Tuesday, October 30, 2007

شعور

ادمان
حايشتني حاله ادمان غير طبيعيه حق موقع ويكيبديا للبحث !

و من يوم اليمعه و انا بس مجابله مايكل انجلو من شفت برنامج عنه
في دبي
فجأة قاعد اعشق هذا الفنان
و اسوي سيرج و مجابلته من يوم اليمعه
و هذي حالتي كل يوم اطلعلي شي و احوس ادور عليه في ويكيبديا
ادمان !!
حب
ياربي حابه كتاب the secret
بطريقه غير طبيعيه !!
و احس مو بس قاعد يغير في حياتي
كل شي فيتي قاعد يتغير
قمت من يصير شي اقوووول اي انا اتراااكت هالشي
رفيجتي انصحتني في كتاب
law of attracion
لي الحين ما وصل
الي يحب من طقه هالكتب ممكن يفيدنا؟
شعور
يايني شعور ابي اهاجر
مليت
صج صج صج ابي اهاجر

Saturday, October 27, 2007

لما يصرخ الزوج و يقول انتي باردة !!!!


قمه الاحباط شعووور عدم التقدير
سوااااء من الرجل او المرأه
سواااااء من الزوج او الزوجه


اليوم بتطرق لموضوع محزن شوي بالنسبه لي
و مأساوي وايد بالنسبه لرفيجاتي المتزوجات الي كل وحده فيهم عايشه القصه او الحدث
مشاهد راح انقلها لكم
من واقع بيوت كويتيه
شابه تعتبر في اول عشر سنين من الزواج
و من المؤسف ان هذي المشاهد لبنات تتراوح اعمارهم مابين ال 25-35
يعني في عز شبابهم
في عز الروح الحلوه
و المفروض تكون حياتهم الجنسيه
ممتازه
المشكله الي راح اتكلم عنها اليوم

لما ايييييييييج زوجج و يعطيييج طراق
بس مو في ايده لألأ
لما يقووووووولج انتي باردة!!

و اهو اكثر انساااااان بالدنيا شاف حراره مشاعرج
ماراح اطول خلكم ويا المشاهد

المشهد الاول

حصه متزوجه من 6 سنوات
عندها بنت وولد
لان الفتره الي فاتت كانت رمضان
و لويه رمضان فحياتها الجنسيه مع زوجها
مجرد تأديه واجب
شغل سريع سريع
لحق او ما تلحق
رمضان ولويه و ايام تراويح و بعدها ماكو سهر
و ايام العشر الاواخر
فماذكر حتى اشكثر نمت ويا رلي المهم ما اطول عليكم
بنتي الصغيره في ثاني يوم العيد طاحت علينا
فلو طيحه قشره
اتضح انه فايرس
نقلناها الاميري على طول
لويتي لوووووويه
مابين بنتي و المستشفى
وانام عندها عندها هناك
اتيييييي امي الظهر
ارجع البيت اقط راسي انام هلكانه
اسبوع على هالحال
في قمه نفسيتي التعبانه و في قمه لويتي على بنتي
والله ماعندي وقت اتذكر متى اكلت اصلا !
طلعت بنتي بالسلامه
اول يوم احتاج انام فيه مرتاحه
اول حوار يفتحه زوجي !!
حصه: انتي صايره باااااااارده
انا ما اذكر متى اخر مرا نمت وياج
الدنيا دارت فيني
انا توني طالعه من المشتسفى
من وين لي موووووووووود اصلا !!
انا مصدومه
ماقدرت ارد عليه
لاني من التعب والله حسيت يا اذبحه يا ارتكب فيه جريمه
لان اللي اعرفه و اظن ان الياهل المقطووووطه في الدار الثانيه بنتك!!!
ماهمني الظروف
ماهمني اهو صح او غلط
همني طرااااااااااااااااااق
و جرح كلمه انتي بارده !!
لاني لهيت عنك فتره
او ما عطيتك حقك في الفتره الاخيره
قررت قراااااااار اني بارده!!
كانت فيني صرخه
حسيت لو تطلع ارحم اروح بيت اهلي و لا اناقش
كلمه اخيره لاي ريال
قبل لا تقول حق مرتك انتي بارده عشان تاخذ منها شي
او اتأنبها لتقصيرها
تأكد انها يا تنتقم يااااااااا تثبت حرارتها مع غيرك
او اذا تبي تضمن عطائها
حفزها و لا تدقرها
لان الدقرات
تشيل الرغبه فيك انت تماما
ما تشيل الرغبه في احد ثاني

