Saturday, August 19, 2006

الجزء الثاني

يمكن بطيت عليكم شوي
في الصور
بس صدقوني ما أخرني الا شي جايد
من يوم الثلاثاء بالليل مسكتني بلاعيمي
يوم الاربعاء لألألألألألألأ فلونزا رسمي
خميس و يمعه في الفراش
اليوم السبت اشوي صحصحت
و قاعده الحين في الصاله مجابله البلوجز
و قاعده احاول انزل باجي الصور عشان اتشوفونها


الصوره الثامنه
مدري ليش انا بالذات او يمكن في بعضكم مثلي
يتسلط على في السفره اغاني طلال المداح و محمد عبده القديمه
الي اتذكرك في رومانسه و حب ماودك ابد ابد
تذكره
و خصوصاا لما تكون بروحك يعني
لا حنيس و لا ونيس و فجأه بو سلطان(مزاج الاغاني القديمه اسمييه انا بوسلطان)
يتسلط عليك
ان جانه في الحمام
ان جانه في هالاسنسير
و يااااااشين اذا انت مندمج في الاغاني بالاسنسير
ومجابل المنظره تسنع في روحك
و يفتح الاسنسير
و خلق الله طاحوا عليك
يا شيييييييييييييني


المهم ما اطول عليكم
انا في السفر موديلي من يصير المسيان على 7 جذي رجعت الغرفه اغسل و ابدل
و اسوي مطاره الشاي بالزعفران
و اريح شوي تالي اكشخ
و اتسنع و اتبخر و انزل القهوه

و انا متعوده لازم الصبح و العصر اشب فحمه بخور في البلكونه و اتبخر في الدار
ما ادري شي الي سلطني و ولعت الفحمه في الدار
شغل عيز

شوي و حطيت بخوره
و حياتكم دقيقه و الا تصفررررررر
الانذار
و يدقوون علي
الرسبشن
و الحاله حاله
ياشينهم قطيعه هالاجانب
خوافيييييييييين
خووووووو اهي اقصاها بخوره
و سولي عليها سالفه

ما يسوى فشلتي
بس اشوه اخوي ما حس فيني و لا درا
جان راح فتن علي امي و سوتلي قصه

عبالكم تبت؟؟
من باجر الصبح شاااااااااابه الفحمه مرا ثانيه و متبخره
و ارد احطها في الكبت و اسكر عليها
مالت عليهم
سنعت دارهم و بخرتها
مو احسسسسسسسسن من الجلاب
الي ينامون وياهم


الصوره التاسعه
على طاري تتسلط علي اغاني طلال المداح او محمد عبده في السفرو خصوصا عبدالكريم بعد

و من اكثر الاغاني الي تسلطت على

غريييييب

انا بعشقك اناا
الا يا اسمر يا زين
ترحب بغيري و انا الولهان
انت معاي و الا انت ناوي تبتعد عن خط سيري
الله امر اعشق و احبك يا بدر
بس الاغنيه الي سويت عليها فيلم لا صار و الا استوى الي خلا رفيجاتي يصرخوووووووون علي
اغنيه زمان الصمت لطلال المداح
كنت نازله ويا البنات من الجبل عن طريق الكيبل كار
و انااااا مندمجه حيييييل الكيبل الكار الي كنا فيه
يشيل 4 اشخاص
انا و ثلاث بنات
ولازم ما المفروض نقوم او انتحرك عشان توازن التلفريك
بس انااااا مشتطه
و البنات يقولولي
سمي بالرحمن ذكري ربك
يا شيخه اعقلي
اتركي عنك الهبال
و انا مطنشششششه
و اصرخ باعلى حسي
و تـــــــــــــــــــــــــــــــــــرحل
صـــــــــرخـــتي
في وااااااااااااااادي
لا صدى يــــــــوصل

ومدري اشذكرني في هالاغنيه
و اغني و مششششششتطه
و البنات يا عوينتي عليهم
بس يسكتون فيني
و انا عبالي اني اصاله على الصراخ


