Friday, June 12, 2009

الجزء الثالث ...حيرتني نظره العين الفتون ** شاغلتني بالتوعد و الوعد


اروح بسرعه اركب سيارتي و اطلع وراها
احاول اعرف اهي وين راحت فيه
بس ما قدرت..
اكمل سيدا لين اشاره الخط السريع
ادري مستحيل راح الحق عليها ..
بس هم امشي ..
تمسكني الاشاره
اوقف
اخذ باكيتي
اولع زقاره
وانفخ بحر مافيني ..
ادق تلفون على مريم
انا : الو هلا وينج؟
مريم: بالمقر
انا : شفتيلي اسم البنت الي قلت لج عنها
مريم : اي بنت ..
انا : نوره ال....
مريم : لا نسيت بس صبر كا الكشوفات جدامي ..
السره صح؟؟
انا : اي السره انا الي اعرفه بيتهم في السره فاكيد مسجله هناك
مريم : نوره احمد ال... و في نوره عبدالله أل....
بس صبر صبر نوره عبدالله عمرها في الستين
هذي عمرها 23 اهي ؟
انا : انا اشدراني ترا انا مو ياج .. بس نقليني العنوان بسرعه ..
مريم: السره .. ق 1 شارع 2 جاده 3 منزل 4
انا : مشكوره .. لا تيبين طاري حق احد و خصوصا امي و لا اتأخرون ردو البيت بسرعه..
مريم : انشاء الله

اسكره التلفون من مريم ادق على خالد

انا : خالد اشلونك ..
خالد : اشفيك ؟
انا : مافيني شي .. بس قولي وينك
خالد : بالبيت
انا : يمك الاهل؟
خالد : لأ
انا: باجر دوامك الساعه جم؟
خالد : من الصبح
انا : خالد باجر الساعه 7 ونص الصبح ابي مسج منك بالاسم الي بدزه لك مسج الحين تطلعلي كل معلوماتها الي عندكم بالتأمينات
كل شي .. وين تشتغل مكانها و كل شي ..حتى نسبتها في الجامعه اي شي عندكم بخصوصها ابي اعرفها ..
بووليد تكفا الساعه 7 ونص المسج واصلني مو تروح و تنساني..
خالد : اعتمد خلاص بس عطني الاسم الرباعي اذا قدرت...

اسكره من خالد ..و ادخل السره

ابرمج عنوانهم و اروح بيتها..
قبل لا ادخل الفريج اسكر ليتات السياره..
اقصر على الاف ام..
واخفف
سيارتها كاهي بالمظلات..
اتطمن انه مافيها شي و احرك
اطلع من قطعتهم
امر ماكدونالدز
اخذ لي عشا و ارد البيت ..

********

ادخل بيتنا بسرعه بسرعه و انا مخترعه
ادش داري
اطل من الدريشه اذا لاحقني او لأ
امسك موبايلي ادق على لميا
مدري شقول بس اهستر عليها ..
ارد اكلم منيه اقولها الي صار من يوم ماطاح الموبايل مني
وانه كان وراي طول الوقت و سمع كل شي
واني مدري اشلون اعتفست
و ركبت سيارتي و دعمت
وطلعت و رديت البيت بسرعه..
اسكره منهم واحذف الموبايل
و ادش اسبح يمكن اطخ شوي
اطلع من الشاور
ألاقي 6 ميسد كول من صالح
اخترع
امسك الموبايل واقعد على طرف فراشي
افكر
ادق عليه
اقوله
ارد او شسوي..
اقوم ابدل و احط كريماتي
و اسكر الليتات و امسك ماي دايري..


