Saturday, April 15, 2006

فيه كويتي؟؟

احبج بس ما ابي اقولج
دلليني......... و بتغلى
دلعيني ...
لا بلييييز ترجيني اكثر !!
في البدايه بركض وراج ..
دخلت مزاجج !! حبيتيني..؟؟
عيل اكليها !!
باذيج و بحقر !!
اول يومين روميو
ثالث يوم قيس بن الملوح
عاشر يوم
الحب يندفن في مقبره صليبيخات !!
سمعتوا عن الفاست فود طبعا
لكن الموضه الحين في الكويت
فاست لوف!!
ممكن سؤال ؟؟
كل البنات و الشباب الي اتناقش وياهم
يقولون مافيه حب هاليومين !؟
ليش؟؟
الهدف تغير ؟؟
او الشاب ماصار يصبر ؟؟
البنت ما تتحمل ؟؟
و الا شنو بالضبط؟؟
أول يومين من العلاقه الاتصالات تشتكي من كثر المسجات
بعدها يبدا العد التنازلي ؟؟
العيب فينا او في الزمن ؟؟
عموما
اذا شفتوا واحد مينن المرأه
و بالمواصفات الي كتبتها
لازم تعرفون انه كويتي
محسر في المرا تحسر
!!!!

42 comments:

lulu said...

صدقتى والله كلامج عدل وهذا الى صاير الحين فاست فود لييش ما ادرى والله
هالمشكله منه ولا منهم

الله يعين
مع السلامه :)))

wwwwwww said...

الرياييل إملّون بسرعة
متى ما حصّل إلّي ببيها.. و صارت تحت رحمته.. ينقلب 180 درجة!! إذلها مذلّة العالمين!! أنا أتكلم عن المتزوجين و غير المتزوجين
بس لما يكونون مو متزوجين وايد أرحم.. البنت إتهدّه و تفتك من ويهه! بس المشكلة لا صار ريلها و ذلها!! في أمها خير تقدر إتسوّي شي! لا و إذا عندهم إعيال بعد خلاص ما تقدر إتحرّك تنجعم و تبلع في قلبها و تسكت علشان عيالها و علشان الفضايح.. مع إنّه قبل الزواج يبوس القاع إللي تمشي عليها! شنقول مالنا إلا الصبر.. الحمدلله على كل حال

uTMoST said...

من بغى الدح ما قال اح :p

واحد داش من الدريشه تبينه يكون امين و محترم؟

انا ودي لو كل وحده تسأل اللي تكلمه ترضاها على اختك؟ و يشوفون اذا يتقبلون الرد ولا لأ :)

انا داشه بعنف؟ ;p

انا من زمان اقرالج بس اول
مره اعلق!:)

3ateeja said...

والله يا وخيتي يا لوير حجيج عدل
عدل مدل
المهم خلينا في لب الموضوع
حلوه لب هاه
المهم
الكويتي من تقولين له احبك شال يده منج
وان قلتي له اموت عليك شال ريله
وان قلتي له يا حياتي شال ......عمره .. عاد انتي وتفكيرج
مو بس لكويتي ترى اغلب الرياييل
ومشكلة الكويتيه انها فضيخ
مسكينه
احبك وحبيبي واذا عليك ديون ادفعهم واذا عليك اقصاد اكيشلك عبالها طايحه بجبد روحها اي ليييييييش مشكله والله
وتقوم الخبله وتحط على ظهرها دين علشان يشتورن بيت بضمان معاشها ومعاشه على بالها ان بيتعدل ويصير آدمي
لا يبا
ما على الغريبه تسويه صبي عندها
ومشبعته حجي حلو
بس حجي
حجي فقط
كأنها تدري ان نفتقد للحجي فقط
يعني السالفه مو ماكو حب
لا في حب ونص لكن ما في ناس تعرف تحب
ولازم الريال ما تحسسه المره انه وصل لغايته
يعني خل يدز خمس مسجات وهي تدز مسج واحد اشفيها
يا زين حب قبل
لما الواحد يحط عينه على وحده يحط في باله انها زوجته خلالالالالالالاص واي شي يمسها يمسه واذا تيوزت صخن
روحي سألي ابوج يبا قط مره صخنت ويابولك دختر اذا قالج إييي معاناته انه منهم :)
شكلج امصخنه هليام
:P

Expatriate said...

let's look at it this way :

Experience has proven facts, using samples of male-female relationships. The facts show that kuwaiti men are not loyal, non-giving side of the relationship and don't understand the real meaning of love.

