مفجوعه في انترلاكن

الله يا انا خبصتها خبصه في بوستي الي فات مدري اشلون قريتوا
حطيت عباس على درباس و قلت بوست !!

المهم بصراحه لازم ارتب اكثر الشكل و الافكار

اروع ما عشته في سفرتي اني بعدت كل البعد عن السوق
و هذا شي وايد كان مستغرب من رفيجاتي و اهلي و ياربي ترا السوق كلش كلش ما يهزني
الكل مستتغرب واي فطييييييييم تدرين شنو الموضه
بكل هدوء اجاوب اي ادري بس مالي مزاج سوق
حايشني موود الوناسه ياربي



خلوني اقولكم عن رحلت العمر في انترلاكن
صبحت الصبح كالعاده الساعه 6 الصبح جدولي يوميا
اقوم من فير الله اغسل و ابدل و اروح امشي رياضه او مرات ادش اللعب تنس
او اللعب مع اليهال في الدوارف
تعرفت على ياهل سويسري
عيزت امطخ فيه كل يوم الصبح امشي الاقي امه تلعبه
حبييييييييييته حب مو طبيعي
الحمار طلع يهودي
بس ما تغيرت مشاعري تجاهه الطفل !!
كان المفروض اكرهه الياهل بس ما كرهته


المهم ارجع الغرفه على الساعه 9 و نص
و ادخل اخذ شاور و اطلب ريوق و اتريق و على طول اروح السياره
((رحله التنظيف من بعد حوسه رفيجاتي ))
امرهم وبعدين قبل لا نطلع لازم نمر ستار بكس
ناخذ قهوتنا
و نبرمج الجي بي اس و نتوكل على الله
هذاك اليوم فزعت البنات من فير الله ورانا انترلاكن
تبعد 3 ساعات بالسياره
بصراحه اهي تبعد ساعتين بس لازم اجذب عشان ما يأخروني
وصلنا انترلاكن بسلام الحمدلله

كل وحده مده البوز الي تبي براشوتينج و الي تبي رافتينج
خير الامور الوسط سوينا براشوتينج
تالي رافتيج
احلى ما في الرافتين
اشكالنا الهول و احنا نلبس الللبس
(1)
الشينجينج روم
طبعا كان الجينجنج روم كلا بنااااااات
فانا نوعي عادي ما انطر دور ادش حمام و مدري شنو
اي مكان افصخ البس المايوه و السوت مال الرافتيج و اخلص
فطيييييييييييم في قدره قادر تحوووووولت حق شاايب خليجي عمره ماشاف بنات مفصخين!!
فيني عقده سولولايت
المهم الي ويانا بنات امريكيات على 23-25
صغاااااار
لابسين بكيني قاعدين يبدلووووووون
طحت في فخوذهم خز مو طبيعي و يا مكاويهم بشوووووووووووف مشدودين اجساهم حلوه؟؟
و الا كلهم خياااااااااااااااااس
المكاوي خلايا نحل
و و لا وحده مشدووووده
و متروسه سولولايت
اكتشفت نفسي احلى جسم فيهمبدون مبالغه
لا شعوريا من الوناسه قمت امشي مفصخه
ورفيجاتي منخشين داخل يبدلون
ههههههههههههه
اقولهم طلعوا طلعوا
خيولوون تعالو شوفو الظييييييييييم
ههههههه
المهم بدت الصجيه و بتبدي رحله الرافتين
هذي مو اول مرا اسوي رافتينج لعبه ممتعه و مرحه
بس رفيجاتي خافوا و انا قمه الضحك
على اي شي و بدون و لا شي اضحك و اعلق عليهم

الصدفه الي صارت احنا طالعين 6 قوارب ويا بعض
4 شباب !!
و احنا الخامس و بنات و شباب
و قارب كابلز!!
انا ورفيجاتي و معانا شباب
و 4 قوارب يمنا جروب بس شباب امريكان و المان
فكه البنات الامريكيات ذلفو رحله ثانيه
من بقا بنات ماكو الا احنا!!!
وحده من رفيجاتي ما تعطي ويهه و الثانيه خوافه
منو الي عاشت بربييييييييع
انا
دبرت عمري وقعدت ورا
و شباب جدامي و لما وقفونا عشان ننتقل من القارب لي الباص نغير مسارنا
شالوني 2
و حطوني 2
و طاحت الميااااانه
الي يمي اسمه رالف
و الي يمه الي يشيلني ليش متين شوي يسمونه اكس اكس لارج
و المدرب وراي
ههههههههههههههه
باختصار ما سويت شي
ورفيجاتي حاقدين علي

مظبطه عمرهاااااا
تكعكعت لهاااااا ويا هالامريكان
يما منهاااااا ما اتعطل

و انا كل شوي قل اعوذ برب الفلق
يوم خلصنا الرافتينج
سلم علي رالف رفيجي و قالي عيوووووونج وايد حلوه
انا احم احم مشكوووووووور و انت عليك ليبس مال من يمطخهم
طبععا ما قلت له

بعد يا ربي انا ادميه رياااااااااال قاعد بحضني في البووووت و ريله بريلي
ماعندي احسااااااااس مثلا!!!


المهم خلصت الرحله بمتعه و سلام و قمه السعاده
ردينا الخيام و الشينجينج رووووووم
رفيجاتي ركضه ركضه
دشووووو خذو شاور و اندعسو مدري وين راحو انا بدلت و طلعت اعلق الهدوم
و الا ششوووووف !!
فوق 20 شاااااااااااااااااب الي كانو معاانا مفاصيييييييخ برا
طارت عيوووووووووني
كل واحد يقووووووول الزود عندي !!
و الزبده مفاصيييييييخ
عادي
طبعا انا طلعت عيوني
تنحت
خزييييييييييييت
شبعت
استوعبت الوضع


دشيييييييييت اصرخ من قمه راسي على رفيجاتي
عرفتوا الصرخه و الصوووووووت الي من اقصى القلب و البلعوم

بناااااااااااااااااااااااااااااااااااااااات لحقوااااااااااا
احنا في الجنه !!!!!!
رفيجتي : عمى بعيييينك و ايش ذا الصراخ
انا: لحقي لحقي احنااااااااااااااااااااااا في الجنه
رفيجتي : ايشششششششش استغفري ربك
انا: طلعي طلعي شووووووووووووووووفي خمسيييييييييييين ريال مفصخ براااااااااااااااااااااااااااا
بحياتي ماشفت هالمنظظظظظظظظظظظظر
طلعي
واااااااااااااي وااااااااااااي ياقلبي ما فيهم واحد مكرششششش
عضلات
صدوووووووووووووووور
الخطوط الي في البطن
وااي تعالووووووووووووا


اعطيهم ظهري و ارووووووووح
بروووووووووووح اشووووووف برووووووح اشوووووووف
واطلع و اخلي رفيجاتي
واجابل الزين
احلى ما في الامريكاااااااااان
انهم ياربي ما يخلوووونج طايحه بجبد عمرج
كل من يقط عليج كلمه
مغازلجيه مثل ربعناااااا
و رفع معنويات مو طبيعي
30 سنه اصيف في اورباااااااا ما غازلني واحد
هذوووووووولا غير
اول ما شفت رفيجاتي خلصووووو و يوني برااا

قلت لهم : الصيف اليااااااااااااااااااااي انا في امريكا

و خلصت الرحله رديت الباركينج خذيت السياره و تغدينا و رحنااااااااااا مونترووو
وصلنا الساعه 10 بالليل
طبعا امي تدق علي و انا بركب البراشوتينج
ها فطيم وينج
انا : في مونترو في الايراني
امي : اي عفيه بيتي لا تروحين بعيد اخاف عليج
انا : اي انشاء الله يماااااا!!
رديت و طووووول الطريج و انا اسمع اغنيه فكروني لام كلثوووم
رووعه
ورفيجاتي نايمين في الطريج
و احلى حركه اسويها فيهم و اهم في غرقه النوم ابطل الدرايش كلهااااا و اسرع
ههههههههههههههه
نحااااااااسه

يازين الصيف

اهم الاخبار

اقامه درس ديني لعمرو خالد في مونترو في فندق مونترو بلاس *

باستضافه اسره المهيدب الكرام

شكرا لكم

اقامه هيفا وهبي و صديقها السعودي في فندق رويال بلازا *

في مونترو طبعا مما ادى الى خلل و ربكه عندنا في البحيره

محور الحديث

شفتوا هيفا !؟؟

وين راحت هييفا ؟؟

هيفا ركبت القطار

و لما شفتها انصدمت

في البدايه ماكنت وجودها عندنا في مونترو

بس لما كنت قاعده في اللوبي في رويال بلازا

مرت جدامنا ويا رفيجها السعودي

وايد اصغر منها

اذا بكبره اعطيه 30 سنه !

