لندن

صباح الاربعاء  الجميل

الف الحمدلله اليوم "جنه " الجو شوي متعدل

وان شاء الله يستمر حلو يارب

بوستي اليوم راح اتكلم عن سفرتي الاخيره

والي كانت من اجمل سفراتي

لان كل ماضاق صدري تذكرت   الضحك و الوناسه الي كانت بالسفره

كنا عباره عن 8 بنات  او أم و احنا 7 بنات

استخفينا من الينون او الازعاج مدري بس المهم كان كل شي حلو

المحطه الاولى كانت لندن

وصلنا لندن وكنا مواصلين

تسدحنا بالسياره

بالعاده انا الطريج الي مطار هيثرو لي لندن

اكون وايد مستانسه

بس هالمره ليش تعبانه فكنت مقفله ..ادور الفراش

سؤال ليش انعيب على الدائري الاول اذا لندن واهي لندن طريج المطار فيه تصليحات من 2007 !!

وعليه علينا بس

المهم وصلت الاوتيل

مافيني اتكلم اصلا ..

والا اشوه الي استقبلني عربي

"نصب علي " اسسسسسسسسسسسسستغلني

قالي اشراايج انسويلج ابقريد على الغرفه وتدفعين  مبلغ معين والله مذكر جم

بس تستخدمين اللاونج على طول والانترنت و الريوق و بلا بلا

انا اهني حزتها دايخه

وابي غرفه باي طريقه

اي اي اي تذكرت و قالي نعطيج الغرفه على الهايد بارك صح تذكرت

عشان جذي اغراني العرض

فقلت له ان شاء الله

المهم ابي داري الحين

وعطيتهم الكروت و كل شي

وفعلا رحت الغرفه و نمت

يووووووووووم صحصحت المغرب

و غسلت و شربت قهوتي

حطيت ريل على ريل بالرسبشن

وقلت له تعاال تعاال

عطني خنشووف اشحطيت اشخليت اشسويت بعمري اناا !!

ويا هالدار

والى طلعت الغرفه الليله على الابجريد و الحوسه اكثر من 350باوند بالليله !

جان انصدم من نفسي

وكان هذا اول طراق لي بالسفره !!

اي نسيت اقولكم ان كان فندق الماريوت  park lane

لا احد يروح و ينقص عليه بالابجريد

لان بالنهايه كلا خرطي

كان الجو حزتها عجيب اينن

المطر الخفيف ما يوقف بالليل و بالنهار غيم و مرات مطر و جم يوم كان شمس

احلى الاماكن الي احبها في لندن اهي صوب  الكينج رود ستريت و القهاوي الي هناك

كان في محل هدوم  " فنتج "

بس سكر وكاتبين العنوان للمحل الثاني بس مارحت ..

لان في ليبرتي اكو كورنر "فنتج "

احب اشرب قهوتي الصباحيه في

prompton quarter brasserie

واتمشى العصاري في ساوث لندن بانك

وايد احب هالمكان و القهاوي المفتوحه و الي تطل على النهر

احب قهاوي المارلبون و دواعيس المي فير

احب شاي العصر في اوتيل سافوي

اعشق كل كوب قهوه شربته او شاي انجليزي

اختليت فيه مع نفسي واستمتعت وكتبت في النوت لو كلمتني

اوثق واسجل اللحظات الحلوه ..

استانس جدا في السبا بلندن

وتمشي الصبح في الهايدبارك

احب مكتبه الساقي و البائع العراقي الي كلا اكاسره و اناشبه على السعر

استمتع جدا برحله الكروز الي من بيج بن لي جرينتش

اعتقد ساعه او ساعه ونص الطريج خيال  و البيوت اتينن

انا وايد احب  لندن سيتي ..وخصوصا العمارات المطله على النهر ..والبوب  القديمه اشلون محافظين على اشكالهم

واحب اتمشى في اي مكان بعيد عن الخليجين

على الرغم من اني "تبيكال كويتيه في كل شي "

ازعاجي

لويتي

وتحلطمي و نحاستي

اذكر مره كنت بكافيه في كينج رود ستريت ..والجو مطر و برد و انا مستمتعه بالاسبرسو  و حاطه اغنيه محمد عبده

ومعليه على الصوت و سبيكر و عايشه جوي بروحي

والشايب الي يمي يقرا جريدته و متنرفز مني ومن الصوت

وانا بو لباس

المهم اني مستانسه ..ومع كل هذا هم انحاش من الخليجين

الظاهر اناعندي اكتفاء ذاتي بروحي

GATWICK Airport :

في البوست الياي راح اتكلم لكم عن اجمل الاشياء الي صارت

لكن الحين بتكلم عن اتعس يوم في حياتي

بعد لندن كانت الوجهه الثانيه ميلانو عن طريق مطار جتويك

تونا داشين مطار جتويك و الدنيا قيله و مطر و كان الطريج زحمه و لويه جناطنا

كان ويانا اكثر من 15 جنطه !!

غير كل وحده ساحبه وياها قش !!

تونا داشين المطار و الا ساين اشكبرها ان كل الطيران المتجه الى ايطاليا متكنسل

عندهم اضراب !!

انصدمنا !!

طبعا البنات ماهمهم استانسو وايد لان يحنون يبون لندن

بس انا خلاص مليت

المهم قعدتهم في كوستا كافيه و رحت انا ويا بنت عمتي و قفنا في الكيو

كان طول الكيو يخرع !!

تخيلو كل الطيارات الى كانت بتروح لايطاليا سواء ميلانو روما فلورانس فينسيا

كلها بكيو واحد !

وتخيلو برود الانجليز

نطرنا في الدور من الساعه عشر وماوصل دورنا الى على الساعه 2 الا تقريبا !!

