Sunday, June 07, 2009

حيرتني نظرة العين الفتون ..شاغلتني بالتوعد و الوعد


صوت مسج..
افتح موبايلي ..
"فيج قهوه؟
ارد
"اي بس وين "
هي
" اي مكان بس مالي خلق اشوف ناس ولا لي خلق تقولين لي تعالي بيتنا فابي اروح قهوه صاده "
ارد
"دايكاف الشعب؟"
هي
"ويع كلها شلأ"
ارد
"بس انا احبها لاني اشوف ناس مااعرفهم"
هي
"كافيه ريبابلك كويت تاون "
ارد
"خو بعد قولاي المباركيه يعني مكشختها كويت تاون!!عطيني ساعه و امرج"
هي
"اولا !! ليش ساعه ؟؟""
ارد
:يايتني حاله لو بروح الفرع اكشخ و احط ميك اب من الفراغه "
هي
" نص ساعه حدج والا بشب عليج حنه "
ابدل و امر لميا ..
نوصل ننزل الكافيه
ندخل .. نطلب ونروح الطاوله

طاحت عيني بعينه ..
شي فيني تكهرب
عيونه تنادي
او عيوني عطشانه..
اقعد في مكاني و ما اشيل عيني منه
بحركه سريعه منه يستوعب و يرد يحط عينه بشاشه الابتوب
اتذكر شوي

اسأل لميا:تعرفين هذا الي هناك؟؟
تلتفت اهي صوبه..
ترد: لا اول مره اشوفه .. ليش انتي تعرفينه؟؟
انا : لا .. مدري .. بس ويهه مو غريب علي ..او مدري ياني احساس غريب اول ماشفته..
هي : تطالعه مره ثانيه ....ممممممممم مدري يمكن شدج عشاااان مملوح؟؟
انا : حلو.. .؟ صح؟؟
هي : لا مملوح..... جلحه كويتين بس مو حلو..
انا : ليش اشوفه حلو؟
هي : الناس اذواق..

و يوصلنا الطلب و نشرب قهوتنا كل ما اندمجت في السوالف احس عيونه تطالعني .. التفت بسرعه بصيد عينه .. يوخرها .. و اذا اهو سرح في الاب توب ما اقدر اوخر عيوني.. اطالع؟؟!! لألألأ اتأمله

يتكلم بالتلفون و انا عيوني عليه
يدخن و عيني تطالعه..

اسولف ويا رفجتي .. عينه معاي..
و احسه يحاول يسمع
اتعمد اعلى صوتي واانا اتكلم بالتلفون عشان يعرف ان الي معاي بنت..

شي كان يومها بين عيونا فقط بين عيونا
كلمنا بعض
عرفنا بعض
اعجبنا في بعض
سرحنا مع بعض
بس بالعيون..
التفت على لميا اسألها :عيونه حلوه؟
تلتفت عليه تطالعه وتجاوب: كلش لأ اصلا ماتبين من السواد الي حوالين عيونه..
انا : تعب السهر واغمزلها ..
هي : بنمشي و خلاص ؟؟
من غير اي شي..

انا: لذتي و متعتي في كلمه خلاص ..اي خلاص بمشي و بروح وبسرح بعيونه و بتكون شي حلو في يومي...
لميا: مالت عليج !! هذا الي يونسج بس !! انج تشوفين واحد حلو؟؟
انا : اي انا هذا الي يونسني ..امشاي بس امشاي نرد البيت الحين امي بتذبحني تأخرت..

نطلع من الكافيه..وعند الباب التفت عليه
وعيونه تتبعني..
ابتسم و امشي
يبتسم وينزل راسه في الابتوب..
فهم الي ابيه و فهمته شي جميل يخلي اليوم حلو..

وارجع البيت
صدري سما و احساسي طير
اشلون يكون في هالدنيا عالم يربط اثنين مايعرفون بعض الا في العيون
يذوبون في بعض بس بنظرات العيون
يسلمون
و يسألون
و يستمتعون
و يودعون
بنظرات العيون؟؟

الله اكبر كيف يجرحن العيون
كيف مايبرى صويب العين ابد
انا احسب الرمش لاسلهم حنون
اثر رمش العين ماياوي لحد
يوم روحلي نظر عينه بهون
فزله قلبي وصفق وارتعد
لفني مثل السحايب والمزون
في عيوني برق وبصدري رعد
نقض اجروحي وجددبي اطعون
قلت يكفي قالت اعيونه بعد


ظليت طول الليل افكر فيه..
ياهل تره شغلت تفكيره مثل ماشغل اهو تفكيري الحين؟؟
ياهل ترا بصدره الاحساس الي ساكن فيني..
اتقلب طول الليل على فراشي .. و عيونه بعيوني
امسك موبايلي
اكتب مسج حق لميا
" من زمان ماحسيت بالاحساس الي صارلي اليوم...
من زمان ماحطيت راسي على المخده و انا ابتسااامه احسها طالعه من اقصى قلبي..
اشلون اكو عيون تغير الاحساس جذي.. و اشلون اكو عيون تغير نفسيه الي يتمعن فيها ..اذا شفته مره ثانيه بساسره و بقوله نظراتك عفستني
.."
ادز المسج و انام..

