Wednesday, April 26, 2006

كان حبيبي ..كان زوجي ..اليوم اهو بوضاري و بس

ادخل الطياره .. اخذ مقعدي المريح ..
ابني الصغير و الخادمه يجلسون في الخلف ..
اوصي الشغاله على ولدي و اقولها عطيه رضعته ونوميه
و اذا قعد بعد ساعه ميخالف هاتيه عندي و انتي ارتاحي
..
المقعد الي يمي واحد عربي الجنسيه ..مممم يمكن سوري !
اردني !!
هم ما ادري بس ليش ابي اشغل نفسي في اي شي
يقدملي حلاو بالنعناع قبل الاقلاع ..
اخذ منه ..و اتشكر له..
اسرح في كتاب الادعيه الي معاي..
حصن المسلم
يالله لك الاجر العظيم يا سعيد بن على القحطاني
على هالحصن الي في كل بيت ...
ادعي ربي ان يفتحها علي و يسخر لي من عنده
ادعي ربي ان يلهم زوجي رشده و يرجع لي بعد عشره 22 سنه
ادعي ربي ان يسخرلي ابنائي و يحفظهم
ادعوك يا ربي انك اتثبتني و تاجرني في مصيبتي
وتخلفلي خيرا منها
...
يارب ان فلانه بنت فلان تسلطت علي في زوجي و بيتي
يارب من عندك تنسفها
يارب اسألك بقدرتك عليها فانك القادر و ليس بقادر سواك يا الله
يارب اهدم و حطم حياتها مثل ما حطمت بيتي و اعيالنا
فرقها يا رب و لا تجمعها مثل مافرقتني بسحرها و شعوذتها من بيتي
يارب قدرت علي ..هذه الانسان بحول منك و بأمرك و ليس لها حول و لا قوه الا بك
يارب اسألك بعظمتك وحولك و يا مغيث اغثني و انت القائل ادعوني استجب لكم و ها انا يا رب ادعوك في سفري هذا
ان تقدر لي كل خير
...
اطالع ساعتي ..
يالله مابقى شي
اسرح في كوب الشاي ..
اتذكر ابني الي ناسيته مع الشغاله ورا
اروح اتطمن عليه
حياتي نايم بعد روحي
نومته مثل ابوه بالضط
يالله اشكثر احب ابوك على كل الي سواه فيني
امسك اصابع ابني الصغير و اسرح في اظافره
سبحان الخالق الناطق
اتذكر اول مرا كنت في شهر العسل
لما طلب مني ابوه اني اقرض اظافر ايده
واشلون عطيته مقراظه الاظافر و قلت له
راح اقضرهم لك بس بشرط
اتخليني احلق لحيتك!!
وقتها ضحك و قال مالج امل
مينووووووون انا اسلمج ارقبتي!!
حذفتها عليه
و قلت له عيل عابل بعمرك
..قاطعت افكاري المضيفه تستأذني انها تبي تمر و انا مسكره الطريج
أشيل ولدي على كتفي
وانومه بحضني
يالله اشلون اقدر اعيش 3 شهور من غير ما الم ابوك
يالله ثبتني
... ارجع مكاني
يسألني الرجل العربي
عن ابني
اقوله و كلي فخر
اي هذا الحلو ابني
طالع علي :)
يبتسم و يدعيلي ان يكون ابن صالح بار فيني و ناجح في حياته
....
العربي : عندك اولاد غيرو؟
انا : يخزي العين عندي 5 غير فهد الي في حظني
اسحب جنطي
يطيح بوكي
اخذه من بين ريولي
افتح البوك
اطلع له صور اعيالي
و انا بيني و بين نفسي
