Monday, May 04, 2009

لكل منا حياه يريد ان يعيشها بعيد عن الاخرين


الحياه صايره وايد متعبه و الناس صايرين محيطين فيج بشكل مرعب
انا من الناس على الرغم من اني اجتماعيه شكليا
ولكن انا صج ما احب الناس
او في الاحرى ماحب الحياه الاجتماعيه الي زايده بالكويت
و صايره احب الصده
احب ربعي و صديقاتي بس ما احب ان يكونون وياي 24 ساعه
ولا
احب ان كل يوم طلعه و روحه و ربع و جروبز


احس من كثر الهياته قبل و الروحه و الناس و الحياه الاجتماعيه الكبيره الي كانت عندي وصلت لمرحله بس خلاص اكتفيت و شبعت و صديت


هذا الشي خلا وايد ناس تعبر عني باستياء
وتعليقاتهم صارت ما تهمني مع ان قبل كنت اتضايق بس الحين خلاص اتقبل..

احب وايد ان يكون لي مساحتي و حريتي و حياتي الخاصه
ما احب التدخل الزايد في كل امور حياتي ..

بس طبيعه الكويتين الحين او الناس بالعالم صارت الدنيا كلها مافيها خصوصيه مدري ليش؟؟
من جم يوم كنت على الغدا ويا امي واحنا انتغدا والا ايها مسج من رفيجتها تنقلها سالفه مليقه عن خصوصيه بعض المرشحين !

سكت انا فجأه و التفت على امي و قلت لها
" الله يا حلو هذيج الايام الي كنا صغار و عايشين فيها بمصر و بيتنا في مصر الجديده لاحد يعرفنا و لا نعرف احد ساكنين في قلعه وادرين حدود حياتنا واهتماماتنا احنا و لعبنا ووناستنا واهم شي كان عند امي ابوي واخواني و دراستنا و اقصى اهتمامي اني بسرعه اي العصر عشان اروح العب في السندباد"
لا اكو اوادم و لا اكو حش ولا اكو مسجات تنقل اخبار مجتمع ولا وحده مناشبتج تتبع اخبارج ولا وحده تحن عليج في المسجات ولا اكو ناس تتقلقس على صوت ولا اكو بلاك بيري الي بثانيه الخبر ينتشر منه ولا اكو تويتر او اي نوع من الضغوط "

وصلنا لي مرحله من كثر التطور نبي نرجع لي ورا..

انا عن نفسي مو ضد التطور ولا ضد التواصل ولكن بحدود..
ومع احترام الخصوصيه .. يعني عندي فيس بوك حالي حال الناس
وعندي بدال الواحد 2 واحد باسم لوير والثاني باسمي الحقيقي ولكن ماعندي فيه اي اهتماام ولا نوعي ابديت ولا مجابلته ولا ادمنته كلش
ولا يعنيني اني اضيف الف بنت عشان بس ابلغ شفي و الا ازيد عدد الصداقات لمجرد ان يكونون عندي.. اضيف الناس الي ناسبتني الفرصه اني اضيفهم واحترم خصوصيتهم و احترم فيهم احترامهم لخصوصيتي
ولكن استغرب من الناس الي هبه هبه في كل شي وقاعدين ليل و نهار مجابلينه واييبون اخبار الناس و صورهم 24 ساعه بس من الفيس بوك؟
ليش اتتبع الدنيا و يصير همي الناس ؟؟ كل هذا وقت فاضي .؟ والا ناس فاضيه؟ او احنا في بلد تدعوا الى الفضاوه و الفضاوه الي فينا تدعوا الى الانحراف او تتبع عورات الناس ؟؟

كثر الدخول في حياه البشر دليل على الفراغ
و كثر الدخول في حياه البشر يخلي الانسان يعيش بضغط اهو مو حاس فيه و بغنى عنه ..

للمره العاشره اقولها انا مو ضد التطور ولا ضد مجاراه وجود البرامج
ولا ضد الحياه العمليه ولكن لا تخلون هذي الاشياء الي سببها الترف ان تكون منقص علينا و منقص لحياتنا

كل انسان على هذا الكوكب له مساحه من الحريه خلوه يعيشها
خنقنا الاتصال الزايد .. من تلفون و مسجات و تطور لي الانترنت و المسن و الفيس بوك وفي الاخير التويتر الي انا مو فاهمته كلش ولا مستوعبه الظجه الي مسوينها مشاهير هوليوود عليه ..


العجيب في الموضوع ان صارت برامج التواصل تقرب البعيد و تبعد القريب..
وصارت الناس محمله نفسها اعباء اهي في غنى عنها نتيجه استخدامها الشي لبرامج التواصل
نشوف الاجانب يستخدمون البلاك بيري بطريقه فعلا تجذبنه له
ولكن استخدام الكويتين غير
و نشوف الاجانب اشلون يتواصلون بالفيس بوك بطريقه جميله كل واحد متواصل مع ربعه في ولايه ثانيه و ديره ثانيه محققين الهدف الحقيقي منه
بعكس الكويتين تماما ..
وحتى المدونات في الاونه الاخيره فهمت الهدف منها غلط و صارت تستخدم استخدام خاطئ



عيشوا حياتكم مثل ما انتوا تبون و ريحوا نفسكم من كل وسائل الضغط
كن ذا حدود و لا تكن بلا حدود
تواصل مع الناس بحدود
كن مع الناس بحدود
عش مع الناس بحدود
و دع لنفسك ان تعيش كما تحب و مثلما تحب
واعط نفسك حريتها و دعها تعيش برغباتها وليس بظغوط الناس



47 comments:

ShLaLaT said...

العجيب في الموضوع ان صارت برامج التواصل تقرب البعيد و تبعد القريب



بالضبط هذا اللي قاعد يصير
!!

why me said...

