Monday, April 09, 2007

خاف الله فيها ..


نرفزني برنامج حسين فهمي يوم اليمعه
مدري السبت .. متحاور مع زوجين ..
المرا تشتكي انه لي هالعمر و ريلها ما زال يطقها
و بعد ما تناقشوا في الموضوع المستفز و هو ضرب الحريم
استفزني هالريااال الي بغيت اطلع له من الشاشه
يقول والله يعني ما اوعدكش اني مش حضربها ما اهما اصلا النسوان تستفزك !!
و لما سأله عن الاسباب طلعت كلها اسباب تافهه و المفروض الريال الي ينطق عليها
فعلا في مناقشه لي بعض البنات تفاجأت ان في فئه من المجتمع مازالت تعاني من الضرب
كنت اعتقد ان البدو اهم بس الي يطقون حريمهم
و بما اني اختلط وايد مع بنات بدويات فسألتهم

تنصدمون اذا قلت لكم ولا وحده فيها من تزوجت ريلها مد ايده عليها
و ان الفئه الي تعاني من الضرب في مجتمعنا مو مقتصره على مكان معين
ولكن مقتصره على جنون بعض الرجال و عقدهم!!
للاسف و احنا في مثل هالزمن و الوقت و مازالت عندنا مشكله ضرب الزوجات
هذا شي مهين , يكسر في المرا اكثر مما يصلح
اتقوا الله في نسائكم
و استوصوا بالنساء خير
و يا عل ايدكم الكسر انشاء الله
لعنبو رجـل ٍ يشـوف المرجلـهْ فضـرب الحريـم !!
من متـى كانـت رجولتكـم علـى ظهـر النسـا ؟!
(ضلع ٍ أعوج ) بس مـو دايـم بكسْـره يستقيـم !!
قوّمُـوه فْعُمْـر لينـه .. يستقـيـم الـيـا قـسـى
يا رجـال اليـوم ( رفقـاً بالقواريـر ) ..
و قديـم ..قالوا: (أخيَرْكم .. رحيم الصبـح // مِكـرام المسـا )
ما يبات الليـل كاسرهـن .. و الـى جَـنْ البهيـم ..
مركـب يدينـه علـى مرسـى مدامعـهـن رســى
بيـض الله وجــه جابـرهـن بعيـشـات النعـيـم
و سـود الله وجـه جابرهـن علـى عيشـة أسـى
ذاكر حقوقـه ليـا قيـل ( اربـع ) بشـرع الحكيـم
و إن وصل لين ( اعدلوا ) طنش ابو الشرع و نسى !!
كِن ( سي السيد ) خلقْـه الله علـى أهلـه زعيـم ..
طاغي معربدْ .. قسـم باللـي بْيحاسِبْـه .. ايخسـا !!
لا الرجولـه بالعنـاد و لا هــي بقـهـر الحـريـم
ليمتـى و العنـف صايـر ظاهـره ضـد النـسـا ؟!

42 comments:

Diver said...

انا اوافقج الي حد كبير
بس تذكري انه ضرب المرأة الناشز انزل بالقرآن ارجو انج تستدركين و تستثنين الحالات الي ينطبق عليها الحكم الرباني لان الزمن ماله علاقة بالتعاليم الربانية

مع كل تقديري للنساء

lawyer said...

دايفر

شكرا لك عزيزي دايفر على التعليق

القران بين ضرب الزوجه فعلا
و السنه النبويه شرحته


مثل الصلاه اقر بالقران و السنه النبويه الشريفه علمتنا كيفيه الصلاه


و الرسول عليه الصلاه و السلام قال اذا نشزت المرأه
تضرب على كتفها بالسواك

انت شايف السواك اشكبرهه !
شغله بسيطه
ينبه فيها الرجل المراه


الله سبحانه و رسوله
ما قال

سطرووهم طراقات
و فناقر

و لا شرحت لنا السنه النبيوه ان يكمشها من شعرها
و ينزل فيها باول الدري لي اخره طراقات !!

وشكرا لك

مع خالص تقديري للرجال

Purplecious said...

مادري ليش ذكرت مسلسل الحريم

ظيييييييييييم

انزين بس من ناحية اخرى أكو حريم يطقون ريايلهم
خخخخخخ
لووووووووول

لا بس والله صج مشكلة
اذا الأب يطق الأم جدام عياله راح يعانون من مشاكل نفسية
هذا اذا ما كبروا و صاروا يقلدون ابوهم

diver
يا أخي الضرب اللي مذكور بالقران له شرووووووط

أول شي يكون غير مبرح أي غير مؤلم

و ما يكون فيه اهانة
يعني مو على الوجه مثلا

و أهم شي ان ترتيب الضرب جاء اخر شي كاخر حل
يعني الناشز أول شي تنصح و توعظ بالكلام
اذا ما فاد هجر المضاجع
اذا ما فاد تضرب و مو أي ضرب
له شروط
صححيني محاميتنا اذا انا غلطانة

بنت الشاميه said...

