Sunday, December 03, 2006

اذا تسكرت الابواب



ماراح اقولكم هالمرا قصه و اتفنن في سرد رومانسيتها و احداثها
لان الواقع المرير و المآساه الي في قصتي ما تتحمل
ليش المرأه بعد عمر 45 و الخمسين خلاص توصل لمرحله انها كبرت
و بنت و سوت و تبي تستقر
اي الريال بعد كسره الخمسين و اذا تبون الصج ريايللنا كاسرين من المهاد
ما ينطرون عمر يختربون فيه..اي هذاا الريال يخرب بيته و يبي يهدمه
بعد ما كبروا عياله ..و بعد ما اتسقروا بناته ..و اذا فيهم بعد لي الحين ما استقر
القصه عباره عن مرا كويتيه ..تحملت بلاوي ريلها من اول يوم خذته
اعيال .بيت مسؤليه ..التزامات .. و حياتنا الصعبه و فوق كل هذا و ذاك
امه و اخته وياها في البيت ...فتخيلوا المعانات و المشاكل الي في هالبييت
الريال وين دوره؟؟
الريال فلوسه برا .. عياله كل من يصرف على عمره و يقولهم اعتمدوا على نفسكم
يبا تعال زوجنا !! انت الله مرهي عليك ..
يرد عليهم الابو لألألأ خل امكم تدفع المهر انا ربيت و كبرت ..ختزوجكم
عمر و الام ساكته و متحمله
اكثر من 35 سنه تحملت سكران
فلوسه على القمار
بخيل على بيته
شاليه كلا قعدات ووناسه
المرا مالها الا مشاكل الاولاد و بلاوي دراستهم
و الاب طاير ويا الشياطين
المشكله الحين ان كل هذا و المرأه ما شكت صابره و متحمله
متوكله على الله
مرا من بيت ناس طيبين و حموله طيبه
مثل ما يقولون بنت ايواد
اعيالها لما اكبرو وافهموا قالولها يما ابونا هذا مو ريال
اذا تبين احنا انطلقج منه
من كثر ما يشوفون المأسات الي متحملتها الام
ردت عليهم
هذا بيتي
هذا مكاني
ابوكم يروح يروح و مرده ايي
الابناء تعبانين و مضايقين على حال امهم
و الام صابره
على ريلها و بلويا
و فوق شينه و قوات عينه
ما يلمسها
لان يابلها الامراض من قبل 15 سنه فمن يومها ما يلسمها
يقولها انتي وسواسيه و اخاف ايي يمج تمرضين سنه !!
الي يوم الي صار فيه الانفجار
بكل بقاحه
ووقاحه
صارت عشيقه ابوهم تتجرأ عليهم
تتصل عليه البيت تطلبه
تروح له الشركه عند اعياله
هذاك اليوم بغت منه شي ضروري
يتله الدوانيه
و الدوانيه في البيت
و جدام الناس
و جدام زوجته
انهارت الزوجه
و ينت
ما بقى الا وصخه و حثالته اتييبهم لي البيت
تقوله زوجته: شقق سكتنا
فراشي في الشاليه بلاوي اشوف فيه و انا ساكته
قعدات سفرات بخل ما تصرف علي و الكاوليه لها كل شي
هم سكتنا لكن اقول بالسر
اما انها توصل تدخل بيتي !!
هذا الي ما ارضى فيه
و تنهار الزوجه
بعد صبر اكثر من 35 سنه
تنهار و ينهار معاها ابنائها و بناتها
الريال كائن اناني
بعيد كل البعد عن الانسانيه
لان اذا تبون الصج في كل بيت كويتي
مشاكل
و البيوت كلها مشاكل
و اغلب مشاكلنا نتيجه انانيه الزوج
مو شرط بالحرام
و لا شرط سكران
بس فيها انانيه
المرا تبي تستقر
اي الريال بيده يخرب بيته
ليش!!
تبون الصراحه اعيد و اقولكم كنت بكتبها على قصه
مو كأنها سالفه
بس ما بغيت اماطل فيها
حبيت توصلكم كسالفه اقرب لي الحقيقه
فعلا ليش الريايل ما يحقق رغباته بقليل من العدل و الحكمه

18 comments:

Kwaitiyya said...

