لله ما اعطى و لله ما اخذ

يوم الجمعه الصبح و على غير العاده صوت الجرس الساعه 9 الصبح و تدخل علينا خالتي و خالي
!!منظرهم غريب ويهم مخطوف واقفين على راسنا .. شفتهم صبه عظامي
امي تصرخ في ويه خالتي اشفييييييكم .. امي فيها شي انا ماكو رده فعل كلش بس حسيت ريلي ما تشيلني
خالي يقول حق امي لا ماكو الا كل خير بس احمد مسوي حادث امي ..بصوت عالي لا حول و لا قوه الى بالله واشلونه الحين ؟؟
وبدون مقدمات احمد عطاج عمره !!
تصرخ امي لا حول و لا قوه الا في الله و اخووووي اشلونه الحين .. درا ان ولده توفى ..يهديها خالي و يرد عليها اي عرف صابر و يحتسب لله ما اعطى و لله ما اخذ
..احمد شاب يبلغ من العمر 24 طالع من صلاه العشاء راح البيت بدل و طلع بيروح الديوانيه بالطريج يتصل على ربعه يقولون له كلنا في الفيحاء متيمعين بالديوانيه بالطريج تطق السياره بنشر و تنقلب و ما يدري احمد ان الديوانيه الي رايح لها و ما وصلها صار عزاه فيها من باجرالله يرحمك يا ولد خاليو يصبر قلب خالي المتحطم ويصبرنا كلنا و احنا مفجوعين عليك
لله ما اعطى و لله ما اخذ
رحمك الله يا احمد

صاعقه ابكتني ....للكبار فقط

دخلت المكتب اليوم .. و الا مستشارين مبسطين عندي
بوزت و مالي خلقهم كلش خلصت و سويت الي يبونه و تريقت و رحت اشرب قهوتي عند المستشاره الي في قسم ثاني
و لما دخلت عليهم ... كانو يتكلمون عن موضوع الخدم ... موضوع يدور في كل يمعه حريم
لكن السالفه هالمره وايد غير لدرجه اني .. لاشعوريا قمت احط اسكر في ايدي على حلجي و قمت اشهق .. و كل ما كملت السالفه ..
اقوووووول لأ لأ لأ لأ لأ مستحيل اكووووووووو جذي .. شوي شوي .. و الا انا لا شعوريا ادمع ..!!!
فعلا لا تستغربون مأساه عندنا في الكويت تبكي .. بما اني اول مره اسمعها فأبكتني

السااالفه الاولى ..

وحده من الحريم ... و هي ام لثلاث اولاد غنيه جدا ماشاء الله (طبعا قالولي الاسم ) المهم اعيالها كلهم من طقه بعض .. بينهم سنين
ساكنه في بيت من دورين .. اهي و اعيالها اهي الدور الي تحت .. و اعيالها عندها و كل ما يكبر واحد يصير عمره 15 سنه يعني من يدش الثانوي صعدته فوق جناحه الخاص ...
يتكون من غرفتين و صاله و حمام ..اتجهز الام الجناح لولدها مع فلبينيه !!!!!
يعني الزبده عندها 4 فلبينيات في البيت وحده لها و 3 لاولادها
لكن الفلبينيات الثلاث .. ينامون و ياكلون و يشربون ويا اعيالها .. و عندها نظريه الام .. تقوله يا وليدي .. ديربالك من بنات الناس
مالنا خلق علاقه ويا كويتيه باجر اخوها يذبحك و الا يسوي فيك شي
هذي فلبينيه عندك سو فيها الي تبي !!!!
الكويتيه بس للتلفون و هذي الفلبينيه للفراش
انتوا مستوعبين السالفه !!
انا مصدومه
المهم
ظلوا العيال على هالحال .. جم سنه بعدها تخرج الولد الصغير من الجامعه
جان تجتمع الام في اعيالها
قالت يا عيالي انا ماقصرت ويااااكم وفرت لكم كل شي عاد الحين يالله شدوا حيلكم انا ابي كويتيه بخطبلكم حريم .. بنات حمايل و تتزوجون
و هالفلبينيات راح نختم على جوازهم و لا يدشون عشان ما يروحون بيوت ثانيه .. يفضحونا !!!!
قالولها اعيالها اوكيه ما عندنا مانع بس بشرط نختمها بسفره وياهم ..
البنات مادحيلنا جزر الفلبين .. بنروح اسبوعين ثلاث و انرد
و الابناء الثلاث .. سافروا سنه 1995 شهر ثمانيه .. وو للحين ما ردوا
اخر مرا كلموا امهم فيها شهر 12 سنه 1995
قاولها يما بنحتفل في راس السنه و انرد
الام طبعا ما قالت هالكلام .. و هالقصه الي بعد ما عانت في السفارات و الخارجيات و سافرت تدور اعيالها
و وصلت السالفه لين صباح الاحمد كان وقتها وزير الخارجيه ..
.. قالها مترجم في السفاره الكويتيه ان اسره احد البنات اقتلت اعيالها و في روايه تقول انهم مسحورين !!
المهم الام احصدت ما زرعت
و الله لا يبلينا
و اهي الحين مخرفه .. عايشه مع الخدم بروحها
.......

