Saturday, November 07, 2009

للصالح العام


موضوع السلطات في البلد موضوع عجيب غريب
فجأه الشعب الكويتي يثور على الحكومه وكأنه نوابنا ملائكه و شعبنا شريف!

و المجلس بكبره مافيه سنعين الا ينعدون على الاصابع


انا ما استغرب من الناس الي بسرعه تنسى لان الناس عاطفين جدا

بس استغرب من النواب الي كل يوم صارخين على شماعه ناصر المحمد واهم اول الناس الي راحوا باركوله و اعادوا الثقه فيه وحبو خشمه !

واليوم اهم الناس الي مسويلنا مشكله

انا لست ضد او مع ناصر المحمد او حكومته ..

انا مع المنطق الي يقول ان اذا في مشكله و مشكله بلد ماتنحل بهذي الصوره
انا ضد تماما ان بلد تدار بحملات شبابيه عاطفيه و يطالبون بتغيير سياسه بلد في هذي الصوره
انا كمواطنه كويتيه بسيطه ما ارضى ولا اقبل ان يتكودون علي طائفه
اسلاميه او قبليه او ايا كانت و تظهر عدم احترامها لرمز من رموز بلدي و بعفسون الكويت عشان والله الحكومه مو ناجحه

طيب انتو يا نواب اشسويتااو غير التأزيم و التعطيل ؟
نائب يصرخ على حجاب
والثاني على شيك
والثالث على العادات
وكلهم في النهايه اردى من بعض

ليش انتو مصدقين ان نوابنا شرفاء جدا لدرجه انهم يكشفون الحق ؟؟
لأ طبعا نوابنا ممثلين في مسرحيه مخرجينها شيوخ
لما المسلم يرفع كرت الشيكات فجأه
مدري اهو اصلا جم اندفعله عشان يثير بلبله بلد كامله
ليش تصدقون ان الناس وايد شريفه
احنا صج ديره كلها حراميه
بس مو معناته ان فجأه الشعب يستشرف
وتنقط الكره بلمعب الحكومه

في صح وفي الاصح
وفي شي اسمه الاصلح
هل من مصلحه شعب الكويت ان يصير فيه الي قاعد يصير؟
لما تطالبون في الديمقراطيه ليش ماتكملونها؟؟

بصراحه كلش مالنا خلق لويه
الديره معفوسه و الناس ثايره
والحكومه لازم تتخذ موقف
والشعب بيرد يختار ناس سيئين

ولازم تعترفون ان تقسيمه الكويت الحين لايمكن يطلع منها ناس سنعه بالمجلس
من فجيت الجرايد اليوم و شفت المسلم يلعلع قلت ولييييييييين اكيد فهد العكسر مسافر
وهذي حالتنا بيرجع عقب جم يوووووم ويسفل تسفل انه توه مسافر و المسلم رده من السفر

حسبوها صح قبل لا تركضون ورا مشاعركم
منو الاهم
الكويت ؟
والا نواب مجلس الخمه؟

انا اقول الكويت ولا يقصون عليكم المضللين

10 comments:

المقوع الشرقي said...

صدقتي الديرة معفوسة والناس ثايرة
قولي امين يا لوير
الله يحفظ الكويت واهلها من كل مكروة

Fahad Al Askr said...

ارجع الديرة ويصير خير

أعلمج فيهم

متسلط هالمسلم كله يصعد بالويك إند ماكو شي بنص الأسبوع

كاني راد ومعلق على البلوق من اللاونج لأن لابتوبي من كثر ماهو مستاء من الوضع هنق

تصدقين فطيم من كثر ما طاحت الميانة بيني وبين لابتوبي رفعنا الكلفة بيناتنا وهنقنا مع بعض

Snow White said...

صح لسانج بس اللي يبط الجبد كل واحد مسوي روحه قانوني ومحلل سياسي هالأيام!! وشادين حمله على الحكومة آل إيه حمله وطنية! وين قاعدين ما تحمدون ربكم عالنعمه اللي انتوا فيها ما تشوفون الأوضاع الإقليمية اللي حوالينا؟ شنو تبون بالضبط تأجيج الأوضاع واثارة الغلاغل في البلد ولصالح من كل هذا! ما أقول إلا الله يعينا ويحفظ بلدنا

enter-q8 said...

