Sunday, June 29, 2008

رجيم X رجيم


خلوني اكون مفيده لاول مرا في حياتي
بما ان احنا في عز الصيف و موسم الرجيم القاتل من الشباب و البنات

الكل طموحه مايوه بدون كرش

بعطيكم رجيم مفيد الدكتور قالي تنزلين 6 كيلو بس انا نزلت 5 كيلو
في الاسبوع طبعا

ملاحظه : هذا الرجيم ما تسون معاه رياضه ابد..
ولا تفكرون في النادي كلش هالاسبوع ..
والي متعود على المشي لا يمشي اكثر من 20 دقيقه
الرجيم هذا يصلح للرجال في اي وقت
و للنساء ما يصير تسوينه فتره الدوره
لازم تبدين من 9 يوم الدوره يعني الي العاده عندها 7 ايام
عقب ما تغسل بيومين تبلش تسوي رجيم..

ما يصير تسون هذا الرجيم اكثر من اسبوع و راح اشرح لكم اشلون ...

واليكم الرجيم..
الفطور
كورن فليكس "فتنس" مع حليب خالي الدسم ..
او فول من غير زيتون بس ليمون و بدون ملح وبدون خبز طبعا..
واهم شي
تشربون قلاص ماي قبل الريوق و قلاص ماي اثناء الريوق وكلاس ماي
معصوور عليه نص ليمون بعد الريوق...
بين الريوق و الغدا مسموح بس في نسكافيه
بدون سكر ..او شاي اخضر..و ماي طبعا..


الغدا
يا سلطه من غير طمام و من غير زيت زيتون وبس ليمون و بدون ملح..
و لحم او دياي او حمام او سمك مشوي...
و نفس الشي قلاص ماي قبل
و اثناء و الاخير معصور عليه ليمونه

العصر او المغربيات تشربون قلاص عصير
ليمون بالنعناع من غير سكر..

العشا قوطي روب
...

طبعا الرجيم هذا مافيه فواكه
مافيه خبز
مافيه ملح
ولا سكر
ولا اي شي
ادري بتقولون انتحار بس صج ينزل..
المرا الي تسوي هذا الرجيم لازم تعطي تبليغ عشان اي جريمه ترتكبها
راح تكون معذوره عليها..

الاسبوع الثاني..
تسوون اي رجيم تبوونه
وتمارسون الرياضه الي تبونها

انا هالايام مسويه رجيم قاسي؟؟
اشلون؟
شلت الوجبااااااااااااااااااااات
و صار اكلي كاكاو و ايس كريم بس
اشراييييييييييييييييييييييييييييكم فيني
عجيبه هاااااااا!!
اذا نفسيتي اتعبت
بلعت
اذا نفسيتي زينه
بلعت
ابي اصير من هذول الا كلا نفسهم مسدودة
اشلون :/
البوست الياي راح اقولكم اشلون نزلت عشره كيلو من غير لا رجيم
ولا بطيخ

Thursday, June 26, 2008

يارويحتي روحي .. نادي حبيب روحي



افتح عيوني المثقله بنوم ليل طويل ..
اسمع صوت باب يتسكر ..
و فوطه على الجمب الاخر من الفراش مرميه..
وو بقايا عطر نثر في الغرفه.. اعتقد انه اغتسل فيه ..
اسحب الفوطه ..مبلله رطبه استنشقها .. فهي للتو لفت على جسدك المبلل..
ارد اغفي شوي ..
اقوم على صوت مسج منه..


لي الحين نايمه؟

اقط الموبايل و ارد اغفي شوي..
اقوم ادخل اخذ باث..
ابتسم..
كالعاده مسج منه على مرايا الحمام خطت بكحلي
" اشكرج كانت ليله ماراح انساها طول عمري .. صوتج باذوني لي الحين "
ابتسم..
وبعدها ادزله مسج..

"قاعده على ريحتك و لافه نفسي بفوطتك ..لوسمحت مرا ثانيه بوسني قبل لا تطلع"

اطلب ريوق..
اتصل في الفلورست الي في الاوتيل ..
اطلب منهم تيوليب ابيض..

يوصلني الريوق

اروع منظر على البلكون..
قهوة
دخان
برد
بقايا تعب ليل طويل..
و نفس منهكه بالتفكير..
اروع منظر من هذي البلكون بصحبه موبايل

و حبيب اتذكر اني سافرت معاه ولكن ماشفته من وصلت غير ساعتين..

انزل الجيم
شوبينج
مساج في اخر النهار..
و انتظار..

اتأمل السويت في كل تفاصيله..
اتعرف على الهاوس كيبينج و اتكلم معهم بكل تفاصيل البلد..
لعلي اتسلى و اقطع الملل المتسرب لنفسي..

مسج
" شتسوين؟"

ارد عليه..

" منسدحه اشوف موفي "
مسج
" انا شوي و راجع .. فكراي وين انتعشا "
ارد عليه
" الاوتيل فيه مطاعم روعه .. اذا ييت نقرر وين نروح ناكل "

اقوم اجهز نفسي
فستان اسود
عقد لولو
و قليل من كوكو شانيل يمتزج بكريم
تظلم الدنيا ..
ويتسلل الملل
اعود للشرفه المطله على حياة ناس
مدينه اهتزت بالصخب
الا في هذه الغرفه الصامته..
اضاءه الشارع تنير غرفتي
افتح الاب التوب لاسمع اغاني تقلل من وطئه الملل

يا سدره العشاق يا حلوة الاوراق..
ملززوم عليه اشتاق يا سدره العشاق


عقارب الساعه تمر

تشير الى الساعه العاشره و النصف
يغلبني النوم
من برود يومي
و طول انتظاري لعمل لا ينتهي ..