السالفه الثانيه

في احد مكاتب الخدم بمجمع الرميح
يت معزبه ... ترد خدامه اندونسيا .. صغيره في السن ..
تقول للمكتب انها ما تبي الخدامه .. قامت وحده (الي وياي في الدوام) تليقفت و قالتها ليش ما تبينها شكلها زين انا ابيها انا على ويه ولاده و ابي مسترجعه
قالت الكويتيه ((الله ياخذها انا عندي ورعان كل ما جا واحد يركبها طقته )) طبعا رفيجتي
قالت اي هاليهال شياطين بس يكفخون الخدم ..قالت لا اعيالي ما يطقون بس يركبون !!
اهني بدت تستوعب صاحبتي
لانها تعتقد في معني كلمه يركبون ((ياهل يركض و يطمر على الخدامه) ماتوقعت يمكن يكون لفظها جنسي!!!


السالفه الاخيره :

قضيه طلاق لمرأه عمرها 65 سنه
طبعا لما يت تطلب الطلاق
لازم يكلمونها مكتب الاستشارات الاسريه ..
خصوصا ان شي نادر مرا في هالعمر تطلب الطلاق
و اهي لا تشتغل و لا راتب و لا بيت و لا احد يعولها غير زوجها
اسألتها الباحثه ليش يا خالتي تبين تطلقين ؟؟
عقب هالعمر ..صبرتي هالسنين .. توقعت الباحثه ان السالفه بتكون على مشكله اعصاب الزوج او على انه متزوج عليها
لكن الصدمه .. كانت اكبر
تقول يا بنيتي ما اقدر اشوف الحرام في عيوني .. واسكت صبرت صبرت لكن لي متى!!
مابقى من عمري ..زوجي ولدي صارلهم 4 سنين و اهم من فلبينيه لي فلبينيه و في بيتي و انا ساكته!!!!
الابو وولده يتحاططون في فلبينيه وحده
و اذا قلت له يا ويلك من الله .. انت ابو انت قدوه قال ولدج ريال و كبير
و يصرفون على هالفلبينيات اكثر من صرفهم على روحهم و يخصوصون لها دار في بيتي .. و انا مرا مصليه مسميه .. اقيم الليل كل يوم و الدار الي يمي فيها زنا و من منو ولدي وزوجي !!!
الله يرضى الناس ترضى!!
وطلقها القاضي على طول و حكم لها بنفقه و بيت وسايق و خدامه ...
لا تخترعون
هذي سوالف من الواقع
هذا الي عرفته و الي ما اعرفه اكيد اكثر .. مسكر بين البيبان
و عسى الله يحفظنا و لا يبلينا


اسمحولي يا اخواني ما اقصدكم بس اقصد شريحه بالمجتمع و ياريت تكون قليله بس للاسف الي قاعد نشوفه انها مو بسيطه
جنس جنس جنس جنس
محووور الحياه صار جنس
وين ما تروح تسمع هالسوالف يا سكس يا اعتصاب
تفتح التلفزيون
اغاني مخله منحطه
صاروا بعض الشباب حيوانات !!!
ليشششششش و بعدين و نهايتها !!
وين الدين ..
انا مو ضد فطره الله و لا انا ضد العلاقه الشرعيه بين الازواج
يمكن فعلا تكون متعه
انا اقصد الحيوانات
الي متزوج او يقدر يتزوج و يلجأ للحرام
ليششششششششش!!!!!
هذولا الناس تالي الليل لما يحطون راسهم على المخده ما ياكلهم ضميرهم
!!!؟؟
مدري بس صصصصصصصصج اليوم استحقرت كل الريايل و كرهتهم و حطيت حرتي في مديري
طلب اوراق
لا تضحكون علي
بس صج حست انبطت جبدي وايد
اسفه على الاطاله

كتاب (فلسطين .. التاريخ المصور) هو دراسة تاريخية متسلسلة منذ بدء التاريخ وحتى أحداث الساعة لكل الأحداث الهامة التي مر بها ذلك البلد العظيم. وقد عرضها المؤلف ضمن أسلوب شيق و رائع، معتمدا التسلسل المنطقي والتاريخي للأحداث مع حرصه على إبداء رأيه في كل الأحداث الهامة.ونود الإشارة إلى أن الكتاب مزود بمجموعة من الصور النادرة والكثيرة زادت على 500 صورة تم انتقاؤها من أكثر من عشرة آلاف صورة، وعلاوة على أن هذا الكتاب يعتبر نقلة نوعية وبادرة رائدة في عالم الكتاب العربي فإنك ستجد فيه من الحقائق والأدلة والإحصاءات والشواهد ما يجعله عزيزا لديك ويحيي في نفسك قضيتك الأولى .. فلسطين والقدس الشريف

- 10 أسباب تدعوك لقراءة هذا الكتاب

- يعد هذا الكتاب مرجعاً هاما، وملخصاً لما كتب في تاريخ فلسطين والأرض المقدسة.

