Thursday, February 22, 2007

حب بطريقه ام كلثوم ..



ام كلثوم
هي الحب
هي الحزن
هي الفرح
لا تسعني كلماتي او معجم مصطلحاتي ان يعبر عنها
او ان يوفيها حقها
و لكن ما يخصني هو ذكرياتي معها
اغدا القاك
يا خوف فؤاد من غد
اسمع هذه الاغنيه في مصر
في طريقي للجامعه
من الزمالك لي الجيزه
و اذا بطلع بالليل اسمع امل حياتي
و اذا قعدت في البلكونه بالليل اسمع
انت عمري
ممزوجه باصوات القوارب الي في النيل
و اذا بأنس بجليس في قهوه نجيب محفوظ
اطلب اغنيه
انت فين و الحب فين
و لكن اين الاطلال من حياتي ؟؟
انا اعتقد ان اغنيه الاطلال
هي قصه حبي
هي قصه حياتي
هي ذكرياتي باختصار
الشي الغريب العجيب
صوته بعد سنين
ياتيني قبل الحاديه عشر بدقائق
يسألني عن اخباري
و حياتي
و اذ بها الاطلال تأتي بصوت
ام كلثوم
نطقت بكلمه واحده
انت بالذات يجمعني معاك القدر في احلى لحظات حياتي
و انا اسمع الاطلال ؟؟


انت و الاطلال

لانها قصتك

دائما اسمعها بدموع
و لكن بعد ما سمعتها معه
سمعتها بشموخ
عرفت الحين فعلا
انه مجرد ذكرى
و اني قويه
واني استطعت الان ان احب نفسي
فقط
و هو مجرد اطلال..

دمتي يا ام كلثوم بسموك
و رفعتك
و دمتي للحب
فمنك استطعت ان ارفع راسي مثلك
و امشي فوق الهوى بشموخ
متيقنه انه لا احد يموت من الحب
و ان الحب سلوى ألهو بها
و لكن لا تدميني
احبك يا ام كلثوم
فذكرياتي معك
انسى بك
غرامي
مواعيدي
خطاياي
عشقي
جنوني

فانا لا انسى يوما مشيت به على النيل الساعه الثالثه فجرا
ادندن.... حيرت قلبي معاك
و لا انسى عتمه ليل ممطر في فينسيا
مع اغنيه سيره الحب .
و لن انسى ليالي باريس و انا اغني معك ...هذه ليلتي
و لن ارقص يوم كما رقصت على ليله حب و الف ليله و ليله..
ولن انسى قصتي ابدا مع بعيد عنك حياتي عذاب..
اليك تحيه
و دعوه من القلب
يا ام كلثوم

Wednesday, February 21, 2007

يما حبيبتي ... لا تتعبين وياي مامني فود ابد !