خلال الاربع ساعات لكم ان تتخيلو اشلون كنت في توتر

و اعصاب شاده

لاني كنت انسق ويا بوكينج عشان ايغيرون حجزنا ..

ومع شركه يورو كار عشان السياره

المهم وصل دورنا وكنت مصممه اني اطير في نفس اليوم وبس لاعت جبدي و مافيني ارد لندن

قالولي لج خيارين ياتنطرين بعد اربع ايام في لندن وعقبها تروحين ميلانو

او تروحين اي مطار الحين تبينه ..

فتحت الخريطه شفت اقرب مطار لميلانو

بس مو في ايطاليا ..طلع مطار نيس..

وبلحظتها قررت نروح نيس بدال ميلانو..

رحت حق البنات في  كوستا ..

قلت لهم يالله ...بنروووووح نيس !!!

واسمع اصوات 6 بنات متحمسات جدا لنيس !!

الي ماصر لي نص ساعه من قررت

ياحلووووووووو السهاله بس

وظبطت اوتيل في نيس

ومع اللويه الي انا فيها و

عقب الدوخه الى من الصبح والتعب و صارت الساعه 3 العصر و انا هلكانه ..جان تظيع جنطتي بالمطار

وفيها بوكي و جوازي و كل البوردينج !!!

اشسويت ..

تربعت بوسط المطار اصييييييييييييييييييييييييح ...

يتبع

WhatsApp 2

مساء الحب والقهوه التركيه العجيبه

الي يايبتها امي صوغه من تركيا ..

شي خيال لا تطوفكم وصو عليها اي احد بتركيا

..

وانا اشرب قهوتي التركيه مع امي و استمتع

واسولف لها عن بوستي الي فات وعن حريم الكويت والاي فون

ضحكتني ! تقولي اشمعنا الكويتيات يعني كل الحريم في العالم

ومايندرى باجر عيالكم شيكتبون عنكم !

(1)

نرجع لحكاوي الواتس اب الي ماتخلص !

طبعا عقب ماسويت بلوك لبعض المزعجين اشصار ؟

وحده تسأل الثانيه "فطوومه ادز مسجات ؟" الثانيه تقولها اي

ويكتشفون اني مسويه للبعض بلوك!

المفرووض استحي صح؟؟

كلش ما استحيت !!

لاني مرات احتاج اثور على "العيب " او اثور على "الاصوبل والسنع "عشان انا ارتاح

انيي حق فئه من الحريم شنو وظيفتها ؟؟

تشتغل حارس عماره !!

بس حارس عماره الواتس اب !

ماعندها شغله غير فلانه

اخر مره دشت الواتس اب من يومين شكلها مسافره!

اي ماتقعد كلا مسافره وعليه علينا !!

على طووول سووها مسافره و مع منو وقصه قصه اشعليكم من الاواادم خيساافرون !!

فلانه سهرانه لي 3 الفير ! مدري من معاه !!

last seen كاان امس الفير ! ماوراها دوام !

الى مضحكني انا صوره الطياره والاعلاام!!

تلفوني بطير من هالطيرات !

والي صج مكدرني صج صج ..الاشاعات الي ملوعه جبودنا بسكم حرام ليش كل شي انسويله قصه و انزيد وانعيد فيه

فكروا في مشاعر الاخرين وفي الناس الي اتحجون او اطلعون عليهم ااشاعات

"ياربي تكافينا شر المستخبي " ولا تخلينا حجوه بحلوج الناس

مايصير البيوت مالها خصوصيه من هالاشاعات

سواء على الصعيد الاجتماعي والخطب والزواجات والطلاق

او على الصعيد السياسي والفتنه الطائفيه الي هابين فيها

بسكم حرام ترا وضعنا مايسمح

او على الصعيد الديني "لاعت جبدي من كم الفتاوي"

ماشبعتوا مثل واخلاق وقيم

يباا ترا خلاص انعرفكم وانعرف تمثيلياتكم..

والله انعرف ربنا من عمر مالا داعي هالتدكور

و النصح والتطفل على الناس باسم الدين

يتروالي لو اسولف لي باجر ترا ماخلص

فخلوني انتقل للبرنامج الاخر الي خرب البيوت و العلاقات الزوجيه والصداقات

(2)

برامج تحديد المواقع ..الي يحدد موقعك انت وين حاليا فيه

"لما واحد يسأل زوجته ويقولها انتي وينج ..واجب عليها ترد عليه وتقوله انا في المكان الفلاني

لكن لما تكون وحده طالعه و تتليقف رفيجتها او وحده من معارفها وتقولها وينج؟

ترد هذيج طالعه ..وتصر الاولى بتعرف وين

فقط لعمل اختبار الصدق والجذب حق رفيجتها

انا اعتقد هذي جقاله !!

اي جقاله

انتي شكو وين البنت فيه

في الوفره والا العبدلي

في الكويت والا دبي

خذت منج فلوس؟

ليش المناشب

ليش التنبر !!

جيكوا على اجهزتكم و سكروا اللوكشن وتحديد الموقع

و تاكدوا من عدم تلغيم اجهزتكم بهالشي ..

ترا الحين الكل صاير فيه هوس تتبع الاخرين لمجرد اللقابه

انا اخر موقف صارلي هالاسبوع

توه فرش

وحده دزتلي مسج تسألني وينج ؟

قلت لها بالبيت ..ردت اللبحت على قلبي ماسفرتي ؟

قمت ما ارد ..ادري ماتبي شي الا اللقافه

قامت دزتلي مسج وسوت هوالات

ضعطي وسكري وبموت و اعيالي وياطلابه عيالي ومرضنا

والناس اذبحتنا بالعيون و انا مو مترقعه

كلا مسجاات نكد بنكد بنكد

وهم هم هم وتشكي

وفجاه بالغلط دزتلي مسج بموقعها "مسج تحديد الموقع " طقته بالغلط

والا الي صارلها ساعتين فاجتلي حسينيه و مناحه وصياح و بتموت

قاعده في ريزورت في "براغ" او بالاحرى يبعد عن براغ نص ساعه!!