المشهد الثاني
هاي
انا لولو
انا احس ان مشكلتي اتحر و تقهر اكثر من حصه
لان حصه عندها عذر ان بنتهاااااا مريضه
انا الي يحر في الموضوع
ان نفسيتي داااااااااااون داااااون
نتيجه ان ريلي عنده ازمه و مشكله
و يمر بظروووووووف جدا صعبه
فهو محبط طووووول اليوم و جدا تعبان
مشاااااااااكل في الشغل
و ازمه ماديه غير طبيعيه
الي واقفين ناطرين يصير الشي او ما يصير او راح ننهار كلنا كأسره
المهم ما اطول عليكم
ازمه زوجي صارلها 3 شهووور
ادت الى تعب زوجي نفسيا و جسديا
و انا هلكااااااااااانه
لاني اشوووووووف زوجي ينهار جدامي
شوي شوي
حيااااتي كلها مسخره
للتخفيف عليه
اني اوقف وياااااااه
اني اقووووويه
اصلا اصلا
انا حالتي النفسيه دماااااااااار
لان اهو كل شي عندي و بالنسبه لي
فمجرد اشوفه جذي
انا اتعب
مراعيه مشااااعره في كل شي
حتى ابسط الاشياء ما اسويها
اخاف يحس اني مو قاعده اراعي مشاعره
مرات حتى الميك اب و التكشخ ما اسوي شي جدامه اخاف يقولي انا في هالظرف و انتي جذي
وووووووووووووووالله ما اتلبس جدامه اخاااااااااف يقول اني مشتهيه و انا موجذي
و اخاف يقولي مو وقتج
انصدم في انه يقوووووووووولي بين السوالف
زوجي : انتي قاعده تعطيني مبرر اخونج
طبعا اهوووووو يقطها على غشمره
بس ريلي اذا بحاورني جد !!
و بقوووول اشياء كبيره ما يبيها تنحسب عليه
يقووووووووولها على غشمره
عشااااااان يقولي انتي ما تفهمين غشمره يبا اتغشمر انا !!
او بعدين يقولي انتي صج تحبين النكد
انا قاعده اتغشمر !!
المهم
نرجع لجرحه لي في كلمه
انتي تعطيني مبرر اني اخووووووووووووونج
حزتها بغيت اقلب عليه الدنيا
لو ما اني احترمت البيت الي انا فيه ووجود اهله
بغيييييييييييييت اقوله
انا الي فيني كله منك
هلكتني منك
فقدت طعم كل شي حلو منك
بسببك
لاني عاااايشه ظرفك
و تقوووووووووووولي جذي
هذي اخرتهااااااا
يااااااا اخي حس باللي فيني
بس شقووووووله
بذمتكم شقووووله
للاسف عقب كل الي اسويه و يصير فيني
يعطيه مبرر لخيانتي