اقول اشفيني ليش انا من شفته وريته اعيالي مو مصدقه
بس توسمت فيه الخير لان رجل كبير جدا في السن و مو كويتي فماراح ينقد علي
هذا ضاري الكبير ...عمره 20 سنه
الحين اهو في بورمث في بريطانيا يروح كل صيف هناك مع اصدقائه بحجه اللغه ..
وهذا خالد ..عمره 17 سنه مع جده في مصر ..
خالد نسخه من ابوه في كل شي شكلا و مضمونا
وهذا سعود 12 سنه
وهذي حنين 11 سنه
و هذا ضرار 9 سنوات
كلهم في امريكا مع ابوهم
و انا مسافره مع فهد الصغير و الشغاله
عندنا بيت صغير هناك عندكم في الاردن ..مع بستان كبير
احب اصيف هناك اذا ابي اهرب من الناس
لان تدري في الصيف كل الدول الاوربيه مليانه خليجين
لكن في شارعنا في عمان و خصوصا في مزرعتنا و مكانا ما اشوف احد ابد
فجأه حسيت اني هذرت على راس الريال
و اهو يبتسم
... ويسألني مسغرب
و ليه منك مع جوزك؟؟
ارد عليه و قلبي يتقطع : لاني انفصلت عنه من اسبوع
حسيت في اعيونه نظره استغراب
و بالحرى عطف و شفقه و كل شي
...
احول اسوي نفسي عادي عشان ما اخليه ينحرج من سؤاله
..والله يا عمو ادري هالحياه الي يعيش فيها ياما بيشوف
بس كل شي قسمه و نصيب
يرد علي : اكيد اكيد
يتمقط ولدي
يقعد من نومه
ياختي على عقده النونه هذي
مالت بابا ..
اوري العربي عقده النونه و النظرات هذي
اقوله انه يشبه حركات والده لما يصحى من النوم
..
يبتسم
استأذن منه
اروح اخذ اغراض ولدي والشغاله عشان تساعدني في تغير الحفاظات
ارجع مره عاشره لمقعدي
كثيره الحركه انا اليوم
متوتره
....اربط حزام الامان استعدادا للهبوط
..
بعد السلام الحار من حارس المزرعه و السواق
و ابنهم الصغير اركب مع ابني
نروح البيت
يالله البيت هذا هذا من عشر سنوات
ما يتغير فيه شي
ابد
تستقبلني الاسره الي عايشه في البستان للحراسه و جني المحصول
ناس سعيدين جدا
بسيطين وايد
لما اقعد في البرنده و اسرح بجريدتي و فنجاني ..اتأمل فيهم
دايمين السمر بالليل و الضحك و البسمه ما تغيب عنهم ابد
على الرغم من انهم لا يملكون شي
صج الي يقول السعاده مو في الفلوس
السعاده في القلب
...
يتصل علي ابني الكبير ضاري
يتطمن علي
ابشره اني في احسن حال
ضاري حبيبي اكثر واحد شايل همي
الحين صرت احس اهو رجل حياتي اهو ابوي و اهو اخوي و سندي
الله لا يحرمني منك يا ضاري
انا: حياتي اشلونك مع الصلاه
ضاري : طقه و طقه ..ماقلت لج اجمع يومين بيوم واحد!!!
انا: الله يسامحك ربي باجر بحاسبني عليك
ضاري : لا يما اشفيج انا في سفر !!
انا : و اذا يعني المسافر ما يصلي..!!!
ضاري : يما شخبارج بعد اشلونج ؟؟ هالله هالله في المسجات الطيبه