صاجه



عاد تدرين


مو من النوع اللي اكون صداقات وايد
ورفيجاتي محدودين جدا
وطلعاتي قليله الا للضروره
ومو اجتماعيه
ولا عندي اكاونت في الفيس بوك



شرايج فيني

;p





ابعد عن الشر وغنيله
أدري لي تعمقت في علاقاتي ناس بيدخلون في حياتي وتنتقل اخباري لفلان وعلان

شكو


انا جذي بعيده عن مشاكل في غنى عنها


لوير

خطوتج صحيحه


لازم يكون لج برايفسي اشوي

U-Turn said...

هلا وغلا
بحرم حمدان المصون ;p

الصراحه طلعتي الي بقلبي كله ما يحتاي اني اطلعه

ويلوموني العواذل لي حبيتج ;$
يا ربي تنحطين على الجرح يبرى

درر درر وما أبالغ ليما أقول درر
صح كلامج الواحد محتاج يصد شوي
ويريح قلبه وعقله
بجرب اعيش بدون أداة تواصل يوم كامل بشوووف أقدر او لا ;p

تسلم إييدج
وعساج على القوه
وولا خلا ولا عدم ;*

chandal/danchal!! said...

عشتي وعش عشتي.. وما حاش أبوج من الخير حشتي يا تم تم

:)


حقران.... تلحقين على منو والا منو


وحدة مالي شغل فيها

لو أشوفها بالشارع ما أعرفها... تسويلي آد!!

طيب شفسرها غير بلاغت شف!

أسوي ديكلاين مادري اقنور... تدزلي اي ميل عل فيس بوك: جندل شلونك؟؟؟ أخاف ما عرفتيني!!!

يا ربي شهالاصرار!!!

مزعجييييين


بس كل شي له مميزات وعيوب!

شتسوين يا تم تم!

الشكوى لله
.
.
.
على كثر روحاتي مصر... ما عمري رحت مصر الجديدة!

قطيني بالدقي والمهندسين وانسيني يا تم تم... أداحر بياعين الخضرة على خضرتهم... والبقالين على جبنهم المعفن لول!

Najmah said...

:**
والله قلتي كل اللي بقلبي
:)

The Simper said...

off yasalaaaam.. 7ikam 7ikaaam...

احنا في بلد تدعوا الى الفضاوه و الفضاوه الي فينا تدعوا الى الانحراف او تتبع عورات الناس

المقوع الشرقي said...

Twitter is an interesting way to commucate with people, though I think that it is simply a less crowded version of facebook.
عجبنى ان فيه البي بي سي
المهم
انا معاج امية بالاميه فى احترام خصوصيات الاخرين
وانا بالحياة الحقيقية امطبقة عشر الاسطر الاخيرة
ومريحة بالى

حتى الفيس بوك والا التوتر
قليل ادخلهم
على المزاج
سلمت اناملك ع البوست

أتيت متاخرة said...

يعني آبي أفهم شي واحد
اذا عرفتوا من فلانة وجم عمرها وبنت منو ووين تشتغل ومن ريلها وندها عيال لو للحين وليش متخانقه وليش تطلقت او زوجها تزوج عليها وليش متلاسنةوياها خالتها وووووووووووووو
هلون بترتاحون
وجم وحدة تبون تعرفون قصتها وليش
شحقه كل هاذي
خلو العالم تعيش وعيشوا انتوا بعد
بلاغة الشف ما تحتاي لا فيس بوك ولا تويتر
هاذي عوامل مساعدة فقط



خارج التغطية::: العفريته بنتي اقولها صدقت خالتج لوير لما قالت طالعة عليها
ترد :منو خالتي اللي قلتي اسمها
ما اعرفها
اقولها لوير
يعني شنو لوير انزين ؟؟
يعني محامية ؟؟؟
انزين فهمت ما اعرفها

I7na 3shagnaha said...

i agree weyach 3la 6ool el kha6

:))


من هني يت خفة الطينة

اثرى طفولتج مصرية

زيي يعني

:)

بس احنا من الدقي


تشرفنا يا مدموزيل


انزين بسويلج اد بالفيس بوك

:))))))

fatto said...

انا نفس حالتج هالفتره .. ابييييييييييي اكوون برووحي ياناااس فهمو تكفووون .

انا امسكره تلفوني من فتره .. مابي اكلم احد ..اتييلي فتره مالي خلق الناس .. ادري هالفتره طولت .. بس الصراحه انا بيني وبين نفسي حدي مرتاااحه ..

وياكثر التشره الي يانييي بس شسوي جد جد مالي خلق احد

fatto said...

وياازييين فزاااع زييينااااه :)

متالومج جان ماتبين مهر لوووول

Nikon 8 said...

خوش كلام
وفعلا إحنا عايشين لغيرنا أكثر من عيشتنا لنفسنا
:(

AseeL said...

!!شخباري السندباد

لعبة الاخطبوط
وبيت الاشباح
والزحلاقيات

مصر الجديدة
وصلاح سالم
وقصر الريس
وسوبر ماركت فلاش
وكركر دكان الالعاب
وبواب العمارة اللي كان مخبر
والزبال اللي عنده خنزيرة

اييييه.. حبي الاول
اللي انجبرت فيه
ذكرتيني باللذي مضى

...مية النيل
اللي يشرب منها يا لوير

:)

ولد الديرة said...

شنو تويتر
!

ولد عم تويتي؟

هذا اسمه النضوج

الله يتمم عليج

بس عاد لا تستوين كلش

لا استويتي خلي المقوع الشرقي تقلبج :>

Sweet Revenge said...