The easy conclusion that you went through :
Kuwaiti Men are not loyal and can never understand love.

Thinking out of the box and looking at the larger picture, the conclusion may not be as easy as you think:
1- Bad samples or men/relationships has been chosen for the testing and derivation of the conclusion

2- Since only limited samples was chosen for that, the testing was not comprehensive. Onother sample may prove a totally different conlusion/observation.

اعتقد كلام
utmost
الى حد ما يوضح هالفكرة

Expatriate said...

ONE MORE THING,

MOST LIKELY the type of relationships you're using for your sample is the problem in the whole thing.

!

NaDiA AnZa7a said...

والله يا طويلة العمر الزمان عمره ما تغير ولا الحب الاوادم هم اللي تغيروا .. صرنا بعصر السرعة ما فيهم صبر
سواء كعلاقة او زواج
تلقين الريال ليب كلم وحدة خلال اسبوع يبي يطلع معاها .. ولي تزوج ماكو صبر اي مشكلة اتصادفة على طول يكون الحل الطلاق... بس تدرين فطوم انا عقب ما كفختني الدنيا طراقات عرفت ان ماكو شي اسمه حب!!
اكو احترام ومعزة وعشرة وثقة واعتقد انا افضل هالشي على الحب
لان الحياة من غير احترام الطرفين مستحيلة
وبس مالي خلق اهذر اكثر في هالموضوع اللي صاير حديث الساعة

طائر بلا وطن said...

LoL :D

انشالله الدنيا فيها خير

و يسعد صباحك

kazmawy said...

الحب موجود
لكن منو الى يعرف شلون يحب
ومنو الى يصدق فى الحب
المغازل بين الشبا ب والبنات هذا ماوراه حب
ماوراه الا اللعب واللهو
اعتقد الحب الصحيح ياتى بعد علاقة ناضجة وشرعية وصحيحة
انا اقول الحب الصحيح ياتى بعد الزواج ..
واما قبل الزواج فنادر ما يكون هناك حب حقيقى...
واسالوا المجربين

chatterbox said...

العيب مو من الريايل بس لا العيب من الحريم بعد يعني حرام عليج ريلج او حتى حبيبج طول اليوم حنة ورنة وطلبات و طلعني وودني مطعم وودني السوق وصلح السيفون وسو الغسالة
والبنية تقول حق حبيبها ادفعلي مكالمات و ود بحثي المكتبة واشترلي نفس نظارتك وهالسوالف يعني مسكين الريال شيسوي؟؟؟؟؟
الرجل الكويتي يحتاج كلام حلو وحنان ودفء اسري يعني هم تحرمونهم من هالشي وهم ماتبونهم يهدونكم ويتزوجون عليكم لبنانية او مصرية؟؟؟؟؟ مايصير

Dr. Saleh said...

Expatriate, NaDiA AnZa7a, and kazmawy you have said enough, and there is nothing to be added here. You all 100% right.

مساعد said...

أهو فعلا فيه مشكلة و سببها بظني إنه الناس ما تتثقف ! ما تقرى عن العلاقات و تفكير الجنس الآخر و لا تدخل دورات اللي بكل مكان ولا تسمع أشرطة .. ببساطة ما تثقف نفسها ..

أنا أتمنى إن المقبل على الزواج يقرى و يثقف نفسه عن العلاقات الزوجية مثل ما إنه مستعد يقرى تعليمات إستخدام ثلاجة يديده عالأقل !

sugar free.. said...

وجة نظري الشخصيه البحته .. مااااااااااا أأيد العلاقات نهائيا .. بتقولون معقده قولوا عادي :))

lawyer said...

Lu Lu
حياج الله عمري
وينج ما اتبينين ؟
اي والله مدري منين المشكله

lawyer said...