و حركات الي اتخشش و تسوي افلام و تنحاش لين تركب السياره

الملاحظ في الموضوع انها جدا جدا مغروره

بس طبعا على منو

ينونها اليهال

يروحون لها و لما يقربون يقولن لها سوري حسبنااااااك نانسي عجرم كنا بنسلم

و الياهل الثاني يقولها

اخص طلعتي هيفا !!

ههههههههههه

يوم رحنا القهوه و نقلت لهم خبر وجود هيفا في رويال بلازا

الكل اجزم بوجودها في البحيره بس كانت مغروره و اتخشش

قلت لهم اكيد منخشه !!

يعني بالله نازله من فندق دار التوحيد في الحرم ويا ابوها !!

نازله من غرفتها وياها واحد اكيد تنخش ! و الا شتهقون

خلصت اخبار اليوم

نبدا الرحله الحين

الرحلــــــه

ترا انا نسيييييت البلوج !!
و نسيت اشلوووووون اكتب
حتى اسلوبي احسه غير !!
عيزت ابي اكتب ابي اكتب
ماني قادره اصف الحجي و الاحداث بس ماني قادره من اكتب كلمتين امل و اقوم

الله يكون في عونكم علي !!
ماني عارفه اقعد دقيقه على حيلي اكتب بوست !
شنو واجب ؟؟
حمدلله و الشكر

زفيت عمري وقعدت اي شالحاله
توني قاعده من النوم الحين العصر
قلت لهم يسون لي بيض و يشوون لي توست بالشوايه
اكل عدل و جذي تالي اردلكم
و ابدى رحلتي وياكم
مو جنه فشله اقولكم اني ماكله بيض الساعه 4 العصر!
طبعا اجازتي ماكانت كلها سفر
لاني ما سافرت شهر

بس بصراحه قرار السفره يا جذي بين يوم و ليله
او يمكن لانه الله كاتبلي الروحه
خلوني ابدى الرحله وياكم
مقتطفات

بدون ما احدد اليوم و الساعه و اشلون عشان الملل بس

ماراح يكون بوستي صور
مثل السنه الي فاتت
ولكن راح يكون مجموعه احداث
بصرااااااااااحه قررت اني ما اقووووووووووووول لكم الا على الاشياء الي تونسسسسسسس

لكن اسمحولي ما اعبر اخش الي صارلي في المطار

طبعا وصلتني المطار رفيجتي و حبيبتي
و قعدنا في ستار بكس لان السايق كان مودي جناطي من قبل و خالص كل شي
بس رحت قعدت في ستاربكس و تالي سلمت على رفيجتي و دشيت قاعه دسمان مدري شسمها
المهم توني قاعده و ساحبه الجريده و طلبت قهوتي و جذي
و الا ما وعيت شفت شخص
اخر انسان اتمنى اشوفه بحياتي

خلوني اعطيكم نبذه عنه
محامي
كنت اعرفه ايام ماكنت انا طالبه و اهو محامي بس معرفه مسنجر لا اكثر و لا اقل
ثقيل طينه شوي
انا نوعي اذا ما ابي واحد! يلزق !

و اذا ابي واحد ما اوصله !!

هذا من الناس الي كنت انا عاجبته و يشوفني اني وايد زينه و انا لان ماكو تكافئ اسري بيني و بينه فكنت مسكره الباب

بس مدري يوم انا كنت طالبه الظاهر كنت وايد وقحه و اشكره قلت له ما ينفع انحب بعض لان ما يصير انتزوج بعض او شي
جذي مدري بس كنت قليله ادب وياه
فقالي كلمه لي الحين ترن باذوني
((راح تعيشين وحيده و تموتين وحيده و لا احد راح يحبج لانج متكبره و مغروره و بلا بلا بلا

عقب ست سنين
الله يعاقبني
ان هذا الريال يشوفني و انا بروحي في المطار قاعده منزويه ويا الجريده بروحي
و اهو ويا مرته و عياله 2 و الفلبينيات
عطاني نظظظظره
من فوق لين تحت
حسيت ابي الارض تنشق و تبلعني
كشيت كشيييييت في مكاني
احوس بالتلفون
احوس في مكاني ماني قادره
اصلا لو كان اكو ريال بروحه قاعد حدي رحت و قعدت يمه سويت نفسي هذا ريلي هذا اي شي بس المهم انا مو بروحي

سكتوا بغييت أأجر صباب القهوه يصير ريلي هذاك اليوم و لا اقعد بروحي جدامه

و ركبت الطياره
و ياريتني ما ركبت
وياي بالطياره

!!!
و فطيم فجي حنفيه الدموع
و صيحي
عمركم شفتو وحده تلبس نظاره بالطياره ؟؟
انا خشيت ويهي عن الناس
و يمكن اهو ابو عادي بس هذاك اليوم تسلط علي
بس يمطخ في بنته و يطالعني

ليش الافلام !!

عاد حرام بنته اتينن ماشاء الله
عرفتوا الي اقول بقلبي
خلاااااص شوف مرتك والله احلى مني و شكلها احسن مني
و اطيب مني
انا موزينه بس فارج لا اطالعني

المهم يوم وصلنا نزلت و خذيت جنطتي و اول ما طلعت رفيجاتي كانوا ناطرين رفيجاتي من سنه بالظبط ما شفتهم
عفست مطار جنيف بالصراخ
أأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأه
ما جنه المطار ممتروس
تعالوا توني استوعب رفيجتي طقتني بالجنطه
حب اقشر احنه !!
رحت على طول يورو كار استلمت سيارتي
سوولي قصه و عفسه و قصوا علي
و عطوني اودي اي فور بس وايد والله اتينن مريحه صج صارت خيره

و اهو طبعا المحامي وراي و كشرتي من هني لي هني

احم احم رفيجاتي وياااااااااي انا مو بروحي

موت قهر ما تقدر تسافر ويا ربعك

مالت عليك روح جابل حنه اليهال !!

انا بستااااانس ويا رفيجاتي

طبعا هالحجي اقوله بقلبي حق عمري

و ركبنا السياره و سمينااااا بالله و حطينا السيديات
و يازين الجي بي ار بس سحيله عمتي وايد عصبيه بس تصرخ
تيرن رايت امييييييييييييييييدتلي !!
طلعت من مطار جنيف
مسكت الهاي واي
وفقت في اول محطه بنزين

ماي
شحن سويس كوم
و توجهنا الى مونترو
لازم اقولكم عن رفيجاتي
من امتع البنات في الدنيا
و لكن فيهم عيييييييييييييييييييييييييييييييييب شنيع
من يركبون السياره ناموا !!!

لحظه هااااااااي انا طالعه ويا منو !!
اتيبون لي النوووووووووووووومه

ورانا درب !

رحت مونترو و استانست في السلام و نزلت الايراني اول يوم و تمشينا شيكت على رفيجاتي و عيالهم و الامه العربيه الكريمه
كل شي نفسه ما تغيرر

اييني وليد يركض
فاااااااااااااطمه فاااااطمه !
هلا وليد اشفيك !!
و ايش الموضه السنه هذي ؟؟!!
اتلفت اطالع البنات
مافهمت قصده
السنه الي قبل الي فاتت كانت الموضه
الشنطه كلوي حقت القفل !
السنه الي فاتت
المارك جيكوب
السنه هذي الموووووضه
رجل (( ريال ))
طحت بالقاع من الضحك
وليدووووووو
من علمك هالحجي ؟؟
سمعت البنات يقولون !!
طيب وليدو اصحى حد يسمعك و ايش يقول عنك !!

