Friday, November 30, 2007

آه يا مزاجي لما اتعذبني


آآه يا مزاجي لما اتعذبني
احب المزاج و يحوشني وايد مود سلطنه مو طبيعي
خصوصا بالليل يقلب المود عندي و اكون كأني امرأه عاشت ليالي الغرام في زمن الخمسينيات
احب الطرب الاصيل
و تتلذذ اذني بكل ماهو قديم
عود
ترانيم
و حتى الموشحات
و المقامات
اهيم مع كل اغنيه
و اكون انا بطلتها
اعيش في عالم لوحدي
و خصوصا مع صباح فخري
و بالاخص مع اغنيه ابعتلي جواب
فلي معاها ليالي و سمر و متعه
لن انساها ابد
احب استرجع ايامي الحلوة
باني اعيد اسمعها
فاغنيه ابعتلي جواب من اروع ما غني صباح فخري
و في هذا التسجيل بحفله ابدع فيها
و دايما له طريقه بان الكورال يبدون ويدخل اهو بوصلته
شي مو طبيعي
و اداء مو طبيعي
و سمعي له و سهري امس معاه كانت ليله مو طبيعيه
لغه جسدي ولغه طربه
يتناغم جسدي مع كل ايقاع و ظربات دف و طبله
فله طريقه تجعلني اهيم معه
احب الطرب
و مزاجي صعب
وخصوصا لما يقول
غيابك طال و بستنى و قلبك مال تتهنى
ان كنت هويت ونسيتني و عليه جنيت مارعتني
يؤدي بذكاء و الفرقه تتجاوب معاه و تهندس له باصول موسيقيه غير طبيعيه
كلمات الاغنيه
ابعتلي جواب وطمني ...ولو انو عتاب لا تحرمني
غيابك طال وبستنى......... وقلبك مال تتهنى
ان كنت هويت و نستني.. وعليّ جنيت وما راعتني
صبرت عليك ودقت مرار ....وابعت اليك اخبار و اخبار
اتاريك نستني مع الايام ورضيت تفوتني على الالام
ابعتلي جواب جواب جواب جواب و طمني
انا ليّ إله يعرفني .....من حر الآاااه ينصفني
مش قادر اقول انت الجاني....اصبر على طول على أحزاني

Wednesday, November 28, 2007

اسكندريه رايح جاي







في اخر زياره لي لمصر
كنت مقررة اروح اسكندريه يوم واحد

قبلها في يوم من الليل قلت حق السواق ان يكون عندنا الساعه 8 الصبح

طبعا فطيم يالله من فضلك من الساعه 6 الصبح فازعه مغسله مبدله و اهي
تسوي روحها ما تسمعني و انا اعتشل في الدار

ورفيجتي تحن من الساعه 7 تبينا انتريق من له خلق ياكل من صباح الله خير
يادوبك حطييييت قهوتي و جابلت النيل

رفيجتي طايحتله اتحشي تسوي سندويشات حق الطريج!!!

طبعا انا الساعه 7 و نص مالكم امل اناقش او اداحر
انا مخليتها ساكته عنها

يوم خلصت قلت لها :حطو سله خبز ثانيه ييبيها حشيلنا بعد

تبون الصج شكلها ماكان عندها مانع

ركبت فوق سويت مطارة قهوة عربيه اهم شي
ومطارة شاي
و حب
و كاكاو
و قظبنا الدرب

السواق محمد صغير في السن
مطيوووووور و كله يتشيحط على راسي
و كلا مسوي فيها ريال
و سياااقته جنه داش رالي

تخيلو معاي الساعه 8 و نص الصبح الاخ دايس و يشفط
و انا قاطه راسي مالي خلق اتهاوش وياه
و الي وياي بس اتنغز فيني زفيييه و زفيييييه
السالفه مو راكبه
حاط لنا مشاري العفاسي ويشفط!!

رفيجتي : بطووط بطووط قوليلووووه بشويش
انا : خليه خليه جدامنا 3 ساعات يالله نوصل بس بعد نص ساعه اذا ماسنع سياقته بفصخ نعالي و بصفقه
نطرنا شوي
و سفلت فيه

و الاخ موديله مسوي نفسه مظبطني في الاشرطه
اول شي حطلي فيروز
و تالي تامر حسني
و بعدها والله مذكر اشحط

المهم الاخ محمد ماد بوزة طوول الدرب
ليش يا محمد علامك!!!!
الاخ محمد طالع من بريك اب شنيع و كانت عنده ذكريات مع حبيبته في اسكندريه
و ماوده يروح مرا ثانيه عشان ما يسترجع ذكرياته!!

والله خوش بكيفك امك انا !!
وصلنا سكندريه ريحنا عند ربعنا
ماقصروا عزمونا على الفيش ماركت هناك كان غدا روعه
عقب الغدا ردينا وياهم الفندق صلينا
و بما انهم طول الغدا بس يتواعدون في تكسير راس بعض في الهند
فردينا عشان يلعبون هند
وبما اني مالي في الجنجفه كلش

فخليتهم و نزلت اظبط المزاج
في خوش قهوة تحت
نزلت طلبتي جويها (شاي) و راس شيشه سنع
و قعدت بريحاتي اطالع الي رايح و الي راد

و الي حواليني كلهم غراميات و عشق و غرام
و كان الغروب مو طبيعي مع نسمه هوا بارده

اطالع هناك و الا هذا جنه محمد السايق!!
بس لأ طبعا اكيد مو اهو هذا ويا وحده
و اهو طول الطريج صك راسي في هاللي هدته و تزوجت و مايحب اسكندريه
لألأ اكيد مو اهو
لألأ اهوو !!!

