم

سبحانه ربي

مسخر ال سعود و هالسعودين

حق خدمه بيته

ما تشوفونهم كل مالهم ربي يغنيهم

و يوسع عليهم

سبحانه ربي

عرف خبير

بيصر عرف يحط مكه وين

وقعدنا انتخيل

لو ان الكعبه في بلد مسلم ثاني!!

ابيات اعجبتني

تعصي الإله وأنت تظهر حبه

هذا محال في القياس بديــع

لو كان حبك صادقا لأطعتـه

أن المحب لمن يحب مطيـع

*************

*************

*************

أيا جامع الدنيا لغير بلاغــة

لمن تجمع الدنيا وأنت تمـوت

*************

*************

ولرب نازلة يضيق بها الفتى ذرعا

وعند الله منها المخرج

ضاقت فلما استحكمت حلقاتها

فرجت وكان يضنها لاتفـــرج

اللهم انك عفو كريم تحب العفو فاعفو عني

اللهم اني اشكو اليك ضعف قوتي

وقلة حيلتي وهواني عن الناس

انت ارحم الراحمين

ورب المستضعفين

وانت ربي الى من تكلني ؟

الى قريب يتجهمني

ام الى عدو ملكته امري

ان لم يكن بك علي غضب فلا ابالي

غير ان عافيتك هي اوسع لي

اعوذ بنور وجهك الذي اشرقت به الظلمات

وصلح عليه

امر الدنيا والاخره

ان ينزل علي غضبك

او يحل بي سخطك

لك العتبى حتى ترضى

ولا حول ولا قوة الا بك

تزيد اللبحه و الاعصاب برمضان؟؟ ليش!!!

تحديث على البوست في اللبحه الرابعه

اللبحه الاولى!!

يوميا اقوم على صراخ الجيران!!
منو الييران !!
اخواني
كل واحد غرفته بجناح
و بما ان اخواني اسم الله عليهم
ابدا ما يعرفون اختراع اسمه لا انتركم او موبايل او اي شي
سمعوا الحوار الي اقوم عليه العصر !!
وبعدين سألووني ليش اتسعر!!
اخوي الكبير: ينادي الصغير باعلى حسه و بصراخ
شــــــــفت جوتيي!! وراي لعب بسرعه !!
اخوي الصغير: مـــــــــادري عنك اش علي من جواتيك اصلا انا ما البس لابجين !!
اخوي الكبير : تي شيرت ايسي ميلاااان عندك !!! دورها بسرعه روح ييبها من دار الاوتي !!
اخوي الصغير : عندي السوده تبيها!!
بصراخ ازيد من اخوي الكبير : لااااااااا مابي السوده ابي

BWIN
اليديده مالتي !!
اخوي الصغير : مادري عنها لا اتعور راسي مالي شغل في لبسك اصلا انت مو قدي
اخوي الكبير : بنطلووووني الاديداس عندك و الا في السله !!! رووح شوفه !!
اخوي الصغير : ما ادري !!
الكبير : عيييييييل ليش صاير اخوي !! ما تعرف شي كلش سو شي مفيد بحياتك!!
و ينادي الخدامه الي في المطبخ الي في الملحق تحت !!!
مــــــــــــــــــــــــــــــــــــــــــــيري !! مــــــــــــــــــــــيري !!
تركض ميري اتي طايره
ميري : نعم نعم !!
الكبير : لا بس خلاص لقيت كل شي !!!
اطلع انا من داري معصبه و بكل هدوء
!!
انت ما تعرف تسوي شغلك بروحك !
يرد علي و اهو مستعيل!!
انا كل شغلي اسوييه بروحي بس بصراخ مو بسكات !!

واي مزعج مزعج مزعج

اللبحه الثانيه

اتابع برنامج عمرو خالد انا و امي باندماج تام
كانت الحلقه امس عن اسم الله المجيب
و كان معنى اسم الله المجيب قمه في الروعه
باختصار الله سبحانه قريب مجيب يسمع الداعي
الله في كتابه ماقال يا مؤمنون ادعوني
لانه يسمع دعاء و يستجيب دعاء جميع خلقه
قل ادعوني استجب لكم
و سبحانه اذا سهل لكم الدعاء اعلموا يقينا في الاجابه
غير ان الله سبحانه يحب اللحوح في الدعاء
و يأجل الاستجابه حتى يرا في الانسان القدره مع دعائه
المهم
و على الانسان ان يدعي ربه و يفصل في الدعاء
و يلح
و قامت امي قالت يالله فاطمه ادعي الحين !
عدلت قعدتي و تنهدت تنهيده طويله و قلت
يا ربي ياااااااسمع الدعوا يا مجيب يا قريب
يالله يا ربي
اخذ الدكتوراه يا رب !!
انا قلت دكتوراه