واااااااي لألألألألأ هم يعل القلب و هم يجابلني العمر كله !!؟؟

الحين حتى الرياييل المتزوجين يحنون على حريمهم و يحسرون فيهم

متى بتسنعوون مدري ؟؟؟

utmost
منوره حياج اختي
هذي الساعه المباركه
لا طبعا ماراح يرضاها حتى على خدامتهم مو اخته
بسسسسسسس تبين الصج يا وخيتي
محد طق البنت و قالها اتكلم
تعالي شوفيهم الحين البنات اهم الي يلحقون الريايل ملاحق
و بعدين اذا البنت تلحق الريال و تالي تحقق وياه و تستشرف وتقول اختك و ما اختك
ماله داعي




عتيجه
هلا هلا بالي لها الخافق يهلي
اي والله صااااااجه
يا عتيجه على اولها ما تشوفين الا غبرتها في بيت التمويل مقطعه روحها في الاقسااااط

lawyer said...

expa
انا مو بس اعطي الامثله الشينه او الي مو زينه من عبط
صدقني يا اخوي اني احترم رايك وايد و كلامك انت بالذات اقراه اكثر من مراا

تدري ليش لاني صحيح و انت بالنبه لي الي تمثل الشاب الكويتي الي اادري فيه منه وايد بس محترم و قاعد بالدوانيه
ماعليه من فلانه و فلنتانه
سنع ماله في توافه الامور

بس انت لو تلاحظ انا في بوستي هذي ما حددت شريحه معينه او شباب فئه معينه
انا ما اقصد الا طبع من اطباع الريال
انا اتكلم عن الرجال عموما مو قاعده اتكلم عن شخص معين

يعني انا لو بتأثر بالي حواليني جان علوم
بسسسسسسسس والله يا اخوي ابيك تعرف شغله معينه
ان الشباب الطيب موجود
لكن انا اهني
اقولها لك
اتكلم عن صفه و ليست فئه

lawyer said...

ناديه

اي والله يا اوخيتي
مشكله اذا راح الاحترام راح كل شي

lawyer said...

طائر

طباحك نوووور و خيرات
دامك في الدنيا اكيد فيها خير

اهم شي ضحكت من الصبح

lawyer said...

كظماوي
سألنا المجربين قالو ان الزواج مقبره الحب !!!

و اذا دش الماذون من الباب انحاش الحب من الدريشه !!


شاتربوكس
لوووووووووووووول موتيني من الضحك
صج صج ضحكت
انزين و احنا من يقولها كلام حلو؟؟؟


د.صالح
حي الله ..اشلونك بشرني عنك
اي والله اليوم كلهم وفوا و كفو ما قصروا

مساعد
اي والله صاج
انا دخلت مرا دوره من هالدورات عن جاسم المطوع
كل الي موجودين عندهم مشاكل و منفصلين
يقولهم جاسم المطوع
ليش بعد ما يطيح الفاس بالراس اتييون ؟؟



سكررررررررررره

هلا فيييييج عمري
احترم وجهه نظررررررج
لا حشى مو معقده
هذا عييييييييين الصح والله
هذا العقل

lawyer said...

ملاحظه
ثاني تعليق مني حق الاخت سنع و منع
لاني اشتطيت و علقت على كلامها من غير ما اكتب اسمها

Expatriate said...

نعم فاهم قصدج

ولكن اقصد على اي اساس استنتجتي وجود هذه الصفة عند الرجال عموما .. قد تكون موجودة فقط عند مجموعة معيّنة

خاصة ان اغلب العلاقات الزوجية الناجحة محد يقدر يعرف نوعها وتفاصيلها

Diver said...

والله السالفة هاذي طويلة بس خليني اقولج عن الرياييل و سبب و قوف الحب عندهم
أولا و هذا الشائع هالايام دور حب حق جم يوم تحضيرا للطلعة و اخذ المعلوم ما حصل شي طااااااااااااااف
ثانيا حب حقيقي لكن من اهم مميزات حب الرجال ان يتم اثباتة بالافعال و ليس بالاقوال اما الحب عند الجنس الناعم يجب ان يكون بالافعال و اقوال و قد تككون الاقوال اكثر
هذا الموضوع لمعلومات اكثر انا ترى بالشوفة

mishari said...

