Tuesday, June 09, 2009

...الجزء الثاني ...حيرتني نظرة العين الفتون ..شاغلتني بالتوعد و الوعد


نوره : ابيه من صجه يقولج مو شغلج !!
لميا: ايي خرا فيه يستهبل .. !!
اطلع موبايلي من الجنطه ادق على صالح
انا بكل هدوء : هاي صالح اشلونك؟؟
عسى مو مشغول؟
صالح : هلا هلا امرااي؟
انا : مشغول ؟
صالح : اي شوي .. ليش بغيتاي شي؟
انا : يصير اذا طلعت تكلمني ابيك في سالفه ؟
صالح : انشاء الله اخلص و اكلمج ..
انا : مشكور صالح .. باي
هو: العفو ولاو .. حياج..
اوصل منيه بيتهم وبعدين لميا


وعند باب بيت لميا ..


يرن تلفوني .. صالح

انا : يلا بسرعه بسرعه نزلاي صالح دق
تركض لميا تنزل .. وارد انا على صالح

انا : هاااااااي
صالح : هلا فيج اشلونج
انا : زينه انت شخبارك..
صالح : عسى مو مشغوله ؟
انا : لأ بالعكس عادي اصلا توني وصلت لميا و كاني بروح البيت
صالح : اها اشوه زين ... امراي شبغيتيني فيه؟
انا : اي صالح يصير اسألك سؤال بس ما تزعل ؟
صالح : اذا ما يزعل ماراح ازعل و اذا يزعل بسوي نفسي ما سمعت..
انا : انا داقه اسألك بخصوص الي كان وياكم في القهوه ..
صالح : اي سألتني اللومي!
انا : لووووووومي !!
صالح : اذا لاعت جبدي من حركاتها و صارت غبيه اسميها لومي
المهم اشفيه الي بالكافيه ليش تسألين .؟
انا : مممممممم اقول الصج والا الف و ادور؟
صالح : طبعا الصج!
انا : شوف بصراحه ..بصراحه انا صارلي فتره كلا اروح هالكافيه
وكلا اشوفه و يكون قبالي و جذي و هذا ..
صالح : شنو جذي و هذا فهميني ما افهم !!
انا : صالح .. افهمني .. يعني اهو مبين خوش واحد و شكلي يايزتله !
صالح يموووووت من الضحك .. ويرد : اشدراج انج يايزتله ..
انا : اوووووووووووه صالح بس عاد .. الولد عاجبني لألأ مو عاجبني
مممممممممم بس بعرف منو؟؟ قولي شسمه؟؟
صالح : وانزين و اذا عرفتاي شسمه اشبتسوين ؟
انا : ماراح اسوي بس بعرف و بس.. يعني اشبسوي؟
انزين قولي .. اشرايك فيه اهو زين ؟؟
صالح : اييه اهني اقدر اجاوبج و افهج بعد ..شوفاي الولد خوش واحد
هادي .. ماعنده خرابيط
انا : عنده بنات .. اقصد عنده رفيجه او وحده يحبها؟
صالح : و انا اشدراني !!
انا : مدري يعني لما يقعد وياكم مااتحس انه عنده وحده ..تدق عليه وحده؟
صالح : كا انا وياهم و دقيتاي انتي علي و حاجيتج !؟ هل معناها عندي وحده ...عموما احنا مانسولف بالخصوصيات ولا اهو الي علاقتي فيه لها شغل بالحجي الفاضي هذا مالكم ... احنا مو بنات نسولف !
اسكت .. افكر
صالح : انتي خاطرج في الادمي ؟
انا : الاهم اهو خاطره فيني !؟؟ بس اهو اشدراه اصلا ..
صالح : ممممم هذي حلها سهل .. ادق عليه الحين اقوله في وحده كانت بالقهوه اشرايك فيها تبيها ؟ اعطيك رقمها
انا : اصرخ من قمه راسي .. صالح من صججك مينون !!
صالح : هاهاهاهاهاها اتغشمر وياج بس بطفرج..
شوفاي .. خليها علي و انا اظبطج بس من غير ما يحس اهو.. و انتي هاليومين لا تروحين الكافيه كلش .. انزين ..؟؟
انا : شنو بتسوي ؟
صالح : انتي ماعليج انا اشوف الموضوع و عقب اقولج .. بس لا تروحين الكافيه انزين ؟؟
انا : انشاء الله خلاص ما راح اروح ..وانطرك تعطيني خبر..
صالح : بس لا اتيبين طاري حق ليما كلش ولا تقولين لها شي .. ولا تقولين لها اني قلت لج بدبرها و جذي ..
انا : اوكيه شووور خلاص ما راح اييب طاري و اهي اكيد ماراح تسـأل ..