انا: ضويري لا اتضيع الصقله حط بالك على نفسك و على صلاتك و بس
يالله فكني ما ابي تصير عليك مكالمات !!
ضاري: اي ميخالف انا ابي اتصير علي مكالمات عشان اطلب منج .. و اقولج ان احتاج فلوس من كثر ما صرفت على المكالمات!!
انا : حريمتك يالله روح ديربالك على نفسك ....دق على خالد و على باجي اخوانك تطمن عليهم
اسكر الخط
تدمع عيوني
انا فيالاردن
ولدي في لندن و الثاني في مصر و الباجين في امريكا
يالله اجمعنا و لا تفرقنا
يالله حكمتك ربي
يارب والله متحطمه على اعيالي
يارب ولهانه عليهم
ياااااااااااااااارب تعبانه ياربي
تقاطعني الحجه مريم(زوجه الحارس) بدك قهوه؟؟
ياريت يا حجه مريم اتيين تقعدين وياي في البرنده مع بناتج و كنتج اتسلوني شوي
ترد علي :هاله بجيبلك التين و القهوه و بجي لعندك
و اتيبلي الجوله الصغيره !!
انا : ويه يا حجه مريم من وين يبتي هالجوله
تدرين كان في الكويت قبل نفسها يسمونها بريمز !!
شكلها عجيبب
و اسهر معاهم لي اسلاعه 12 في الليل
بعد ما تعشينا و استمتعنا
ادخل غرفتي
الفراش موحش
اخر مرا كان زوجي و بنتي معاي
تدمع عيوني ولهانه على حنين
ادز مسج على موبايل سعود ولدي
((حياتي سعود الوقت مناسب اني اتصل))
طبعا انا علمت سعود اذا كانت مرت ابوه يمهم يقولي غير مناسب
و اذا كانت مو يمهم يقولي مناسب
و دايما بنتي حنين تتعمد انها تكلمني و معاها ابوها عشان تحرج ابوها يسلم علي
و تحاول هالبنت توصل ابوها فيني بكل الطرق
اتيني مسج افتحها ((يما حبيبتي انا ولهان علج وايد مع اخواني و ابوي بعد اكيد ولهان عليج تدرين يما ابوي امس نام ويانا ما نام عند زوجته ..بس للاسف الوقت مو مناسب لان حيزبونه موجوده ))
بس انا ولهانه على اعيالي اكثر
افتح قناه روتانا اعلي عليها
اتصل في سعود ...ادري في سعود يسوي نفسه ما يسمع عشان يخلي ابوه يفطن ان في احد دق
يشيل التلفون ..
سعود: هلا يمااااااااااااااااااااااااااااااااااااااااا ولهان عليج حدي
يما سان فرانسيسكو من غيرج ما تسوى شي
يما اشلووووووووونج؟؟
انا : بكل هدوء ..هلا حبيبي اشلونك عطني بوسه بسرعه
شخبارك حاتي اشلون اخوانك و حنين
عطني اياها ولهانه عليها
..يما يما هاج ابوي على ما اروح اناديهم ...يحذف السماعه على بوضاري
بوضاري: الووووووووووو السلام عليكم ..هلا ام ضاري اشلونكم
انا : هلا فيك اعيالي اشلونهم انشاء الله مستانسين لا تكدرهم دللهم و ديربالك على كمام ضرار ترا ما يحس في نفسه كلا يركض و اذا صار بالليل يتعب
و اهم شي حنين تبي كورن فليكس بالليل
و لا تنسى اشترلهم كل شغل المدارس لاني ما اظن برجع الكويت من شاف الوناسه و السهر اهني شكلي بقعد لي رمضان اهني