نزلت من الكيبل كار
و انا في نشووووووه الاندمااج

ولا احد يدري سبب صراخي و على شنو و على منو اصرخ

بس تذكرت خالد الفيصل لما يقول
اون و كل يحسبني اغني
عليل و كل من يحسبني مداوي
اودع رفيجاتي و اقولهم القاكم بعد ساعه في البحيره

ادخل غرفتي
اقط نفسي على الفراش
و اكمل غناء زمان الصمت
ابكي

ادخل الحمام
و تحت الشاور
اركز الشاور على ويهي

وابكي

لين يطلع الي فيني كله بالشاور

جربوا تغسلون همومهكم
تحت الشاور
احساس عجيب

الصوره العاشره

انا اؤمن بان معشر النساء ناقصات عقل و دين
و ان احنا مخلوقين من ضلع اعوج
و لكن الي شفته في عيني
و شافووه نص الخليجين الي في سويسرا
يؤكدلي هذا الكلام

كنت رايحه جنيف مع اخوي و صديقه امي عشان انأكد الحجز
حلو
و انا في محطه القطار
و الا هذاك الشاب الخليجي
الطويل
الابيض
وسيم
معاه زوجته
كان يطالعنا
وزوجته معطيتنا ظهرها
لفت زوجته عشان تشوف اهو شنو قاعد يطالع
و الا شافتنا
انا و مرا كبيره
و اخوي
شي طبيعي
لان الخليجين ما يطالعون الا بعضهم
لكن تفاجأت من رده فعلها
والله العظيم الكلام الي بقوله الحين مو خيال
و صج
و انا نفسي ماني مصدقته
قامت لمته حيل
و باست شفايفه
ولانه اهو طويل
فكانت ترفع نفسها
وتوقف على اطراف اصابيعها
يحاول يرفعها و يستمر في الفرنش كيس
بطريقه بشعه
يمكن عشان اهي متحجبه فكان شكلها بشع
او لكونهم خليجين
المهم قلت حق اخوي
لف ويهك لا اطالع
قال انا شكووووووو فيهم
اهي ما استحت على ويها
تبيني انا الف ويهي
اهي اصلا تبينا نطالع و الا جان ما باسته جدامنا
وصل قطارنا
ركبا و قعدنا
بعد نص دقيقه
اقعدت اهي وريلها

بمكان اهي تشوفنا و نشوفها بس مانشوف ريلها
اهي عطتني نظره
و كملت بوووووس فيه لي انا عند محطه لوزان غيرت مكاني
حسيت انها تستهبل
وصلت مونترو على خير
دخلت الغرفه على ما اريح و ابدل و اغسل
شفت موبايلي
و الا فيه اكثر من 8 مكالمات من رفيجتي
و انا اتنشف
يرن التلفون
هم رفيجتي
اعصب
لاني ما احب احد يشكل علي

ابدل و انزل القهوه
و انا داشه القهوه
رفيجاتي يصرخوووووووون
فييييييينك يا شيخه تستهبلي
عجزنا نكلم ما تردين
قلت لهم اشدعووووه ليش هالتشكل
وين بروح كاني يايه
قالوووووا لألألألألألأ
ناظري
و الا ششوووووووووووووف
نفس البنت و الولد الي في محطه القطار
لي الحين مستمرين
في فيلم السكس
القراده مو بوس عادي
لا شغل تلحس و لوعه جبد

التفت عليهم
قلت أي قطييييييييييعه ارف يارفهم
ما احترمت احجابها وياي كانوا

قعدت انا و عطيتهم ظهري
و انسولف
بس البنات بالهم مو الهذره عينه على المسخره الي تصير ورانا

شوي و الا المسعده تقعد في حضنه
5 دقايق و حياتكم وخرها و راح الحمام
البنات اشهقوا
تبون الصراحه موقف مؤرف
و مقزز
من مسلمين
الفشله ان الي في القهوه
طاوله كلها حريم كبار
و كانت تعليقاتهم تموت ضحك
و في طاوله شياب
هم وايد عصبوا على المسخره الي تصير

