Tuesday, November 24, 2009

مرني مرة فرح



لقراءة البوست يرجى سماع الاغنيه






في عالم الاحياء ام الاموات هي .. لاتعلم .. كل ماتعرفه انها كانت تغط في نوم عميق
تتوسد الاحلام .. تفرش من الهموم سرير لها .. تدثرت بالغصات
و نامت اخيرا بعد ان احتست كأس دموعها ..




واذ بها يده


..احسته
لمس اطراف اناملها



ايقظها ..


"قومي حبيبتي ابيج "



هي لم تسمع همسه






...
نائمه ..




فتحت عيناها



.. تأملته




اخذت تسترجع ذاكرتها

اين هي
اين هو
هي اين؟


يبتسم
نزل لها على هيئه رجل...." كالـــملااك" مبتسم



وضعها على كتفه
رفعها

ثبتها


عانقت رقبته ....


تدثرت جسده حتى لا يذهب


و تسأله وهي على كتفه

"تطير لدنـياه "

وين بتوديني؟


امشاي معاي فوق ...

هي : وين فوق؟؟


تعلقت به و هي تعتصره بكاءا


"فلان .. انت عايش؟؟"


فلان انت حي ؟


فلان انا مليت الانتظار ...


تدري من يوم رحت و الدنيا مالها طعم


مالها لون




فلان .. الدنيا بعدك خانتني
بالحيل تعبتني..



تذكر يوم قلت لي .. لي غبت بترتاحين



اشلون اهون عليك خليتني بروحي



تشتكي له حالها
و قلبها يعتصر الالم
الحزن
و كل عضلات وجنتيها ترتجف بكاءا




تختنق
تنكسر




ويرفعها ...


فلان ؟ وين وصلنا؟


هذي السماا السابعه الي يقولون عنها؟؟

هو : لأ هذي الغيوم ....




لمته حيل بكل "ألم الاشتياق " الي نام معاها ...كل ليله بدونه ..
وهي تردد ببكاء .. وتهمس له .. سألت الغيوم باي الدروب القاك يوم؟


اخذها..

اجلسها على غيمه
بارده


هي : أح فلان اهني موت برد اشلون عايش؟


هو : انا مو اهني عايش ..انا مكاني بعيد .. بس التقيتج اهني!

هي : باستغراب .. التقينا هني ؟ اشلون ؟؟


هو : انتي بحياتي مثل الغيمه ..استغثت الرحمن ..


و اغاثني فيج ..




جلست بحظن الغيوم
وبحظنه


شكت له ايامها ..
حزنها
دموعها
ألمها ...
الفراق .. والدنيا





هي : فلان تحبني؟؟
تذكرني و انت بعيد هناك؟
اطري عليك ؟ اتشوفني ؟
والا الي عندك خلوك تنساني؟



هو: انا لو انسى عمري ما انساج ..


هي : تشوفني وانت فوق ؟ تسمعني اذا بكيتك ؟ اتحسني ؟
اتشوف حياتي بدونك؟

هو : احس في كل شي في كل شي .. بكل لحظه احس فيج ..

بس مو بيدي .. ناطر اتيني هناك.... قلت لج تعالي .. قلتاي ..ما اقدر ...امي و ابوي ما اقدر اخليهم ....





غيوم
و دنيا لا احد سواهم بها...
تقفل السماء ابوابها ليلا عليهم
دنيا من الاحلام ....لهم هم فقط ...يلتقون في سماء الدنيا
او اي سماء اخرى ..فهم لا يكترثون ...
همهم هو اللقيا



هي : اهني راحه .. عالمك راحه .. مافيه الا انا وانت ..عالمك مافيه الا "الحب"
هو : وانتي ...


هي : مرني مره فرح ...غير حياتي ... اخذني بعيد في كل مره اتحس ان الدنيا قفلت بابها في ويهي .....الدنيا يا فلان كارهتني ...مع اني ما سويت لها شي ابد...ولا شي بالدنيا ابيه راضيه تعطيني اياه...تخيل اني اشحت الفرح منها


..ولا ترضى تعطيني اياه





فلان ...



احبك...



و خايفه..







هو: ابشرج بس اول الايام تعب..بعدين تتعودين .. وترتاحين..






اشرايج اخذج لمكان فوق بالسما.. اوريج دنيا ماشفتيها ..وماراح تشوفينها الا معاي....مكان ماراح تعرفين الي فيه بس راح اعرفج عليهم...