انا و امي مزيج من تناقض عجيب غريب
محد يصدق او يستوعب اني بنتها
لا شكلا و لا مضمونا..
امي انسانه ما تحب الطرب ابدا
ثقيله لابعد الحدود حياتها جد و مثل و قيم
و انا عكسها تمام
و هذا واضح بشخصيتي
لما درست في مصر و يتني امي زارتني
دشت شقتي عبالها بتلاقي الكتب في كل مكان و اني مقطعه الدراسه
ادخلت الشقه و تفاجأت في الترتيب الدقيق ولا كأن هذي بنتها الفوضويه الي
اذا درست تفرش الكتب بكبر الغرفه
اسألتني : فطوم ما توقعت شقتج مرتبه والله سنعه
انا : اي لاني ما ادرس !!
امي وايد تتبع طريقه النصيحه وياي و ابدا ما تعتقد اني كبرت
فلما فتحت التلفزيون تفاجأت في دعايات لمسلسل سكس اند سيتي
على ايام عزه
رده فعل امي فظيعه
تصرخ من قمه راسها
استغفرالله استغفرالله استغفرالله
و تشيل السماعه و تطلع لها الابوريتر
امي : الووووووووووووو الابراتــــــــــــار حوليني بسرعه على الرسبشن
و يتم تحويل امي
امي: الوووووووو رسبشن الله يسامحكم بس هذي قنوات تحطونها حق مراهقات طالبات ....
و تدخل امي معاهم في تفاصيل قناه الشوتايم
و تنصعق امي لما الفتانه مالت الرسبشن قالت لها(( ان الست بطه هي الي عامله الاشتراك داا مش تبع الاوتيل يا افندم ))
و تعطيني امي موشششششششح من المثل و القيم و المبادئ و العين تزني و زناها النظرو النصايح الي مالها اول و اخر
امي : حسبي الله علييييييييييييييييييييييييييكم و نعم الوكيل اكو احد يدفع عشان اثام الاثام ابلاش و بعد تدفعييييييييين تشترين اثام ..
و خلصنا من مصر و ردينا الكويت بعد ما رديت
جددت اشتراكي سنه
ما وعيت الا امي مناديه اخوي الصغير
امي : بقوووووووش بقووووووش تعال شوف في عندنا قنوات مو زينه تعال امسحهم !!!
اصرخ انا من قمه راسي
طااااااااااااااااااااااااااااااع هذولا انا اشترك و هذولا يمسحوون
امي : لا لا انا و ابوج سوينا اجتماع و رفضنا وجود الشوتايم عندنا في البيت !!
انا : هاااااااااااااااااااو يما اخواني كل واحد عنده اشتراك في داره و انا لما حطيته في الصاله عندي الي محد يقعد فيها غيري قلتي ممنوع !!
امي : لا لاااااااااا عندنا مراهقين !!
يما منووووووووووووووووو مراهق !!
امي : انتي !!!!
كان وقتها عمري 24 و تقول عني مراهقه
المهم يوم الخميس الي فات امي كانت وايد تعبانه
و لما ردينا من المستشفى الفير ما قدرت اخليها تنام في دارها خذيتها داري
و الا التلفزيون مفتوح و الطامه الكبرى (( دعايه جريز اند انمي ))
(( لاحظو انها تعبانه حدها و مغمضه عينها و انا مسندتها و ما تعبر تمشي )) امي: فطييييييييييييييييم الي فيني هذا مووووووووت انا بموووووووووت حدي تعبانه
سكككككككككري هالمسخره حطيلييييييييييي المجد حطيلي قراااااااااان الملائكه ما ادش داررررررررررج و انا بموووووت بس الملائكه ما يدشون من هالمنكر !!!
ياااااااااااااااااا ربي
!!
انا : ما اعرف رقم قناه المجد لحظه ادور ساعتين ادور لقيت الفجر
انا بس قلت ما اعرف رقم قناه المجد استهلت امي في المواعض
ياربي مو جريمه اذا ما اواطن قناه المجد ينرفزوني داثرين مو غصب و امي 24 ساعه مشغلتها يعني غصبن عليها متابعينهاااااا
المهم الي اثار الموضوع
ان امي امس رايحه درس محمد العريفي و متكلم عن الامر في المعروف و النهي عن المنكر و اسم عليها امي حبيبه قلبي من امس و اهي متغير اسلوب الامر عندها ..
لما شافتني الصبح لابسه تنوره قالتلي ان الشيخ يقول شجعو بناتكم و قامت تقولي درس امس للمرا العاشره ..بس ضحكت وايد على سالفه ان امي تقولي يزاج الله خير بارك الله فيج !!
مستغرررررررررررررربه انا مو مصدقه
بصراحه ما استوعبت نطرت شوي
قلت جود احصل زفه
اسلووووووب الوعض هذا يديد علي ..
انا متعوده امي تزفني الصبح كل يوم على البخور
و على القهوه الي مو مفيده للصحه و دوامي المتأخر
بسسسسسسسسسسسس يزاج الله خير
و حببيه قلبي
و بارك الله فيج
ما اعرررررررررررررررررررررررف
مو نوعي
و دايما استغرب لما امي تسألني سؤال انا ماني عارفتله اجابه
انتي متى راح تتغيرين؟
دايما اطفرها و اقولها قصدج اتغير للاسوأ ؟؟ انا مستعده بس ناطره الفرصه
ههههههههههههههههههههه
عندي موهبه بس ناطره الي يصغلها !!
تناقض عجيب غريب
في كل شي غير
محد مصدق هذي امي
و رده فعل رفيجاتي اول مرا يشوفون امي
ان يقولون لي فطومه امج وايد كلاس !!! انت غيررر
و رده فعل رفيجات امي اول ما يشوفوني
(( انتي وايد احلى من بنتج ))
عمممممممى بعينكم
اقول بقلبي
بس ابقى انا وتبقى اهي حببيه قلبي
لكن انا غير