- تسلسل منطقي تاريخي من بدء التاريخ وحتى أحداث الساعة المعاصرة، مع تقسيم وترتيب واضح.

- بالرغم من طول الفترة، فالكتاب جمع تاريخ فلسطين بإيجاز غير مخل بالأحداث التاريخية الهامة.

- دحض مزاعم اليهود وأكاذيبهم في حقهم التاريخي بأرض فلسطين وإثبات أن أول من سكن فلسطين هم العرب.

- كشف المؤامرات والفضائح التي جرت وتجري على أرض الإسراء والمعراج على مدى التاريخ.

- الكتاب مزود بمجموعة من الصور النادرة والكثيرة زادت على 500 صورة تم انتقاؤها من أكثر من عشرة آلاف

صورة.
- تم إضافة الآراء الخاصة والحكم على الأحداث دون الاكتفاء بالسرد التاريخي للوقائع.

- تطلب العمل على هذا المشروع قرابة الأربع سنوات ما بين جمع وتأليف وإخراج وتدقيق اشترك فيه فريق متكامل.

- إحصائيات وأرقام مؤثرة في تاريخ الانتفاضة وخاتمة برؤية مستقبل فلسطين مبنية على الآيات والأحاديث الصحيحة.

وأخيراً.. لأنه من واجب كل عربي ومسلم أن تكون قضيته الأولى (فلسطين والقدس)، فيستنهض الهمم من أجلها.

الخيانه الزوجيه ....الى متى؟؟

مثل ما عودوتوني و عودتكم في كلامي و بصراحتي عندي سؤال يحيرني
بليز جاوبوني عليه
لما كنا صغار نسمع ان الخيانه الزوجيه جريمه !!!!!!
و مع قناعتي انها جريمه
لكن البلوى اني اسمع في وايد من رفيجاتي عن تجاربهم مع الخيانه الزوجيه !!
ما ابي اسألكم عن اسبابها لان كل واحد و له سببه ولكن بقولكم
يا شباب ليش ما تكفيك مرا وحده ؟؟
و ليش صار شي ملازم لشرط الزواج ان الوحده تحط في بالها ان زوجها بيخون
و شنو تصرف المرأه ؟؟

بقولكم شي يمكن البنات راح يتضايقون مني وايد

انا عن نفسي لو زوجي وايد مريحني و معيشني عيشه محترمه و مو مخلي علي قاصر و اهو طيب
و حسيت بعد 10 سنوات او 15 سنه عشره معاه ان في حياته وحده ثانيه بس ماقالي
راح اسكت و اتغيبا تدرون ليش
عشان ما يتمادى ويااي و اكيد طالما خش عني يعني محترمني
فليش اكسر هذا الاحترام
انا ما اقولكم ان الخيانه شي عادي
بالعكس جريمه وجريمه بشششعه و تجرح و اتهين
لكن ليش صار الشغل الشاغل للحريم في كلامهم و خوفهم من الرجل
بس لسبب الخيانه
...
نقطه اخيره احب اعرف من كل بنت
لو دريتي ان ريلج يخونج شنو راح تتصرفين؟؟

و احب اعرف من كل شاب
اي ريال يفكر يخون هل يمر في باله لو ان زوجته درت ..اشكثر راح يكون جارح مشاعرها
و ذبحها؟؟

رحمك الله يا فهد الجزيره

فجعنا اليوم صباحا في وفاه صاحب السمو الملكي الامير فهد بن عبدالعزيز ....
...وصلني مسج الساعه 9 صباحا من زميلي السعودي ..و بصراحه وفاه المرحوم كانت هزه للكويت .. و جميع شعبها
الله يسكنه فسيح جناته يا رب
لا تنسون تدعون له ... بصراحه انا وايد كنت احبه خصوصا بعد موقفه الاخوي لنا اثناء الغزو العراقي الغاشم
و وقتها امي كانت حامل و اول ما يابت ولد خلال فتره الغزو .. على طول و بدون تفكير سمينا خوي الصغير فهد
فانشاء الله يا فهد الجزيره ما راح ننساك لانك في قلوبنا و في كل بيت