انتهت مشاهد الي عرضتها لكم
كنت بعرض مشاهد اكثر بس السالفه راح تطول
كل واحد فيكم يحط المشهد الي اهووو يعيشه
فعلا مشكله
لما تجرح المرأه بكلمه انتي باردة !!
لما المرأه ما تلاقي اي رعايه من الرجل
و كل الي تلاقيه قمه التدقر
و بعدها يقولها انتي باردة
و انا اقوووول
فاقد الشي لا يعطيه
المشكله قبل امهاتنا مضحيات
يعني اذا شافت شي من الرجل تصبر
احنا جيييييييل ما نصبر ترا
انتوا تحملوا ثمن اغلاطكم ويانا
و النصيحه الثانيه للبنات
لازم تفهمين تفكير الرجل عدل
كل مازادت مشاكله
زادت رغبته الجنسيه
عكسنا احنا تماما
في اي مشكله يختفي الدزاير

Wednesday, October 24, 2007

يومياتي بدون لاب توب (1)الله يستر


يومياتي بدون لابتوب
سلسله احداث من واقع مزري لي
راح انقلها لكم يوم بيوم
السالفه ادري بتقولون اشدعوه فطيم
ليش مكبره الموضوع
انا في السفر استغنى عن الاب توب
بس تعودت عليه في حياتي
في بيتنا
ضيقه خلق من غيره
ماعندي احد اسولف وياه في البيت كلش
ولا احب اشوف التيفي
لان التيفي بالنسبه لي حس و بس
يعني كل شي يشتغل بس عشان الصوت
لكن الاب توب و البلوج و الشغل و الموقع
والمسنجر غير
حياااااااات كامله بروحهم !!
ما استغى عنهم اصلا
رديت امس الظهر البيت
لان نفسيتي تعبانه من غير لاب توبي
فتحولت من لوير
الي المعزبه النسره
الي حطت حرتها في الخدم !!!

دشيت البيت
زفيت الهنديه ليش مو مجهزه الطاوله
الطاوله مجهزه كانت بس ليش ماطلعت الروب من الثلاجه !!
تغديت
و خلصت و صليت
رحت المخزن
قعدت الصبي و الخدامه من النوم
شكوووووووو بتنامون الساعه 4 العصر يالله قوموا
تعالووووو طلعوا المخرن !!
ليش طوووووف الدري مو نظيفه؟؟
ادق على الطباخ
اتهاوش وياه
انا : انت الحييييييييييييين ماعندك الا الغدا تسويه !!
من الساعه 1 الظهر حطيته في الفرن و ذلفت وييييييينك
تعال غسسسسسل طوف الدري !!!!
ياااااا الطباخ وياب السلم
و غسسسسسسل الدري و الديكوووور
من فوق لين تحت !!
رديييييييت حق الي بالمخزن اشوفهم شسوون !!؟؟
و الا اطلع الكنااااااابل الشتويه كلهم
يالله رووووووحوا غسلوهم
الصبي يتحلطم : البلانكت مدااااااام ودييييه لوندري !!
المعزبه النسره : يالله يالله يلاااااااا قم بس قم مالت عليك لوندري ليش؟؟
يغسلوووووووووونهم بمكايل وصخه!!!
يالله جيييييييب شااااااامبو و غسسسسسل هذا كلا كمبل شامبو!!!!
و ارد على الطباخ الي حولت وظيفته الى صبي
هاااااا خلصت الطوف
يالله نظظظظظف ليتاااااات الدري كلهم!!
و غير ليتاااااااااات الصاله
اخذ جيس اليتااات و دور على البيت كله
اي ليييييييييت محترق بدله!!!
و اثناء ما اهووو يشتغل انا اتحلطم عليه: انت ليششششششش
ماكو سويييييي عشاااااااا ليششششششش ماكو سوي معجبنااات
بيتزاااااااا زعتر !!
بدال ما تقعد بالكراسي بس تهذر رووووووح سو عشااا اذا خلصت
على ما خلصوووو عجلتهم صارت الساعه 6 ونص
رحت سويت شاي و قهوه!!
يتني رفيجتي سوينا مشوار بو نص ساعه و ردييييييت
و قلت حق الطباخ يسوي عشاااا
دشيت المطبخ
و الا سله الفاكهه اشكبرها !!
جاااااااان ازززززفه
انت ليشششششش مكود الفاكهه جذي
ليششششششش ما يسوي فروووووووت سالاااااط
هذا كلااا سوي فروت سلاط زييييين
اكو معلوم و اطلع
هذا غير حنتي على اخوي
تعشيت
درست
اكل بندول
نام مبجر
والساعه 8 انا بالفراش!!
الساعه 9 نمت
الساعه 11 ونص قمت شبعانه نوم
جان ابجي!!
دزيت مسج حق رفيجتي
كلمت رفيجتي
وتوني اتذكر هههههههههه
بجيت عليها
و حنيت على قلبها
اخر شي
قلت لها : اناااااااا ليشششش ماعندي رفيييييج
شالحاااااله
ليششششششششششش ما عندي زحير شي
اقزززززززززر فيه سواااالف
((صج مصلحجيه ))
وابجي انا لونلي
انا برووووووووحي
ضيييقه خلق
ماعندي احد اسوووولف وياه
عندي رفيجات بس اخاف ادق عليهم هالحزه يخترعون
مو متعوده على التلفونات كلش
رفيجتي ميته ضحك و تقولي تعوذي من بليس
استغفري ربج !!
قومي صلي
قلت لها صلييييييييت العشاااااا
و السنه
و الشفع و الوتر
و القياااااااااااام
و قريت قراااااااااااااااان
كل شي سوييييييييت
ماكو شي
و بدا مفعووووول حبه المنوم
الساعه 1 الا نمت
فكه !!
على ما يووووووصل لاب تووووبي
الا انا بموت
اخوي بعد قلبي
قالي اخذي لاب توبي
11 بوووووصه
ما اشوووووف
عسرني
حذفته
و انا اكتب البوست اضحك على رفيجتي تقولي امس
و لج خلق تتعرفين على واحد و تعالي تميليقي اول الايام
و حنه و رنه
و هواااش و اخر شي بريك اب !!
جان اقولها : نعاااااال نعاااااال اصنه بالنعال ما وراي الا نعااااال
هههههههههههههههههه
محد طقج على ايدج !!
بتعرف و بكفخ الاداووووووووم
هههههههههههه
ينيت صح؟؟

