Thursday, January 24, 2008

الدنيا دوارة


الله سبحانه و تعالي ينصر عبده

الي يتوكل على الله يلاقي ربي سبحانه مسخرله كل شي من غير ما يحس
و المظلوم له حوبه
و اغلب الناس الي تسيئ لانسان او اتهينه و يسامحهم او انه يقول حسبي الله و نعم الوكيل
ربي صج ينصره و ياخذ بحقه
حتى لو ماكان حزتها
حتى لو تأخر الشي

من سنين يمكن ست او سبع
المهم تعرفت على شخص و بصراحه ماكنت ابي ارتبط فيه مو عشان الحب
ولكن عشان ظروفنا الاجتماعيه لانه مو كويتي
فدايما اقوله انت اصلا مو مستقر
تبي اتشحططني انا وياك !
شسوي اروح جده او الرياض و مرات الطائف انت ماالك مككان معين على حسب شغلك

نهايتنا كانت في هذا الحوار
كان اهو جد
و انا سخيفه اتغشمر
قلت له : مممممممم يمكن اذا عنست و صار عمري 30 اخذك بعد شسوي العوض و لا القطيعه!

هوبصراخ: ايششششش قااااال ايشششششششش!! استناااااااااكي لي 30 !!! بعييييييد عنك قسم بالله بكره لا صار عمرك 30
تدوري جززززززززمتي تمسحينها ما تلاقينها!!!

انتهى الحوار
قطعت كل شي
ورحت
و صار بين فتره وفتره
كل 8 شهور
سنه
يدق
ما ارد عليه
ولكن مرتين قدر يحصلني لانه يطلع CALL
ويكون حزتها موصاحي
فاسكره في ويهه

المهم ما اطول عليكم
من فتره قريبه جدا
اتفاجا في امي تكلمني عنهم
الفرصه الي انا ناطرتها من سنين!!!
انا يمكن مو حقوده
يمكن مو سيئه بس الكلمه بقلبي
ولما كان يرد يدق بين فتره و فتره مايشفى غليلي
ولكن الفرصه الحين يت
طبعا امي ماتدري عن شي ابدا

رفعت السماعه عليه و كان هذا الحوار الي قلته بدون اي تفكير و نتيجه حرتي و رده فعل مشاعر محتره

انا : الووو هااااااي فلااااان شلووووونك ( بنبره وايد سعيده و طايره فيه)
هو: ياهلااااا ياهلاااااااا بالزين كله ياحبي له هالصوت شخبارك
انا : وااااااي فلان شالمفاجأه
هوحدا متشقق و طاير يضحك!!!
انا : اقووووووول فلان عندك جوااتي وايد وصصصخه تبيني امسحهم لك!
هو: ايش!!!
انا: اقووووووووولك عندك جززززززم كثيره وصخه تبغااااني انظفهم لك
ابشرك ترا انا ترقيت قمت امسح طاولات !!
و صار شد و جذي و سكرت التلفون
و قعدت افكر بالموضوع
الي من وين طلعلي عقب هالسنين !!
سبحان ربي من ست اوسبع سنين قط علي هذا الادمي هالحجوة
و كان يظن اني انا ابيه عقب
ردلي قبل لا اكمل الثلاثين حسب التاريخ الهجري
عشان ارد عليه و يسمع مني كلمتين ما هقى يوم بيسمعهم
عباله عقب الي قلته برد اسبه او اغلط و لكن انا سمعته كلام خليته يحتقر نفسه
على الحجي الي قاله

و اذا عقب ست سنين ما نساني انا جددت اقامه ذكرياتي عنده حتى لو بخرف و يفقد الذاكره
بس عمره ماراح ينسى كلامي الي قلته له عن الغلط و الاحترام و الناس و عن ربي سبحانه اذا رفع
و اذا اخذ بثار احد
الي خلاني اقول هالحجي
اذا في انسان جارح انسان بكلمه
خيتحلل منه
ترا الحوبه يمكن تذبح

مسج
انت محللني صح؟؟
لاني مرات وايد اخوره عليك بالحجي
بلييييز مابي عقب سنين يصير فيني شي احس انه حوبتك

Tuesday, January 22, 2008

عادتي لاقفيت

عادتي لااقفيت ماارد المسير,,,عالي الهمه على جرحي يجور
ولاجبرني الوقت واعياني الهجير,,,استظل الصبر لايام وشهور
ماارد الراي في العلم الكبير,,,,ولا يثنيني عن عزومي فتور
وما خضع راسي ولو طرفي سهير,,,,احسب حسابي ولي قلب صبور
ما وطيت الشين والعلم الصغير,,,,اجبر كسوري على مسك وعطور
ولا خطيت وزل بي راي غرير,,,,ارتجيت العفو من رب غفور
الخطا يا عاذلي ماهو خطير,,,الخطرلاصرت مع ذنبي جسور
الخطر اقوى على ظلم الكسير,,,,وينطفى نوري وانا في الناس نور
اكتفيت وصابني منك الكثير,,, ولا هواي احيا على قلب الامور
سامحك ربي على الجرح الكبير,,,وسامح الله من على مثلك يشور

Sunday, January 20, 2008

I attracted a hug





السنه الي فاتت من شهر 12 و انا مجهزة لسته التغيير و الاهداف لسنه 2007
عشان ادخلها و انا مخططه و منظمه و عارفه شنو ابي
اتصدقون اني حققت معظم مخططاتي
و الف الحمدلله كانت سنه فيها وايد امواج عاليه بس تبقى الامواج نعمه


و كان عبالي اني ما انجزت شي في 2007 بس بعد التفكير و مراجعه اللسته
الف الحمدلله ربي على كل النعم عطاني فوق ما اتمنى


ولكن تفاجأت بعمري اني بخلص شهر يناير
و ان دشت علي السنه اليديده و انا لي الحين ما جهزت اللسته
تدرون في ناس ما يخطوون
بس انا اذا ما خططت راح اضيع ليش؟
لاني ما احب حياتي تمشي من غير اهداف
و لا احب حياتي تمشي جذي
بس للاسف مدري شنو ابي


احس اهدافي و افكاري عليها طبقه غيوم
ضباب
شي معتم
ابي ارتب شغلات وايد
او ابي احدد افكاري بشكل احسن


قاعده ارتب الكتب و الروايات الي قريتها في 2007
والله وايد
متى كان لي وقت اقراها
سنه 2007 سنه البيات الشتوي و الصيفي الظاهر !
اكثر شي قيم قريته في 2007
وحسييت اني وايد غير من حياتي كتاب ذا سيكرت
و هذا راح اكتب عنه بوست كامل
ولكن الشي الاحلى من القراءه هو التطبيق
و الايمان في اللو اوف اتراكشن !


من الاحلى الاشياااء
ان صارلي فتره شهر
احن حنه مو طبيعيه
ابي لمه
محتاااااااجه لمه
ادق على رفيجتي اقولها اييج شعور تقومين من النوم تبين احد يلمج حييييل
تقولي لأ!!
ياربي ليشششش اانا احب اللم
المهم قلت حق رفيجتي انشاء الله اذا سافرت
بشوووووف اي واحد بقوله اذا يت لك وحده محتاجه مسكييييينه بتردها؟
انا محتااااااااجه لمه
لممممممني!