هههههه

و خلص يومي الاول في مونترو
رديت الغرفه
ويا صاحباتي
غسلت خذيت شاور
و قعدنا في البلكونه
خلص اليوم الاول و ما اذكر الاحداث بالظبط او بالاحرى ماراح ارتب الاحداث
و ذلك لشي ما في نفس يعقوب

طرب
لي مع الطرب في هالرحله قصه

و ذلك بسبب احساسي القاتل في الهروب

ابي اهرب من شي شنو مدري

اندمج اندماج غير طبيعي

في الاغاني الي في اي بود او السيدي

واهيم هيمان غير طبيعي

في اليوم الاول كان السيدي

يحتوي على اغاني ناظم الغزالي

قولي ياحلو من الله جابك

هز الجرح قلبي من عذابك

جرح القلب من فرقاك

محد مثلي بمحبوبه تمحن

هم هذا نصيبي و انجبر بيه

لا اني اتوب و لا الله يهديه

قولي يا حلو اشجابك عليه

شملت الالم و الهم اذيه

و انا الي اجرحت ايدي باديه

هوييييييييتك و انت مغتر بجمالك

و في نهايه اليوم الاول اقولكم

الى كل رب اسره يسوق سياره في السفر

الله يعينك على وقفه الحمامات في الطريج

حمدالله على سلامتي ....قره عيييييييييييينكم

واااااااااااااااااااااااااي

لحظه ابي المكم ابي ألمممممممممممممممم من صصصصصصصصصصجي

حدي حدي حدي ولهااااااااااااااااااااااااااااااااااااانه عليكم

تراااااااااااا عادي حتى اخواني الشبااااااااااااااب اليوم بلمهم

شخباااااااااااااااااااااااركم ربعي

شمسويييييييييييييييييييييييييين

واييييييييييي صايرين اتهبلوووووووووووون

لا اطالعوني جذي محترقه من التاااااااااان العنيف

مابقى بحيره في سويسرا ما سفطت عندها و سبحت

شخباااااااااااااااااركم

حدي ولهانه عليكم

حدي بهذر على راسكم

و فيني طاااااااااااااقه هذره مو طبيعيه

نزلت توني شويه صووووووور

و بويريكم اياهم

بسسسسسسسسسسسس السوااااااااااالف و الصيااااااااااااعه

خاشتها لكم

اول شي بسسسلم بس

ابي تقرير مفصل عن اخباركم ؟

ملاحظه:

شوفوا من يتريق وياي الصبح كل يوم في البلكونه .؟؟

ومناشبيني على الكرواسون ؟؟ العصافير !

يا حلوووهم

ربعي تبون الصج والله فقدتكم و حدي احبكم

و سوالفي و خرابيطي استعدوا لها بليييييييييييز

اجازه

راح اخذ فتره اجازه بسيطه و سأعود

كل صيف و انتوا بخير

حدها قهرتني !!

انا بقولكم عن مشكلتي
انا وايد احب الصداقات
و اقدر الصداقات و احترمها
و احترم مشاعر رفيجاتي

بس انا هاليومين اشوي تدرون اني وايد تعبانه يعني مافيني مجال اجامل وايد
و لا اقدر اتقبل وايد امور

بقولكمم الي صاير ويايي والله بدون اي زياده
و صدقوني وايد شغلات لانها تجرحني ما راح اكتبها

احترم علاقات و صداقات المسنجر على الي الرغم اني ما افضل وايد اضيف بنات في الثانوي
مو عشان شي..او وايد فرق عمر لاني مو انترستينج كلش..
المهم هذي بنت ضافتني من شهرين
و تسولف و عادي
يوم يتني تقولي
فطيييييييييييييم اشعندج قاعده قومي خنمشي !!؟؟ رياضه هزي طولج مريني تعالي !!
اعتذرت لها بادب

ترا انا مو من نوعي اسولف وياها و لا مطيحه الميانه و لا معطتها ويه اهي من نفسها معطيه نفسها ويه
المهم يتني هذاك اليوم
لوووووووويرووووو تعالي ويانا الشاليه بنسوي حفله ! و تان و وناسه
اعتذرت لها و قلت لها مشكوره

عقبها بفتره يتني تقولي
فطيييييييييييييم امي حدها زعلانه عليج تقول ليششششش كل ما عزمناااااج ما اتيين
قلت لها فلانه ترا انا حتى اسمج الاول ما اعرفه و انا مو نوعي اوسع دائره معارفي بسرعه
هي : مو شرط تعرفيني يكفي انا اعرفج

اعتذرت لها اهي و امها
هذاك اليوم البنت ملت مني
جان تقوليي اقص ايدي اذا ولد ما طلعتي ويااااااااااي

المهم انا سكرت السالفه وياها ما ابي اتنااقش في هالموضوع
بس شوفو كلامها الي فجرني امس بالليل !!
لوووووووووووير
كااااااااااااااااااااااك
كااااااااااااااااااااااااااااااااااك
قريت بوستج
سحب سيفووووووووووووووووووووون عليج
كشششششششج الكويتي
بعد انتي الله يهداج
والله قويه
اكو وحده تقول حق الناس و تكتب بوست
ولد الناس طردني و عطااااااااني نعال على راسي !! !!
وقامت تقط حجي !!!
تحسفت انا ليش ما تعرفت عليها والله عادي نص الليل
اروح في بجامتي ازنطها و اطلع الحره الي فيني
و ارد

سكت ما تكلمت
ردت تلبح
لوير
يالله عاد هالاسبوع مالج عذر ما تطلعين ويانا
رفهي عن نفسج خو بعد انتي مطرووووووووووده !!و ماعندج لا شغله و لا مشغلله
و تظحك بطريقه
عرفتو الي
كاااااااااااااااااااااك
لوووووووووووووول

و انا بالعه موس وساكته

قلت لها ليش شايفتني قبل معلقني في بنكه يعني ما اطلع !!

فلانه ترا انا كل يوم اطلع بس ما اطلع مع ناس ما اعرفهم و استملقهم

ترد تقولي انزين لوير انا باخذ فيج اجر لاني احبج صج
انا توني متخرجه من الثانوي و الحين انخطبت
لان علاقاتي اخطط لها صج
و رفيجاتي مثلي
فعشان نحبج بنرسم لج صح و بنحبلج !!
و الي تبينااااااااا بنيييبه لج !!
والله ما نبي شي منج
بس انتي سلميني نفسج !!
ما نبي شي منج لله في الله
والله لوير احبج و كاسره خاطري شالعه قلبي !!!!!
كل الي ابيه منج يوم واحد من الصبح لي الليل
تروحين وياي انا وامي سوريا !!!
اهني انا مت خرعه
قلت لها ليش
قالت نقرا عليج و نعطيج شي تشربينه من هناك و جذي
قلت لها : سسسسسسسسسسسسسسسسحر يعني
قالت لا حرام السحر
هذا بس عمل حب !!
وبعدين لا تستشرفين وايد انتي تبييييييينه صح !!!
يعني لوير كل هالماضي الاسود
يت على السحر ..كلكم يا الكويتيات حرام و حرام و بعدين اشوفكم بالخش و الدس تسوون كل شي
!!!
بذمتكم هذي شرد عليها !!
ما تحملت بلوك و ديليت
كيفها ختزعل ما همتني
ترا انا ما قلت شي الخافي اعظم والله
قهرتني
امس باليل
بنت ما كملت 18 تسوي سحور

و ينيه مو بنيه

هذي اذا صار عمرها 30 شتسوي؟؟؟

حطمني ... اييييييييييييييييينن

قــــــــــــــتــــــــــــــلني

حطمني هذا الجوووووووووووووتي في المحل حطمني

رايحه اشتري شغله

اوكيه

ما وعيت الا شفت هالجوتي قمت اصرخ بالمحل من حلاته

يشووووووووووووووووووووق

لو تشوفون ردت فعلي

اللبنانيه مخترعه

و اللبناني كانو واقفين وياه شباب 2

هدو الي بيدهم و جابلو ردت فعلي

والله والله حططططططططططمني هالجوتي

من حلاته و اشلون اتحلى عليه و اشلون دمعت عيني

الاوادم اخترعوا

ما يشووووووووووووووووووووووووق؟؟؟؟؟

و الي يبيع يقولي اخذيه علقييييه في السياره اذا ماعندج بيبي

قلت له ماااااااااااااااا ابي

يالله رفيجاتي بليييييييييييييز ييبااااااوي بيبي

ابي اشترييييييييه صوووووغه

بليز بلوجر منو حامل صج صج بطرشه هديه ولاااااااده

عن خاطري كيفكم

قالت له : ليتس جو فور فكيشن !