المهم هذولا ساعه كامله مجابلينا و مبدعين
بعدها اطلعو من القهووه و تمشو على البحيره
و بلشوووووو بوس جدام منو؟؟
جدام اليهال
هاهاهاهاهاهاهاهاهاها
يانا اخو رفيجتي الصغير اعيوووووووونه طايره
و ما كانت سالفه اليهال هذاك اليوم و الناس الا هذولا الكبلز

بعد شوي و الا بنت عمتي تدش القهوه
قلت لها طااااااااااااااافج
قالت شنووووووو
قلت لها خليجين شغالين بوس جدامنا
قالت ليكون الابيضاني
الي مرته متحجبه
ههههههههههههههه
قلت أي!!!!!!!!!
قالت طافج ماشفتيهم ويانا في الطياره
بدعوووووووووو
ريلي يتصدد و اهم ما يستحون

المهم بعد يومين و تحديدا في كرنفال جنيف
ايووون اليهال من جنيف
نسألهم
هاااااااا بشروااا اشلون الكرنفال عسى استانستو
الجواب الوحيد الي قالوووووووه
فاتكم شفتو الرجال الي يبووووووس في مرته و تسويله حركات في البحيره
قلنا أي
قااااااالوو جنيييييف كلها صورتهم بلوتوث!!!!!!!
تبون البلوتوث حقهم؟؟
قلت لهم الله يستر علينا
ماعليكم
تبون الصراحه تحسفت ليش ما خذيت البلوتوث
هههههههههههههههههه

بالله اشتسوا عليهم الحين؟؟؟؟
ما يستحون
اشلون واحد يقدر يوري الناس عرضه و يستعرض بوس مرته جدام خلق الله
تبون الصج
بيني و بينكم
انا دايما افكر لو ان واحد يبوس مرته جدام الاجانب و في شهر العسل شي عادي
و اقول عادي يستانسون
بس عمري ما هقيت ان المنظر بشع لي هالدرجه!!!!!


الصوره الاخيره

ماكنت بصراحه ودي اقولكم عن الصوره الاخيره هذي او بالحرى كنت بحط بدالها صوره شوي احلى
لكن شغله في نفسي
و فضفضه فيني
و شعور مضيق صدري
خلاني لازم اقولها

كنت في لوغانو
و تحديدا في البلكونه
مسكره على الباب و اطالع الغروب من بلكونه الفندق لاني كنت توني راده من ميلانو و هلكانه مافي حيل انزل البحيره
فقلت اخذ شاور و اغسل دلاقاتي احسن
المهم و انا مبسطه في البلكونه
و مستمتعه في الجو العجيب
و اسولف في التلفون
و شوي شوي تظلم الدنيا
شوي شوي من ورا الجبال يطلع مثل نور بسيط
انا مندمجه ويا النور
هذا القمر
سبحان الله اشلون يسطع
بعد خمس دقايق
نور القمر و توسط السما
و القمر كان وقتها بدر
و في عز السوالف
و انا مشتطه باعلى حسي
بدر
بدر
بدر
صااااااااار بدر
اقووووووول باي باي اكلمج بعدين مو قته بدر معاي

في وسط السما يعكس نور البدر على البحيره
ممر منور من نور هالبدر
انا مشتطه ما ادري ليش
اطامر
اول مرا اشوووووف البدر يطلع من السما جذي
عيوني تغورق
مدري فرحه على البدر
و الا وله على بدري؟؟
اتأكد من اخوي الي في الغرفه
اشوف اهدومه مقطوطه برا باب الحمام
الحمدلله قاعد ياخذ شاور
امسك موبايلي
ادق على بدري