رفيجتي تقولي واحد ما تعرفينه تبين تلمينه؟!!
قلت لهاااا ازيدج من الشعر بيت
بقوله شوووووف انا ما اعرفك و لا تعرفني
ولا ابي اعرفك و لا تعرفني
ولا ابي منك شي
بس اتعرف تلمني اللمه الي تعصرني عصاااااااااار
و اروح اكمل يومي طاايره من الفرح بشعور اللمه

عاد قمه المتعه اني من كثر ما احن على اللمه
اني انلميييييت امس لمه مو طبيعيه
و الاحلى من شعور اللمه انها اتييج من غير طلب
و اتييج بحب كبيييييييييير
و عقب ما انلميت طرت من الفرح
قمت اقول
I attracted a hug
طبعا قلتها في قلبي
عشان ماينقال عني خبله


بس صج هل هذا شعور طبيعي
انكم تحتاجون لمه؟؟
والا انا وحده مشاعري زايده جيلتها!؟؟

Saturday, January 19, 2008

عاشورا في البحرين

عاشورا
صيام عاشورا يكفر السنه الماضيه !!
اكثر سنه خذيت فيها ذنوب و السبه اللبحه منك
بس هل يكفر صيام عاشورا اللي سويته اليوم
دشيت المطبخ سألت الطباخ شنو الفطور
قالي مرق سمج حق بابا !!
قلت له شنو يعني سمج فطور
سو شوربه
تشريب لحم!
مجبوس دياي و مرق مسالا شيكن
و شيكن ستيك
و خبز عروق
و قلي كبب و سمبوسه
و روكا سلط
و فتوش
و كيكه تمر
هذا كله فطور حقي بروحي !
مفجوعه صح !!
يقولون عاشورا
فرق بين هالسنه و السنه الي فاتت
طول يومي و انا افكر في السنه الي فاتت هالحزة
البحرين
الطريج
عاشورا
كل شي مسكر
ضيقه خلق الفندق
انت مرضت
و انا احاتي
تذكر انك السنه الي فاتت هالحزة وين.؟
و عند منو
و شنو قلت لي
و انت منو
و انا منو
قاعد تفكر ؟

Tuesday, January 15, 2008

ابيع العمر على شانك و لا احسب عليه حساب ...(الجزء الثاني و الاخير)


ليش اذا احتجت وجوودك تبعد و تروح
ليش اذا بغيتك ما الاقيك
ليش اذا تعبانه انت لاهي ما تكون وياي

ليش ما تحب تشوف ضعفي
ليش ماتحب تسمع كلام قلبي
و ماتعبر على الشقا وياي


من اول يوم صارت شغله مصعب و هوايته
يطفرني بوجود امه و يفتح مواضيع يدري لولا وجود امه لسويت سالفه كبيره

و خالتي انسانه وايد طيبه
بس يااااااربي اهي امه ادري امه لكن اغار

لا تقولون ما ينغار من الام
اغار

خالتي مرا هاديه سوالفها قليله
ما ينسمع لها حس الا اذا تزف الخدامه
او تزف مصعب على الصلاه

و الا غيره ما احس فيها الا اني تقيدت وايد في موعد دخولي و موعد خروجي معاه
قمنا نطلع بالبوق
و انييي بالبوق

صرت اعرف في مصعب جانب من شخصيه ما كنت اعرفها
طول عمري اعرفه كحبيب كصديق
كأب لي في شدتي
و سندي

لكن اول مرا اشوفه ابن
و ابن بار في امه وايد
مو قاعد ابالغ
بس يحبها بطريقه اتخليني اغار
هل المفروض ما اغار ؟



اسرح في مصعب و اهو يهمز ريولها
كان يقعد في الارض و اهي منسدحه

كنت اسرح و اطالعه و اهو مو منتبه !!
يوديني خيالي لبعيد

ياه هذا الانسان الي احبه و اموت عليه
اشلون يداري امه

امور بتفاصيل يفخر فيها المحب اذا لقاها في حبيبه

احس بدغدغه لمشاعري
و اكون فخوره جدا فيه و كأني انا الي ربيته مو اهي

لما يمسح على راسها
لما يحب راسها قبل لا تروح تنام

لما يداريها في كل شي

يما ادق عليه و اقوله وينك يقولي في السوبر ماركت اوديها تشتري اغراض

لما اييي يشرب عندي قهوه الصبح و يقولي سلمتاي على امي اليوم؟؟

اقوله لأ توني قاعده

احسسسسسه يتعسر
والله يتعسسسسسسر
و يعتب علي
لاني ما قمت بواجبي
و سلمت فاحس فيه
و اقوله : يالله قوم عيل ليش قاعد عندي هني خنروووح نشرب القهوه هناك

يرد علي و جنه يقولي اشعقبا
ما تدرين هذي حزه صلاه الضحى !!

مرا من المرات
قعد من النوم
و ياني
عشان اسويله قهوته التركيه الي يشربها مع الزقاره
اروع احساس لي بالدنيا و انا اسويله قهوته الي ما يشربها الا من ايدي



يرن التلفون
اشيله
امي اسوووولف وياها و اسلم عليها و اطمنها
و اقولها بكل حماس اني بروح حفله ميشيل خليفه
ياي عندنا هني بوستن
و الحفله كلها ناس راقيين

اسكر التلفون من امي

اعطيه الطفايه

اقوله اني بلبس الحين و عشان البنات بمروني انروح انتريق برا اليوم

هو: وين بتروحون
انا: والله مدري البنات قالو بنتريق برا و بنتشمى
يمكن نسوي اظافرنا مادري
اليوم الاحد توقعتك بتقوم متاخر بعدين اكيد بتودي خالتي السوبر ماركت
فعشان جذي اتفقت وياهم
هو: ساكت ((ما يعجبه اتخاذ قراراتي و لو كانت بسيطه ))
انا: اي نسيييييييييييت ما قلت لك توه توه لما قالولي بمروني انتريق برا
قالووووولي بنروح حفله مارسيل خليفه الاسبوع الياي
هو: استاذنتي من صبييييييكم !!!!؟؟
انا : مصعب اشدعوه ... قالولي البنات شقولهم يعني و بعدين انا احب مارسيل
و انت ماتحب هالسوالف و بكون ويك اند انت ما تسهر وياي تكون ويا ربعك
(( طبعا حدي طخخت السالفه عشان ما تكبر و قمت اسولف جنه ماكو شي عادي عشان مالي خلق تتحول الى مشكله و تنقلب السالفه علي و ما اروح عشان ارضيه لاني بروووووووووووووووووح))

مصعب يكره تصرفاتي لما اسوي نفسي جنه ماكو شي صار
و انا بعد اعترف اني اقث لما اكون غير مباليه

يشرب قهوته و يمشي
اروح وراه

يدش داره
!!

ما اقدر اروح وراه خالتي بالصاله!


اطق باب داره !