في قمه الولع
و الحب
في قمه العطاء و الاعتناق
في اوج مشاعر غارقه
يفاجأني ويصدمني بانه بسافر معها
في احتراقي المكبوت
و في كتمان شعوري
اقوله ليش؟؟
بس قالتلي : ليتس جو فور فكيشن
و انا ودي اسافر اغير جو!

و انا هنا صامته لا تعليق
ماراح اتكلم عن الحب
ماراح اتكلم عن العطاء
ماراح اتكلم عن احتراقي
و لا عن عذابي
و لا عن غيرتي
لاني وعدتك باني ماراح اتكلم
و عازه علي نفسي اقولك شي و اتكلم
مو شويه
يومين و انا ساكته
يومين و انا مو مرتاحه
لاني مصدقه و لاني مقتنعه
في فراشي منسدحه
منهكه تعبانه
مهدود حيلي
من الهم و التفكير

احس صج ضاقت فيني الدنيا و داري صارت قبر من

يخنقني
بكل برود اتينني تقولي: تذكرين مرا قلت لج اذا ابي افل منج بقولج
و قلتلي اي نفل بهدوء
انا الحين بفل منج

و بكل قهر
و شي يعصر القلب
اقوله بتفل مني عشان تسافر مو حايشك تأنيب الضمير؟؟
عبالك بتستانس؟
ممكن اعرف السبب ؟؟
هو: احتفظ فيه لنفسي!
ياخذ جنطته يسافر
يروح وياها
تناسيت كل حقدي
و غيرتي و غظبي
غفيت على السوفا من البجي
و نمت
قمت لقيته دازلي مسج يسلم قبل لا يمشي
يقولي باي!
نسيت انه قالي بريك اب
نسيت انه جرحني
كل همي حزتها
طلع نص الليل ينتقل من ولايه لي ولايه !
وصل او ما وصل ؟
امسك الموبايل
اسأله وصلت ؟؟
هو بدون اجابه
بعد 4 ساعات
ارسل مسج ثانيه
و مازال بدون اجابه
هل يعقل ان اي انسان
يقبل على ايا كان ان يحترق من اجله شخص

و هو في متعته
عيني على الساعه
الحين اهو وياها !
الحين لامها
الحين طالعين
الحين نايم وياها
الحين اخذ باث وياها !

الحين انا اشقاعد يصير فيني
ادخل اغسل ويهي
و اطالع نفسي في المنظره
ااخ صج تعبتيني وياج

تعودت الانتظار
تعودت الخيانه
تعدت الغدر
تعودت امور كثيره ما يتحملها احد
هذا مكاني من امس بالفراش
امسك موبايلي
اشوف منك مسج قبل 48 ساعه
تقولي فيها
اوعدج اني احبج على طول و اذا في يوم حبي ما زاد ماراح ينقص
و مستحيل امل منج او من ينونج و لا .... و لا 100000 .... ياخذوني منج !!
اسكر المسج
اقولك ما هم في النهايه خذوك خلاص
انا اهني و انت هناك
مافي شي بالدنيا يواسي
المي
مافي شي في الدنيا
يبرد علي
حاله ضياع

بذمتكم من تقدر حبيبها يقولها بسافر ويا غيرج

و اهي ساكته

بتموت

من تقدر تتحمل الي اتحمله

من تقدر !

و اشلون يقدر واحد يسوي جذي ؟

انا ما اقول غير
صبر جميل و الله المستعان

جزا البارحه جفني عن النوم

نـــــــــــــــوال

my MESSY man

صداقه ما يفهمونها
و لا يحسوونها
صداقه من نوع اخر
ايام و سنين
عشره عمر
وقفات
شيلات و طيحات
وجود صداقه بحياتنا مو معناته ان ما نحب
يا اخى لا تقارن روحك في انسان صارلي اعرفه اكثر من ست سنين!!
حياتنا ويا بعض
سوالفنا
همومنا
ساعاتنا
مرحنا
اسرارنا
شطاناتنا
جنوننا
هفواتنا
سقاطاتنا
و اهم شي حلالنا فلوسنا
حساباتنا
هو ليس صديق
هو قيمه بحد ذاتها
باخصتار
من ما يعدني راس مال ما عده فايده
و حمني انت راس المال و انا الفايده
وجوده كصديق بحياتي شي ما استغنى عنه
و لا يمكن استغنى عنه
و اول شي بعترف فيه حق زوج المستقبل
بقوله شوف يا ولد الناس
هذا انساااااان اكثر من اخو
اكثر من حبيب
او اهم من وجود حبيب في حياتي
هذا الانساااان فاهمني يسمعني
هذاموجود من سنين
و راح يظل وياي العمر
اذا اهلي الي اهم اهلي يقدرون و يعرفون اهميته عندي

حمنــــــــــــــــــــــــــــــــي احتاجك
صج صج صج احتاجك
ياكرهك شكلك نايم الصبح
حــــــــــــــــــــــــــــــــــــــــمني تعال
يمديك يالله قوووووم
تعال




حـــمـــنـــــــــــي

تااااااااااااااااج للمرا عشرا زليون

available Or single
اي سينجل
بس كلش مو افيلبل
او شنو يعني افيلبل اني متاحه للتعرف او بلا بلا
لا لا كلش غير متاحه و الحمدلله عندي واحد يسوا الدنيا و مافيها
الله يخليه و يطول بعمره
و يهديه و ما يعفر على بلوجي
شوف حبيبي انا قاعده اساحلك جدام الناس كلها

best friend
فجر
نوف
شيخه

cake or pie
باي

احب وايد الابل باااااي

مالت جووني

Favorite color
الابيض
اموووووووت عليه


gummi bears Or worms
لا هذا و لا ذاك

Home Town
قربطه
اي مو بدليه
صح صح
قربطه
انا اسميها قربطه
مو قرطبه

منغمسسسه

حبه


Jan Or Feb
فبراير
بسسسسسسسس مليت من الانجيليزي بترجم حتى الاسأله
وين وصلنا

كيدز
احبهم بس من بعيد لي بعيد
ترتيبي
الثانيه
شنو مستفيدين من هالسؤال يعني؟؟!!

الحياه
دروس و عبر و كثير من الطراقات
و قليل من السعاده
و كلها على التوقعات على قوله بعض الناس


الزواج
اذا مو مع الي ابييييه
ما ابي
باختصار
على قوله نوره الهوشان
الي يبينا عيت النفس تبغيه
و الي نبيه عيا البخت لا يجيبه

تفاح و الا برتقال
تفاااااااح و الاخضر بالذات


فوبيا
المتن
لي درجه ما يبقى حبوب ما اكلها ما يبقى
كريمات
ما يبقا عله
وصل وزني الحين 49 و لي الحين ابي انزل 4 كيلو!!