وبعد يومين .. ولي الحين احساسي فيه مثل ما اهو..

اطلع من الجيم اقرر اروح نفس الكافيه .. اخذ قهوتي من هناك يمكن الاقيه..
اروح اخذ القهوه.. و انطر شوي هناك اشربها .. وتصير ساعه و ماشفته..

اسأل الفلبينيه..
من يومين واحد كان قاعد مكاني .. اهني مع لابتوبه .. شفتيه اليوم؟؟
بابتسامه ذكاء منها و فطنه افهمت شنو ابي و قصدي..

ردت علي ان اهو دايما يكون موجود يا مع ربعه .. يا مع لابتوبه لان مكتبه فوق..

احس بخيبه امل اني ماشفته..
و ارجع البيت
ادز مسج حق لميا و منيه .. اقولهم اني اليوم رحت الكافيه و ماشفته..

واظل افكر فيه..

و يشوفون رفيجاتي حاله التفكير و الولع الي انا فيها فيقرورون ان راح نستمر اسبوع كامل يوميا نروح الكافيه.. لين نشووووفه ..

وبعد 3 ايام اشوفه..
يدخل ويا ربعه
وعيونه تسلم ..
يلتفت و يحاول يخلي ربعه كلهم يقعدون و يقعد اهو قبالي

لميا: ان ماتلحلحتاي اليوم بذبحج
منيه: ماعليح من لمووي صبراي و شوفاي شنو يسوي..
انا : مستحيل اسوي شي يخليني ما اقدر احط عيني بعينه باجي العمر..
انا حبيت عيونه .. ياااااا اعيش فيها او بدونها بس ما اطيح منها.. و لا اخسرها..

اهو في زاويه يقدر يشوفني بكل وضوح و انا بعد
يندمج في السوالف ويا ربعه وانا ابتسم اتحلى عليه..
اندمج انا في المسجات و رفيجاتي احس عيونه معاي..
اتعمد الفت نظره اكثر
في حركات ايدي وانا اتكلم
في ايمائاتي..
في تصرفاتي بس ما اطالعه

اساسر منيه : عرفت شنو احب في عيونه
خدرانه....:)
تضحك و تقولي: قصدج نعسانه ..
انا : لأ لأ خدرانه ووساع بس مو ناعسه..

فجأه التفت على البنات و اقولهم بالله بنات خنقوم
ينصدمون !
يطالعوني .. يسألوني : من صجج نقوم
ارد عليهم : اي والله بس قوماو
عشان يتعلق.. انتو ماسمعتاو محمد عبده يوم قال لذه الحب في الشي القليل..
واذا انا كل يوم ييت و بسطت ساعتين جابلته .. راح يكتفي
وانا ما ابيه يكتفي
ترد علي لميا تسألني : نووره ! من صجج نقوم ..
اقوم و اخذ جنطتي ... و اقولهم اي والله بنقوم..
وقبل لا تقوم منيه ..
يدش اخو لميا الكوفي شوب ..
ما ينتبه لوجودناا ..
و يروح متجه بسرعه للشباب
ابتسسسسسسسسسم
و تبتسسسسسسم لميا
و منيه مو عارفه شالسالفه
ارتحت الحين ..
طلع رفيج اخو لميا..
نركب السياره
تدق لميا .. على صالح اخوها
و يحقرها ..
تدز له مسج :
انت في كافيه ريبابليك لي الحين.؟؟
الي لابس بولو كحليه منو هذا؟؟
يرد عليها
مو شغلج !!

يتبع









40 comments:

maha said...

لوير تدرين شنو ودي؟؟

ودي أصرخ

وليييييييييييييييييييييييييييييييه


كملي القصه


يوم اندمجت


نوره تبتسم وانا فاكه الكشره


الله يسامحج معن ودي اذبحج الحين

الله يسامحج

الله يسامحج

من القهر قاعده اقول الله يسامحج

جنون إحساس said...

صباح الخيررر يا قميل


ذكرتيني بروحي 3 شهور أروح نفس الكافيه كل يوم الساعه 7 الصبح بالضبط آنا هناك
عيني عالباب
بوصلعه يا
المصري يا
القزم يا
بو نظارة ما يا
لووول كل يوم ناطرتهم اللي يقول أعرفهم الحين

خوش قصة ناطرين الباقي

ولد الديرة said...