يفج باب الدار و يصرخ علي
هو: انا ما هميتيني رحتي والا قعداتي انا همني الاسلوب الي تتعاملين وياي فيه
لو انتي عرفتاي اني بالصدفه بروح حفله ويا ربعي من غير ما اقولج
و اسوي السالفه جنه ماكو شي
و تتضايقين و اتجاهل مشاعرج اشكره و اعدي السالفه جنه ماكو شي
هذا معناته يا انه انتي مو هامتني
يا ان انا ما احس
و اظن انج تحسين و انا المفروض اهمج

احتراما لخالتي ما ارد
اسكت و امشي
و اقوله الله يسامحك
انا مو مثاليه
بس اعرف اشلون اتفاهم وياه
مو جدام امه

اروح ويا رفيجاتي و اطلع
و يروح اهو يطلع

ونرد اخر الليل جنه ما صار شي

و تمر ايامنا
اسبوعين اشزينه
و فتره انتظارب
و دايما انا الي اراضيه
حتى اذا انا الي معاي الحق

اتعب نفسيا اذا زعل علي
يمكن صرت ما احس بحواليني
و يكون اهو محط تفكيري
بالي وياه
له طريقه تعتيم اعلامي اذا زعل مو طبيعيه
حتى و اهو حواليني
ما اعرف عنه شي
اشوفه يدش و يطلع بس ما اعرف

و اظل انا متكدره اصيح طول اليوم
و اشكي حق خالتي
يداد لها

ياربي احبه و لا اقدر على زعله
فيه غرور مو طبيعي
ما يقول انه غلطان
و لا يرضى يراضيني
يجرحني مرات بكلمه
بتجاهل وجودي
ولكن اذا طال البعد
اقوله

سيد جروحي شمس عمري و ظلي البعد طول و الخطا منك واضح اذا غرورك يمنعك تعتذرلي
لا تعتذرلي قول اسمي و اسامح

تنطوي الايام و تمر فينا
يكبر حبنا معانا يوم بيوم
علمني اشلون احبه
و خلاني ما اشوف في الدنيا غيره
عرف يخلي كل هالدنيا يعني مصعب

و لي غاب بكل وله اقوله
تغيب و الدنيا معك تغيب و يصبح العالم غريب

احب اهتمامه فيني
خوفه علي
احتواءه لي و لجنوني
و زعلي
و اعصابي
يعرف اشلون يدفيني في يوم بارد
و يطمني في ليل اعتم

و دايما اقوله الايام بتمر بينا
و كل شي بروح
الا حبي و حبك
يزيد
احلى الكلام الي سمعته بعمري منه اهو
احلى التصرفات الي شفتها بعمري منه اهو

ما انسى يوم اختلفنا و قالي والله ابيج
لو كل يوم نزعل و انتهاوش بس ابيج
احبج ولا اقدر استغنى عنج

ما انسى يوم قالي
انت الضعف الوحيد بحياتي وحتى ضعفي لان منج ابيه

ما انسى يوم يوم هادي سرحت انا وياه و قالي
فاطمه ابي عيالي منج و اذا مو منج ما ابي

ما انسى كل شي منه
و احلى شي منه
علمني ان الحب يحني تشتري راحه حبيبك

حياتنا ماهي روايه بقصه
او فصل من فصول شهرزاد
ولا حلم ربيع مر

اثنين طبيعين عادين نمارس حياتنا بشكل جدا طبيعي

في مرات وايد نقعد ما عندنا شي نقوله
انا بالصاله ويا لاب توبي و اهو يمي
يكفيني يكون يمي
احساس وجوده بروحه يمليني

اشوف البلوقات
المواقع
شوبينج
شات في المسنجر
و اهو لاب توبه بحضنه
بس مادري شنو يشوف

بمكر النساء الي عندي اقوم و المه من ورا عشان
اشوف اشقاعد يسوي او منو يكلم
مالت علي ما احصل شي قاعد يلعب جيم!
انا: واي ياكرهي لما اشك فيك
ترا انا يايه بسوي نفسي اجكك!
و اطيح عليك اشقاعد تسوي
مصعب : هاهاهاهاهاها عاد انا لو بسوي ما اسوي و انتي موجوده
اقولج روحاي نامي يالله بنام و اسوي الي ابيه!!!!!
انا : ياااااااااسلااااااااااااام
وارد اجابل النت
انا: مصعب شفت بلوق برلماني
هو: لا اشيطلع هذا !؟
انا : واي مصعب من ادش بلوقه اسيح
هو يعطيني نظره : وايد عليج !
انا:يقتلني ريال يعرف يكتب جذي اشلون ؟
اشلون يقدر يكتبني ..تعرف الي يصير بينا
يكتبه بالظبط عليه شفرات مو طبيعيه
هموومه تكون بنفس همومنا ..يوم قال مخنوق
كنت يومها امشي بالشارع اصيح اصيح يايتني القمته الي مو طبيعيه
بليز مصعب هاك اقرا ..تروح و العذر راجع..
مصعب : ماني قاري شي ...(يسكت )
انا: واي يا كرهك لا تدقرني اقراااااا حدك بزووغ عليه
مصعب: انا لطقييييتج ترا ما انلام !!

تمر فينا الايام و اخلص امتحاني و ارد اجازه نص السنه الكويت
3 اسابيع
كل الي اذكره فيهم الجيت لاق
و اني حدي متعسره في الكويت من دونه
وقتي و ساعتي على توقيته اهو هناك مو توقيت الكويت
اقعد مع ربعي و لا اسمع كلامهم
عيني على التلفون و قلبي معاه
عاشر يوم لي في الكويت
اوصل لمرحله الانفجار من دونه
الله لا يوريكم شعوري و لا يفرقكم عن احبابكم

ادق عليه و ابجي
10 سوالف في بعض
اعصب على كل شي
يفهمني
يحسني
يعرف سبب نوحي عليه
يدري اني ولهانه

يسألني تبين لمه؟
اصييييح زياده
اتيني الشرهه
مصعب ابيييك تعال الكويت
اول مرا اجهز جنطتي قبل السفر باسبوع
اول مرا ابي ارد مكاني
واحس بغربه في داري
ابيك يابعد ناسي و هلي
ابيك لي وطن لاضاقت الدنيا فيني

ارجع بوستن

وترد حياتنا طبيعيه
تمر الايام فينا
و يضطر مصعب انه ينتقل ولايه ثانيه
كورس اخير قبل لا يرد الكويت
سافر عني فتره من الوقت
ربعه الي هناك حياتهم غير
اسلوبهم غير
كل شي تغير على مصعب
و علي انا
ماراح اقولكم اشلون راح مصعب
واشلون قالي خبر انتقاله
لاني تعبت اكثر منه
احس يوم روحته
شي انشلع من يوفي
احس احد طعني وخذاه

طبعا الي طمني اني انتقلت وياه في البدايه
ورتبت شغله
وتطمنت على كل شي
رجعت بروحي بوستن
و الشقه تاكلي من الفراغ و الوحده
احس الطوف تسأل عنه
داري
مكاني
كل من يسأل عنه
اعيش بروحي
بمكان كان مليان بحسه
وصار كل شي بارد من دونه

حتى الاكل انسى اكل
ولا اشتهي اكل
مرضت روحي
و ذبلت

قالو الشوق ظالم
قلت سيدي ماظلم
قالو يجرح عيونك و يحرمك نوم الكرى
قلت اعطف ياسيدي
لاكرمك في غيابه
لوبتجرحني اجرح
كلي فدوة لشبابه
قالو حبيبك مسافر