" انا افشل انسانه في الدنيا ..سويت شي محد يسويه
انا اصلا ما اعرف اسوي شي حق نفسي .. وانا سبب خراب كل شي حلو ممكن ايني ..ماراح الوم نفسي بعد اليوم اذا ماعندي شي ابيه ..لان انا سبب رئيسي في حرمان ذاتي بذاتي..
تصرفاتي كلها غلط من اولها لي اخرها.. خوفي و ترددي و رده افعالي.. انا انسانه لايمكن اواجه ..اقدر اقول حق الفراش مشكور انت احسن انسان بالدنيا تسوي قهوه و لكن ما عندي القدره حتى ان اوقف اكلم انسان طبيعي يبيني.. انا التناقض بعينه و علمه...
اذا خطأت في حق نفسي بعد اليوم راح ازعل من ذاتي العمر كله..دايما انطر الفرصه اتيني و يوم يتنا خسبقت الدنيا..
اسفه مشاري .. ماتمنيت اسوي فيك جذي ولا ادري اشلون سويت هالشي اصلا .. انا جد اسفه..يارب بجهل وخوف مني حسست الانسان اني ما بيه .. و سويت شي يمكن يخليه يروح مني لكن يارب انت مثل ما قدرت اتييبه يكلمني .. ولان كل شي بقدرتك يارب ومنك فاتمنى ان هذا الانسان ما ينقطع وصلي معه..قبل لا انام ياربي .. بجدد عهدي معاك و بقولك اني وكلتك امري
.."

اسكر الدايري
اخذ موبايلي
ادز مسج حق صالح
" انا سويت مصيبه .. بس ما اقدر حتى اني اشرحها لك الحين اذا كلمتك راح اصيح لي الصبح.. بس صدقني اذا قمت الصبح وانا احسن انت اول انسان راح اكلمك .. تصبح على خير .. صالح مشكور على كل شي بس ترا انا خربت كل شي "
وانام ..

**********

افتح عيني الساعه 8 و ربع
اشوف موبايلي ..
ماياني مسج من خالد
ادق عليه
و مايرد
اقوم اغسل
واشرب قهوتي ..
صوت مسج افتحه
"نوره احمد ال.... اختصاصي ترجمه في
كونا..متخرجه من كليه الاعلام دفعه 2002
معاشها 860 واذا تبي اي شي حاضر "
اطالع المسج استغرب
شبي في معاشها جم ! شالمعلومه !
ابدل و اسوي اتصالاتي مع ربعي الي في كونا
واحاول ادبر طريقه اروح اشوفها في دوامها و يواعدني واحد من الربع ان يضبطني باجر اروح اشوفها حزه صلاه الظهر ..على ما اهو يسأل و يشوف اهي وين بالظبط و اي قسم واذا تكون في مكتبها او لأ و اذا قدرنا ندخل قسمها او ما يصير ..
ولكن الاهم من هذا ان يحاول يدربلي رقمها مكتبها الخاص او الداخلي .. و ايميلها ..

*********

اقوم الصبح متأخره كالعاده
امر ستار بكس جمعيه الشاميه
اخذ قهوتي ..
بلاك كوفي
سكيمد ميلك اون سايد..
و اروح الدوام ..
النص الساعه الاولى في الدوام سلام و يمعه بالمكتب الي يمي مع القهوه
اروح مكتبي
اتصل على صالح ..
مايرد
كنت ادري انه ماراح يرد في هالوقت بس حبيت يعرف انه اول شي سويته في يومي هو الاتصال عليه ..
ورد اتصل علي بعد ساعه ..
انا : هاي صالح اشلونك
صالح :انتي الي بشراي اشلونج اشفيج؟
انا تغورق عيوني .. تخنقني العبره اقصر على صوتي و بصوت مخنوق اقوله كل الي صار امس
صالح: تطمناي ماكو الا كل خير صدقيني الريال اذا حط في باله وحده هالسوالف ما تهمه بس انتي خلج عادي ولا تحتاتين
انا بدق عليه و بشوف اذا اليوم نطلع او لأ اذا يابلي طاري بكلمه اذا مايابلي الطاري انا ماراح اقدر افاتحهه . بس راح اطمنج وانتي لا تكردين روحج..
دايما صالح اهو مصدر راحه لنا
مو بس انا انا و كل اهله دائما شايل حمل راحتنا كلنا ولا يرضا اي شي يكدرنا او يزعلنا .. و دائما اهو فخور بانه لولا وجوده معي في مراحل الدراسه الاولى لتكسرت انا من الصبيان الي معانا ..