انا: الووووو هاي حياتي ابييييييه بدر
لوغانو خيال عجيبه و الى احلى منها شفت نور البدر العجيب
بدر:اهلا اهلا ..ها اشلونكم شخباركم؟؟ انشاء الله مرتاحين؟؟ متى الوصول؟؟!!
انا : بدر حدي ولهاااااااانه عليك ...احس يمه لويه...بدر مشغول؟؟
بدر: أي انا في الدوانيه ..تدري ديوانيتي اليوم!!!!!!!!!
اانا بصوت مدقور: اها اوكيه اخليييييك علي
بدر: على خير انشاء الله
انا : مع السلامه
و اسكر التلفون
اقعد مهدود حيلي
مدقووووووره
دموعي تصب
ابجي بحرقه
صعب تحب انسان و يتجاهلك
صعب تطلع مشاعرك و تندقر
ريايلنا ماكو احساس
اهم شي الدوانيه
و الشغل
ونفسه
ادخل الغرفه
بعد ماكانت البلكونه و منظرها العجيب من دقيقه احلى منظر في الدنيا
صار بعيني ما يسوى شي

دخلت سحبت كفري
و نمت
سويت جنطتي من باجر الصبح و رجعنا من لوجانو لي مونترو
خمس ساعات في القطار
و انا ابجي مرا
و افكر مرات
الى متى؟؟
فعلا الى متى؟؟
سؤال محد راح يقدر يجاوب عليه غير بدر
الى متى هذا الي يصير

و في النهايه
كانت سفره قصيره
ممتعه وايد
بغض النظر عن الدموع الي فيها
و لكن الضحك كان اكثر بوايد
كانت يمعه حلوه
بنات رووووووووعه
سوالف عجيبه قبل النوم
انا و اخوي نذكرها
ارجع الكويت
في المطار
اشوووووووف امي ناطرتني
تحضني
توصلنا البيت
ادخل داري
و اقط رووووووحي على فراشي
واااااااااااي شعور بالراحه عجيب
احب هالمكان وايد
لو الف قصور الدنيا كلها ما اكو احلى من فراشي

ملاحظه:
الكونكشن مدري اشعلامه
عيزت احاول انزل الصور مو راضي
انشاء الله بحاول و اذا ما صار وقت ثاني

29 comments:

Fuzzy said...

اي صج وين الصور ؟ ولا نستخدم خيالنا العلمي ؟ هاهاها

الديوانية ملاذ الشباب الاول والاخير ولا تحاولون تفرقون بين ريال وديوانيته والمثل يقول

الرجل بدون ديوانية كالعربانه بدون تواير

أهم شي اني أول واحد يعلق هاهاها

:P

Яeema said...

راح أبدي من القصة الأخيرة
قاعد يعاملج معاملة الأزواج
ما أدري أضحك و إلا أبجي

و يا كره إذا متلاشط ويا إللي يمه و دقيتي بالغلط و حاشج طشار بس إللي بهدوء !

ما أدري إشلون أوصفة
بس مو قصدة إنتي بس إتصالج يييه بالغلط


توني داقه عليه ( زوجي ) أقوله بطلب من كاسبر أند غامبيني و يبيله 40 دقيقة علي ما يوصل فشنو تبي؟

أبي ماكدونالد

أنا : أمس ماكلين تبي تاكل اليوم بعد

قتلج عندي ميتينج و بروح بعدين عندي شغل و ما أحبه هاذا

راح آكل أ] شي !

وااااااااااي لو مو شايل التليفون أحسنلي!

واااااااااي ما سوت علييي داقة لو رايحة و طالبة بسكات أحسنلي

10 سنين تدقر و أقولج لما أطلع ولا يدق و لما يوصل يقوللي نسيت

عادي عادي بييييييي كووووووووووللل

كويتييين
--------------------------

أما هذيله أمهات الكيسنج
صراحة ما أدري شقولج
بس ويا حجاب و إلا بدون حجاب
صراحة مأرفيين و عيييب جدام اليهال
-----------------

الشور و يغسل لهموووم
إييييييييييييييه إمسويا وياه كونتراك

قولي ليييش؟
ممنوع إتبينين إنج زعلانة و مادة البوووز بالبيت
فالحل الوحيد للتغطية أهوا الشور
و أنا كل دمعتي علي طريف و ما أحب أحسس إللي وياي إنني متضايقة

لأن بكل بساطة إنتي الغلطانة و عقلج صغير و حزتها تحتاجيين تاخذين شور عند المطافي عشان يغطي فحطتج

يا كره لما تتأثريين !؛
----------------------------------
البخور :
هههههههههههههههههههههههههههههههه
وايد إتصير وياي إليين حلف حلف عليي ماكو بخور بالغرفة !؛

يا أخي خمورة ويا المطر
مكيفاتهم مااااي
نحتاج بخووووور
أبدا !؛ و لا شي

Яeema said...