المهم خلصت رديت
و طلعنا
وعلى الساعه 10 رديت القاهره
ركبت السيارة
من اول خمس دقايق رفيجتي شخريها يصفر

و انا اقول عسى ماا محمد يبووووووقني يقطني في الصحرا
و عيني على السايق طول الوقت اشوفه لا يغط لا يسوي شي
اطالع ويها و الا الويهه متغير مسفهل
و قام يحطلي اغاني ورده
و فايزة احمد
و شوي شوي ام كلثوم

قلت لألأ اشوة
و يحاجي عمرة و يبتسم
ووصلنا على خير

من باجر و الا الاخ محمد كاشخ و حالته حاله
و طول باجي الايام هالسايق عين في الشارع و عين في المسجات

قبل لا اسافر قالي انه حب وحده تعرف عليها بسكندريه!!
مامدااااااااااااك

المهم توة من شوي
الاخ مخلي رفيجتي تدق علي
يبي يكلمني
سألتها اشيبي!؟؟ قالت مش عارفه عايزك

دقيت عليه : هاااااا محمد ازايك اشعندك؟؟
محمد: كل سنه و حضرتك طيبه يا استازة ..انا بس كنت عايزك تنورينا و تشرفينا على كتب الكتاب في العيد الكبير انشاء الله يا ريت تنوريناااااا
العانس النسرة : هاو محمد من بتاخذ!! انشاء الله هذي مالت اسكندريه (( انتييييييييييييي شكووووووووو))
محمد : ااه و انشاء الله حعمل يوم حنه و يوم كتب كتاب
العانس النسرة: امداااااااك عرفتهاااااااا

بعدين استوعبت و باركت له
المهم سكرت الخط
و حسيييييييييت نفسي صج عانس نسرة
انتي شكووووو

اكتشفت ان السالفه ان العوانس مو مخلوقات قشرة و لكن تصير فيهم رده فعل نتيجه صدمه اخبارزواج هههههه

طبعا ضحكت على عمري ضحك بطريقه مو طبيعيه

حسيت نفسي حيزبووووووونه

حسيت عمري بعد 10 سنين راح اكون هوبلس كيس
هههههههه دقيت على رفيجتي و قلت لها الي صار
ماتت ضحك
و اتعاااااااااااااايرني خلتني اطيح من الضحك
تقووووووولي راح عليج!!!!
ماكان موجود بس ماندري انه بيظبط في هالسرعه
واي موقف يضحك

فهذي مواصفات العانس عشان بس ما تضيعون :
1- من تشوف كابلز تطالع منو الاحلى المرا او الريال
2- تردد وايد كلمه ((مافيها زورد مرته))
3- تمشي و تقول الشرع حلل اربع
4- تمشي و تردد كلمه الرسول((ص)) داعي للجياكر فالحمدلله انا حلوة
5- اقووول بعد و الا انطق؟؟





Monday, November 26, 2007

ردا على بوست مناف

قريت بوست مناف
و من كثر ما اهو روعه
ما حسيت في نفسي الا و انا ارد عليه و اكلم روحي
اهو كان قصيده و شعر
ولكن انا لاني ماني شاعره ولكن سطرت لكم خيالي
سطورة فعلا روعه
سطوره ما تليق الا في مناف


كان يقول انها اصدق لحظه بعمره
حلفت له انها الاثمن و الاغلى

كان يقول كنا اثننا
قلت له لألأ كنا روح بجسدين

يقول انه برد
بس ابد ماحسيت
كان نسمه كافي

كان يوصف لون السما
والله اني ماشفت غير عيونه

على غفله سكنت رعشه ايده
ظمني عنده حيل و لمني
همست باذنه
دخيل الله اكثر
لمني حيل
وقلت له
بعد اكثر
خاف يعورني
قربت انا منه
وقربت انا اكثر
شفقانه عليه شفاتي
قليل بحقه ولهانه
من الشهد مليت انا كاسي
و من العسل انا رويته
طمع حبيبي في قبلاتي
و من الحيا غضيت انا طرفي

كانت هذي اثمن و اغلى لحظاتي
مع ضوى روحي
وصف فيها السما و البحر
بس نسى يقولكم انها فينسيا

rainstorm



موعدي الساعه 6 الصبح لازم اكون في المطار
ليلتها كانت مطر و غرقه بطريقه غير طبيعيه
كان البرق و الرعد يقصف الدار و الهوا يهز باب البلكون و الدرايش
انزل الشتر و ما اقدر انام باقي ساعتين على موعد خروجي للمطار
اسوي جنطي
ادق على الرسبشن اطلب منه يأكد قعدتي الساعه 4 الا ربع
الساعه 4 الفير ينزل الجناط و اييب السيارة
البل مان واقف ويا جناطي على مارحت يبت السيارة
يقولي مستحيل تقدرين تسوقين في هالجو المطر ماراح يخف
لانه ريال كبير كان وايد خايف علي
ولان انا من سنين اعرف هذا الريال
فتعودت دايما الصبح يعطيني حاله الجو اليوم

يرن تلفوني
امي: فطومه قعدتاي ؟
ارد على امي و اطمنها اني قاعده و الحين بروح مونترو بالاس اسلم السيارة في مكتب اليورو كار و اركب قطار الساعه 4 و ثلث لي المطار...
عشان ما تحاتيني
امي حست اني بسوق و اني ماني راده السيارة

توكلت على الله و حزتها كلي من فوق لي تحت ماي
و كأن السما تحلب حلاب
كميه مطر مابحياتي شفت مثلها
الساعه 4 الفير
راح اسوق في الجبل بروحي
على ما اطلع الهاي واي
واقظب خط الهاي واي
يشهد الله على ان لي يومي هذا مدري اشلوون سقت حزتها
بروحي
و صوت الرعد يهز السيارة
الدنيا عتمه برا
مااشوف شي
طريجي ما اشوفه
الهاي وايد على جبل مرتفع
و الظبااب تحتي
المشاشات ما توقف لدرجه تهتز السيارة فيها
و السياايير تشخط بسرعه عجيبه
خوف غير طبيعي
انا عمري بحياتي كلها لاخفت من مطر
ولا رعد
و لا ظلمه و لا برق
عمري ماخفت من مرتفعات و لا جبال
و لا اعتقد اني خفت من شي بالدنيا ابد
الطريج في العاده يكون ساعه و نص او اقل
هالمرة صار اكثر من ساعتين
فيني نوم
خوف
رعب
بس ما ابي ابجي
لان مو وقت بجي
كنت اقول حق نفسي هذي تجربه
وانتي تقدرين عليها
يمكن تشوفونه شي جدا عادي
ان وحده تسوق الساعه 4 الفير في طريج هاي واي ما ينشاف من المطر و الرعد و البرق يقصف فيها من كل صوب