الرسول صلي الله عليه وسلم يقول من احسان اسلام المرئ تركه مالا يعنيه

سبحان الله صفة منتشرة بطريقة عجيبه ,حطي حدود وخلي كلامج عن نفسج قليل كثر ما تقل المعلومات الي اطلعينها
كل ما كان احسن
فيس بوك تيرتل ما لي علاقة فيهم انا خط واحد وايميل ومو ملحقة هزود افتح علي نفسي بيبان

zajel said...

كل منا يعيش الواقع مع الآخرين يفرح لفرحهم ويحزن لحزنهم يضحك هنا ويبكي هناك يقوم بعمله يحب يكره يتعامل مع الأصدقاء حياة عادية نعيشها جمعياً بأحاسيس مختلفة منا من ينافق ومنا من اخذ الصدق عنوان حياة...
نتوقف قيلاً
هل هي حياتنا كلها على هذا المنوال
لا بل توجد حياة أخرى نعيشها كل منا على طريقته
حياة أخري تكون في عقولنا وقلوبنا
قد لا نبوح بها للآخرين

من الطبيعي أن يحتاج الإنسان لوقت ما كي يخلق لنفسه جوا آخر أو حياة أخرى يعيشها بعيداً عن المجتمع والأسرة
لكن هذا لا يعني أن يكون هذا الشكل هو نمط الحياة ... فالواقع هو الأصل...

BKK said...

You said it and I could not have said it better.

Nobody has a life here or what??!! Thats why I decided to do a couple of things that do not require so much interaction with lots of people:

1. Scuba diving lessons.
2. Ood Lessons.

So whenever any annoying person says lets go out I just have to say sorry I have some training to attend. Cool or what??

BTW I did not log into my facebook account since I registered.

I have never been to Egypt although I was born there. Didnt have enough of the Nile water to get me back there :)

lawyer said...

صبااااااحكم بلااااك كوفي تعدل الراس و المزاااااج الي مو راضي يقتنع بان لازم يتعدل كل يوم الصبح ..






شلالات
اي والله فعلا شي عجيب تتواصلين مع الناس الي في اقصى الدنيا و اهلج و الناس الي حوالينج جدا بعيده عنهم بحكم القوقعه الي صايره و البعد عن الالتزامات الاجتماعيه

صرنا بعاد و مو بعاد








واي مي
ارييييييح لج والله زين تسوين اصلا تحافظين على خصوصيه حياتج و تبتعدين عن القيل و القال

عفيييييييه عليج

لا انا عندي كل شي ولكن بحدود و برااحه








يو تيرن
اهلا اهلا فيييييييييج
هههههههههههه
اي نعم حرم حمدان بس لا تدري مرته عن بلوقي يمنعوني من دخول دبي
هههههههههههههه
ودج عاد كاشخه رايحه دبي والا تاليني امن الدوله هناك و ملزخيني و ياييبيلي ام خمااااااس تفعصني
ههههههههههههه


اي والله كانت بقلبي قصصه و طلعتها في هالبوست
خلو الناس تعيش براحتها

صرنا في الكويت كأنه كلنااا في ستار اكادمي و موجهه علينا الكاميرات
و كل اسبوع عايله من العواايل تطلع نومينيه و يصير عليها حجي
ماله اول ولا تالي

و اذا ماكو سالفه ألفوو سالفه في الخطبه او موضوع المهر او العرس

اي ليش عاااااد؟؟

الله يسلم عمرج يالغاليه :*****









جندل لويسسسسسس
انا اعرف وحده مسويه اكاونت باسم اخوهاا و اخوها ما يدري لانه اخوها معرووف و ادش على رفيجاتهاااااا جنها اهووووو و عارفه خماجير الكويت كلهااااا من اكاونته !!


اي تركيها عنج ختولي بلاغه الشف اصلا

الا بعرفون تزوجتاي والا لألأ
واذا تزوجتاي عندج عيال و الا لألأ
واذا عندج ولد او بنت
واذا عندج حطلج ريلج بيت او لألأ
انزييييين عندج بيت مستاااانسه؟؟
ريلج زين وياااج؟؟
واذا دشيتاي مكان بس يطالعون عينج مستانسه او لألأ

وليش مستانسه !!

اشتبوووووووووووون

مو عارفين ان مرات السعاده تكون من الداخل و من القلب مو عارفين ان احنا صرنا ممثلااااات نجيد دور السعاده اكثر من سعاد حسني بس عشان نداري الشماته و الحجي ..




انااااااااااا نت مصر الجديده مع عياااال البشوااااااات وولاااااد الزواااااات

مليقيييييييييييييين اخر شي رافجت عيال البوابييييين هذولا الي يمشووون ويا شطانتي
والا في البدايه كل ما رافجتلي سنعه
من باجر امها اشتكت عند امي

عندهم اناااااااا بلدي لان اسمي فاطمه

اهما شاهيناز صافيناااز
بسسسسسسنت

اتصدقين يمنا محل بيع ورد كل يوم اشتري حق امي جوريه بجنيه
و اكتب لها رسااااااال اسسسسسسسسسفل في امن يابت طوايفناا



لان البنات اشوفهم اذا خلصو لعب مرات يشترون ورده و يكتبون رساله حب حق امهم


انا اكتب رساااله تعبر عن مدى اضطهادي في البيت

" يما نا ما احبج ليش كل يوم اتسبح "

يما انا اريد الذهاب الى الهرم و انتي ما ترضين انا لا احبك بس احب ابوي !!!