وياخذها ..
الى دنياه
يرفعها بالسما
بين الغيوم
بين النجوم
تمسك لها نجمه


و تقوله



انت الشمس و كل شي يدور حوالينك...


يبوسها ويقولها القمر يدور حوالين الشمس ...



انا الشمس وانتي القمر..



هو يطير و هي تعلقت بكتفه حتى يرتفع بها ..

حبيتها منك .."اني قمر"


هو : آآآآآآآآآه قوليلي بس وين اروح من كلامج



انا




ما




اقدر





عليج





هي : وانا ما اقدر على قلبي الي يبيك..





هو: ترا خلاص الحين لازم تردين..

هي : اروح ؟ اهون عليك تخليني ؟


وتوديني بايدك ..قلت لك الدنيا متعبتني..

وخانتني ..

لا ترجعني ...

خلني معاك ..حتى لو كنا ..امواااا(ت)


تدري يوم بغت اتصالحني اشسوتلي.؟؟


اقول ؟
والا انت تدري؟

صح؟
فليش اقول





و رفعها على كتفه مره اخرى ووعدها بياخذها السما السابعه...

ولكن

نزل

فيها..

وحست هي بالهبوط

وقالت له






ادري
قاعد تردني تحت..

ادري خايف علي ...


وينزلها لفراشها ..
ينومها...بسريرها




و يروح ...

يأكدلها ..
لا تخافين ..بتم معاج
وبحبج ...


تتحسسه بفراشها
تدور ايده


تدوره


ماتلقاه
ماتدري اللي صار صج او حلم؟؟
بس تدري ..انه خذاها له
وخذاها ل(بــــــــعـــــــــــــــــــــــــــيد) حيل

12 comments:

ZooZ "3grbgr" said...

الله يرحمه

:/

صبا said...

عسى عمرج طويل يا فطيم
تذكرت الغالي الغايب الي رحل عنى وعن داره واهله
اخوي الله يرحمه برحمته ويغفرله

ما ني قادره اشوف حروف الكيبورد
الفراق يذبح
:"(

مالنا غير الصبر

NewMe said...

جاء بي العنوان إليك
قرأت على مهل
ورأيت الحلم
يسرد واقع
حب مرير
لماذا
نغدو بالحب مساكين
أضعف مما نعرفنا
والوجع المر يستشري
حتى تخور قوانا
وينوء القلب بما فيه؟
مؤلم جدا
حين يتحول سبب السعادة
إلى هم وألم
كم أحب الأغنية
كلمات
ولحن
وصوت
"مرني يا آخر قصيدة بهالعمر"
نكتبهم علنا نشفى
ولا نشفى
دومي بحب يحيل
أحلامك واقعا ملموسا
وأيامك أقل مرارة
تحياتي

Anonymous said...

قشعريرة !

:

أحبها.... مرة فرح :)

Manal E. AlNuaimi said...

والله خنقتني العبرة ..

بوست مش طبيعي بالمرة ..

بيني وبينج صرت أخاف حتى من الأحلام لانها اتعب اكثر ..


صباحج ورد ..

الزين said...

بكيت

بكيت كما لم ابكي من قبل يافاطمه
العيد على الأبواب

ولازلت مو قادرة اعيد

جم عيد راح
وجم عيد بيي انا انسى التعب
انسى الوله
يخف الفقدان

امسح دموعي واقول العيد الياي بيكون اهون


ومااا يهون يا فطيم
مااا يهون

ياخذ من حشاج الفرح ويعلي بعيد
يوفج يتنهنه
انتي تنضين
تنوحين
والدنيا تضيج
وتضيج
وكل شي يتلايم عليج

تمثلين الفرح وانج اوكي
بس منتي اوكي
انتي مستهلكة من الحزن
اكل وشرب عليج
وعجن منج انسانه ثانية
ما تعرفينها
تطالعين ملامحك بالمرايه
تقولين هذي منو
انا كنت اعرفها
تحسين حالة انفصال بين اللي تشوفينها واللي تحسينها
وتكرهين الثنتين

تبين تكونين هذيج اللي راحت وسكرت البيبان وراها

واييج الألم بعز النوم
ويصحى الوله مع اول الحلم
وتبجين الفراق
وتعتبين
وودج تلمنيهم
يكلمونج بس الكلام مبهم
مبهم
كل شي مبهم
وتصحين على صوتج تنوووحين
تبين ترتاحين
وين الراحه يا فطيم
بحضن اللي راحوا ولا بحضن الدنيا الوسيعة اللي ضاجت بغيابهم