من يرفع الرجل ايده على المراة يعنى الرجل انتهى من حياتها ولازم ما تقعد عنده دقيقه لانه مو سوي وغير امين عليها.......تصدقين مره فى برنامج قالت دكتورة علم نفس :على المراة ان ترد الضربه نفسها للزوج من اول ثانية ولا تتردد وبنفس المكان....بعدها يصحا الرجل ويفكر الف مره فقبل ما يمد ايده مره ثانيه....لان عنصر المفاجاة من رد فعلها يشل تفكيره...والضرب عند الرجل للمراة ما هو الا خزين فى عقله الباطن من طفولته لما يراه فى محيط اسرته... مومرتبط بمكان او زمان او ثقافه

بس شنى هالحياة اللى هو يطق المراة او المراة تطق الرجل

لوير الله يهداج من هالغنية العجيبه والوناسه الى الطق مره وحده....يا شايلتنا فوق يا هادتنا تحت

ودمتى بمحبهوسلام

Almas said...

للأسف الرياييل صايرين عالطريف

على أدنات الدون .. يطقون حريمهم

المجتمع له ضلع في هذا الموضوع لأنه لما الريال يطقها أهو عارف إنها بترجع لأن المجتمع و الأسرة يحثونها على هالشي من باب تحملي .. هذا ريلج .. ولازم تصبرين
إذا مو عشانج عشان عيالج
والأخ يالله خير ماخذ راحته لأنه متطمن بترجع
أوكي الواحد يصبر ويتحمل لكن الكرامة وينها
إذا انعدمت الكرامة .. يصبح الإنسان ماله قيمة
والعيال راح يتعقدون .. ويليها الإنحراف والتوهان في الحياة لأن البيت مفكك

آنا أقول المجتمع ساعد الرجل على هذا الفعل
لأنه يأيد المرأة تتحمل أقصى أنواع الإهانات ولا إنها تطالب بحقها ويمكن الأمور توصل للفراق وتحمل لقب للأسف مجتمعنا مايرحم
لكن في بعض الحالات ترفض هذا الوضع وأوكي خل تصير (م) ولا كرامتها تصير بالأرض
قاعد نشوف شباب ودماء تهدر من أجل كرامة أوطان وأرض وحقوق فما بالك بكرامة الإنسان

الله يهدي الرياييل إلي يطقون حريمهم

وأتمنى ما ينسون إنه هالأفعال كلها محسوبة عليهم
والعداد يحسب

إلى يوم الحساب

طائر بلا وطن said...

صباحك ورد

اللي يضرب المرأة إنسان مريض
أو يعاني من عقدة
أو ضعيف شخصية و مهزوز

و اللي تتحمله الله يجازيها بصبرها بس ترى
مو مضطرة و الطبيعي انها تضربه بالطوف
و تخليه يشوف وحدة مريضة نفسه يستهويها الطق

اللي مو قادر يفرض شخصيته بعقليته و احترامه
لنفسه و زوجته تلاقينه يلجأ لهالأساليب
المريضة

الإحترام اساس العلاقة و قبل الحب و أي شيء

و بالنهاية حتى لو كانت المرأة ناشز
أو فيها من العيوب و الاعوجاج مالا يتعدل

امساك بمعروف او تسريح باحسان

و اطلع كاسب بنفسي و بأقل الخسائر


وجهة نظر

engineera said...

اولا لوير انا اول مره ايي بلوجج .. الصراحه كتاباتج وقصصج اتينن! حطيتج على الفيفرت ليست:) ثانيا موضوع الضرب! انا عندي اساس علاقه الزواج الاحترام! واذا انفقد هالاحترام الحياه مع الشريك اتصيير صعبه! اصلا الضرب يقلل من شأن المره! الصراحه كلشي بالتفاهم يصير وينحل! واذا ماانحل في طرق اخرى حضاريه غير الضرب!!

{ 13 } said...