فطيييم جم مرة اقولج ولا تفهمين شسوى فيج

سمعونى وصدقونى اللى باقوله هالمرة عاد اهوا الصح واللى ما يرضى يطق راسه بالطوفه
ليش الريال يسوى جذى
لان المرة صارت رخيصة يبى يكلمها الساعة 3 الفجر عادى يكلمها من اللليل لى الفير وكل واحد متلحف وهات يا كلام عادى والعلاقة ما صارلها يومين خلكم واقعين قبل البنت ماكو موبايل تتكلم من تليفون البيت ركضه وتسكره بسرعة يمكن هالشى عفوى بس صارت عزيزة عندى الريال حتى لو اهيا موزينه بس الريال يشوف جدامه وحدة تخاف من اهلها وتتكلم بحذر الحين البنت ما يهمها تكلمها اليوم باجر طالع معاها البنت وما اقصد الكل فقدت عزتها وانوثتها ورخصت نفسها حق كل وحدة وكل هذا بحثا على قولتهم عن الحب اللى يبى البنت على نظافة دش من الباب وتعز نفسها عن اللى يسوى واللى ما يسوى والريال النظيف لما يشوف بنت عازة نفسها راح يركض وراها مثل المينون لانها صيدة ما تتطوف ويتزوجها والخفيفة اللى ما تهد التليفون وسوالف تالى الليل مصيره تلقى نفسها بروحها عانس او تتزوج واحد نفسها من وحدة لى وحدة ادرى ان طولت بس صدقونى هذا الصج وحاولى تتقبلونه

kuwaite said...

loool


:)

meo said...

الحب موجود لوير
شفته بعيوني بغيري بس مو فيني
وايد ناس مو موجود فيهم
و للأسف انا منهم ,شلون ايي محد يدري
محد يقدر يختاره, يا تحبين ,يا صداقه, يا تلعبين
الزمن ما اشوف له اي عيب

نعيب الزمان والعيب فينا
ومـا لزمـاننـا عيب سوانا

qalm-jaf said...

شهادتي على الرجل الكويتي مجروحه انا ما احب الجروح
(:
الشاب الكويتي يبي يحب كويتيه تعرف عليها باي طريقه المهم اول مره تطلع وياه
حياويه بعد الميانه تطع على حقيقتها
عمرى ما ابي احد يشوفي
طبعا كل البنات حتى المنقبه من يبي يشوفها
(:
خلينا نروح مطعم
طبعا الولد كويتي
وذرب وكتكوت والكرم فى دمه من ايام جده حاتم
(:
شنو تبين ياقلبي
تمد البوز يعني اخراء لا انا ما اكل الا سلتات اى سلطات
ياقلبي لا تستحين
الله مالي نفس واخاف اخرب مكياجي
امانه عشاني
خلاص عطني كباب وعيش ومرق وبصل ووو
لفت الصينيه كلها
وبعد ماتشبع ياقلبي خربت الرجيم
(:
وبعدها الكويتيه تقول عمري خلينا نروح السنما
يفكر الكويتي حاضر يقول ابقلبه والله انها حساسه تحب السيما
(:
اول ماتوصل السنما عمرى نبي ناكل اكل السنما ابي اصير مثل نوال الزغبي
(:
الكويتيه بس تاكل
عليها بالعافيه
يدق الكويتي على حبيبته الكويتيه يبي يسمعها شعر او اغنيه رومنسيه
ترد عليه
اي سامعتها وع خايسه
(:
هنا يبدا الكويتي بانه يحتاج غسيل مخ
(:
تدق عليه فى يوم عيد الحب تقوله
هاااااااا
شريتلي هديه ولا لاء
هههههههههه
واى مطعم راح ناكل
مو تقص على تجيبلي دبدوب
وورده امعفنه
هههههههه
.
.
.


تبين الصج
والنعم بالمرأه الكويتيه
والنعم بالرجل

.
.
العيب فينا احنا كلنا رجال ونساء

اي حب يا لوير تبين اكذب عليك ؟؟؟
الحب شيء حلو بس احنا
الكذابين واللى وصخناه بعد رجال ونساء
ليش ؟؟؟
.
.
.
أسألوا الرسول ص
هل يقتل المؤمن قال نعم
هل يسرق المؤمن قال نعم
هل يزني المؤمن قال نعم
هل يكـــــــذب المؤمن قال
لالالالالالالالالالالالالالالالالالالالالالا
لالالالالالالالالالالالالالالالالالالالالا
لالالالالالالالالالالالالالالالالالالالالالالا


عرفتي وين العله

كم رجل كذب على امرأه
وكم امرأه كذبت على رجل
.
.
.
الرجل الكويتي
يعطي البنت أعيونه بس علاقه من غير زواج

.
.
.
الشافعي قال
عفوا تعف نسائكم
مو حافظ الباقي
(:

نون النساء said...

المشكله ان كل طرف ينتظر من الطرف الثاني انه يسويله شي..!!


أووكي بادروا كي نُبادر نحن كزلك
أو بالأحرى خلينا احنا نبادر بالشي الزين علشان اهمه يبادرون كزلك .