راجعه من بيت يدتي متأخر
الساعه 10ونص
اشوف و الاااا طباخنا واقف يراقب يطلطل
شافني قب
قلت في قلبي هووووووو هذا اشعنده ...شكيت فيه و تعوذت من بليس!!
دخلت البيت من الباب الجانبي و الا الخدامه فاجه دريشه دارهاااا ومسكره اليتات !!!
اطق الباب ابي تفتحلي كسرت الباب تكسر اطلعتلي مفصخه في شلحتها !!
وفاله الشعر و متحمره !!!!!!!!!!!!!!!!
صرخت عليها صراخ اشلون تطلع مفصخه !! فرضا لو واحد من اخواني بتطلع جذي !!تفتح له الباااااااب
ما قدرت تقول ولا كلمه
و انا ازفها ألقي نطره سريعه على غرفتها شفت راس ريال تحت الفراش !!
مت من الخوف دخلت بيتنا بسرعه ما قدرت اواجه موقف الريال الي تحت الفراش يمكن اكون جبانه بس خفت منها اخاف يسويلي شي
بسرعه دشيت بيتنا دقيت على اخوي قلت له تعال على ما يا اهو ورفيجه الا الطباااااااااخ قب دراه !!
طبعا انا في البيت بروحي
اهلي مسافرين
اخوي الكبير ويا زوجته مسافرين !!!
و انا حاليا اكتب لكم و انا ميته من الخرعه والله ماني عارفه اتصرف
ما بي اخرع اخواني اكثر
بنطر لي الصبح و اشوف شيصير
و شنو الحل يمكن احط كاميرا
بس مسأله اني ازف طباخنا و جذي و اقوله مستحيل
طالما ان ماكو ريال في البيت
و فريجنا كلا هنوووود و اخاف هالرياييل يسون فيني شي لا عيوني
يقولوون خوافه و لا يقولون الله يرحمها
والله ماني عارفه شسوي في عمري اخر شي بخلي الخدم في البيت و انا بنام في المخفر امااااااان اكثر من بيتنا!!

ان لم تستحي ففعل ما شئت

يوم اليمعه و تحديداالساعه تسع و شوي بالليل راجعه هلكانه تعبانه مالي خلق قطيت روحي على اول قنفه في الصاله
مسكت الريموت اقلب القنوات و الا اعلان في قناه ان بعد شوي بيبدي فيلم حق جوليا روبرت وايد احبه
فجأه يتني الهمه قمت بسرعه بسرعه غسلت و لبست بجامتي و سحبت الكفر والفازلين و الدلاق ورحت الصاله اجابل الفيلم
شفت بدايه الفيلم و اندمجت و شوي و الا دعايات
قمت قلبت المحطه على ما تخلص الدعايه
و الا ششوف !!!
هيفاء وهبي في حفله البرايم لبرنامج الوادي ..اول شي لابسه من غير هدوم .. ثاني شي كلام بطريقه و تصرفات مبتذله تحمدت ربي مع اني بيني و بينكم زقت على شكلها لكن هم عصبت علي المستوى البايخ و التفاهات
رديت اشوف فيلمي هذاك الفيلم الي يشرح القلب
و الاحلى من الفيلم الساوند تراك ماله شي خيال
خلص الفيلم
رديت اقلب القنوات .. و الا هيفا للحين !!!!
سرحت فيها قلت بيني و بين نفسي شنو الي وصلها لي هذا المستوى !!
امجدينها و اميزينهاااا عن باجي الناس في كل شي
ياناس الدنيا ليش مقلوبه
وحده يا ناس تميز عشان انها بنت ليل !!!!
وصلنا لي هالدرجه !! لي هالمستوى
لو صاحبه علم او اختراع اقول ميخالف
لو على شأنها بسبب حفظ للقران او عالمه في اي مجال هم اقول ميخالف
وحده برتفع شانها لسبب انه ليلتها في 25000$ بس عشان هالشي !!!!
عشان متبريه من بنتها و اسرتها بس عشان هالشي !!
عشان بتزوج واحد اصغر منها في 10 سنوات بس عشان هالشي
بذمتكم لو اتيني بنت عمرها 10 سنوات و بتسألني عن الطموح و المستقبل و الحياه و ادعمها بافكار حلوه
في عقل هالبنت الصغيره ليش ادرس و اكرف و اخر شي ما احصل شي اسوي عمليتين تجميل و انجح في حياتي
البلوه قبل كانت الناس عندها غيره عندها قيم الحين انعدمت

الرياااااااااااااااال يطلب من زوجته تكون هيفاء وهبي في شكلها و في كل شي
الحريم قامو يقولون حق بناتهم تسنعوا صيرو مثلها !!!
في وحده تقول من تطلع هيفا في التلفزيون ريلي يقولي هذي مرا و انتي مراا !!!

يا ناس لا تفهموني غلط انا مو ضد الجمال
بس انا ضد الوقاحه و ضد الابتذال و ضد تخريب المجتمع
ضد تفشي الدعاره و ضد البلاوي الي تصير فينا !!
لي متى الناس سلبيين ؟؟
الله يستر علينا و يحفظنا
المهم اني شفت فيلم حلو و دهنت رويلاتي في الوالزين
و دمتكم سالمين

خوااتي و اخواني نظرا لاني جدا مشغوله هاليومين ويا يدتي في المستشفى وشغلي الي ما يخلص و نظرا لان والديني مسافرين فانا الي انجز معظم ارتباطات البيت و مسؤليات امي تجاه يدتي فاعتذر لكم حتى تتحسن ظروفي و تطلع يدتي من المستشفى

ايطاليا

estekanna atag

1-what does love mean to you?? شي مجربته و منلجعه منه لين قايله بس وبصراحه و بدون فشله احلى ايام حياتي ايام الي عشت فيها و انا احب و الحب بالنسبه لي اني اعطي بدون مقابل و لا انطر اني اخذ شي ..and love means never having to say you are sorry.