فجأه مع الشله اليديده
بدا يتغير
بدا يسري متأخر
ويسهر برا وايد

حسيت بدا الخوف يذبحني
والبرد يسري بمكاني
في البدايه قلت يوم يومين

مو بالعاده مصعب
ولا من تصرفاته
ولا عوايده
دايم عنده ربع
و قروب بنات و شباب
بس عادي
ما تغيير علي بشي و لا تغير معاي بشي

لكن احساس المحب دليله
اكو شي يصير هناك
انا مااعرفه

يمكن منه
او من تأثير و حنه و زنه ربعه
او يمكن الشله كلهم كل واحد وياه وحده

بس هل انا اهون؟
هل الي بينا بسرعه يروح
هل فعلا من مجرد بعد
ومعرفه بنات غير
يتغير الريال؟
مستحيل
لان اعرف الرجل اكثر من الرجل نفسه

ادري انهم يفرقون بين الحب
والصداقه و الوناسه
وادري انهم ما يخططون يستقرون الا اذا عارفين انهم قادرين على الاستقرار

صرت نادر ما احصله
صار يرد البيت تالي الليل مو شفقان و لا ولهان
صرت اسأل عنه وايد
ولا يسأل عني

تعرفون شعور المرا لما تستقر
وترتاح
وتحس اكو بنت تسحب منها استقرارها
تعرفون شعور الانهيار

صارت حياتي جحيم
صرت اتعب من كل شي
صار الحب عذاب
و اهو ولا همه
صار يشوفني اموت في اليوم 100 مرا

وعذره الوحيد اني ألفت فيلم بروحي و عشته
وان ماكو بنات في حياته
وان المفروض اصلا ما اشك فيه

سألته
واجهته
سبب هالتغيير شنو
ماعنده رد

قمت ادوره الف عذر
قمت اجذب نفسي
ابي اخليه نظيف بعيوني لي اخر يوم بحياتي
ابي اصدقه

اواجهه
مصعب تصوني؟
مايرد
مصعب تخوني؟
مايرد
مصعب تحبني
يقولي اكيد
اشلون تسألين هالسؤال
وانتي تدرين اني احبج اكثر من روحي
واكثر بوايد من حبج لي

بس انتي جرحتيني بظلمج

وانا لازم امشي من حياتج
لانج ما تثقين فيني!!

كل الي بينا
كل الي بنيناه
كل هالعمر
يروح بسهوله

صارت علاقتي في الانسر ماشين اكثر من علاقتي فيه

ادري يحبني
بس ادري ان اكو شي يصير من وراي و انا ما ادري

احسه خلاني اسبح وياه في محيط
لي وصلت النص تعبت
لاني قادره ارد
ولا قادر يشيلني
هل راح اموت غرقانه؟

قامت مشاكلنا تزيد
غيره
شك
بعد
ولهه

صار حياته كلها ربعه
بس ربع بنات و شباب

اعتقد في مثل هذي الحال
المرأه توقف لي هني بعد كل الي سوته و عطت
وتنطر النتيجه انها تاخذ

اعتقد من حقي صار اني ارتاح
لان شقيت وعطيت بما فيه الكفايه

حسيت وصل معاي لمرحله اقول الي اقوله مايرد علي
عندي مليون سؤال ما يجاوب عليهم

اول مرا بحياتي احس انه يبيني اروح
من غير ما يقولي روحي
عشان ما تطلع مني

رجع بوستن
ياخذ باجي اغراضه
يدري في حالي
و يشوف بعينه شنو يصير فيني
اهو تعبان
وانا تعبانه

ماراح اظلمه

بس في الجم يوم الي قعد يرتب امورة
كنت معاه لي اخر لحظه
وكنت كل كلمه يقولها
اسمع و اسكت
و اقول انشاء الله

لي درجه مصعب الي ما ينطق
قالي :فاطمه ليش تسوين جذي
ليش تعامليني جذي
تدرين اني قلت بريك اب و تدرين ان مابذني ماي في الرده!!!!!

اح
شعور يقتل
ان واحد يقول حق وحده تدرين مابذني ماي في الرده!!

في هالفتره
كانو معاي صاحباتي الله يخليهم لي

تسألني رفيجتي تهقين لي الحين يحبج؟

التفت عليها و قلت : اهقى؟
انا متأكده اني اسري بدمه
واني ماي عروقه
وادري اني كل شي بحياته
انا حبه
و انا كل ناسه


تسألتي صاحبتي الثانيه اتهقين بيرجع؟

رديت عليها وقلت لها
الريال يدور كل شي و يغير كل شي
الا امانه و راحته
الكويتي لي سافر لي اخر الدنيا
او اذا سافر في الصيف 3 شهور
هل معناته ببيع بلده؟
وطنه؟
بغير جنسيته؟

طبعا لأ
الكويتي يسافر يغير جو
يستانس و يرد

انا ادرى بيني و بين نفسي
في اشياء وايد محد يدري عنها غيري
اي شي يصير بين اي اثنين محد يعرفه كثرهم اهم

لو بقول
لو بتكلم
ما اوفيه حقه
بس هم مع هذا كلنا نغلط

ترد علي رفيجتي
اذا ردلج بتردين له؟

رديت: ماراح تعرفين جوابي الا لما تتقلبين على المخده طول الليل
و تهربين من كلمه (( تدرين مابذني ماي في الرده)) حزتها راح تعرفين اذا برد او لألأ



كل هذا اذكره و انا واقفه على الدريشه
اشوفه واقف يرتب اغراضه بالسياره ويا رفيجه

برد
واحساس بداخل قلبي
يموت بكل لحظه اشوفه فيها

مادرى اذا الماي الي على الدريشه
دموعي
او مطر

يروح
و تمشى الايام
كل الي اذكره اني قلت له
مصعب لا تذكرني يوم بشين
ولاني بذكرك يوم باي شي شين
لا تقول كانت
ولا بقول كنت
قول ظروفنا كانت صعبه

اوعدك اني بظل اذكرك بكل خير

Thursday, January 10, 2008

حبيبي اليوم ذكرانا و ابيك تراضي جروحي


اطل عليه من الدريشه اشوفه و اهو يدش
ينعصر قلبي على كل الي قاعد يصير
يمر و شريط ذكرياتنا يمر وياه

منك احلى محبه عاشها قلبي و منك جرح الهوى ياما تلاعب بي

ياي ياخذ اغراضه...يجمع من غرفته آخر ما بقا له
وليته..
يوم أنه خذا من شقته ما بقى له
،ياخذ معاه ذكراه
وقلبي
واحساس عيا يرتاح في بعاده


أصد بعيني اللي عشقها
واداري فيها احساس قلب يون
ودمعه ترتجف على أطراف رمشي
لا يا عيني لا تفضحي قلبي
لا يا ضعفي لا تناديه يلمني
لا يا روحي..لا تنادين من رخص فيني
!!
دموع عيني تفضحني
واداريها عنه
في هاللحظه مابيه يشوفني
في هالضعف ابيه يكون بعيد عني

أطل عليه من فوق الدرج
تهتز خطوتي
واخفي وجودي
ويفضحني ظلي

يرفع عينه علي يحاول يدورني
آه يا عينه ..عين شفت فيها طفل عشقني
احتاج لوجودي
وروحي
عين..غمضت بحضني
وتدللت على روحي
!!
تدورني عينه وتلتفت،وانا منه انخش وابتعد
بشوف مني شي
و انا خاشه نفسي عنه