مجلس تازيمي و مجلس تازيمي
ذبحتونا بهالكلمة يا فطيم
ليش ما تكون الحكومة اهي اللي تازيمية
لا سكن لا صحة لا تعليم لا عماة عين لا صخام لا زفت رشاوي و محسوبيه
اكمل بعد

The Simper said...

http://www.youtube.com/watch?v=vB2KtAENyQ0

|:| DUBAI |:| said...

فطمطم

ان شاء الله خير

: )

بنت الشاميه said...

اليوم سياسه ..سياسه سياسه

والله كل من يدور على غثاه
واحنا مغتثين بهالسياسه ومعجعجين فيها
ولا حل بالافق لا مع الحكومه
ولا مع النواب
جنه ياحافظ بينهم صراع بالوادي

والواحد ضاع بينهم
حتى خطاب صاحب السمو ما دار عليه الشهر.....ما صبروا حتى يمر الشهر مستعجلين على الحل
ماعاد اكو حشيمه حق احد
خذوهم بالصوت لا يغلبوكم
هذى حكمة نواب مجلسنااااا
احاليه اللى الله بلانا فيهم
يالله العافيه

اجار الدين كشمش said...

الاخ فهدان بن عسسكر

والله فطيييم ماهمتها السياسه

ولا حركت السياسه صرصوخ اذنها

هذيييييي نغزه لك

ليششششش ما عزمتهاااا على السسفره ؟؟؟؟

احترت واكتبت بوسست سسياسي

فيه نما الي علمنا ان العسكر مسافر

مثل المسلم نما الي علمنا اعطيتوا شيكات حق ناس وناس ...ليش ما عطيت يا الرئيس ...النائبات وراهم حصبه وشنيتر بلباسهن!!!1
والشتوي صار له شهر من نزل
وغير معصومه مو متوفر قياسها ؟

فطيييم تركي السياسه عنج
!!!1

فمالله

Mariam B.D_Q8 said...

بصارحه كلامج عين العقل
يعني اللي قاعد يصير في المجلس من صراخ و هواش او تشهير اب خلق الله
شنو راح يستفيد منه المواطن ؟؟
ولا شي
خطة التنمية واقفة
مو بس واقفة اللا انتهت صلاحيتها
كل العالم تتقدم وربعنا يرجعونه لي ورا من العقليات المتحجره
اللي اتهمها مصالحها الشخصيه
و المواطن اخر همها
اللي قاعد يصير بكل بساطه مسرحية هزلية مجردة من جميع المشاعر الأنسانية المنافية للأخلاق الأسلامية
الساعية لتهديم الوحده الوطنية و الأرتقاء براية المصالح الشخصية

mowa6en said...

أتسائل دائما ، هل الديمقراطية بآلياتها هي هبة كريمة من الله أم هي خدعة من خدع الشيطان !؟

أتفكر كثيرا ثم أتوصل إلى نتيجة مشتركة في كل مره ، وهي أن العلة والمعلول في هذه الأرض هي ليست الآليات والمعتقدات والوسائل و .. و .. الخ ، بل هي الإنسان ذاته لكونه إنسان لا كونه مواطن أو مسلم أو أي صفه كانت ، لأن الفرق هنالك كبير

بقدرت الأنسان أن يجعل الديمقراطية ديمقراطية سخيفة ، أو ديمقراطية قبلية أو ديمقراطية عنصرية أو حتى في بعض الحالات قد يحولها إلى ديمقراطية لا ديمقراطية ، وهذه حالة متقدمة جدا ، إذ ما "النظام" أي كان إلا شيء مجرد لا ينطق ولا يتحرك إلا "بكن" فيكون من الإنسان لا الرب

الديمقراطية والنظام روح عامة تسمو في الإنسان فبل أن تكون وسيلة حكم لتفضيل هذا على ذاك

قد تعطيك الديمقراطية حرية التعبير والاختيار ولكنها للأسف لا تمنع عنك حرية الهدم والتعطيل وفق آلياتها المسموح بها ، لأن هذا القرار -الهدم- هو قرار لك باعتبارك حر ومتعلم وتعرف ما يسمى بروح النظام ، لا على اعتبارك جاهل تتعامل مع النظام كما لوكان عدوك اللدود وهدمه هو غاية وجوده !!


عموما أنا عجبني موضوعك فطوم
:)