اسكر الخط من صالح و ادق بسرعه على لميا ..

اعطيها تفاصيل المكالمه و اقولها ان كلش ما اتييب طاري حق اخوها انها تدري و تسوي روحها .. ماتدري و ان اذا رد البيت تزفه على المسج و شكو يقول مو شغلج .. و تقوله ان يشبه وحده بالكليه فبعرف اذا اخوها او لألأ.....مجرد حركات تمويه يسونها الاخوان ..

ادخل البيت .. اغسل و ابدل و اقط راسي على المخده
وافكر فيه .. اسحب ماي دايري و اكتب..

" شفته اليوم و كان شكله وايد حلو.. مرتب كل شي فيه مرتب ..
لبسه .. شكله .. ملامحه .. وطلب براون كلاب ساندريش يعني معناته .. يحب الاشياء الهيلثي .. انا بعد احب الاشياء الهيلثي مثله.. عيونه اليوم احلى من هذيج المره ..ونظراته تعور القلب.. وكان يطالعني بعد .. يارب هالانسان عاجبني .. الله يخليك ياربي انشاء الله ما تصير عنده بحياته وحده و يطلع ما يحب .. انزين حتى لو كان يحب على الاقل بريك اب من زمان و اهو الحين في فتره مقبل على انه يتعرف و يطلع يارب زين .. انشاء الله يكون ريال طيب و اخلاقه وايد زينه
انا متأكده ان اخلاقه زينه .. شكله جذي ...(( جاد اي ترست يو اند ام شور يو ويل هيلب مي ... كل الي ابيه نهايه سعيده))"

اسكر ماي دايرني
اسحب موبايلي اضبط الالارم و انام..

بعد يومين يتصل صالح ..

يبلغني ان بعد ساعه لازم اكون عندهم في البيت ضروري
بس ما ادش اقعد بالسياره و انطره لين يدق علي ..
ابدل بسرعه بسرعه ..
واروح..

اتصل على صالح
صالح : هلا نوره وينج؟
انا : كاني بالطريج ..
صالح : شوفاي اذا وصلتاي بيتنا .. قعداي بالسياره لين تشوفين
سياره مشاري وصلت بعدها طلعاي و سواي نفسج تاخذين اغراض و جذي و دشاي بيتنا ..حزتها بطلع لا تكلميني و لا راح اسلم عليج و لا احاجيج.. وانتي لا تتلفتين ولا تطالعين ولا جنج حسيتاي ان اكو سياره.. اوكيه
انا : اسمه مشاري ..
صالح: اي مشاري .. يالله وينج بسرعه .. كاهو يدق علي على الخط الثاني ..
انا : بدش اللفه
صالح : اوكيه يلا باي..
انا : باي..


اصفط سيارتي .. اعدل شعري.. اسحب جنطتي .. احس في سياره يت
انطر شوي .. انزل عقب ..اسكر بابي و اروح للباب الي على الجمب الثاني .. اسوي نفسي عدلت شي .. اسكر الباب و امشي .. بدخل البيت ..
صوب الباب يطلع صالح و لا اسلم عليه و لا اكلمه .. و يروح
ادش حوشهم و اهو يحرك .. وعقبها اتوهق ! هاو انا ليش يايتهم اصلا !!
يابني الحوش و قعدت ..!!