روحي معلقة بالسما
واقول متى نلتقي
شكثر باقي من العمر من غيرها
اشوفها بعيون الريم
طولها
شخصيتها
وانعصر لأن اهي ما شافت الريم اليوم

والعمر ايام تتقضى
والتراب بيلم الكل
قلبي وقلبج
وقلوبهم قبلها
وتبقى الروح تدور الروح

وين تلتقي فيها الله اعلم
وهل نلتقيهم هم الله اعلم

الله يرحم الحال


تعالي لميني بعد ما بجيتيني

..

الاوركيده said...

صباح الغيم

تدرين صارلي يومين اقرا البوست واسمع الاغنية وما أقدر اكتب شي كلمات حلوة واختيار الاغنية كل شي يخليج عايشة بجو ثاني الله يحفظج من كل شر وتجتمعين مع من تحبين يالغالية:)

عيدج مبارك

lawyer said...

سامحوني اني ما اقدر انزل جميع العليقات لان فيها بعض جرح المشاعر ..



لي و لمره فرح...


وماراح انزل التعليقات الي خلت القصه و قالت لي اني ملحده و كافره و صاعده السما العاشره





اقرؤوني كماااااا انا



استمتعووووووا



و اطرحوا عنكم سوااااااد افكاركم



فلا اريد مفتي هنا


ولا اريد انسان تجرد من الادب




كل ما اريده قااااااااارئ

رق قلبه لاحساسي




شكرا ربعي

Mariam B.D_Q8 said...

خليتيني للحظه اغمظ عيوني
و احس فبرودت الغيم
بحرارة الشوق بعد الفراق
بقصر اللحظات الجميله


ما اقول اللا الله يعين اللي فاقد احبابه مو بس الموت اللي ياخذ الاحباب
حتى التلاهي اب هالدنيا يفرق الاحباب

lawyer said...

الزين


الزين شعووووري بالفقد شي مهلك متعب

و ما ان اغاثني الله بقطره مطر الا حرقت قلبي و جفت ..

تخيلاي زوووووووز اني من افكر برتاح اتعب

اجرررررررر التعب جر معاي في كل مكان

تخيلاي يا الزين اني حاسه بكل كلمه تقولينهااا


اه يا الزين


لما يمووووووت الامل

لما يموووووووت

و تصحين



ليدي

و عسى الفرح يحبك دوم









منال
صبااااحج زاهي ممطر بعبير ندى الزهور الي قاعده اشمها الحين



فعلا نخاف الاحلام

lawyer said...

نيو مي

ااااااااااااااااه

لماذا نصدق بالحب و تكذبنا الظروف؟

لما نتطهر به و يدنسنا هوو بجرمه


لماذا كل شي يدعونا للهلاك بالقرب منه


دومي انت بحب و توفيق من الله في ايامك هذه

بوركت و بارك الله لك نجاحاتك







صبا

عسى الله يرحمنا و يرحمهم يا رب

انا اسسسسسسسسسسسسفه

كل الكومنتاااااا زف فيني ليش اكتب هالبوست وووايد قالولي لا تنشرين الكومت







زوز
يموتون في احلمنا ام قلوبنا او اين يموتون

الله يرحمنا احنااا على يصير فيناا








دمعه

اميييييييين يارب

واليومغيم و مطر
و الجو فظييييييع

صباااااح الاعياد و الطاعات




مريم

فعلا بالظبط

كل شي يرووووووح
و يبقى الالم باقي بالجروح


اللهيدوم لج الي تحبين
ويخليهم لج

Unknown said...

والله خنقتني العبرة ..

لديك الروح الجميلة. الكثير من الوقت على جهاز الكمبيوتر سيئة للعيون. محاولة خدماتنا
والخدمات هي كالتالي:

- خدمات تألق بشرة العروس.
- خدمات سريعة لتألق بشرة العروس.
- خدمات التخلص من الشوائب في البشرة للعروس.
- خدمات خاصة بالعريس.
- خدمات خاصة بوالدة العروس والعريس.
خدمات متقدمة لمعالجة التجاعيد (خاصة بأهل العروس والعريس).
صباحج ورد ..

الدكتورة هالة حشاد
(عيادة كايا)