عينكم ما تشوووف الا النور !!
امي : شنهوووووووووووووووووووو اقولج ادعي تقولين دكتوراه
الرياييل من ماستر منحاشين
هالدوووووور دكتوراه
مينووووووووونه انتي
بتذبحيني
تبين سكري يوصل مليووووووون
لا بارك الله فيج و لا في الساعه الي دشيتي فيها الحقوق !!
و لا في الساعه الي رحتي بتكلمين فيها
انا : يمااا هذي امنيه دعااء دعااء!!
امي : ذلفي عن ويهي قولي ربي ارزقني ريل سنع
تقي نقي صالح مصلح مذكور عندك في الملأا من خير الرجال يكون سكن لي و سكن له و تفصل امي تفصيل في الشرووط و الطلبات!!
انا: اووولا كل هذا في ريلي !!
امي : جابي جابي ما طبت منج انا طلبت من الكريييييييم
روحي قومي ادعي بس ادعي قومي ياعلج الستر
عيل اقولج ادعي
تقولين دكتوراه!!
ناقصه عقد
ناقصه هبال
ناقصه نعره وموجه على الرياييل!!
من زينج تاخذين الدكتوراه
جنج مينونه مجابله الكمبوتر و هالكتب معقده
لاعمري شفتج متحمرا مثل باجي البنات!!
و لا متسنعه
من اول يوم رمضان ملوعه جبدي في التريننج
و هالكبه رابطه شعرج
و ساطره يمي جنج عيوز!!
لا تطلعين لا تروحين
رووووحي ذلفي
هيتي
خيشووفج واحد سنع!!
انا: اقاطع صراخها..والله ما عرفنالكم اذا طلعت قلتي هايته
اذا قعدت قلتي ملوعه جبدي منسدحه 24 ساعه جنج عيوز!!
تدرين شنو احسن حل!
بقدم بعثه على فرنسا اكمل دراستي هناك
لا كشخه و لا كويتين
و لا قيل و لا قال!!!
امي: و باشتطاط قاتل
ياربي رزقتني بنت وحده و بتموتني
هالصبيان يازينهم 24 ساعه كاشخين و متسنعين اتحسين انهم عيالي !
اما هذي عوووووووووووع مادري من طالعه عليه!!!

وااي يا قلبي كل هذا من كلمه دكتوراه!!

ما قلت شي
دكتوراه تسوي جذي
ياربي امنيه امنيه
الواحد ما يتمنى
ههههههههههههههههههه

اللبحه الثالثه

ياربي ليش الرياييل تزيد حنتهم و لبحتهم في رمضان
و كلا هواش و اعصاب!!
دقت علي رفيجتي تاخذ وصفه حلو
واسمه لبحه ريلها و عيالها
يتحلطم على الخدم
على اليهال
على الثلاجه
على الحلو
على الخساير!!
قلت لها بليز دقي وقت ثاني ريلج معصب
روحي شوفي شنو يبي بعدين دقي
تقولي: ماعليج منه هذي حالته طول رمضان بس يلبح
تهد السماعه و تقوله
مو تلبح على قلبي قووووووم افطر قووم
اشحقه صايم انت
عورت قلبي ماني قادره اتحجى بالتلفون!!
تتسلط انت!!
انا قلت الحين ريلها بذبحها!!
خنسكر التلفون ابرك
الو فلانه فلانه امي تبيني!!
صديقتي: و امج 24 ساعه مناشبتني من ادق
!!!

اشفيهم الاوادم اعصاب!!

تحديث على البوست
في اللبحه الرابعه !
بعد هواش امي وزفها لي !!
على سنعي الزايد و عدم كشختي
اليوم الله وكيلكم يا رفيجاتي
لسحت لقمتي من اهني عقب الفطوور
ووطرت وررر على صالون اليرموك
دل دل دل سويت شعري و سويته بااف
و تسنعت
و رحت البيت بسرعه بسرعه الاتوه مأذن العشا
كشخت بذيج الدراعه الي يالله من فضلك
و فجيت التجوري يا عوينتي عليه مغبر ما فجيته من زمان
و طرلع التراجي الروووبي الي على هالكبر
و كشخت و تمكيجت و قعدت بالصاله!
و حصل الاتى:
يا اخوي مستعيل من صلاه العشا
اخوي: ياه ياه بو الفطم وين بتروحين
خوو غبقه بنات ((....)) خلصت الاسبوع الي فات وزوعوا الهدايا
كاشخه حق منو !!
وين بتروحين
انا: ولا مكان ماني طالعه بس بشرب الشاي
يدش داره يغسل و يتسنع و يطلع
اخوي: لا انتي من صج كاشخه جذي عشان تقعدين في البيت !!
انا : اي والله اشفيك

اخوي : لااااااا الله يشاافيج انشاءالله سكنهم مساكنهم !!!