المفروض أنا بس هذرت وايد و علي ما طبعت سبقتني

{ 13 } said...

تتبخرين..؟؟ من زين البخور الي عندنا الحين خلاص اشجار كمبوديا انقرضت ..اي بخوور؟؟وفي سويسرا بعد ..على هالعطور الي عندهم....مزاج..وشنو تغسلين دلاقات ..وانتي قاعده في البلكونه.؟؟؟خربتي الموديل حجيه..ومنو هذا الخليجي ؟ اكيد سعودي..وكيف زوجته متحجبه وتسوي جذيه؟؟يبقى الحجاب ليش سووه؟؟مو عشان الشياطين الي فينا ماتطلع؟؟ووين صورهم لوووووووول

is it in Youtube..??
by which nickname??...:>


ومنو هذا بدر..؟طيب كان قلتي طلع القمر..عشان ماتتذكرينه......لاتصحين

White Wings said...

يا حلو قصصك، وجمال تعابيرك العفوية
بس عزيزتي، "بدرك" ليس هو الوحيد الذي بيده وضع نهاية للموضوع، بل الحل عندك، أنت تملكين زمام حياتك ولا أحد غيرك، خصوصاً امرأة قوية مثلك كما يبدو من مدونتك
خالص امنياتي

LonDonY said...

من وين ماخذه فراشج ؟؟
;p
شكله مو طبيعي

sologa-bologa said...

اهم نقطة الاغاني اللي تعلق وقت السفر
قبل لا ارجع الكويت بجم يوم كان عندي اخوي وكنا
نتمشى بالمووول
وما ادري ليش علقت اغنية عبدالمحسن المهنا
عوافي جان اتكبر .. عوافي
عوافي جان اتغير .. عوافي
وان جان اهو نساني بالعون هم انا اقدر

حتى أخوي يقول لي خلاص علقت الاغنية بلسانك

اما موضوع الريال وزوجته فخلوهم يعبرون عن مشاعرهم جدام الناس
مو كافي انهم بديرتهم ما يقدرون يسوون هالشي

fuzzy
مثال حلو
الريال من غير ديوانية كالعربانة من غير تواير

صح لسانك

3ateeja said...

كل شي بصوووب وآخر موقف بصوووب
والله حسيت بدقره
حسيت اني اندقرت معاج
...وبيرب الشور والهموم ..بعد اشوي ان شا الله

اما من ناحية ما ترتاحين الا بفراشج انا مثلاتج الى درجه اني صعب انام بمكان غير فراشي:)

نون النساء said...

اي يا لوير

لي متى يعني ؟؟

:""(


.
.
.


بالنسبة حق الإثنينة اللي اتحجيتي عنهم
اكو مثل يقووووووول
ياشين السرج على البقر

مو حلو الشي اذا زاد عن اللزوم
حبو بعض بس عاد مو جذي
هلاقة

LonDonY said...

لوير اول شي هالكبلز ما اعتقد انهم متزوجين.. هذا اللي اقدر اقوله

الحين عاد انتكلم عن بوناصر.. ولازم ننصف هالبدر وللامانة اقول اهي ما كانت دقرررة بمعنى دقررة وعشان لا انخليها عايمة ونتهم الديوانية في كل شي.. انتي كنتي في جووو عالم ثاني .. وتأهلتي حق النفسية اللي كنتي فيها وقت الاتصال.. بينما الاخ بدر كان في جووو ثاني مختلف مو مؤهل في لحظتها "لقمة" المشاعر اللي انتي كنت فيها.. لا وغير انها مو ديوانية عادية .. كانت ديوانيته اهو الاسبوعية.. يعني الحظ ما اخدمج يومها تلقينه كان يتكلم في موضوع جد او قطع نقاشه مع واحد عشان اتصالج.. مو معقول يتأقلم بهالسرعة ويوالم مشاعرج في لحظتها.. هالسالفة وايد نغفل عنها ونحس بالدقرة وهي بالصج ما كانت دقررة.. لاتنسين اهو ماكان معاج .. انتي اللي متصلة ولا كنتي تدرين شنو طبيعة مشاعره وقتها.. فهالشي ماكان ممهد له..