الضرب عموما خطأ للمرأة..للطفل..للرجل ..للخدم
بس صراحه في نسوان يستاهلون الطراقات ..معلش .. يعني انا انقهر لما اشوف واحده مسكينه في حالها وزوجها طايح فيها ضرب هدد ..ووحده ثانية " مقصوفة رقبة " ماشيه على حل وسطها لا وبعد ريلها مستانس عليها ..واذا حد كلمه على باله انهم غيرانين منه او منها ....الظلم ان الناس الصح يتمرمطون والناس الغلط ماخذين راحتهم بالدنيا
وخصوصا بنات هالأيام ..شايله ولدها وجنبها زوجها " تسحبه " بحبل وتتمشى وهي تبصبص لووووووووووووول .. ..
ياخرررراشي على نسوان كده ..

7osen said...

ضرب المرأه فعل مشين بالنسبه للرجل

واصلا لغه العنف والضرب كلها مرفوضه وما توصل الى اي نتيجه

لكن في شي وايد يبط الجبد

لو فرضنا ان الريال طق زوجته طراق بلحظه غضب ترا هذا الشي مو جريمه لا تغتفر

عادي يعني

لأن في بعض النساء ممكن تهدم حياتها على شان زوجها طقها طراق

لكن بالعموم الضرب مرفوض

sologa-bologa said...

في هالزمن
المفروض نقول
أيتها الننننسوة
رفقا بالرجال
تراهم مظلومين


وعلى طاري الضرب والطق
أعتقد
الشغلة مالها علاقة بمكان أو زمان
مثال الحضر والبدو

لكن المسألة درجة التفاهم والترابط
مو بس بين الزوجين
بين أي رجل وامرأة إيا كانت
طبيعة الرابط اللي بينهم
سواء اخوان أو حبايب أو زملاء

أنا بحياتي ما مديت إيدي على اختي الصغيرة
مع إني أكبر منها ب15سنة ويحق لي أكفخها
اذا غلطت أو راددتني
ومع ذلك بحياتي ما سويتها وإن شاء الله
ما أسويها أبد
لأن الاحترام هو الأصل قبل الترهيب
والتخويف

ودمتم بحب

S-Q8 said...

glteeha mita kanat el rjoola eb tharb el 7areem? 9a7 lsanech, o el 9ara7ah ana ashoof hathela el reyayeel ele ymedon eedhom 3ala ele ath3af minhom reyayeel th3aaf o mayestahlon laQab rjoolah. le'ana el qowa mo inah el wa7ed ymed eedah o ykaser.. el qowa inah el wa7ed yegdar yamsek nafsa fe mawaQef el ghathab! ba3dain people get mixed up o ygolon 3adee lana mathkor bil Qr'an. inzain ya akhy nthekar bas 3al nashez wel nashez mithel makilena n3aref 7ala extreme wayed o mato9al dayman. o 7ata 3al nashez allah ra7amha o gal fe kha6awat 6weela gabil mad el eed. o 7ata mad el eed maykon shay y3awer aw y'athy o shabehoh eb tharb el mswaak. ya3ny ba3aref hatha el m3a9eb 3ala morta el nashez wain byet7akam b'a39abah o ygees 6agetah 3ashan ykhaleeha nafs el mswak.. btlageeh etha oho rayal bye7terem nafsa o mara7 ymed eedah 3ashan lay'athee morta. adry geragt wayed bas min el 7ara lana hal mawthoo3 yaQher.

Mother Courage said...

يعل ايده الكسر

;-p

Mother Courage said...

diver!!!!

الاسلام قال ضرب لا يترك اثر و مو على الوجه و الرسول عليه الصلاة و السلام قال مثل لما تضرب احد بالسواك...يعني جدا خفيفة و القصد منها التأديب و له شروط من ناحية السبب من وراء الضرب.... مو فوضى!

mishal said...

حريم اليابان وشرق اسيا وحتى امريكا يعانون اكثر من العنف

وبالعكس انا اشوف ان الدول الاسلامية العنف الاسري فيها نسبتة اقل بكثير من الدول الاجنبية

PearL said...

موضوعج عجيب

احتقر الريال اللي يمد ايده على مرته

احتقره وما اعتبره ريال

==
عاد تصدقين لوير في سالفة سمعتها من وحدة من زميلاتي في العمل

ريلها كان من هالنوعية
مو صاحي

كان عنده مسدس
مرات تقوم من النوم تشوفه ماسك المسدس و منيشن عليها
يقولها اوقفي جدامي وحطي تفاحة على راسج

ابي اطق التفاحة


عشان تعرفين ان الجنون فنون

اجار الدين كشمش said...

من صجج اكو احد يطق المرا للحين....."مايمديه ادش داره الا الشرطه ساحبته.....خل يفك نفسه من تحقيقاتهم.....لو بس الازعاج....كل يوم منادينه س وج """"""""""""""""المهم لا تخاف وتسكت عنه خل يتادب...

عــــــابره said...