يا رويحتي روحي
نادي حبيب روحي ..
ماظنتي خلي عن وعده يتأخر !

ارسل مسج
" وينك ؟"
يرد
" عشاء عمل تعشي انتي "

ادري حبيب الروح ناوي على الجيه ..

و في كل مره اردد الاغنيه ..
تتسلل دموعي معها ..
لانتظار مللته
و يوم طويل ..
ينفرط العقد في نهايه اليوم
و بقايا كحل على الوساده..
فستان
عقد لولو
سويت فخم
منظر يطل على اروع مطل بالعالم
برد
دخان
و كل شي ليس له قيمه بدونك
الساعه تشير الى الثانيه عشر
اسمع صوت باب..
هو : حـــــــبي ليكون نمتي..؟؟
انا : شلونك؟
هو : ولهاااااااااااااااان عليج حدي سوري سوري حبي ..
انا : ليش تصر على سفري وياك و تخليني طول الوقت بروحي ؟
يتأمل الغرفه
شموع
ورد
و بقايا من امسيه لم تكتمل به ..
اشعلتها سدره العشاق


Tuesday, June 24, 2008

يسعد صباحك







تمرون في هالحاله؟؟



في الدوام مثلا الباركينج كبير و مشترك ..
كل اليوم الصبح او مرتين في الاسبوع على الاقل تصادفين واحد لا تعرفينه و لا يعرفج
بس شوووفته الصبح تشرح الصدر.. مو جميل بس شرح..؟؟





في السفر مثلا يصادفج او تصادفك وحده ساكنه وياك في نفس الاوتيل
لا تعرفها و لا تعرفك و لا تبي تعرفها .. بس شوفتها تشرح الصدر
في ناس نحب نشوفهم لمجرد ان شوفتهم تشرح الصدر لا اكثر و لا اقل
..





اكيد كلكم فاهمين قصدي ..



انا وحده من الناس مثل ما قلت لكم اصادف شخص
يصفط يمي مرات .. شرح .. اذا شفته استااااانس من الصبح
هذي نزااكته و نسفته و سنعه و عطره .. ما يتغير ..و مشيته الهاديه ..
و هذي اناااا طايره مطيوره .. كلا مستعيله ..
بس عيوننا تتبادل ابتسامات صباحيه . لا اكثر و لا اقل ..
احب الناس الشرحين

اقول بناات
هذا الزييييييييييين مو مهند !!

Monday, June 23, 2008

شالحاله بالله!!

غياب
مرضيه
تاخير
استأذان
مرضيه
غياب
تأخير
استأذان
ليش كل يوم الصبح اتعسر قبل لا اقوم و اول شي افكر فيه اليوم شنو؟؟
مرضيه و الا غياب و الا شنو؟
ليش كل يوم احسب متى اتقاعد!؟
بقعد في البيت ومشولي نص المعاش راضيه..
اليوم و انا اخذ شاور الصبح
تكفون شنو طرا علي ؟؟
بشتغل امينه مخزن؟؟
يوم واحد في السنه تشتغل
و طول السنه تفتر..
و عطله 3 شهور بالصيف
و شهر بالشتا
ترا نعمه
انزين باجر شنو؟
طبيه و الا غياب؟
او بشوفلي صرفه بعمري !!
ابي دوام من العشر الصبح وين؟

Sunday, June 22, 2008

انت نعمة تستحق الشكر ..



