اصد و جنه العيد بعد

واي شكلي بنام في البلوق او بسكن فيه !!
شوفاو مالي خلق عياب و تطنز بس الصراحه انا اسيح من الحر
مو عشان انا مولوده في القطب الشمالي لألأ
بس انا صج صايره ويا الحر اسيييييييح من ارد البيت ما اعبر اسوي شي غير اني اغسل و ابلع فاكهه و برد ..ليش؟؟ لاني اطلع الساعه 2 من الدوام واوصل البيت 3 الا

يعني من 35 لي 45 دقيقه زحمه طريج فهالشي يخليني انشوي و راسي يعورني من الشمس فشي طبيعي لما تحطون اي مخلوق بالشمس لمده 40 دقيقه بيذووب وينصهر ..
ارد البيت احط راسي و انام لي المغرب
اقوم متعسره اجابل افلام و تيفي و ارد انام !
مدري شنو قاعد اسوي بعمري
و خصوصا ان الفتره الي فاتت ووايد ارهقت في العمل فمجرد اني ما اوصل البيت
اتسدح و اتبطح لي باجر ! شالحاله لازم اشوفلي صرفه بعمري
بشترك في نادي بس متى اروح !!؟
وماعندي استعداد اقزر باجي عمري بس اجابل افلام لاني انا انسانه اذا اسيح من الشمس شوي فانا اسيييييييييييييييييح و اعيش الدور من الافلام اكثر
و الفتره الي فاتت كلا مجابله روتانا زمان و سينما و الشاشه
افلاااااام مصريه قديمه و حب يطيييييييير و ايام زمان الي تشلع القلب
عادي عندي في الويك اند من ارد من الشغل لي باجر و انا فيلم ورا فيلم مع بلعه خرابيط و برنجلز يا عل ماكو برنجلز انشاء الله .. والله يساااااامحه ولد الديره استاثم فيني من يومين و انا رايحه راده على بيتزا قيصر شالحاله !!!

اي المهم خنقولكم شغله توها خطرت في بالي لما رديت على الزميله يونوهو..
على طاري انتخابات امس .. لاحظنا ان الله يهداهم صوب مدارس النساء الوصخ و القراطيس و اليهال المققطه بالشارع !! حرام عليكم انا بس افج الدريشه و ازف في اليهال شنو موديل اليهال حراااام شمس و غبار و الجو تعيس ليش مطلعين عيالكم راخصين فيهم لهالدرجه؟؟ والا يشاركون بالعرس الدمقراطي اي عرس زين عيالكم ايون ساعه يطمشون و يمشون لكن تسون فيهم جذي حرام
و شنو موديل البنات الي صايرين يشحتون اصوات!!
البنات الكويتيااااات امس والله العظيم ولا اقدعها شحاته بالحسين .. انتوا بنات الكويت ما اصدق !! تطب طب على سياره الريال و تسويله حركه تكفا تكفا .. و لابسه تي شيرت احد المرشحين و الملفت للنظر ان الشباب يحوسون في مدارس البنات بس للطماشه و يمكن يحصله بنت بنتين يسولف و ينكت وياهم و شنو موديل البنات تكعكع و تضحك ويا رجال الامن و الشرطه والرياييل لايعه جبودهم منهم

امس لاحظنا الصراحه تنظيم يشكرون عليهم جدا رجال و نساء وزاره الداخليه الي ساهموا في تنظيم الاقتراع و تنظيم سير العمليه بسلاسه
التنظيم كان عندنا في قرطبه جدا جميل و مبهر و الصراحه ماكان في اقبال كبير ولكن التنظيم ملحوظ..

انيي حق الطامه الكبرى الي اهي التقلقس و التمصلح .. بقولكم سالفه عن وحده اعرفها

لو كانت البنت مجرد معرفه سلام سلام ماكنت راح اكتب فيها بوست ولو كنت انا الي بس ملاحظه عليها هالشي .. ما ضيعت من وقتي لكن هذي ملاحظه اهلها فيها و كذلك حمولتها.. فحبيت اكتبها لكم لانها صارت ظاهره لبعض نساء الكويت..

في نمونه من البنات يسلمون بس على المزاج.. اليوم انتي كاشخه و شكلج حلو و يشوق و قاعده ويا طاوله بنات كاشخين و شكلكم حلو اسلم عليج.. شايفتج في عرس و يكون العرس وايد كشخه ومن اهلج اتسلم عليج .. وتصير حليوه بعد .. شايفتج بالصالحيه ويا قروب حريم كاشخين و سفور و ربع خالتها ام ريلها تسلم و تسوي نفسها حليوه

تشوفج الصبح في مركز سلطان انتي في ترينينج تعطيج طاف
تشوفج في المطار مسافره عمره لابسه عباتج تعطيج طاف
تشوفج قاعده ويا حريم عيايز بالمباركيه تسحب عليج سيفون واهي بالطاوله الي يمج لانكم داثرين..

فانا بما اني اعرف البنت من قبل الغزو من احنا يهال يعني ..ماكنت مصدقه وملاحظه هالشي الا لما نبهوني رفيجاتها و كذا وحده من اهلها فصرت اعرف لها خلاص .. فشنو سويت اني مجرد لما اشوفها في مكان انا اصد ولا اعطيها مجال ان ينحط عيني في عينها لاني مابي اسلم ولاني ما ابي اتعبها في الابتسامه الصفره ولاني مابي اعطيها مجابل اتعب عيونها الي اتلاقط على جنطتي و جوتيي و ساعتي و بدلتي .. لانها تفضح روحها في نظراتها فريحت روحي و قمت اصد..

وهذا شعور متبادل بيني و بينها.. المهم صار امس دشيت المدرسه .. الحين اهي ماودها تسلم ولا اتيي صوبي بس افتشلت من امها و خالتها ياو سلماو علينا .. جان تمثل انها حليوه وتقول فطومه (( اتدلع بعد والله يعرفون اذا اشتهوا يدلعون )) لا تخلون مرزوق و الخرافي .. جان اعطيها ابتسامه صفرا و اقولها انا بالثالثه .. صوت الصبح خلصت عطيت جويهل مقطوع!!

اهي انصدمت و مشينا عنها .. سبحان الله اهلها غير و الي حوالينها غير بس اهي فيها احساس بالنقص من شنو لا اعلم .. ما يصير على كيفكم تسلمون وقت ما تشتهون بس عشان اتقلقسون وعيب جدا انكم اتصددون فقط لان الي بتسلمون عليهم اشكالهم الحين ماعجبتكم ... سبحان الله البنات الحين مدري اشصار فيهم!مزاج يضحك يسلمون عليج وانتي في دين اند ديلوكا و يصدون عنج بالمباركيه !