و يمر اليوم بدون اي خبر عن مشاري..
وبدون اي احداث ..

*******

انا ادري ان الحين بروح اشوف البنت في دوامها
و انا مو اول مره اشوفها
بس ليش هالمره مرتبك مدري
جهزت الظرف الي باخذه معاي
على الرغم من ان مكانهم مافيه مراجعين بس بسوي نفسي مراجع او مدري اشلون بتكون الدخله
اصوت على الخدم "فـــــــــــــــــحم بـخـــــــــور"
ادش اسبح و ابدل و اتبخر
اتردد شماغ ابيض والا غتره !
شماغ
غتره ..
غتره احسن
انادي جينا تبخر الدشداشه
و الغتره و اتردد
نعال
والا جوتي ..
ممم
جوتي
انا : طلعيلي الدلاق الاسود بسرعه
لألأ
الادعم
بيج بيج
والا اقولج الابيض احسن
وارد اقرر البس البني ..
للمره الثانيه اتبخر كلي
و اتعطر
البس نظاراتي
بوكي
سويجي
موبايلي
و باكيتي ..
افتحه اتأكد جم زقاره فيه
احذفه و اخذ باكيت يديد..

وادق على صاحبي اقوله اني كاني يايك بالدرب..

و في اخر لحظه اقرر ان يوديني السايق لان ماعندي وقت ادور باركينج و لا ابي اظيع الوقت
انزل كونا
سكيورتي
و اجراءات امنيه
رفيجي ناطرني عند النافوره ..
و نروح نشوفها
في البدايه ما انتبهت يوم شافتني ..

بس شكلها شافتني ..او يمكن ماعرفتني لاني مغتر ..

وانا طالع من صوب الممر

سويتلها نفس الحركه الي سوتها لي اول مره في كافيه ريبابلك
التفت عليها .. وابتسمت
..
وابتسمت اهي و نزلت راسها ..


و اتشكر من صاحبي.. و يعطيني
رقمها الداخلي
و ايميلها ..

اطلع واخلي السايق يوصلني المكتب ..
اول ما ادخل مكتبي
افتح الابتوب
اسويلها ادد
و اكلمها...

الرجاء تكبير الصوره لمشاهده الحوار



اسكر الابتوب و انا مرتاح
وعقب اسبوع من السؤال و الاستخاره
اتوكل على الله..وافاتح الوالده و اعطيها رقم بيتهم
و اسأل نفسي سؤال
هو انا استاهلك؟
وان النهار اللي في خدودك يخلي النسمة عطر
.. وان العذاب اللي في عيونك يعلـّم الناس الشعر
يتبـــــــــــــــــــــــــع

59 comments:

RoOra said...

wallllllllllen 3ala alyOtb3 :@:@:@:@

esTeKaNa said...

فكرة التنقل بين نورا
وخالد
وصالح
فكرة جميله جدا
وفكرة وضع حوارات المسنجر مبتكره ايضا
:))
هذا الجزء جميل فيه ابداع من نوع اخر
.
.
.
انا حبيت صالح
تخيطون لي عليه؟
هههههههههههههه
بعدين في شي
!!
ادري ان الواقع غير مبادئنا وافكارنا
بس السؤال:
الحين البنت اللي بتكاسر ريال؟
وتسعى له
وتسئل عنه
هل راح تكون هذي نهايتها
!!
نفترض ان الريال مرتبط
او كان مو مفكر او مو عاجبته بس عيونه تعودت تطالع
شنو بيكون رده فعلها؟
كسرة خاطرها
ادري انا وايد بعالم ثاني بس احب البنت بعزها ،ولو حست بشي تداريه برقتها من غير لا تعرض مشاعرها للبوح لاخ صديقتها او اي شخص اخر
وولو كان هذا الشخص نصيبها
بيكون نصيبها
ولو لم يكن نصيبها ،لو تسئل عنه الدنيا وتوصل لي بابه
ماهو نصيبها
:)
بشكل عام
القصه جميله بددت ملل الصيف بشكل كبير
شكرا فطومه

chandal/danchal!! said...

