الصيف قرب و المناقشات و الحوارات الصيفيه بلشت
كالعاده وين بطس مثلا ! نفس المكان .. ترا من قلب مليت
اوكيه انا قاعده اسافر طول السنه بس مليت صج طول الصيف نفس المكان
قاعد افكر في اني ما اسافر اصلا.. بس من اذكر الحر و الغبار اقول العوض و لا القطيعه
ادري بتقولون الناس مو لاقيه تاكل و هذي تتبطر على سفره
الهدف مو السفره او البطر انا من صجي مليت
ابي اسوي شي مفيد
ابي اسوي شي غير
احس تفاهه ترا كل سنه نفس السفره نفس المكان نفس الناس
احس اوكيه وبعدين سافرنا و رحنا و بعدين
حايشتني حاله مو طبيعيه ابي اسوي شي مفيد ابي عطلتي هالسنه غير
قلت بروح كينيا او اي دوله افريقيه او جنوب افريقيا
اساعد اليهال اتطوع في مكان عشان اليهال
قالو في تانزانيا هم ماعندي مشكله المهم عندي اسوي شي
دخلت موقع اليونيسف عشان بقدم طلب
اكتشفت ان كل الشروط ماتنطبق علي
اولا لا انا اقدر اقدم من امريكا و لا كنت عايشه فتره في امريكا ..
وشروط ماتتوافر فيني
.. ابي اروح صج اتطوع اسوي شي مفيد
ابي اجابل هاليهال احسن الدنيا وايد بخير
ووايد حلوة
المهنه المتوفره الوحيده هي طباخ
ماهمني ايا كان النوع طالما في النهايه راح اتطوع اجابل هذولا اليهال
قمت اقرا عن طبيعه الحياه الصعبه
راح اخذ تطعيمات
راح يكون لبسي غير و حياتي غير
جدول يومي راح يكون متغير على حسب الي قريته
ولكم ان تتخيلو خيالي الواسع وين وداني
بس خاب املي و انكسر حلمي في كل الصعوبات الي قاعد احلصها من شروط التطوع
سألت في لجنه خيريه
مايخذون حريم والسالفه فيها محرم
راح احاول اسوي سيرج اكثر
والي عنده اي معلومه ياريت يساعدني
او الي يقدر يساعدني في هالشي ياريت بعد
يدليني على اي مؤسسه تبي وحده فاضيه بتسوي شي مفيد
