Sunday, February 24, 2008

بعت الدنيا

هالايام عايشه موود مو طبيعي ويا اغاني عبادي الجوهر
و بالذات اغنيه لليل احبك
لليل أحبك .. مابقى في السما نور
والى ضواني الليل .. للصبح أحبك
واللحظة اللي كلها صد وغرور
اشوف قبري بين عينك وقلبك
في صدري اسراجٍ حزين ومكسور
رغم المطر والريح ... شلته افدربك
والله مابه غير لوعاتي قصور
وخوفي عليك الله ربي ..وربك
إلى متى ببني على صمتك جسور
لاحيرتني اسباب سلمك وحربك
العمر احبك... مابقي فينى شعور
ومتى جفاني العمر ... وشلون أحبك
اي اقتراحات اخرى لعبادي؟؟

Thursday, February 21, 2008

رائعه ليالي الحلميه


عندما تسكنني الوحده ادور على الماضي الحلو
من اروع ايامي كانت طفولتي و من امتع الاوقات في طفولتي هي تلك الساعات الي اقضيها مع ليالي الحلميه
تابعتها من الحلقه الاولى و كنت صغيره
و كنت احفظها لاني كنت مو بس اتابع ولكن اسجل الحلقه و اعيد و ازيد فيها
بساطه الدراما المصريه والاسلوب
اسطورة اسامه انور عكاشه ترعرعت معاها و كبرت
كبرت و انا احلم بواحد يحبني مثل ما حب على زهرة
و واحد يتألم للفراق مثل ما يتألم عادل ببعد قمر
ببكاء زينهم لفراق سماسم
و بخفه سلموونتي لما يتحلى على نفسه و حوارته الي اموت من الضحك
اروع حوارات في الدراما المصريه هي حوارات صلاح السعدني في ليالي الحلميه
قناه روتانا زمان نخلت الماضي الدفين و طلعت احلى ايام عمري
الحين قاعدين يعيدون ليالي الحلميه في روتانا زمان تصدقوني اذا قلت لكم اشوف الحلقه و اشوف اعاده الساعه 1 بالليل و سبع الصبح!!
اتصدقوني اني عقب 20 سنه !! اولا صار عشرين!! ابي انا عيوز!
المهم اتصدقوني اني بعد عشرين سنه مازلت احلم و انا اتابع
ومازلت اتأثر و انا عارفه القصه تماما
اول مرا انتبهت انهم يحطون المسلسل في روتانا زمان
وسمعت الاغنيه بجيت
ذكرت ايام حلوة
اياااامي
طفولتي
برائتي
و اسأل نفسي صج انا يينيه اشفهمني هذا كله شنو هالاهتمامات يعني !!
و اتصدقوني اذا قلت لكم اني لي اليوم تدمع عيوني لما اسمع اغنيه المقدمه و النهايه
ومعاي حق لما اتأثر بصوت المبدع محمد الحلو
في هالاغنيه الي تحمل معاني كبيره
احب ليالي الحلميه
احبها وايد
جزء كبير من حياتي
و من الاشياء الي ارتبطت فيني
و اربطوها الناس الي حواليني فيني
اتركم مع اغنيه المقدمه
و كلماتها
و لا يطوفكم متابعتها توها الحلقه الرابعه من الجزء الثالث
توا الحب راح يبدي فيها
ااااااه لما يقول في الاغنيه
ليه يا زمان ما سبتناش ابرياء!!
ااااااااه علىها ايام كان كل شي حلو فيها
كانت ايام تتحقق لنا الاماني من غير حلم
مجرد امنيه و تحقق
كانت ايام ماعرفت فيها الحرمان
ااااااااااه يا ليالي الحلميه اه


منين بيجي الشجن.. من اختلاف الزمن

ومنين بيجي الهوى.. من ائتلاف الهوى

ومنين بيجي السواد.. من الطمع والعناد

ومنين بيجي الرضا ..من الايمان بالقضا


من انكسار الروح في دوح الوطن

يجي احتضار الشوق في سجن البدن


من اختمار الحلم يجي النهار

يعود غريب الدار لـ أهل وسكن


ليه يا زمان ما سبتناش أبرياء

وواخدنا ليه في طريق ما منوش رجوع

أقسى همومنا يفجر السخرية

وأصفى ضحكة تتوه في بحر الدموع

ولفين ياخدنا الأنين

لليالي ما الهاش عينين

ولفين ياخدنا الحنين

لواحةالحيرانين
ملاحظه:
انتقالي من الجي ميل
لي الهوت ميل لخلل في الجي ميل
مو عشان ايني ادد من ناس ما اعرفهم
من باب الذوق يعني
الي يسويلي ادد
يستأذن بايميل
او يعرف بنفسه و الا يعتبر مصير الادد الي الديليت
شكرا

Monday, February 18, 2008

بسي تحلطم بس تحملوني


واي بنفجر من الاعصاب بطريقه مو طبيعيه
في الفتره الي فاتت كنت مسافره اجازتي تقريبا ثلاث اسابيع و انشاء الله باجر للاسف برد اداوم
واكتشفت ان اخر ثلاث بوستات كلا كاتبتهم في المطار ! مطيوره!
كنت في دوله وايد بارده ورحت دوله جوها جدا متقلب فصار الاتي نزله برد
وتغيير جو و ظليت اسبوع من طبيب لي مستشفى و اختربت علي السفره
رديت الكويت غبارو كلا بفراشي
!!