جذي خاطرة الرقي تسوي؟

بس خوش خاطرة وخوش جزء يا تم تم

أما تفاصيل ماكدونالدز والمعاش موتتني من الضحك

يقولون اكو ساندويش يديدة اسمها جورميه!! جربتيها؟

Unknown said...

HEYYYaaaaaa :D betzawejooon :P khosh nehayya..
bs laish yatba3 :P ma 5alle9at??

~ هند ~ said...

:)
>> حلوه حركت ال msn


أنطر يتبع :)))

مرق: said...

f6aiiiiiiim aham shai elpicture elli fee msn maltech 9orat elka3baaaaaaaa ......nice storyyyyyy:)

Fouzan said...

يعطيج العافيه .. بس اموت واعرف شعرفج بسوالف الصبيان خصوصا لما قلتي انه بطل الباكيت وشاف جم زقاره فيه! عقبها حذفه وخذا باكيت ايديد!!

Manal said...

بانتظار البقية

U-Turn said...

@@

وي وي يا حسرتنا للحين يتبـــــع

ليش @@
قتلج سطريها كلها كلها @@

نبوق من وقت الدراسه عشان نقراها ;p

يالله عاد بعد جم يوم وراي accounting @@

خلصيها عشان خاطري





ترى عورت قلبي ما ادري ليش ;p


بس القصه صج خيـــــال
تسلم إييدج ;**

I7na 3shagnaha said...

خوش واحد هالمشاري

سريع سريع

اكيد كويتي؟؟

uaeee said...

كالعاده ابداع غير عادي :)
حلو انه خليتي مشاري يحكي..
بس نورة شكلها شوي تستهبل يوم تسأل كيف عرفت ايميلي.. مب جنه صالح في الواسطه؟؟ و بعدين كيف تثق في صالح كل هاي الثقة؟َ!
كنت ابا اعرف اكثر كيف شافها في الدوام تفاصيل اكثر يعني؟ و ليش بس راح عشان يشوفها و ما كلمها؟؟
هممممم يالله الرابع متى؟ :))

المقوع الشرقي said...

فاتو
احلى واقوى جزء
عجبنى التنقل بسلاسه بين الاثنين
ويازت لى بالحيل
شخصيه مشاري
عارف شيبى بالدنيا
جان زين ياخذها
:)

U know WHO said...

لوييلووو
هاي
لاء لاء لاء خطيييييييررررة

حركااااااااات
؛)

بس كافي مذلة الله يخليج
ونبي كل الحلقات مرة وحدة

كلمت يتبع هذي أكرها أكرها أكرها

واااااااااااااااي
تحرييييييييين

;P

Sweet Revenge said...

حلوه القصة للحين
ناطرين الحلقة الاخيرة
اغششج
وتزوج مشاري من نورة وعاشوا في سبات ونبات وخلفوا صبيان وبنات

maha said...

يعطيـــــــــــــــــــــــــج العافية لوير


شكلج تعبتي فهالجزء


بس يبتيها مع الباكجراوند حق نوره الظاهر الاغلبية من البنات جذي

bhr.qadsaweya said...

ana elu0ola noo waaaaaay


mtab3a wa besheeeedaaa

teslam edech
ya36eech el3afya

cosimfree911 said...

wayed

cosimfree911 said...

wayed 7elwaa alge9aa 9ara7aaa ebravo 3alich

oo mashkooraa ;) for ur help

Mu.Sij said...

na6reeeen el takmeeela 7adi endamaaaajt :D

Mariam B.D_Q8 said...

ايوا ايوا
:)
ناطرين التكملة

بنت الشاميه said...

واااي يهبل صالح....الله يكثر من امثال صالح......لوووول
يبرد الجبد
يالله بسرعه خلصيهااااا
القصه جم حلقه..؟؟؟
لازم اليايه الحلقه الاخيره
علشااااانا تكفين فطيييييييييم

رزنامــــــة said...