بس احساس اني بروحي و انا اسوق
و يمكن ادعم في اي لحظه لاني جد موشايفه شي حزتها
لاني ادش النفق و ما ادري انه نفق من الظلمه
و لانه المطر مو راضي يخف بس يزيد اكثر و اكثر
بعد رعب اكثر من ساعتين
دايما احساس الخوف يكون خرعه وقتيه او لحظات بس مو ساعتين متواصله
اشلون مروا مدري!!

وصلت المطار
نزلت في الباركينج
قعدت يمكن ربع ساعه
افكر في الي صارلي
اشلون قدرت اسوي بنفسي جذي و ليش؟
وقتها عرفت و تيقنت ان عمري ماراح اخاف و اكون مرعوبه كثر الخوف الي شفته لمده ساعتين او اكثر
وقتها عرفت اني اقدر اسوي كل شي بالدنيا بروحي

واتحمل كل شي بروحي
وقتها عرفت ان ماكو شي صعب
وان الطريج المظلم لابد له من نهايه
وقتها عرفت اني طلعت من خطر بدون ما القى احد يخاف علي
او احس ان في احد قالي حمدلله على سلامتج
وقتها عرفت حقيقه ان الله معاي

Friday, November 23, 2007

اشكركم من كل قلبي على كميه السعاده الي احصلها بسبب وجودكم بحياتي


انا صايرة وايد اعبر عن مشاعري
ووايد امشي و اقول كلمه احبج
او احبك
كل الناس قمت اقولهم احبكم
مدري اشفيني هالايام وايد وايد احس فيني مشاعر بطريقه اوفر
بصراحه قعدت مع نفسي و سألت نفسي انتي شنو تبين او شنو يسعدج

اكتشفت ان لو احد يقولي احبج
بتكون هذي اروع هديه لي بالدنيا

او لو احد يشكرني لشي ولو كان بسيط بتكون هم هذي من اكبر و اكثر الاشياء الي تسعدني

فقررت اسوي للناس الاشياء الي احبها
عل و عسى احصل شي منها
او يكفيني ادخل السعاده بقلبهم

فقمت دايما اقول حق خدامتنا
انا احب القهوة ولانج تسويلي القهوة الي احبها فانتي سبب في سعادتي مشكورة لانج تخليني سعيده
لانه حسيت كلمه مشكورة وبس ما تكفي
كلنا لما الخدم ايبولنا ماي او يسون لنا قهوة نقول ثانكس و بس
لكن خنغير
فانا غيرت في هالطريقه الي قلت لكم عنها
و في نفس الوقت بالصالون و الي سوتلي حمام زيت كانت تسويلي مساج مو طبيعي
خلتني اغييب عن الدنيا
فقلت ليش اقولها ثانكس وبس او اني مجرد اعطيها بخشيش بسيط
ليش ما اقولها شي يسعدها
فقلت لها
انا ياييتج الصالون و انا قمه الحزن و الالم و الستريس و الكأبه
يو ميد ماي داي بصراحه و خليتي كل الالم الي فيني يتحول الى راحه
مشكورة وايد انتي عندج انامل سحريه شالت كل التفكير السلبي الي في راسي

ما تتصورون الهنديه اشلون و انا اعبرلها عن الراحه اشلون تقولي رييلي!! ثانكس والله و
ادمعت عينها
و نفس الشي اتبعته ويا امي و ابوي
و نفس الشي اتعبته ويا اخواني
ونفس الشي هم اسويه في رفيجتي
كلا اخمها و اقولهااا احبج

واكتشفت ان المفروض اني اسعدهم في كلمات غير تقليديه
في اني اعبر عن مشاعري في صدق

ولكن ما هقيت اني انا بكون اسعد منهم في اني افرحهم او اسعدهم في كلمه

جربوا تعبرون عن مشاعركم
جربو تغييرون من طريتقتكم التقليديه

جرب اليوم تقول حق مرتك كلمه حلوة بطريقه فيها تغيير بسيط
و شوف شنو عائد هذي الكلمه عليك

جربي اليوم تقولين حق ريلج
او اشكريه على شي بسيط و حبي راسه
و عبري عن الي بقلبج

وشوفي هذا الشي اشلون بعود عليج انتي بالخير

حبي بنتج

بوسي ايد ولدج

دزي مسج حلوة حق امج

شكري رفيجتج بطريقه مبتكره

عبروا عن مشاعركم
و شوفوا اشلون راح تستمتعون

جربوا و قولولي
وفي النهايه
مشكورة وايد الزين
بعد قلبي مدري اشلون اشكر كلامج الحلو عني
من كثر ما تمنيت شي يسعدني تفاجأت في كلامج بالبوست
خليتيني اثق اني اي اتراااااكت كلمه حلوة من احد
احبج

Thursday, November 22, 2007

يازينه من مكان يرد الروح..مال فصله


عطله نهايه اسبوع سعيده
الله يخليكم شوووووفو هذا الفندق الي ميته ازووره
روعه مشوقني حدا
الي راح له خيقولي مثل الي في الصور
شي ابداع
اذا دشيتو الموقع بليز شوفو السويت و الغرف
ابي اروح بلييييييييييييييز
يازينه من مكان يرد الروح
و يمج حبيب القلب
ويه ويه و تاخذين تان
دعوة من لوير لكل الازواج
تكفون ودوا حريمكم
صيرو رياييل سنعين
ترا الدنيا ما تسوا
و هذا لنك الفندق

