Saturday, January 07, 2006

بنات الرياض


دخلت المكتبه كالعاده اسلم على البايع جني اعرفه صج
اسأله اذا وصلت مجموعه يديده من الروايات الي احبها ..قالي اي اخت فاطمه وصلت روايه ام النذر لعبدالرحمن منيف
قلت و بعد ...
قالي في روايه الناس كلهم مسوين عليها صجه و حالتهم حاله .. ومعطينها اكبر من حجمها !!
قلت له شنو اهي ؟؟ قالي ....بنات الرياض ... قلت اي سمعت عنها ..بس بس والله ما قريتها
قالي اي ياهل !! خالها الدكتور غازي القصيبي ألفت لها كلمتين و شكلها دقت علي خالها تقوله خالي الله يخليك
قول حق ربعك النقاد يمدحوني !!!!
لما شفت هالملقوف يطب في الروايه حسيت انه يتحكم فيني
جان اقوم و اسحبلي وحدها و اشتريها قبل لا اقراها قريت ام النذر و انصحكم في قرائتها
وبعدها في يومين بديت
اقرا بنااات الرياض ..
كانت روايه ...أكثر من رائعه لبنت ابدعت في كتاباتها ..
تحسفت ان طافني متابعه الايميلات
في هذاك الوقت
عباره عن اربع فتيات اخذوا نصيبهم من الحياه
وصفقتهم الدنيا عدل
بس الشهد لله انهم سنعات و انا اشوفهم قمه في السنع
قريت عنهم من طبقه مخمليه و قريت من النقد الاذع في المنتديات لبعض المتخلفين
و لكن الشجره المثمره اهي الي ترمى بالحصى
و ان كان بعض المتخلفين الي ما يهمني رايهم ضد هذي الروايه
اقولهم شربو من البحر
كنت اكثر وحده احس انها تطابق شخصيتي وحبيتها وايد سديم
كنت اشوف قمره سطحيه
و ميشيل انتيييييييييييييك بمعنى الكلمه
لميس فتاه مسالمه شفافه
اسلوب العرض في الروايه كان جدا ممتع و شيق
و انا احييك يا رجاء على هالبساطه و الشفافيه
المشكله الدنيا قعدت و قامت على سوالف بسيطه
لو يدرون على الي اعرفه و شفته في عيني عن بنات من الرياض عايشين في القاهره
لا لشي في هالدنيا سوا الفساااااااد و نشر الرذيله
و اخر همهم الشهاده
بس انا اشوف مو من حقي اني اتكلم عنهم لاني كويتيه .. فالاولى اني اشغل نفسي بنفسي

كل الروايه من اولها لي اخرها خيال و فظيييييعه
و انا من وجهه نظري هي ترجمه سعوديه لمسلسل سكس اند ذا سيتي الامريكي
لان في طريقه ارسال الكاتبه للايميل من كل جمعه تذكرني في كاري برا شو يوم السبت لما اطرش المقال ..
و يقعدون رفيجاتها في المطعم يتكلمون عن الي تكتبه
..

خلوني اتكلم عن الشخصيه الي فعلا اثرت علي ..
وخلتني طول الروايه اتفاعل وياها و ابكي ..لما تفرح و لما تسمع اغاني و لما تكون وحيده و لما توفى والدها ,..
و هي سديم الي احس ان فيها شي كبير مني
ما ابي اطول و اخاف امللكم
بس... حبيت اقووولكم عن شي وايد ممتع و لا يطوفكم لو ما قريتووه الا و هو بنات الرياض

23 comments:

Hashemy said...

اتشرف واكون اول واحد يعلق فعلا انا من زمان حاط في بالي اني بشتريها لكني بانشغالي هالايام ماطلعت وسمعت فتره ان الروايه خلصت وناوي اقراها الايام اليايه واكتب رايي عنها انشالله شوقتيني وايد واشكرج انج تكلمتي عنها وهي دكتوره شابه خليجيه نتشرف بظهورها بهالمجال

الأجنحة المتكسرة said...

شريت القصة وهي الطبعة الثانية لأن دارت حولها آراء كثيرة بين مؤيد ومعارض

ألحين إنتي شوقتيني أقراها

شكرا وعيدج مبارك

lawyer said...

عيدكم مبارك جميعا..
هاشمي اي وايد حلوه و ترا انزلت الطبعه الثانيه

الاجنحه المتكسره
نورتي اي بلييييييييييييز اقريها وايد حلوه

Яeema said...

عيدك مبارك أول

ثانيا

ما حرتج الرواية لما جابو سيرة المرا الكويتية اللى ولدها مو ريال و اسمة نوير بدال نوري؟

و ما حرتج إن الجارة أم نوير كانت المركز التعيس لمغامرات البنات؟

it;s nice novel and i love it , bas et7eer eshwayya

:(

does a kuwaiti woman = FREE WOMAN - mo bas free it's also a ---- ( madry what or how to say this word )

pleas answer me

Яeema said...

hashemy : Yoooz 3an hal sowalif , jamal ma jamaal!

rakkiz 3ala el rewaya!

i am here tarra !

( NO i am not his MOM ! )

Hashemy said...

reema hahaha LOL ee mo my mom ya jema3a ehya khalty lesghera o asghaar meny ba3ad ha rethaity al7een ;p

lawyer said...

