Tuesday, August 16, 2005

صاعقه ابكتني ....للكبار فقط

دخلت المكتب اليوم .. و الا مستشارين مبسطين عندي
بوزت و مالي خلقهم كلش خلصت و سويت الي يبونه و تريقت و رحت اشرب قهوتي عند المستشاره الي في قسم ثاني
و لما دخلت عليهم ... كانو يتكلمون عن موضوع الخدم ... موضوع يدور في كل يمعه حريم
لكن السالفه هالمره وايد غير لدرجه اني .. لاشعوريا قمت احط اسكر في ايدي على حلجي و قمت اشهق .. و كل ما كملت السالفه ..
اقوووووول لأ لأ لأ لأ لأ مستحيل اكووووووووو جذي .. شوي شوي .. و الا انا لا شعوريا ادمع ..!!!
فعلا لا تستغربون مأساه عندنا في الكويت تبكي .. بما اني اول مره اسمعها فأبكتني

السااالفه الاولى ..

وحده من الحريم ... و هي ام لثلاث اولاد غنيه جدا ماشاء الله (طبعا قالولي الاسم ) المهم اعيالها كلهم من طقه بعض .. بينهم سنين
ساكنه في بيت من دورين .. اهي و اعيالها اهي الدور الي تحت .. و اعيالها عندها و كل ما يكبر واحد يصير عمره 15 سنه يعني من يدش الثانوي صعدته فوق جناحه الخاص ...
يتكون من غرفتين و صاله و حمام ..اتجهز الام الجناح لولدها مع فلبينيه !!!!!
يعني الزبده عندها 4 فلبينيات في البيت وحده لها و 3 لاولادها
لكن الفلبينيات الثلاث .. ينامون و ياكلون و يشربون ويا اعيالها .. و عندها نظريه الام .. تقوله يا وليدي .. ديربالك من بنات الناس
مالنا خلق علاقه ويا كويتيه باجر اخوها يذبحك و الا يسوي فيك شي
هذي فلبينيه عندك سو فيها الي تبي !!!!
الكويتيه بس للتلفون و هذي الفلبينيه للفراش
انتوا مستوعبين السالفه !!
انا مصدومه
المهم
ظلوا العيال على هالحال .. جم سنه بعدها تخرج الولد الصغير من الجامعه
جان تجتمع الام في اعيالها
قالت يا عيالي انا ماقصرت ويااااكم وفرت لكم كل شي عاد الحين يالله شدوا حيلكم انا ابي كويتيه بخطبلكم حريم .. بنات حمايل و تتزوجون
و هالفلبينيات راح نختم على جوازهم و لا يدشون عشان ما يروحون بيوت ثانيه .. يفضحونا !!!!
قالولها اعيالها اوكيه ما عندنا مانع بس بشرط نختمها بسفره وياهم ..
البنات مادحيلنا جزر الفلبين .. بنروح اسبوعين ثلاث و انرد
و الابناء الثلاث .. سافروا سنه 1995 شهر ثمانيه .. وو للحين ما ردوا
اخر مرا كلموا امهم فيها شهر 12 سنه 1995
قاولها يما بنحتفل في راس السنه و انرد
الام طبعا ما قالت هالكلام .. و هالقصه الي بعد ما عانت في السفارات و الخارجيات و سافرت تدور اعيالها
و وصلت السالفه لين صباح الاحمد كان وقتها وزير الخارجيه ..
.. قالها مترجم في السفاره الكويتيه ان اسره احد البنات اقتلت اعيالها و في روايه تقول انهم مسحورين !!
المهم الام احصدت ما زرعت
و الله لا يبلينا
و اهي الحين مخرفه .. عايشه مع الخدم بروحها
.......