Wednesday, November 21, 2007

بوست غير قابل للقراءه لاي شخص بياخذ الموضوع جد و بينتقد


اسم الله علينا احنا يا الكويتين كل شغلنا غير
حتى انفصام الشخصيه عندنا غير
مواقف و تصرفات ما تصير في اي بلد لانها بس عند الكويتين

الشخصيه الاولى
نورة بنت عمرها 25 سنه
تدرس في دار القرآن
حبوبه و سمحه
رجعت من الحج تحجبت
و لبست عبات
في يوم قررت تطلع ويا رفيجتها بعد ما تخلص محاضراتها يالله من فضلك
مرتها رفيجتها
نورة: الو حصه وينج ؟
حصه : كاني بدش الضاحيه
نورة : يالله انا ناطرتج برة
تركب نورة السيارة تسلم
و تطلب من رفيجتها تسكر الاغاني
لان الاغاني حرام و اهي من بعد الحج الحمدلله التزمت
ما صارت تسمع اغاني
تنصدم حصه من نورة و تسكر السيدي
يرن تلفون نورة
نورة : هلا حبيبي
حصه تطلع عيونها
لما تسكر نورة التلفون تسألها حصه باستغراب
هذا منو !!! انتي لي الحين ويا فهد
والله عشنا و شفنا اغااااااااااني حرام
رفيج مو حرام!!!
فعلا وين اكو بنات في العالم يحرمون الاغاني و يسون فيهااااا حرام
بس يكلموون شباب!!
عندنا في الكويت بس
يالله من فضلك


الشخصيه الثانيه
تماظر و سعيده و مرزوقه
رفيجات يتيمعون كل سبت الصبح يتريقون في جوني الصالحيه
يقلدون سكس اند سيتي
ثلاثتهم متزوجات
طول يمعتهم يوم السبت و اهم تف و سب في الريياييل و بيتهم و ان الرياييل جلاب
و كلهم حوش و كلهم مو كفو و احنا بنات حمايل طالعين من بيوت ابهاتنا مو من بارات
رايايل هالوقت انانيين و مزاجيين و لا يعجبهم العجب و كل الي نسويه عشانهم ما ايووزلهم الله ياخذهم و يفكنا منهم يموتون على الرخصيه يموتون على امهات الفلوس يبوووووون البيتشز
ما يبون الحلال ..
تماظر : ويعه تويعه يقووووولي بتزوج عليج
مرزوقه : اي ما يبون السنعه الي تقوم في البيت و الريل و العيال
سعيده : اي يبووووووون الي تمص فلوسهم
تماظر : ايييييه الاخ يبيني 24 ساعه جاهزة حقه اسم الله علي ما يهمني هالشي
مرزوقه : اي والله احنا سنعات
يخلصون يقومون
كل وحده تركب سيارتها

تماظرتدق على رفيجها يشيل التيلفون
تماظر: موااااااااااااااه موااااااااااه احبك
هو : هاها هاها ها
تماظر : احبك
هو : وينج
تماظر : احبك
هو: تعالي تعالي .....
اي بلد فيها انفصام بالشخصيه مثل الكويت
سنعه عند الريل و الزوج و بيتش عند الرفيج؟


سعيده ترد البيت بسرعه
الريل طالع
تشبك مسنجر
و تعيش حياتها
اي بلد فيها المتزوجه مدمنه سايبر سكس و ريلها بالدار يشكي منها
و في النهايه اسم الله علينا سنعات

مرزوقه ترد بيتهااااا تساحل ريلها
تتودد له و علاقتها زينه مع ريلها بس مع الخيل يا شقرة
كلا تذم في ريلها عشان تخاف من العين و محد يحط العين على ريلها


الشخصيه الاخيرة
ناصر ريال يعاني من انفصام شخصيه عجيب
مينن مرته .. حاط دوبه دوبها في الكويت
من يطلع يجيك على لسبها على شعرها على حجابها على عطرها
لا تلبسين
لا تتمكيجين
لا يشوفونج ربعي !!
و من يسافر وياها يبدون المشاكل
امشي وياي الديسكو
بالليل قطي حجابج لا تفشلينا
امشي الكازينو
بوسيني في المطعم
شربي وياي
عشان تدشين المود مثلي
و المرا منقلب راسها
ماتدري من تسمع
ريلها الي في الكويت
و الي الفاصخ الي برا الكويت

هذا كلا بصوب و اذا تهاوشو عايرها
انتي اصلا لوووو سنعه ما سمعتاي كلامي !!
بس انتاي تبين جذي !!

مواقف و شخصيات ما تصير الا في الكويت
مواقف و شخصيات كاركتريه ما تعني ان اعممها على احد
او انه بالضرورة احد فيكم مرت عليه هالاشكال

Monday, November 19, 2007

الرومانس له وقته ما يصلح في بيتنا و لا بروحي






انا وين و الرومانسيه وين!!

كلش انا مو مالت ريلاكس

هالايام قاعده اتبع طريقه التدليل العجيبه لنفسي

بس مو كل شي نقراه يصلح لنا

المهم الزبدة
قلت احسن شي بعد عناء يوم طويل في العمل و شاق مثل امس مداومه 3 ساعات

قمت المغرب من النوم

طرشت الساايق
حولي اييب لي جم ورده

ترست البانيوو
و حطيت الببلز
و حطيت الشمووع
ترس الحمام

نثرت ورد
على ما سويت كل هذا انهد حيلي !!

طبعا بيني و بين نفسي
مو مقتنعه
ضيقه خلق الحمام
شنو ريلاكس

يالله المهم فطيم قعدي

قعدنا
التلفت يمين و يسا ر وبعدين وين الريلاكس

اقول حق نفسي
لألأ يبيلج ميوزك!!

اصرخ باعلى صوتي
انادي اخوي
عطني البلاير
قالي لألأ لألأ
مو زين

ايونج الينانوة !!