Monday, February 19, 2007

و عندك واحد شيشه و صلحو



حبيبه قلبي

مووووووووودي ظارب عليج هاليومين

ليش ما عندنا مكان سنع في الكويت او قهوه سنعه

انشيش فيها؟؟

ليش مافي مقاهي نسائيه

ليش من يقولون لي عن قهوه

اروح اشوفها

اقولهم

نوووووو نوووووو

تأبى المروووووءه

الى اصحاب رؤس الاموال الضخمه

فتحولنا قهوه

و سموها شيشه ستاااايل

بس بشرط

للنساء فقط

فيها شيشه و تيفي و ميوسك

و يا سلام

هذا ويهي اذا رديت البيت

Thursday, February 15, 2007

اختفاء بلا نيله المفاجئ!!

وين بلا نيله ؟؟؟؟
وين راحت ؟؟
صارلي يومين ما دشيت البلوجز
اليوم دشيت
انصدمت
ما لقيتها !!
وييييييينج نيييييييله ؟؟

Saturday, February 10, 2007

it`s Valentine Party Time


الاخوه و الصداقه مو بس في الحجي
لا طبعا !!الاخوه و الصداقه فعل..لذاااااا اخواني و خواتي السينجل
الي متأزمين نفسيا على الفالنتاين
مو عشااااااان ان فالنتاين لاااااااا طل
اصلا بدعه بس متأزمين نفسيا و يعانون من انفجرار المراره الحاد
لانهم سيييييينجل و بلا مأوى عفوا بلا حب و بلا بطيييييييخ
لذا تكرمت انا بمنحتي الساميه اني استظيييييييفكم عندي
مدري ليش كتبت اخواني و خواتي و انا ما راح استقبل الا بنات
((بحركم ))
اتشرف بدعوتكم لحضور حفلتي الخاصه المقامه في بيت وحده من رفيجاتي
(( الي ما تدري اني بسوي حفله في بيتها ))
و راح اخذ في نفسي اولا و فيكم اجر
ان اسوي حفله ديجي عشاااان نكون جدا لاهين في هاليوم
و ما نفكر في شي ثاني
برنامج الحفله
شغال الديجي من الساعه 6
تبون لبس تنكري كيفكم
بس انا اصلا شكلي هوله و متنكره خلقه
فماراح اهول بعمري اكثر
رقص و مسابقه عرض ازياء
و امتن وحده الي بتفوز في المسابقه(( عشان انا اشتري الهديه و اخذها ))
كيفي دافعه فلوسها و تروح علي !!
الساعه 11 تخلص الحفله
مينيو الحفله

معدس(( طباخ بيت رفيجتي))

شاي فحم انا الي اسويه

حب و فستق و قروضات (( هم شغل بيت رفيجتي))

كل وحده اتييب طبق وياها

انا علي احط السماط اصف الصحون

الي بتييب حلواتقولي ما نبي عشر بنات يايبيييين نفس الكيكه من الاوبرا و الخباز

و دمتم سالمين و كل عام و انتو بخير

و كل سنه و احنااااا سينجل
(( عسى الله لا يقوله ))
ملاحظه: يستحسن لبس دراعه لان المعدس راح يبط السحاب و زراير الجينز

Wednesday, February 07, 2007

ليش يا فطيم ليش !!

وااااااااي يالله صباح خير...
اليوم قمت من النوم متأخره
حدي تعسرت بسرعه بسرعه ابدل
مدري اشلون اغسل ويهي...
توني اطالع ويهي في المنظره
و الا ششووووووووووووف
حديقه الزهور !!
مخدتي موديلها كلها دانتيل و ورد ووشغل تطريز يدوي
بس اقلبها و انام على الويه الساده !!
الظاهر و انا في عز نومتي مندمجه و قالبه المخده
و نايمه على التطريز
فتعالوووووو شوفو خدودي
ويهييييييي عنيف عنيف!!!!
خرايط في ويهي
التطريز مطبع
صايره بونجااا بونجا مالوت افريقيا
حطيت فاونديشن
هم ماكو فايده شخووط حمرااااا!!
لبست اكبر نظاره بالدنيا !!
عرفتوها مالت سعاد عبدالله في درس خصوصي
ابي اخش عمري
شكلي ظيم
توني داشه المكتب الا يشكل علي المدير !!
موووووووووووووو وقتك من الصبح
شكلي يفششششششل
خشيت عمري خششششش
و اكلمه على كتر
لحظه بس خنشوووووف عمري بالمنظره لي الحين !!
لا ابشركم خفت !!!
بس شي شي
الله لا يحرجم
صج افششششششل اانا