السالفه الثانيه

في احد مكاتب الخدم بمجمع الرميح
يت معزبه ... ترد خدامه اندونسيا .. صغيره في السن ..
تقول للمكتب انها ما تبي الخدامه .. قامت وحده (الي وياي في الدوام) تليقفت و قالتها ليش ما تبينها شكلها زين انا ابيها انا على ويه ولاده و ابي مسترجعه
قالت الكويتيه ((الله ياخذها انا عندي ورعان كل ما جا واحد يركبها طقته )) طبعا رفيجتي
قالت اي هاليهال شياطين بس يكفخون الخدم ..قالت لا اعيالي ما يطقون بس يركبون !!
اهني بدت تستوعب صاحبتي
لانها تعتقد في معني كلمه يركبون ((ياهل يركض و يطمر على الخدامه) ماتوقعت يمكن يكون لفظها جنسي!!!


السالفه الاخيره :

قضيه طلاق لمرأه عمرها 65 سنه
طبعا لما يت تطلب الطلاق
لازم يكلمونها مكتب الاستشارات الاسريه ..
خصوصا ان شي نادر مرا في هالعمر تطلب الطلاق
و اهي لا تشتغل و لا راتب و لا بيت و لا احد يعولها غير زوجها
اسألتها الباحثه ليش يا خالتي تبين تطلقين ؟؟
عقب هالعمر ..صبرتي هالسنين .. توقعت الباحثه ان السالفه بتكون على مشكله اعصاب الزوج او على انه متزوج عليها
لكن الصدمه .. كانت اكبر
تقول يا بنيتي ما اقدر اشوف الحرام في عيوني .. واسكت صبرت صبرت لكن لي متى!!
مابقى من عمري ..زوجي ولدي صارلهم 4 سنين و اهم من فلبينيه لي فلبينيه و في بيتي و انا ساكته!!!!
الابو وولده يتحاططون في فلبينيه وحده
و اذا قلت له يا ويلك من الله .. انت ابو انت قدوه قال ولدج ريال و كبير
و يصرفون على هالفلبينيات اكثر من صرفهم على روحهم و يخصوصون لها دار في بيتي .. و انا مرا مصليه مسميه .. اقيم الليل كل يوم و الدار الي يمي فيها زنا و من منو ولدي وزوجي !!!
الله يرضى الناس ترضى!!
وطلقها القاضي على طول و حكم لها بنفقه و بيت وسايق و خدامه ...
لا تخترعون
هذي سوالف من الواقع
هذا الي عرفته و الي ما اعرفه اكيد اكثر .. مسكر بين البيبان
و عسى الله يحفظنا و لا يبلينا


اسمحولي يا اخواني ما اقصدكم بس اقصد شريحه بالمجتمع و ياريت تكون قليله بس للاسف الي قاعد نشوفه انها مو بسيطه
جنس جنس جنس جنس
محووور الحياه صار جنس
وين ما تروح تسمع هالسوالف يا سكس يا اعتصاب
تفتح التلفزيون
اغاني مخله منحطه
صاروا بعض الشباب حيوانات !!!
ليشششششش و بعدين و نهايتها !!
وين الدين ..
انا مو ضد فطره الله و لا انا ضد العلاقه الشرعيه بين الازواج
يمكن فعلا تكون متعه
انا اقصد الحيوانات
الي متزوج او يقدر يتزوج و يلجأ للحرام
ليششششششششش!!!!!
هذولا الناس تالي الليل لما يحطون راسهم على المخده ما ياكلهم ضميرهم
!!!؟؟
مدري بس صصصصصصصصج اليوم استحقرت كل الريايل و كرهتهم و حطيت حرتي في مديري
طلب اوراق
لا تضحكون علي
بس صج حست انبطت جبدي وايد
اسفه على الاطاله


22 comments:

Nooni said...

3assa allah la yableena wala yabley a7ad ....wegaf sha3ay janbi wallah ...we3

Яeema said...

الكويت فيها بلاوي الله يحفظنا انشاء الله
ما أصدق إن أم اتسوي بعيالها هالشئ
أمبيييييييييييه!!!!
ياتلي فترة وحدة معاي بالدوام تقرا مجلة الجريمة
ما اتصدقون إني لما الحين تعقدت منها و لا يمكن أركب سيارتي بدون ما أقفل الباب قبل لا أبطل المكيف
كم صارلك في مهنة المحاماة؟

ii said...