Tuesday, October 23, 2007

My Motherboard, My Self



فجاه قبل امس بالليل يطفي على الاب توب
قلت اشفيييييه قام يخورا
سكرته و نمت
رديت امس من الدوام
اول شي اسويه افتح لاب توبي
احاول فيه
مني مناك
ماكو فايده !!!
يطلع اصوات بالبدايه !! الجهاز يشتغل اسمعه يطحن
بس ماكو شاشه
قلت ليكون صارت !!
و احترقت السكرين
بسرعه بسرعه لبست وحالتي حاله
وين ارووووووح بالهظهاي
بروحي مريضه و مافيني حيل
اركض لي الورشه
يا الايوااااااااد لحقو علي
شوفو شنو علته
حاولو فيه
قالو نفحصه و ندق عليج باجر!!
بااااااااجر شصبرني لي باجر !!
المهم اول شي سويته الصبح
دقيت عليهم
الو ها اشصااااار سويتوه اي اخذه !!؟؟
يرد علي الريال : الماذر بورد ظاربه !!!!
ماااااااااااااااااااااذر بورد !!
و انتي انتهت كفاله جهازج من سبوعين
فالتصليج عليج
المااااااااااااذر بوووووووورد عاد
يوم انك بتخترررررررررب
فايروس
شي
مني منااااااك
ظارب الماذر بورد كله مره وحده !!
طبعا الله لا يوريكم الحياه الكسيفه الي بعيشها بدون لاب توبي
ما اقدر
ما اعرف !!
لازم اكوووووووو حياه يمي
امس نمت الساعه 9 باليلل من ضيقه الخلق
شصبرني الحين
طبعا من غير تفكير
اليوم بروح اشتري لاب توب يديد
او اطلب يديد
اوكييييييييييه انا اطلب ما عندي مشكله بس
شصبرني اسبووووووووع!!
على ما يوصل
ببجي
و القراده ما احب استخدم لاب توب احد
و لا احب استخدم شغل اخواني
وااااااااااااي
موديلي بروح احن على اخوي الصغير يعطيني لاب توبه الي ما اعرفله
و يوووووووووووقف على راسي
خلصتي
خلصتي
لاااااااااااااااا
ما ابي
ببجي
الماااااااااااذر بوووووورد يا الظالم
ماذر بووووورد
ليشششششششششششش