بعد شوي اتيي امي خالصه من الصلاه !!
امي : هوو انتي وين قبيتي عقب الفطور
انا : الصالون !
امي : و بس انتي طلع معاشجج فسفستي في هالفلوس
ماعندنا غير الصالون احنا !!
انا : وبقلبي قصه اشكبرها الحين انتي قايله تسنعي لما تسنعت زفيتيني
يما اشفيييييييييج اصلا ماسحبت من فلوسي ابوي معطيني الفلوس
وبعدين انتي قلتلي تسنعي
امي: انا قلت تسنعي مو طلعي التجوري! وين مفتاح التجوري قفلتيه
اشماله مطلعه هالتراجي!! بتروحين عرس
و الا بس عشان توريهم الخدم !! يزووق قلبهم

وليييييييييييييييييييييييين ما سوا علي
يازيني و انا مخلقنه

دش ابوي :
يه يه يه يه اشهزييين
تو ما حلت الدراعات
توو ما حلت هالصاله بنورج

يا بعد عمري يا بوووووووي محد جابر بخاطري غيرك
و لا احد رافع معنوايتي غيرك

ابوي: يا بووج لاحد يشوووف هالزين ينظلوونج!!

انادي انا بالصاله و اقول
ربعي الينانوه
ربعي الكتبه الملائكه
قريني
لا تشوفون تنظلوني

يبا من درا عن هوا داري
و شافني
هاهههاهاهاهاهاهااه

يدش اخوووووووووي الصغير ويكملها
اخوي: بسم الله الرحمن الرحيم
ليش مهووله في روحج جذي!!
انا: مهووووووووووووووووووووووووووووووووله
ياعلك شقووووووووووووووول
ليش مهووله

اخوي:مدري كاشخه حدج
و متمكيجه و لابسه اكسسوارات
انا بألعلى حسي: الماصاااااات الماصااااااااااااات
اخوي: اي و بعد كاشخه بالماصات حق ليش.. ؟ حق شنو؟؟
انا : امي زافتني تقولي تسنعي!!

اخوي: ماعليييييييج منها زين
يا شين السرج على البقر
يبى انتي موووووووو مال كشخه خلاص
تعودنا عليج
اذا كشختي يعني في شي غلط!!
اشك فيييييييييييييييييج !!!

وبعد ما شفتووووووووووو و سمعتو
انا بقولكم لا تعليييييييييييييييييييييق

ببجي من تدقرهم ببجي

ذهـبت ربـّـات البيوت بالأجــور

الى صديقاتي
حبيباتي
الى كل ربه منزل
خواتي البلوجرز
منعها خوفها على بيتها
ان تطلع للجيام
او حرمت شي من اجل بيتها
وزوجها
اليك هذه البشرى

من وافده النساء
أسماء بنت يزيد الأنصارية التي أتت النبي صلى الله عليه وسلم وهو بين أصحابه فقالت :
بأبي أنت وأمي إني وافدة النساء إليك وأعلم - نفسي لك الفداء - أنه ما من امرأة كائنة في شرق ولا غرب سمعت بمخرجي هذا أو لم تسمع إلا وهي على مثل رأيي .
إن الله بعثك بالحق إلى الرجال والنساء فآمنا بك وبإلهك الذي أرسلك ، وإنا معشر النساء محصورات مقصورات . قواعد بيوتكم ومقضى شهواتكموحاملات أولادكم وإنكم معاشر الرجال فضلتم علينا بالجمعة والجماعات ، وعيادة المرضى ، وشهود الجنائز ، والحج بعد الحج ، وأفضل من ذلك الجهاد في سبيل الله .وإن الرجل منكم إذا أخرج حاجا أو معتمرا ومرابطا حفظنا لكم أموالكم وغزلنا لكم أثوابكم وربينا لكم أولادكم فما نشارككم في الأجر يا رسول الله ؟

فالتفت النبي صلى الله عليه وسلم إلى أصحابه بوجهه كله ، ثم قال : هل سمعتم مقالة امرأة قط أحسن من مسألتها في أمر دينها من هذه ؟ فقالوا : يا رسول الله ما ظننا أن امرأة تهتدي إلى مثل هذا .فالتفت النبي صلى الله عليه وسلم إليها ثم قال لها : انصرفي أيتها المرأة وأعلمي من خلفك من النساء أن حسن تـَبـَعـّـل إحداكن لزوجها وطلبها مرضاته واتباعها موافقته تعدل ذلك كله .فأدبرت المرأة وهي تهلل وتكبر استبشارا .