الله لا يبلانا

القصه الاولى هي الصدمه
ام من خوفها على عيالها سوت كذا
قد سمعت قصه مثلها قبل ان الام تقول الخدامه ولا بنات الناس
بس والله تستاهل
من عمره 15 ؟؟
عيب عليها والله
بس بفهم شغله وش يحبب الرجال بالفلبيننيات وعع؟



السالفه الثانيه
لا احد يزعل مني بلييز
بس انا اشوف هالاشياء تكثر عند البدو
ويعتبرونها عادي مره
يمكن من الجهل او ما ادري وش اسمه

meo said...

اختي المحامية
الناس أجناس
حاولي ما تخلين الخير يخص و الشر يعم
ويمكن المكان اللي انتي فيه يخليج تسمعين هالحجي بكثرة
و ترى مو بس الرياييل
حتى في حريم وايد و بنات خربوا بيوت
و كلنا نسمع عنهم

بس الصراحة انا لما اسمع ما اغير تصرفي
مع البنات سواء بالعمل و لا اذا بخلص شغلي
تبين الصج كسر خاطري المدير ماله ذنب
:"(

qalm-jaf said...

آسف سوف استخدم عبارة سيئه
فى الحقيقه نعم الهاجس الجنسى صار اهم من هاجس الوظيفه
الواحد صار يدور شغل مو عشان ياكل بالحلال علشان يسوى له شقه مع ربعه وقعده
هذا اول هدف
الهدف الثانى يبحث عن وحده فى الشارع يحاول ليس لكى يتزوجها بل لى يستمتع معها
اذا سألت شاب ذاهب يوم الخميس او العطله وين رايح يقول ابى ادور على ق؟
علشان ارقمها
وانام معاها
ملاحظه بسيطه هو لا يقصد العاهره اللتى يدفع لها مقابل المتعه الحرام هو يقصد البنت الشريفه بنت العايله المحترمه
يجب ان تعرف المرأه بان الشاب الوسيم الذى يحاول ان يرقمها ليس ملاك
ويجب ان تعرف المرأه ان عندما تاخذ منه الرقم يقول هذا الرجل فى نفسه انها قح؟
اما بالنسبه للقصه الاولى
حاشتنى قشعريره من السالفه
اقدر اقول او الايه الكريمه تعبر اكثر
قال تعالى
يمكرون ويمكر الله والله خير الماكريين
قال تعالى
وما ظلمناهم ولكن كانو انفسهم يظلمون

ولكن يوجد رجال يستحقون هذه الكلمهيااستاذه
(:
بعد اذن الاستاذه المحاميه
نوره
الفلبينيه او الهنديه أمرأه نفسك لها حقوق وواجبات من حقها ان تحلم وتتزوج وتنجب اطفال
وهى من بنى ادم ومن جنس البشر وليست من الحيوانات
لكى تقولى عنها وع
اذا كانت خادمه فهى امرأه قبل ان تكون خادمه
بعد اتمنى
ان لا تحكمين على الناس على اساس
الجنس او اللون او الدين او المذهب او العائله او القبيله
آسف لانى ملقوف بس ما احب العنصريه والتفرقه

lawyer said...

اخواني و خواتي اثلجت صدري تعليقاتكم

جودي ابت
تشرفت فيج اختي .. و احب اقولج اني من اشد المتابعين لباباي صاحب الظل الطويل ..
امين يا رب العالمين..


بحرينيه
يا هلا و غلا فيج نورتي
اي للاسف و المشكله انها امرأه من عايله محترمه و معروفه و زوجها متوفي .. و لو مزوجه عيالها و مربيتهم صح جان احفادها يملون عليها البيت

ريما
اي او سكتي انا لو شنو ما اقرا هالمجلات اشفيها كوزمو و هالو جلامر و فلوريدا دزاين ..