انا معاج قلبا وقالبا

الريال الي يمد ايده على زوجته مااسميها

مرجله اسمهيها مهزله

وانسان شخصيته ضعيفه .. ومايقوى الا على الي اضعف منه

لو انه ريال ويخاف الله ويتق ربه فيها كان مااسوى هذا الشي

حراااااام .. وخافوا الله

AseeL said...

شنو قاعد يقلد
Dr Phill?

البدو ما يطقون عندهم حريم وايد يفرغون بأشكال متعددة وبكمية غير محدودة lol

انا كل ما اكبر افهم اكثر وفهمت انه الرياييل ما يترس عينهم الا التراب

لا يضيق خلقج اتبعي مقولة الربعي
الكويت لا زالت جميلة تفاءلوا p:

هذا الموجود لازم نقزر فيه
الرجل الشرقي يظل شرقيا

وعلى طاري هالسالفة في وحدة ذكرتني اليوم بفيلم محمود ياسين الرجل المثقف المنفتح القادم من امريكا ولما اكتشف انه عروسته نجلاء فتحي اخطأت في السابق انقلب شرقيا من رأسه لاخمص قدميه

في النهاية.. كلهم محمود ياسين بشكل او بآخر

وعسى بس حضرت ندوة التحالف اليوم وعسى ما قعدت في حديقة بيت عمتك من الزحمة؟.. ما كان زحمة كان في كراسي فاضية بالسرداب

عذرا للإطالة
ومع خالص تحياتي

Q8DOLL said...

في ردود انا مستغربه منها ماراح اعلق عليها أظن لوير بتكفي وتوفي
اختي لوير انا معاج
بعدين الريال اللي يطق المره مايحس انه ماعنده رجوله ؟؟
يعني يتشطر على وحده أقل منه جسمانيا؟
أوكي فلنفرص انها تساويه بالقوه صدقيني بيفكر اميه مره قبل لا يطق لانه يدري بينطق
لانها ضعيفه يسترجل عليها
وفي فئه حتى مع خواتهم يقول اللي اطول لسانها اكفخها !! يعني لما تكفخها راح تحترمك ؟؟ لأ ممكن تتمرد وممكن تخاف منك
والخوف عمره مايكون احترام
في ألف طريقه الانسان يفاهم فيها مع الآخر
هل بيطق أخوه لو لاسنه ؟؟ طبعا لأ بيكلمه على انه ريال ويتفاهم
بعدين الاخوان يتلاسنون ويتهاوشون شنو يعني لازم طق؟؟
وفعلا في حريم يندبقوون ياحرام وترد للريل عادي لأنه المجتمع دايما يبي المره تتحمل
يطق رديله مالج الا بيتج
وانتي كله منج خليتيه يعصب ويتنرفز

الطق تأثير النفسي كبير واااايد
الاهانه عظيمه
اني انطق من زوجي الصبح وبالليل يبي حقه الشرعي وياما سمعت ببنات جذي
شنووو عيشت الحيوان أحسن

سوري عالاطاله بس جد هالموضووع حساس بالنسبه لي
تحياتي لج لوير .. دايما متميزه

Diver said...

Lawyer
شابات و شباب
اتمنى من الجميع قراءة المكتوب و استيعابه بشكل دقيق اولا و من ثم الرد

اولا انا قلت اوافق لوير باغلب الي قالته او مثل ما كتبت الي حد كبير
ثانيا انا طلبت من لوير الاستدراك و عدم اغفال الحكم الشرعي المذكور بالقرآن و قلت "ارجو انج تستدركين و تستثنين الحالات الي ينطبق عليها الحكم الرباني " و اكد الي ينطبق عليها الحكم الرباني من قرآن و سنة

و شكرا للجميع

Q8links said...

الشعر

ولا أروع

شكرا

KQ8 said...

انا اعتقد ان الضرب
يرجع الى عوامل نفسيه

فمثلا الرجل قد يكون في صغره في بيئة نشأة فيها على الضرب او رأى ابوه يضرب امه او ان ابوه كان يضربه على الدوام..الخ

فبتالي الضرب الذي يضرب به زوجته هو نتجية لتلك الامور التي مرت عليه اثناء نموه

lawyer said...