اتصدقيييييين كبرت و انا لي الحين ما احب اسبح
احس السبوووووح وااجب !! اسويه كل يوم بس ما احبه ههههههههههههه










نجمه
يااااااااابعد قلبي انتي :**********






سمبر
اي والله صايرين الشباب و البنات مو عارفين شسوين فاضين مجابلين الفيس بوك

بطريقه بس تضبط و مغازل
البنت السنعه اختبرت قامت تجاري الوضع و المتزوج قامو البنات يتخماطونه اكثر من العزوبي

والسبب شنو الفضاوه
يعني لو كل انسان بدال ما يجابل الفيس بوك عشان يظبط و يضيع من وقته و كل يوم ينزل صوره واهو مفصخ و اهو سابح و اهوو نايم لام جلبه
بذمتك هذي تصرفات انسااان طبيعي ؟؟
هذي تصرفات واحد فاضي ماعنده لا شغله ولا مشغله

و ما الومه لان احنا في بلد ممله و الناس مو عارفه اشلون تقضي وقتها

غير في الانحراف و السيلي ثينج








المقوع الشرقي
اهلاااااااا بالغاليه

انزين بليييييز
قوليلي التويتر كل واحد عنده بروفايل ؟
و بيج و بعدين بس يقول انه شقاعد يسوي الحين؟؟

اي والله اهم شي انه في احترام لخصوصياات الناس

اي هذااااااا الشي الحلو البساطه و التوسط في جمييييع الامور احنا مو ضد هذي الاشياء ولكن ما تكون التارجت مالي بالدنيااااا

مايكون بس هدفي اني اعيش بين الناس في الفيس بوك و اسييء استخدامه

والله ضاق خلقي هذاك اليوم كنت اعرف بنات وايد وايد كلاااااس
فجأه مايوهااات و كلابز و سواااالف مالها اول ولا تالي

الفكره عندنا في الكويت ان عبالهم اذا صارو فري يعني وناسه

و يقلدون السيلبرتيز في التصرفات و قدوتهم كيم و باريس هيلتون و ما يدرون ان هذولا اوطى ناس في امريكاا
و ان التفصخ و الابتذال هذاااا مو كلااااس كلش

اشفيها لما احط صوري وانا مسافره و مستانسه و ممارسه هوايه من هوايااااتي وانا بكل بسااطه
اشفيها لما احط صوري ويا اسرتي

بس ليششششش احط صور حق ناس ما اعرفهم بمايوووووه

و بيكيني و تفصخ؟؟
وبعدين يبون الشباب يشوفونهم عشان يتشوقون و يخطبونهم؟؟

جذي راح اتييب عريس؟؟

انا مرات احس الوحده في الكويت من كثر ما عنست قامت تخبط تضرب فوق و تحت بتصرفات مالها اول وتالي مو عارفه اشلون اتييب ريل




الله يسلم عمرج حيااااااتي

:)))

zajel said...
This comment has been removed by the author.
zajel said...

Your comment has been saved and will be visible after blog owner approval.



ليش بس

zajel said...

كل منا يعيش الواقع مع الآخرين يفرح لفرحهم ويحزن لحزنهم يضحك هنا ويبكي هناك يقوم بعمله يحب يكره يتعامل مع الأصدقاء حياة عادية نعيشها جمعياً بأحاسيس مختلفة منا من ينافق ومنا من اخذ الصدق عنوان حياة...
نتوقف قيلاً
هل هي حياتنا كلها على هذا المنوال
لا بل توجد حياة أخرى نعيشها كل منا على طريقته
حياة أخري تكون في عقولنا وقلوبنا
قد لا نبوح بها للآخرين

من الطبيعي أن يحتاج الإنسان لوقت ما كي يخلق لنفسه جوا آخر أو حياة أخرى يعيشها بعيداً عن المجتمع والأسرة
لكن هذا لا يعني أن يكون هذا الشكل هو نمط الحياة ... فالواقع هو الأصل...

Corpse Bride said...

صباح الخير..

صح لسانج..

المفروض ان محد يتعدى حدوده معاج وبالمقابل ما تتعدين حدودج معاه..بس منو يقدر؟؟

ما كنتي تروحين الميريلاند؟؟

بطهم كان كل شي ياكل..لووووووووووول

:)

chandal/danchal!! said...

LOOOOOOOOOOOOOOOOOOOOOOOOOL

واي موتيني من الضحك تم تم

أنا كنت مرافجة عيال عم صالح البواب

الله يذكره بالخير

وعلى حجيهم اللي مادري منيين اييبووونه


لما كنت أعصب على أمي أروح حق ابوي اقوله طلقها!!!!

وايد متأثرة بأفلام ابيض وأسود!!!!

كل عبالي امي نيلي وابوي حسن يوسف!

ARTFUL said...

انا نفسج

الفيس بوك جربته وما قدرت استخدمه بالطريقة اللي سوه علشانها

ضفت ربعي وقفلته وخليته

ادش بين فترة وفترة

اشوف صور ربعي اللي كل يوم اشوفهم فمافي شي يديد

بالنسبه للبلاك بيري

احس انه ما يسوى

حتى متري تحن تبيه وانا ماني مقتنع ادري بكون هبه وتمله

وبالبداية من كثر المسجات اللي توصلها يمكن اكسره

لاني انا من طبيعتي احب اذا دشيت البيت اقط التلفون

واقعد مع مرتي وبنتي

جدامنا التلفزيون واللاب توب سوالف وجاي وقعده ولا مثلها

حتى البلوق احرص اني ما ادشه الا بالدوام

الا اذا صج كنت فاضي

حلو التواصل مع الناس

بس ماهو على حساب اهلك وخلانك

استانس اطلع مع ربعي القراب حيل طلعه خفيف

استانس اطلع مع الوالده الله يطول بعمرها

مرات اكره اسولف بالسياسة والاقتصاد

بس لا يحوشج الكدر مرات الواحد يحتاج يكون قاعد بروحه او مع اهله

طلعه حبيه خفيفه بعيده عن الحياة المدنية اللي تشغل البال وتصيبك بالصداع والارهاق

وصلني ايميل اليوم في صور عن جزيرة بالبرتغال

الخضرة اللي فيها والتصاقها بالبحر

والبحيرات والحياة البسيطه

تشرح الصدر

ودك من يقطك يومين ثلاث هناك تغير جو وتصفي بالك وترجع

متروس حيوية ونشاط

الحياة حلوه بس ساعه وساعه

:)

عسى الله يشرح صدرج ويريح بالج ويسعدج بالدنيا والآخرة
ويكتب لج الخير بكل خطوة

:)

أتيت متاخرة said...

