تصبحين على خير يابلدي
تصبحين على خير يا كويت
قبل لا انام حبيت افضفض بشي في خاطري
وبعدها اسكر الابتوب و انام
أول مره بحياتي ايني احساس ان الكويت امرأه عجوز ارمله بها من الهم ما يكفيها و بها من الالم الذي سيحزنها سنين ..
ماتلاحظون ان البركه قلت في الكويت .. وان صرنا ننام و نصحى على فاجعه ..
اولها من شهر مقتل الشاب المرحوم بأذن الله تعالى حازم البريكان
وانفجعنا كلنا عليه بلد كامل باهلها و شعبها ..
واخرتها نظرنا نظره الخزي والعار على من قتلوه و نكسنا رؤسنا وبلعناها ..
و مامدانا ارتحنا الا طلعولنا هالشباب الي بفجرون فينا احنا الابرياء !!
شنو الهدف مدري و لمصلحه منو هم مدري !!
واخرتها امس يهتز سرير تلك العجوز بفاجعه العرس و الحريق ويعلن بالاعلام الخارجي و يقدمون رؤساء الدول خالص العزاء للشعب الكويتي ..
قعدت العجوز من النوم قلت لها قوماي يايينج معزين يالله .. استقبلينهم
تدرون اشردت علي؟
وخزياه فشله شقولهم ياهل ام 23 سنه اعفست الديره واحرقت بيوت
وقهرت امهات و يتمت اسر .. وشردت اطفال ..
فعل فاعل و خطأ امرأه يعاقب عليه بلد كامل ! و تحاسب الحكومه و و الكل يتهم انه مقصر !!
ليش مدري
اول مره بحياتي اكتب بوست ضد شخص وانا متعاطفه وياه و متعاطفه ويا الطرف الاخر .. اتيني حاله بس افكر شنو شعورها الحين يتروالي ودها احد يذبحها و تفتك..
وبنفس اللحظه اتذكر الضحايا يعورني قلبي اكثر و يعتصر قلبي ..
في جلسه قانونيه اليوم تم النقاش بين زملاء لي محامين ..اتصدقون انه بدقيقه اقدروا يفندون القضيه .. و يشيلون انتفاء قصد القتل و الساعه مبكره و الف عذر و عذر و بطلعونها زي الشعره من العجين بس لانها صارت قضيه رأي عام فماراح يدسون اسمائهم فيها!!
عصبت عليهم و قمت و قلت صج محامين !!
نصيحه رحموا البلد من القيل و القال
رحموا البلد من الاشاعات
رحموا البلد من مصالحكم ..
الكل الحين صار يضرب بدفوف المصلحه
بس مدري لين وين بنوصل
تصبحون على خير بروح انام
تصبحين على خير يابلدي .. صج اتمنى اتشوفين الخير لانج من زمان ماشفتيه من هالوييه الودره الي مجابلينج
رساله الى نواب الجهراء .. ما اصدق ان مافيكم واحد ثري او مليونير وبدال ما يبني عمارات و يشفط في هالمناقصات يسويي مستشفى او جناح سنع .. ؟؟
رساله الى المستهترين باحزان الناس و مصابهم و ماعندهم سالفه الا يسوون مسجات نكت و قالبين الفاجعه الى مضحكه .. استحوا على وييهكم ..
رساله الى المعنيين في البلد ..بدال ما تفترون من معرض لي معرض ومن عرس لي عرس .. اصلحوا البلد .. بسكم مجاملات
رساله الى شعب الكويت
فكروا في الديره عدل
تصبحون على خير و رمضان قرب ينعاد عليكم بصحه و سلامه
وعساكم تعودونه كل سنه على الخير ...
مبارك عليكم شهر الرحمه
34 comments:
الله يصلح الأحواااااااااال يا لووير..
البوست يعور القلب
:(
الله يرحمهم يارب والله يصبر اهاليهم واهالي المصابين وطلعهم بالسلامه يارب وحسبي الله ونعم الوكيل على من كان السبب
اييه والله تكسر خااطري كويتناا :(
الله يعيين بس
لوير من زماان عنج
اشتقناالج :*
آآآه يا كويت :(
بوست يقطّع القلب :(
وعسانا نشوف الخير بشهر الخير والله يمسح على قلوبنا ويوّحد صفنا يارب :(
الكويت أمانة إذا احنا ما حفظناها من يحفظها؟
وعلى المحامين حتى لو اهما طلعوها محد بيخليها تعيش الناس بقلبها نااار وألم ولو عاشت فما راح تعيش إنسانة سوية مرتاحة !!
الشخص لي ذبح واحد ما يعيش مرتاح ولا يقدر يحط راسه عالمخدة وينام هالمرة 44 غير المصابين :( :(
قدّر الله وما شاء فعل :(
الله يحفظ الكويت ;**
ما نقول الا حسبي الله ونعم الوكيل
والله يا اختي العزيزه هالديره ماشيه على البركه
او صدقيني او ابصم لج باجر واحد من هالنواب او فزعات او بيطلعون ام 23 منها
اقلها بي يقولون مينونه او ماتتحكم في تصرفاتها
او بي يطلعونها براءه او بيكسرون بكل اهل الكويت
المفروض يطبق القصاص او تلاقي جزاءها على المجازر اللي سوتها
على الأسر الي شتتتها
اصلن كل ما اتخيل اللي صار تدمع عيني اشلون قدرت اتسوي كل هذا
الله يصبر اهل الجهراء او اهل الكويت
او ان لله او ان اليه راجعون
hi, awal shai welcome back we missed ur writingz :)
sib7an allah hal mishkila bithat ma tadren mino tlomeen, ile swat hal 7areeja aked ghal6ana bs wallah allah y3enha 3ala ile ihya fe, y3ne ma atwaqa3 inha kanat mit3amda inha tithba7 kil halnas . .