صباحكم ورد

حدا فيني النوم
:\

يالله ببلش ارد عليكم

مع اني يوعانه حدي فطولو بالكم علي على ما يوصل ريوقي




بربل
فعلا في دراسه تكلم عنها مرا جاسم المطوع في برنامج
ان معظم الرجال اللي يطقون كانو يشوفون ابهاتهم يطقون امهاتهم
من قبل




بنت الشاميه

حي الله من يانا :)

فها ينتهي الريال بعين المر من لحظه رفع ايده عليها

تبين الصج صعبه على الوحده تطق ريلها اول ما يطقها
تدرين ليش
لان الواحد فينا مجرد ما تنقاله حجوه من احد

ينصدم و يتنح و يقول يا ريت رديت و يا ريت قلت

فما بالج طراق

و دمتي بعز و سعاده





الماس
فعلا في مجتماعتنا الشرقيه مازالت المرأه تعاني من نظره المجتمع بقصورها

الماس حبيبتي
الحيل نص نساء المجتمع مطلقات

كلمه مطلقه ابدا ما تخرع
و لااااااا صارت تسبب ازمه نفسيه




كلمه مطلقه عندي = امرأه لديها كرامه ابت انهاا تعيش مذلوله

ابرك من حريم ذايقين الذل من سنين
و ساكتين

صاااجه العداد يحسب






طائر بلا وطن
اي والله صاج
الاحترام اساس كل شي
و حد فاصل لكل التجاوزات

الاحترام يحقق راحه نفسيه


و الي ماقدر يفرض رايه الا بالطق فهذا ريال مو محترم ذاته في البدايه

اشكرك على التعليق الرائع الي يبرد القلب




صباحك سكر

The Simper said...

is spanking considered hitting? :P

lawyer said...

انجنيرا

حياج الله نورتي
و انشاء الله ما تكون اخر مرا

مشكووووره وايد وايد على كلامج الحلو

تخلين الواحد من الصبح يكشخ و يستانس :)
في هالزمن مثل ما قلتي اذا كنا مرتقين و متحضرين لازم علينا التفاهم باسلوب حضاري






قطعه 13
فعلا اهل الغلط ماخذين راحتهم بالدنيا

و اهل الصح متمرمطين

وايد حريم فعلا مثل ما قلتي راكبها الغلط من راسها لي ساسها

بس ما يعني انها تنضرب
بالتحاور و التفاهم كل شي ينحل






حسين

اول كلامك اشحلوه و اشزينه و انا اقول نعم نعم
بس لما وصلت لي نقطه تهدم بيتها على طراق
اييييييييييي

اتهدم عشان طراق
الي يمد ايده مرا
بمدها عشر

و رياييلنا اللهم يا كافي 24 ساعه معطبين
فهل معناته و اهو داش و طالع طراااااق

يا سلااااااام

حسييييييييييييين
الله يسااامحك

نون النساء said...

استخدام مبدأ العنف الجسدي على الزوجة أو أيا كان
اعتبره انسان ضعيف من الداخل
ويبي يثبت شيء لنفسه
لكنه غير موجود فيه

الضرب مثل البذرة الصغيرة
تزرعها وتاخذ حصادها
نتايج وسلبيات ومشاكل لها اول مالها تالي

Unknown said...

You have to differentiate between real badou and so called badou and not only badou abuse their wives. Please reconsider your comments about badou

thx

Cr8ivia said...

6ab3an il ilmatho3 la niqash feeh
wat3ajjab min 7osen o rayah inha mo nihayat ildinya
sa7 mo nihayat ildinya
bas nihayat il7yata bainha o bain rayelha ilmafroth la ma7ala
khalas min yerfa3 eeda aw iyfaker iymed eeda i7tiraamha lah iyseer 0 ..
مادري هل راح يرضا لو صار العكس؟ غضبت منه غضب شديد و حذفته باكبر ما عندها؟ او غلطت عليه بكلمه كبيره؟
بيطوف لها و يقول ساعه غضب و تستمر الحياة؟

i agree with mosan too u have a very bad idea about badou and u generalize it :P u have to differentiate between real badou and 3agad/hailag whatever

lawyer said...

سلوجــــــــــا

لااااااااااا انتو كلش و ابدا مو مظلومين ;)

فعلا كلامك صح ان الامر مو متعلق بمكان او زمان
بدليل ان كل بلاد العالم فيها نسبه من العنف على المرأه


عطفك على اهلك و امساك نفسك عند الغضب هذا اكبر مقومات للرجوله تملكها انت

و عسى الله يخليك لهم
و نشووووووووووووووفك معرس و بعدها بجم سنه مرتك تقوووول والله الحمدلله ربي رزقني في احسن الرياييل عمره ما جرحني بكلمه مو بس تصرف:))



دمت انت بسمو
يعجز لساني عن وصفك






نعناعه

حياااج الله اختي
و مشكوووووره على التعليق
و نورتي والله
ابدا ما قرقتي بالعكس
انا وايد استمتعت في تعليقج

و كلامج عدل فعلا المرراجل
عمرها ما كانت بمده الايد
و الرجوله تكون بامساك النفس عند الغضب