شنهوو ينانوة
بروحي مو ناقصه تخرع

عيل بقوم اييب كتابي
ييبت كتاابي
قريت

تدمر كتابي ماي!!

لا حوول
لحظه اييب كلنكس امشه !!

و بقومتي
و الااا اشوف ظلي في الطوفه
ليششششششششش حاطه شموع
بس انا في بالي اليناانوة
صررررررررررخه وحده لي باب الحمام

انادي اخوي
ينانوة ينانوة

هو : طلعي
انا : فووطه نسيت فوطتي
ييب البرنص
ييب اي شي

بسرعه بسرعه

صراخ
طلعت معصبه
ههههههههههههههههههههه
اتحلطم
على اليوم الي فكرت اسوي فيه باث
كلش شعور مو حلو تسوينة في البيت


كلش مو شعور ريلاكس

انزين قعدنا و بعدين
اعصابي انتلفت
لا يتدمر كتابي ماي
لا ايووني ينانوة

هاو هذي حاله !!

و كل شوي يرن التلفون او مسج
و اصرخ يبلي التلفون

الحين انا قاعدة عشان ريلاكس
و الا عشاان شنو بالظبط!!

كلش ما تصلحلي الرومانسيه

مو لي ياربي مو قصب!!!

ملاحظة:
فانكووووووفر حاولت البق عمري بس ما قدرت كلش ما نفعت
قلت بسوي شي حلو تعويض يعني صاارت عفسه الله يلعنها من ساعه يوم فكرت اسوي
ريلاكس و رومانس و بلا بلا بلا بلا

خساير ماي على الفاضي 10 ساعات اترس بانيو

دقيقتين قعدنا

ما يسوا الورد ما يسوي الفوم باث

و الببلز



وين الارشاد عني !!














Friday, November 16, 2007

الرضا و السعاده



السعاده و الرضا
الرضا ان مهما اتتك مصائب تحمد الله عليها
الرضا انك ترضا بقضاء الله و قدره
الرضا انك تقنع بكل رزق قسمه الله لك
الرضا انك تعيش يومك حامد ربك سعيد بما تفضله عليك من الف نعمه و نعمه
الرضا ان لا تقع عينك على رزق غيرك و تتمناه لنفسك
الرضا تقوم من النوم تحمد ربك الف مره على البيت
و الامان و الصحه و العافيه و ان هذا اليوم ياك و انت عايش تحت رحمه الله
الرضا ان احب لغيري الخير
و لكن الي يضيق الخلق
ان ترا غيرك ممن عنده الصحه و العافيه و لكن يتذمرون على شي مو عندهم
عندهم مال و خير و نعمه و لكن لا يحمدون الله فهم منشغلين بحسد غيرهم
الرضا هو ذاك السكون و الراحه في القلب و الاستسلام لله في كل اموره
فكل ما يأتي من الله خير
الرضا ان يأتي البلاء عليك و لكن تحمد الله
فهذا اكبر نعمه ان تعرف ان الله له حكمه في كل شي
الرضا شفته في عيني
في تلك المرأه بلغت اواخر الاربعين من عمرها
تزوجت و هي في عمر 16 سنه
انجبنت 10 ابناء
تسكن افخم الفلل
تأمر و تنهي
فهي سيده قصر
و تحتها الخدم و الحشم
فهي تلك الزوجه السعيده التي يحسدها كل من حولها
تصحى من نومها على مشكله بسيطه يثور الزوج غضبا
يطلقها
فتتجرد من كل الصلاحيات و النعم
تذهب لبيت اهلها
لا تملك من المال شي
و لا الابناء
و لا شبابها الذي ذهب في ذلك المنزل
لا تملك شي مطلقا
لا تملك الا الابتلاء و الصبر
اسألها اشلونج ؟
تقولي بالف خير و نعمه
اسأل نفسي اي نعمه و انتي تجردتي من كل النعم؟
تقولي الحمدلله ربي قسم لي اعيش في هذاك البيت 24 سنه
و رجعت بيت اهلي
لاعيش لنفسي و لاخرتي
فانا ادرس الدين و القران
لان ماعندي شهاده
و لا عندي شي
ولكن راضيه بكل ما قسمه الله
الرضا ان ارا تلك المرأه تنثر السعاده لمن حولها و هي راضيه جل الرضا بكل ما قسم الله عليها
ليش بالضرورة ان يكون الانسان سعيد
ولكن النعمه ان يكون راضي حتى يسعد
فليست السعاده هي الاشياء الماديه
و انما السعاده هي ضحكه من القلب مرتاح بالك
الرضا انام قريره العين
اعلم بان والديي راضين عني
الرضا ان احمد الله على كل شي و اي شي
حتى اقدر اعرف الراحه
فكرو في نفسكم
في هالجو الحلو و قعدو معاها
هل انتو راضين ؟
هل انتو سعيدين
اذا ماكنتو سعيدين شوفو النعم الي عندكم
واحمدو الله عليها
حتى لا تزول
وقتها بتعرفون شنو يعني الرضا
شوفو النعمه الي بين ايدكم
هل مستعدين تستغنون عنها؟؟
اذا قلتوا لألأ
فاحمدو الله عليها
حتى لا تزول
الحياه ماشيه ماشيه
ولكن خنمشيها بسعاده
و رضاااااا
الحمدلله ربي على الراحه
الحمدلله ربي على انك قنعتني بما رزقتني
الحمدلله ربي اني راضيه بكل الي تكتبه لي


Thursday, November 15, 2007

مود شطانه مو طبيعي !!


الجووووووو فظيييييييع اليوم ماشاء الله
مدري اشفيني اليوم طول الطريج ادندن اغاني عبادي الجوهر القديمه
ياظلوووم يا ظلووووووم الناس لا نامت انا الي ما انوم

مدري من وين عانه علي!!

المهم خلوني اقولكم
هاليومين حايشني مود شطانه مو طبيعيه
من الجو مو مني !