بوضاري المطنقر : يصير خير انشاء الله اشتريلهم كل شي
تسحب حنين السماعه من ابوها
حنين: عسووووووووووووووولتي عسووووولتي اشلونها ولهانه عليج ماما
انا : اتغورق عيوني من دلعع هالبنت اتماسك او امسك نفسي شوي....هلا امي و ابوي و خلف طوايفي كلهم بسرعه حبيني
و قوليلي اشتبين اشتريلج من اهني امي؟؟ تاكلين عدل .؟؟ تفرشين اسنانج بالليل
حنين :يماااااااااااااااا ترا حيزبونه طقت ضرار و انا طقيتها و قلت لها بعلم عليج ابوي و امي
عشان امي راح تذبحج
يما الله يخليج تعالي ما نبيها الله يخليج يما
ابوي حلو يما ابوي والله صار يعطينا فلوس وايد تعالي انا عندي فلوس يما
و بأنهيار ارد عليها : عطيني ابوج بسرعه
انا: ساااااااااااااااالم هذا الامانه الي عطيتكك اياها انا اعيالي ينطقووووووووون يا سالم
انااااااااااااااااااااا اعيالي اعطيك اياهم تسفرهم و تحلفلي انك بتحطهم في عينك
اخرتها ينطقون
سالم: اشفيج الله يرضالي عليج لا طق و لا شي غشمره كانت تتغشمر معاه و انا بعدين قلت لها اعيالي مو متعودين على الغشمره الثقيله
و خلاص اوعدج ان ماراح تسمعين شكوى من احد
انا : والله يا سالم لو واحد فيهم يشتكي من شي مرا ثانيه والله بخليك اتردهم لي باول طياره
دامك مو قد المسؤليه ليش تتكرم و تاخذهم
......يسكر الخط في ويهي
اطالع الموبايل
و ابجي
الله ينتقم منج يا رب الله ينتقم منج
ربي يوريني فيج يووووووووووووم
ياللي فرقتيني من اعيالي و بيتي
اقعد ابجي على سيادتي لي الصبحادعي ربي يثبتني و ادعي عليها بالموت
ياذن الفجر
اصلي في البرنده
انطر الشروق
اروح انام
اقوم الساعه 2 الظهر
الحجه مرم تبلغني ان والدتي ووالدي اتصلوا اكثر من مرا
اتصل في امي
اتطمن عليها في مكه
الجو حار و امي تقضي الصيف كله في شقتنا الي في مركز مكه مجابله الحرم الله يهنيها
...ادق على خالد و اتطمن عليه
اسلم على ابوي
خالد ما يعبر عن مشاعرع ابد
لازم انا ازيد من جرعه العواطف
من غير ما يطلبها مني
امه و افهمه
اتحضرلي الحجه مريم الحمام الدافي
اسبح و اشرب القهوه
الحجه مريم : يالله ياربي انت عالم فيها اشرح لها قلبها يا رب
انا : اميييييييييييييين و جميع المسلمين
الحجه مريم : ما ألتيلي وينوه لابو ضاري و اشلون اجوز عليج و ليش اتطلقتي ؟؟؟؟
انا : اخذ نفس عميق و اتنهد
..اااااااااااااااااااااااااااااااااااااااااااااااااااااااااااااخ سكتي يا ام الخير سالفتي سالفه لا لها اول و لا تالي
بس حضريلي شيشه و شغليلي روتانا طرب عشان اقولج كل الي في قلبي
يتبع