اتصل في لميا ماترد !
اكسر عليها التلفون ماترد !!
ماني داشه و محد يدري انيي بيي..!
ادز مسج حق لميا " لميا انا متوهقه انا في حوشكم .. و انتي ماتردين
سيارت امج و ابوج موجوده .. ماني داشه عييب فشله"
ارد سيارتي .. انطر شوي محد يرد
..

احرك و امشي !!
ادز مسج حق صالح
" نفذت الخطه صح بس قولي ليش سويت هالحركه ؟؟"
يرد علي

" اولا ابيه يحطج في باله صح اذا شافج في قهوه الف سؤال و سؤال في باله و يمكن الف نيه تكون في باله .. لكن اذا عرف انتي من اهلي بتغير افكاره و احتمالاته فهمتي؟"
ارد عليه
"لأ "
صالح
" احسن و انا طالع مالي خلق افهمج اذا رديت اقولج "

تدق علي لميا
انا : الو
هي : سوري سوري كنت اخذ شاور ماشفته
انا : لا عادي بس كنت في بيتكم و استحيت ادش و انتي ماتدرين
هي : ايييييي شي هاو عادي طقاي الباب ودشاي داري منتي غريبه اشفييييييج
انا : مدري فجاه وقف مخي و تعسرت ورديت البيت ..
اسمه مشاري .. قالي صالح ان اسمه مشاري و سوا حركه خلاه يشوفني في بيتكم ..
لميا : اشلون شاااافج ؟؟ شفتيه !.؟ وين
انا : اي في بيتكم اخوج سوا خطه ان لما اهو يمر ياخذه يشوفني
لميا : ويييييه مالت على هالاخو ! يوم ان يعرف يخطط علامه ما خطط لي صاير سبيل يمشي و يظبط الناس
انا : هاهاهاهاهاها لا تخافين انا اظبج وبشوف اخرتها ويا اخوج ..
لميا : لا تخافين اذا السالفه دش فيها صالح ما يمر شهر الا الريال في بيتكم
انا: لا عاد مو شهر .. مابي بسرعه انا بعرفه .. واصلا ابي احب توني صغيره بستانس ..
لميا : مالت عليج اخذيه و بعدين استانساي براحتج العمر كله
انا : هاهاها الي يسمعنا نخطط يقول الريال حبني !
لميا : كيفنا خلينا نستانس انتحلم اشوارانا..هاهاهاها بس اقول يلا خلصاو تعرفاو على بعض لاعت جبدي مسلسل تركي مو تعارف..!
انا: الله كريم صبراي صبراي .. انا قلبي حاس ان خير انشاء الله

اسكر التلفون من لميا و انطر اتصال صالح
ولا يتصل .. وما اقدر احن عليه .. لان يدري اني مهتمه
..

وبعد يوم ابلش احن على لميا ان صالح ما دق .. تصدمني ان صالح اصلا في البحرين عنده امتحان و بيرجع عقب باجر !!

اقرر اني اروح الكافيه يمكن على الاقل اشوفه...
اروح و اخذ قهوتي و اشربها
انطر شوي ما ياه
اقلب المجلات .. اطالع الساعه
هم ماكو فايده
امل و اقوم ..وانا متنرفزه و معصبه..
ادق علي منيه وانا حدي معصبه..