نورا
امين الله لا يبلي الجميع
ههههههههه سؤالج حلو ما اقدر اجاوبج عليه في البوست بس كل الي اقدر اقدر اقوله لج ان اكثر شي يحتاجه الرجل يلاقي عندها بدرجه 7 نجوم هذا على قوله الحريم بس اذا تزوجت بسأل ريلي بس اخاف افتح عيونه لا لاااا مالي خلق
انتي سألي اكثر
السالفه الثانيه انا معاج فيها

lawyer said...

Meo
ليكووووووووون انت مديري !!
ههههههههههه ادري تصرفي غلط بس مفعول السالفه

قلم جاف
عدل كلامك انا اتفق وياك و بصراحه انا كنت بقول الكلام الي انت قلته بس قلت اخاف تقولون انتي متحامله على الرياييل

كويتي رحال
صح كلامك س انا تفاعلت الظاهر زياده ويا السالفه والله شسوي اول مرا اسمع سالفه في هالمستوى
اي والله صح حتى المو متزوج لان في النهايه زنا
اسم الجريمه زنا سواء للمتزوج او غيره

Expatriate said...

أولا : بالشيطان هالناس ، الواحد يجابل عمره ويفكر بنفسه اولى من انه يشيل هم الناس بالديرة ، باللي ما يحفظهم اذا دينهم سهل جذيه عليهم ، وعايشين علشان الجزء الحيواني فيهم ، فبالطقاق وعساهم على هالحال واردى
احنا شكو فيهم ؟


ثانيا : هالقصص مهمة جدا حق البنات علشان يشغلون مخوخهم وما ينقص عليهم ويعيشون اوهام واحلام مثل الافلام الامريكية والمسلسلات ، ويعرفون ان اللي يحاول يكلم البنت او يتمشى بالمجمعات اوقات الزحمة ويرقم ، هذا مستحيل غرضه حيواني شوي ، هذا ناوي شر ، ولكن الشباب ممتازين جدا بالتمثيل والاستعراض وتأليف القصص وكلمات الحب وهالسوالف ، وللأسف اغلب البنات يا اغبياء تمشي عليهم هالسوالف ، او تعبانات ماشين بنفس الدرب
ولكن نصيحة للبنت اللي خايفه ربها لا تغتر بالافلام الامريكية اللي لا واقع امريكا ولا واقع الكويت تنطبق عليه ، والشباب الامريكان هني بامريكا العن بألف مرة من الشباب اللي بالكويت ، واللي تطلعه هوليوود بالافلام الامريكية الرومانسية كلها قصص تصير مرة بالالف في امريكا ، اذا مو اقل،
والمؤمن كيس فطن ، والبنت اللي تمشي ورا عواطفها مردها بتبجي وتندم في النهاية ،
وانا سعيد لكلامج آخر شي لوير ، ايه ، عرفي حقيقة الخمة بالكويت ، عرفي حقيقة اللي مسوي نفسه محترم وكول وزقرت ويتمشى تالي الليل في المجمعات بالكويت ويتفرفر بالقهاوي ، وقاص على البنات ،
انا ما يبطون جبدي الشباب ، هذول حيوانات خلاص ، بس يبطون جبدي البنات اللي ينقص عليهم ، ومصدقه عمرها عايشة برومانسية ، ولو بس اسجل لها الكلام اللي يدور بدواوين الشباب ، تقعد تبجي اسبوع على الاقل


اما عن انتقاداتي عن اسلوب نقل القصص ، والكلمات المستخدمة في الموضوع ، فأحتفظ فيها لنفسي

جنة الحواس said...

ما عندي تعليق مناسب بس شي يضيق الخلق

و بعض الناس مثل ما قلتي صاروا حيوانات

:(

ii said...