Saturday, October 20, 2007

تغيير جو




واي كل شي اقبل فييييييييييه
الا اني ارد احلم في الامتحانات !!

وزائرتي كأن بها حياء ............ فليس تزور إلا في الظلام فرشت لها المطارف والحشايا .......... فعافتها ونامت في عظامي يضيق الجلد.. عن نفسي وعنها ....... فتوسعه بأنواع السقام

أول شي حمدلله على سلامتي
لوصولي ارض البلاد محمله بفلونزا و نزله برد عجيبه

اخر يوم لي السفر خذيت برد
و في الطياره الله لا يوريكم اشسويت في رفيجتي
ههههههههههه
بدعت فيها
نايمه و رافعه راسي لي فوق و متغطيه في الكمبل من فوق لي تحت
و اشاخر
لألأ مو اشاخر
عرفتو القحصه
خخخخخخخخخخ
رفيجتي انقزت ادور منو هذي
من وين هالصوت
الطياره فيها شي
و الا انا اقحص في وصله شخير ثانيه
خخخخخخخخخخخخخااااااااااااااااااخ

فجيت ويهي


و ارد انام
هههههههههههههه

بعدين اقوم مرا ثانيه اخمط زندنها و انااااااام
يننتها
تحملتني و لوعت جبدها
اخر شي قالتلي قومي شوفي فيلم !
هههههههههههههه
و من رديت من الطياره لي الفراش صارلي الحين 24 ساعه بفراشي
حدي تعبانه
كلا نوم و احلام سخيفه و كوابيس
لكن اني احلم في الامتحانات
هذاااااااا شي سخيف جدا

مشكورين وايد على السؤال
و عيدكم مبارك
سامحوني ما قدرت ارد عليكم و لا ابارك لكم في العيد لاني سافرت اخر رمضان
وجني عنز بدو طاح في مريس
24 ساعه سوق سوق
ورمت ريول رفيجتي مسكيينه

عادي ادق عليها
فلانه وينج
ترد علي انا بالدار
ههههههههههههههه
يابعد قلبي قلبج

و كل ما عصبت على
قالتلي انا مو يايييييه هني اضعف
يايه ارتاح
انشاء الله بس اقوم من هالفلو الي هالكتني
اقولكم تفاصيل روحتي

لكن اذا ما رديت هاليومين
عرفوا امي ذبحتني
انا منخشششششه عنها
عشان ما تسألني اشكثر صرفت و فسفست
على بالي برد الاقيها مسافره!!
حاليا
انا بروووووووووووك لوير
هههههههههههههههه


Wednesday, October 10, 2007

IMMonitor MSN Spy 2.0




شوفو انا بعلمكم

هههههههههههههه بس مو تسونها فيني يا ويلكم !!