انا قاعده لا لي و لا علي
دقت علي رفيجتي اعزمتني على شاليهات
الدرة في جده مارينا الي هناك

طبعا هناك الوضع ثاااااني اي بيششششش شرم اي بطيخ
جي تي سكيااااات و مايوهات و تبدع و شاليهات
و الدنيا فالينها على الاخر

اخر مرة رحت قلت لها اناايي جده عمرة
انتي اتخربييييييين حجتي مو بس العمره
هههههههه

المهم
دقت رفيجتي تحن علي حنه مو طبيعيه
اعرفها اذا طق براسها خلاص تسويها تسويها
و انا بصراحه خوش بنت سنعه
حدي ما اقول لألأ حق الوناسه و الخراب هههههه

المهم رفيجتي خلصت و ظبطت روحهااااا و كل امورها
الي حرني في الموضوع انها تقولي ما نبي شغالات و لا طباخ و لا احد
عشااااااان انتي فيه!! اشحقا اجيب لي شغاله تسوي شي اذا هي طول الوقت يا بتنزف يا بتسوين انتي الشغل عنها
كـــــــــــــــلــــبه اوريج

المهم ان احنا بنكووووووون شله بنات يمكن 6 او 7
بروحنااااا
و بما اني انا ماني رايحه
فلازم اخرب عليهم

اشسوييييييييت؟؟

دشيت المسنجر
شلت البلوك عن واحد
و شوفو اشسويت
هذا الادمي مسكييييييييييييييين يموت على عمرة بطريقه قاتله
خف طينه و فصله
و يمكن يمكن يكلم فوق 100 بنت شويه
موديله في الصيف
جنيف
كان
باريس
ماربيا
لندن
البنات في الفيس بوك عنده فوق 800 بنت
و غير الي في الصج
و غير انه مسكييييييين يتروالي
يرقم اكثر من ما يدش الحمام
و بما اني اعرفه من زمان مجرد صداقه فكل مغامراته عندي
على انه كبير بس عقله عقل ياهل لي الحين يموت على التظبط!!

سلمت عليه
و قلت له هاااااااا وين انشاء الله هالويك انت؟؟
جالس في الرياض ؟؟
قالي لألأ
بطلع الشرقيه

قلت له خسااااااااااااااارة اجل مقدر اشووووووفك في الدرة !

صرخ قالي انتي بتروحين الشاليهات
قلت له ايييييه
قال انتو مع مين؟
قلت له بنات جنيييييييف كلهم و لحالنا
مسوين ديجي بارتي
على طول عزم نفسه و ربعه بيينه

لاحظو اني عفستهم !!
قلت له لألأ خلك في الشرقيه
اشلك في البحر ((يا بريئة)) حدي

و بعدين حنا ما نبي عيال الرياض او اي قصيمي يجي يوطوط
خلنا مع حقين جده ابرررررررررك
جده غير

و عفستهم امس اهو دبرله شاليه
يوم ظمنت انه بروح ويا ربعه

دقيت على رفيجتي قلت لها يا خسااااااااااااارة
ما نقدر ناخذ راحتنا

عيال جنيف هناااااااك
زيزو و ربعه
هههههههههههههههههههههههههه

خليها وقت ثاني
يا نحسسسسسسسسسسسسي
يا نحسيييييييييييي
رفيجتي ماتت قققققققققققققهر

ياكرهم هذا وقتهم
يا شينهم
ههههههههههههه

خربت على البنات روحتهم

و قصيت على الشباب خليتهم يروحون و ما يلاقون احد

بعد صج شبااااااااااااااااااب فاضيه من طق طبله قال انا قبله !!
اهوووووو يثق في كلامي
يدري اذا قلت شي يعني اكيد ماني جاذبه فيه

عاد اليوووووووووم بضحك ضحك
اتخيييييله رايح يدوووووورنااااااا
و موديلي حطيت في المسنجر
جده نورت
و جاذبه عليه
قلت له الصبح اطلع عمره (( ماشااااااااااااااء الله ))
و بتغدا في بيت صديقتي في جده
و على العصر نرووووووووح
يعني انا الحين و انا اكتب البوست المفروض انا في العمره
ههههههههههههههههههه
واي واي وناااااااااسه
يا زييييييييين الشطانه

الضحك اذا رفيجاتي الحين دشو البلوج و قرو البوست
صج صج بنطق
ههههههههههه
ويييييييييييك اند سعيد

Tuesday, November 13, 2007

عطني من ايامك نهار وباقي العمر..للي تبي


انت تدري اذا ولهت عليك اتعسر صح؟؟
شي مو بيدي والله
تدري اقعد مع نفسي و اقولها اهو لاهي مشغول
و الوقت غير الوقت
النومه غير و الظروف غير
بس مو بيدي اتعسر
تدري ما اقدر اعيش فرحه من دونك
و تدري اذا بقولك شي و ما لقيتك اصيح و اتعسر
تدري اذا شفتك جني ياهل فرحان بامه في الصف و يسوي حركات لفت انتباه و يتشيحط
انت تدري لو كنت متكدرة و شفتك كل الي فيني يروح
و كلمه منك بس
كلمه منك انت بس تغيير يومي كله
تدري لفرحت و طرت منك
و تدري يومي كله انت

امس بالليل
اذيت امي

لا تلومني ماكو غيرها احن عليه في الليل
طفرتها بالليل
متعه مو طبيعيه انك تلفت الانتباه و ترفع ظغط الي يحبونك

انا : يما برووح له
امي الحنونه : ذلفي فكينا روحي له
انا : انزين اذا رحت ما الاقي الانتربول ناطرني؟؟
امي : مينونه انا خبله افضح عمري ناقصين حجي اوادم احنا بجذب و بقول راحت بنتي دورة !!!
(( اكتشفت ان امي من كثر ما هددتها اني بييلك قامت ادور عذر لو انها تصحى من النوم و ما تلاقيني ))
بدعت في امي و خصلت
حاولت انام
قعدت الفير
و بعدها الصبح ييت الدوام
اكشتفت في شي ناقص يومي و اهو انت
اكشتفت ان مزاجي لي الحين ما تعدل
لانك ما صبحت علي