استغفرلله
لأن بعيد كل البعد عن الإنسانية والأصول
لأن بعيد عن الدين والإيمان
لأن الحمدلله والشكر مو مهتم بعياله وبيته ومرته

لأن الحمدلله والشكر اهوا انسان وصخ وعرجه وصخ من صغرته

ياربي لاتبلينا
الله يحفظنا يالوير ويبعدنا عن هالنوعية من الناس

وبقولج شي
الريال اللي يشرب توقعي منه كل شي لأن راح يدمن مع الوقت وماراح يكون بوعيه فا عادي يسوي كل شي

Kwaitiyya said...

okh ! awal mara aseer awal wa7da :D

lawyer said...

كويتيه

صباحج ورد

فعلا كلامج عيل العدل
اذا ابتعد الرجل عن الدين تجرد من كل شي

Diver said...

بشكل عام ما نقدر نقول انه الرياييل اهم سبب المشاكل انا اقدر اييبلج الف قصة المرا كانت فيها السبب

م ثل ما قلتي المشال بالزواج شي عادي و البيت الي مافيه مشاكل مو طبيعي
الحل حق اغلب المشاكل اهو الالتزام بالدين التعامل بين الريال والمرا محدده الدين هذا ما يعني ما راح يكون في مشاكل حتى بيت النبوة كان فيه مشاكل و الي قاري السيرة يقدر يعرف

ارد و اقول الطرفين لازم يعرفون حقوقهم و واجباتهم الشرعية و من هني تيي الحلول للمشاكل

انا اول ما تزوجت قلت حق مرتي لج مني الي الله كتبة لج و زيادة و مابي اكثر من الي الله كتبه لي و الحمد لله الامور ماشية حسب الاصول م بعض المطبات الهوائية من وقت لين و قت

Яeema said...

المرا دايما تبي الإستقرار و هذا وضع طبيعي
أما الرجل و خصوصا إذا كان لعوب عمره ما يتعدل
و خصوصا إذا عنده جميع مغريات الدنيا من فلوس و حريه
و خصوصا إذا مرته صاينه بيته و إمأمن عليه

بس صج في شغله مهمه

حل الجنس له دخل بالموضوع؟؟؟

إن المرأه بعد ال45 مالها خلق و اليال يقدر يعطي ليييه 60؟؟؟

shakshaka said...

el7emdela welsheker allah layableeena w fe3lan fee wayid mn hasuwalif eb mojtama3na!

lawyer said...

دايفر

كلامك هذا لما يكون الريال متزن

لكن بذمتك يا دايفر انت ريال و فاهم اذا الدوانيه فيها 10
جم واحد سنع و جم واحد نص و نص و جم واحد ريشه !!


انت ريال و ادري
انا ما اقول المرا اهي الحمل الوديع

حريمنا يطفشون اليني من البيت

لكن مسكينه يدادلها مو منها
من الالتزامات و المسؤليات و الضغوط

lawyer said...

ريما

المرا÷ اصلا تحتاج الجنسي بعد الخمس و اربعين بس بطيرقه مختله
ليش لان تحتاج امان
تحتاج انها تحس انها ما كبرت

و من قال ان المرا من توصل سن معين

ليش ما تشوفين في اروربا يتزوجون بعد الخمسين


الانثى تحتاج هالشي
و يختلف من مرا لي الثانيه

كلامي هذا انا قاريته في سايت اوبرا
عن موضوع المينيبوز
كلا اقرا حق امي




شكشكه
امييييييين الله يحفظنا و لا يبلينا

Cr8ivia said...

من قال ان المره عقب ال 45 خلاص ما تقدر تعطي و لا تقدر على الجنس !!
السيده خديجه رضي الله عنها جم عمرها يوم تزوجت الرسول عليه السلام؟ جم ياهل يابت منه؟

الصراحه المره اللي قلتي قصيتها صج ان اجرها عند ربها كبييير ان شاء الله .. بس اهيه الغلطانه
شلون اعيش مع واحد حيوان جذي؟
امراض و ضح و سكر و بخل بعد! ويع!
اهيه الملامه بصبرها
حتى لو تقول عشان العيال
هذا خرااااب للعيال مو اب
كان مفروض من اول شي تفر منه .. شالله حادها!
ياوووويله من ربه

و ما نقدر نقول اغلب المشاكل من الريال .. الحريم مو مقصرين بعد .. وحده وياي توا بالتحقيقات يايتهم قضيه تقول رافع قضيه الريل على مرته ليش؟ معاندته من اول السنه مو موديه عيالها المدرسه ليشششش؟؟ ما سفرها بالصيف!