سبب للابتسامه
كلمه حلوه منه


فصول
الربيع


شي ما تعرفونه عني
مدري يتروالي بعضكم قام يعرفني اكثر من نفسي
مممممممممم
اي 24 ساعه صافنه و سرحانه
احب اغلاطي
و عيوبي
و احب اسوي كل شي غلط

عاده سيئه
الريسك عندي صفر

اكلتي المفضله
ماكدوووووناااااااااالدز
بلاااااااا
مناااااااافس
برجي
الحوت


مشكووووووووره شيماء ما قصرتي
بس عندي سؤال لكم
شنو يعني تاج؟
و شنو مستفيدين منه ؟؟

تركي عنج اللقافه ..لا تخربين عطلتج

ليش اللقافه يعني ؟؟
انا بفهم ليش؟؟

نصيحه حق كل وحده مني

لا تسمعين كلام رفيجاتج و تسافرين بالصيف على حجي الناس
يقولون هالفندق زين
يقولون عالمنطقه زينه
يقولون هالمكان زين
و يوديج بوالعيال
و يسفل فييج طول السفره
و تمدين بوزج
و يعايرج لي صليبيخات

تذكرييييييييين هذيج السنه يوم اذيتينا يقولون و يقولون
تذكرين يوم قلتي هالفندق زين

و رحنا و لاعت جبدج و راحت علينا الفاوشرات
و اخر شي سكنه بفندق ثاني

نصيحه
تركوا عنكم اللقافه
لا توديييييين ريلج
مكاان ماشفتيه
لا تشورين عليه بفندق ما شفتيه
و تاكلينها اخر شي

سؤال برئ

ليش طول السنه اذا سوينا معدس محد ياكل
و من نسافر
كل يوم اخر الليل لما نرد من الطلعه تعبانين
نقول اويلاه يبيله معدس ليش!؟؟

ليش الريال اذا شاف دلاقين زايد بالجنطه صرخ قال وزن ؟؟

و خيشه عيش خمسه كيلو عسل على قلبه !!؟؟

قصيده اعشقها

الله من هــم بروحي ســـهجها
بخافى ضميرى فـى كنين الحشا لاج

احـرمن نار تواقــد وهـــجها
منهاخطر روحـى على ســلك ديباج

وعين عسى المولى يعجل فـرجها
يفوح ناظرهـا كما عــين هــداج

استرسلت للدمع من ما رهـــجها
غـــيظ يكظ عبارها مثل الامـواج

كـــم واحــد له غاية ما هرجها
يكنها لو هو للادنـين محــتاج

يخاف من عــوجا طــوال عوجها
هــرجـة قـفا يركض بها كـل هـراج

يقضب عـليك المخطيه من حججها
حلو نباه وقلبه اسود من الصـاج

الله خلق دنيا وسـاع فجــجها
وعن ما يريب القلب لك كم منهاج

والرجل وان شـطت لياليك سجها
عســى تواليها تبشــر بالافـراج

رحمك الله يا محمد السديري

من اورع ما قرأت و من اروع ما سمعت

قصائد محفوره في االقلب

هذي القصيده لي معاها قصه

احبها من حبي لهمي فيها

و لذكريات راسخه في نفسي

قصيده

عبره

كل بيت فيها

ديوان بروحه

احب اقراها

و احب اسمعها كأغنيه

و اذا قعدت مع نفسي

لا شعوريا تلاقوني اشغلها و ارقص عليها سامري

على فكره لي مع الرقص السامري قصه

اخرى

اتمنى ان القصيده تعجبكم

لانها من اقرب القصائد لقلبي

الله من هم بروحي

نهايه اسبوع سعيد ..بارد ..يسرسح .. مع رياييلكم

حبيبي نروح انتعشا في ماكي اليوم ؟؟
هو : لا بل مينون !! اروح ادفع 100 دينار و اطلع يوعان اشحقه !!
هي : اها .. اوكيه

بعد تفكير مستمر
هي : حبيبي نروح السينما اليوم احجز؟؟
هو : لا يا معوده بدت العطله و كل مكان زحمه و ماكو افلام
و بعدين يصير مثل الاسبوع و نطلع ما ابي ..
هي : اها .. اوكيه..

من باجر ..
هي : حبيبي بتروح الزوراه اليوم ؟؟
هو : من يزور بالصيف !! اطلع درجه الحراره خمسين ليش!!
قعدي طلبي غدا في البيت
هي : اها اوكيه

مع تمنياتي لكم بنهايه اسبوووووع سعيد

يا متلف الروح

الي يخاف من مرته لابحط رقمه بالجرايد

ياربي الي يخاف من مرته لا يحط رقمه بالجرايد !!
سمعتوا سالفتي مدري اضحك مدري ابجي
هالايام احتاج شغله من جريده الوسيط
فكودت كل الجرايد
و اجابل الاعلانات و ادقدق
مدري داقه على عشر ارقام
عشرين رقم شويه و بس مدري داقه على منو
المهم اتيكم السالفه
امس قمت من النوم و الا ما وعيت رقم غريب 3 مرات داق
او 4 مرات
مالي خلق ادق نقزني قلبي
حقرت
قمت غسلت بدلت
رديت و الا لألألألألأ الرقم يشكل
شلته
انا : الوو
هي : اللووووه من انتي !! ((بلكنه بدويه قح ))
انا : نعم منو انتي انتي داقه علي
هي : اي انتي الي داقه علينا
انا : لا والله انا ما دقيت اختي
انا قمت من النوم لقيت فوور ميسد كولز منج
هي : هيييييي هيييييي و نايمه بعد يالله العافيه
انا : هااااو منو انتي
تسكره بويهي
وبعد شوي يدق علي نفس الوقم
اشيله
تقولي انتي اشتبين داقتن على رجلي !!
انا : نعم ... شنو !!
هي : هي هي انتي داقتن على رجلي اشووله
انا: لو سمحتي منو ريلج ؟؟
هي : بععععععععد اثريج ما تعرفين رجلي من !!
تدقين على رجال واجد شكلج !!
انا : لو سمحتي اختي عن الغلط انا داقه اليوم على اكثر من شخص بخصوص اعلان موجود بجريده الوسيط
زوجج حاط اعلان يمكن
و رقعته في ويهااااااااا
و المرا من امس لي اليووووووووم و اهي مسويتلي سااااااالفه
ابلشششششششتني في ريلها !!!
يبا ريلج حااط اعلان انا شكووووووووووووو
يبا
الله بالخير
يالرياااااااااااييل
الي عنده مرا تنبر وراه و يخاف من مرته
لا يحط رقمه بالاعلانات و الجرايد!!!!!!!!!!!
و احنا نبتلش فيهم
المشكله مو بس انا طلعت الي صايرلي الموقف وايد ناس
و الي ما اقدر اقوله
الحوار الي بط جبدي بيني و بينها
ما اقدر اقووووله مو عشان شي
لانه ماله معنى صصصصصصصج
بطت جبدي

ارواحنا تعلقت

ارواح تعلقت ببعض
انعقدت ستين عقده
كلما اردت ان افتح عقده
عاندتني و زادت
العقده
ستين اخرى

و ما ان قررت بفتح العقد
و قطع السلاسل
تجمدت الارواح
و ملئ المكان
صقيع
مشاعري

لم استطع ان اذيب هذا الصقيع الا ببركان انفجر
فصهره
نعم

بركان انفجر عليه
سيل هائل نزل على رأسه
تترامى عليه صخور جبل تفتت عليه
كل ما اعرفه من قاموس التجريح
اودعته باذنه
صرخت و صرخت

حتى اني و لأول مره اعلم بوجود هذه الطبقات الصوتيه المختزله بي
استطاع بافعاله معي ان يكتشف في صوتي حبال لم تعمل بعد

و هو ساكن بكل هدوء

لم يصد صخره واحد قذفت عليه
لم يقاطع حديثي
كل ما كان يفكر به
ان هذي الانسانه مازالت تحبني
لم يسمع صراخي

فكان لصوتي وقع دعاء الكروان باذنه
كل ما كان يشغله انها مازالت لي
فهي مازالت تحترق لي
و كلما ازيد اشعال نار الكلمات
كلما يبرد هو
لان صقيع معاملتي له في الايام الاخيره
هز حياتنا معا
لم اتردد في اي شي قلته
انت ما تحبني
انت ما تدري عني
انا متعذبه بروووحي
و انت و لا همك
تدخل و تطلع و لا جني موجوده
و لا جنه هالادميه تحس
ما تقدر
و لا تحب
و لا تفهم
عمرك ما تسنع
و لا راح اتسنع
و صراخ
و هواش
بكل برود قاتل