قلم جاف :
اسفه لتعبيري بكلمه وع
لكن انا قصدي مو الشي العام
يعني انت تعرف بالضبط لكوني رجل وخليجي بعد ليش رجالنا يحبون الفلبينيات
انا قلت وع على السبب مو عليها هي لانها انسانه وعارفه هالشي ويمكن تكون احسن مني بعد
بس سبب تعلق الرجال بالفلبينيات او الخدامات يقرفني ويسبب لي الغثيان

لا تفهمني غلط وتظن اني استحقر احد مو مثل جنسي

تبي تحلم تتزوج وتجيب عيال؟؟ اوكي بالحلال مو بالبلاوي اللي يسوونها ببيوتنا والسحر
الحمدلله ما جبت شي من عندي اقرا هالموضوع وتعرف الفلبينيات (اللي اقصدهم انا) وش يسوون عشان تحصل على اللي تبيه
اما الفلبينيه اللي محترمه نفسها من دون تصرفات نص كم انا ما قلت عنهم شي
طبعا والنص الثاني من كلامي فهمته لوير !!
اللي هي قالت عنها خدمه 7 نجوم وهي صادقه
:)

الظاهر قمت تدافع عنهم لانه عاجبك الوضع مثل ماهو عاجب غيرك
:)

lawyer said...

expa:
اي والله وياك حق في الي قلته يا ريت البنات تصحى شوي
و اشكرك


اي عسووووله اكو الشكوى لله

بروك
اي والله للاسف


نورا :)

qalm-jaf said...

نوره
عندما تقولين آسف
فأنكى تتأسفين من نفسك اولا ومن النساء الفقيرات ثانيا وليس لي انا
شيء جميل ان يعترف الانسان بانه مخطأ ولكن الاجمل ان تعتذرين
(:
أغلب كلامك صحيح ولكن الاسوء هو
الظاهر قمت تدافع عنهم لانه عاجبك الوضع مثل ماهو عاجب غيرك
التعليق
شكرا جزيلا ويعطيكى العافيه
ويجى منك اكثر
قال تعالى
قل هاتو برهانكم ان كنتم صادقين
اعتذر اذا فى خطأ فى الايه
الايه الكريمه تكفينى فى الرد على تعليقكى
وشكرا

ii said...

قلم جاف:
اعتذر؟؟
طيب انا قلت لك اسفه على التعبير فيه اكثر من هذي كلمه!!

ثانيا النساء الفقيرات؟
انا ما تكلمت عن الفلوس ولا قلت حنا اغنياء وهم فقرا
والفلوس مالها اي دخل
والدليل انفتان الرجال بالفتيات الشاميات
:)
مع انه فقيرات مثل ما تفضلت

كل مافي السالفه الحكي اللي قلته لك
هذا الشي اللي يقرفني

جملتي الاخيره ما اقصد فيها شي والله
بس انت تاخذها بجديه بعض الاحيان
قلت لك تدافع لانك الوحيد اللي انتبه لكلامي وعلق عليه
:)
اذا مضايقتك لهدرجه تراي اسحبها
ولاراح اجيب برهان ولا شي
لانك اكبر من كذا بواجد
:)

Qa6Wa said...

do u know is this happenning??? walla kila min el 7koma o el parants walla,,, kila man3 e5tila6 EVERYWHERE!! yalla,, now 79daw elli zara3tooh,,,

walla law ena kil shai ok o mako man3 e5tila6 chan walla walla shai min chithi 9ar,,, ymkin y9eer bs mo eb hal wa7shiya!!!

I BLAME THE COUNTRY, I BLAME THE PARANTS

qalm-jaf said...

نوره
اخت عزيزه وغاليه
(:

enter-q8 said...