هي في المطبخ تحوس
و هو مجابل الاب توب و التيفي
هي: حبيبي تبي كووفي؟
هو: نوو
تفتح الفريز..تطلع ايس كريم شيز كيك هاجن دااز
هي: تبي ايس كريم؟؟
هو : يس بيبي..تراميسوو
اسحب قفاش من السله
واعطيه الايسكريم
اقعد جباله ..اقط روحي على السوفا
اهو يتصفح موقع
وانا بقلبي حجي ..
بس مابي اقطعه..
افكر اسرح .. اكل ايس كريم
وفي عز اندمااجي في الاكل افكر بصوت عالي
واقوله..
فرح انخطبت..
هو: لاااا زين .. الف مبروك
هي : اتصدق انا مو فرحانه وايد..
ارد اكل ايس كريم و افكر
وهو يطالعني يبي يعرف مني سبب اني موفرحانه..
اي مو فرحانه بس لا تستغرب
لما رفيجتي طول عمرناا نحلم بقصه حب و عندها واحد تحبه
تموت عليه .. خمس سنين قصه حب مستميته..
ايفن لو كان اهو سرسري.. او مو زين .. بس تحبه
كنا كلنا على امل ان حبهم ينختم في زواج..
بس اهي اصبرت وايد
ووافقت الحين على هذا الي متقدم لها..
طبعا اهي تعرفت عليه 3 شهور قبل لا يعلنون الخطبه
بس صدقني اي نوو اهي مو طايره مثل لو كان هذاك الي خاطبهاا..
هو: ماتدرين شنو الخيره يمكن هذا احسن لها بوايد من هذاك..
هي: ادري والله ادري..
احط الايس كريم
اقوم قباله اكلمه اشتط شوي..
شووف انا بقولك شي
خلنا من كلام العقل والتفلسف و الخيره و المنطق..
اناااا انااااا كبنت اوكيييييه لما احب واحد و اتعرف على واحد
الشخص الي يكهربني .. الي امووت عليه
حزتهااا ما اسوي اختبار سنع او اخلاق مااكو واحد عشان يدش قلبي
يعبي ابلكييشن.. عشان اوافق عليه.. الحب اذا دش و طق القلب.. يكوون في مقدمات ان هذا الانسان زين..او منااسب بعدين هذا الانسان احبه..
مع الوقت يطلع سرسري
يطلع جذاب .. يطلع واات ايفر
بس احبه.. ابييه باللي فيه.. ابييه في عيوبه
اعيش وياه طوول عمري و انا يوم مرتاحه و يووم مو مرتااحه بس
راحتي يووم و انا طايره بالحب تسوي الدنيا ..
الكلمه الحلوة تسوى كنوز الدنيا
اذا تزوجت فرح ريال ماتحبه بس عقليا زين و ارتاحت له و مناسب ..
يبقى دايما في خاطرها هذاك او بقلبها فراغ ما يلمليه شي
و تبدى اهني عيونها تزوغ هناك
و عيونها تدمع على اغنيه حب .. و مع الوقت و المشاكل و الروتين
تصير حياتها .. بارده
بس اوكيه يتم في اخلاق و احترام و كل شي.. بس مافي السبارك
مافيه الروح الي تعشق
يووم لما اييها مزااج تعيش كحبيبه و تطير بالحب ماتقدر تسويها ويا ريلها
لان مو حلمها ..
بقولك شي.. احنا البنات اغلبنا اغلبنا من احنا مراهقات او احناا يهال..
نرسم لنا حلم صغير.. يكبر الحلم ويانا كل ما كبرنا.. ونسعي اشكثر عشان انحققه
تسأل اي بنت فينا ليش مو فرحانه في الي خذيته تقولك لان مو حلمي..
تسألها بقلبج واحد تقولك لأ
بس مو حلمي.. مو الي متوقعته..
مو كل حلم صح.. ادري
بس يبقى حلمي...
اتعب من كثر ما اشتطيت في السالفه..
اقط روحي على السوفا..
التفت ..
هي: الف الحمدلله انك انت ريلي.. واني خذيتك..
لو ماخذيتك راح اعيش طول العمر وانت بخاطري..
يضحك على عفويه كلماتي..
يقوم ..هو: اي والله الحمدلله خذيتج جان طالع براسج نخله !
هي تكفخه و اهووو ماشي ..يرد الايس كريم..
هو: حبيبتي ..تدرين اشكثر انتي غاليه و احسن مراا بالدنيا و اشكثر انا احبج
هي تقول بقلبها .. انشاء الله مايقووولي طبخاي
انشاء الله ما يقوووووولي طبخااي!!
هي : اي اي اي؟؟؟
هو: انا بروووووح انام شوي .. بليز مابي اسمع حس واحد فيكم
و ياريت يااااريت تصيرين خووش مرا و تاخذينهم و تروحين وياهم البوووول
هي : الحيييييييييين انت مواعدهم بتوديهم و انا بروووووح الصالون
عندي موعد !!
هو يسااحل : الله يخليييييج لهم يلا تكفين انتي وديهم!!؟؟
هي : برووووووح الصالون .. اخذ عيالك انت .. اي نييييييييد ماي سبيس!!
يسوي حركات تكسر خاطري ...
اقوله اوكيه ...
اخذ اليهال و اطلع النادي ..
طول الوقت سرحانه بالكلام الي قلته له..
و خطبه فرح..
و حياتي ..
وضع صديقاتي و اوضاعنا..
يمكن حياتي مافيها شي كامل .. و كلها امور روتينيه عاديه
بس لما افكر في نهايه اليوم .. ان حبيبي اهو زوجي .. صديقي..
امي و ابوي و اهلي و كل هالدنيا .. احمد ربي الف مرا لوجوده بحياتي..
ادش الجيم..
اراقب اليهال..
اسحب موبايلي.. ادزله مسج..
انت نعمة تستحق الشكر..
انت بحياتي كل شي و احلى شي
عطيتني شبابك
اسمك
عيال منك نورو دنيتي
كل لحظات حلوة معاك
و بسببك..
و كل فرحه منك ..
انت فعلا نعمة تستحق الشكر..

Wednesday, June 18, 2008

ابي احبك اكثر



ابي احبك اكثر
ارددها مرا ثانيه
ابي احبك اكثر



يطالعني
يبتسم
ألمه حيل من كل قلبي
اقوله حبيبي ابي احبك اكثر
احس توني لي الحين ما شبعتك
احسني توني عرفتك

تمر ايامنا
ليالينا و انا احس بقى عندي وايد لي الحين ما عطيتك
كلام واايد بعدي ما قلته

حببيي
ابي احبك اكثر

يرفع نفسه
يتسند على تاج الفراش
يرفعني
يحطني على قلبه
يقولي : قولي الي بخاطرج

اقط راسي على صدره
انا خايفه من باجر
خايفه حتى من بعد باجر
خايفه من يوم يمر و انا بعدي ما قلت الي عندي
خايفه بلحظه زعل انت بتكون مو عندي

ابي احبك اكثر
ابي حبي لك اعيده من الاول
ابي ايامنا الحلوة
ما توقف
بعدي ما قلت كل الي عندي
بعدي لي الحين ما فرحت اكثر
عندي لك وايد
بس خوفي اهو الي مخليني اقصر

تنزل دمعه من عيني
تسري بخدي
و تنزل على صدره
ارفع عيوني اشوفه
يصد عني
وبسرعه يسحبني
و من هالدنيا يخشني
يلمني حيل
حيل و اكثر
اصيح بين ايده
يدري ليش ابجي
كلمه وحده اعيد و ازيد فيها
ابي احبك اكثر
ابي احبك اكثر
خلك عندي
ابي احبك اكثر

Tuesday, June 17, 2008

قايله ماني متحجيه !!