عنبوه

لابس فولوكس؟

بليه :p

صبا said...

فطووووومه


يا زينها من حيره


علقتيني


شنو يتبع
!!


كملي ابي اعرف اشصار معاج

ما الومج ...يا حلو جلحة الكويتيين


يا حلو السماااار

:)


سردج حلوووووووو ...مررررره


شوقتيني


ناطره البقيه

............

على طاري المباركيه
اتصدقين فطيم ,,


ميته ودي ارووووح المباركيه ودي اشوفها واتمشى واتطمش
واشرب شاي باستكانه ام نقطه
زرقه

بس محد يوديني

اختي العوده امس قلت لها
انتي وعدتيني انروح المباركيه
ولي الحين ما رحنا
تخيلي من السنه الي طافت

انقولي :

اودييييج بشروووووط

!!


لاتلبسين شي ضيج
( جينز)

لبسي شي طويييل

:(


لا تفلين شعرج

:(


ليش
؟؟

الزين said...

صباح دغدغة المشاعر


ولهت على قصصج

:*

chandal/danchal!! said...

عسى ما يطلع مقلب

كوفي ريبابلك مركز تجمع الفلة يا روحي

chandal/danchal!! said...

يا زين الرولو بليند مالهم


يسسسسسحننننن

haifa said...

متابعة

ياقمر

Sweet Revenge said...

الله علي لغة العيون
يالله كملي ناطرين ابو العيون
الخدرانه

رزنامــــــة said...

قصة جميلـــة ، بانتظار معرفة نهايتها
مع تمنياتي ان تكون سعيدة

Mariam B.D_Q8 said...

صج شوقتيني
احييج على اسلووبج الحلو
او ناطريين آخرة لغة العيون :)

enter-q8 said...

بشوف نهايتها مع ابو عيون وساع

بنت الشاميه said...

يالله بسرعه طلع منو...؟؟؟

لا تقولين انه متزوج

ترى اذبحج
(((((((((((((:

Sn3a said...

احس البوست يونس
احس الي تمر بهالمواقف قلبها حار وايدها بارده مادري ليش


كملي احب اقرا جذيه
سويييت

تصدقين
مرات ودي اقرا نفس القصه من الطرفين
اشوف الطرف الثاني شيقول

نون النساء said...

ديري باااااااااااااااااااالج


ترا ما ورى الخدار غير المشاكل


خليها بس مثل اغنيه نوال


اربع اسنين واحنا نتطالع بالعيووون




لأن حلاتها جذي



بعدين عاد راح تبان العيوووب
والدثره
والشماطيط الشخصية والعينية وال
وال
وال


وتصير لووعه

mowa6en said...

اندماج كامل مع النص

ننطر

المقوع الشرقى said...

لوير
طلعتينى من المود بسالفتجج الله يعافيج
اندمجت فيها ايسلمج لا تطولين بالجزء الثانى
صايره ضيجت حظيره
:)
هي تمون العين ولا ما تمون
ولين
شتجاوبين
ضيفى ايسلمج البيت
هى تمون العين ولا ما تمون
يوم خذت قلبى وقفت يا سعد
ولج منى اهداء

لحظه لا تبادلنى النظر
ابعد اسهوم الهوى عن خافقى
من زمان وانا يذبحنى النظر
ياخذ اللى من افراحى بقى
سمعيها على رواء

بالانتظار
بس عسى ما تكونيت
وانا متعود اكون المشتقى
:)

Dalal Arch said...

Lawyer, lekuwaityeeen akthar nas eykhzoooon, how do you know when its the real thing when nobody is willing to take the first move ??!

RoOra said...

wai ya 7ELWAh ;pP~

Q80 Blogger said...

لذه الحب في الشي القليل


انا اشهد

joy said...

ya kerhech ta3alagt
ifffffffffffff
ana lazem ma afech your blog ella kel 6 month 3ashan elgesass tkoon mawjooda kamla

wody asebech!!!!
iffffffff
mataraygt o ebredat 7aleeebty o facha 7aljy agra o a5rat ha malch she`3el o yatba3



aaaaaaaaaaaaaaaaaaaaaaaaaaaaaaaaaaaaaa

ARTFUL said...

ودي اقول هذا انا

بس اول شي ما اروح القهوه وآخذ معاي لاب توب

وولا مره رحت كافيه ريبابليك

ولا مكتبي بنفس العمارة

ولا ادخن

وكل هذا مافيه مشكله

المشكلة العويصة ان ما عندي تي شيرت بولو لونها كحلي

;p

غصب الولد معجب فيني وان انا الفت انتباهه
!!!!

والله فقارة الصبيان كله ملزقينها فيهم
!!!