2-what does marriage mean to you?? الارتباط بالزواج معناته مثل ماجاء في القران سكن و موده و بصراحه ينووني كله بطلعه في هالريال و من ايام شهر العسل ببدع فيه و عسى ما يطلع ريال خواف و ما يحب المرتفعات لاني اموت على البراشوتيج و احب المغامرات وانشاء الله اقدر اكون عند حسن ظنه فيني وبيني و بينكم من اول ما يقول الملاج تم بشخط ورقه استقالتي

3-do you beleive in 'love at first sight'??
على قوله اصيل عرفتك و النظر خداع خداع صدقتك و طاوعتك سلمتك شعوري بساع بقولكم سر بس ما تقولون حق احد ترا حبيبي ماشفته الا بعد سنه .... بس انا اعتقد ان الاعجاب من النظره الاولى مو حب يعني اهو الباب الي يدخل منه الحب

4-how many children would you like ??
لو ساليني هالسؤال من زمان جان يمديني اييب وايد لاني كنت ناويه منتخب بس الحين 26 سنه عمري على ما اتزوج و هذا اذا تزوجت يمكن 28 يمديني !!!!!! ما ادري اشكثر بس لانه ما عندي خوات و لا عندنا احفاد في البيت و صارل لنه اكثر من 15 سنه بدون اطفال في البيت فراح اشد حيلي لاتوصون حريص

5- If given the opportunity, what is that one song you would sing for me on wedding day??قصدكم انشزززز يعني !! صوووتي ظيممممبس بسااسره و بغني لكن مو في العرس لا بيني و بينه اتهقون اغني ليله لو باقي ليله ؟؟ لا لا بل بل يقوول هذي يايتني طايره مفجووعه لحظه افكر في اغنيه اتطلع الجانب الزين الي فيني امممممم اي لقيتها بغني اغنيه نوال الزغبي خليك ليييييييه مشغووووووول بيه نسيني كل حياتي يا عين

7-What are three qualities you would look for in man??
اول شي ابيه يخاف الله و ملتزم بس مووووووو حجر و لا دين حيل يعني دين كووووووول
ثاني شي ابيه يفهمني و يسمعني ... ويقدر الشغلات الي احبهاا يعني باختصار يحتويني
ثالث شي ما يوقف في ويه طموووحي و ممكن احط شي رابع ؟؟بعد اذنكم ابييييييه كريم و سخي و سنع وولد ناس اياويد و محترم مو بصبااص و ماله شغل في احد الناس تحبه و يموت في السفر مثلي ههههههههههههه

8- What are the three qualities and three bad habits that you have??
اتكلم في مساؤيي قبل
اول شي حساسه بارده مبذره جدا جدا...... بس ما ادري ليش احس هذي الشغلات تتفاوت من شخص لي الثاني
المزايا طيبه رومانسيه احب اساعد اهلي وايد

9-Did you have any previous relationships??
ههههههههههههههههههه ذكرت مقطع من برنامج كوكتيل مال داود حسين لما يسال انتصار الشراح هل لج علاقات سابقه ؟؟؟ اسكتت مده جان يقووولها اشوه حبيبتي يعني انا اول حب في حياتج قالتله اصبرررررررررررررررررررر خنعدهم ههههههههههههههههه باختصار اي عنديوبلا مثاليات زايده


10- Where do you see yourself in 10 years time??
انشاء الله يا رب اخذت الدكتوراه و امتلكت بيت خاص لي و مشرووع تجاري
شكرا استكانه و
انا اتاج وايلد مير
عشان اهي الي امون عليها استحي اطلب من احد غيرها اخاف يزعجه هالشي

وخزيتااااااااااااااااااااااااااااه !!!! صج فشله

شنو شعووورج و انتي تمشين بين مستشارين !!!!!!!! و وكلاء نياااااااابه و يخوونج الكعب و تتكرفسين جدام الرياييل كرفسه مو طبيعيه !!!!!!!!!!!!!!!!!!!!!!!!!!!!!!!!!!!!!!!!

ابي ارفع نفسي ماني قادره !!!
حسبي الله على بليس العدووووووووووو
جلب طرف التنوره بالعكب !!!!!!!!!!!
وقته !!!!
بس ما اقدر اشرح الموقف اكثر خلوني اصحصح و اقولكم اشصاار