Monday, February 05, 2007

نـــــــــــــســــــــاي

صارلي اربع او خمس ايام و انا بس ادندن هذي الابيات
لفايق عبدالجليل...
يا ناس احب هالقصيده وايد
و الاروع ان ديوانه مستحيل ينشال من الكومدين
كل يوم لي معاه بيت يديد
اعيش فيه
احلم عليه
اصحى من نومي اردد الابيات
لكن هالايام ماني قادره اتوقف عن ترديد
هالقصيده
اخليكم معاهم تاخذكم بعيد عن بلوجي
نســـــــــــاي

نساي ...
و انت الهوى
بالنسبه لي و الماي
اسمع أنا صوتك
و لا تسمع نداي
اشهق أنا باسمك
و اشتاق له.. و انت معاي
اكتب على سمعي أغاني
اكتب و اغنيك ..
حيرتني
و احترت أنا فيك
تزعل بلا أسباب
و تعاند.. و أراضيك
بكل حالاتك أبيك
بكل زلاتك أبيك
حبـيـبـي انت
و الا العذاب انت
و الا الفرح انت
مدري وش أسميك
نساي
تغيب و الدنيا معاك تغيب
تقطع خيوط الشمس عني
و يصبح العالم كئيب
و أصبحت أنا لوحدي على
أرضك غريب
ما تكتفي من غربتي
ما تكتفي من حيرتي
الله كم انت عجيب .
. الصمت دايم لعبتك
الصمت احيان رهيب

Saturday, February 03, 2007

رساله الى زوجي العزيز


زوجي العزيز
حياتي زوجي ..
انا ادري انك تحبني
و ادري انك تموت علي
و ادري انك تحب بيتنا و تحافظ عليه كثر ما تقدر
ادري انك تسعى عشان تشتريلي بيت احلامي
و ادري اني وايد غاليه عندك فوق ما انا اتصور
عشان جذي يا زوجي العزيز
انا اعطيك تصريح بانك تخوني
كل اربع شهور مرا
مره وحده بس
ادري الحياه متعبه
و البنات طحيحه
و ادري بعد اغراءات الدنيا
و التلفزيون
و الي انت تشوفه غصبن عنك يخليك تبي
تجدد الجسم فقط
و ليس الروح
انا ادري تموت علي
بس انا قلت عشان تركز معاي و تعطيني من وقتك لي و لعيالي
فوقرت عليك
انك تتعب و تخون و تدور و تخش
لان يبين عليك يا زوجي
فاقتراحي كل ما تميت يا بعلي العزيز
تنام ويا وحده يوم كال تقضي ويها
تجدد
و ترجعلي مركز اربع شهور
و هكذا
اما حياتك كلها
مسنجر
و تظبط بنات
تلفون
سفره دبي
و تالي
هوشه و زعل
كلش مالي خلق
وفر وقت التعارف و رضاع التلفون لي
انا من الحين اقولك
لك سفره
و لك نومه
بس باجي الوقت خلك وياي
احسن من انك ضايع مني طول السنه

زوجي العزيز
احبك
مع تحيات
زوجك المخلصه
الي لايعه جبدها من شتات تفكيرك
و مصرف موبايلاتك
ملاحظه :
هذي الرساله
من زوجه
قاعده تضحك ويا ريلها
مو تاخذونها على انه لوير
تدعو الى الفسق
و الحرام
خذوها من وجهه نظر اجتماعيه فكاهيه

صباحكم ورد
ادري يوم السبت
جدا تعيس
و ادري محد له خلق شي
بس حبيت اليوم اغير لكم الجو و المود
و اهديكم من الصبح هالاغنيه
و هالورد
صباحكم جووري
ممكن سؤال بسيط اذا ما عليكم كلافه
شتفكرون فيه الصبح في السياره و انتوا رايحين دوامتكم ؟
لكم اهداء مني بسيط

Thursday, February 01, 2007

حسن النيه ..