يجيب : خلصتي و الا فيه بعد

اهستر عليه
فهو لم يتجاوب مع ثوره جنوني
و درجه غلياني
اخذت الابجوره
شفت عيونه طلعت
بكل ما اوتيت من قهر و قوه كسرتها
كسرتها
و انا مصدومه اكثر منه
حينها ايقن تمام اليقين
اني سانهار
سحبني
بعيدا عن الزجاج المرتمي
و اقاومه انا بضربه
في كل مكان بجسده
بضربه في كل مكان يقع امام يدي
لم اسمع
الا كلمه وحده منه
تعالي
تعالي
تعالي
و هو يحتضني بين يديه
يلف يداه على

يسكن ارتعاشاتي
يضعني على السرير
وكأني طفله غريقه
يديه بيدي
رجليه تحكم جنون ركلاتي
حتى انام
و لم اسمع كلماته التي قيلت لي قبل منامي
فكل ما اعرفه
هو

الى اي مدى يحبني

سنتين على الدرب ساير

كل عام و بلوجي بخير

سنتين وياكم
كل من يسألني لوير كتبتي بوست السنتين
اكيد طويل مثل السنه الي فاتت
سنتين
مرت وياكم
سنتين بس هالمرا مو انا الي بقول
هالمرا ابيكم انتو تقولون
اشكركم من كل قلبي

اشكر كل واحد فيكم عطاني من وقته
اشكر الي يتضايق مني
قبل الي يحبني

اشكر الي ينتقدني
قبل الي يحييني

اشكر كل وحده طاحت عينها على كلمه مني
اشكر كل واحد قرا و ضحك و قال هذي صج بايعتها
اشكركم

صفحه جدامكم طويتها
هذي انا شقيتها
مسكت اقرا اطرافها قبل لا ارميها
لقيت حب منكم
و ووفا مني

لقيت قلوب حيه
و مشاعر طيبه
خوات و اخوان
ماشين بالدرب وياي
ناس تعيني و ناس اتشد على ايدي
اشكركم ولكن ابي اسجل افعالي مو كلامي
رسى مركبي في هاليال عندكم
رسى يم مراكبكم

اشكر كل ايميل وصلني

اشكر كل دار نشر بتبناني

اشكر مجله ابواب

اشكر مجله النهضه

اشكر مجله ليالينا

اشكر اصحاب المنتديات

اشكرك طال عمرك


قبلكم كلكم اشكر ربي عليكم
احبكم

ياربي انا اقدر الناس المشغوله !! بس ليش محد يقدر

لما اتييج وحده تقولج فلانه ويييييينج غاطه ليش ما تسألين ليش ما ادقينو

و لما تشوف نفسك بعد شهر او شهرين او 6 شهور فجأه غاط عن الناس

شنو يكون السبب

انا اتوقع الريايل يا شغل يديد

يا مشروع يديد

او يمكن بنيان

و البنات اكيد نفس الشي

الي حرني امس داقه علي وحده

فطييييييييييييييييييييييم وينج غاطه ليش ما ادقين

لاحظوا البنت مالي خبر فيها من 5 شهور

اشعندج غاطه

حب يديد ؟

و الا خطبه ؟؟

طبعا ما راح اقووووووولكم سيل التحلطم الي تحلطمته عليها

و ما بغت البنت الا عمرها

يهاااااااااااال احنا شالحجي

والله لاهيه

والله لاهيه مدري

ما صار فيني طبع الي ارفع السماعه و ادق على الناس

انا ادري عيب فيني

بس انا لاهيه

و الناس عبالها حاقره

بس جد لاهيه

و انا يايتني حاله من ارد من الدوام مالي خلق اسوي شي

عادي متنحه طول اليوم

مو من الحر

بس مدري

لاحد يسألني اشفيني

الناس ما تلهى ؟

انتو ما تلهون؟؟

شنو الشي الي يخليك تكون لاهي و غاط

شنو الشي الي يخليج وايد مشغوله ؟؟

العيب فيني انا؟

و الا في ناس مثلي؟؟

نسيت اقولكم صباحكم ورد

على الهامش

اغنيه روعه عجيبه

هابه فيها هاليومين

لاصاله

اقــــرب قريـــــــــب

وكالاتكم هذي انا ما ابيها عووووووع

تم تغيير اسمي من لوير الى المقاول لوير

مرت البواب لوير

مخلص المعاملات لوير

لذا يرجي التنويه

مشكله البنت الي تعيش و اتربا بين صبيان
مشكله ان اهم ينطرون منها تصرفات انثى في مواقف رجوليه
و انهم يبون مني اكون بنت قصب في امور ما ادري اذا اهي خاصه في البنت او الولد

يعني من صغرتي معلمني ابوي على الاعتماد على نفسي
في السفر انا الي ادبر كل شي
في البيت انا وايد اساعد في كل شي
و اذا قلت ما اعرف يقولي روحي سألي

امي كانت وايد مرتاحه من طريقه تربيه ابوي
لان هذا مريحها وايد
متكله على في كل شي

طفولتي اتعرفونها جدا شنيعه
مراهقتي نوعا ما ماكو مراهقه

كبرت الحين و تحولت من البنت فاطمه
الى المقاول فاطمه و مخلص المعاملات و مرت البواب
و اكره شي بالدنيااااااااا عندي لما من اقول حق ابوي او امي ليش انا اسوي جذي ؟؟
يقولون (( احنا معطينج وكاله اشحقه))

ارد باعلى صوتي و بصراخ و بتذمر
انا ماخذه الوكاله منكم عشان ابي ابوقكم
اطلع من وراكم عماره
بيت شي شيات
لي الزمن يعني
مو عشان تكدشوني الليل و النهار

الشهر الي فات انا يا رايحه شويخ
يا راده من شويخ
يا حولي يا الرى
عشان اغير استقبالنا
و اهلي مسافرين طبعا كانوا
دقت امي
امي: فطيييييييم حبيبتي يمديج على ما نرد تكسرين حمامنا ؟؟
انا : لا طبعا !!!
هاليومين انا متحوله من مقاول الي مخلص معاملات
شغل تسجيل عقاري و توكيلات و الحاله حاله !!
بس انا خبري الي يكرف يعطونه عموله يدفعون له
امي و ابوي معطيني وكالات على شنو ؟؟
على التكدش بس

لا تقولووووووووووووووووووووووووون اجر
هالاجر هذا انا ما ابيه

خلصنا من تخليص المعاملات
ياني الوالد الله يطول في عمره
ابوي: فاطمه سويتي خريطه الشاليه !!
بقلبي اقول (( انا خابره اني دارسه حقوق بس يوم كان عندي هوايه خرايط و تصميم
تطقطق في البيت مو شغل رسمي يعني ))
اي يباااا سويتها
بس ترا هم لازم تروح الاسيوي يعتمدها و يظبطها لك
اهو يدري راح يعرف
خلص ابوي من المكتب الهندسي
و رد علي
ابوي: بتمرين البلديه ؟؟
انا : بععععععععععععععععععععد بلديه ادشششششششششش بلديه
اكووووووووووووووووووو بنت في الكويت اتمر البلديه او يصير على دربها البلديه
ماعندي شي في البلديه

شنو بالله البلديه مارينا مثلا !!!
وبعدين كل شي في اسمك
في ابتسامه يرد ابوي : عندج الوكاله !!
لا حول الله ياربي

المراد الي خلاني اقولكم هالقصه
ان في الصيف لازم انسق السفر
ما يصير يتهيت البيت
يا انا اسافر يا امي تسافر
و هالسنه لازم اسافر ويا امي
و طبعا امي رضت في السفر وياي و توهقت

كل ما مريت في الصاله تقط لي نغزات ان ظغطها هالايام مرتفع شكلها ما تعبر على الطياره
ارد عليها : ظغطج .. سكرج .. بتسافرين وياي يعني بتسافرين وياي
سفره بروحي ماني رايحه .. نغزات من اليوم لي باجر ماراح يهمني

لاني صايره مرت البواب احرس لكم البيت
و لاني مخليتج في البيت ويا الخدم
ولاني صايره مقاول
و لا بخلص معاملات
ليش؟؟
اشفيني فجأه قلبت عليهم ؟؟
بسبب امي الي امس تطنزت علي
تتحطلم علي بالصاله
امي : انتي يا طارده في الاب توب يا راده فيه
يا داق عليج صباغ ..يا طاقه هندي !! يا بشويخ يا الظجيج !!
عمري ما شفتج داشه بورده !!
داشه بهديه !!
داشه بشباصه !! (( الحييييييييييييييييييييين الشبااصه شي زين يعني او انثوي وايد الي مخلي امي تقط علي هالحجي شباااااااااااااااااااااااصه يما ))
لوعتي جبدي بالجينزات !!
ليش ما تلبسين تنانير شاريتهم لج بغير ستايلج انا !!
عقب 28 سنه امي بتغير ستايلي !!
ليش ما اتروحين قهاوي
اتروحين معارض
اماكن بنات
ليش ما تحطين مكياج !!!