رواه البيهقي في شعب الإيمان

.وهو في تاريخ واسط .

دع الخلق للخالق

اليكم عني
من وكلكم بحسابي و رب العالمين موجود
من وكلكم بعقابي و ربي و ربكم سميع بصير
من وكلكم بتتبع عوراتي و كأنه ليس هناك شي في هذه الدنيا سواي !!

لفت نظري بعض البلوجر
خلوو كل شي في هالدنيا و جابلو و علقوا على شي واحد
مو لي انا بس لي انا
و لبعض المدونات
و هو الله يهديج يا لوير
الله يصلحج يا لوير
و كأن مدونتي كانت مرفئ للدعاره
و مسكن شيطان !!

من وكلكم بمحاسبتي
فانا لست بقناه تبث الرذيله
انا مدونه فتاه بسيطه
بها من تناقض الزمن
و شخابيط ايامه

ياتيني من هم بظانين نفسهم باصلاحي
الله يستر عليج
زين كتبتي شي ديني
!!
هاا بعد رمضان بتمين جذي!!

كثير من الكبار الناضجين
نصحوني بعدم كتابه هذا البوست
لان راح يزعل ناس وايد
و قالولي خليه اليهال
ما عليج منهم

الي عاجبه يقرا
و الي مو عاجبه
لا يقرا
في ناس تحب بس اثبات اغلاط الغير!!

اصلحوا انفسكم قبل اصلاحي
دعوووووني و ربي يحاسبني
ربي وكل ملائكه لي
و لم يوكل عبيد مثلي

دعوا الخلق للخالق


في تعليق سخيف من الاخ كويتي
kuwaite

يقولي منو قالج انا صغير و منو قالج و منو قالج
و اليوم يقولي الداعيه لوير
!!
اتمنى انكم تزورون المدونه الحين

و تروحون للارشيف شهر فبراير 2006
في بوست نزوه او عابره سبيل او بوست قصيده
تروحون تفتحون الكومنت تلاقون اخونا كويت
حاط كومنت روحوا كليك عليها
و دشوا نفس مدونه الاخ الي يعلق
الي بوصله لكم راح تلاقون اسمه و يمه صوره بابا جابر
!!
هذا الدليل الاول على انه اهو يناقض نفسه

اضغط هنا للرجوع للارشيف و التأكد

http://floristq8.blogspot.com/2006/02/blog-post_26.html#comments

اخي كويت
ايميلك موجود
انا ضفتك عندي شهر فبراير
تعرفت عليك
كنت طالب في ثالثه ثانوي
جدا خلوق و متفوق
اعتقد الحين يمكن وصلت رابعه ثانوي
!!
فلا تسألني اشلون عرفت
اذا انت ناسي انك ضايفي في فهذا شي راجعلك

انا ما انسى

kuwaite said...

سؤال

الحين بعد مايخلص رمضان بتم المواضيع جذيه

ولا يتقلب الموجة


بصراحة ماحب هل اسلوب برمضان مطوع ولما يخلص ارد سرسري

اضحك على منو ربي !!


كلامي يمكن يضايقج لانه صريح

9:40 م

و ردي عليه كالاتي



كويت

حياك اخوي شخبارك انت وينك قاطع؟؟

ما اتبين؟؟


اول شي خلني اقولك شغله
لاننا احنا في رمضان وفي شهر فضيل
فتكون علاقتنا بربنا و الناس الي حوالينا يحيطها جو ايممانيات
فيكون هذا محور حديثنا
ونكتب عنا

ثاني شي اذا انت او انا او اي احد كتب يوميات عاديه
مايعني انه بيكون سرسري !!

يعني اذا كتبنا عن موضه او قصص واقعيه
او سفر او غيرها او مشاكل او اي ظاهره مومعناتها ان انت سرسري

او انا او اي احد موجود
يمكن صغر سنك ما يخليك تستوعب كلامي
لكن الي وده اوصله لك ياا عزيزي
لا تظن ان سماع الاغاني او الاشعار من السرسره!!

احنا ناس مسلمين طبيعين
انحب الحياه
نعيشها
و ما انظر احد
و لا نبي نسيء حق احد
في كتاباتنا
اتمنى اتضحتلك الصوره

وبعدين انت انسان وايد زين فلا تقول عن نفسك سرسري

انت من شلت صوره بابا جابر و انت متغير :)


و لا تقطعنا


كان رده عليه بطريقه لم يعتقد يوم اني ماراح اواجهه

kuwaite said...