نو نو لوير صج بنتي طالعة عليج
مثل الطبع يا ربي
كل يوم اتصيح
ما يصير ماما كل يوم انتسبح
كل يوم انتسبح

اذا بس تلعوزنا
واذا تلعوزت الثياب بس تبي تبدلهم
ههههههههههههههههههههههه
مو قادرة ذكرتيني فيها
تحس السبوح واجب الزامي تكرهه موت
وما ترض تغسل شعرها المتروس رمل من اللعب ويا الصبيان
شالهنشبة ويا شبيهة لوير
المشكلة شعرها لا اله الا الله طويل
ومو راضية تقصه ولا تغسله

انتاي الحين فاهمتها
جوفي لي حل وياها

7osen said...

اعجبتني هذي الكلمة وااايد

العجيب في الموضوع ان صارت برامج التواصل تقرب البعيد و تبعد القريب

اييي والله بالضبط

Dousary said...

مرحبا


صاجة بكل كلمة قلتيها

أحيان كثيرة الإنسان محتاج يقعد مع نفسه .. يتأمل .. يسترخي .. يبدع .. يكتشف أشياء حلوة بنفسه .. يعيش لحظات مع روحه وبس بعيد عن زحمة العالم


وهي لحظات دقيقة يستشعر فيها طعم الحياة الحقيقي بعيد عن المجاملات والأقنعة والتصنع وغيره من الأمور إلي اعتدنا على ممارستها في يومنا

لكن لابد من الإختلاط بالناس عشان نستطعم مدى حلاوة الجلوس مع النفس

وشكرا على هالبوست الرائع

ReLaaaX said...

قسماً بالله صاااااجه !

والله!

وصلت مرحلة بدون مبالغة موبايلي سايلنت طول اليوم

اجيك المسجات قبل لا انام والمسد كولز ابتسم وارد انام

اول الايام اللي حولته سايلنت كان اذيه صراحه خصوصا اللي مايحصلوني ويدقون على بيتنا وآنا مااااااالي خلقهم

عقب خلاص اعرفو النظام وصار الشي اذا ضروري دزو مسج ومرات بعد بيني وبينج اسحب سحبة محترمه :p


لازم الناس تفهم إنهم قراب ونحبهم بس بنفس الوقت مانبيهم على طول ويانا !!!!!!!

Sn3a said...

انا ماكنت اجتماعيه ولا بصير لاني ماحب كثره الناس فوق راسي

جايز اكثر فتره تكلمت فيها بالتلفون ومسجات وخبه اخر كورس بالجامعه حزة البروجكت

ماحب العروس ولا الحفلات ولا الاستقبالات ولاهم يحزنون

فمرتاحه من هالمجاملات والشكليات
حتى اكاونت الفيس بوك مو باسمي;p


انتي لان انعرف عنج اجتماعيه
فاكيد الحين الناس يلومون وجذيه
فتره وتعدي

الواحد بيعيش مره وحده
ليش الناس كلها تشاركه كل اللحظات
قمته!

حنطفيس said...

صح لسانج

jmili badr said...

عيشوا حياتكم مثل ما انتوا تبون و ريحوا نفسكم من كل وسائل الضغط
كن ذا حدود و لا تكن بلا حدود
تواصل مع الناس بحدود
كن مع الناس بحدود
عش مع الناس بحدود
و دع لنفسك ان تعيش كما تحب و مثلما تحب
واعط نفسك حريتها و دعها تعيش برغباتها وليس بظغوط الناس


حبيت أن أعيد كتابت السطور الأخيرة الي كتبتها لأهميتها وهي أي هاده السطور تحمل معاني وفلسفيات حياتية ممتازة بس لي تعقيب على السطر الأخيير


واعط نفسك حريتها و دعها تعيش برغباتها

أنا أقول اعطيها حريتا لاكن بحدود فليس هناك حريةمطلقة الى في الجنة


و دعها تعيش برغباتها

فهادا أكبر خطئ ممكن أن يقع فيه الانسان أن يعييش لرغباته أقصد هنا الغرائز

...

وليس الرغبات الأخرى كالأكل و الشرب...أظن أنك فهمت قصدي

وأحب أن أضيف كلمات dousary وشكرا

lawyer said...

اتيييييت متأخره

صااااجه بالظبط شنوووو المهم في خصوصياات الناس

انا اعتقد ان التاس التعيسه في بيوتها اهي الي تدور على خصوصيات الناس لتعوض نقص فيهاااا

و يسعدون جدا بمشاكل الاخريييين

ومن يسمعون دقوا بلغوا شفهم

اللهم يا كافي

هههههههههههههههههههه بنتج عسسسسسسل اتييييييينن









احنا عشقناهاااا
اييييييي انا بتوووع مصر الجديده
وناااااسه انتو الدقي ربشه و لووويه
يابختكككككككككم

افا عليج سوااااي
:)))








فاتو
الناس مو فاهمه ان النفس مثل الجسد اتيهاااا مرااات حالات تعب و تحتاج الى الراااحه


هذااااااااا الجمااال والا بلااااااش
هذااااااا يكفي انه من ديره ام خمااااس حبيبتي







نيكون
الشي الوحيد الي نسويه يمكن حق نفسنا اهو شغلنا الخاص
اما غيره ابدا ماكو شي
يومج للناس والاهل و الربع اكثر
اتلاقين الرفيجااات ينطرونج بس ادشين مسن ياكلونج بالمشاكل
وعندي وحده من الربع تغط تغط شهر شهرين بس ختصير عندها مشكله او شحنه من التحلطم اتدق الساعه 7 الصبح !! و تتحلطم عشر ساعات على عيالها
ريلهاا
خدمهااا شغلهااااا و حمولتهاااا

مرات ودي اقولها انا شنو علاقتي في هذا كله عشان اتشكين على راسي !!