حقي انا الهم والنكد !! ليش! انتي مسافره مستانسه صديي اشواي ليش تلبحين علي بامراضج

فطييييييييييم اشسوت

ضحكت ضحكت من قلب

و قلت لها اشلون الريزورت عسى مستانسه ..

يمدحون المكاان يقولون عجيب ..

:))))))))

اهي ماتدري اشلون نا عرفت وان منهاااا بس شكلها حدها اخترعت و تفاجأت

اعتقد هالانسانه الحين بتختم البقره 40 مره يالله بتدق علي من هول الصدمه وتحديد الموقع

لوووووووووووووول

WhatsApp 1

صباح الحب ياكويت

اليوم الصبح الجو اينن ..شي طبيعي انه راح يتغير بس على الاقل نفتح عيونا على شي حلو

اتمنى ان كان ويك اند سعيد

خفيف لطيف بدون نجره ومناجر

خلوني اقولكم قصه خفيفه لطيفه ظريفه

كان يامكان في احد الازمان

قرر الحاكم ان يعطي هبه الف دينار لشعبه

وكانت هذي الهبه في شهر فبراير

وحزه ما الناس تشتري هدايا او اتخطط لهدايا

عيد الام لامهاتهم

وبما ان الميزانيه كانت راهيه

فكل الكويت "ولاول مره يجتمعون على راي "

قرروا يشترون حق امهاتهم جهاز "اي فون "

ياعل ماكو اي فون !!

ليش دعيت على الايفون وليش اتحسر على عمري !!

على نطاق الامهات مع الاي فون صار الوضع كالاتي :

1-ندش و نطلع ولا احد معبرنا ..لان الكل لاهي في الايفون

2- تحولوا كل ابناء المنزل بدون استثناء الى ورشه "المهندس "

ماغير نزل برنامج و امسح برنامج حط برنامج وابقريد حق برنامج !!

الناس بعالم و امهاتنا بعالم ثاني

سواء بزواره بعرس في كافيه و في سفر

ماغير نظاره و منزلين هالراس !

شي مو طبيعي

انزين انيي الحين لموضوع برامج الاي فون وراح اخذ 3 اهم ابس

الواتس اب :

انا عن نفسي كرهت الواتس اب كره العمى

اول ماطلع الواتس اب ماكو الا انا و فجر رفيجتي نسولف فيه

صار الحين الواتس اب بعد اعصار الامهات

كل مدرسه متقاعده كانت ويا امي بالمدرسه عندي بالواتس اب ولا تسألوني ليش!

كل حريم خوالي و عمامي وبنات عم خاله يدت ام امي

و كل عيوز مرت علي بالكويت وياي بالواتس اب !!

مو مشكله وجودهم ابدا حياهم الله

المأساه ان افج الواتس اب الصبح

الاقي غزو !!

شنو يعني كل وحده بروحها دازه مايقارب من 6 الى 15 مسج !!

شالازعاج !!

ميخالف مره باليوم

مره بالاسبوع

بس مو سباق هذا مو سباق !!

دز و انا دز !

رحموني !

والغريب ان نفس الانسانه تدز "ماكنتوش " مسجات

مره دينيه و دعاء و قبور و شي يخرع

عقبها اغنيه جديده للجسمي

عقبها صباح الحب

عقبها دعاء للاموات

عقبها احذروا هذا المنتج

احذروا ستاربكس

واهي قاعده بستاربكس الافنيوز !

شنو موديلكم بالضبط !

هذا غير انه صرت مطراش و سكرتيره حق رفيجات امي

لاذكرهم بمواعيد يمعات رفيجاتها والدروس

هذا غير اللقافه القاتله اللي اكتبه في ال status

مثال : فطوومه اشفيج عسى ماشر ليش كاتبه دعاء

فطومه شنو يعني الي كاتبته

فطومه اتحبييييييييييين ؟ ياه ياه شالاغاني الحلوه من حقه كاتبه

انت "الحبيب " الي رويت الحشى ري !

سؤال سؤال والله جد ؟

يعني اول ما ينقرا راح ينفهم اني كاتبته ليش status

بس على فرضيه اني احب و كاتبه حق واحد

بقره بقره انا لما بحب بروح اكتب في ستيتوس حق الناس اشكره !

دسبرت مثلا ؟ مو صاحيه

فيني نقص !!

والا يوم اني بحب راح اقولج اي والله احب !!

شاللقابه !

مرات اعصب

ومرات صج صج يكسرون خاطري وافكر فيهم

اقول ان حريم الكويت خصوصا المتقاعدات و الي مايروحون ولا لهم خلق يطلعون

صارت كل حياتهم اي فون وواتس اب

وماعندهم شي غيره

تقعد بالبيت ماعندها الا واتس اب و دز و اتطمش على ال status

راح اخليكم الحين

واكمل لكم في الجزء الثاني من انقلاب الاي فون في حياتنا بالكويت

واكمل لكم انواع المسجات و اتكلم عن البرنامج الثاني والثالث

ملاحظه:بليز لا احد يقول حق امه ان لوير كاتبه شي عن الواتس اب لان يمكن وحده من امهاتكم

اهي وياي بالواتس اب و مالي خلق زعل و تشرهه

وشكرا

تويت تويت تويت

انا محتاره شكتب والا شخلي لكن قررت ابدي من حيث نهايتي

قبل لا اقطع التدوين كان اصلا عندي اكاونت بتويتر و كنت مسكرته برايفت و قله قليله جدا جدا