الله يسلمكم

في برنامج يديد ناااااااازل اسمه


مسنجر سبااااااي


هذا تقدرون تتجسسوووووون فيه على الي تسولفون وياهم في المسنجرتعرفون فيه اهم من يكلمون و جم واحد يكلمونه و شقولون بالضبط


يعني اذا انتي تسولفين ويا ريلج في المسنجر تقدرين تشوفين ريلج من قاعد يحاجي من غير ما تلبحين على قلبه

من قاعد تكلم


من عندك اون لاين


متى بترد البيت


هذا البرنامج يغنيج


لانج بتعرفين ريلج في الدوانيه

شاااااااااااات ويا منو


لوووووووووووول

كرهتوني يا الرياييل


من خلال هذا البرنامج يقدر الواحد يتجسس على ربعه

في حدود 7 شاتز بس


القراده

انا ما اششششششششتغل عندي


ترا حاولت اششششششششغله وياك


مصيييييييييييييييبه

ما اشتغل


و ما بغيت ادق في رفيجتي تعلمني

لانها زافتني ما اسسسسسستخدمه


ترا والله ما اسسسسسسستخدمه

بسسسسسس بعلمكم عليه


برناااامج اسمه

مسنجر سباي


و يالله توكلووووووووا على الله


تذابحوووووووا ويا رياييلكم


للعلم بس

لا تنسوووووون المثل الي يقول


من تدخل في مالا يعنيه وجد مالايرضيه


عاد انا عقب ما ساعه حاولت و لا رضا يششششتغل


جان اقول ويييي انا شكوووووو اشعلي منه

افججج على عمري بيباااااااان مسدده



طبعا للمتزوجين

راح يلاقون رياييلهم من وراهم يسموووون حريمهم الذيبه


عادي خلوا روحكم رياضيه


و هذا لينك البرناااامج استااااااااانسو



اتقدم بالاعتذار لصديقتي


سامحيني ما اعبر اخش شي



ربعي في المسنجر

من الحين بقولكم كلكم بلووووووووووووووك

عشان محد يتجسس علي


ماكو خوف الحين رمضان


لكن عقب رمضان ما اظمن نفسي

احششششششش في وحده و الا شي مني منااااااااك


هههههههههههههههههه


Monday, October 08, 2007

المغفور له الشيخ سالم صباح السالم الصباح

بقلوب مؤمنة بقضاء الله و قدره
نتقدم .. بخالص العزاء
لأسرة الشيخ سالم صباح السالم الصباح
وذلك لوفاة المغفور له الشيخ سالم صباح السالم الصباح
طيب الله ثراه و أسكنه فسيح جناته
سائلين المولى عز وجل أن يدخله فسيح جناته
و نتقدم بخالص العزاء لأسرته الكريمة

Sunday, October 07, 2007

سامحني



على كثر الهم الي بقلبك سامحني
على كثر الالم الي فيك سامحني
حبيبي سامحني
ادري بتسألني على شنو بالظبط؟ او ليش حبيبتي
عسى ماشر اشفيج؟؟
بقولك سامحني
تعبانه و ما غيرك يفهمني
و لاحد يقدر همي و الله يخليك سامحني
حوالينني الكل يشوفك اسعد انسان
يابختك فيها
و مادور بزلاتي و غلطاتي سامحيني
الكل يحسب انك مرتاح
و مادور انت الي بس مريحني
حبيبي سامحني
تغيب 48 ساعه من الهم
و تشيل الالم و اتيي
تبي من يراعيك
من يواسيك
تبيني اوقف وياك
تلاقيني ضدك
احملك مسؤليه غيابك
و همي
اسفه حبيبي
مو انا الي اقدر اصبربغيابك
و لا انا الي اقدر ابلع حرتي
من اشوفك
الي فيني كله يطلع
سامحني
حبيبي سامحني
اتمنى اكون احسن انسانه وياك
و اتمنى اكون راحه لك
بس سامحني
دوم اقول لنفسي
الحين برد
و لا تفجين حلجج بتسكتين
و لا اتبينين له شي
ماراح يحس انج تبجين
و لا راح تقوليله شي
بس من اشوفك انسى كل وعودي
و انسى كل شي
عمرك ما زعلت علي
عمرك ما لمتني على شي
عمرك ما صرخت علي
عمرك ما انفعلت علي
دوم حنون
دوم صابر
على و على هالزمن
يمكن عشان تدري باللي فيني صح؟
حبيبي سامحني
كنت اتمنى اكون ارق من جذي
بس لو كنت بالضغف الي تبيه و بالهدوء الي انا ابيه