الثلاثاء 17 يونيو 2008 - 06:59
مئوية فهرنهايت
طقس مغبر والرياح شمالية غربية معتدلة الى نشطة السرعة ( 25 - 45 كم/ساعة

العظمى المتوقعة
42
الصغرى المسجلة
30
الغبار برا بطريقه مخليتني مكتئبه
احاول اسوي نفسي عادي و اقص على عمري .. و اقول الف الحمدلله و غبار و لا غيره
ومن هالحجي
بس ماقدر اتعب نفسيااا
اطل من دريشه مكتبي اكتأب زياده
سكرت الستاير ...
كل ماله و احس الدنيا تظلم زياده
ادري ماكو حل
و ادري ما تفيد حنتي بشي
بسسسسسسسس صج صج صج
جوووووووووو كئيب
ماني قادره اتنسسسسسم متنك صدري مختنقه
من ارد البيت 24 ساعه نايمه
مو بس عشان مابي اطلع ؟ نوو
عشااااااان احس ماكو اوكسجيييييين
احتاج اكسجيين
مطوله سالفه الغبار جنها
فيني بجوة
بقولكم سر
احتاج اتعرف على طقاقات
صج لا تضحكون علي
ابي اتعرف على طقاقات و اييبهم يطقون كل اسبوع اسبوعين
المهم اسوي حفله في الشاليه
بس تبدي الحفله من عقب الغداا
مممممممم قاعده افكر في الموضوع و اتخيل رفيجاتي و انا اقولهم تعالو طقاقات
مممممممم كلش ما يساعدون
ايبون الكآبه اكثر
كلنا يا مغلقين يا نايمين يا انصييييح
اقولهم PMS
بس لي متى ماااااااصااااااااار

Sunday, June 15, 2008

مهند حماااااااااار

تحديييييييث الاغنيه

مهند

انت حماااااااااااااااااااااااااااااااار و حقير

واكرررررررررررررررررررررررررررررررررررررهك

اشوة اني من البدايه ما حبيتك

و اليوم كرهتك اكثر و اكثر

احلى مافي المسلسل مناظر تركيا

الله ياااااااااخذك

خااااااااااااااااااين

كررررررررررهته

يووووووووووم كان في السياره ويا الحماره
و نور تدق عليه و يطالع ومتوهق و لايعه جبده

كررررررررررهته يجذب

وااااااااااي اتتتتتتتتتتحر اكررررررررررررهك


ترا انا مجابله المسلسل الحين وحاطه حرتي هني في البلوق

برووووووووح احتر


مانلام لما اكرهه الرياااااااييل

و نور كلا بتسوي مفاجأه و تفرحه و اهو حمااااااار
بط جبدي


الله ياخذك بس بسكر التيفي
اهداء

Thursday, June 12, 2008

صدمه عمري !


في عز انشغالي و حوستي في العمل .. ولاهيه ويا الاوراق واللويه ..
اتيني زميله لي .. بتقولي خبر
هي: استاذه ؟؟
انا : (خبركم ذربه ) هااااا!؟
هي : بقولج شي ؟
انا : ارفع راسي هلا هلا فلانه شلونج زينه.. امراي ؟؟
هي : الحمدلله ..مممم انا خطبت!
انا بقلبي قاعده انقد عليها اشفيها ماتعرف اتحجا شنو انا خطبت قولي انخطبت : ابتسااامه
هي : اي انا خبطت .. الاسبوع الي فات ..
انا : يلاااااا ماشاء الله على البركه مبرووووك مبروووك .. عسى الملجه قريب؟
هي : لاا انشاء الله عقب سنه
انا :اوووووووولااااااا !! ليششششششش! (فطيم انتي شكو بالناس)

هي مبتسمه و احس ودها تقولي صج مو كفو اقولج : لا عشان يمديني اجهز وجذي
انا : يلا ماعليييييييه انشاء الله يسهل عليج .. خوش خوش ريل فلانه حلوة عليكم
(لانها ثالث وحده في القسم ترتبط خلال هالشهرين ) الا ماقلتيلي من ولده ؟؟؟
هي : ممممم هندي !!
انا : يااااااااحليهم والله خووووش ناس بيت الهندي امي تعرفهم..

هي : باستغراب .. لألأ فاطمه اهو الريال هندي ..!! عشان جذي قلتج انا خطبت!!
لان اهو هندي ولازم انا اخطبه !! و مايمدي اجهز له وجذي و انشاء الله في الصيف الياي العرس في الهند !!
اناااااااااااااااااااااااااااااااااااا اهني تكككككككككككككككككككني العرق
مصدووووووووووومه............ وووووووقفت على ريلي.........قمت اشااااااهق
لألألألألألألأ !!!!!..؟؟ لألألألألألألألألألألألأ.؟؟
ليششششششششششششششششش؟؟
هي بكل برودو ابتسامه : انتي تدرين امي هنديه .. وامي شارطه على ابوي يوم كبرنا ان كلنا ناخذ هنود .. لان الكويتين مو محترمين و ماحترموها !