^
^
ياشين المكس :P


طبعا اتكلم عن الأزواج لأن اللي مو متزوجين أماالخاطبين هذول بلابل ما تسمعين غير التغريد ..



ترا هم الحريم الله يهداهم بعد مرات يمصخونها... والله يوم اقعد مع الحريم اشوف نماين انا انا البنيه ما أقدر اتحملها ولا اتحمل ملاقتها ولا حتى ضحكتها شلون عاد ريلها

وااااااااااااي



أو العكس مثلا كان قاعد عندي بالمكتب واحد
والله يا لوير تحفه على القميص المخطط وردي وأزرق وضيق والبنطلون ضيق وأهومعظل

مادري ليش زعلت على مرته واشفقت عليها
امبيه هذا اشلون تقوله أي لااف يوو



مادري شكو الكلام اللي قلته فوق


بس بما اني مع بنات جنسي
فالريال اهو الغلطان دائماً

mishari said...

نون النسوة :مو كل البنات بس الشغلة اللى بقولها تنطبق عليج واتمنى انج ما تزعلين الريال لو يولع اصابعه شموع حق الحريم راح يظل مقصر شوفى احد الاخوات اكتبت تعليق عندى فى البلوق واتوقع انها نيله ان بعد الزواج التعبير عن الحب يكون غير وبطرق مختلفة بس مشكلة الحريم عموما تكره الريال لمجرد ان يتغير شوى ما تفكر ان الريال دايما يفكر شلون بدرس العيال ويخليهم احسن منه وما تفكر ان شايل هم البيت وشلون يأمن لهم بيت المسقبل وما تفكر ان اغلب الالتزامات عليه وندرى الحريم الحين قاموا يشاركون بالالتزامات الاقتصادية بس تدرين ليش هذا كل من طمع الحريم ما تقنع باللى موجود ودايما ما تبى تطبق مد ريولك على قد الحافك بالعكس تحن على الريل بكل شى باتفه الامور واخر شى الريال يطفش من البيت بسبة غباوة المرة وبعدين يقولون ليش يتزوج اجنبيه يبه ارحم من حنة الكويتية اللى بس تبى تدز هديه وتروح استقبال وبدلة اقل شى ب 500 والهدية لازم ما تكون تفشل والورد اللى تدزه لازم يكون 100دينار
صلوا على النبى وخافوا ربكم بالريايل وراح الله يوفقكم

Яeema said...

عزيزتي لويير

المشكلة أزلية
و ماراح إنخلص منها
متزوج مو متزوج كل ماشي

الريال متروس تناقضات
و كل واحد يختلف
و كل واحد يحب بطريقة معينة

اللي يحب إن المرا إتصعدة السما
و إللي يحب ينقاد
و اللي يحب يشوف ضحيتة متعذبة

فمافيه قاعدة علي هالموضوع
كل واحد و تربيتة

في شي حلو لازم البنات يعرفونة

الريال يحب المرا الغامضة
يحب ما يعرفها عدل
و بنفس الوقت يحب إنها إتكون أنثي ، جسم و كلام إمصفف و مدبرة

و حنونة و تهتم فيه و إتونسة بالفراش

و بعدين يموتون علي إللي إتغلا
و كلام مشاري صح في هالنقطة
البنت رخصت نفسها وايد
الصراحة

و ماكو ريال يستاهل إن البنت ترخص في نفسها حقة
ما يفهمون إن هذى تضحية و حب و شي سامي اللي قاعدة إتسويه
:)

chatterbox said...

المعروف ان المرة تعبر عن عواطفها بالكلام والرجل يعبر بالافعال
اقولج ليش؟؟
لان المرة تستانس من الكلام الحلو فعشان جذي اهي تقول هالكلام حق الرجل وعبالها اهو جذي يستانس
مع ان العكس الريال يحب الافعال عشان جذي اهو يعبر عن حبه للمرأة بالفعال

والنتيجة ان محد قاعد يعبر بالصورة المطلوبة والمراة ماتحب ارجل والرجل مايحب المرة "زوجته بس" لذلك لو المرأة تدق بايدها وريولها ماراح تعجب الرجل وكذلك الرجل ما راح يعجب المرة

وهذا احلى شي في الحياة تكيف المتناقضات
وسلامتج :)

lawyer said...

expa
فعلا العلاقات الزوجيه الناجحه محد يعرف سبب نجاحها بس صدقني انا اعرف وايد ناس شكليا علاقتهم الزوجيه مثاليه لكن فعلا ماكو شي و لا اكو علاقه اصلا