Diver said...

انا راح اعلق على موضوع واحد يمكن تعرفينا و يمكن كرهتيني من كثر ما علقت عليه
ارجوج لا تحطين حلول مشاكلج بايد الناس الثانيين الحل بايدج
يبا العمر يطوف و الموضوع على قدر صعوبته بسيط يبا تبي الصح و ال لا
اذا يبي الباب مفوح و اذا لأ عيشي حياتج
ترى الحزن لمدة دقية حسافة فالدنيا الواحد مو عارف شراح يصير
انا اسف بس مادري ليش احس انج وحدة من خواتي ابيلج الخير

Hope said...

i liked they way u wrote about ur trip :)

lawyer said...

فزفز
اي شسوي بعد عيزت احااااااااول احط الصور ما قدرت
ههههههههههههههه

اما سالفه الدوانيه
يبا احنا ما قلنا لا تروحون الدوانيه
بس هم انقول لا تسكنون في الدوانيه

يعني كل يوم دوانيه؟؟

3 4 مرات في الاسبوع كافي مو عيشششششششششه اهي
:pPPppP

lawyer said...

ريماا
ههههههههههههههههههههه اي مجربتها

اي والله كويتين
الله يصبر قلوبنا يا اختي

لنا الجنه انشاء الله
ههههههههههههههههههه

و لو انتي مشتهيه ماكدونالدز قالج اشلج في هالاكل الخايس
و يعطيج ساعه محاضره عن الفاست فود
مو عشان شي عشان ماله خلق

lawyer said...

كيتي الله يعافيج حبي
اييييييييييييي احنا و البخور قصه قصه
ههههههههههههه
اي والله صح عمرنا ما تكلمنا في موضوع البجي تحت الشاور

خيعرفون الرياييل اشكثر انداري ادموعنا عشان ما انكد عليهم


قطعه 13

اي احلا شي البخور مع العطور الفرنسيه و جنج ما تدرين تحطين دهن عوود اذا خلصتي
على هالبراد و المطر
حتى دهن العود له مزاج خاص هناك

اي والله مالت عليهم
ما احترمت حجابها
و اهو ما احترم الباقي من رجولته




وايت وينجز
شكرا اختي بعد عمري والله رفعتي معنوياتي وايد
تسلمين على النصيحه الطيبه
الله يسعدك يا رب



لندني
البيت الامريكي
من سنين الطواعين


اروى

مشكوووووووره عمري تسلمين
اي والله البخور شي اساسي
اصلا ما تحلى غرفتج في الفندق الا و البخوور ويااااج

تسلمين حبي




سلوجا
اييييييييييييي واااااااااااي
يا حلات هالاغنيه
عواافي عواااااااااااافي
المشكله و السر مو بس في اني اكوون اصااله بالسفر
لا هممممم بعد اهي طق اصبع
اهي جتوووووووف
مرا انا معلقه على اغنيه
و انا نازله من الباص
و مشتطه
و ارقص
دزتني وحده
يعني باختصار كلش مو وقتج
وراني شغل و انتي تهزيين عند باب الباص
هههههههههههههههههه

و احلى لحظات الرقص في السفر
في غرفه القياس
جدام المنظره
استهبال


لاااااااااا لااااااا
هذا تعبير خاطئ
من صجك مخامط و مباوس جدام الله و خلقه
يولون
شكله هذا صانها في نعال بالدار
بس جدام الناس

و الا شكلها ايام الخطبه
بس اتخيل في التلفون
ببوسك في الطياره
و بنام وياك في المطعم
و بالسووووووق
و خيال ضارب

lawyer said...