اهني انا استحييييييييت من نفسي و رده فعلي الهيليقيه !!
انا شكووووووووووووووو في البنت !!
بس عوووووووووورني قلبي عليها والله العظيم ترا الساااااااالفه صصصصج
والبنت تشوووووووووووق اتينن مافيها ششششششي

المهم خنكملكم الحوار

بديت اخذ خط رجعه و ارقع حق عمري

انا : اهم شي عسى بس زين انتي عاجبج؟
هي : اي الحمدلله .. انا وايد تعبت على ما لقيت واحد زين يناسبني .. ماتشوفيني تأخرت في الزواج !!!

انا اهني بغيييييييييييت اقظبها و اطردها من المكتب اشووووحها اهي و هنديها
البنت عمرها 22 سنه و تقولي تأخرت في الزواج

انا : ايييييه يلا ماعليه اهم شي التوفيج الله يوفقج ..

البنت عسى الله يوفقها صج
مو حرام امها تسوي جذي ؟ انزين يمكن البنت راضيه و مستانسه
انا ليش رده فعلي هيلقيه جذي !!
ليشششششششششششش انا يبين علييي كل شي
ترا انا سوييييييت شوووووووووو في تعابير ويهي عند البنت
!!

Monday, June 09, 2008

قدر طفل 2


تستبشر حسنه في حملها ..وتفرح
و اهلها فرحانين اكثر منها ..
بوعبدالله يختفي عنها لمده اسبوع يراجع فيها حساباته
مصدوم .. متوهق .. هذي الخطوة الي ماحسب حسابها ابد
يعتكف في بيته يسكر موبايلاته

و يجابل ام عبدالله .. اهي الوحيده الي حست انه اكو شي
تتسائل ام عبدالله شالي ممكن يكون في فيه ..

خساره في العمل مستحيل؟ اي عمل فيهم .. مستقبله مضمون .. شركاتهم مو اهو الي يديرها ..عقاراته اجارها تدر عليها شهريا بملغ يكفله الخير له و لعياله العمر كله

وبعد اسبوع يروح يتطمن على احوال زوجته حسنه

ويتفاجئ بفرحتها وفرحه اهلها و تباريك الاهل و الجيران ..
اشلون تكون فرحه عند طرف و مصيبه و كارثه عند الطرف الاخر

يطلب بوعبدالله من حسنه انه يطلعون للعشا برا

و يفاتحها في موضوع .. اجهاض الطفل ..

والا راح يختفي من حياتها وماراح تشوفه ابد و لا راح يعترف فيه..
تنهار حسنه من طلب بوعبدلله
و لكن ترفض ان تجهض الطفل و تقوله بينا المحاكم

بوعبدالله بدا يخاف من ظهور هذا الزواج على المجتمع و الفضيحه الي راح تصير لاسرته و مركزه الاجتماعي

اشبقولون الناس ؟
اشبتقول ام عبدالله و عيالي ؟
اشبيقولون اهلي و نسايبي؟؟
و بين شد و رخاء في محاولته لاقناع زوجته بان تجهض الطفل

و يفكر في اي وسيله .. يسلكها للتخلص من الطفل ؟؟
بعد فتره من الوقت .. راح يطلب المساعده من امه ..

بوعبدالله: يماا شوري علي ..المرا حملت و انا توهقت..
والدته: انا قايلت لك من قبل لا تتزوج الا لما تقول حق مرتك و هذا شرع الله ماكو شي ينخش .. و من حقها تحمل و من حقك تعدل بينها و بين زوجتك و تعدل ما بين الي في بطنها .. عيالك..
ولكن والدته امرأه كبيره في السن مشلوله.. ليس لها اي حول او قوة..

تطلب والده عبدالله من خال البنات ان يحضر
و تقوله عطني عنوان اهل حسنه و روح ييب حسنه و امها ..
و تقابل والده عبدالله حسنه و امها و تطمنها ان طول ما اهي عايشه لا يحاتون شي
و هذا الولد احد احفاد هذا البيت و بتعامل حاله حال الباجي ..
وفعلا في بدايه كل شهر ترسل الجده لهم مبلغ من المال و الكسوة و كل خير
حتى صناديق الميوة و الخضرا تنزل في بيت حسنه قبل اي بيتها..

و في هذي الفتره اعترف بوعبدالله لام عبدالله بوجود زوجه ثانيه حامل في شهورها الاخيره
و تثير ثااائرتها .. وتشييييييل الدنيا و تقعد و تقطعه و تطرده من البيت
وتبدأ في كيد خطه لعدم فضيحتها في المجتمع بان زوجها تزوج عليها او يمكن ان يوم من الايام يكون له ولد من غيرها
تصك الدنيا في ام عبدالله .. و تستنجد في ابنها الوسطي فهو معروف في العايله كلها ان اهو الشري ,,, القوي .. الي راح يبرد قلبها ..

و تناديه و تنهار جدامه في ان مستقبلهم راح و فضيحتهم في الكويت و ان صارو حجوة بحلوج الناس و ان خيركم و حلالكم كلاااا بيروح حق وحده مثل حسنه .. و انت بصير عندك اخو منها..
و يجن جنوووووون براك و يحلف و يتوعد بانه راح يذبح ابوه و يذبح مرت ابوه و الي في بطنها ..
و في هذا الوقت ابدا لم تخاف ام عبدالله على ولدها كل الي همهاا .. ان تاخذ بثارها قبل الفضيحه ..