اكون او لا اكون


بس خلاص كافي

الكل عرف الكل درا

لي متى انتي مستمرة

لي متى انتي عنيده

لي متى ماتسمعين الكلام

اشناطره؟؟

شنو الي تبينه بالضبط

شنو الي بتصولين له بالضبط

لي وين رايحه ؟؟

قوليلي عشان اعرف

بس انج تسبحين لي هالعمق!!

اخاف ايي يوم مالج قيش فيه!!

!!!!!!!!

انزين حشميني انا !!

مالي قدر عندج ابد؟؟

مالي خاطر عندج ابد

...

قدرك عندي على العين و الراس و لا احد يقدر يساوم فيك

بس هذا انا .. عيوبي بلغت عنان السماء للاسف

بس مكاني اهني

يا اكون او لا اكون اهني و بس

البيت الوحيد الي بنيته ..

Tuesday, April 25, 2006

بسرعه انكسر


ترا الزجاج بعد الكسر ما ينلحم

Friday, April 21, 2006

انا ريال جذي ..ماني شايف فيني عيب..بس مشكلتج ماتبيني جذي!!

يا بنات فهموني بليز ابيكم تفهموني
انا شاب عمري 28 سنه
ماني حلو بس ماني جيكر
الحب الي تبونه انا نسيته من سنين من تخرجت من الجامعه
الحين صارلي 6 سنوات
اكلم... اخربط .. احب
كل شي اسويه
بس ما اعشم
و لا راح اعشم
و لا راح اللعب في ورقه الزواج
اصلا ما احتاج
تدرون ليش لان اغلبكم راضي فيني جذي!!
انا كتله من التناقضات
تربيت على مبادئ و كبرت غيرت الدنيا مبادئ اهلي الي اغرسوها فيني
شفت بنات اشكال و الوان
بس تدرون اذا كلمت اكثر من واحده
و هذا الي حاصل الحين
امل بسرعه
ما ادور عن الحب
لانهم كلهم يحبوني و احبهم
نسيت اقولكم
انا من انصار نظريه
قلبي مثل الدكان حق كل واحد له مكان
بس اتهزني البنت الهاديه الي ما تطالع
الي ملامح ويها برئ
بس ما افكر اقرب يمها عشان ما احب اخرب البنت
ابيها اتيني خربانه
سووري رفيجاتي
مو قصدي انتوا مو شي
بس انا ما احب اشيل ذنوب بنات
كافي ذنوبي
باختصار
يا حبيبتي الي مليتي مني
بختصار يالي ناطرتني من زمان
انا ما اخونج بس انا جذي
ماني شايف غلط بالي اسويه
و عشان تفهميني عدل
انا احبج استانس معاج
بعد يومين اتييني وحده
تبي تستانس معاي
تبيني اردها !
لا طبعا ما اقدر
انا ريال و بستانس في شبابي
ليش تعامليني معامله زوج!!
وليش تبيني اغار عليج جني
بوعيالج !
لو ابيج تزوجتج من زمان
انا ريال
اعرف شنو ابي
و لو ادري ان راحتي وين
جان ما شفتيني معاج
باختصار!!
اقري هالابيات وفهمي منو انا بالظبط
يابنـت أنا ماني كذا وظنونـك تكّـذب عليـك.....
...كلّي عيـوب وماقوت تخجلني ظنونك وأتـوب
أكذب عليك ودوم أخونك وألبس الأبيض وأجيك
..وأعشق معك ألفيـن وجه ويمتلي صدري قلـوب
أحلى الكـلام أقول لك لو قلته البـارح لذيـك
...ياقف على شفاهـي معك مراهـقِِ صبِ لعـوب
أكـذب ولا أدري ليه أكذب أعشقـك ما أرتجيـك
....أخاف من صدق الحقيقة في الهروب من الهروب
والله أحبـك وأعشقـك وأعرف زمان اني أبيـك
....لكنهـا هـذي الحيـاة اتعلمـت منا الـذنـوب
العيـن عجزت تعتقـك القلـب عيّـى يشتريـك...
....في السجن خيّال وفي في الصدر رجـّال كـذوب
هذي الحقيقة ما يجي في الكـون أطهر من يديك...
.....وانا الذي أنقض وضـوء الغيم والما والهبـوب
أنقل عيوبي فوق متني وانت لك عيبـك شريـك....
.....وباكر تبسـم لي وجـيه لك يعبسها الشحـوب
يا طاهـره حنا كذا المظهـر يكـذب عليـك......
...يمكن يجي يوم أخجل من ظنونك وأتـوب

Saturday, April 15, 2006

فيه كويتي؟؟

احبج بس ما ابي اقولج
دلليني......... و بتغلى
دلعيني ...
لا بلييييز ترجيني اكثر !!
في البدايه بركض وراج ..
دخلت مزاجج !! حبيتيني..؟؟
عيل اكليها !!
باذيج و بحقر !!
اول يومين روميو
ثالث يوم قيس بن الملوح
عاشر يوم
الحب يندفن في مقبره صليبيخات !!
سمعتوا عن الفاست فود طبعا
لكن الموضه الحين في الكويت
فاست لوف!!
ممكن سؤال ؟؟
كل البنات و الشباب الي اتناقش وياهم
يقولون مافيه حب هاليومين !؟
ليش؟؟
الهدف تغير ؟؟
او الشاب ماصار يصبر ؟؟
البنت ما تتحمل ؟؟
و الا شنو بالضبط؟؟
أول يومين من العلاقه الاتصالات تشتكي من كثر المسجات
بعدها يبدا العد التنازلي ؟؟
العيب فينا او في الزمن ؟؟
عموما
اذا شفتوا واحد مينن المرأه
و بالمواصفات الي كتبتها
لازم تعرفون انه كويتي
محسر في المرا تحسر
!!!!

Saturday, April 08, 2006

رياض التي رأيت ...