اما عن انانيه الريال و خيانته فحدث و لا حرج
اقولج سالفة واحد في اواخر العشرينات ماعتقد احد منا ما يعرفه و شلون حياته بيرفكت مع

lawyer said...

كراتيفيا

قولي وين تروح المرا

لا شهاده
لا بيت لا مدخول ثاني

مرا عمرها الحين بيقارب الستين

مو متعلمه و لا تشتغل
و لا بيت

و لا مدخول

وين تروح ؟

Cr8ivia said...

الحجي مو وين تروح الحين؟

الحين تروح عند احد من عيالها

هذا الشي كان المفروض يصير من زماااااان

من ايام الشباب تهده

Charisma said...

مأساااة
شهالحالة الله يكون بعونها
ما ادرى بس انا اعتقد ان فينا طاقه للتحمل تتفاوت بين وحده ووحده
وهذى صبورة والله ياجرها المسكينه
وصدقينى الله يمهل ولا يهمل

انت وربك تنياز بس مراعاة الشعور ضروريه
اعرف واايد رياييل ووايد حريم بعد يلعبون اوكى
بس بالستر ومراعين مشاعر شريك الحياة او شريكت الحياة
ما يجرحها
يحترمها ويقدرها بس يبى يلعب
عنده رب وعنده عقل

بس ايى اتجرأ وبالعلن على مناكرى جدام زوجتى وعيالى والناس
ما ادرى شقول
الله لا يبلانه ويستر علينه يا رب

mosan mosan said...

DAMN

What’s with you all and male bashing ? and why so negative ?

albandry said...

ووووويييي فطووووووووم

لاف مؤلفة من هالاشكال
حمدالله عالعافية والله يستر

البيوت والله ما تخلى بس ويين اللي يحس

{ 13 } said...

هو الكتابة باللهجة المحلية صعبة ..أدري..بس نفسي مرة ..من خاطري أقرأ لك بوست ..حروفه مشبوكه صح ...بدليات الكيبورد عندك عجيبة

عفسة كلام لوووووووووول

بس حلو "جمعتكم" ياالبنات مسووين قعدة شاي الضحى الكترونية

:-D)))

lawyer said...

كراتيفيا

نارك و لا جنه اهلي



كيتي

فعلا ااذا بليتم فاستتروا




mosan

ههههههههههههههه لا والله يمكن صدفه

صدقني الصبح لا نزلت البوست و رحت قريت من شويه الشطه الي بوست ريما
قلت ويييييييي

الجماعه منعفسين هناك
هههههههههههههه

افا عليك باجر اكتب شي عن الحريم
خووووووو وراء كل جريمه امراه
هههههههههههههه



البندري

اي والله صدقتي يا رفيجتي

The Simper said...

mashala postaatkom hal yomain waaaaayid 6waaal!

laish ma taktiboon executive summary before the post.. so we know what's the subject.. :D

Kuw_Son said...

صراحة .. من واقع المحاكم .. أشوف المر !! قصص يشيب لها الراس !! والله عملكم متعب يا المحامين !! شلون تصبرون على بلاوي الناس !! أنا قريت هالقصة عورني قلبي !! و انتوا كل يوم تمر عليكم هالقصص بالهبل !!
الريال مو كل مرة أهو أساس البلا .. خل نكون واقعيين .. جزء من المشكلة تتحملها الزوجة النسرة ..
اليوم قاعد أقرأ في الدوام مجلة المصرفي عدد 121 لعام 2206 .. في موضوع عن الطلاق .. و يتكلم الموضوع عن علاقة المصارف المالية و الأعباء الاقتصادية اللي يعاني منها الزوج نتيجة استمرار طلبات الأميرة سعادة الزوجة !!
اللي وده يستزيد يقرأ هذا الموضوع ..

بغض النظر عن غنى الزوج كما هو واضح في قصتج اللي تفضلتي فيها .. إذا الريال مو سنع .. من حقج ومن حق الكل ينقهر و يقول الريال فيه كيت و كيت .. بس لا نعمم .. لأن الديرة متروسة رياييل فيهم خير ..

و أختم بقول الرسول صلى الله عليه و سلم : "خيركم .. خيركم لأهله".

و دمتم في رعاية الله