اختي لوير

السؤال هل سيتم هذا التغيير بعد رمضان ولالا


جميع يصيبهم جو ايماني ويتأثرون ولكن متى ماخلص رمضان رجعت حليمة لعادتها القديمة

المواضيع السفر والمواقف اليومية وغيرهم شئ عادي جدآ وما يختلف على اثنين لكن اخذي لج فره على الارشيف المواضيع القديمة

ومقارنة بسيطة بين المواضيع وبين هذا الموضوع

هل بنظرج يتساوون !!!


تناقض عجيب غريب فماتدري هل شخصيةالي تكتب شلون صايرة متقلب , مزاجية, او ماخذه الدين على كيفها


لا مانع من التغيير لكن التحويل والرجوع من اجل فترة بسيطة او صحوة دينية
هذي مشكلة


وبالنهاية في نقاط غريبه

صورة جابر الله يرحمه بالموضوع

ومادري على اي اساس حكمتي بصغر سني

واني مطوع او سرسري


وبالتوفيق حجية :)

11:36 ص

شكرا لكم
وتقبلو مني
مو من عادتي اشغل نفسي في توافهه الامور

لكن لما اتييني مظلمه
من ظالم في بيتي

لازم ادافع عن نفسي

((المرء على دين خليله فلينظر أحدكم من يخالل))

((إنما مثل الجليس الصالح والجليس السوء كحامل المسك ونافخ الكير، فحامل المسك إما أن يحذيك، وإما أن تبتاع منه، وإما أن تجد منه ريحًا طيبة، ونافخ الكير إما أن يحرق ثيابك، وإما أن تجد منه ريحًا خبيثة))

اذا كان صديقك جليس صالح يعينك على هذه الدنيا فأعلم انه هبه من الرحمن
يذكرك بالله و باليوم الاخر كلما اشغلتك الدنيا و فتنتك

و اذا كان صاحبك جليس سوء كالشيطان

لا يذكرك الا بالدنيا و الشهوات فاعلم انك في بلاء عظيم

اذا كان صاحبك لا يشغلك الا بالهوى و كأنه نفس اماره بالسوء
يزين لك المعاصي و يهوي بك في طريق الرذيله
فاعلم انك في غمام..

اذا كان لك صاحب يتودد اليك الليل و النهار ليزن لك الدنيا و يبهجها في عينك

بالسفر
لقضاء عطله العيد في ممارسه الحرام و اتباع الشهوات
فتأكد انه لا يحبك ابد
فهو يحب شيطانه
و يرا فيك شيطان
اخي
اختي
هذه الايام الفضيله
بها ليله القدر اسأل الله العلي العظيم ان يرزقنا اياها
و نفوز بها
ويجعلنا من عتقائه يا رب

فادعوا لانفسكم و ادعوا لي
بصحبه صالحه
تعيننا على هذه الدنيا
و يبعد عني و عنكم شياطين الانس

بزغ نور العشر فهل من مشمر؟؟

على سجادتي
على سجادتي اناجي رب العباد
رب السموات و الأرض
انت ابصر بي يا رب
انت اخبر بحالي يا رب
انت اعلم بضعف نفسي
و قله حيلي
و هواني على الناس
يا رب مالي وعبيدك
و انت ربي
مالي سواك يا مالك الملك يا رب
ابكيك على سجادتي و عندك علمي

فانت علام الغيوب
بصير
سميع
مجيب
اقسمت عليك يا ربي برحمتك
و نورك الذي ملئ
اركان عرشك
ان لا تكلني لنفسي طرفه عين
فانت المدبر يا رب

اذا غلقت الابواب
من لي غيرك يا فتاح

يارب
يا سميع
هذه العشر الاواخر قد أتت يا رب
و لم اوفي رمضان و اوفي نفسي و اوفيك يا رب بحقك
يا رب فتنتي الدنيا
و اهوالها
و الايام تمر و لا تنتظرني

عجله هي ساعات رمضان
و انا تأخرت يا رب
فمن سبقي لجنانك يا رب
فمتعه

و متعني و لا تحرمني
و عجلني يا رب لعمل الخير
اشكو اليك حالي و انت علام الغيوب
تقبل مني
و اعني على القيام
و الطاعات
و تقبلها مني
و اعتقني يا رب من جهنم فانها بأس الضجيع
و بأس دار المقامه
وعجلت اليك ربي لترضى
وعجلت اليك ربي لترضى
وعجلت اليك ربي لترضى