انا : ابيه سويت شي حدا سخيف انا ليش اصلا صايره سخيفه !!
حدي حدي تنرفزت من نفسي و عصبت على عمري ! تخيلاي رحت الكافيه سطرت هناك ساعتين انطر مشاري اييي او يمكن يمر او يمكن اشوفه و لاشفته ولا مر ولا شي .. عرفتاي الي وانا قاعده اسأل نفسي سؤال انزين واذا مر شنو راح يصير !.؟ واشلون راح اكلمه و ادري في نفسي ماراح اكلمه بس ابي اشوفه ! ورغبتي في اني اشوفه مفشلتني جدام نفسي... تعرفين لما تسوين شي كلش مو مقتنعه فيه بس تسوينه تقولين يالله بسويه عشان نفسي خنسكت نفسي !! احس بداخلي حرب جزء مني يبيني اتهور و اجاري اشياء ما اقدر عليها و جزء مني طول اليوم ينقدني و يخليني مفتشله من نفسي .......و كاني الحين بروح اركب السياره و حدي بموت .. كرهت نفسي خلاص....ولا راح افكر في مشاري ولا راح اييبلكم طارييه ولا ابي اشوفه خلاص
..

وانا اتكلم بالتلفون واطلع سويجي من الجنطه واحوس فيها .. يطيح موبايلي...وانزل اخذه ..ارفع راسي و الا مشاري واقف على راسي

يبتسم ....

اشهق من الخرعه !!

هو: شفتج داشه الكافيه ..قلت انطرج هني عند سيارتج .. عشان اذا ييتاي اعرف اكلمج..انتي تنطريني داخل و انا انطرج بره ..

اتنح
انصعق من الي صار و الي قاله

بسرعه اروح اركب سيارتي ... و اتحلطم باعلى صوتي

لألألأ لألألألأ ماكنت ابيها جذي لألأ لألأ ماكنت ابيك تدري .. موجذي مو جذي ..مابيها تكون البدايه جذي..

اسكر الباب بسرعه
بحطه على
R
من التدوده احطه على
D
ادعم
و ارجع قري ..
بسرعه اطلع من الباركينج...

و اهو بسيارته وراي


يتبع

43 comments:

lawyer said...

سووووووووووري نزلته بسرعه بسرعه من غير الواان



لحظه بلونه سوااااااااو ريفرش توبه اوعدكم بساااااااعه معينه لاني طلعت و نسيت اصلا

omar said...

القصه حلو بدون الوان حتى مشكووره بس هم علقتينا ويشرفنى انى اكون اول من قراها ودايما الريال يكون بهاجرأه

~ هند ~ said...

ناااااااااايس..
:)))

قريتها بالأسود وهم حلوه .. مو لازم ألوان ..

>> ومسامحينج ع التأخير ،، بس لا تعيدينها
:Pp~

pure-silk said...

wawمبدعه كما انت دائما

بالانتظار على نار

pure-silk said...

wawمبدعه كما انت دائما

بالانتظار على نار

pure-silk said...

waw القصه مشوقه
يالله ناطرين التكمله

Love Moments said...

هالبارت "مشوق" لوول

لما صار الاكشن وقفتي !!!

القصه مشالله حلووووه

=)

ARTFUL said...

لا لا مابي جذيه مابي مابي


الحريم كل شي تبوه على المشتها

;p

طول المه تبيه ولما صارت ما عجبها غير سالفه

بس خوش قصه يا عيني عليييج يا مبدعه

بالانتظاااااااااار

:)

mimi said...

قصة صجية ؟

maha said...

استغفرالله

وبعدين وياج


شهالقريحه اللي بالقطاره



لوير شكلها بتصير بينا طاخ وطيخ

mowa6en said...

مثل اندماجي مع روايات تركي الحمد

Haya said...

لوووووير حرام عليج ترى امتحانات و حالتنا حاله بليييز نبيي بارت ثاني اليوم بعد والله تكسبين فينا أجرر

Unknown said...

Laaaaaaaaaaaaaaa3
Laaaish yatbaaaa3 ??? !!!!!!!

el joz2 hatha a7la min elli gabla ba3ad..feh action wayid w 3isht el qi9a:P

la ywaagef lawyar:p

maha said...