w inas ma ga9araw ishta'3law tash,heer w shimata bil mara, ilmafrooth na7med rabna w nad3ee 7g ile mataw w bas, ma kan la da3ee ina 9oorat,ha w isemha ilkamel yintashroon bhal 6areqa . .
allah yer7am mota ilmoslemeen . .
hi, awal shai welcome back we missed ur writingz :)
sib7an allah hal mishkila bithat ma tadren mino tlomeen, ile swat hal 7areeja aked ghal6ana bs wallah allah y3enha 3ala ile ihya fe, y3ne ma atwaqa3 inha kanat mit3amda inha tithba7 kil halnas . .
w inas ma ga9araw ishta'3law tash,heer w shimata bil mara, ilmafrooth na7med rabna w nad3ee 7g ile mataw w bas, ma kan la da3ee ina 9oorat,ha w isemha ilkamel yintashroon bhal 6areqa . .
allah yer7am mota ilmoslemeen . .
الله يعين!!!
قلبتي المواجع
انتي شلونج وشلون صحتج بشرينا عنج؟؟
من زمان عنج اخيتي!؟!؟!
* عورتي قلوبنا والله ماجنه عايشيين في الكويت .. الله المستعان :(
بوست يعور القلب
الله يلوم اللي يلومج
جان زين نستفيد من دروسنا هذه الازمة اكدت ان الديرة لا تمتلك ادنى مؤهلات الاستعداد للكوارث علما بأن الحدث على مستوى الدول المتقدمة صغير اما في بلادنا المتخلفة توزعت الضحايا على 3 مستشفيات و طاقم الماني و بريطاني في الطريق الى المساعدة
بس لا ننسى اننا جيران لبلد صاحب سلاح نووي متغطرس
انا لله و انا اليه راجعون
فعل فاعل يعاقب عليه بلد كامل
؟؟؟؟
صدقتي والله
الرحمة مطلوبة لأهل الضحايا وللناس للي تشتغل بصمت وتعب ولا عاجب أحد
الرحمة مطلوبة لأهل المتهمة ... الله يعلم بحالهم
الوضع كارثة حقيقية وليس للتنفيس عن كل شي مضايقنا؟
كنت أتساءل مثلك وين تجار الجهراء
معقولة ما يفكرون بشي مفيد للجهراء وعيالها ؟؟؟
كل عام وانتي بخير وصحه وعافيه
الله يبعد الاحزان والحوادث من كل ديار المسلمين
ورمضان ان شاء الله يعود بفرح وسعاده
:(
صدقيني مو بس بالكويت
العالم كله صاير عجوز و ناوي ينتحر من عمايل البشر فيه.
الله يحفظكم من كل شر يا رب.
لوير
مبارك عليج الشهر
:)
اكرمكم الله بشهر رمضان بعفووعافيه و مغفره منه......مبارك عليكم الشهر
وعساكم من عواده
مبارك عليك الشهر و الله يتقبل منك الصيام و القيام
صج اني ولههههان عليج
والصج اني انا المقصر بالزيارات
مبارك عليييج الشششهر
ياعل لياليج اقمار وقلبج افراح وهنا
فمالله
الله يحفظ الكويت و يرحمهم برحمته
و ينتقم من اللي كان السبب :(
مبارك عليج الشهر و عساج من عواده
اشتقنا لج
:**
مبارك عليج الشهر.. وعسانا وياكم من عواده
مبارك عليج الشهر يا حلوه
وينعاد عليج وعلى اسرتج الكريمه بالخير والصحه يارب
:**
وينج اخيتي ما باركنالج بالشهر؟؟
شلون الصحه انشالله بخير؟؟
منتديات نسائية
http://www.fr7ty.com
http://www.fr7ty.com/vb
فرحتي,فرحتى,موضه,موضة,أزياء,ازياء
,صحة,صحه,منتديات نسائيه,فساتين
,مكياج,ميك اب,مرأه,نساء,بنات
,عروس,فساتين سهره,دواء,دخون
,بخور,عطور,عطورات
,اكسسوارات,دلع,منتديات,شات,ملابس
,كولكشن,غرف نوم,ديكورات
,أثاث,غرف أطفال,منتديات نسائية
طولت الغيبة عسى المانع خير؟؟؟
قلنا تصبحين على خير بس عاد ما ننام نومة اهل الكهف؟!
طمنينا عنك!
عيدكم مبارك وتقبل الله طاعتكم وعساكم تعودونه إن شاء الله بصحه وعافيه
وكل عام وانت بخير
عيدكم مبارك وكل عام ونتو بخير وصحه وسلامه :)
welcome me .. check me out o 3edkom embarak :)
يا بنية وينج !
ولهنا عليج :/
عسى المانع خير ؟
:( وينج
إن شاء الله تكونين بخير ومرتاحه
ألووووو
لوير
عيدكم مبارك
وعسى المانع خير
ألووووو
لوير
عيدكم مبارك
وعسى المانع خير
!!
ترى عيدنا
!
العزيزة لوير
وايد فاقدتج صار لج وقت طويل ما بينتي عسى المانع خير؟
بالأول قلت سفر صيف وتالي قلت رمضان وطال الوقت وماني شايفة أعذار ثانية؟
ترا مكانج إمبين وولهنا على قصصج وبوستاتج الحلوة
أنطر عودتج :*
Post a Comment