فقد حارت بي نفسي في هذه الدنيا

فمالي غيرك

و مالي الا قبلتك

الجأ اليها

مالي الا دعائي

و دموعي

على سجادتي يارب

يارب

يارب

لا تحرمني ليله القدر واجرها

يارب اكتبلي ليله القدر و وفير حظها

يارب اسألك بليله القدر يارب

يارب

رمضانياتي غير

رمضانياتي انا غير
بسطرلكم جم موقف رمضاني صار لي في رمضان عشان تعرفون رمضاني انا غير ..
مو عشان انا فلطح زماني لألألألأ بس لاني انا حتى في عز ايمانياتي لازم افصل !!
و على منو فصلاتي لازم تكون !!
على الفقير لله المسكين المعذب في الارض ابوووووي
لان ابوي متحملني !!
رمضانيات 1
بيوت اذن الله ان ترفع ويذكر فيها اسمه يسبح له فيها بالغدو والاصال. ))

يوميا كلنا على الطاوله انتيمع
قبا 10 دقايق من الفطور يكون كل شي مجهز في السفره و حتى الشوربه و كل شي مصفف
و قاعدين ننطر الاذان
اخوي الصغير يطالع الساعه
اخوي الوسطي متأخر كالعاده ياخذ شاور
انا و امي و ابوي و اخوي الكبير و زوجته مقابلين القبله للدعاء
يأذن
يقول دعاء الافطار ابوي بصوت عالي
انا مركزه على دعائي
اقمظ عيني اكثر للتركيز
ادعي لي و لكم و لجميع المسلمين
انسمي بسم الرحمن كلنا و نفطر
الغريب و الطبع البايخ الي فيني
ان مستحيل اسوي حركه الشوربه و التمره و اروح اصلي
!!
لألأ انا ما اعبر لازم افقم افقم و تالي اقوم اصلي
و كل يوم ابوي محاضره على الفطور ان لازم نعطي المعده مجال و ما ناكل مرا وحده
و كل يوم اقوله نفس الكلمه
خير انشاء الله
انت رووح صل و ادعيلي
و انا ربي بهديني يوم و برحم معدتي
اخلص اغسل بسرعه بسرعه و اصلي
اخلص من الصلاه اصبلي الشاي و القهوه و امسك الريموت و احط على قناه السعوديه بانتظار افطار الحرم و متابعه صلاه الحرم
نهاهاهاهاهاهاهاه الريموت كل يوم عندي
مسكين اخوي الصغير يتمنى يوم من الايام يشوف البرامج التعبانه ويانا في الصاله
بس حريييييييييييمتك ما تخرب صيامنا
احلى شي في رمضان اهو يمعه الفطور ويمعه الشاي و الحلو على صوت سديس في الحرم الشريف
الحمدلله على ان احنا مسلمين
الحمدلله على نعمه الصيام
لحمدلله على نعمه صله الرحم
و اذا انت في بيت يذكر فيه اسم الله و تتيمعون على طاعته و ذكره فاعلم انك في خير كبير
و احمد ربك الف مرا على هذي النعمه

رمضانيات 2

على يمعه الحلو
الي بعد الفطور
اصب حق ابوي قهوه
و مرت اخوي تقول حق الوالد
عمي عمي سمعت في اخر فتوى !!
يقولها شنو بعد !!
تقوله في مفتى حلل شرب الزقاير و قال انها ما اتفطر لان الزقاير مو اكل !!
قالها ابوي ..الله يسامحه و يهديه بس اصلا الزقاير بكبرها حرام ..اشلون عيل شربها و انت صايم..!!
و انا قاعده يم ابووووي
اقوله: هوووووو اشحقه ما تراعي مشاعري و شعوري ..شنو حرام و ما حرام شالنغزات علي !!
الحين انا شحلوي ساطره يمك و انت على اولك ما غير حرام و حرام هالزقاير !!
ما تراعي مشاعري جدام اعيالك !!
ابوي اهني ميت من الضحك
يقوووووووول شنو انتي ادخنيييييييين !!
اقوووووووله مدري عنك يعني انا ما قلت لك اشكره اني ادخن بس المفروض تفهم
و انت ليش نغزات علي هههههههههههه
اخواني يموتون ضحك
مرت اخوي طاقتها البوه
مو عارفه صجنا من جذبنا
امي تقولها هو بعد ما تعرفين فطيم و خرابيطها
ههههههههههههه
تموت ادور على الشي الموزين تسولف فيه !!
رمضانيات 3