بس صج شي هالصالح

خوش واحد

المقوع الشرقي said...

لنهايه شكلها سعيده
والأشبين
صالح
--
الثالث
الله لا يهينج
لا تنشفين ريجنا
بالانتظار:)

مرق: said...

ابداع ابداع كما تعودنا منك يا لوير

بنت الشاميه said...

فطيييييييييم
وبعدين وياج...؟؟؟

الله يخليج هذى اي قهوة..؟؟؟؟
(((:

الزين said...

واي وااااي

بطقج


ليش يتبع


بيني وبينج سالفه


:)


كلميني

haifa said...

فطيييييم

وبعدين معاج

بس خوش واحد هالصالح

ونورة موقفها الاخيرررررر فضيييييحة

chandal/danchal!! said...

loooooooooooooooool


خوش مكان حطيتي يتبع

عسى ما تطوف تقاطع الدروازة مع التدوده ويدعمها باص الجليب!


حطي يتبع على كيف كيفج

بس كل يوم حطي جزء اذا تكرمتي

رزنامــــــة said...

القصة حلوة وواقعية
واقص ايدي اذا كانت خيالية لوووول
بانتظار البقية ... ماادري ليش حسيت نفسي داخل احداث القصة
وكأني احد ابطالها بعد

U know WHO said...

لووولوووووو
هاااااااااااي

ولهانه عليج.. شلـ أخبار ؟

ترى حدي حدي حدي مشغوووولة ومكروووفة كرااااف


النهاية النهاية النهاية
لو سمحتي بدوووت ما تعلقينا

RoOra said...

waii tshweeG :D
yalh bsr3a kamleehaa;p Hada alfinalz w mjabla bo e3yOn ;$

U know WHO said...

لويرا؟
وين النهاية

رحت اجتماع من ثلاث ساعات وتوني رادة توقعت الاقي شي

يلا يلا يلا
اشصاااااااار
؛)

Sn3a said...

بصراحه
الجزء الاول بريء
الثانيه لا ومو واقعي

فشله ادق على اخو رفيجتي اقوله عن ريال
واهو ماراح يكون ريال لو اصلا قالي عن رفيجه
انا شووي اولد فاشن فعشان جذيه حبيت الجزء الاول اكثر

واصلا اهو كرهته لما قال انتي تنطريني داخل وانا بره احس حتى لو يدري خليسكت فشششله

bhr.qadsaweya said...

لوير تسلم اييدج حبيبتي
يا ليته كان اطول
صج صج صج تسلم اناملج الي تكتب

يعطيج العافية

هوا said...

واااااااااااااي لوووووووووير
انا استحيت من الموقف
شلون اهي؟ مسكينه
واهو صج جريء

ياالله... الله يخيلك لا تبطين علينا
;)

Anonymous said...

!!!!الجزء الثالث ما عليج أمر

مليت و أنا انطر مليت

:(

I7na 3shagnaha said...

تومي

واللي يسلمج نبيه مسلسل تركي ما يخلص

من زمان ما قرينا شيء يونس جذي


بس ليش هالتخسبق


الحين على هاللبحة هدته و مشت
!!




يالله نكست بلييييز

U-Turn said...

واااااي

@@ حرام مسكينه تدودهت


يالله يالله ما نبي يتبع

سطريها كلها ;P

عــــــابره said...

اهليييييييييين لوير

ترا صايره فتره اتابعج على طريق الموبايل واقرى لج خصوصا قبل ماانام

واستانس على سواليفج ولايفوتج ساعات اسولف مع صديقاتي عليج

والقصه خطييييييييييييييره روعه

الله يهديج مسويه كانج مسلسل مدبلج وين لقطه الي تعور القلب توقفين

قولي انها مشيت بسياره لاتقولين انه وراه تعورين قلبي تراااااااا

شكلي بموت عنصر التشويق عندج

بس شيييييييييييييييييييييييييقه

ومبارك المنزل اليديد من زمان عن موقعج على الكمبيوتر كله من الموبايل

وناسه والله افتح ساعات صفحتج واتصفح واقرى حتى الاشياء القديمه وناسه

عشتي لنا رمزا وذخرا للشباب

نشوفج على خير

صبا said...