السالفة الاولى
ساعدت على المعصية لعيالها
وعاقبها الله بعيالها


السالفة الثانية
هذي رايحه فيها وعلى ما اظن عايشيين بزريبة مثل البهايم اذا تدري عن هالسوالف وتبرر هالشي


السالفة الثالثه

الشرهه على الولد


السالفة الاخيرة

الخدم هذول امانه عندنا هادين اهلهم وعيالهم مقابل خدمة ومقابل مادي

يا سبحان الله

الواحد اذا ما يخاف الله بنفسه

شنو يصير اكثر من هالبلاوي

وفي بعض الخدم
مال طراقات وفناقر على الريق وعلى المسا

فلبينية عند زميلي بالدوام

مطنقرة عليه

تقوله شنو
im woman i need boy frind
مشكله فعلا خصوصا ان بعضهم يجي من بيئة مختلفه

ويا كثر بيأتهم

lawyer said...

blasha
al7koma ma ga9art kil shay 7awalt etsawih lakin alnas ely almafroth e6abeq alqanon ohma akthar nas msawin blawy

enter

ee walla 9a7 klamik
oooffffffff fe ba3th`hom mal 6ag

ana marra 9alry chethy felebenya mostarja33a yebnaha mn bacher o ella ga3d fe al7osh smoking !! shway shway mobile yeren o tetna7wa9 3ala wa7d
almohmm zatenahha lamma ana zafetaha galatly ana woman ! gelt laha me 2 o single
galatlly galtly lazem et3aljen nafsech!!!!!

Hopeless Poet said...

The 1st story is really I don't know what to say!! Usually the mothers care more about their kids being away from all 7aram but this woman I don't know!!
And I don't think the reason is "man3 el e5tela6". All western countries have e5tela6 but we still see child abuse and rape and child pornography and incest and so on! It is more related to the people and their goal in life!

lawyer said...

hopeless

7ayyak alah
ee walla 9aaj alomahat ohma shadden akthar o 7azmen bs hatha shay aked mawjod fe jenatehom akid fehom shay mo 6abe3y

aked mo salfat ekhtela6 ba3ad ..

شرقاوي said...

Lawyer,

المشكلة الكبرى هي نوع التربية التي يتلقاها الطفل قبل سن الدراسة...وهذا موضوع باب من أبواب علم السيكولوجيا

جداتنا، في الماضي، رحمة الله عليهن، كانوا أميات لا يعرفن القراءة أو الكتابة، لكنهن ورثن قيم ورثها أطفالهن مع حليب الرضاعة ...

والآن وبسبب النعمة الزايدة صار في كل بيت أكثر من خدامة\مربية... أو ما يتناسب معها الوصف...

هذه الظاهرة صار لها عدة عقود...ونشأ منها أكثر من جيل ...تربى في أحضان من هن أقل ثقافة من الابوين البيولوجيين للطفل...

وهناك من عندهم مربيات بكل معنى الكلمة...مربيات على ثقافة وبالخصوص في سيكولوجيا الطفل...لكن هذه النوعية من الأسر نادرة...

والمشكلة أكبر عندما يكون الزوج والزوجة مضظران للخروج من البيت لعمل أو ارتباطات إجتماعية لفترات طويلة في اليوم وترك الطفل في رعاية من هن اقل تأهيلاً لهذه المسؤولية الجسيمة...

سؤالي الآن، وبعد مرور أكثر من ثلاثة عقود على الأقل من هذه التجربة الإجتماعية، ماذا نتج عندنا من شباب وشابات بعد هذه التجربة؟

وهناك بيت لشاعر الكويت الشعبي فهد بورسلي يذكر فيه نوعية من الشباب وأطلق عليهم "ربى الدايات". ولا أستطيع أن أتذكر القصيدة، علماًً بأن من كان عندهم "دايات" في كويت ما قبل النفط من القلائل وربما نستطيع عدهم على الأصابع...

وسامحونا على هذه المداخلة الطويلة...
وشكراً للمحامية على هذه المساحة من الحلم...
(شرقاوي)

Inssan said...

الله لا يبلينا هذيل ناس يالوير لو تعرف الله وتخافه جان ماصارت ولا سالفه من هالسوالف بس سبحانك يا رب العقل والدين نعمه

lawyer said...

شرقاوي
اي والله ربى الدايات
على الاقل كانوا الدايات من مصر يعني عرب و مسلمين .. بس للاسف
هاليومين الي يشرف على تربيه اعيالنا لا مسلمين
و لا حتى عندهم اي دين او مذهب

انسان بسيط
اي والله صاج