اهم الي اسوي لهم اكسبت .. وبعدين من شهر يناير هذا حزه الانتخابات فتحته و صرت اعلق و جذي

الغريب في الموضوع ان مواقع التواصل و برامجها من ايام

ام اي ر سي ..محد كان يدش عشان يشتهر او يسوق لنسفه

وفكره تويتر اصلا "تغريد " مو تسويق

اول ما طلع تويتر كان اينن عجيب مافيه الا السلبريتيز والمشاهير يكتبون وين راحو ووين ردو

لان فكره تويتر هي العصفوره الي تنقل اخبارك وتتبعك وين ماتروح

يعني انت تكتب وين بتروح ووين بتيي

تويتر دشوا فيه ربعنا العرب و خربوه !! زحمه لووووووووووووعه

وكل جمبازي ياي يسوي من نفسه شي

ويعتقد ان من غير اللائق انك اتكلم عن روحاتك و يياتك

بالعكس ياماما تويتر هذا الهدف منه !!

لان تويتر ماهو حمله انتخابيه ابلاش !

ولا تسويق للذات

ولا مكان يصير فيه الواحد غاندي

الي بوصله ان الانسان المبدع صاحب الانجاز لايعتقد ان لما يكتب هذا بحد ذاته انجاز

الانجاز الحقيقي انك تكتب ما انجزته حقيقه

اصحاب الهمم و الانجازات ماكتبوا "رسايل " و قالوا انجزنا

بل عملوا ثم نحن من كتبنا عنهم

هذا من جانب

انيي حق تويتر في ايطار المجتمع الكويتي الفكاهي :

تويتر خلانا نشوف ازواج كل رفيجاتنا

خلانا نشوف اعيال الخال و العمه

تويتر خلانا نشوف الناس وعقليتها

تويتر يعني انك اتحاسب على افكارك لانها راح تكون محل نقاش الام والخالات باللزواره

"ما كناا كويسين وو بنئووول الي عاوزينه و بنكتب كل حاجه اي لزمتها الخنئه دي باا "

وصارت الناس اتنافس على عدد الفلورز

الفلورز مو زواره ولا واجب

انت يعجبك الى اكتبه هذا قرارك

انا مايعجبني الي تكتبينه فهذا قراري ليش يزعلون الناس من هالشي

اهي خيارات و اختيارات

مو صداقات !!

لما ارد عليج او ارد على تعليق او اعقب عن شي مو معناته انتي صديقتي و ادزيلي برايفت ياحلوج ياحلوج

بشوفج اطلع معاج و بعدين نصير ربع

تويتر مو ربع

ريتيويت مو ربع

الفلورز مو ربع

هذا معارف تحت مظله مكان معين لا يعني ربعي

مايصير مثلا اني اقول حق الناس والله اوبرا رفيجتي لان كلا اتسولف وياي بتويتر !!

معاني ومفاهيم الصداقات و المعارف بالكويت تغير ..عشان جذي تكون العلاقات هشه

عقب طلعه طلعتين موقف موقفين

تصير مراقع بيبان

لان اصلا انتوا مو صديقات ...

مو بس جذي تويتر الحين صار المكان الي يدور كل واحد فيه - سي في - البنت الي بيخطبها او بيتعرف عليها

او العكس صحيح ...

وكل واحد فيهم يصدر احكام عن الشخص بدون مايشوفه لمجرد شاف تويتاته

طيب ليش احكم واشلون احكم

انتكلم عن حكم البنت على الولد

البنت تعتقد ان الريال ثقيل طينه و مليق مجرد انه مايكتب ! او يرد بجديه

انزين انتي ماراعيتي ظروف او اسباب theme الشخصيه هذي

يمكن اهو يرد الكلمه و يحاسب عليها لان له وضعه السياسي

وضعه الاجتماعي

له ظروف عمله

موبالضروره مليق يمكن عنده اكاونت ثاني مو معرف بنفسه و شخصيته فيه ممتعه

وانتكلم عن حكم الولد على البنت

يشوف البنت تضحك وتسولف قال خفيفه

يشوفها ماكتبت قال غموووض

يشوفها اتحط اغاني قال سخيفه

طيب هذولا رفيجتها فشي طبيعي بتضحك وياهم

واهي انسانه مرتاحه مع نفسها كيفها بتستانس تضحك

هذا مو كافيه والا استقبال عشان تقعد متسمته !

واذا ماتحب تكتب لان اتحس ان ماكو شي يستحق الكتابه

المراد ان تويتر ينن الناس وقعد

والي ماعنده صار عنده سالفه

وانا ناطره شي يديد غير تويتر اهب فيه

اخليكم الحين و بوستي الياي عن الحريم الكبار والاي فون !!

كل الحكايه اشتقتلك

طبعا اشتقت حق التدوين و الكتابه ..

اعتقد صارلي سنتين ونص او 3 سنين ..المهم انا وايد مستانسه ان الناس طخت عن المدونات عشان جذي انا رجعت لها

رجعت لنفسي

حتي اكتب وامارس هوايتي

طبعا اكيد خلال هالسنتين كتبت وايد بس كتبت بدون محد يقرا ..

وكلا اقطه بالدرافت

راح اكتب عن وايد اشياء

عن حياتي عن نفسي ..سفري

عشان ما انساني ..