دايفر

تسلملي اصلا انا على الله ثم نصايحك ما استغنى كلش
كلش


مشاري

مشاري و من قالك ان الوحده مضيعه من وقتها نص الليل عشان يصير فيها الي انت قاعد تقوله

كلامك غريب شوي
صح؟

كوييييييييييت

حي الله من ياااااانا
هذي الساعه المباركه



meo
تصدق والله لما قريت كلامك قلت اشوه يعني فيه ناس تعترف هالايام



قلم جاف

موتني موتني من الضحك
اشطاري عليييييييك
ابييييييييه يا قلم
لوتدري اشصار فيني
من الشطه الي اشتطيتها
ناديت امي تقرا
جان تقولي يا حليله صاااج

قلت لها لألألأ اهم شي جاكيين حركات الحريم
عبالنا احنا انهم ما يدرون لما نسوي جذي
طلعنا مساكين

بسسسسسسسس صصصج ماتوقعت كلامك

شي شي شي شي شي


نون النسوه
مجبووورين انجامل الحريم محسووبين عليهم

يالله يالله صفقي ويااااااي
الحريم وايد زينين
العله كلها في الريال

lawyer said...

ريما

يعني الي المرا تسويه من باب العطاء الرجل ياخذه بنذاله و يتعنفق و بعدين يقول فيها و فيها
يعني لما المراا تعطي و اتضحى صارت ترخض نفسها

اشوه ان الرياييل اعترفوا انهم مو كفووو و لا ويه نعمه


شاتربوكس
اتهقييييييين ان الي احنا فيه و التناقضات و الكبد و العفسه
اهو الي معطي طعم للحب ؟؟

mishari said...

laawyer:كلامى صدقينى صح تدرين ليش
قبل البنت لا كلمت واحد خشاشى ركض الولد وتزوجها لان على قولتهم الشوق والولع اذبحه الحين وقت ما يبيها يلقها الصبح العصر الفير التليفون يم راسها واى وقت تبى تتكلم معاه وما صار فى حواجز بالكلام صارت المسألة سايبه يتكلم معاها باى موضوع بدون حدود وبمجرد ما ترد عليه البنت اهو يحط اكس كبييييير عليها لانها طاحت من عينى لمجرد انها تكلمت بهالشى حتى لو علشانه ونادر ما تحصلين ريال يقدر بنت انها سوت كلها هذا علشانه

أحمد said...

ههههههههه هالموضوع مشكلة

أشوف المشكلة في الحب الي نبحث عنه. و حاطين قدوتنا مين.. قيس و روميو ههههههه

أبصم بالعشرة لو قيس تزوج ليلى كان دفن الحب في مقبرة صليبيخات هذي.

لكن ضاق صدره يوم ما قدر يتزوج ليلى... و جعل حياته حزن و نكد...

ليش حزن و نكد؟ انتقام من العالم.. و عشان يحسسهم بالذنب الي سووه فيه..
يعني جرح حب ليلى كان جرح صغير... لكن جلس يحفر فيه و يكبر الجرح... و مع الوقت صار يتلذذ بالحزن و الكآبه و عاش حياته كذا.

و الثاني روميو... الحب كان مجرد لذة التفاحه المحرمه... و هي بالظبط الي يعيشونها شبابنا و بناتنا في الكويت و السعوديه عندنا بعد.

الحب هذا غلط جدا تبني عليه زواج!!.. لأنه بعد الزواج... خلاص يصير شي حلال... تفاحه عاديه... تحس انك تورطت و انخدعت..

حل الزواج انك تدرس أخلاق الطرف الثاني قبل الموافقه. من ناحية البنت مثلا.. هل هو عصبي؟ هل هو متكبر؟ و عددي الصفات الي تبينها.. لكن حاولي ما تتجاوزين عن خمس لأن يمكن ما راح تلاقين أحد ههههههه

لأن فعلا تلقين بنت تعلقت مع واحد.. يحبها و تحبه...يموتون في بعض..
لكنها تعرف انه عصبي و يتنرفز بسرعه... و تسمعه مره يهزئ في أخوانه الصغار أو يرفع صوته على أمه..

الحب بيعميها عن كل هذا.. و أول ما يطلب يدها للزواج ما تصدق نفسها و توافق!!

و في الأخير تجلس تصيح وش فيه تغير علي..