بعدها بيوم ابوي جدام اخواني بعد الفطور يقولي
بو الفطم دشيت دارج اليوم و الا ششوووووووف !!
مسويه جهاز المشي علاق حق اهدومج !!
لا يابنيتي ترا المشي صحه و زيين و تعالي شوفي الاجانب الي اعمارهم على تسعين و فوق الثمانين
اذا سألتهم يقولون لك لان احنا محافظين على صحتنا في شبابنا و انمارس الرياضه
و ما اندخن ..
اقاطع ابوي !!
وباشتطاط تام و انا ماسكه مطاره القهوه و احركها فوق و تحت و اهوش فيها و عيون امي اتلاقط
ويا المطاره اتخاف اقطر قهوه على زوليتها الايرانيه
يبا مو حاله هذي كل يوم جدام اخواني و امي اتعايرني بالهزقاير
ما يصير جذي
ترا انا ما اشرب لاني دلع وولع
لا يبى انا هدفي شريف
انا اشربها عشان تسد نفسي عن الاكل
هذا اولا
و ثانيا برستيج يا يبا برستيج
عيل تبي نانو و دانو ربعي التروفه الي بالنادي يقدمولي زقاره و ارفضها!!
واي يبااااا حدك اولد فاشن
ابوي يضحك
اخوي الوسطي مو عاجبه غشمرتي كالعاده
اخوي الكبير يقول حق الصغير
افا اختك تروح نوادي مختلط من ورانا
الصغير يرد عليه
عادي عادي 2006
ارد عليه طاع هذا لا تفشلنا شنو مختلط انت بعد
اسمها كابلز
..ينط اخوي الصغير يسأل اخواني
تخيلوا ادشون قهوه تلاقون فطيم اتشيش شنو شعوركم !!!
الوسطي ما تعطلها
قال عقال على طول
!!
الكبير يقول
اسوي نفسي ما شفت و اطلع
هاهاهاهاها
يقول ابوي لو تعدين مني ميخالف بس حاط وراج 3 ريال
التفت على ابوي و اقوله لا تخاف مظبطه الجمرك
ههههههههههههه
رمضانيات 4

انا بعرف ليش الرياييل يحبون الحنه في رمضان
ليش كل يوم على الفطور تعليق
ليش الشوربه ماصخه
و ليش الهريسه مالحه
اذا ماصخه المملحه يمك حط و اسكت
و اذا مالحه
شسوي يعني
برووح اردها الجدر و نطبخ من يديد
!!
و ليش اذا يوم سوينا هريس محد ياكلل
و من ياجر ماكو هريس
الكل يسأل وين الهريس ليش ماكو هريس !!
رمضانيات 5

بعد صلاه التراويح
حطينا الشاي انا و ابوي و تجابلنا
دخل علينا اخوي الكبير و تكلمنا عن موضوع المرور و الزحمه المروريه القاتله
و المخالفات المروريه
و تشكى ابوي من مخالفاتي !!
و قالي يا بنيتي ترا انا ماني ملزوم كل يوم و الثاني ادفع هالمبالغ على استهتارج !!
احلف له ان مو انا و لا عمري عديت حمرا او صفطت غلط
هذا كله السايق او اخوي الصغير !!
الحين انا خليت كل شي و قفت على كلمه مو ملزوم
جان اقوله تعال و بعدين انت ملزوم شرعا علي
يعني لازم تدفعلي
قالي لا انا ملزوم على امج و على الصغير بس انتي كبيره يعني اذا باجر قطوج في السجن على المخالفات المروريه
لان السياره باسمج
انا مالي شغل !!
قلت له يعني انت مو ملزوم !!
و مالك شغل !
قدها ؟؟!! قدها
البس نعالي مستعيله
و اسوي نفسي بقوم
يالله عن اذنكم بروح اتزوج هتلي
اخوي يناديني
تعالي
و ابوي ميت ضحك علي
مو قادر يناديني
تعالي
انا لألألألألأ اشتبون بروح اتزوج
هتلي
يقولي مو ملزوم عيل بزوج نفسي انا
ابوي يقهقه من الضحك مو قادر يتكلم
على طريقتي الجنونيه و رده فعلي
و اشلون انا على طريف
بروح اخذلي سقط
افشلكم
ليش تقولون مو ملزومين !!
اخوي يلمني
و يقول حق ابوي ديربالك ترا فطيم هاليومين سي دي من مخها طاير
و هذا انا يوميا
كل يوم مسويه فيلم
حق ابوي
و ميننته
احسه يتمنى يخلص رمضان عشان انطلق في هياتي
لاني معتكفه في رمضان و مجابلته
و يستمر مسلسلي الرمضاني و هناك مواقف اخرى جدا جدا مضحكه
بس ما اقدر اقولها استاثم فيكم !!
خلوها عقب رمضان
و تقبل الله طاعتكم
و حياكم الله عندنا كل يوم انا و ابوي قاعدين بعد التراويح