راح اكتب عن تغيير الناس في السنتين الاخيرتين

عن هوس تويتر ..عن الصداقات اليديده و عن كل شي

راح اكتب عن اللوك اليديد للمجلس العجيب

عن السياسه

عن الملائكه الى بالمجلس

عن كل شي .. يطري في بالي

والحين اقوم ابدل عشان اطلع الحق اروح العزا وبعدين ازور صديقتي

مرات تكون اجمل النهايات ...فراق

- يقول تعالى ((وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ)) البقرة 216

وعن أبي بن كعب رضي الله عنه قال: ما من عبد ترك شيئاً لله إلا أبدله الله به ما هو خير منه من حيث لا يحتسب

مرات تكون اجمل النهايات

الفراق

شكرا لكم

الحياة الاخرى او الشخصيه المزدوجه

ما بني على باطل فهو باطل..
استوقفني عدد المشاركين في لعبه سكند لايف ..
هي لعبه في الانترنت ..يختار الانسان الحياه الي يبي يعيشها و الشخصيه الي يبيها..
و يتعايش وياها

اانا انصدمت اشلون اكو ناس تقدر تلعب هذي اللعبه مو عشان شي بس عشان اشلون يكون لهم دبل لايف..
فاكتشفت ان عدد الي يلعبون السكند لايف في الصج اكبر من المشاركين..

جم واحد يدش المسنجر باسم مستعار ؟ بشخصيه مستعاره و يعيش داخلها و بعدين يوصل لحد ما يقدر يخرج من هذي الشخصيه و يصير التصادم!!
جم رجل مل الحياه الزوجيه؟ ولا يريد طلاق زوجته ولكن اراد فقط التجديد ..فدخل عالم المدونات بشخصيه الرجل العزوبي
الرجل الي يبحث عن الحب ولا يريد التقيد ..ويبدأ التعارف و اللعب في مشاعره اهو اولا و من ثم مشاعر البنت..ناسي حديث الرسول عليه الصلاه و السلام
"عفوا تعف نسائكم "

كم بنت ملت من روتين الحياه الزوجيه فاختارت لها شخصيه في الفيس بوك البنت الدلوعه الهوائيه ولعبت في مشاعر الرجال؟
كم بنت تلخبطت عندها الهرمونات في فتره النفاس و دخلت في مود الاموشن و العواطف و دخلت قصه حب مفعمه بالوله و العشق و الهيام ..ناسيه بذلك النعمه الي اودعها الله بين ايدها وهو الطفل الجديد ..وناسيه الرجل الي يبات في فراشها ..ينطر انتهاء فتره النفاس..حتى تعود زوجته و نعمه.. خانت نفسها اولا ..و ربها في طفلتها ...وخانت زوجهاا.. ودخلت تبحث عن اللعب والعذر فقط انها تعاني من فتره لخبطه هرمونات!!

كم انسان فاشل دراسيا دخل عالم المدونات بشخصيه الدكتور الناجح و عاش حياه السيرج و يعطي النصايح و يساعد الناس..لانه اختار ان تكون له حياه اخرى ..بعيده عن تلك الحقيقه..

كم بنت في عالم المدونات شاذه جنسيا و تمنعها العادات و التقاليد من البوح بشذوذهاا.. فاختارت شخصيه الرجل الفحل في عالم التدوين ودخلت بيننا هنا على اساس انها رجل و الكل يتعامل معها على انها رجل؟؟

كم رجل شاذ ((جاي)) ماقدر يعبر عن البنت المسجونه في جسده فاختار ان يكون له سكند لايف في الانترنت يظهر فيها دور البنت الي تتغنج و تتدلع.. و لكن محافظه جدا ماتقدر تقابله ..ولا تبي تقابله..

كم شخص منكم دخل علاقه في الانترنت او تعرف على انسان بالانترنت و حس انه غريب و يخفي وراه سر؟؟

هل فكر احد فيكم واهو يختار ان يكون عنده سكند لايف ان يلجأ الى معالج نفسي يشرح له الي فيه ويطلب الاستشاره؟؟

غريبه هي الحياه لما تكشف لنا ناس يعيشون بحياه اخرى وتصدمنا الدنيا بعدها بان معظم البشر الي حوالينا يعانون اما من انفصام في الشخصيه
او سايكوباثي...

عالجوا انفسكم ,,وتقبلوا الواقع
لان حبل الجذب قصير..

ضاعت الحسبه

ما بني على باطل فهو باطل

*

*

*

*

*

*

*

*

صح؟؟

ودعوتك بشجن

سمعت اذان الفجر الاول..ينادي ..

اتقلب في سريري
شي ما يجرني نحو السرير و يشدني تحت الوساده
ودعوه حائره من نفس ضاقت ذرعا من الذنوب تدعوني لصلاه ركعتين قبل الفجر ..

اتذكر همي و اتقلب و احاول ان اعود الى النوم ..
هي دائما هكذا نفسي .. تتحرش بي وتختبرني ..تذكرني بالصواب و يجرني الشيطان نحو الخطايا..
نفضت عني الشياطين التي باتت بسريري ..

وقمت

صوت المطر
خشوع الشجر
وانين قلبي ..

افتح الشتر و الشباك.. وادعوا الهواء لمشاركتي صلاتي..
افكر في هذه الاوقات و في يوم عرفه ..الا يجب ان اتجهز لربي ؟
الا يجب ان اعمل لاستقبال ملائكه الرحمن ..
هل لهم قبل ان يمرو على حجاج بيت الله في هذه الساعات ان يمروا من امام شباكي ليلتقطوا دعائي الخالص ..

رتبت غرفتي فعندي ضيوف..
وبخرتها !

هل جننت لا اعلم !
ومن المؤكد اني مجنونه !
هل هناك انسانه تبخر غرفتها الساعه الخامسه فجرا !
تنتظر نزول الله و ملائكته في هذا اليوم..

ربي اتعلم اني احبك ؟
كل يوم اقول لك اني احبك..
قل لي لما انا بعيده عنك هذه الايام؟ هل طردتني ذنوبي..
ذو الجلال و الاكرام.. يا رب اني انتظر رحمتك الي وسعت كل شي ..
واني ادعوك جهرا و علانيه و اني اخاف عقابك
ولكني ارجوا رحمتك اكثر..
يارب اني اسمع خيرك النازل وغيثك الممطر ..لاغسل نفسي به ..