ليش ما تلبسين قلوب

ليش ما تلبسين ساعه

هالي اشتريهم حق منو !!

ليش ما طلعتي علي !!
ابقق عيوني
مخترعه
انا بعرف انا مقاول
او مخلص معاملات
و الا مرت البواب
و الا بنت و انثى ييبووووني اتمكيج و اتكشخ و اترزز بالمطاعم
انا منو بالظبط !!

يعني لازم امي و ابوي ينسقون بينهم

يوم يخلوني بنت امي

و يوم بنت ابوي

يوم فاطمه و يوم عباس

!!

على الهامش

مبروووووووووووووووووك

تخرج اختنا استكاااااااااانه

الف مبرووووووووووووك

سامحوني فدموعي سبقتني اليكم

تحديث

ييت و تسبقني خطواتي لكم
ييت و تسبقني دموعي لكم
اليكم احبتي
الى كل احبائي و ربعي
لاني تعودت اضحك وياكم
و لاني قمت حتى ما استحي من البجي جدامكم
اكشف لكم همي
لعلي في البوح انسى او ارتاح
طلعت من بيتنا متجهه لي الصالحيه
اخذت علبه الكاكاو و انا مستانسه
لاني بروح اشوفهم
كلمت نفسي طول الطريج
فطومه ماراح تبجين
فطومه بتسلمين و تقعدين عادي
فطومه الناس الي فيهم كافيهم
كلش مو ناقصين
دخلت شفتها وافقه عند الباب
لميتهااا بكل ما تعنيه هالكلمه حضنتها و كأنيطفله رمت نفسها
سلمت على الباجي
وسلمت عليه
كان في الزاويه جالس
بوقار رجل في منتصف الخمسين من عمره
هده المرض و تعبه
جندست يمه
سلمت عليه
نورت الكويت يبا
تو ما نور المكان
تو ما نور البيت
عسى ربي ما يحرم نورك من بيتهم

دموعي سبقتني للجده
جلست في زاويه
ما يشوفون دموعي
اتصدد
امسحها
اجلس معهم جلسه حميمه
و بعد ساعه استأذن منهم
لا احب الوداع
و لكن لا اعلم متى راح اشوفهم مرا ثانيه
استودعتهم الله الذي لا تضيع وداعه
و وقتها اطلقت العنان لدموعي
دخلت على والدي المريض
طمنته على صحه ابو صديقتي
محاوله اخفاء دموعي بصداتي
رحت عند امي
سلمت عليها
قعدت بالصاله
ما قدرت
تذكرت فرحاتنا ووالدها معانا
تذكرت طيبته
تذكرت حبه لبنته
تذكرت كلمته بروح اسلم على النادي و الدوانيه
و بجيت
طلعت من بيتنا لاني ما اقدر اواجهه اهلي بدموعي و بكائي
قطيت راسي على السكان
ابجي
لعنه عليك ايها المرض
كم من حبيب فرقته
كم من ابن ابكيته على والديه
استغفرت ربي
و استسلمت كما يستسلم اي مؤمن لربه
مشيت في الشارع من غير هدى
اتصل على عيالي (( عيال خالي ))
اتطمن على امتحاناتهم
رحت وقفت عند بابهم
نزلت افرح معاهم
عشان انسى شوي
تطمنت على احوالهم
حبيتهم
تهاوشت وياهم
تناجرت
سكرت التلفون في ويه صاحبتاهم

طلعت و حسيت ان الدنيا ما تسوا شي
طلعت و حسيت لو ان اشكثر في ناس بحياتنا ما ندرى متى بنفترق عنهم
و اكثر ناس امس كانو بينا
و اليوم حال بينا و بينهم هادم اللذات
اليوم بكيت حزنا لمرض والد صاحبتي
فكيف بحالي على نفسي
و على اهلي
و على من احب
الى كل انسان يقرا سطوري
حتى لو ما اعرفكم
فاشهد الله اني احبكم
و حتى الي اساؤو لي
يعلم الله اني احبكم
فقلبي لم يعرف الكره يوم
و لم بعرف الغل يوما
لم احقد
و لم اسئ لاحد
لان الدنيا ما تسوا

و اذا سمعتوا يوم في خبر مرضي
فادعولي بالشفاء
سامحوني كدرتكم
بس ما قمت اشوف الشاشه من البجي


يارب يا سامع كل نجوى
اشفي والدي
و اشفي كل مرضى المسلمين
يا رب
ياعالم بالسراير
اسألك باسمك الشافي تشفي كل مريض
و ترفع ضره
الى كل من يقرا مدونتي
استسمحكم
بدعاء في سجدتكم لمرضى المسلمين
فاليوم اهم ويانا
و ما ندري باجر وينهم
او احنا وينا

قتلتني كلماتها

ما قدرت اوقف ضربات قلبي من روعه سطورها

كيف لها ان تكتب شعوري

باختصار

اهي قارئه فنجان

ام فراشه تحوم حولنا

اتركم معها

لتعلمو ما هزني

لانها كتبتي كقصه

بطلها دائما هو

فــــراشــــــــــــــــــــــــه

الخوف من علاقه يديده .. او من زواج جديد

في قعده بنات

تناقشنا عن مواضيع وايد

الي لفت نظري مو في هالقعده لألأ

و حتى اكثر من مرا

بين البنات و الشباب

فكره غريبه شوي

فلانه شمصبرج على علاقه كلها مشاكل و نجره و هواش و عوار قلب

الاجابه : بس تعودت عليه صارلي وياه خمس سنين ..مالي خلق اغير

واحد اعرفه كلا يلبح على قلبي

فعلتها و تركتها

اقوله دامها معوره قلبك شاللي حادك لي الحين مستمر وياها ؟؟

هو: والله مدري تعودت عليها وين بتعرف على غيرها ؟؟ ترا صعبه عقب الثلاثين تتكيف بسرعه مع بنت!!

صج احنا نصبر على بلاوي الي عندنا لمجرد ان تعودنا

هذا السؤال اوجهه

للمتزوجين

و الي مو متزوجين

للبنات

و الشباب

تفضل علاقه كلها مشاكل و نجره و عوار قلب

او علاقه بارده لمجرد ان تعودنا على بعض

و من وين بنتعرف و ليش

و تعال تأقلم و بلا بلا بلا

و بكون انا اول من يجاوب على سؤالي

تبون الصج

كلهم اردا من الثاني

من اولهم لي اخرهم عله

السلم و الثعبان

هاليومين السينما صايره اتينن
الاسبوع الي فات رحت فيلم عربي اسمه في شقه مصر الجديده
او شغله جذي

و امس رحت فيلم روعه اسمه لعبه الحب يمكن !
ليش ماني ذاكره الاسماء مدري
المهم ان الفيلم وايد وايد عجبني

و رومانسي وواقعي وجدا ممتع الغريب في الموضوع
اني حسيت قصه الفيلم وايد قريبه مني بشكل موطبيعي
و كل ما طلعت لقطه انا و رفيجتي انتطالع مستغربين

و فعلا رفيجتي قالتلي هالشي

الغريب
ان وحده ثانيه من صاحباتي اول ما طلعت من الفيلم
دقت علي قالتلي فطييييييييييييييم في فيلم حدا حدا انتي !
لازم تروحين له