اسيل
ايييييييييي والله صاجه
تذكرين يوم خرعتج و قلت لج وين ساكنه عبالج ساحره ههههه
وانا على نيتي قاااعده اووصف بيتناا ههههههههههههه








ولد الديره
هههههههههههههههههه

يقولون الفاكهه اذا انضجت تخيسسسس
هههههههههههههه

جنه مو بشااااره النضوووج

اي اي ياكاهي مقووووع
بقوولهاا


تويسر هذا الله يسلمك
برنامج مثل الفيس بوم لكن مافيه اي هدف فقط تسوي اكاونت عشان تقول انت اشقاعد تسوي الحين؟







سويت
صلى الله عليه وسلم
من اكبر النعم ان دينا الاسلامي دين اخلاق و معامله يربي الانسان من الداخل و يريحه عشان يظهر عليه الرضا و الراحه
دينا دين قلوب و سكينه للنفس


الف الحمدلله على هالنعمه








زاجل
اهلا فييييك
بالظبط انا هذا الي اعنيه
ان هناك لابد لنا بالتعايش مع الاخرين اصلا اجنه من غير ناس ما تنداس
ولكن الي صاير للاسف ان الناس ماصارت تحدد الناس المحيطه فيها صاروا ينفرضون عليك


الاهل سبب للراحه ولا يعتبرون ناس

نفرح بالافراح و نحزن للحزنهم ولكن لا نعيش حياتهم

يكونون جزء من حياتنا و ليس كل همناا








BKK

والله عفيه عليييييك
ان عارف شنو تبي و عارف تعيش حياتك صح
عليك بالعافيه زين تسوي
بلا تفاهات شباااب القز و الدواوين و الافنيو

الدواوين قبل تسوي رريااااييل الحين القعده فيها كل واحد حاط لابتوبه بحضنه و بلاي ستيشن و مغازل و اذا سنعيييين سنعيييين حشوووو في البنااات
واخذ على هذا المنوال



كلش ما شررررررربت من ميه النيل بما فيه الكفايه
يبيييييييلك تشرب اكثر هههههه


سؤال ممكن اعرف من وين ياخذون دورات تعليم العود؟؟
و يصير حق البنااات؟؟

صج صج صج احب العوووود







برايد
اهلا اهلااااا

امبلا اروح الميريلاند بس مو وايد هههههههههه

واي تركبييين البوت الي تجدفينه بريوووولج
هههههههههههههه

بس اكثر شي السندبااد يوم و ترك لانه يم بيتنه كلش










جندل لويسسسسس
هههههههههههههههههه

لوووووووووووووول

انتي مجرررررررمه

لا انا مستحيييييييل اقووووول حق ابوي جذي
انا اكثر شششششي جايد اسويه افتن على امي انها طقتني

انااااااا اكثر شي كان يحرني ان المصرين ما يطلعون في القواااااايل و اقعد العب برووووحي

ماعندهم تنبط و حبااااال و اشياااااء مجرمه


في البوست الياااااي راح اقولكم عن الجانب المجرم ههههههههههه

U know WHO said...

LAWYER..
إنتي حتئوليلي .. أنا حدي لايعة جبدي
بس لو أقول ماني رايحة.. تقوم الدنيا

المـامـا الله يحفظها عندها التوجب شي مفدس
فيج خير قولي لاء.. مسلسل درامي
كل البنات يروحون ويا أمهاتهم .. إنتي بتفشليني.. شيقولون ..

Ok.. MoM
ولا تزعلين .. برووح.. بس من بيته؟؟
بيت بنت خال عم يد يدي.. الله
وانا شكووووووووو
حتى ماعرف شكلهم

لو أكتب كتاب ابـ هالموضوع ماخلص

بس عاد الرفيجااات.. لازم لهم وقت..

أما الفيس بوك
فيه مزايا وعيوب

من مزاياه إني صرت متواصلة ابـ
ريفيجاتي القديمات

أما العيوووب.. وي يا لولووو
مو دشت علي وحدة..
انتي
U know Who
انا أعرفج وأعرف أمج وأختج
شكوووو فيج!! يعني عرفتيهم وبعدين

هات يا مسجات
اشلونج ولهانة عليج!! شنو أي شي

ليش ماتردين علي
ليش كلة أنا أسأل
ليش وليش وليش

أنا ما حلمت فيج حتى أفسرج.. ديليت

Broke said...

واي لوير بوستج يبرد القلب .. قلتي كل اللي ما قدرت أقوله

و ما أقدر أضيف عليه شي

lawyer said...