افتح غرفتي واخرج ابحث عن المفاتيح و اتذمر على والدتي التي قفلت كل الابواب
واخرج .. لعلي اذا خرجت كنت قريبه و تحت المطر يصل دعائي
او اغتسل ..لا اعلم
كل ما اعرفه الان ان في هذا اليوم لا اريد ان تفوتني فرصه
توبه
وانابه
وعوده
لك يااااااا الله ...

المطر يختلط بدموعي و اشهج له بالبكاء
وان لم ابكي عندك.. فمن ابكي عنده ؟؟
وادعوك
يا سميع
يا مجيب
يا قريب
ياقابل التوب ..
يا غافر الذمب
يا غفار
اتعلق بباب رحمتك و جودك
فلا تحرمني
ولا تقطعني
و اصلني بك
فاني استعزيت بك
وتوصلت بك
و سألتك انت
يارب ارحم ضعفي
وقني شر نفسي
ولا تكلني الى نفسي طرفه عين
فاهلك
فاهلك يارب..

المطر يزداد هطولا
و استبشر بغيث الله ..
احبك يالله احبك
اتعلم اني احبك يا الله ..

واني اعلم انك دوما تغثني و ترحمني ليس لخير اعمله و لكن فقط لعشقي لك..
فانا اخافك دون الخلق ..وهذه الوحدانيه يارب فاني لم اشرك بك شيئا ..
سجودي
وصلاتي
وعبادتي
و تقربي
اليوم لك
كله لك
يارب كل الازمان
وياربي
اسألك بنورك الذي ملئ اركان عرشك ان تغثني
يا غياث المستغثين يارب العالمين
اغثنا يا رب اغثنا ..
ويزداد المطر و اتذكر انه حتى يستجيب ربي دعائي علي بالدعاء للضغفاء مثلي
فادعوا و ابتهل
و استغثته بانين الخاشعين

يا غياث المستغيثين يا آمان الخائفين
يا جابر المنكسرين يا واصل المنقطعين
يا مجيب المضطرين يا سامعا لكل شكوى
يا كاشفا لكل بلوى يا من ينزل الى سماءه الدنيا ليغفر لعباده
ليجيب دعائهم ليسمع مسألتهم
اسألك بكل خير سأله نبيك محمد صل الله عليه وسلم ..

واتذكره
اتذكره
نعم حبيب الله ..كيف لي ان اسجد لربي وانسااه و هو من علمني كيف ادعوا الله
وابحث عن دعاء له في قلبي حفظته دوما عن ظهر قلب ..
يوم كان ضعيفا..
وانا باضعف حالتي الان ..لا اريد االا ان اعتزم امري بربي ..متبعه نهج رسولي..

اللهم إني أشكو إليك ضعف قوتي ، وقلة حيلتي ، وهواني على الناس أنت رب المستضعفين وأنت ربي ، إلى من تكلني ؟ إلى بعيد يتجهمني ، أو إلى عدو ملكته أمري ؟ إن لم يكن بك غضب علي فلا أبالي ، غير أن عافيتك هي أوسع لي . أعوذ بنور وجهك الذي أشرقت له الظلمات وصلح عليه أمر الدنيا والآخرة أن يحل علي غضبك ، أو ينزل بي سخطك . لك العتبى حتى ترضى . ولا حول ولا قوة إلا بك

و اخذ نفسا عميقا
استنشق الهواء.. ممنيه نفسي بانه يوم خير..ارجوا من ربي مغفره
ورحمه
و اغاثه ..

و استجابه لدعائي

و استجابه لقلبي الذي تكسر و ثقل بالهموم

و ادعوه في كل لحظه ان يغسل قلبي ..من خطايا عبيده به

واردد سرا و جهرا
اللهم انك عفوا كريم تحب العفو فاعفوا عنا
اللهم اتنا في الدنيا حسنه و في الاخره حسنه و قنا عذاب النار

.....
اعود الى غرفتي..
كل شي بها بارد
نتيجه الشبابيك المفتوحه الا قلبي المنفطر..
واتذكر ان مواسم الاعياد لا تأتي الا بعد مواسم العبادات ..
فاني ان كنت قصرت فاتمنى اني عملت شي قليل ..يبشرني بعيد من الله
ولكن عيد لقلبي..
وملامح وجهي التي تغيرت من الحزن

واردد اللهم اني استغفرك و اتوب اليك..
اللهم مازويت عني شي مما أحب فاجعله فراغاً لي فيما تحب

تقبل الله طاعتكم و كل عام و انتم بخير

مرني مرة فرح

لقراءة البوست يرجى سماع الاغنيه

في عالم الاحياء ام الاموات هي .. لاتعلم .. كل ماتعرفه انها كانت تغط في نوم عميق
تتوسد الاحلام .. تفرش من الهموم سرير لها .. تدثرت بالغصات
و نامت اخيرا بعد ان احتست كأس دموعها ..




واذ بها يده


..احسته
لمس اطراف اناملها



ايقظها ..


"قومي حبيبتي ابيج "



هي لم تسمع همسه






...
نائمه ..




فتحت عيناها



.. تأملته




اخذت تسترجع ذاكرتها

اين هي
اين هو
هي اين؟


يبتسم
نزل لها على هيئه رجل...." كالـــملااك" مبتسم



وضعها على كتفه
رفعها

ثبتها


عانقت رقبته ....


تدثرت جسده حتى لا يذهب


و تسأله وهي على كتفه

"تطير لدنـياه "

وين بتوديني؟


امشاي معاي فوق ...

هي : وين فوق؟؟


تعلقت به و هي تعتصره بكاءا


"فلان .. انت عايش؟؟"


فلان انت حي ؟


فلان انا مليت الانتظار ...