عتييييييييييجه
ياختج دورنا غير

فرشنا غير
حتى مخادنا غير

هناك 10 مخاد ما اتييب راسج

سمعي السالفه

الساعه 2 بالليل اول يوم ماني قادره انام المخده معوره رقبتي
دقيت على الرسبشن
طلبت 3 مخااد
قالي الرياااااااال
يصير ايج الحين اعطيج المخاد؟؟
قلت هووووووو اي عيل انا ليش داقه اطلب
اقولك ابي مخاد
قالي الحين اييييييي؟؟
قلت عيل باجر
اي ابي مخااد
ما اقدر انام
شوي طق علي الباب
سحبت ثووب صلاتي
لفيته على راسي
ما لبسته
فجيت نص الباب
سحبت المخاد
صفقت البااااااااااااب في ويهه
عمى بعينك
قايلتلك ييبلي مخاد مو نام ويايي

lawyer said...

نون النساء

اييييييييييييييي والله يا شين السرج على البقر
وانتي الصاجه
ريجهم ما ينشف
؟؟
حلوجهم ما تخيسسسسس

ودي اسألهم هالسؤال

lawyer said...

لندني

ليكون انت بدر؟؟
والله شكلك انت بدر
عيل اشووووووووووووووووووله ادافع عنه
هااااااااا!!
اشووووووووله

خلني اقولك شغله
انا اقدر هالامور
بدليل اني ما ازعل
في فرق ما بين الدقره و الزعل
الدقره احساس انت اتحس فيه
الزعل موقف انت تتخذه

لكن انا ما زعلت
او عصبت
كل الي صار اندقرت و بسسسسسسسس
و شكرا على التوضيح

ادري فيكم ما تعيشون من غير دوانيه

lawyer said...

دايفر

انا وياك
ينطبق علي المثل
الي ما يطيع يظيع
صصصصصصصصصح؟؟

ادري في عمري

lawyer said...

hope

حياج الله اختي نورتي
لا تقطعين
شكراااااااا حبيبتي
:)

Mohammad Al-Yousifi said...

احلى شي الحلو و مرته اللي طايحيله بوس

زمن العولمة امأثرة فيه

Chai-7aleeb said...

سلامات

يا شين الأنفلونزا بالصيف

enter-q8 said...

انزين ليش لابسه حجاب

ادري هديت الموضوع كله وقعدت علىهالشغله

لالالا صج ليش لابسه حجاب

اشوى اني مو هناك

عادي
تسمعون واحد بعلو صوته يقول : يا الاهطل روح انت وياها الغرفه


اما باقي الموضوع
فا انا مع اخوي
Diver

الحمدلله على السلامة

LonDonY said...

من شريط الذكريات
بال 84
مونتانا
فندق ميرابو
دور ثاني بالرياضيات
اتعس سفرة بحياتي
*sighhhh*

layal said...

اجر وعافيه -ما تجوفين شر ان شاء الله

صاجه بسالفه تعلق الاغاني
محمد عبدو مسكت بهذي المسأله

اما هل كبل فيبيلهم من يكسر راسهم
صدق من قال ان لم تستحي ففعل ما تشتهي

mishal said...

الحمدالله على السلامه

مشاءالله مبيّن انّج مصحصحه عدل

لان هالجزء أحلى من اللي قبله
هم بعد الجزء الأول كان حلو لكن هذا أحلى

ندخل في الموضوع----------

الصوره الثامنه+التاسعه
بوسلطان ترا اعرفه زين وخصوصاً مع خالد عبدالرحمن
:)

الصورة العاشره

اول شي اشمئزاز

بس

ههههههههههههههههههههههههههه

عجيبه هالسالفه

كل واحد يقول للثاني طاااااافك
الثاني يرد: والله انت اللي طافك

ههههههههههههههههههه

لا صج صج انا مخزّن عنوان هالبوست في المفضله عشان ما اضيّعها

(خوش سالفه)

==========
الصوره الأخيره

بدر: أي انا في الدوانيه ..تدري ديوانيتي اليوم

*كان يتكلم معاج بصيغة مذكّر

وهذي عادتنا اذا كنا بدوانيه رسميه
حتى لو الوالده تتصل علي هم بعد ارد عليها جذي
هلا تبون شي انا مشغول ....انا بالدوانيه
ترا مو كل كلام ينقال بالدوانيه

:)

فارس هوى الكويت said...