امس و انا راجعه من النادي لقيت طرد عند باب غرفتي من ارامكس ..طبعا وقتها نسيت اني راده من النادي و المفروض دايركت شاور !بس لأ ! اخذني الحماس و الا اشوف واصلني فيلم نوت بوك طبعا بسرعه بسرعه من الحماس اخذ شغلي و دخلت اخذ شاور ..عندي طقووس الكشخه قبل لا اشوف اي فيلم ..ادش اسنع داري من عقب الدثره و اجهز الديفيدي ..و اسكر الليتات و اقفل داري و اسكر جهازي .. و انسدح اجاابل الفيلم ...اي نسيت اقوولكم ولعت شمووعي .. بعدين انحشرت من البخور و الشمع ..المهم ..شفت الفيلم و كان فظيييييييييييييييييع فظيييييييييع الي ما شافه اكيد انصحه نصيحه يشووفه ...و الي شافه اكيد بيوافقني الراي ...بدا الفيلم عبارات فظيعه كلمات روعه رومانسيه ما بعدها رومانسيه ....صج صج الحب يا جذي يا بلاش ..بعد متعه ساعتين يخلص الفيلم ..و اقعد ابجي بجي مو طبيعي جنه ميتلي احد ..(حمدلله و الشكر) ومن داخل نفسي ماني عارفه اذا انا قاعده ابجي متأثره من الفيلم او متأثره على حالي !ابجي عليهم او ابجي على حظي ..ما ادري ليش انت في بالي على طول .. انت في كل فيلم اشوفه ..في كل اغنيه اسمعها ما ادري متى بنساك مدري مدري متى اقدر ارد طبيعيه مثل ما كنت !!ثلاث سنين و انا من بعدك اعاني ... ليش قاعده ادورك في كل ريال اشووفه و اعرفه ليش قاعده اقيس كل الرياييل فيك ليش اقارن الناس فيك ليش قاعده اتطبع في طبعك ليش ماني قادره اكرهك !!!!!ليش اشوفك كل يوم و انا رايحه الدوام ... و قبل كنت ما اشوفك ليش احبك هالكثر ليش لما تشوفني و تسالني فاطمه للحين ما تزوجتي .؟؟ ودي اقولك وقتها تعتقد ان الله سبحانه بيرزقني زوج و انت في قلبي ... تعبانه وايد هاليومين بدوونك و ادري راح اتعب اكثر لما اكون وياك مرات امسك موبايلي و افكر ادق عليك ... بس ادري ماراح ترد و لا انا يهون علي اسوي في نفسي جذي .......فعلا ودي اعرف ليش تجارب الحب تفشل عندنا و تنجح ويا الاجانب .... عشان الخيانه او الملل ..او شنو بالضبط؟؟اغلب رفيجاتي و البنات الي حاويلني يحبون في فتره الجامعه .. بس ما يستمر حبهم و يتزوجون زواج بارد ....اعيش على ذكراك ابرك من اني اكون مع ولد الناس .. و انت في قلبي اكيد ما يستاهل ..... بس هم ارد و اقوووووووول لا يطووفكم الفيلم بس كل واحد خيشووفه برووحه ....واتمنالكم وقت ممتع

وصيه يدتي

مرات احس اتييني رده فعل عجيبه !!!
اروح النادي .. احاول احرم نفسي من الاكل .. بس وزني ما تغير
اقووم اسوي انقلاب على عمري
احط لي بووكس ايس كريم و اجابل افلامي و اكل لي احس بالتخمه
هذا الكلام في الويك اند ..
و صارلي جم يوم صج صج مشتهيه عيش مشخول لاني من زمان مو ماكله عيش
يالله !!!!!!!! شنو العيش لذيذ
اختب من الصبح يوم الجمعه ..
اقول حق الطباخ سولي مشخوول ... و ادلل على المشخول ..
كل من يدش الصاله .. اصرخ في ويها
ترا غداي مشخوول تبون !!؟؟
المهم حزه صلاه اليمعه
ماني قاادره انطر ارووح اركض اجهز اجار الطماط و المعبوج و الروب و العفسه كلها
اول ما يدش ابوي البيت راد من الصلاه ..
اصووت على الطباخ في اعلى حسي
حطططططططططططططططططططط الغداااا بسرعه
و لا تنجبه في مواعين السخان
حط العيش في قنجه
ابسط اجابل قنجتي ... اقول حق ابوي تبي ؟؟ يقول مشكوره ما اكل عيش
و اكل بطريقه مفجووعه
عيش و اجار طماط و روب و معبووج
صج الطباخ الكويتي لا يعلى عليه
... يدتي الله يطول في عمرها و يشفيها
اهي الي شهتني على المشخول تدرون اشلون
يوم الاربعاء تيمعو عيال خوالي يسلمون عليها
الي بيروح اسبانيا و الي بيروح لبنان و الي مدري وين بيروح
قالت لهم يا عيالي هالله هالله في الستر
و دير بالكم من الخراب
احفظ الله يحفظك
و تراااااا ماكو على الكويتيه ... كل شغلها سنع بسنع
حتى يا وليدي اكلهاا .. تعلم الستر منها .. مجبووسنا و اهو المجبوس ما نطبخه الا و احنا مسكرين عليه الجدر
صج يدتي ما ادري ليش تضرب المثل في المرأه الكويتيه او الخليجيه انها احسن من جميع نساء العالم
وكل شغلها مستر ...... حتى طباخها لي انطبخ مسكر عليه في الجدر
.... يما لولوه اتهقين شباب الكويت حاليا يؤمنون في نظرتج ...
والله مدري و حتى عيال خوالي قاصين عليها ....
الي يقولها اكيد و الي يقولها انشاء الله
و اهم لي اطلعو الصاله .. يقولون امي لولوه لما اتشوف الايطاليات في اي بيزا بتنسى ابو الكويتيات !!!!!!!
المهم ... انا الوحيده الي سمعت كلامها و تشوقت على المشخول