وانا اتفق معاااج في نقطه ان الناشز
و ان الله سبحانه و تعالى ما حط هذا الشي لاي صغيره و كبيره و عشان الرياييل يمشون و يصفقون بهالحريم

لألألألألأ

و لكن حتى تعلمم ما في القران علينا قبل قراءه التفسير

حياج الله اختي
منوره :))




برافا
هههههههههههههه

ادري يازتلج

شسسسسسسوي من الحره
كتبت بذرابه
و بشي من الطرح
لكن بقلبي كانت هالحجوه





مشعل
حيااك الله اخوووووووووي

من طول الغيبات

اي والله نساء امريكا
و شرق اسيا و القاره الهنديه
من اكثر النساء الي يعانون من ممارسه العنف

الحمدلله ربي مكرمنا بالقران
على الرغم من وجود نظره شرقيه مع ضرب النساء


حياك الله اخوي مشششششعل





بيرل
واااااااااااااااااااااي
اسم الله عليناااااااااااااا



شالي حاااااااااااااااااادني

اشحقاااااااااا حاطين المحاكم
اول شي اثبت هالي قاعد يسويه و اسوي عليه اثبااااات

تالللللللللي ما يفكه منه الا حكم طلااااااااااق

هذااااااااا شروووووع بالقتل

بحط مسدس برااااااسج
!!!!!!!!!!!

اااااايااااااااااااااا ولد الكلب
تفاااااااااحه على راااااااااااااااااسي

عشاااااااان تنيييشنها

هذاااااا الي ناااقص بعد
انا لو منها اقوووووووووم اسحب وحده من خواااته

و الااااااااا عياله و احط على راسهم تفاااااااحه

الله يكافينااااااااااا الشر

و يقولون محااااااااكمنا ليش متروسه قضايا طلاق

من هالمياااااااانين الي مبتشلين فيهم

الا الدستور said...

نحو كويت افضل

نحو حوار ديمقراطي ليبرالي راقي حر

ندعوكم للمشاركه في الشبكه الجديده

شبكة الحوار الليبرالي

www.secularkuwait.net

طائر بلا وطن said...

^
^

نبي دستور للأزواج لا هنت

و موفق بمشروعك




سوري لوير .. بس ليش لأ
جود يلقى لنا حل
:)

بـركـــــان said...

بعد التحيه

يجب أن نفرق بين الرجوله و الذكوره !!
نعم كل رجل هو ذكر .. و لكن ليس كل ذكر رجل ..
بنظري هو ليس برجل من يضرب امرأته .. فهذا ضد تعاليم الدين .. و الرجوله على حد سواء
القرآن يقول أو تسريح بإحسان اذا ما أعجبتك !!

(و يا عل ايدكم الكسر انشاء الله)

ههههههه أمين

البدو و الحضر فيهم الزين و الشين .. و حتى إن لم يضرب البدو حريمهم .. فيعاملونها كفقاسة بيض للكثرة أو ملئ شهوة وقت الحاجه .. تخدمه حالها حال الخدم .. للأسف أصبحت أفضل صديقه للرجل خادمه .. و حتى لا نجمع نقول الكل و لكن هناك فئه لا يستهان بها تقوم بهذا الدور

بركــان ثائر

Q8links said...

ثانيا: نقطة مهمة غابت عن البعض أرجو الانتباه لها

يبدو لأن الغالبية هنا من الجنس اللطيف فهن يتعاطفن بشدة مع المرأة

لكن هل يصح أن نفترض دائما أن المرأة على حق وأن الرجل هو المخطئ في كل الأحوال، وهل من الصواب أن نفترض أن كل الرجال الذين يضربون زوجاتهم رجولتهم ناقصة؟

يجب أن لا ننسى الحكم الشرعي والضرب آخر الحلول، ومثل ما قيل آخر الدواء الكي، والضرب لا بد منه في حق بعض النسوة وهن أقلية صغيرة طبعا يتطاولن على أزواجهن وربما يرفعن أصواتهن بلا احترام لقوامة الرجل في البيت

هنا على الرجل أن يتدرج في التعامل مع الزوجة حسب النص القرآني ويكون حكيما ولا يهين المرأة

لكن أن نلغي حكم الضرب مثلما قالت بعض المعلقات المحترمات فهذا ليس مبتغانا بكل تأكيد

احتراماتي

Sn3a said...

منو كاتب الشعر؟
روعه

Sn3a said...