سامحني
حبيبي
تسألني
ليش في هالوقت اكتب لك هالكلمات
لاني شفته شهر غفران
و طلبت من ربي يسامحني و يعفو عني و يغفرلي
و بعد ربي
مابي رضا احد غيرك
حبيبي سامحني
اذا في يوم اذيتك
اذا في يوم ما فهمتك
اذا في يوم تجاهلتك
اذا في يوم تعبتك
حبيبي سامحني
اذا في يوم ما كنت مثل ما انت تبي
اذا في يوم ما صبرت كثر ما انا ابي
حبيبي سامحني
بتمر ايام
و بيمر العمر
و بتسامحني
حبيبي سامحني
ادري اصلا عمرك ما زعلت
عشان تسامحني
بس انا قاعد اطلب من نفسي اتسامحني على الي اسويه
فانت سامحني

ملاحظه:
ابيه حبيبي تدري بينا ! اكثر من 800 مسج
طبعا هذا غير الي انمسحوا!
واي لازم تقراهم
ادري عندك نسخه منهم
بس ممتعين
واي اشلون كنت اطفرني
وبكل ينووووووون ارد عليك
لحظات
ما حسيت بقيمتها الا لما فقدتها
و انت تدري شنو فاقده الحين؟؟
سبحانه ربي اشلون احب كل شي منك و فيك

Thursday, October 04, 2007

متعتي المباركيه شسوي ؟؟


عندي مشكله عويصه
ياناس انا وووووووووووووووحده مزاجي المباركيه
كيفي احب المباركيه !! لا تضحكووووون علي
كل شي في المباركيه احبه
حتى الحر و و الوصخ الي هناك احبه
اذا ضايق خلقي اروح رحله للمباركيه
استااااانس
خلووني اقولكم وين المشكله !!
ادق على رفيجتي اسألها تروحين المباركيه
تقوووووولي مالج امل الافنيو اوكيه مباركيه نيهي !
ادق على الثانيه
الثالثه
ليشششششششش محد بيروح المباركيه !!!
الله يرررررررررررررررحمج يا يماااااااااااااا لولوووووووه
محد يطاوعني على سووووووووووق السمج و المباركيه غيرج
و اخيرا رحت المباركيه و برووووووحي
نزلني السايق عند الصراريف و دشيت سوق التمر متجهه الى سوق المباركيه
لاحظو خطه السير !!
دشيت سوق التمر
سألت عن زيت الزيتون الي ما الاقيه الا هناك
و خذيت جبن و زيتون و رقاااااااق و مشييييييت
رحت سوق المباركيه
خذيت خضرا
ما ابيها
بس المهم اشتري شوقتني
تمشيت شريت من الحواااااي زعتر و نعناع و خرابيط مالها اول و تالي و هم ما ابي شي
اشتري لمجرد اني اشتري والله لا اكثر و لا اقل
رحت سووووووووووووق اللحم
سألته عندك قلوب ؟؟
قالي اي
دقت على بنت عمي الوووووو ريلج يبي قلوب حق الصقر !!
لاحظوووووو اني ما شريت شي حق عمري
طلعت رحت سوق الصراريف
حنيت عليهم واحد واحد
الدولار بجم !؟؟
الفرنك السويسري بجم ؟؟!!!
بصير منهم بشتري فرنكااااااااااات من الحين حق الصيييييييف !!!!!
مشييييييت شوي رحت حق الحواي الاصلي الثاني
ابي ليفه!
صابوووووون رقي
زيووووووووت
حنه
لفيتهم بجيسسسسس
و مشيت
دشيييييت النافوره
خذيت من الشمالي
درابيل
كيك
بقصم
خرابيط
غريبه
و طلعت
دقييييييييت على رفيجتي في مصر
تحب شغله من المباركيه
تخيووووووووولو ساعه اتوصفلي الشغله!!
مكالمات ب 30 دينار عشان شغله ب 3 دنانير !!
نزلت سرداب دعييييييج
تهاوشت ويااااااهم على عرضهم لملابس مبتذله !!
و اناا شكوووووو هم ما ادري
المهم اني حسسسسسسست و استااااااااااانست
طلعت رحت المهاره
تعرفون المهاره.؟؟
خذيت مكسرات
قحاااااااافي
فنااااااااااايل
دلاقات حق السواق و اخر شي يقولون لي احنا ما نلبس هذا !!
عياااااااااااااال عزززززززززززززززز سواقنا يلبسووووووووووووون دلاقات سي اند اي الظاهر و انا مدري !!
ورحت حست عن المسابيح
بشوووووف بجم المسابيح
و انا مدري ليش يعني !!
بس المهم اسوي شي