ارتفل

تعليقك يبرد القلب الله يخليك ذخر لاهلك انشاء الله


الحين البنات كلهم يا بلاك بيري يا اي فون

لا تخلي بخاطرهااااا
والمهم انه المبدأ انك من تدش البيت ينحط التلفون على السايلنت

وباجي الوقت اهي تاخذ راحتها فيه



فعلا الواحد يسلى نفسه بالنت و غيره ولكن ابدا ما يكون على حساب اهله

و خيركم خيركم لاهله

احنا في البيت جذي اذا تيمعنا في الصاله يوم السبت او اليمعه يكون الوقت فقط لنا و لواليديني و تحرص ان نكنسل كل شي فقط يكون وقت لناا



اويلااااااه شوقتني علىهالجزيييييره


الشي الوحيد الي مو زين في النت ان خلانا نشوووووووف العالم و انا وحده من اشوووووف شي اتشوووووق و ابي ارووووووووح










اتيت متأخره
بعرررررررررررررررف شنو قصه الامهااااااات ويا السبااااااحه


ياربي مانحب الشامبوووووو و الصابون و بعدين تعالي نشفاي شعرج و مشطييييييه

شالحااااااله ياربي




قوليلها بعدين تصير ريحتج كتاكيييييت ههههههههههههه



اقول اتيت متأخره واالي يعافيج بنتج صغييره اشماله كل يوم تغسل شعرها بعدين يتقطع

اشفيييييييييييه الترااااااااب مو احنا مخلقون من ترااااااااااااااااااب



:D







حسن
اهلا و سهلاااااااااا فييييك يالغالي
اين انت


اي والله تقرب البعيد و تخلي القريب منك بعييييييد








دوسري
اشكرج على التعليق و حياج الله في مرورج
فعلا لابد لنا ان نعيش بعض الوقت مع نفسنا تسترخى و نرتاااح
و يكون جزء من حياتنا الناس و ليس كل حياتناااااا


مهم جدا ممارسه ما نحب و الا نرهق نفسناااا بما يحبووووون









ريلاكسسسسسس

انااااااااااا اترحم كل يوم على من اخترع السايلنت


و احب نفسي كل يوم لاني قاطه الموبايل على الكامدينا او الفراش و احووووووس او اجابل التيفي و بين كل ساعه ارد اشوف من دق علي



واحلى شي بالدنيا المسجاااااات

BKK said...

Lawyer, I took it from Al Wasee6. The advertisement has been there on weekly basis. Sorry The number is in the car and I am in the office. I will try to post it tommorro. I dont think he cares about genders since it is more of private sessions.

Please dont talk about the great Nile water. Thank God my parents came back very quickly. Of course I still get this question "Omik Maseryah?!" and of course my first reaction is "Yup darajah Olah ba3ad"

Dont get me worng, I love Q8 but I cant wait to get out of here, got to my favorite destination in the world "the Land Of Smiles" and of course use my diving lisesnce.

Cheers.

بنت الشاميه said...

لوير الحكيمه
اليوم تقرين كل افكاري
وبردتى اللى فينى
بس من يسمع ...ومين يفهم

شكراااااا

ARTFUL said...

المشكلة عندها آي فون

بس لازم مع الهبه

;p

Yin مدام said...

لوير العزيزة

خصوصيتج إنتي ترسمين حدودها
ولا أحد يملك الحق بإختراقها من دون إذن منك

والدنيا مليانة بلاغة شف
والوقت الفاضي والعقول الفاضية في هذا الزمن وجدت أسوأ طريقة لتملأ هذا الفراغ بالتدخل بخصوصيات الناس
الإنشغال بها

ما عليج من أحد
وعيشي حياتك كما تريدين كيفما تريدين أينما تريدين
بالنهاية لا أحد يتحمل نتائج الإختيارات غيرك!!

فلم لهم الحق بالتدخل بها ومحاولة فرض أسلوبهم عليك ولكنهم لا يشاركونك النتائج إيجابية كانت أم سلبية؟

بوستج روعة

الله يبعد عنك كل متطفل وحشري وملقوف
:)

Purplecious said...

rabbena ykamelik be3a2lik ya 7bebchy

اقريها بالمصري

;p

كلام جميل و كلام معقوووووووول
مأدرش أقول حاجه عنوووووووو

:)

ما عليه توني يايه من جندوله و متأثره بمود ليلى مراد


خلاص يعني نووووووو موووووووور تنبررررررررررر؟؟؟

@@ في @@

يعني عيني بعينج
تلعبين مكاسر؟
هههههههههههههه

شلون ظهرج؟ ترى أحسن شي السباحة بس نطري الطبيب شقولج

روميـه فهد said...

ما نختلف على الكلام إلي ذكرتيه لوير ..

الإنسان بيده يصنع عالمه سواء مزدحم أو فارغ ، وبعقله يختار احتياجاته وهل التقنية الحديثة من برامج وغيره تفيده أو لا ، وبقلبه يخلق المشاعر المناسبة لمن يستحق في الوقت المناسب دون مبالغة أو فهم خاطىء للإيثار ...

تدرين مو مطلوب غير عمل الواجب وبس .. ليش نغرق نفسنا في المجاملات الاجتماعية زيادة عن اللزوم أو نسرف وقتنا لهذرة زايدة وفعل لا يسمن أو يغني من جوع ...

يبيلنا نقول : لا .. ونغيّر..على الأقل نتعلم نقولها ... ونرتب حياتنا عدل ونسمح بمرور الكائنات المهمة إلى حياتنا ... مو كل من دق بابنا كلنا .. اشعليه خل نجربه !! ...

بوست تنفس الحالة الواقعية عدل يا لوير ..

دمتِ لمن تحبي

روميه

lawyer said...

سنعه

الانسان الله خلقه يعيش مع الناس يتجاوب وياهم ويفرح وياهم و يوقف وياهم حزه حزنهم و ظيقهم لابد للانسان ان يكون مع البشر هذا نوع من التعايش ولكن الي صار اوفر ان صار يومج كله ناس هذا الي انا صرت انتقده

الناس جزء من حياتنا و ليس كل الحياه الي نعيشها..