بوعبدالله مختفي .. و الابن براك يدورة من مكان لي مكان ..
و في احد العصريات يلاقيه يشرب الشاي عند امه .. المرا العيوز
يدخل براك على ابووووه و يهدده ان راح يذبحه و يذبح مرته و يذبح امه بعد على المهزله الي راح تصير .. براك يهدد ابوه و جدته بالسلاح و يقوله اذا ماطلقتها
راح اذبحك انت او اذبح امك قبل و بعدين انت.. عشان تحتر على امك الي مجابلها !

خاف بوعبدالله من ابنه و خاف على بيته من الانهيار

و نفذ الي طلبه ولده و طلق حسنه .. ولكن بما انها حامل فالطلاق لايقع شرعا ..
و في هذا الاثناء تطلب ام عبدالله من بوعبدالله في اجتماع عائلي حضره اهلها
بان يكتب عقاراته .. والبيوت و الحلال و المال و الحسابات و الودائع و تحويل كل ممتلكاته باسمها .. وليس له حق التصرف في اي شي و نقل ملكيه اي شي لها اهي بس .. وحتى اذا تبي فلوس يا بوعبدالله انا اوقعلك شيك و اذا انت تبي تعطي اي احد مبلغ تعطيه من دفتر الشيكات الي باسمي ولك حق التظهير فقط..
و يرضخ بوعبدالله لطلبات ام عبدالله .. و يسجل جميع ماله و ممتلكاته لها..

ووسط تساؤل الاهل و انتقال الاخبار من بيت لي بيت

عرفت الكويت بزواج بوعبدالله على ام عبدالله .. و ان راضاها بان حجر هو على نفسه طوعا..

و في هذا الاثناء ينفجع بيت بوعبدالله لوفاه بنتهم الكبري حصه ..في حادث جت سكي في البحر .. عن عمر يناهز 23 سنه
وتنهارام عبدالله و تنهار الجده اكثر ووسط فضيحه في العزا .. تشكي العيوز حالها للنساء .. (( خذت حلال ولدي عبالها قدرت عليه بتحرم الياهل الي ماشاف الدنيا من حلال ابوه ...ان ربك لمرصاد .. خذيتي الفلوس خذا منج اغلى بناتج ))

وبعد ثلاث اسابيع من العزا تضع حسنه مولودها (( علي)) وسط اجواء حزن و توتر
و يمنع براك الاب من الاعتراف فيه

براك : راح تنكر انه ولدك و انه منك .. راح تنكر انك خذيتها .. ماكو شي يثبت انها مرتك .. لا في المحاكم والاوراق الرسميه و هذا العقد حرقناه !! ماكو اي دليل انها مرتك ..

وخالها طول عمره مظبط لنا بنات في الشاليه .. مندوب الصبح و قواد بالليل..
اذا رفعت قضيه والا طالبت في شي بطعن في شرفها و بكون ولدك بن حرام !
لا راح نعترف فيه و لا نبيه و شرعا ما يورث لان ابن الزنا ما يورث !!

ام عبدالله مو صوبهم كلش لاهيه في حزنها على بنتها ..

و الجده تشتد الحره فيها و تمرض و تموت ..
و ينقطع امل هذا الطفل في وجود اي شخص بالعايله معترف فيه ..
ترفع حسنه قضيه اثبات بنوة و يطعن بوعبدالله في شرفها و ياتي بذلك من اكثر من شاهد شراهم ليشهدو عليها .. و تطلب المحكمه فحص الدي ان اي .. و يثبت علي انه ابن عبدالله..
وبعدها تختفي حسنه مع ولدها .. ولا تطلب من بوعبدالله شي و لا تطالبه في اي شي..
تغير السكن و تغير جميع وسائل الاتصال و تختفي اهي وولدها..
عندها من الاوراق الرسميه ما يثبت نسب و اسم علي و درءا لها من فضائح و مكايد براك و بوعبدالله .. خذت ولدها وراحت بعيد.. فهي امرأه طعن بشرفها..
و بابنها و بكل وجودها.. فاثرت ان تبدي مع ابنها حياه لاوجود لاطماع فيها و لابيت يتعقد علي منه .. فقير علي ماديا و لكن غني معنويا بامه ..
طفل محروم من كل شي يبيع لاخوانه و ابناء عمه و خالته يوميا من زجاجات العطور وهو و هم لا يعلمون صله القرابه ..
هل فكرت يوم من الايام و انت واقف في الاشاره ان من يبيعك زجاجات العطر ,,هو احد غلطات اثرياء البلد؟
او قريب لك خانه الزمن؟



Wednesday, June 04, 2008

قدر طفل

اطلع من الجامعه بعد يوم طويل و صيف حار لي البيت
كل يوم امر على هالاشاره في طريجي الساعه 5 العصر في عز حر الصيف درجه الحراره 48
يمر علي كل يوم هذا الولد الي عمره لم يتجاوز الخمس سنين
اعطيه مرا المقسوم و مرا اشتري منه عطر .. اطالعه و اتحمد ربي الف مرا ان قدري ماكان قدر هذا الطفل ..الف الحمدلله لك يارب اني لا بدون و لا اهلي قطوني بالشارع ابيع زجاجات عطر و لا امي و ابوي متكلين علي في رزقهم.. كل يوم هالحزة اغلق من اشوفه


و يوم من الايام و انا طالع من الجامعه ويا ربعي .. ايني يركض هذا الولد يبيع لي العطر
يأشرله رفيجي رووح رووح مانبي .. رفيجي نزره بطريقه عصرت قلبي بس سكت ماعلقت ..