عطني من ايامك نهار و باقي العمر للي تبي

Sunday, November 11, 2007

انا معاك

في غلاك قال خالد الفيصل



فدوة عيونك



فـدوة عيونك لو غدت روح مغليك "
" وش عـاد لـوراحت لعينك عشاير

ابـيع مـايغلى على الكون واشريك "
" واسـوق لـى جـتنى علومك بشاير

وازعل جميع الناس بالحيل وارضيك "
" واصـبر ولـودارت عـلى الدواير

وآخـذ مـن ايامي لك ايام واعطيك"
" وان راح عـمري لك فلا هوخساير



و في وصفك تقول عابرة سبيل


رجّال يسوى له ثمانيـن رجّـال
كل الصفات اللي ملكها فضيعـه

له ضحكةٍ تشبه لضحكات الأطفال
ذيبٍ ونظراتـه حنونـه وديعـه

وله فزعةٍ منها المجانيـن عقّـال
وفجوج لا ضاقت عليّ الوسيعـه

ياما عدل عوجا ثقيلات وطـوال
وأنـا معاقبتـه غيـورٌ صريعـه





و بدر بن عبدالمحسن عرف الي بقوله لك و عرف من انا دونك





انا إنت .. يا إنت أنا ..


لو سألوا حبيبي ..


عن إسمي حبيبي ..


قل هذا أنا ..


تشبهني عيونك .. سميني المدى


.. غطيني برموشك .. عن عين العدا


..ظفرني جدايل .. واكتبني رسايل ..


وانسى من أنا ..


واعدني المدينه .. أوقات الغروب ..


امواجي سفينه .. ورمالي دروب .


.بأمشي لين أشوفك ..


لين أقرا بكفوفك .


.إسمي .. ومين أنا ..




و انا غير عنهم


لاني احسك



بتاخذني وياك


يمكن اكون ظلك



او يمكن ما اتعدى خطاك



احبك





ايس كريم







الى اصحاب القلوب الرحيمه اتوجه في بوستي هذا مخاطبه قلوبكم الرقيقه


حيث انني اشتهي هذا الايس كريم


و لكن حالي حال نص الكويتين حافيه


فياريت اذا مر على بلوقي تاجر او احد الاخوان الي عنده هوايه وكالات


يفكر في ان اييب احد هالوكالات الكويت
ايس كريم بن & جيري



او





مابي الي في مركز سلطاااااااااااااان مو فريش مع تحيات حافيه عندها افكار تجاريه
و من اهم اسباب سعادتي
البلعه
حيث انني اتعسر بشكل غير طبيعي اذا يعت و عادي ما اكل شي
طول اليوم بس اكل كاكاو او ايس كريم

Wednesday, November 07, 2007

فكرة تخريبيه



يااناس الجو عجيب مو مال دوام


والله مو مال دوام


الجو يذبح


مخيليني اقوم من النوم امشي و اللم الي في البيت كلهم


(( ماكو احد في البيت غير اخوي الصغير ))


و كلا ماله خلقي !!



الجو مال اغنيه روعه


الجو محرض على الهياته


الجو باختصار مال حب


حطيت قهوتي الحين و قلت احرضكم!!


ماتحسون ان صج مو مال دوام


و البلوة

ان مأجج المشاعر


و فيني فيضاان حب

يا حسرتي

يوم كنت في لندن

امشي و اقولهم صوروني في هالجو !!

الجو يطلع في الصورة ؟؟!!!


اموت على الخريف يا ناس

و احب الشتا


احب هالجو الفظيع


هذا شهر 11


الله يعيني لي شهر 2


بحط حرتي و بتحلطم عليكم

ههههههههههههههههه


انزين اطلع من الدوام وين اروح؟؟


حرضووتي

و عطوني افكار تخريبيه ؟؟؟ بلييييييييز
الجو يتعدل و انا اخترب !!

Monday, November 05, 2007

الحين الكحول حلال او حرام ؟؟




عندي سؤال اكيد تعرفون اجابته بس والله انا ما اعرف



في مايونيز ماكدونالد او ساور كريم
الي برا الكويت
مكتوب انه في نسبه واين
قفلت حق رفيجتي حراااااااام فيه واين


قالت نسبه الواين هذي غير محرمه لانه تنحط كمادة حافظه ؟؟


انا الي اعرفه ان الحكول يدخل في الادويه بنسبه بسيطه كمادة حافظه

بس استغربت من انه في اكل الواين الي فيه حلال لانه ماده حافظه


بصراحه شكيييييييت ؟؟



شغله ثانيه

انا وحده اعششششششششششق شي اسمه تراميسو

و قاعده اسووووووولف اني اموت على شي اسمه ترمسو وكل مطعم ايطالي برا الكويت اقعد فيه بس

عشان التراميسوووو


قالتلي نفس البنت


حراااااااااااااااام كلا رام !!!


قلت لها لا حلال لانه ينحط كمادة حافظه


ههههههههههههه


لا تقولون لي الرام حرام ؟؟

Saturday, November 03, 2007

يُسمعني.. حـينَ يراقصُني



يخـبرني.. أني تحفتـهُ
وأساوي آلافَ النجمات

و بأنـي كنـزٌ... وبأني
أجملُ ما شاهدَ من لوحات

يروي أشيـاءَ تدوخـني
تنسيني المرقصَ والخطوات

كلماتٍ تقلـبُ تاريخي
تجعلني امرأةً في لحظـات

Thursday, November 01, 2007

لوير = خريجه مخافر!!


انا خبري لما الجو يتعدل الواحد يرد بيتهم يشتهي يشووووف هديه
مفاجأة تنطرة

شي مني مناك
المهم رديت امس الظهر البيت و الا الاقي هذاك الظرف افتحه و الا مخالفه سرعه لي فوق ال 300 فرنك !!!
مخالفه الصيف !!
الله يستتتتتتر
اشوة ابوووووي ما طاح عليها جان فضحني!!