اهم شي اني نسيت اعلق على الموضوع
البنت اللي ترضى بالظلم
واللي تنام كل يوم مطقوقه
واليوم اللي وراه تبوسم بويه الوحش
الغلط راكبها

ماعندها اهل يوقفونه عند حده
ماعندها اهل ترجعلهم معززة مكرمه
لاتقولون عيال ماعيال
العيال اكبر ضحيه لعنف الازواج على بعضهم
وجود الاطفال مع الام او اب بعد الطلاق اهونلهم من افلام الرعب اللي يشوفونها
وموبعيد يحصلهم نصيب من الطق

الرجل لين مد ايده على زوجته بالرايحه والراده الطلاق فرض عليها
لأن شرطه انلغى
فالرجل مو موجود
الطرف الثاني وحش
وماعتقد الاسلام يجيزلنا نتزوج وحوش

MANAF said...

والله اذا المره ما وراها رياييل

ياخذون حقها تضييع يا اختي

هالايام الابو لاهي والاخو لاهي والام

نصيحتها مالج الا ريلج تحملي

اكيد بيتمادى

والله يا اني اذكر سالفة وحده قريبه

من الاهل كان ريلها يورمها من الطق

مع انها سنعه وقايمه بواجباتها وصاينه

بيتها وتتحمّل عشان عيالها .. بصراحه

انا واخوانها ينينا من صج كنا نبيه

بس الابو مو راضي كله يقول لا توصخون

ايدكم لين صار موقف جدامنا الحمدلله

الله يابه غلط عليها جدامنا باليمعه

وتجرأ يبي يمد ايده المسكين والله ما وعى

الا والدم يطلع من كل مكان من ويها

لين قام يصيح مثل البنات !! العفو

مو قصدي يعني بجى مثل اليهال :) تخربط

حتى جهازه السمبثاوي والبارا سمبثاوي

اللي يحب النبي يضرب

اهني ما يتجرأ انه يمد ايده مره ثانيه

اللي عندها مشكله مع ريلها او رفيجها

لا تستحي اتصلو عندنا خدمه منازل

هي هي

وناسه تذكرت السالفه

كان شكله مسخره

lawyer said...

اسسسسسفه على التأخير بالرد

بسسسسسسسس والله لوويه

المهم خندور لين وين وصلت
مممممممممم


اجار الدين

ههههههههههههههه والله جان زين كل واحد في هاليومين من يفكر يمد ايده
تاخذه مرته لين الشرطه





ماي سولد
اي والله للاسف منو الحين الي يعامل زوجته بمخافه الله


للاسف حتى مفاهيم الرجوله الحين تغيرت




اسييييييل

يا هلا يا هلا
ابييييييييييه
نفس القصه قاعده اتكلم مع وحده عن ان الرجل الشرقي بظل شرقي حتى لو عايش في امريكا و امه امريكيه

رفيجتي بتسووووووووي دراسه فيها


لا والله ما رحت
اذا بتروحين يوم بلغيني

انتشاوف هناك
و حجزيلي يمج كرسي :)






كويت دول
حيااااج الله
افا عليج ما طولتي و لا شي
و مكشوووووره على الكلام الطيب

اما بالنسبه لتعليقج اي والله انج صاجه
فعلااااااااا للاسف في ريايل مثل الحيوانات
يدبق من هني
و يكمشها من شعرها تعالي نامي وياي

يااااااااااااااااعلك الظربه قوووووول امييييييين
عبده ابوووووك الي يابك

لا لا قوووووووولي امين الله يحفظنا و يحفكم من هالاشكال





دايفر
فاهمتك انا لا تخاف
:)





كويت لينك
على فكره الشعر
هذا معطيتني اياااااه الاخت كراتفيا
من متدى ناقلينه

مشكوووووره اختي كرتفيا






كراكاتو
فعلا في برنامج مرا سمعته ان يقول الشي الي يخلي الرجل يظرب الزوجه ان شايف امه مسكينه من قبل تنطق

بس اكيد هذا ما يعني
ان بيكون لازم مثل ابوه

لان في اولاد من كثر ما يكرون الغلط على امهم يصيرون احسن الرياييل مع زوجاتهم

lawyer said...

سمممممممممممممممممممممبر

spanking !!!!!!!!!