(1)
ادق عليه .. بعد رنتين يشيله ..
انا :الوو هاي وينك

يجيب: طالع

انا : عشتو وين رايح ؟؟
يجيب : وتر لمون ..تدرين اليوم السبت ماكو دوام
انا: اها زين تسوي تغير جو ... و انا من داخل احس بالغيره !!
..اسكت شوي بعدين اقووله في بنات حلوين ..؟؟؟؟
يجيب : ممممممم لا عادي الوضع عادي حتى لو بنت حلوه بس مو احلى منج
يضحك و اهو مستانس و انا اغلى
اتدووده و اسكت و اسوي نفسي عندي شغل عشان اهرب منه و لا يتلذذ في غيرتي اكثر
انا : اوكيه عمري اخليك ويا ربعك اذا طلعت دق علي
يجيب : اكيد انشاء الله و اهو متشقق
و قبل لا يسكره يقوولي فراوله غيرانه ؟؟
أنا: طبعاا لااااااااااااااااااااااااااااا شكوووووووو
يضحك و اسكر التلفون




(2)


يدق علي وبعد جم رنه اشيله

انا : الوووو هاي عمري
هو: هلا و غلا وينج مشغووله ؟؟
انا : اي شوي
هو : وينج؟؟
انا : رايحه اييب التذاكر
هو : انشاء الله معزمه على السفره ؟؟
انا : اي انشاء الله ..
هو : ويا منو بتروحين ؟؟
انا : قلت لك برووحي .. بس بقدم خطه البحث و برد ..
هو: قلتي امج بتروح وياج !!
انا: اي ما اقدرت قالي ابوي لا تنطرين احد هذا مستقبلج فانشاء الله برووح اسبوع و برد
.... احسه يغلي من الداخل
اقووووووووله ..عمري ليش ماكو ثقه ؟؟
هو: طبعا اكو ثقه بس خايف عليج
انا : اهاااااا اقوول عمري انا وصلت بس اخذ التذكره و ادق عليك
باااااااااااااااااااااااااااااااي

سؤال ؟؟؟
ليش الرجل يعتبرغيره المرأه حب ؟؟؟؟؟
و المرأه تعتبر غيره الرجل عدم ثقه فيها ؟؟
سؤاااااااال يا ريت تجاوبوني عليه

mabRoooooooKK

http://wildmare.blogspot.com/

صج انا اغرس مباادئ فظيعه و اسس تربيه صالحه !

كل سنه في الصيف شهر 6 انتيمع البيت كله و نروح حق عمتي الكبيره نسلم عليها قبل لا تسافر
و كل مرا نروح بيت عمتي ابوي و عمامي و عمتي يتذكرون سوالف قبل و السالفه تنقال مليون مرا
لكن السالفه الفظيعه الي موتتني من الضحك !
ان وحده من بنات عم ابوي مرا كبيره في السن ايم السبعينات و كانت توها طالعه من العده
المرا وارثه خير ماشاء الله بس عمرها ما طلعت من الفريج !!
اول مكان راحت له بعد العده اهي و اختها مصر و اسكنوا في فندق هيلتون النيل طبعا العمه ما تعرف شي
شغل نياااااده مساافره في عباتها و بوشيه توور و نعال نايلون ههههههههه هذا كلا على وصف عمتي طوول السفره كانو يدورون كمال الشناوي و شاديه
مرا من المرات مبسطين في اللوبي .... ياهم الجرسون قالهم اشتشربون !! واهم ما يعرفون يقرون وقتها قالوواا نبي من ذااااااا؟؟؟؟ (اشروا على بطل العصير الي يمهم )
اشووووي و الا الخواات طايحيله ساامريااااااااااااات في اللوبي !!!!
اسكروااااااااااااااااااااا !!!! اشربووووووووو بيره
ههههههههههههههههههههههههههههههههه

دش عليهم محرهم الي اهووو ولد اخوووووهم لقااهم يتطوطوحون في اللوبي و سامرياااااااات فصصصصخ عليهم النعاااااااااااااااااااال و لزززخهم و تلفظ الفااظ فظيعه ما تنقال
صج صج صج صج هذا الموقف يموت من الضحك يقووله عمي لنا بطريقه تخلينا دموووووووع دموووووع من الضحك
صج الواحد يقعد ويا الاهل قعدات ما تقدر بثمن

(2)

امس بالليل دلوول رفيجتي دقت علي ......
توها راكبه السياره ويا بنات اختهااا ..... كالعاده دلوول رفيجتي اكثر خاله في الدنيا تطلع بنات اختها
المهم توها راكبه دلول السياره ويا امها و بنت اختها الصغيره الي عمرها خمس سنوات
و الا تقولها البنت خالتي حطي رووبي !!!!!!!
انصدمت رفيجتي ..ويا امها قالوولها اشعرفج في رووبي
قالت فطوووومه كل ما تركب السياره تقول حطي روبي حطي روبي !!!!!!!!
انا الحين اقولج حطي روبي