فعلا التنقل مابين صالح ونورة
ومشاهدة وضع كل واحد فيهم وايد حلوة
بانتظار البقية

Unbreakable Girl said...

يا كره الانتظار


تحمست، و عشت الدور وقلبي قام يقرقع وياهم.... وعاجبتني مفرداتج حيل

بليز عجلي علينا

monshg | مُنْشَق said...

لوووير

المعلومات أبديتد على طووول ولا " سي اي أيه " ما شاء الله بسرررررعه

و مدام السالفه كلها عيله بعيله

من الآخر متى الملجه إن شاء الله



:D

ولد الديرة said...

يعني ما راح يموت البطل؟

Kwaitiyya said...

واااي طالع اليتبع اشكبرها قطيييييييييعه

يتبـــــــــــــــــــــــــع


ترى توني فاتحه البلوق ونزلت تحت بشوف إذا اكو يتبع وإلا شكبرها طالعتلي


اليووم حطي الرابع

Kwaitiyya said...

توني خلصتها
وناسه نبي صالح بعايلتنا
وين اكو صالح كويتي جذي

U know WHO said...

صلوووح ملووح اللي يدل بيته يروح

وصلوح هذا ظحيت بيت العز

اي ليش ما ياخذها
ويضبط مشيري مع اخته
ونخلص
وزواج جماعي مراعاة للشباب وميزانيتهم

؛)

ARTFUL said...

يعطيج العافيه

اكثر شي ضحكني القصة

صورة الحرم بالماسنجر


;D

ماله شغل بالموضوع

اقول ترا عروقنا بالماي بكونا

تبين اطلع لج من بنته

;p

ما قلتيلي شرايج بشعر الرقي؟؟

;p

------------
جندل

انا ما ذقتها بس خابر ان منذ مبطي منزلينها واذا ماني غلطان وقفوها

;p

chandal/danchal!! said...

فطومة ناطرين الجزء الرابع من أصل مئة جزء


:)



ARTFUL

انا صايرة وايد لاق وكل المعلومات توصلني متأخر

ReLaaaX said...

قولولولوليييييييييش

ألف الصلااااااااة والسلااااااااااام عليك يااااااحبيب الله محمااااااااااد

;p


تكفييييييييييييييين ترى تكفى تهز الرجال

نبي النهاية مرضية للجميع :p

mowa6en said...

؟

صبا said...

لوووووير

الجزء الاخير أبيج تحطين

يطاقة الدعوه ..العرس


مليناااا من النهايات التعيسه

والاحباط الي مشلخ الدنيا


فطيم

طلبتج


































زوجيهم
:)

بن جبلة said...

مشاري و نورة

مو راكبين كلش

ماراح تكون النهاية سعيدة

عدل ؟

Miemie said...

Mashallah eslob el qesa wayeed yshaweg!!! tawny a6i7 3ala ur blog -i'm a new blog born ;) - LAZEM t2alfin qesas etha lil7in masaweteha! u have a gift..
Waiting for the yOtba3..
great work :)

الجـــوري..كـــلام الصمــــت said...

الله يسامحج !!

في يتبع!!

اول ماطحت على مدونتج قريت الجزء الثالث بدايته جان اقوم واقرا من اول ماخلصت الا بعد ساعه وشي :$

>>>ماكو ابرد واثلج مني عادي :$


بس الصراحه تحسين انتي شخصيه معاهم !!

حيل ترابط بين الشخصيات افكار يديه وحلوه لها طعم امبيه صج زووغه :)

راح ارز ويهي بكل الاجزااء :D

تسلمين ولاتطولين علينا :(

welcome 2 my blogs
http://jooryah2020.blogspot.com/

Kwaitiyya said...

الله يرحمه برحمته
ويصبر اهله وزوجته
اللهم آميين

Michomeme said...