يعني من الأساس شايفته أخلاقه أي كلام و عصبي و يرفع صوته حتى على أمه.. و آخر شي ليش تغير علي؟

هذي ميزة الزواج العادي في الإسلام.. الزواج يكون على أساس الدين و الخلق... لا أعرفها ولا تعرفني.. لكن ما هي مشكله أبدا.. أعرفها بعد الزواج... يكفيني بس اني أعرف أخلاقها.. لأن اذا كانت هذي الأخلاق تناسبني... خلاص أي بنت في الدنيا تحمل هذي الأخلاق بتناسبني.

خرابيط أحبها قبل الزواج هذي مالها معنى.. هذي لذة الممنوع و انجذاب جنسي بس..

آسفين على الاطاله و الفلسفه الزايده.. تحياتي :)

طائر بلا وطن said...

العزيز أحمد
.........

السلام عليكم
:)

بعد التحية .. عزيزي أحمد اتفق معك في بعض
ما ذكرت فيما يتعلق بالممنوع و المرغوب
و الغشاوة التي تحجب عقول البعض و هذا واقع

لكن ان سمحت لي أرى في عبارتك الأخيرة كثيرا
من التجني .. جنس و بس .. معقول يا احمد

لا أنزه كل العلاقات و لا حتى أدعو أو أحرض
على تكوينها و لكن هذا لا يمنع ان هناك
من أحب بشرف .. أخلص و ربما نجح في حياته

هنا فقط كنت اتمنى عدم التعميم
:)

مسألة الأخلاق .. نعم .. فاظفر بذات الدين
تربت يداك .. و لكن لا تنسى ان الاسلام
أقر الخطبة كمرحلة أولية من الزواج .. ترى
لماذا؟ .. ثم هل كل صاحبة خلق تناسبني او تناسبك؟

هناك معايير أخرى قد تختلف من شخص إلى آخر
و لا تنتقص من قدر اي منهما .. و قد يكونان
على نفس المقدار من الخلق


تحياتي لك
:)

غريب said...

ليش ما تقولين ان الحياة صار رذمها سريع والعلاقات العاطفيه تبدي بسرعه وتنتهي بنفس السرعه وليش متحامله علي الريايل جذي الله اسامحك

أحمد said...

ههههههههه طائر بلا وطن..

عزيزي ما تجنيت على أحد. الانجذاب الجنسي ما أقصد ممارسة الجنس بس... أقصد هي طبيعة البشر للانجذاب للجنس الثاني.

و فعلا الحب قبل الزواج انجذاب جنسي... إلا اذا اللهم كانوا مع بعض من سنين... مثلا يكونون قرايب و بينهم ذكريات و عشرة عمر.. هذي غير و فعلا ممكن أصدق الواحد اذا قال أحبها... لأنه عاش معها سنين و طلعت مثل الفرد من عائلته..

فهذي نقطة الاختلاف عندي... اني اشوف ان ما فيه حب أصلا عشان يكون شريف ولا لا... ما دامهم قرروا الزواج فأهدافهم شريفه بإذن الله.. ما ندخل في النوايا..

لكن الي يبي زواجه ينجح... لا يقدم على زواج بسبب هذا الحب الي اسميه انجذاب جنسي.. لازم يفكر برا دائرة الحب هذا.. و يدرس البنت صح.. هل اخلاقها و طبايعها تناسبه ولا لا؟

يعني مثلا تلقى واحد تعرف على بنت من شهرين أو ثلاثه... و يعشقها بجنون... و يعرف انها دلوعه في بيت أهلها و من طقة الي يعششون في الأسواق ههههه مثلا..

تلاقيه يصير ينجذب لها أكثر بسبب هالدلع.. و يقول أحبها و أبتزوجها..
و المسكين ماهو عارف انه بيجيب عنصر نكد في حياته..

طبعا فيه ناس تنجح زواجاتهم مع انهم يعرفون بعض قبل الزواج... و أحد الأسباب انهم فكروا صح و عرفوا ان اخلاق و طبايع الطرف الثاني تناسبهم. أو انه دخلوا الزواج على عماها و ربي وفقهم و كانت طبايعهم تناسب بعض :P


كلامك سليم طائر..
أعتذر على حصر المعايير على الأخلاق... كل واحد عنده معاييره الخاصه.. و أحد المعايير ممكن يكون الجمال. لكن أهم شي انه يقدم على الزواج بناءً على هذي المعايير..


تحياتي لك

sOulvOice said...