والمهمممممم خلصت شريت الي اكووووووووو و ماكوووووو
و ركبت السياره
رحت الشاميه
قطيت اغراض الحواي
و الكيك و الخرابيط
و بعدين ردييييييييييت البيت
و كنت في ققققققققققققققمه سعادتي
ياربي المباركيه ونااااااااااااااسه
اشلون في ناس ما تستااااااااااااااااانس فيهاااااااااا
والله محرمووووووووووون هالناس الي يتعنفقووووون
اعلان هام:
اي واحد فيكم بيرووووووووح المباركيه
يدزلي مسج برووووووووووح و ابي احد وياي عشان بقعد في القهاوي
بشرب شاااااي فحم
و باكل كبااااااب
اي على فكره انا عادي اكل كباااااااااااب من المباركيه



ملاحظه : لا تخافون الصوره قديمه في الشتا الي فات
ما اكل كباااااااااااااب في رمضان بالليل ههههههههههه

Wednesday, October 03, 2007

ضاقت الدنيا و لجأت اليك

اللهم إني أشكوإليك ضعف قوتي وقلة حيلتي وهواني على الناس
برحمتك يارب العالمين،أنت رب المستضعفين وأنت ربي إلى من تكلني؟
إلى بعيد يتجهمني ام إلى عدو ملكته أمري ؟
إن لم يكن بك غضب علي فلا أبالي، ولكن عافيتك أوسع لي من ذنوبي
اسألك بنور وجهك الذي اشرقت له الظلمات وصلح عليه أمر الدنيا والآخره من أن يحل بي سخطك
أو ينزل علي عذابك
لك العتبى حتى ترضى ولا حول ولا قوة إلا بالله
عندما تشتد الكرب
و عندما تضيق الدنيا بنا
الى من نلجأ ؟؟
للفتاح
سبحانه
في هذه الايام المباركه لا تنسوني بدعائكم
فانا احوج الاحوجين
بدعاء خالص من القلب
عن ظهر غيب
من اخ او اخت صدقت النيه مع الله في دعائها
و صدقوني ما نسيت احد في دعائي

Tuesday, October 02, 2007

كان دوم يذكرنا في هالوقت ..عسى بس احنا مو ناسينه ؟



كان كل سنه في العشر الاواخر يطل علينا بكلمة منه
كان دايما يذكرنا ما بخل علينا في طلته سنه من السنين و اهو عايش حتى في يوم مرضه
ولكن هل نحن اوفياء انه نذكره عند ربنا في العشر الاواخر هالسنه ؟؟
لا تنسوونه في دعائكم و صلاتكم
في كل يوم ارفع فيه ايدي لربي
زوله يطري على
ماني قادره انساه لا بصلاه و لا عند الفطور
مرات اقول يا بخته
ياريت عقب عيني في احد يذكرني كثر ما اذكره

الله يعفرله يارب و يرفع درجاته يا رب