يا زينج

ومن غير الوااان

ابيض واسود

:**



خوش موقف
وانا كل هالمده على بالي انتي
استانست وقلت اشوه الحظ قام يبتسم لها

كملي
لا تعلقينا
ورجااااااااااااءا

نبي النهايه سعيده
شبعنا مأسي

بانتظار البقيه

:******

Mariam B.D_Q8 said...

تسلمين على هالقصة الروعة
او ناطرين التكملة

U know WHO said...

لووولووو
يسعد لي هالصباح

بس ملقتيها عاد

لايكون بتخلينا معلقين طول الويك اند واحنا ننطر النتيجة
والله لو امتحان ما اهتميت له جذي

انا عشان جذي ماتابع مسلسلات
لاتخليني أغط وشوف الفلم كامل

؛)

يلااااااااااااااااااااااااااااا
يلااااااااااااااااااااااااااااا
يا لوووولوووو

النهاية السعيدة
عرس وطيران وسامري
:)

Kwaitiyya said...

يا شين هال يتبع قطييييعه
يالله شصااار عقب ما تدودهت هذي

بعدين مادري احس علاقه صالح برفيجة اخته خياليه .. يعني مو ليه هالدرجه عاد طايحة الميانه
مادري هذا رأيي ويمكن اكو ناس عادي "فرييي" .. يمكن انا من مجتمع شوي قمته لول

المهم.. يالله ترى ما صارت .. بنعرف شصار عقب ما لحقها ودعمت ومشت... أكيد ابوها بيزفها زفه محترمه ينسيها مشاري وطوايفه لووول

ARTFUL said...

وهذا الوعد الا ما وعدتج فيه

;p

قصيدة الرقي

-----------------

جالس لوحدة ياكل الرّقي
قمت اتفكر والروح ترقي
صابني وش واحتاج من يرقي
على قلبي اللي يرتجي قربه
--
يقشّر فلوحٍ ويتفل حبّه
ماهميته ولا خاف من ربّه
لا ضمني ولا أستقي من عذبه
يمين شمال وأدش أنا بصبّه
--
يضحك وماسك بيده فلحٍ حمر
مدري هو فلحٍ والا خده عفر
قالوا بالأول من صبر هو ظفر
نال مطلوبه وحصّل لو حبّه
--
شاحتني بقشرٍ والعنة أسلافي
تبغي التغلي وتقولي يا جافي
طاح الحطب وأصبح الكل صافي
عدل صنيعه يا حلوه بطيبه


وسلامتج وتعيشين

;D

الزين said...

فطووومه

ترى انا حاطة لي كرسي وقاعده انطر عند باب مدونتج

:$

يالله ياماما والله عيزت وانا انطر

U know WHO said...

لوييييلو
هاي

ترى مصختيها عاد
جنها مذلة
؛)

أقول لايكون اخرتها صلوح يطلع المعجب الخفي
؛)

pure-silk said...

ToooMaaa
نحن بالانتظار ولكن الى متى ؟؟؟؟؟؟؟؟؟؟
جاوبيني وانا يور
GrandMother

~ هند ~ said...

على تأخيرج ونطرتنا للجزء..

نبي الجزء الثالث
ومعاه
والرابع مجانا

:Pp

ولد الديرة said...

مرة وحدة بحياتي

ابي البطل يموت

:p

I7na 3shagnaha said...

انا اختصرت الطريج و رحت بسطت بكوفي رببلك جود اشوف الاحداث بعيني

enter-q8 said...

حسافه محمد هايف طلع من الظواهر السلبية و الا بلغته عن مكان القهوة