اي يعتبر طق
الرسول يقول بالسمواج
بسسسسسسسسسس

و خفيفه الظربه

اي شي غيره يدخل في ايطار المحظورات





نون النساء
حي الله من يااااانااااااا

كلامج صح
لكن هل الريال و اهو يطق زوجته يحط في اعتباره الكلام الي قلتيه
ياريت يفكرون دقيقه قبل لا يسون هالشي
و يكسر قلب المرا
و بعدها ينكسر كل شي حلوووو





موسان

اهلا اهلا
شخبارك
فعلا المفروض كنت اشرح مقصودي بالبدو

و افرق
بس قبل هذا الشي احب اقولك ان مو كل البدو ان بعضهم

اتكلم عن البدو المتمسكين بالعادات البدويه

لاني كنت اعتقد ان المرا عندهم تنطق عادي
و الريال مازال يتزوج عليها
و بلا بلا بلا
بسسسسسس
الي قعدت وياهم مرا و تناقشت معاهم

اكتشفت لا وايد غير

مدللين حريمهم

يودون و ايبوون
و شايلين عن حريمهم كل شي
ماكو مرا تروح جمعيه تشتري اغراض البيت و تالي تروح المصبغه و بعدين تودي المستوصف
و بعدين تروح الكراج

المرا عندهم تروح السوق و الصالون
مدلله و مستاااانسه
و كل ويك اند عرس
و الريال يدفعلها

و متحمل كل شي
و اذا صار الصيف وداها شهر لندن او شهر الريف النمساوي






كراتيفيا
ههههههههههههههههههه

جني انزفيت ؟؟

lawyer said...

الا الدستور

دشيييييييييت و بسسسسسسجل
ماقدرت
السالفه حووووسه

يقولي حطي منو العضو الي انتي يايه عن طريقه
شكتب

الا الدستور؟؟





طائر بلا وطن
هههههههههههههههههههههه

يما منكم





بركان ثائر

الله يكافينا الشر و ما تنفجر اهني
انا مرا شفت برنامج عن البراكين هذيج الايام و ذكرتك

!!
شالي عاجبك في البراكين

و تعليقا على الكومنت
فعلااااااااااا
صصصصصصصصصصصصصصصدقت
والله
بيض الله ويهك
مووووووووووووو كل ذكر رجل

للاسف الذكوره وايد بس الرجوله ينعدون عن الاصاااابع





كويت لينك
مهماااااااااا استفزت المرا
و سووووووووووت
ما تنطق

يرقع الباب و يحقرها
يسكر موبايله و لا يرد عليها
يذبحهااااااااا هالشي اكثر من الطق






سنع
حياااااج الله نورتي

هذا الشعر مكتور في متندى عطتني اياه الاخت كراتفيا

ههههههههههههههههههه
بردتي قلبي
اي والله صاجه الاسلام ما يجيز لنا نتزوج وحوش
ههههههههههههههه


حلوه
اذا لا سمح الله بلاني ربي بريال يطق بتطلق منه بناء على فتوتج
:))






الخاطر
وووووووووووواااااااااااااااااااي
الله يجبرررررررررررررررر بخاطرك

بردت قلبي

زييييييييييييييييييييين تسووووووووووووووووووون فيه

عفييييييييه عليكم
هالفقيره
متحمله هالطق
و اهو ما تحمل مرا وحده

قلعته يااااااااااااااااااعله الدبقه الي تدبقه

انا لو من مرته
اطقه وياكم
اخليييييييه ما يععرف طقاقه

و الا اركض اييب مضراب الهريس على راسسسسسسسسسه

ابط راسه

ياااااااااااااااااااعله البط الي بطه

قققققققققطع

بس صج صج صج
زين تسووووووووون

اي وايد حريم الحين بدقون على الكنترول ياخذون رقمك
;)
هههههههههههههههههه




اقول يا نااااااس اشلونكم ويا الغبار اليوم
!!!!!!!

قاعده اشرب قهوه بالغبار
مو قهوه بالحليب !!

The Simper said...

miswaach!?! a6wal miswaach 15 santi! shloon a6ig feeh! el miswaach for poking :D

lawyer said...

سمبر
اييييييييي شفت الهدف من السالفه التوبيخ ان الواحد ينبه زوجته بالمسواج على جتفها

SHAHAD said...

بدعتي يا لوير
ياني أكره الرياييل اللي يطقون حريمهم
لا وياليت السبب يكون قوي ويستحق
وربي الأسباب سخيفة والريال هو اللي يختلقها عشان يطق فيها
عندهم هذي هي الرجولة
بس تدرين بعد الغلط من المرة نفسها
يعني ريلج طقج وكفخج على شي تافه
شكو تامة عنده !
لو الريال يحس ان المرة تمنعه وتوقفه عند حده وربي ما يتجرأ
انا ماقول تكفخه هي بعد
بس خلاص اللي ما يحترمها لا تقعد عنده
والله الطلاق ارحم
لا يقولون قاعدين نضحي عشان عيالنا
العيال إذا شافوا امهم تنطق كل يوم والثاني
ماراح يكونون طبيعيين مثل باجي اليهال
الله يهدي الجميع يارب