خطواته على ذاك الدري تقترب
اسمعها بقلبي وارتعد
ارتجف
ويهتز كل ما فيني
!!
ابلع ريجي
ادخل شقتي
يروح اهو شقته
يلملم مابقاله
يلملم جروحي وياه
وايامي و احلى عمري
يلم عمري
بياخذ ذكرياتي
وبياخذ اغراضي
عفوا اغراضه

اول مره بحياته يطق الباب قبل لا يدش علي
استئذانه يخوفني..يذكرني انه يوم انه خطف قلبي
ما استذن
ومن يومها ..نسيت معاه معنى الاسئذان
اهو روحي...وفي روح تستئذن من روحها؟

امسح دموعي

اقوله دش انا قاعده
مصعب: تبين شي قبل لا امشي
انا: لأ سلامتك ..ظفيت لك باجي الاغراض
و في اغراض حطيتهم لك بكرتون و خليته عندي
التيشرتات الي احبهم خذيتهم ..اسمحلي
مصعب: حلالج

يداري عيونه
مايطالعني
يلف ويه يمين وشمال
يتفقد مكاني و اهو حاس هذي اخر مره بيدش في هالمكان
يلتفت يستجمع اخر ذكرياته من مكاني
وقلبي
وكل جنوني
تهقون؟كان يبي يحفظ لي اخر صورة في ذاكره قلبه؟

ياهل بقلبي يصرخ تعلق على اطراف ثوبه يرتجيه ما يروح
اقعد وانا من لي غيرك بهالكون؟
لا تروح
بنت بداخلي تقوله كسرت حلم بنت فيني
صوت ام بداخلي تقوله هان عليك حضني

هانت عشرتي

يمشي و يروح يحاول يسكر الباب

و انا واقفه بلا حراك
وانا واقفه ...تثقل خطوتي وتتجمد حركتي
يمشي
و انا امشي للدريشه
اشوفه
برد
سنو
يساعده رفيجه في باجي الاغراض
و انا واقفه على الدريشه اراقب
اشوفه و اشوف عمري راح وياه
روحي خذاها وداعه عنده

وشريط الذكريات بين عيوني

كنت اشوفك من قريب مع جميع الناس عادي
ماتخيلت حبيب رايح بقلبي و غادي
صرت افز لشوفتك و اتحرى جيتك
انتظر حبي الجديد بعد مافكرت فيك


هل التقينا صدفه؟
عرفني من دون لا اعرفه
اعجب فيني
حاول اللعب معاي مرة و المراوغه مرة ثانيه
و يوم تقرب مني و حطني في باله
حبني
عيل هل التقينا صدفه؟ لألأ اكيد لأ

ولكن كل الي اعرفه اني يوم شفته عرفت انه قدر راح اعيشه

عشقتك قبل ما أِشوفك..وشفتك صرت كلي حلم
ابي رمشك يغطيني..وأبيك أقرب من أنفاسي
!!
شفت بعيونه سبارك ماشفته من قبل
فزيت وقلبي ارتعش من اول لمحه
من اول شوفه و هذا كله صار من نظره بدون ما اكلمه

عيوني مع عيونه
ارواح التقت و توالفت
توالفنا اشلون مدري
كان بكل شي غير
وكنت انا اخر احلامه
كانو البنات حوله كثير
وكانو يتسابقون لارضائه
وكانو هالبنات يعشقون جنونه
كانو!!
لأ بالعكس
مازالو البنات حوله
والكل يحبه
ولكن استثناني منهم كلهم
واختارني انا دونهم
ياني دون سابق انذار و موعد
فرض علي نفسه من دون ما احس
سحبني من الدنيا عشان اعيش دنيته بدون ما احس عشته اهو
هو محور حياتي وانا حوله اعيش
كان ريال معاي بكل شي
وطفل بعض الاحيان


الي اعرفه الحين بعد ماقعدت بروحي واسترجعت كل الي صار
ان انا مالي يد في هالي صار
لا انا اخترت قربه
ولا اانا خترت الفراق!

ما كان الفراق اختياري,,ولا عمري اخترت الوصال ولقيته
وانا أعشقك عشق المطر للصحاري...مها قسا وقتك علي ما جفيته
!!
كان اهو يقرر و انا انفذ
كنت اطاوعه بكل شي
مو قصبن علي
لا والله كان كل شي برضاي
بحبي
مو عشان ضعفي ولكن قادني جنوني ورائه
يازينه من عقل اذا هذا ينون

كنت احب رجولته و خضوعي امامه
كان بالضبط اهو يفصل و انا البس
البس فرحانه بكل شي اهو اختاره لي
تعرفون احساس الأنثى لي اخضعها حبها وحولها لفراشة؟
لمخلوق آخر مرن ..مجنون..رقيق وأجمل من كل جميل؟
وفي النهايه يوم حبيته
حطيت قلبي بيدي و سلمته اياه
حطيته بقلبه وقلت له
مصعب حافظ عليه
و صونه
خلني بقلبك
وترا باجر الدنيا دواره
ابيها تدور و انا معاك وتكون انت محور كل شي
ابيك انت شمسي و انا القمر ادور حوالينك

مصعب..هالله هالله بالأمانه
يوم أمنتك بقلبي..هالله هالله بهالأمانه

كانت اول ايامي في بوستن عرفته فيها
و كانت اول و احلى ايام عمري
سنه اولى ماستر
وكان اخر سنه له هناك

بعد ماعرفته و تعلقنا في بعض
انتقلت للسكن يمه
في نفس المكان
ماكان يكفينا ان قلوبنا تسكن بعض
ماكان يكفيني انه يسكن بقلبي كنت ابي اعيش معاه صج
بيتي اهو بيته
وسكنه اهو مكاني

كان يساعدني بكل شي و ابسط شي
وكنت انا له الحب و القلب و السكن
كنت انا الحبيبه
وكنت الام
و الطبيبه حزت التعب

عشنا ويا بعض ايام لا تنسى
اللي حب انسان و ماعاش وياه
ماعرف معنى الحب
تقاسمنا الحزن قبل الفرح
يشهد علينا الليل,,,,والسهر,,,وكل شي حلو جمعنا
شاركته في كل شي و شاركني
يومي و يومه
دراستي و دراسته
اكلي و شربه
نروح و نرجع يميع
ربعه اهم اخواني
واهله اهم ناسي

اكتفيت فيه دون عن هالكون

احبك دون كل الناس و اسأل و اطيع الامر و اصغى لاستماعه

بتنساني؟
ما اظن
بتنسى وحده تقعدها نص الليل الساعه 4 الفير
تجاري جنونك؟
تنسى ريوقنا في ماك
تنسى شهوتي لشورما في منطقه تبعد ساعه و اتروح اتييبها لي؟

انا: مصعب بليييييييز ميته برد الله يخليك سكر التكييف
مصعب يحط ايده في يبهتي: ترا انتي حاره
انا: لا لا عادي مافيني شي بس سكر التكييف

يعصب على
يسكر التكييف واييب لي الادويه
و يقط على الثرو يدفيني
و يشيل الكتب من حواليني

مصعب: قوماي ارتاحي دشي الدار ارتاحي

يدخل علي بعد شوي و يايبلي فيتامين سي
و ماي
يشربني
و يقولي ارتفعت حرارتج
دشي اخذي شاور