ليش ابوي لو امي طايحه عليهااااااا جان دافنتني لانها اسألتني مسويه بلوة قلت لها
اببببببببببببببببببببببد بنتج اسم الله عليها لا هي راعيه هالحركات و لا شي
اشقالووووولج يماااااااا انا صبي!!

القرادة مو جذي
القرادة علي مخالفه سرعه
و انا اصلا في السفر يوم و ترك في البوليس ستيشن!!
موديلي امشي و ادور بوليس ستيشن
صاااااااااار مخفر كلارنس مثل السوبرماركت
!!

اول مرا تخالفت كنت واقفه عند محطه القطار بس ما اقدر اروح سيارتي لانه غررررررررررقه
مطر و انا واقفه يا الضابط
و انا اقووووووله نوووو نووووو بليز انا هني كااااااااااااااني

بس مطر قالي المكينه يمج ليش ما دفعتي
المهم الحمار عطاني مخالفه
70 فرنك تأخير 3 دقايق في الباركينج!!!

ركبت السيارة رحت مريت رفيجتي
ودورت مخفر كلارنس
و كان غرقه و قيله و عفسه

و كشيشناااااااا طايرة!!
و هلاقتنا
من الصبح
تسنعناااااااا
و انا اضبط عمري عند باب المخفر رفيجتي تمسسسسسح حمرتي!!!
هاااااااااااااااااو انا داشه عند الناظرة!!

المهم دشيناااااااااااااااا فيلم
تمثيليه
حتى الكلب سلمنا عليه
دفعنا و مشيناااااااااااااااا

وتوكلنا على الله

و المرة الثانيه

هذاك اليوم اخر ليله لي
في ساعه متأخرة من الليل
احم احم
طالعين من مخبأنا السري
متدفيييييييين عقب الهوت شوكلت ومستانسين

ركبنا السيارة بوصل البنات بيوتهم
ماوعينااااااا الا كشافات و نقطه تفتيش

هم كان يومها مطططططططر الي يخرع
وقفني الشرطي

ليش كان هوا و مطر
فصرخ علي :سكري السيااااااااااارة

فطيييييييييم تنحت

فهمته بس من الخرعه ماكو ردة فعل
يصرخ علي : سسسسسسسسسكري السيارة

سكرتها و ابتسمت ابتسااااامه باردة
و في كل برود التفت على رفيجتي الي يمي قلت لها عطيني الدفتر و عقد الاجار
سحبت جنطتي الي وراااااا وطلعت رخصتي

لاااااااااااحظو اهو ماقالي شي للي الحين سويت من نفسي

اهما واقفيييييييين يمكن اكثر من 8
و كلاب
و سيايير و عفسه
واحد واقف على راسي يسألني

و رفيجتي الي وراااااااااا اخترعت و تضحك
ال7 كلهم تيمعووووووووو عليها

صرخوا عليها
اهي اخترعت جان تقولهم بالفرنسي
اشفيكم انا شسويت!!
و 4 يوجهوووون ليتات عليهاااا يطالعونها

نزلونا
يسولفون ويانا
انا وايد واثقه من نفسي
الي يمي صارت صنم ماتتكلم بس
تحاجيني من ورااااااا ضروسها تقولي رفيجتج الي ورا اشبهتنااا
مسويه جريمه ترا !!
اعطيها ابتسامه صفرا اقولها

الاخت عبالها قاعدين في الرياض بس خنوصل بالسلامه اذبحها!!

طبعا للامانه العلمييييييييييييييييييييه
اسفل سافلين خلق الله كانو هالشرطه
8 ريايل شبااااااااااب
بدعوا فينا اسأله مال امها داعي

سحبوناااااااا

و اعرفو وحده وحده فينا
اخر شي ولد الكلب يقولي اووه انتي باجر راده
قلت له اييييييي باجر قالي حسافه ما في وقت نشوف بعض اشرب وياج قهوة
انا ابتسامه صفرا قلت له الصيف الياي انشاء الله انا كل سنه هني

والضابط الثاني يقول حق رفيجتي اوووووة انتو في كلارنس
يمنا وين ساكنين اي عمارة و تطلع يم عمارتهم و يطلب يديتهاا على طول
المهم عطونا مخالفه لان الراكب الي ورا مو لابس حزام امان !!
اول مرا ادري ان الي ورا لازم يلبس !!
و مخالفه ثانيه حق رفيجتي لانها مو شايله اثبات وياها
لازم تشيل فيزتها او جوازها
!!

السالفه كلها لا مشتبه فينا و لا بطيخ و لا وقفوا احد قبلنا و لا وقفواااااااا احد بعدنااااا
وقفونا احنا بس و سوولنا لووووويه

و رفيجتي الثالثه العنت ابو ابو ابونا و لكم ان تتخيلوووووو انواع السب الي سبيتها الضابط
و سبيتها رفيجاتي يمكن نص ساعه و احنااا مو مستوعبييييين يوم طلعنا كل وحده فينااااااااا تحط حرتها في الثانيه !!
اخر شي عرفت ليش رفيجتي الي ورا شاكه بروحها لانه خدامتها منحاااااشه
وعبالها قاعدين يدورونها!!!!!!
مو اقوووووووولكم مسويه جريمه

المهم امس دقيت على رفيجتي الظهر و الا مسكينه نايمه قلت لها قوووووومي قووووومي
ياييتني مخالفه لي بيتنا
قالت لي كم ؟؟
قلت لها السعر
ردت علي في بروود هذي حقت طريج جنيفا مونتروا الهاي وااااااااي
مبروووووك

استني جايك انشاااااء الله السفير الفرنسي يسحبك من كششششششششتك على الي سويتييييييه في طريج المونت بلانك جنيفا!!!
وسكرته بديت استوعب شنو سويت في طريج الردة من الشومونيه !!
شي لا يقاااااال لا يوووووووووصف
بس جريمه في حق البشريه