اقوم من نومي يوم الخميس الضحى ..على مسج .. من صديقتي في السعوديه .. تقولي ان والد فلانه الفلاني متوفي ..
ادق عليها .. اعزيها و اعظم اجرها ..
اقول حق امي !! اتفاجأ ان امي اصلا ناويه السفر للرياض بعد اقل من ساعتين !!
اقولها من صجج يما !! تقولي اي والله برووح حق خالي في العنايه المركزه ..
اقرر فجأه خلال دقيقه وحده بدون تفكير اني اروح مع امي الرياض
اتصل في اخوي يودينا ..نسوي جنطتنا من غير تخطيط بسرعه بسرعه
ربكه .. نوصل المطار الساعه 2 الظهر ..نسأل اذا في حجز ..للرياض .. نلاقي حجز .
اتصل في صديقتي المقربه لي بالرياض..
انا : الووووووو ريما بليز انا الحين في المطار ابي حجز في الفيصليه غرفتين و سياره بأسرع وقت ممكن..
والله ما تقصر ..
اوصل مطار الرياض الاقي ليموزين الفيصليه ينطرنا ....
نروح الفندق ...
الرياض الي شفتها غير عن الرياض اخر مره
التحليه غير .. شارع العليا غير .. الناس غير .. المقاهي غير !!!
نوصل الفندق .. الحريم الي في اللوبي و الاختلاط و الانفتاح على مصراعيه غير تمام..
فندق فخم .. ضيافه عجيبه ..
حراره استقبال ما نلاقيها في ولا بلد اخر ..الا اذا دفعنا بخشيش ..لكن في الرياض غير
بدلنا بسرعه بسرعه ..اتجهنا للتخصصي .. انا خابره المستشفى التخصصي من كم سنه اهو بعد كان غير
و الطالبات و الطلبه غير و الدكاتره و التقنيه و الطاقم غير !!
قلت انشاء الله ما يدش اي سعودي مستشفى كويتي و يشوووووووف البهذله الي في مستشفياتنا!!
تطور عمراني .. اقتصادي ..انفتاح .. تطور تقني ...
زرنا المريض و بعدها رحنا شوي بيت خالي الدكتور جمب المستشفى على طول في العليا ..
شفت بنات يصيرون لي ما شفتهم من اكثر من 16 سنه !!!
يالله هالكثر كبرنا !!
ارووح المحمديه .. اعزي ... اطلع من المحمديه على طوول من العزا .. لي مطعم الجلوب .. في الفيصليه .. سويت فلم مصري عشان احصل حجز فيه ...بدها طلعت فوق للمقهى و كانت امسيه روعه
صبحت الصبح يوم الجمعه .. الحيات ميته في الرياض صباح الجمعه .....
اقوم بزياره عائليه سريعه على وجبه الغدا ..
من العصر يبدأ مشواااااار المقاهي ..
قهوه عجيبه مدري شنو اسمها لها منظر خيااااااااال ... ما كأني يا ناس في الرياض .. لو كان قايلين لي دبي قلت ميخالف .. بس مقهى في فندق المملكه ..في الدور 77 مرتفع تشووف منه منظر الغرووب العجيب ...
و اتمشى في جسر المشااااااه شي فظيع
حسيت اني طايره ...
اجلس في القهوه ويا صاحباتي ..
الطاوله الي يمنا بنات يدخنون و الي يمهم بنات متغطيات من فوق لي تحت .. و احنا وسط لا كذا و لا كذا
قمه التناقض و اعتقد هذا الشي لا يوجد الا هنا !!
ياخذنا السوااق يودينا شارع التحليه
الي اهوو الشانز ليزيه ...
مقاهي اشكال و الوان مطاعم عجيبه ..
عزمتنا صاحبتي في مطعم اسمه عبدالوهاب
لذيذ وايد انصحكم فيه ..
.. بعدين اطلب منهم ان نكمل السهره عندي في الفندق قبل لا يـتأخر الوقت لان امي ما ترضى
نروح نشرب القهوه و نحلي في المطعم البرازيلي الي في الفيصليه
القعده وايد حلوووووووه الجو خيال
و اسلم عليهم و اودعهم لاني ماراح اشوفهم الا بالصيف
اطلع غرفتي ..
اقعد مع امي و خالاتي
و من باجر الضحى الي اهو اليوم السبت .. نسوي جناطنا و نرجع الكويت ...
كانت الرحله جدا سريعه
روووووووووووووووووعه
يا ناس الي وده يساافر الرياض ياخذني معاه
لان الرياض الي شفتها ماهي الرياض الي تركتها من كم سنه
شفت ناس غير
مجتمع تغيرت افكاره بسرعه البرق
مفاهيم غير
وناااااسه غير
ضحكت ضحكت ما بحياتي ضحكته
ملاحظه : للجياكر الي مثلي الي تعاني من قحط عاطفي و اخر رومانسي عليها ان تزور الرياض لمده 24 ساعه
راح تتأكد انها اجمل من هيفاء وهبي على كميه المغازل و الكلمات الحلوه الي تجيها
انا ما دريت اني حلوه الا امس في الرياض
انواااااااااااااااااااااع الكلام الحلو
ههههههههههههههههههههههههههههههههههههه
قلت لصديقتي اني راح اصدق نفسي
رجعت بلدي و بيتي و انا محمله بذكريات من الرياض عجيبه
و ممتعه
و يا ريتني ارووووح هناك كل شهرين على الاقل