حسن النيه
حسن الظن بالله
التوكل على الله
صفاء القلب ..
كل هالمصطلحات هذي دايما امشي و ارددها ليل و نهار
دايما اقعد بيني و بين نفسي كل يوم اذا مو باليوم اكثر من مرا و احاسب نفسي
والله صدقوني مو قاعده اتكلم في نفسي
بس قاعده اقولكم شي عشان تفهمون معني بوستي هذا
احاسب نفسي و اعاقبها مرات
احب الناس تحبني و هذا شي وايد ضروري عندي
احب الحب
اعشق الحب و محبه الناس
احب الخير
متعتي اشوف انسان عنده نعمه سعيد فيها
صج اتحلى عليه
دايما اقول حق عمري و خصوصا و انا اتمشى بالسياره
قطي حمولج على الله
انتي بالارض في ربج فوقج مدبر
لا تشيلين هم بالدنيا يزيدج ربي هموم
همج الاخره و رضا ربج
عشان الله يفتحها عليج
انا كلش مو مثاليه
و لا يمكن اكون زينه
بس صدقوني من اروع العبارات الي في حياتي
و اثمنها
ان ايني كلمه تقدير من شخص
عندي ربع
و هم شباب مو بس بنات
يقولي فاطمه و رب الكعبه انتي خليتيني احترم شنو مرا
انا طايش
لعوبي
ما افكر غير في استغلال المرا
انتي غيرتي نظرتي
انتي بسببج انا تزوجت
لما ايني اكثر من ريال يقولي جذي
هذي مو نعمه ؟؟
لما اتييني رفيجتي تبجي
و تقولي حلي مشكلتني
بكلمه بسيطه
و ضحكه و ابتسامه مني
تريحها
و تخليها ترد بيتها سعيده
و تسعد زوجها
هذي مو نعمه؟؟
الي ابي اوصله من هالكلام
قطو حمولكم على الله
و توكلو على
بوستي
الي طاف
كتبت
احبك بو براهيم
والله العظيم ما تتصورون و لا تصدقون
عدد الايميلات الي يااتني
تسألني منو بو براهيم
و شنو براهيم
و كأنه حرام علي الحب
من هو بوبراهيم ..؟؟
لما احترم شخص و اقدره
و اتمناه اب لابنائي
يكون هو بوبراهيم
نسبه لان انا ينادوني في البيت ام ابراهيم
لما قالتلي الاخت كويتيه شنو الحب و عرفته
بقاموسي البسيط الخاص
ماكان لشخص معين بالذات
كان الحب عموما..
عجبني ايميل ياني من واحد
يقولي لوير لي متى بتحبين ؟؟
قلت له اخووي
بظل احب و احب
على عدد الطقات الي اتيني بالدنيا
انا احب الحب نفسه
اما اذا الطرف الثاني
ما قدرني
هذا شي راجع له
معناتها اموت؟
لاني احب الناس
واحب الحب اكثر
احب ارسم بسمه حلوه صادقه
على شفاه كل من يقرالي
مو معناتها اذا كتبت عن الحب
انا غايصه في العسل ..

الله العالم وحده باللي فيني
لكن توصل في الناس تتبع اخبار الناس و تقيسها بالمسطره
شي متعب صح؟؟

الي خلاني استغرب في ايميل
طويل عريض
نهايته واحد يقولي
بصراحه احسد بو براهيم !!!
احسده
قلت له يا اخوي
تمناله الخير
انت ما تدري بو براهيم شنو مسوي في دنيته الي الله
رزقه وحده تحبه
ثاني شي
من قالك انا زينه و برفكت
يمكن انا اقوله كلام حلو في البوست
بس انا مأذيته في الصج؟؟
و يمكن العكس صحيح

دعوه اخيره صادقه من القلب
الله يحفظكم
و يزيدكم محبه
و يرزقكم
تمنوا الخير للناس
حبوا
صفو النيه
توكلو على الله
خافوا الله في انفسكم
صدقوني
ربي يفتحها عليكم