نفس ذاك اليوم بنات قاعدين جبالنا اول ما قعدنا وقعدت وحده تستهبل تخلي رفيجتها اتصورها واهي تسوي حركات بويهها

وتالي قعدت تكاسر رفيجي لما رفيجي شك برجولته

;p

Kwaitiyya said...

لوووووووويررررررررررررررررر !!!!!!!

قصه حلوة بس فيها شي مو حلو


(( يتبــــع ))

يا كرهــــا
ماحبها هذي يتبع انا ماحبها

كملي يالله اليوم نزلي الجزء الثاني وعقيه بربع ساعة الثالث انزين ؟؟
من صجي ترى بسبج بالبوست الياي إذا شفت (يتبع) وقد اعذر من انذر

مرق: said...

akeed hatha anaaaa f6aim ;)

بنت شرق said...

وتعطلت لغه الكلام وخاطبت
عيني في لغه الهوى عيناك
موفقين ... بس لا تطولين علينا بالتفاصيل ....

Unknown said...

نايس

حددددي اندمجت لووووول

يالله متى الجزء الثاني؟
:p

U-Turn said...

شقول الي بقلبي الله يهداج
قلبي قام يعورني

مشتطه وحالتي حاله
وأصارخ وانا اقرا عشان اندمج

وآخرتها يتبع @@

لا طولينها عاد @@

يالله كمليها !!

bokeh of magic * said...

تصدقين عشت مع القصه صدقت نفسي عبالي انا نوره :P
يالله ناطريينج =)

monshg | مُنْشَق said...

علقتينا كالعاااااده

:)

Fskra said...

yal maleqaaa kmlaaaaaaaaaaaaaaaay el q9aaa ;p

shawagteeeni ;p

abe a7b :x

maha said...

لوير

صبحج الله بالخير


ماصارت


متى بالله قريحتج تفيض وينزل الجزء الثاني


على فكره مصختيها

كل يوم وانا اتحرى هالبوست


والله



اوكي ماعندج نظام ام بي سي بلس؟؟

lawyer said...

ربعييييييييي

شلووووووووونكم


ابييييييييييه رفيجاتي و ربعي كلكم فشلتووووووووووووني


لساااااااانكم اشطووووووله


كل من يصرخ و يسسسسسسب




ياربي ياربي ياحبيبي كل البلوقاااااات احوس فيها اشوووووف ربعهم ذراااابه


كيوووووت و لافلي و بربسسسسسس



انا ربعي يتمشوووووووووووون في عجرااااااااااات



كلا شابييييين ضووووووو




هاهاهاهاهاهاهاهاها


:**********





انشاء الله اليووووووووم المغرب ينزل الجزء الثااااااااني









للتشويييييييق


سؤاااااال ؟؟




انا مخلصتها وكاتبه النهايه بس بعرف شنووووووووووو رايكم او ودكم ؟؟ نهااااااااايه سعيده او وشوو؟؟





غلما باني ماراح اغير نهايتي بس بلاغه شف بعرف ؟؟







لوووووووووووووووفج


احبكم


:*

chandal/danchal!! said...

اليوم عيد ميلادي

خلي النهاية سعيدة دام النفس عليج طيبة

:)

~ هند ~ said...

ننطر المغرب :))

>أرشح نهاية سعيده :)

المقوع الشرقي said...

لوير
يا لوير ترى مافينى شدت نطرت شى
دزينى واطيح
:)
صار المغرب
عن التنهنه
لو سمحتى

النهايه
عشان عيد ميلاد جنجن
وبخاطرها سعيده
بس طلعى الموضوع حلم
والحلقه اليايه
عطينا الصجيه
:))

U-Turn said...

وي وي وي @@

مشاء الله علييج
وعود أنجلييز ;p

ويينها @@
صار المغرب وبليل بعد
بصير الفير وللحين ما نزلتيها @@



عن نفسي ابي النهايه سعيده @@
خليهم يتزوجون
مانبي فلم هندي اعجبوا في بعض وآخر شي كل واحد بطريجه @@


يالله عاد برد الساعه 12
وإذا ما لقيتها
خصم على قولت كويت @@
الله يردها لنا

omar said...

اشكثر نطرنا دشيت البلوق اكثر من عشر مرات انطر البوست والخميس عندى امتحان
وما درست طنشتينا يا اللوير

bhr.qadsaweya said...

آآآآآآه و يــــــا آآآه

بليييييز لا اطولين بالبوست الياي

يعطيج العافية

نون النساء said...

اذا بعد النهاية السعيده نجرة وهواش ولوعة جبد

من الحين نقولج لا اتخلينها سعيدة


X_x

lawyer said...

شكرا لك اخي برست

لكني لا اقبل اخذ اي كوبي او نسخه من مدونتي ووضعها في اي منتدى و لا اقبل نسخ جزء منها


شكرا لك و اتمنى احترام رغبتي في كتاباتي الخاصه