حنطفيس

صح بدنك :)





جميلي بدر



أنا أقول اعطيها حريتا لاكن بحدود فليس هناك حريةمطلقة الى في الجنة

اقصد هنا ليس الحريه المطلقه في فعل النمكرات و اتباع الاهواء و لكن اقصد هنا اعط حريتها في انها تكون مع الناس وقت ما تريد و تبتعد عن الناس و توافهه الامور متى ماتريد

هل وصلك المعنى؟

لا اعني هنا الغرائز ابداا





U know Who

متأكده امج مو توأم امي
اناااااا بالظبط نفسج
خنفكر اقول ماني رايحه تقوم الدنيا

وانا مهمتي صارت في الحياه
سكرتيره امي و الناطق الرسمي عنها و المرافق

وامي مشاء الله وايد اجتماعيه
بس انااا خلاص اخر جم سنه تمردت
نص الاماكن ما اروح وياهااا

الي يصيرون لي و قراب اروح بس ربعها اهي خلاص انا شكو فيهم..


يعني الحين يعزمونج على تعارف
وبعدين ملجه
وبعدين عرس
وبعدين استقبال !!

انا افضل اروح الملجه فقط
عشر عزايم على مناسبه وحده ليش!


بنت رفيجه امي تولد ادزلها ورد و خلاص
ليش اروح استقبالها بالمستشفى و انا مو وايد وياهم ولا اعرف اهلهم ولا شي


انا ما اقصر في العزاا
لانه واجب و اجر و ارووح حق القريب و البعيد ماعندي مانع لانه حزن
والناس تبي الي توقف وياهم في احزانهم


والمشكله انا بنت وحيده ماكو احد تروح وياه غيري ..فابتشلنا في الناس

سكتاي انا وصلت لمرحله اذا احد عمنا او وصلت بطايق مراااااااات ما اقوووووول







بروك
عسى قلبج باااارد دوووم يارب

:))





BKK

خلاص انشاء الله بدوره في الوسيط


هههههههههههههههههه

الله يعييييينك عيل على تحملك الوضع الي حده شكلك لايعه جبدك منه




Dont get me worng, I love Q8 but I cant wait to get out of here, got to my favorite destination in the world "the Land Of Smiles" and of course use my diving lisesnce.

Cheers.


cheers yomma cheers eshwarana :P

lawyer said...

الغاليه بنت الشاميه
عسى قلبج دوم بااااااارد انشااااااء الله


:**



ارتقل

اييييييييييييي مسكيييييييينه بتغير عن خاطرها ما يصير كل منه عنده هههههههههههههههه



الغاليه ييييين


كل مره بكتب مدام اتذكر و امسحها

ههههههههه


فعلا كلامك عدل كل انسان يتحمل تبعات وجود الناس بحياته
اهو الي يحدد و اهو الي يقرر


لكن انا ما اتكلم عن نفسي بس
اتكلم عن وايد ناس


عندج مثل رفيجتي وايد تتعب من تدخل الجناين و الحموله و ما تقدر تطلع من البيت
هذولا ناس فرضوا عليها
كثر ما تحط لهم حدود بس شي ماتقدر تسوي عليه كنترول..

عندج مثلا التدخل في مجال العمل الناس عايشه وياج في بيئه مفتوحه حتى و ان حطيتوا لهم حدود كبيره يبقى انهم مفروضين عليج و ما اخترتيهم


الحياه معقده اكثر من اللازم







بربل

ياااااااااااختشي

هذي الي يازتلي حدها



ههههههههههههههه
انا الحمدلله ما انبر في الي ما يعنيني هههههههههههه

يعني في ناس اتنبر بس بتعرف اخبار ناس و بتعرف و بتليقف في حيااااه الناس

و يعيشون هذولا الناس ماهمهم الا اخبار فلانه و علانه



لكن انا انبر في الشغل عشان اعرف شي يخصني


انبر في الخدم ايييييي عند ويهج هههههههههه





فعلا الطبيييييب قالي سباحه
وانا اخاف من مسااابح الكويت

وبيتنا مافيه مسبح

تنصحين في بووول سنع في الكويت؟
بس لا تقولين لي الي في الخالديه ولااااا فلكس شنو غيره؟؟






روميه
انتي الي بردتاي قلبي في تعليقج

اهلا فييييج في البدايه

فعلا كلااااامك عين الصواب




تدرين مو مطلوب غير عمل الواجب وبس .. ليش نغرق نفسنا في المجاملات الاجتماعية زيادة عن اللزوم أو نسرف وقتنا لهذرة زايدة وفعل لا يسمن أو يغني من جوع


الواجب فقط الواجب
اما الباقي زياده مالها معنى

حنطفيس said...

نفس الشغور بالضبط

Ansam said...

WOW congrats! You are featured in today's issue of Al Jarida newspaper

check the link below


bloggers on Al Jarida

Coffee said...

روعه لوير واوافقج الراي
لو كل واحد اهتم بشؤونه افضل من
تطفله على الناس بكل حزه
وانا عن نفسي ساعات لي رديت الديره وشفت اهتمامات البنات اللي حولي احس اني من كوكب ثاني وهالشعور كان من قبل لا اسافر ادرس بره احس البنات ما يحبذون النقاشات الهادفه بس ولبهم فلانه شسوت ومن خذت وش لابسه وغيره من تفاهات بنظري
وعلى قولة اختي تاقلمي ياربي عيزت احاول بس ما قدرت! الحين عديت الثلاثين ولي الحيني مو متاقلمه
تسلمين

مستعدة said...

حاولت أكتب عن هذا الموضوع فلم أستطع..عبرت عن كل المشاعر التي طالما أحسست بها.. الغريب بالموضوع أننا من النوع الإجتماعي ولا أواجه أي مشكلة ولله الحمد في العلاقات الإجتماعية..
لكن كما قلتِ يحتاج الإنسان ليخفي مساحة من فراغ لا يشاطره مع أحد

وبصراحة أسعدتني قراءتي للموضوع بأن أجد شخص يشاطرني الإحساس!

أعتقد أن الناس تهرب من الواقع وتخشى مراقبة نفسها .. فتراها تلهي نفسها بكل ما أوتيت من قوة..


شكرا على الموضوع :)