يه يه يه يه يه انا صصج قدوووووه حق هاليهااااال .... داقين علي بالليل ميتين من الضحك من الموقف
اي عاد اذا عندكم بنات ناقصين تربيه طرشووهم لي اسبووووووع احولهم نانسي و رووبي

نبارك لاخوونا انسان بسيط

http://inssan.blogspot.com/

حجاب براشوت وتسريحه القطوو

امس و انا طالعه رايحه النادي ... مريت الصاله و الا اخوي الصغير
فطووم وين بتروحين ... قلت له بروح النادي قلت له ليش ودك نرووح مكان قالي كيفج
قلت خلاص ارجع من النادي اسبح و نطلع
طلعت ويااه قالي يبي كسارات حق لعب الكره
من مركز سلطاان شوق شرق .. اول ما دشينا سووق شرق قالي شووفي انتي تسوقي اهني في دبنهامز على ما انا اييب اغراضي
حسيت اخوي مستحي اتمشى وياه لي الرياضي ..
قلت تدري شلون انا بروح هاجن داز اقعد هناك ويا مجلاتي اذا خلصت تعالي ... و انا في الطريج بين دبنهامز و هاجن دز اشلووف بنات غريبه اشكالهم !!!!!!!!!

ياربي هذولا كويتيات ادري بتقولون انا قديمه على هالموضوع بس المسخره في اللبس الي قاعد تصير شي مو طبيعي
اطاالع الشباب كل واحد جنه عاافر في راسه قطوو
شاابين جراقي في قفته !!!!
اشووف البنات و كل وحده لابسه قميص نووم تحته بدي و لابسه جينز وحجااااااب !!! متفووخ جنه براشووت!!

انزين ابي افهم ليش هالبييي دوول الي تلبسوونه و تحته بدي و هالجينزاات يا ربي متحجباات
اشفيهااااااااااااا التنوره و القميص و المرتب
اخر مرا طلعت ويا رفيجتي دلال قلت لها لحقي انا و انتي غير لابسين تناننير و قمصاان تقول الظااهر احنا موضه قديمه
قعدت في القهواا طلبت ايس كريم .. شوي و الا اخوي يايني فطيييييييييييييييييييييييم بنات الكويت ما ورااهم اهل صح !!!
قلت له اشفيك بعد اشصااير !
قال بنات لاحقين شبااب والله شفتهم
قلت وييه هذا شي قديم عادي عادي
صج صج صج هالزمن يخرع شنووووووووووو اكثر بصير بعد
المهم طلعنا رحنا تعشيناااااااا في شيليز
ششووووووف شحجي !!!
شبعت ملابس دااخليه شبببببعت جميع الالواان !!
لما طلعت من العشا قلت في قلبي الله يحللج يا يما لولوه ياللي كل خميس ميمعتناااا و ساتره عليناااااااا في هالزواره
و لا خليتنا نشوف هالبلااوي
بس امس يدتي معزومه عشان جذي طلعت يوم الخميس

بسسسسسسسس الي باط جبدي بناتنا صارو ريااييل و رياايلنا بناات
اقوول حق اخوي ترا انا بغاازل يضحك قلت له شفت الجنوس الي هناك برقمهم
هههههههههههههههههههههههههههههههههه متنا من الضحك
قال يخافون منج شكلج يطق
هههههههههههه بس والله يا ناس قولولي لي متى هالحال
شنوووووووو بيصير لناا
شيلي خلانا جذي
بناتنا مفاصيخ و عادي
شبابنا جنوس و عادي
شياابنا كل ويك اند حفلات كابلز وعادي
يوم اليمعه كل من طاق يخته و طراادهه و تارسه بنات و نقول عادي
لي متى ؟؟؟؟؟
والي يحر اذا ياا الواحد يخطب يبي بنت سنعه
حسبي الله على بليسكم يينتوو البناات
موعارفين امس شيسوون في نفسهم
كل وحده ودهااااااااااااااااا تقوول يا ناس حبوني رقمووني
و الشباااب يقولون نفس الكلام ان البنات اهم الي يتحرشون و اهم الي
يحرضوونهم
طيب منووووو المفروض الي ينلام و شنو الحل ؟؟؟؟

كلمات اعجبتني اقدمها لكم ...لعلها تعجبكم
لا افكر في نفسي بوصفي فتاه محرومه بائسهمن فتيات الجيتو ,,تفعل ماهو طيب
و انما افكر في نفسي بوصفي فتاه عرفت منذ بواكير حياتي انني كنت مسؤله عن نفسي وانه يتحتم علي ان افعل ما هو طيب
اوبرال ونفري...
لن انكسر و لن افقد ثقتي في نفسي رغم تحطم ما كنت اعتقد انه يقيني
ليوسيل كليفتنون

الطرق المؤديه لكسر القلوب كثيره و القصص غاصه بحكايات قبوب كسرها الحب لكن القلب يكون منكسرا فعلا اذا نزغت منه الحلم
بيرل بك
افضل طريق للخروج من مأزق ,,موجود داخلك
روبرت فروست

الحياه لحظات متواليات و ان تعيش كل لحظه منها يعني انك ناجح
كوريتا كنت