تدري من يوم رحت و الدنيا مالها طعم


مالها لون




فلان .. الدنيا بعدك خانتني
بالحيل تعبتني..



تذكر يوم قلت لي .. لي غبت بترتاحين



اشلون اهون عليك خليتني بروحي



تشتكي له حالها
و قلبها يعتصر الالم
الحزن
و كل عضلات وجنتيها ترتجف بكاءا




تختنق
تنكسر




ويرفعها ...


فلان ؟ وين وصلنا؟


هذي السماا السابعه الي يقولون عنها؟؟

هو : لأ هذي الغيوم ....




لمته حيل بكل "ألم الاشتياق " الي نام معاها ...كل ليله بدونه ..
وهي تردد ببكاء .. وتهمس له .. سألت الغيوم باي الدروب القاك يوم؟


اخذها..

اجلسها على غيمه
بارده


هي : أح فلان اهني موت برد اشلون عايش؟


هو : انا مو اهني عايش ..انا مكاني بعيد .. بس التقيتج اهني!

هي : باستغراب .. التقينا هني ؟ اشلون ؟؟


هو : انتي بحياتي مثل الغيمه ..استغثت الرحمن ..


و اغاثني فيج ..




جلست بحظن الغيوم
وبحظنه


شكت له ايامها ..
حزنها
دموعها
ألمها ...
الفراق .. والدنيا





هي : فلان تحبني؟؟
تذكرني و انت بعيد هناك؟
اطري عليك ؟ اتشوفني ؟
والا الي عندك خلوك تنساني؟



هو: انا لو انسى عمري ما انساج ..


هي : تشوفني وانت فوق ؟ تسمعني اذا بكيتك ؟ اتحسني ؟
اتشوف حياتي بدونك؟

هو : احس في كل شي في كل شي .. بكل لحظه احس فيج ..

بس مو بيدي .. ناطر اتيني هناك.... قلت لج تعالي .. قلتاي ..ما اقدر ...امي و ابوي ما اقدر اخليهم ....





غيوم
و دنيا لا احد سواهم بها...
تقفل السماء ابوابها ليلا عليهم
دنيا من الاحلام ....لهم هم فقط ...يلتقون في سماء الدنيا
او اي سماء اخرى ..فهم لا يكترثون ...
همهم هو اللقيا



هي : اهني راحه .. عالمك راحه .. مافيه الا انا وانت ..عالمك مافيه الا "الحب"
هو : وانتي ...


هي : مرني مره فرح ...غير حياتي ... اخذني بعيد في كل مره اتحس ان الدنيا قفلت بابها في ويهي .....الدنيا يا فلان كارهتني ...مع اني ما سويت لها شي ابد...ولا شي بالدنيا ابيه راضيه تعطيني اياه...تخيل اني اشحت الفرح منها


..ولا ترضى تعطيني اياه





فلان ...



احبك...



و خايفه..







هو: ابشرج بس اول الايام تعب..بعدين تتعودين .. وترتاحين..






اشرايج اخذج لمكان فوق بالسما.. اوريج دنيا ماشفتيها ..وماراح تشوفينها الا معاي....مكان ماراح تعرفين الي فيه بس راح اعرفج عليهم...




وياخذها ..
الى دنياه
يرفعها بالسما
بين الغيوم
بين النجوم
تمسك لها نجمه


و تقوله



انت الشمس و كل شي يدور حوالينك...


يبوسها ويقولها القمر يدور حوالين الشمس ...



انا الشمس وانتي القمر..



هو يطير و هي تعلقت بكتفه حتى يرتفع بها ..

حبيتها منك .."اني قمر"


هو : آآآآآآآآآه قوليلي بس وين اروح من كلامج



انا




ما




اقدر





عليج





هي : وانا ما اقدر على قلبي الي يبيك..





هو: ترا خلاص الحين لازم تردين..

هي : اروح ؟ اهون عليك تخليني ؟


وتوديني بايدك ..قلت لك الدنيا متعبتني..

وخانتني ..

لا ترجعني ...

خلني معاك ..حتى لو كنا ..امواااا(ت)


تدري يوم بغت اتصالحني اشسوتلي.؟؟


اقول ؟
والا انت تدري؟

صح؟
فليش اقول





و رفعها على كتفه مره اخرى ووعدها بياخذها السما السابعه...

ولكن

نزل

فيها..

وحست هي بالهبوط

وقالت له






ادري
قاعد تردني تحت..

ادري خايف علي ...


وينزلها لفراشها ..
ينومها...بسريرها




و يروح ...

يأكدلها ..
لا تخافين ..بتم معاج
وبحبج ...


تتحسسه بفراشها
تدور ايده


تدوره


ماتلقاه
ماتدري اللي صار صج او حلم؟؟
بس تدري ..انه خذاها له
وخذاها ل(بــــــــعـــــــــــــــــــــــــــيد) حيل

يسعد صباحك ...ياحبيبي

يسعد صباحك .. يا حبيبي

حالي طيب

كل شي مثل اللي كان

المدامع .. والمواجع ..

والأمان اللي اختفى لحظة غيابك

والليالي اللي مضت

.. مثل الليالي اللي مضت

الهم عازف ..

والدمع نازف ..

والعمر في غيبتك حاير وخايف

حتى جراحك وسط قلبي مثل ماهي

وفي شفاهي باقيٍ نفس الكلام اللي بقى ..

آخر لقا

مثل منتَ يا حبيب الروح شايف

كل شي مثل اللي كان

وحالي طيب

يسعد صباحك .. يا حبيبي

هذا انت كل ما ضاقتبي الدنيا تغيب ...