اول شي الحمدلله على السلامه وماتشوفين شر واجر عافيه اختي
الصوره العاشره ماقول إلا حسبي الله ونعم الوكيل
وفي كم بيت ذكرتهم

وَإِذَا أُصِيـبَ القَـوْمُ فِـي أَخْـلاقِهِمْ

فَأَقِـمْ عَلَيْهِـمْ مَـأْتَمـاً وَعَـوِيـلاَ

( أحمد شوقي )

والمَرْءُ بِالأَخْـلاقِ يَسْمُـوا ذِكْـرُهُ

وبِهَا يُفَضَّـلُ فِي الـوَرَى وَيُوَقَّـرُ

( محمود الأيوبي )
.....
الصوره الأخيره ذكرتني بزهريه عبدالرحمن الضويحي

النـاس في راحتـةٍ وانا في شقـا وامْـرارْ

والماي يصبح بريجـي به مَـرار وامْـرار

ما طيـج انا الـزاد به بعد الحـلاة امـرار

يا متلـف الـروح يلّـي ما بحالـي شَعَـرْ

شمتـان في بلـوتي من يوم غنّـى وشعـر

الراس صـابه صـداع وما بُقـى بهْ شَعَـرْ

يا أهـل الوفـا بس قولولـه يمـر امـرار

تحياتي لج وعساج على القوه طال عمرج :)

layal said...

تذكرت كلمه خالد النفيسي الله يرحمه تنفع حق هذلين الاثنين
(( جللييليين الحيه ))

lawyer said...

مطقوووووووووووق

مالت على العولمه اذا جذي
يا زييييييين ايام صالحه و سعيدان
ابرك



شاي حليب

اي والله يا شينها
حر و موت
و رطوبه
و فايرس
يالله الحمدلله على كل حال



مولان
اتصدقييييييييين
انا والله قلت جذي
بس انا شفتهم في جنيف العصاري الساعه 7
اتهقين سكارى!!
و في المطعم بس شاربيييييييييين
كولا
لا تخافين
مجيكه عليهم انا
ما عندي شغله غيرهم
ببسسسسسسسسسسسس
انا اقول يمكن محششين
والله ما يندرا عنهم



انتركويت
ويييييييييييييي جان زين انت هناك عيل
بردت قلبنا فيهم
لو شايف الاجانب اشلون يطالعونهم
و تخيل الاجانب موديلهم ما يطالعون
بسسسسسسسسسس من كثر ما كان مقزز مع حجابها و شكلها




لندني
هههههههههههههههههه

يا عوينتي عليييييييييييييييك



ليال
تسلمين حياتي

اي والله و خصوصا اذا طرت عليج اغنيه محمد عبده
اشوفك كل يوم و اروح واقول نظره ترد الروح
وااااااااااااااااي عبده عجيب



كويت دايفر
لاااااااااا مو وايد مندمجه
بس ما حسيت ان الاسنسير وقف
هههههههههههههههه


والله انا يفيدني الصراخ
احسسسسسسسسس يطلع الي في قلبي
هههههههههههههههههه

اي واااااااااااااالله ما تستحي علة ويها
لاااااااااااااااااا مالك امل تسوي في بيت ابوها
هذي شكلها حتى في الدار ويا ريلها ما تدري عنه

الله كريم



المشعل
ايييييييييييييي
والله
شفت اشلون

اما عن الدوانيه
فانتوا يا الرياايل من ادشووووووووون الدوانيه تكرهون حريمكم
ليش ما ادري!!




فارس هوى الكويت
حياك الله
ابدعت يا فارس
تسلم انت و عساك على القوه


لياااااااال
هههههههههههههههههههه
مت من الضحك