حتى لما قلت حق ريلي ان القصه حياااات فطيم
تدرين اشرد علي !؟؟
قالي اي والله وايد
اول انطباع لها لما تشوفينها اتحسين بشي و بعدين وايد مع الوقت اتحسين بشي ثاني
ماراح اقولكم شنو قاااااال
عشان ما تدرون اشكثر يعرفني ريل رفيجتي
هههههههههه

لكن تبون الصج
تدرون اي فيلم احسه قصه حياتي باختصار
السلم و الثعبان
الي يمثل فيه هاني سلامه و حلا شيحه
هذا صج صج بالاسبوووووع اقل شي مرتين اشوووفه


قصه واحد مطلق
صايع
حياته كلها بنات حريم
فلوس
لعب وناسه
و لكن في نفس الوقت يحب الرومانسيه و الحب

ضايع مو عارف اشيبي

تعرف على بنت
و اهو سكران و في قمه الخمبجه
و قام شوي شوي يتقرب منها

قام مع الوقت يحبها
خذاها لعب في البدايه
وبدا ينقلب السحر على الساحر

بدا يتعب من حبها
لانه مو قادر يكون اهو مثل ما اهي تبي

و في نفس الوقت يبي يكون زين
و اذا راح ويا ربعه الكلبز يبي يكون راعي بنات
و من يرد البيت يبيها اهي يحبها

قصه الفيلم غريبه
قصه تحاكي واقعنا في هالزمن
تعرف عليها و بدا يتغير

غيرت فيه وايد شغلات
و في وسط الحب
و قوه العلاقه

ضعف

ضعف امام الجنس
و يا بنام مع وحده بس ما قدر

صبح الصبح راح حق حبيبته
قالها انا بفل
ليش بتفل
قالها لاني احس اني مخنوق!!
حبج يخنقني

يقيدني
ما اقدر اكون الي تبينه و لا اقدر اصير وياج و انا مو وياج
و متعب نفسي اكثر منج

هدته

رد لها لانه تعب من بعدها

قالها لاني مرتاح و انا قريب
و لاني مرتاح و انا بعيد

قالها صبري علي
تحميليني
فيني شي زين
بس يبيلج تتعبين عليه
بتغير عشانج بس صبري علي


و اهو في الديسكو
يرنع عليها
يشوفها اهي وين
و اهو ويا بنات يحقرها

بس ما يجذب عليها
يحبها
بس مو عارف شنو يبي
و لا اشلون يبطل خرابيط

الي مخلي الفيلم وايد حلو حواراته مع صديقه احمد حلمي
و اسلوبهم


و من اقوى الحوارات بالفيلم

تدق عليه و اهو في الديسكو
تدق مرا مرتين
يشيله يرد عليها

هي : انت فين ؟؟
كلمتك كتير ما بتدرش ليه ؟؟

هو : انا مع احمد في فرايدز

هي :انت ما عندكش دم هو انت تستهبل ؟؟
احنا لسه راجعين من السفر مش قادر تبعد عن الجو الزباله بتاعكم ؟

هو : بأولك ايه احترمي نفسك .. و و اتكلمي عدل انتي مين عشان تحاسبيني انتي ولا حاجه
انا اعمل الي انا عايزوه
تسكر التلفون في ويها

يدش الديسكو متنرفز
يتوتر
سبها غلط عليها
بس مو هاين عليه
توقع انه لما يصرخ عليها بيرتاح

تعب اهو اكثر !!

طلع و راح لها البيت

شكل عليها تلفونات ما ترد
شكل عليها هرنات لين طلعت من البلكونه
و اهو يكلما بالتلفون
هو : ممكن تسمعيني ابأ غلطان لو قلت لك نفسي في ايه دالوقتي
انك تنزليلي
هي : مش حقدر مستحيل انزل
هو : اطلعلك انا
ساعات الواحد يبدي يعمل حاجه و يلاقي نفسه يعمل حاجه تانيه
انا في حاجه غريبه بتحصلي اليومين دول ....حاجه تستاهل انك تصبري عليه شويه
ياسمين انا مش وحش اوي .. و اوعي تسيبيني لو حد قالك عليه حاجه اوعي تسيبيني


و يروح يركب سيارته و يكلمها لين ينام و اهي وياه على الخط

وبعد فتره حب و و محاوله منه لاصلاح نفسه
مرا يقدر على شيطانه و مرا شيطانه يقدر عليه
اذا رضت عليه يصير من احسن الناس و من يزعلون يفلت

و حوار ثاني
يبدا يتغير عليها شوي
تدق ما يرد
تدز مسجات ما يرد عليها
بدا يمل من الارتباط و التقيد
لانه كان بنام مع وحده و ماقدر

راحت له لي البيت
طقت الباب
فتحه و قالها دشي

راحت خذت شي من الثلاجه انتبهت ان الزباله متروسه بيره

سألته : انت كان عندك ضيوف امبارح ؟
هو : لا دي تحيه بألها يومين ما جتش
هي: بما انك فاضي با ممكن تفهمني ما بتردش على تلفوناتي ليه ؟؟

هو : بتعب يرد عليها
كنت نايم
هي : مش مسدأأااك
هو : مش عايز اتكلم في الموضوع داا
هي : لا راح تتكلم عشان انا عايزه افهم الي بيحصل

يسكت يحاول يتهرب وبعدين يقولها

هو : ياسمين انا مش عايز اكمل
انا اتخنأت .. مش حأقدر ابئا بطل الفيلم بتااعك
مش عايز نتعب مع بعض اكتر من كدا
صدقيني انا حاولت بس اجس نفسي بثقل اني ادز شي ثقيل حيل

و كدا احسن
نبعد من دالوأتي
تنصدم اهي
تتبلعم

و الاروع من كلامه
ردها اهي عليه
بس ما راح اكتبه لكم

ابيكم انتو اتشوفون شنو ردت عليه

كلام يبرد القلب


و اخر مشهد بقوله لكم

عقب ما يحاول يهدها
يبعد عنها فتره
ما يعبر
يتعب و يغير نفسه
عشان يرد لها
يبعد و يرد تعبان مع كل مرا

بس اهي تصده
محتره على نفسها

يروح لها

هو : اشلونج
هي : زينه ,,
هو : ممكن اكلمج دقيقه
هي : تفضل
هو : شمسويه
هي : زينه مرتاحه الحمدلله زينه .. تعبت عقبك شوي بس الحمدلله رديت لحياتي الطبيعيه
هو: ياسمين انا تعبان وايد من غيرج حاولت .. بس انا تعبان
هي : تعبان من غيري !! ليش وين البنات الي كنت وياهم ليش ما تطلع وياهم مو انت كنت تطلع ويا بنات و احنا ويا بعض !!
احسن شي تسويه انك لازم تنساني
هو: حاولت بس ما قدرت انا عارف اني غلطان !
هي : غلطان ! انت جذي اي غلطان انت طول عمرك جذي و بتم جذي و لا راح تتغير و لا تقدر تتغير هذا انت مع زوجتك و معاي و مع اي وحده تالي انت جذي


بصراحه فيلم انصحكم تشوفونه
قديم شوي من سنه 2002
بس يستاهل ينشاف

حسافه اذا الواحد حب وحده و ماعرف شنو يبي منها
حسافه اذا اذاها و بعدين يطلب منها تحبه اكثر
حسافه اذا لعب و ما يبي يتغير و بتم جذي
حسافه اذا مو عارف عقب هالعمر اشيبي
حسافه يصلح اغلاطه باغلاط اكبر

حسافه انه ما يداريها
حسافه يجرحها يوم بعد يوم
حسافه ما يراعي مشاعرها
ويا هالبنات الي حوالينه

لانه تحسف و دفع الثمن وايد غالي
حزن
ضياع
وحده


لانه من يسكر اهو عليها باب
يفتح لها ربي اكثر من باب

مسج

شصبرني انا شهرين و اهو توه مسافر

عزاي انه اخذ قلبي في وسط عيونه يشيله

و انا اصبحت في بعده وحيد و اكسر الخاطر