وكل ما ضاقتبك الدنيا تجيني

هذا انت

ان كساك الهم صرت أوفى حبيب

وان نساك الهم تتباهى بـ أنيني

مثل منت .. دايم تجي فـ وقتك حبيبي

بعد ما وقتك يروح

يا آخر دموعي وشجوني

.. وأول إحساسي جروح

ما بقالي من عذابي يا حبيبي .. الا انت

وهذا انت يا حبيب الروح شايف ..

كل شي مثل اللي كان

وحالي طيب يسعد صباحك ..

يا حبيبي هذا ضي الصبح ..

او هو بعض نورك ؟!

هذا همس الورد ..

او دافي شعورك ؟!

منهو مثلك في غرورك ؟!

جيت متأكد بسامح .. راسم الطيبة ملامح

ماهو بدري !!

.. انت تدري ما قتلني غيابك اكثر من حضورك

ايه كان العمر داكن ..

ايه كان الهم ساكن ..وقتي بعدك

بس أنا يا ضيّ عمري ..

كنت عودت الأماكن تألف بعادك وصدك

ياللي ما يرضين ضعفك ..

ما ادري انثر فوق كتفك أغلى دمعي .. او أردك

يـــــــــــســــــعـــد صبـــــــــاحـك

واي بموت من الفشله !!

واي واي واي بموت من الفشله

تخيلااو مابحياتي كلها في حياتي الوظيفيه تهزأت

مثل التهزأ الي صارلي اليوم
بسسسسسسس قلعتي استاهل

اول مره بحياتي ريال يكلمني وانا منقص ويهي و ما اقدر ارفع حتى راسي
و من داخلي احس اكو نعال قاعده تطقني تقولي قلعتج قلعتج !!

ياني السكرتير ناداني قالي المدير يبيج
كالعاده احم احم رتبت عمري .. عدلت شكلي .. وبقلبي اقول ياحسرتي
جك جك جك جك جك -صوت الكعب الفتاك -

طقيت الباب
سطرت و قعدت و شاقه الابتسامه !!
المدير قال حق السكرتير سكر الباب !!

بغيييييييييييييييت اصيح
بغييييييييت اقوله اقول اقول والله اقول
والله اتووووووووووووب بس لا اطقني !

تخيلاو الموقف
المدير منفجر من الاعصاب وانا قباله بابتسامه شقاقيه
فاشلون اهو راح يبدا الموضوع !!
الزبده سفل في امن يابتني ساعتين على استخدام النت
ومطلع برنت في الدقايق و المواقع و متى و الساعه جم و اشلون و ما الووووووون

الله يااااااااااااااااااااا انا افتششششششششششلت
الله يا انا انقص ويهي

اول مره بحياتي كلها ايني شعور ان الريال الي جدامي بيفصخ العقال يكوفني !!
سممممممممممممممممعت كلام يفشل يفشل
و يقولي 3000 دقيقه بالشهر انترنت ! من صجج انتي !! شتسوين !
وشالمواقع !!
عايز عليج انترنت حطيلج ايجو ب 15 دينار اخذيه وياج وين ما تروحين !!
تخيلااااااااااااو يقولي حطاي ايجو

بغيت اقوله والله عندي ايجو ووطنيه و واي فاي في البيت و بي بي و اي فون !

بس مالي ويه اتحجاا !!
والمشكله انا وايد جد و سيريس في الشغل و عمره محد قالي شي

فمابالكم لما مدير و مو يقول و بس لألأ يفششششششششل
طبعا ما قدرت اقول حق المدير اني مسبله اليوزر نيم مالي و 4 اجهزه تستخدم يوزري غيري انا ..

يعني الكل يستخدم ماي يوزر .. على ابونا عادي و ابي في قسمي ان البنات و الشباب يتسلون فيه وقت الفراغ مافيها شي

!
بس ما هقيييييييييييييييت ان راح انجك او اذا انجكيت اصلا راح اسأل عن هالشي !
الله يا الفششششششششششله

اول مره بحياتي احس اني ابي احط روحي على الانفزبل !واختفي

المهم انا طول ما اهو يكلمني وانا ما اقدر ارفع عيني
طول الوقت
ان شاء الله
صح كلامك
اي فعلا
لا ما يصير
انا الغلطانه
معاك حق

وخزياه وخزياه من الريال شقول عني ميته على النت في الدوام
مشفوحه !!
مايدري ان مو بس انا الي استخدمه
المهم وعدته ان هالشي ما يتكرر و استأذنت

وان اذا سحب تقرير عن استخدام النت الشهر الياي ما راح يشوف شي من الي شافه

وذلفت مكتبي و انا مييييييييييييييييييييييييييييييييييييييييته فشله فيني بجوه
الطامه الكبرى ان 2 من الي يستخدمون اسمي.... شباب فهذولا اصلا انا مدري شنو يفتحون !! بس اهما جدامي ما يشوفون الا ايميلز و يوتيوب و منتدى انساب و قبائل و جذي بس
وباجي البنات انا اعرفهم و اظمنهم بس البلوه ان اهو منصعق في الدقايق !!
عباله كلهم انا
و لو شنو مستحيل اقوله والله انا مسؤله اؤؤمن في التطور و الاداره الحديثه و بلا بلا بلا
بلعت لساني و انطمييييييييييييييت و اعتذرت و طلعت !!!

اول مره احس في احساس امي لما تقولي ابوج معصب و يقول بنتج و بنتج وانا مفتشله ما عرفت شرد عليه !!

انا حسييييييييييت جذي !

لحظه اسجل التاريخ اليوم
انه في يوم 18-11-2009 تهزأت وقلعتي !
ومفتشله من هالمدير الي عباله منقوزه ساكنه في النت و 24 ساعه مخليه الشغل و مجابله الفيس بوك !

مالي ويهه اطالعه مدري شنو المواقع الي اهو شايفها ! وخزياه