يوم من الايام و انا مار مالقيته
يوم .. يومين .. ثلاث .. فقدته !؟

بعد اسبوع شفته .. فتحت الدريشه : ياني يركض
انا: شسمك ؟
هو: علي
انا: علي وين بيتكم
هو: الكوريات
انا : شنووو !!
هو : الجهراا الجهرا
انا: انزين وينك الاسبوع الي فات ؟
هو : امي مريضه !

وتقطعنا الاشاره الخضرا
احرك

و في الليل يروح علي بيتهم
يعطي امه جزء من المبلغ و يحتفظ في جزء منه
تزجره امه بان يعطيها المبلغ كامل
و يعطيها المبلغ كامل و هو محبط لانه لم يدخر جزء منه لنفسه
حياه صعبه
علي ليس كباقي الاطفال .. ولا مثل عيالنا على الاقل
لا عنده سينما و لا عنده طلعه في الويك اند
ماعنده ام و لا اب و لا حياه مثل باجي البشر

يسأل علي امه : يمه ابوي متى يجي ؟؟

تقوله روح انت بس نام و بعدين تعرف متى ابوك بجي ..
تتأكد ام علي من نوم ابنها وتتنهد من يوم عمل شاق و مشاكل اسريه
وفقر و ظلم و جور هذا الزمن ...

هي :ايييييييه يا علي تبي تعرف ابوك متى بجي!؟
ابوك ماراح يجي !! ولا انت شايفه
ووتذكر ام علي قصتها ... او مأساتها
يعتصر قلبها على الظلم و تعلم ان الظلم ظلمات يوم القيامه

بجيك يووم يا عبدالله بجيك يوم ياعبدالله انت و مرتك و عيالك

ويرجع شريط الذكريات بام علي ...
كانت شابه عمرها 19 سنه .... سعوديه الجنسيه .. تكبرها اختها الي عمرها 20 سنه
و تصغرها اختهاا رفعه بسنتين يعني 17 سنه ....

هن ثلاث خوات .. الجازي و رفعه و حسنه...ابوهم متوفي
ولي امرهم خالهم و هو يشتغل مندوب عند احد اثرياء البلد
يعرض عليه الزواج على زوجته و يظل الخال يلح في موضوع زواج عمه (معزبه)
على احدى بنات اخته...

الخال: والله تاخذ احلاهن بعباتها..
يقولبها المعزب في مخه .. و بعد التوكل على الله و الاستخاره
يدق على رفيجه عبدالله.. ليستأجر منه شقه في احد عماراته الي بالفروانيه
و يقوله عن نيته بالزواج من ثانيه ... وعلى قولته تغيير بس بالحلال
و انت مثلك عارف انا ما ارضى الا بالحلال...

يعطي المعزب .. مندوبه مبلغ من المال لتأثيث الشقه من سوق اليمعه...
و لتجهيز العروس بنت اخته .. و لما قربت المده .. بدا المعزب بالتردد على مثل هالخطوة
ويدق على صديقه عبدالله.. يحن عليه ليخطو الخطوة معه يرفض صديقه عبدالله و بشده ...

وبعد العزم و التوكل على الله يتزوج بوأنس من الجازي خارج الكويت

و بعد فتر تبدأ مشاكل بوعبدالله ويا ام عبدالله فيقرر ان يتزوج عليها مثل ما سوا رفيجه ابو انس
" هذولا الحريم ما يكسر راسهم الا حريم مثلهم"
وفعلا يتزوج بوعبدالله من حسنه و ياخذ شقه يم شقه بو انس في نفس الدور بعمارته
و بو جاسم صديقهم يتزوج الاخت الصغيره ...ولكن ما يطول وياها اسبوع و ينفصل عنها..

بوعبدالله كاتب اسلامي معروف شخصيه اسلاميه معروفه جدا
يخوض الانتخابات سنه ورا سنه بدعم من جماعته الاسلاميه..
شخصيه متحدثه .. مرموقه له من البرستيج العائلي الشي العجيب..
ثري جدا .. له من الاولاد 8 .. حياته يملئها التناقضات .. اعياله فري و اهو اسلامي..
يقضي الصيف في بيته في الريف الاوربي و اهو اسلامي !..
يكافح جميع انواع التمدن .. يحارب الاختلاط في كتاباته و طرحه
و ابنائه مدارس خاصه و ابنته تدرس برا.. باختصار كل شي حرام على الناس و حلال على اهله ..