Thursday, April 06, 2006

مشتاق و مضنيني الفراق

تروحين و ترجعيين بالسلامه
ما تتصورين اشكثر راح افقدج
يوم الخميس معاج غير
و يوم اليمعه طلعتنا غير
يوم السبت مدري اشلون بداوم و انتي وقهوتج اول شي اشوفهم جدامي راح اتغيبون عني
انشاء الله يا رب تستانسين و تتسوقيييييييييييييييييييييييييييييييييييييين
و تستمتعيييييييين في السووق عدل و الجو الحلو و تغيرين جو
حطي بالج على نفسج
ترا انتي غاليه عندنا وايد

Tuesday, April 04, 2006

عواطف الحاي ساعدينا

هي: الووووو هاي عمري شلونك
هو : هلا فيييييج شخبارج؟؟
هي: زييييينه حياتي شمسوي بشرني عنك انشاء الله كل امورك تمام؟؟
هو: والله الحمدلله كل شي ماشي تمام
هي: يعطيييييك الف عافيه مووووفق يا رب
هو: ها ! وينج؟؟
هي: والله ماكو توني راكبه السياره كنت متعشيه ويا صاحبتي براا
هو: وين متعشين ؟ و ويا منو؟؟
هي : متعشين في مطعم سي فود الي قلت لك عنه من قبل
هو: عليكم بالعافيه .. زين تسوين غيرتي جو..بعد شكو ماكو شخبار الديره؟
هي : والله ماكو الديره تمام وكل شي حلو مرات الجو يصير زين وومرااات هوا وغبار و عفسه و انا احوالي متغيره مع الجو.. لايعه جبدي من الدوام .. مالي خلقه متهاوشه ويا مديري الي ما يستحي على ويهه !! ما عنده لا حيا و لا حشيمه ..حزه التقاريرر يستنفروون هالمدرا
هو: اشلوون؟؟
هي : والله ماكو بط جبدي هالمدير قمت قدمت استئذان و رحت السوق ... حاط دوبه دوبنا عاد ما لقا الا انا !!
امووووووووت في العناد ما يدري كبر راسنا من خذينا حقوقنا و دشينا المنتخب !!!
هو : شنووووووو اي منتخب بعد ؟؟
هي : وييييييييييييييي انت برا الديره تعال ما دريت الكويت معفووسه !! المرا الكويتيه بتشكل فريق كره قدم و بيصير منتخب نسائي .. و انشاء الله بنروووووح كاس العالم و انتو حدكم ..حتى كاس الخليج ما خذيتوو..
هو: قمي زيييييييييييين من حلاتكم عاد تروحون كاس العالم و الا يصير عندكم فريق او نادي !!
هي: هوووووووووو ليش ما يصير عندنا بعد !!!! تغاروووون منا محد واقف في طريج و طموح المرأه الكويتيه الا انتوووو يا الرياييل !!
خلونا نوصل للي انتوا ما وصلتوا من سنيين ..ترا من صجي اتكلم!!
هو : رووووووووحي زين انتي بعد ..... كويتيه و كره قدم ... انتي تصدقين عاد وايد عايشه الدووور !!
هي : هووو !!؟؟ ليشششششش بلا ما اصدق !!؟؟
هو : امصدقه انتي بعد بذمتج اكوووووو شوورت يدش بمكوه المرأه الكويتيه !!!!؟؟ من حلاتكم عاد تلعبون كره !!
!!!
************
بالله اذا رياييلنا يفكرون فينا جذي ويييين بنووصل ؟؟
بسسسس والله خوش منطق وين بنلاقي شورتات قدنا ؟