اني ما اعرف اذا كانت القصة حقيقة او شخصية او من وحي خيالج
لكن ابدعتي في كل الحالات
اعجبتني القصص
في البداية قرأت السطور الاولى من الجزء الثالث بعدها قررت اجرع الى الاجزاء السابقة و اقراها بكل تفاصيلها
حسيت اني كنت معاكم

قصة حب بريئة

Mohamed Anwar said...

شكرا علي المجهود-thank you
http://24all.blogspot.com http://pc4all2all.blogspot.com

Mu.Sij said...

6alabtech kamliha 9arli dayssss aro7 warja3 o ma alga el new part:(

ur blog one of my fav i really loved it

endmaajnaaa ya lawyer kamliha

sologa-bologa said...

تصحيح معلومة:
المواقف في كونا متوفرة خصوصا عقب ما سووا مواقف خلفية حق القنصلية يعني ماكو زحمة
:)
ثانيا
لما راح حق صاحبه اللي بكونا
وتلاقوا عند النافورة
هل كانت النافورة شغالة ولا مطفينها؟؟

alala said...

حدي اندمجت و تفاعلت ويا القصة ... بس عاد طولتيه ناطرة الباجي على ناااار


حبيت مشاري واضح و صريح و دوغري ما عنجه روح تعال شغله حار بحار :)

و هب السعـــــــــد
هبايبه :)

alala said...

حدي اندمجت و تفاعلت ويا القصة ... بس عاد طولتيه ناطرة الباجي على ناااار


حبيت مشاري واضح و صريح و دوغري ما عنجه روح تعال شغله حار بحار :)

و هب السعـــــــــد
هبايبه :)

ARTFUL said...

عسى ما شر اوخيتي فاقدينج؟!؟!؟!

monshg | مُنْشَق said...

ان شاء الله المانع خير.

Don Juan said...

الحين هذا صج ولا تأليف ؟ @@
اذا صج ليش انا ما يصيرلي جذي :'(
اذا تأليف خليهم يموتون آخر شي ;D

Sweet Revenge said...

لوير وين باجي القصة
غششتج انا بعد

chandal/danchal!! said...

فاقدينج يا تم تم

ان شاءالله كل امورك طيبة؟

الجريح said...

علقتينا

تالى اشصار
؟؟؟؟؟؟

الجريح said...

اللى
وليست
الى

الجريح said...

اذاما فيها زعل

حبيت اصحح لج خطـأ لغوى
جملة
قول (الى ) فى قلبك خطأ
الصح
قول (اللى ) فى قلبك

مع تحياتى

شقران said...

الغالية لويــــــر


مساء الجاسمين


كيف أحوال محاميتنا الغالية
:)

.
.


والله إن اللي عجبني بالقصة كلها هو بوصلوح..حبيب...وخصوصا حركته لما خل نوره تجي البيت عشان مشاري يشوفها...فكرته مية مية...وأظن هالفكرة خلت الوضع كله يكون تحت الاطار الصحيح

.
.


كأنك غايبة...عسى المانع خير



بانتظار الجزء الرابع...لاتبطين رجاءا
:))


تقبلي مني أجمل التحايا وأرقّها

عــــــابره said...

تحمسنا حيل للقصه ..
وبعدين وقفت

عسى المانع خير
لاتطولين
=)

|:| DUBAI |:| said...

أنا ترى متابعة بعد

: )

Mu.Sij said...

are u okay??? fegadnach !

الجـــوري..كـــلام الصمــــت said...

عسى ماشـــر؟؟

فاقددينج حبوووبه :(

maha said...

لوير

بطيتي عسى ماشر

ماتشوفين شر فاقدينج


لا تمصيخينها صج والله طولتي

lawyer said...

صباح الخير

انا مدري حتى اشلون اشكركم على سؤالكم
على متابعتكم

على حرصكم في معرفه اشفيني او وين غطيت

مشكوووورين و انشاء الله الجزء الرابع و الاخير راح ينزل اليوووووووم


ثانكسسسسسسسسسسسسسس

اوول
:************


XoXo

U know WHO said...

لوولوو
وأخيرن

أشوه الجزء الأخير ولا جان دعيت حق إضراب

؛)
لوووونق تايم.. مس يوو