هلا و غلا ريما ايامج سعيده ..
بالنسبه حق السؤال الي سأليته فعلا وايد حرني ..لكن ترا البنت خلاتها كويتين و عايلتهم ثلاثه ارباعها كويتيه عشان جذي حسيت انه السالفه .. مو عن قصد عرفتي

و عن سالفه بيت ام نوير عيل بقولج سالفه تموتين حره
رفيجتي سعوديه دقت علي تقولي
اماااا الكويتيه صج .......
ما اقدر اقول الكلمه !!!
قلتلها ليش تقولين عنها جذي
ترا حريتني
قالت يا ختك شكلهم الكويتيات ما وراهم رجال داشرات يعني صايعات
بس انا و بعتب راح اعتب على الي يقرا و لا يفهم لكن ما راح اعتب الكاتبه لان ادري في حسن نيتها لما ذكرت عن سالفه ان الجاره الكويتيه
و بالقابل جار قمره كويتي و اذكرت شلون انه يعامل مرته وايد زين وطيب

~ se3loah ~ said...

عندنا اردى من اللي مذكور بالروايه صح!!
لكن الفساد بكل محل
وغلطانين اللي عارضوا الروايه
لانهم يبون يخلون المجتمع السعودي مجتمع مللائكي

{ ~ Bo Jasoom ~ } said...

الرواية اثارت فضولي من اول ما شفت اعلاناتها بالصحف

كل ما ادخل المكتبة افكر اني اخذها بس عشان ما اضيع أأجل الفكرة

جدامها جدول طويل :/

خل اخلص الزهير لباولو كويلو وعقبها في جم رواية اخرى

بس من طريقة العرض الظاهر باجر بروح اشتريها واخليها عقب الزهير : p

والله يستر
= )

ثانك يو = )
www.bojasoom.com

lawyer said...

هلا و غلا سعلوه .. عيدج مبارك حبيبتي

ادري ادري بس العرض الرائع .. اهو الي محليها و الي منتقدها قاعد يخش راسه في الطين

lawyer said...

يالله بو جسووووووووووم اشناطر زتك بسرعه

Babby said...

et9adgeen 3ad ena 9arly muda men shareet el ketab o0 laih al7een ma feta7ta :((

o0 kel mara bagool bagra o0 ma e9er 3endy wagt :@ GGGGRRRR !! bs la enshallah enshallah SOOOOOOON .. !! shawagtooooooony :P

lawyer said...

واااااااااااي اشفيكم كل من شاري الكتاب بس ما قراااااااااااه
نونو نوووووووو لازم تقراه ترا يونس اصلا والله يغير مودك

مساعد said...

لوير ..
أولا الحمدلله عالسلامة .. كل ما أزور مدونتج أشوف موضوع الذاكرة الهضمية !! بس الحمدلله يمكن رد لج الحماس .. والله الرواية كل ما أشوفها أتذكر الجدل و أقول خل أقرى شي ثاني أفيد وايد أبرك لكن خلاص قررت إني أشتريها .. كلمينا عن أم النذور :)

lawyer said...

انشاء الله مساعد راح اوعدك اعطيك نبذه عنها

qalm-jaf said...

انت محاميه وقانونيه
اشلون تقولين ان اللى يختلف معاج بالراى يروح يشرب من البحر او بعض المدونات متخلفين
.
.
.
انا ماقريتها بس اللى ضايقنى عدم تقبل وجهة الطرف الاخر
ومن منو للاسف من محاميه وقانونيه
.
.
.
لوير
فى اعتقادى البسيط اي شي فيه
سكس
على طول ينشهر
مثل البلوتوث
يعنى انت تقدرين تكتبين عن القضايا اللى فيها سكس وتحطينها بكتاب راح تصيرين اشهر من كاتبة بنات الرياض
.
.
.
نعم فيه فساد وفيه كل اللى بالغرب حتى لو كان بالخش عندنا
.
.
.
فى ناس تعرض المشكله وتحط حلول
وفى ناس تحط المشكله مع التشجيع لها
-----
وفى ناس تحط المشكله مع اثاره جنسيه للكسب المادى والشهره فقط
.
.
.
اتمنى ان تتقبلنى بصدر رحل وماتقولى روح اشرب من البحر لانه مالح
(:

lawyer said...

قلم جاف حياااااااااك الله اكيد بتقبل و اصلا انا ما حطيت المدونه الا عشان نشارك اراء بعض
انا قصدي مو على المثقفين الي ينتقدون انا قصدي على نوعيه الي دايما تسوي نفسها مثاليه و عايشه في المدينه الفاضله
خلاااص و لا تزعل لا يشربون من البحر
راح احط سبيل كرتونين ماي ابراج

qalm-jaf said...

عزيزه وغاليه
(:

نعم لاتوجد مدينه فاضله ونحن بشر نخطأ ونتوب
.
.
.
الاهم احترامنا لبعض وتقبل الطرف الاخر حتى لو كان
الاخرون هم الجحيم
آسف على تطفلي
شكرا استاذه

lawyer said...

حيااااااك الله قلم جلق نورت و ما قصرت .. اي والله يظل احترامنا لبعضنا و ذاتنا قبل اي شي

3thari said...

الناس معطين هالكتاب حجم وايد اكبر من حجمه وبعدين
وانتي بالقاهره او لندن ماشفتي بناتنا بنات لكويت
شيسوون صدقيني افضع.

lawyer said...

موضوع الرراويه كان عن بنات الرياض
مو بنات الكويت
و شكرا لج عذاري

3athari said...

هلا فيج انا ادري شنو موضوع البوست بس
حبيت اذكرج ببناتنا واللي يسوونه بعد
وان الجريب اولى بالنصيحه
وتره انا متاءكده انه ماكو احد يبي
يكتب بوست عن بنات لكويت احنا جذي
حالنا يالكويتيين

اش رايج انتي بماانك معجبه في هالكتاب لدرجه
انج كتبتي عنه بوست اش رايج تكتبين لنا بوست
عنا ومنا وفينا
بنفس الموضوع

lawyer said...

انشاء الله عذاري
لما اييني المود ... راح اكتب عن هالشي