اخذ شاور نطرني عند الباب

يوكلني الادويه و انام

كل شوي رايح و راد يتطمن

موعد دوانيته اليمعه في شقته
يخليهم و يسهر على راحتي

اقوم من غرقه نومي
انا: الساعه جم؟
مصعب: الساعه 10 ليش؟
انا: ماتبي تروح عند ربعك
مصعب: انتي ربعي
يقعد يمي
يقيس حرارتي
نزلت شوي
اقوله مصعب تحبني؟
يحتضني حنان عينه
ويلمني بروحه
ويهمس لي باذني
يا عيون مصعب
مو بس احبج
انا اموت عليج
يعطيني ماي
ابوس راحه ايده
الله لايحرمني منك


يطنز علي : شنسوي بعد كبرتي و قمنا نداريج
لا لا لا خلاص انا لازم اتزوج يبيلي وحده تجابلني انتي عيزتي

انا :بضحكه مريضه تعبانه منهكه :الله يسااااامحك اسم الله علي تتزوج علي
مصعب : بعد اذا صار عمرج 60 بتزوج عليج
اشتبين فيني خلاص
انا : ابييييييييييييك احبك لين امووووووووت انت مالي

أمان...احساس الأمان يخليني اغفي
وبين ايده انام


تدمع عيوني لا ذكرت حوارتنا
ايامنا
ليالينا
سفرنا
و مشاكلنا

كنا يوم و ترك انتهاوش
بسبب و بدون سبب
من كثر ما كنا انجابل بعض

عيوبي تفوق عيوبه
و اغلاطه اكبر من اغلاطي

فيني عيوب و له اغلاط

في كل مره انتهاوش يزيد حبنا اكثر من الاول
في كل مره نسافر انتعلق في بعض اكثر من الاول

كنت اغار من اي امريكيه تكلمه
و اتهمهم في انهم يبون فلوسه

و اغار من اي خليجيه تسلم عليه و اتهمهم في انهم ميتين على كويتي

كنت ارز عمري في كل مكان وياه

سوقنا
مطاعمنا
ماكنت ارضى افارقه
و كنت اتباها كل ماشافونا الناس ويا بعض

ماهمني كلام الناس
ولاهمني الحجي
ولاهمني اي شي

اهو كان محور حياتي
تركيزي
عشقي

جنوني

احبك ياكل افراحي
احبك بكل جروحي


لي تزاعلنا يمرض
وعلى المه انا اتعذب
يغلط بحقي و اسامحه
روحين بجسد ما نرفق بحقوق بعض
ولا منهو فينا بدا
لانه تعبنا واحد

و انا راده من المكتبه
ادز له مسج :وينك
يحقرني

افهم انه لي الحين زعلان
ادز له مسج ثانيه تبي عشا؟؟

يحقر
افهم انه لي الحين مطنقر

ممممم
شسوي شسوي فكري يافطيم اشلون تخلينه يرد عليج

ايه لقيتها عرفت شقوله في المسج

مصعب حياتي لقيت ناصر و عبدالله بيروحون السينما فيلم يديد بروح وياهم من الجامعه
تقدر اتيي ؟؟

يرد علي

ردي البيت بس ردي البيت

اصرخ من الوناسه

يس
يس
يس
يااااااااربي...أجمل مافي الكون
أنا وهالمجنون

اروح البيت
اتحرش فيه
قاعد بصالته
ومسكر الباب يعني لا اتيين مابيج

اطق الباب ما يرد
انا: مصعب ابييك انا ييت عشانك مارحت السينما

هو: تعرفين تخليني بروحي
انا: مايصير ادش

يفتحلي الباب
ويروح يقعد

اروح المطبخ اخذ ماي من الثلاجه

ارد امسك الريموت
اطقطق في القنوات
اروح غرفته

معفوسه كالعاده

ارتبها
يدش علي
هو: خلي اغراضي لا تسوين شي
ابيهم جذي

طبعا لازم تعرفون شي في مصعبي
ان اذا رضا عني كدش ابو امن يابتني

و اذا زعلان علي : خلي اغراضي لا تجيسينهم


دايم الزعل
و دايما اراضيه
مشكلته يغلط بس يعرف يطلعني في الاخر انا الغلطانه

والله مدري اشلون متحمل طولة الساني
و انا مدري اشلون متحمله اعصابه

تدرون شنو الشي الغريب
اخترنا نعيش و انموت في بعض
من غير ما نعرف بعض



تكفون خلّوه لا تحصون غلطاته انا ادري انه تلف حالي
خلاني امشي على كيفه و مشهاته طوّعني شلون ؟ مدري ..بس طوعني


وعلى هالحال انا وياه اشهر
وبعدها قالي ان الوالده بتيي انشاء الله بعد اسبوع
و تعالو شوفو خبتي وخبته
على ييتها
مو قلت لكم امه اهي امي
و اهله اهم ناسي
القط اغراضي من كل مكان في بيته
حمامه
سله ملابسه فيها هدومي ليش!!
الحكومه على وصول
و التفتيش وارد
ولازم نقوم بازاله جميع الالغام
و في يوم الوصول
خالتي و خدامتها
و انا مسويه فيها السنعه
مربطه في الصاله ما اقدر اروح داره و لا اروح مكان
عشتو انا يارته بالصدفه
اكو ياره ادرعم على ريال !
بس هل اعبر ؟؟
اقدر امثل الدور كامل ؟ ما اظن
يتبع

Monday, January 07, 2008

يهالو ويهددوني بعد!!


صبحكم الله بالخير

طبعا في الفتره الي طافت غطيت عنكم فتره بسيطه
بس ضحكني اخوي فهد العكسر يقول غطيتاي و رديتاي لا احم لا دستور !
هههههههه

فحبيت ابارك لكم بكل المناسبااات
الي ما احب ابارك احد فيها

ماني نحيسه بس ملاقه يعني
كل سنه بقول هابي نيو يير

من قال هبي طل !!

كل سنه بقول عيد مبارك و بعدين يعني !!

و كل يوم بقول ماري كرسمس (( يااااااا عل ماكو كرسمس انشاء الله اشودرني غيره ((
الله كريم

المهم خلوني اقولكم شغله
بيني و بين المناسبات عداوة

يحوشني اكتئاب
و لا احب احتفل

مو عشان انا وايد داسبرت نو نو
بس عشان احنا ناس ما نعرف نحتفل عدل !!