امممم موضوعج عوار قلب ونبش جرووح ;)




فيه حب وفيه قلوب,, بس برايي الحب مايستمر الا اذا كان الطرفين نفس مستوى العطاء

كثر ماتعطين بالحب تاخذين ,,نظرية عطاء بلا حدود من طرف واحد ماتوكل خبز ومردج بتملين


الحاصل عزيزتي ان احد الطرفين يلقى شغلات تعجبه بالطرف الثاني فيشتغل الفضووول والبحث والتحري عن اللي جدامه,,

وشلون ارضي هالفضووول؟؟ اكلم هالانسان

كلمته؟

عرفته عدل؟

عودته علي؟

اهاااااا اهني استوعب احد الطرفين انه مايناسب الثاني دينيا ولا فكريا ولا اجتماعيا


ومتى يستوعب ؟؟؟؟؟؟؟ عقب سنين احيانا,,صباح الخيررر وينك من قبل

انزين ليش ماقلت من الاول؟؟توك تكتشف مثلا!!!



خلو الحب لأهله واللي يبي يلعب ولا يقضي وقته يشوفله وحده من نموونته يا اخي لاتروح حق وحده تبي حب صادق ومن قلب شوف وحده من طقتك شغل كوكش شباب وماتذكرك الا بمكالمة مرة بالاسبوع




مشكورة هيضتي اشجاني ;D

lawyer said...

مشاري

يتروالك مو كل الرياييل جذي
و لا كل المكالمات و العلاقات راح تكون فيها اباحيه من ناحيه انه يكلمها بالجنس
الي فهمته من كلامك باي وقت يبيها يلاقيها
ا غلطان صدقني

لان في ناس يكلمون بعض سنين والله و لا عمره حتى يبوسها في التلفون

هذا يعتمد على اخلاق الريال
يمكن انت تتكلم عن الناس الي كلش مو زينه بس يدق عشان هالشي

لكن في ناس سنعه


احمد
فعلا الحب العقلي شي و الحب الافلاطوني شي ثاني
الزواج لازم يبنى على احترام
مش على علاقه حب افلاطوني
لانه بيكون جدا فاشل
ابسط مثال رفيجتي
حب من المتوسط لي الجامعه تزوجت
الحب مات من بعد شهر العسل
طلاق بعد الطفل الاول !!
تقوووووولي الريال ما يتعاشر
وينج عنه 9 سنوات و انتي تحبينه و تموتين عليه
!!!!!!

lawyer said...

غريب
هههههههههههه صدقني مو متحامله على الراياييل
بس متحامله على بعض من اطباعهم العسره
ههههههههههههههه

يوم واحد من غير الرجال مالها طعم
اتخيل نفسي اعيش مع حريم بنسبه 24 ساعه
انفجرررررررر

هههههههههههه

lawyer said...

سول فويس
اختي حياج الله نورتي المكان

انا اسفه اني هيضت شجونج
بسسس هذا الصج صدقيني
المشكله المرأه و الريال ما يلتقون بفكره معينه
و صايرين ما يتحملون بعض
بحجه التغيير
و التجديد

شنسوي بعد هذي حال الدنيا
اي والله رووووووح اللعب بعيد مع بنات من طقتك

tasty_as_berry said...

موضوعج مأساة صراحة لوووول ..

يعبر عن الواقع الأليم :(

يعني أهو في حب ... بس عاد وين اللي ينحب !!

أنا مبرمجة على شغلة ... ( تحبني وتبيني ... تنظرلي كزوجة وتاخذني )

غيره اعتبره علاقة عابرة .. سواء ظلت العلاقة بالذاكرة أو لاء ..

يعني إذا ما نظرتلي نظرة أني ممكن أكون زوجتك .. شنو أنا بالنسبة لك حبيبتك !! (بقولك منافق)

مو مقتنع فيني .. عساك ما اقتنعت .. مع السلامة ..

اللي صاير الحين .. الهدف واحد ... شلون آخذ منها اللي أبي واخليها توافق تروح مكان مسكر !!

أما لقاءات بأماكن عامة .. لا لا شخباري الحين هاذي سوالف ياهال !!

أنا مرات أشوف نماين بنات والله أحتر .. أقول هاذول ساس البلا..!!

وخو بعض الشباب مخه بركبه ... ومحدود .. ما يعرف يقيم ويفرق !!

وهم أقول أن خليت خربت .. :)

يعطيج العافية ،،،