يتزوج من ام علي في زواج سريع في البحرين.. ولا يوافق بتصديق العقد لان الزواج سري
يتسلى فيها اول الايام .. يروح وياها دبي .. و يرجع الكويت يطلع وياها بالخش و الدس
.. يروح اماكن مايروحونها اهله .. وبعد شهرين تحمل ام علي و تكون الطامه الكبرى !!
صحى بوعبدالله من السكره ..
و توهق في ان ام علي حامل !
وتبدي المشاكل
يتبع

Monday, June 02, 2008

سالفتي ويا الشايب


عطفا على كومنت العزيز اجار الدين كشمش
واحسنهم طبعا الي تصيد الجاكبورت ابو 85سنه
مايمديها تملج عليه..وتعشيه تشريب كلنكس الاامفنقش !!!1وتربح البليون
===
خلوني اقولكم سر من اسرار حياتي
مرا من المرات كنت مسافره حلو..
وفي شايب في الاوتيل خزااااااااااااز
يعل قلبي بالخزززز
اذا صار العصاري
ياا قعد في االلوبي كشخ في البدله و الصبغ تارس شعره بطريقه قاتله
ويحط قلاس الواين و يجابل الباند الي في اللوبي
و بروحه عايش جوو
يصفق لهم و يهيم فيهم
وهذا الشايب خليجي
محد يعرفه ولا يدري عنه بس مسوي حق نفسه ديكور
يمه لبناني سكيورتي او شي جذي و مسكين هاللبناني مايتحجى
بس مجابل موبايله
وانا كل يوم من اروح او ارد و هذا يخزز على ما اوصل الاسنسير يالله مسكين يمديه يبتسم
من كثر ما اهو شااااايب و ظيييييم استيعاب المخ عنده جدا بطئ ههههه

يوم من الايام و اذ بي اتيني عرة الخبال
و اقول فطيييييم ممممم سولفاي ويا الشايب
جذي من نويت اسولف ماشفته يومها
شفته عقب يومين ههههههه (( حتى الشايب الله فكه من شري ))
سويت نفسي ابي شي من الكونسرج و على ما يطلعه لي استأذنت و قعدت

بعد قلبي الشااااايب ابتسسسسسسسم بس ربع ساعه على ماستوعب وقالي تفضلي
انتو لاحظو السيناريو هاا !!
مدري اشلون بديت سولفت وياه سألته يمكن اذا سعودي او كويتي شي جذي
ماذكر والله بس شوووفو الشيبه مو هين !!
يقولي انا في الاول يوم كنت اشم العوود في السيب ظنيت انك اماراتيه
بعدين يوم شفتك انتي عرفت كويتيه !!
فمدري اشلون ياب الطاري ان احنا يا الخليجين وين مانروح لازم البخور و الطيب و الجاي والقهوة و زعفرانه ويانا و من هالحجي .. انصدمت انه اصلا الفندق مفضين له جزء من مطبخهم يعني طباخ الشايب وياااااه !!
لاحظو مستوى الحديث بلعه و مطابخ
المهم قالي انه غدااه جريششششش !! ففطييييييييييييييييم انصدمت و سوت فيها بو العريف
واي ونااااسه يريش .. ذكرتني برمضان احنا ناكله برمضان يااااااااااحلو الهريس و اليريش الاماراتي (( قاعد اجاريه في السوالف ))
ياريتني ماقلت يا حلات الهريس الاماراتي !!
صك راسي ساعتين لا لا يغرك هو مووووو على الاماراتي او السعودي او الايراني
هوووو على سنه المحصول و الارض في الامارات ارض عذرا !! بعد عشر سنين تتعب الارض و ماعاد يصير المحصول كويس !!
و اذا تبين الجريش ما على جريش القصيم
ولييييين فجيت على روحي بيبان مسدده
و استلمني تحقيق !! انتي من بنته و اش يقربون لك الي في المنطقه الفلانيه و اش يقربون لك حقين التمور و ايش يقربووووون لك بلا بلا بلا
وانتي يايه بروحج و الا وياج احد و ليش ما وياج احد ووين صديقاتج
ووين تسفطين سيارتج بالليل .. ليش تودينها الباركينج و ترجعين لحالج الساعه 1 ياااااااربي ... من خمس دقايق كلمتك ليش صرت علي ابو صج!!!
ما خلصناااااااااااااااااااا الا بطلعه الرووووووح
دقيت على رفيجتي اهستر ضحك وااااي لقافتي لقافتي
قعدت ويا شاااااايب في اللوبي سوالفه جريش و قرصان و ارض عذرا و المزارع واااااااااي صج ملقوفه انااااااا
ياحليله صديقي الشايب من باجر كل يوم طاقين علي الباب يا يايبين لي تمر
يا معمول و اذا رحت بتريق يناديني تعالي تريقي ويااااااااي
ماقمت انزل الريوووووق
ههههههههههه
مشكله البنت الملقوفه الي فضولها قاتلها تبي تعرف كل شي
من يومها تبت حرمت اسلم على احد

Sunday, June 01, 2008

جرح ينزف


كنت اركض
اركض
اركض بروحي
وحيده
كان يضربني سوط الفارس حتى اكمل الركض
وصلت لمرحله لا استطيع الرجوع للخلف فيها
ولا اعلم متى سأصل
وسوط الفارس القاسي يضربني اكثر
طحت
تعبت
والكل في وسط زحمه السباق
يصرخ
يسأل
يستغرب
اشفيها ؟
ليش ؟
وكأني فرس راهن عليها الفارس بمليارات
وكأني فرس خذلته في وسط السباق
نسى انها روح تتعب
ولما فشل في السباق
وبعد الضرب القاسي
في النهايه
لم يسأل عنها
لم يجبر بكسرها
قالها كلمه وحده؟
انا مستغرب ليش تطيح
مستغرب اشلون تطيح؟
ليش في وسط الطريج طاحت؟
انانيه فارس
ضرب فرس بقساوة
ثم استغرب موتها من الضرب
ثم سألها بجم شراج غيري ؟
قالت له بكل ثبات
من يشتري فرس ميته