جد والله
الكويتين خبه و قمته على الفاضي

ماكو بساطه
ماكو متعه

ماكو شي مريح

اول يوم العيد معيده في ترينينج !!
اشرايكم

في راس السنه نايمه مبجر
لو ما رفيجتي الي تسولف واخر شي قلت لها بنااااااااااااام
مابي يصير الساعه 12
و انا قاعده
ياربي ما بي تمر علي مناسبه اذكر اني لونلي


طبعا انفصام الشخصيه يشتغل في المناسبات
اشلون؟؟

عندي نوعين من الرفيجات

شاكي و مشكوووك به

الشاكي : هي الرفيجه الي تدز مسج تتحلطم ان احنا عوانس في هالمناسبات و ماعندنا احد يدري عنه

فاصير انا المستشاره العاطفيه اهني
و اقولها اشدعوه المتزواجات مستانسين
و اسوي نفسي ام السعاده

و احنا المرتاحين
و اقولها عندنا صحه و عافيه وخير و نعمه
بس هذا الف الحمدلله
ليششششششش من كثر النعمه تبينا نبطر

و الجزء الثاني من رفيجاتي

الي انا اصير عليهم مشكوووك به

ادز لها مسج
اتحطم عليها: بلييز قوليلي اذا صار الساعه 12 اتهقييييين من ببوووووس؟؟

بلييييييييز قوليلي اهو شسوي الحين

ترد علي بمسج

رحمي حااااااالج من التفكييييييير


فعشان جذي قمت اقص الحبل من نفسي و اخطط للسفر في كل مناسبه
عشان ما اقمت احد

و لا تشغل عندي رادار الشك و الوسواس

اي على طاري الشك

من الخبرات السووووووده بحياتي و السايقه
صرت كله افترض الشر

و كلااا اسوي فيها شارلك هولمز و اني جااكته في بلوة و اهو برئ مسكين

و يوووم الي يسوي بلوة اكون نايمه بالعسسسسل مالت علي

المهم اكتشف نفسي اني شكااااكه
و هبله

و كله مسويه افلام و اعيش الفيلم الي الفته بروحي
و خبله و مينونه

و قريبا جدا
بدش مستشفى الميانين


خلوني اقولكم سالفه صجيه صارتلي هاليومين

دزيت مسج قلت له : وااد يا محي مراتك فضيله عند صاحبتها لو عاوزني كلمني

رد علي عقب ساعتين : ضوضو حبيبتي وينج
قمت شلت قشي و رديت البيت قلت يعني سسسسنعه و قلت له انا في البيت

صار باجر الصبح امسح المسجات و الا ما وعيت

ضوضو حبيبتي وينج؟؟!!


هااااااو منو ضوضو
دااااز مسسسسسسسسج بالغلط حق وووووووحده
و وصلتني
اااااااااااااايه الله بيكششششششششششفك

ااااااااااااالله بيعطيني على قد نيتي
انا صااااااااااااااده بسسسسسس ربي يكششششششفك
و اقعده من غرقه نووووومه

فلاااااان منووو ضوضو

و يحلف و يكفر ما يعرف وووووووحده اسمها ضوضو
((يعني يعرف بس مو ضوضو )) طوفتها لك !!

قلت له ايه داز لها مسسسسسج
و وصلتني بالغلط

سكت سكت
سكت
قالي وين المسج
قراها
قالي لحظه لحظه!
انتي مو دازة مسج تقولين :مراتك فضيييييله !!
ضوضو يعني فضيله !!
انا هني لحظه صمت من الفشششششله
بغيت الارض تنشششششق و تبلعني
الي سكت بوووووووووساعه
واهو يصرخ
وين الساااانج
تحجااااي الله تحجااي
و بس عاد ماراح اقولكم انه قالي ان مسكين الله باليه في ابقر بقره بالكون
لان اعيب اقول جذي
بس و سلامتكم هذا الموقف
بس ليش انا دشيت في عشر سوالف
لاني ابي اسولف
اي نسيت اقولكم
هاليومين اذا شفتو يوتوب
وحده ترقص ويا صبيااااان يهالوو في مسرح المفروض يكون مسرح جاز
مفتوح
بس سلطان و ربعه كانو حاطين اغنيه عزاه يا قلب من الهم عزاه
وبما ان ماي بست فريند عزة فاشتطييييييت عشانها و توجهت لشله الشباب الصيع في المسرح
و رقصت باستنزااااال هيلقي
ووحده من رفيجاتي من يومين تقولي شفنااااك في التصوير !! و قامو يهدودوني بان بينشرونه
لووووول
يهددون امني القومي !
تخيلو صج ينتشر
عاد مستهبله يعني موشي حلو
مشكله لما توثق هلاقتي
و المشكله الاكبر ان كل وثايقي التصويريه هيلقيه !!
و استهبااااال
بخليكم ويا الاغنيه سمعوها و تخيلو شنو ممكن يكون الهبل
لاني لازم اقوم اشرب قهوتي
البرد الي برا مو صج صح ؟درجه الحراره 5 تعور !!
مسج
حبيبتي عزة صج صج
سمعي الاغنيه
كل يوم ادق عليج اصرخ عزاه بس اليوم غير
ايييييه
صج خيبه كبيره

Thursday, January 03, 2008

عين احضنتني و اشهقت

اتقلب طول الليل بفراشي باقي 3 ساعات على موعد وصول السياره
افكر للمرا المليون شنو البس بعد ما غيرت رايي الف مرا ..بس لاعت جبدي من النطره ليش اكو شي اسمه انتظار؟؟

اقوم اخذ شاور للمرا الالف افرش اسناني و اطالعها بالمنظره
البدي شاور الي يحبه و البودر و الديودرانت تفاصيل صغيره بس تضيع وقتي و تخلي هالساعه تمشي
ربكه ترتيبي و تبديلي يزعج رفيجتي الي وياي في الغرفه

تتقلب رفيجتي بتأفف و تغطي ويهها
اطالع الساعه توها الساعه 7
احد يتبخر الساعه 7 الصبح في هالظلمه بالسفر؟

اتبخر و انزل بهدوء
الكوت و الشال و الكاب بيدي

انزل تحت اتريق و اشرب قهوتي
و انا في البوفيه جبدي تلوع
بطني يعورني
خرعه اللقاء؟
و الا الخوف او المحاتات
مدري
اكتفي باكل فروت سلاط و قهوه

و انا في اللوبي انطر
اييني السايق
ياخذني بسرعه و يقولي يالله بسرعه برا مطر و و رش الاور
و باقي على الطياره ساعه و شوي و الطريج يمكن ياخذ اكثر للمطار

اركض و انا اعاتبه ليش تأخر علي؟
يايني قبل الموعد بربع ساعه مسكين ما تأخر
بس انا اسابق الزمن عشان شوفته

الطريج واقف
زحمه
انا مرتبكه و اربكت السايق وياي
حسيت انه مسكنا الخط السريع
الحين بديت ارتاح

قلبي يرقع
الراديو مزعج جدا
اقوله يطفي الراديو

احط راسي على الكشن و ارتاح
اخذ نفس عميق
اجيك على شعري
شكلي
صبغي
اخذ المنظره
اشوف الميك اب
و الاكسسوارات
و كل شي كامل
نوصل المطار
ندخل الباركينج
و كأني ادل هذا المطار
انحااااااش من السايق اسرع
و اتوهق في نص الطريج اني ما ادري وين بروح؟
فاضطر اني انطره

اوقف عند الجيت
الطياره ما وصلت
اروح كوستا
اقعد في القهوه هناك

انطر
ادزله مسج : اول ما تطلع من الطياره دزلي مسج بليز؟؟

يعلن استعلام المطار بوصول الرحله القادمه من مطار نيويورك
و قلبي يرقع
احس روحي بتطلع من مكانها
بس مافيني اكثر
كل مامني يرتعش
يرجف
الموبايل ما اقدر امسكه
اقط اغراضي على السواق
و اهو ماسك اليافطه الي فيها اسمه
اطالعه
اقوله : اي نووووو هيم