عالجت الالتهاب و الربو و الفلو و كل شي بس لانها انزلت بصدري و لاني تحولت الى حواي متنقل ادى هالشي ان يصيبني التهاب حاد بالحنجره و يمنعني الدكتور من الكلام

خمس ايام بدون صوت و صوتي كان يخرع


اجهد نفسي قصب بالكلام لاني اتنرفز من الصمت و الكلبه الخدامه تحر
اكلمها في الاشاااااااااااره تضحك علي بنت الكلب افصخ السليبر و اصقعها فيه
اروح البنك عشان اخلص شغله معنيه معلقه و اروح ما اكلمهم اسلم الاوراق و البطاقه
يبون رقمي اسجله في ورقه و اعطيهم
الله لا يواريكم نظره البؤس و الشفقه عبالهم ما اتكلم
خلصوني بسرعه ووصوليني لي الباب !
رحت اخلص شي متعطل لي في المطار
اتكلم بالاشاره
بعد الاشاره كتابه
الخط ظيم ما ينقرا
يتعاطفووون وياي و يخلصولي اموري
اكتشفت ان محد رحمني الا الرياييل ! و الكويتين
الخدامه ذابحتها انشاء الله قريبا
المهم انا باجر اشلون اداوم و اانا حنجرتي مجروحه
و كان المفروض ادام من جم يوم بس قظيتهم طريحه الفراش
واي برد الدوام قطييييييييييعه
احتاج اتحلطم من اليوم لي باجر
تحملوني مو كافي ما اعبر اتحجي
ترا انا احب اقرق و اهذر يعني ليش دايما عقابي يكون في الحجي
كاني احاجيكم و متجمده بفكس و ماي حار و داري صارت ثلاجه من كثر الرطوبه لاني كلا فاجه البخار
خذيت عسل
و نقعت علج البان في بطل ماي
و 24 ساعه ماي حار
و هرده
و بعد شنو شي زين؟
عطوني نصايح ما احتاج خدم فيها
وبعدين تعالو علموني
ليش الحين بصير العيد الوطني وماكو اي فرحه كلش
وليش هلا فبراير يلوع الجبد دااااااااااثر
يفشل
والبرامج اتييب الظيم
مذييع هيلقي الساعه 8 باليلل يقدم برنامج هلا فبراير و فعاليات بنظاره شمسيه و زلف!!
مددددددددددري شالاشكال الهيليقيه
فكونا سو مثل باجي دول الخليج و حطوا مذيعين لبنانين على الاقل سنع شكليا
او فرضوا عليهم اللباس الرسمي يا بدله يا دشداشه
الله يخلييييييكم بسنا هيلق
يامذيعات يعورون العين بمكياجهم و صبغ شعرهم يا رياييل بتنبط من المتن و كروش تفشل
وليش قناتنا داثره
لاحظت شغله
اول العيد الوطني يحجي فرحه و زينه و ايوبون لنا اعلام من المطبعه و الكهربائي
يعلق لنا ليتات جنه عرس هنود
الحين امر في الشارع ماشفنا بيت كويتين معلقين علم الكويت
و اذا بيت معلق يطلع بيت شيوخ !!
ليش الكويتين صارو مو سعيدين في الكويت ولا حابينها و لا يبون يحتفلون فيها؟

Thursday, February 14, 2008

خل الهوا ما بيننا و اقفل الباب


ولهاااانه
لعيونك ولهانه لهمسك ولهانه
ولهانه عيوني تشوف عيونك
ولهانه اسرح فيك
ولهانه

من قلبي ولهانه
ولهانه وله يعور
يقعدني نص الليل اناديك
افكر

حبيبي ولهانه
ولهانه احاجي عيونك
و راسي على جتوفك
ولهانه من صجي ولهانه
ولهانه تلفني بحضنك
و انام طول الليل بين ايدك
ولهانه احبك اكثر و اكثر
ولهانه وتعبت الحرمان

ولهانه و ناقصني انت
تعبانه من فرحه يتيمه ناقصها انت

تعبانه اهم وياك طول الوقت و انا الحرمان يلازمني و يمنعني منك


ولهانه و فرحتي ماتكتمل الا فيك

ولهانه ارحمني عيزت اقولك ولهانه


عيوني انت و النظر انت و الفرحه انت و الجفا انت
تمر الايام و يعدي العمر و الناس تفرح و اظل انا بروحي شفقانه وبتم ولهانه


ويظل خيالك وياي العمر كله افرح معاه بروحي



Monday, February 04, 2008

شالزياده الي تخرع فجأه؟؟

اشفرق ثلاث دنانير عن دينارين و نص ؟؟
ليش انا وايد محتجه على زياده سعر تذاكر السينما ؟؟
مابي مابي وايد غاليه 3 دنانير مساكين الي عندهم 5 يهال !
لو بره الكويت ادفع و جنه العيد ادفع و انا مو فاهمه الفيلم بس في الكويت و لويه اليهال بالسينما و الصراخ مو كفو ثلاث دنانير