مسحت البوست عشانج يا ريما

اخواني و خواتي

سامحوني على اني ضيقت خلقكم في البوست الي فات

و انا الحين احتفظت فيه

و لغيته من البلوج نظرا لان ردود الافعال الخارجيه كانت وايد قويه

المهم

لان الحب فعل مو بالكلام

و لاني احب ريما وايد وايد

و لانها من امس بالليل و اهي تبجي

و تقولي خافي الله فيني

و طرشتلي مسج بصراحه بجاني وايد

فعشان جذي اسمحولي

لاني مسحت البوست

و اتمنى لكم صيام مقبول يا رب

و حق بعض الناس الي قالوا بطرشولي

قرقيعان

ترااااااا ماشفنا شي !!

ايييييييه مشكله الرياييل ماوراهم الا الحجي

اشكركم من اعمااااااااااااق قلبي

من لا يشكر الناس لا يشكر الله

شكر خاص جدا جدا جدا من قلب حار
لحبيبه قلبي و اختي و عمري و رووووووووووووحي
ريما
على انها حطتلي هذا البنر العجيب


و شكرررررررررر احر من نار الجمر
للاخ
I_live_in_q8

على تصميمه الرائع للبنر
و اهدائه لنا هذا البنر الروعه

و اشلون صمم ميزان العدل
عشان يتماشى مع اسمي
لوير

مشكووووووووووووووووووووووووور
وايد وايد
والله مدري اشلون اشكركم

دايما اتفرحوني
مشكورين
صج هذا شهر كريم

مسخر ربي الكريم فيه الناس حق بعض

الحمدلله
اخجلتوني و ادمعت عيني والله

اول ما شفت البنر
شهقت و صرخت من حلاته

نفحات رمضانيه

النفحه الاولى

يارب دعوت لنفسي و لوالدي و لجميع المسلمين
فتقبل يارب دعائي بنيتي
و لا تكلهم على ذمبي يارب



النفحه الثانيه

في هذه الايام اتابع عمرو خالد في قناه اقرأ الساعه 11.45
برنامج و بأسمك نحيا
تبون الصج كل ما شفته و بكيت و تأثرت اتمنى كل المسلمين يشوفونه و يستفيدون منه
عن اسماء الله الحسنى
و تحسفت وايد على اني واصله لي هالعمر
و اعبد ربي و ما افقه معاني اسمائه


لفت نظري اسم الجبار
كنت اظنه يعني الجبار القوي
طلع اسم الجبار يعني
يا جابر المنكسرين
!!
من منا لم ينكسر في هذا الزمن
و كم منا منكسر لحاجه الان
و كم منا دعا ربه و قال
يا جبار
يا جابر المنكسرين
اجبر كسري
و ارفعني

اتمنى انكم اتابعونه
و اذا ماعندكم وقت تقدرون تزورون موقع عمرو خالد :)

النفحه الثالثه

ليله القدر

سميت ليلة القدر بذلك لعدة معان، هي:

1. لشرفها وعظيم قدرها عند الله.
2. وقيل لأنه يقدر فيها ما يكون في تلك السنة، لقوله تعالى: "فيها يفرق كل أمر حكيم".
3. وقيل لأنه ينزل فيها ملائكة ذوات قدر.
4. وقيل لأنها نزل فيها كتاب ذو قدر، بواسطة ملك ذي قدر، على رسول ذي قدر، وأمة ذات قدر.
5. وقيل لأن للطاعات فيها قدراً عظيماً.
6. وقيل لأن من أقامها وأحياها صار ذا قدر.
والراجح أنها سميت بذلك لجميع هذه المعاني مجتمعة وغيرها، والله أعلم


أفضل ما يقال فيها من الدعاء

أفضل ما يقال فيها من الدعاء: اللهم إنك عفو تحب العفو فاعف عني؛ يردده ويكثر منه داخل الصلاة وبين تسليمات القيام وفي سائر ليلها ونهارها.
فعن عائشة رضي الله عنها أنها قالت للنبي صلى الله عليه وسلم: "أرأيتَ إن وفقت ليلة القدر، ما أقول فيها؟ قال: قولي: اللهم إنك عفو تحب العفو فاعف عني".9
وكان من دعائه صلى الله عليه وسلم: "أعوذ برضاك من سخطك، وعفوك من عقوبتك".10
وبما يسره الله له من الدعاء والذكر.


لا تنسونا بدعاء ليله القدر

النفحه الاخيره

ربي اني لما انزلت الي من خير فقير