ما دزلي مسج!!ليش وينه
افتر
اطالعه
ماكو شي
البوابه تفتح
الناس تطلع
و اهو وينه؟
اتعبث في موبايلي
ادزله مسج: بليييييز دزلي مسج او كول مي
وينك انت وصلت بالمطار
و انا اكتب المسج
الاقيه واقف جدامي
اخترع اطمر
اخذ نفس
عيني بعينه
و ابتساامه تعني الي وصلت اخيرا

اتنح؟!
بس ليش طول عمري حاطه في بالي اذا شفته بلمه حيل
ليش ما لميته
ليش الكون وقف عند عيونه
ليش عيوني تغالطني و تدمع الحين.؟
ليش ارجف
و ابتسامتي تزيد

يقولها لي :شلونج
و من سمعت صوته عرفت شنو يعني انه وصل
لميته حيييييييييييل وقته
و قلت له زينه
زينه
بديت استوعب
وحضني جدام الناس كلها
شالني وحطني على قلبه
الي اذكره اني ساسرته
و قلت له :ولهت عليك
هو: حبيييييييبتي
ياخذ السايق الجناط و يمشي جدامنا
الود ودي يشيلني
او اتعلق فيه
و لكن اكتفيت بلمه على الجنب
اكتفيت بايدي في ايده

ركبنا السياره
لا شعوريا قطيت روحي عليه
و لا تكلمت
يسألني و يكلمني وانا مثل البنت الدلوعه الي مو راضيه تتكلم
و لا تبي توخر
و لا تبي تشيل راسها من عليه
اسأله : اشلون رحلتك
نمت
وسرحت و انا في حضنه
هل اهو صج الحين وياي؟
و اخيرا صار وياي
صج يا اليوم الي شفته و اخيرا
هل انت انت حبيبي
ارفع نفسي منه
و اشوف ويها
يبتسم
و اركز نظري فيه
ابوسه
و ارد اقط روحي عليه

نوصل الاوتيل
داز لهم اهو ايميل قايلهم ايرلي جيك ان بس ما عطونا الغرفه
انا: تعال امش غرفتي
خلنا نرتاح فيها بقا ساعه على موعد غرفتك...
اسأله : تحتاج جنطتك؟
هو : لأ خليها مرا وحده بس باخذ الهاند باااااج

نركب فوق
ندخل الغرفه
يتسكر الباب
ويشيلني بلمه تعوضني وله الايام الي فاتت

افتح الثلاجه اطلع له ماي بارد
يدش الحمام
افتح التيفي
و افتح الدرايش
الهوا باااارد
و الستاير تطير شوي
المنظر خيال

بصوت عالي اقوله : تبي نروح ناكل شي
او تنطر لي تحط اغراضك في الغرفه تبدل و ترتاح بعدين نروح؟

يطلع من الحمام
يقط روحه بالفراش
اقعد عند ريوله
يسحبني

بعد دقايق
صوت الباب يتبطل

نخترع
صوت من بعيد : هاوس كيبينج
انا وبعد ما اخذت نفس عميق

خراااا فيج

نستلم الغرفه
ارتب اغراضه

يدخل ياخذ شاور
اطلب اكل
يطلع من الحمام

ناكل و نقعد ويا بعض
في جلسه حميميه كلها اعترافات
و سوالف
نلاقي نفسنا صار المغرب

اكو لحظات احلى من لحظات لقاء حبيب بحبيبته؟؟
عشق ارواح انتظرت يوم مشمس

صبر قلب طفله
لاب حنون

ننزل في هالبرد انتمشى
نمر على البيوت
و الفنادق
و البارك
و السكوير
و لكن ما ادري في اي شارع مشيت
و لا وين رحت
كل الي اعرفه اني بين ايده

كل الي احسه قلبه يدق بيدي

اسبقه بخطوتين و اجابله
و اهو يراقب لي الطريق
امشي عكس السير و اسولف وياه
انا : الله يخليك الله يخليك طول عمري اتمنى ادش بارك او حديقه بالليل بس كلا اخاف
من السكارى او اني يصير فيني شي
بس دامي وياك خلنا نقعد الحين في مكان

يمسك ايدي بسرعه قبل لا اطيح
و يسحبني يمه
و يقولي امشي عدل
اتطاير مثل عصفوره
و اتكلم وياه و قلبي طاير
اترقص
اغني
العب
كل شي كنت
و كل شي سويت وياه

او في الاحرى كل شي اكلت
انا : حبيبي بما اني ما احب التخصص و لا التنظيم فراح ناكل الحين كستن
و بعدها ايس كريم و اذا خلصنااااا بنتعشا
و ابتسااااامه عريضه

نسهر في مكان حلو للعشا
انا : المره الي فاتت ييت هالمطعم
بس معاك انت غير
هو : مواه
انا: كل شي وياك غير
حتى الناس اشوفهم احلى

هل اليد لها لغه؟؟
نعم لها لغه
فلما يمسك ايدي بيده حيل و يفركها
احس شنو بقول
افهم
و ارد عليه باني اشبك اصابعي في اصابعه اكثر

هل العيون تتكلم ؟
تتكلم العيون و احلى وقت لها اثناء الاكل في مطعم حلو
فيشتغل الفم بالاكل و العيون بالكلام

نرجع الفندق

اروح غرفتي
اغير ملابسي و ارتاح
يتصل علي بعد ساعه
هو: نمتي ؟
انا : نو
هو : تعالي نوميني
انا : اخاف انام عندك صج
و يدوروني
هو : تعالي بس شوي

اروح
يفتحلي الباب
يضحك على شكلي
انا: بصوت منحرج و رده فعل مضحكه
ليكون عبالك بييك بقميص نوم لابيرلا !
بررررررررررد برا درجه الحرارة صفر
و بعدين اانا المفروض اكون نايمه يعني
و انا اصلا اصلا مو ناويه اسوي شي غلط
عشان جذي ييتلك في هالشكل
مراعاه انك راد تعبان و اول يوم
و انا ابرر خلاجيني
و اهو ميت ضحك!!
قعدت في وسط الفراش يتأملني

عفوا يفشلني
و يعد
لابسه روب
دلاق
سليبر
بجاما
شال
و يسأل : بقا شي في الجنطه ما لبستيه؟؟

و ارجع غرفتي و انام
و اعيش وياه احلى اربع ايام في حياتي
شوبينج
تمشي
مسرحيات
مطاعم
مرا ربع و مرا حبايب
مرا هواش و مرا غيره

احب فيه كل شي و اصغر شي
احب فيك كل تفاصيلك
احب هدوئك و يومك
احب شهيتك المفتوحه
و نفسك المسدوده لما تنقث مني

احب اسلوبك
كلامك
لمساتك
وهمسك
احب يومي معاك
و احب كل هالدنيا بعيونك
حبيتك سنين
و لكن يومين اعيشهم وياك يعطوني دافع اعيش باجي العمر لك

احب تفاصيل ما يحبها اي احد
او ما تهم احد
احب ريحه جسمك
و احب حنتك اذا بغيت تعرف شي
احب دغدغتك لي
و احب اشوفك و انت تاخذ شاور و تحلق
و احب المك و انت بالحمام
احب اسكر جنطتك في بدايه كل يوم ونهايته

احب العطر برقبتك
و احب البس هدومك

احبك انت كلك
من اولك لي اقصاك
احب امسي وياك
و يومي الي عندك
و مستقبل مهما كان ابيه دامه وياك

احبك