هذا انا ما تغيرت ..بس كبرت

يستعجلني زوجي بفتح الكبت
عشان اعطيه الدشاديش القديمه ..
كبتي هذا بالذات نصه دشاديش عتيجه او مو عتيجه بس ما يبلسهم ريلي و نصه قمصان نومي
محتفظه بقمصان نومي الي لها ذكرى خاصه في حياتي
مثل هذا القميص الي وايد احبه بسيط جدا ما فيه شي اسود دانتيل و شيفون
قصه بالصدر و واسع
ما انساه لانه قميص نومي بعد انفاسي في بجري ..(اكبر اعيال)و
اذكر كل شي في هالليله ..
اذكر هذا القميص و عطر بالوما بيكاسو
و اذكر بعد ليلتها سهرنا على اغنيه محمد المسباح
اذكر لما غنيتله
مثل النهر حبك جرى في دمي
مثل السحر نساني حتى اسمي
هزتني الاشواق اول ما شفتك
والقلب لك خفاق يا ليته قلبك
سرى حبك في دمي
يا حبيبي سرى

و اذكره لما كان يرد علي و يقولي

احبك في صمت محد درا و حس و اشويه لي قلت انت حبيبي و بس

اذكر حيل لما حضني و سألته حلو لبسي ؟
قالي انتي الي محليته

و اذكر بعد لما قلتله اعجبك عطري ..
ورد علي و قال
غيبني
خلاني اغوص فيج

و يقطع سرحاني
صوت ريلي

هــــاتي الدشاديش اشفيييييييج؟؟
ويييييينج

اسحبهم بسرعه بسرعه و اعطيه اياهم

احطهم لك بكيس؟؟
لألألأ طبعا من متى اوزع دشاديشي بجياس
خليهم في علاقهم و مغطين في جيس النايلون
اوديهم اقطهم على حارس المسيد الحين

اسأله:بس هذولا يددد و ما لبستهم وايد
يرد علي: لن تنالوا البر حتى تنفقوا مما تحبون
ضامنه لي باجر البسهم؟؟
شعبان ايام فضيله
خلي المسكين يلبس شي زي لرمضان

اصفن شوي
افتشل من نفسي
انا وين وريلي وين
انا في مود هالقميص
و ريلي في دشاديش و موت
و رمضان

تبين شي ؟؟

لألألألأ سلامتك

يطلع ريلي

اسحب قميص نومي
احس نفسي صغرت 20 سنه

ادخل اخذ شاور

البس قميصي
اتعطر
انسدح في الصاله
اسكر الليتات
اخلى الابجوره
و امسك الريموت اقلب القنوات
احساس عجيب
شعور بالسعاده
كاشخه حق عمري
و الا مصغره عمري
و الا برجع في الزمن ورا
والله مدري

اتابع اوبرا
تصير الساعه 9 ونص
يدخل زوجي
مستعيل
للمطبخ
مطنقر
يحط الاغراض في المطبخ
يروح الدار يبدل
اسمع صوته يدخل الحمام

يطلع
يطل علي في الصاله
اسأله فيك شي ؟؟
يسألني !انتي ليش كاشخه جذي؟؟
يتعسر زوجي اكثر
بعد ماشافني
اجاوبه:مو كاشخه بس لما طلعتلك الدشاديش شفته
عجبني
ذكرني في ايام حلوه
تذكره !!
يرد علي و اهوووو يسكر الابجوره و يفتح ليتات الصاله
لألأ ما اذكره
انا تعبان
و ضايق خلقي
و باجر عندي شغل
بشووف الاخبار و بنام
اكو عشا؟؟ و الا بما انج كاشخه ما تبين عشا؟؟
ارد عليه باستغراب!
و اعطيه الريموت
هوووووووو اشفيييييك معصب و مطنقر

يرد علي بصوت نزره
مدري عنج كاشخه و ساطره
و انا تعبان حدي
!!

ليش انت متعسر عشان انا كاشخه
هوووووو انا ما قلت ابي شي
انا كاشخه حق عمري
و اروح المطبخ و اتحلطم
والله خووووووووش بعصب عليج ليش تكشخين و تقعدين في البيت و انا مالي خلق

اذا انت مالك خلق
اصلا انا ماطلبت منك شي
ليش اتحسسني اني انا بس اكشخ عشانك
يرد علي:لان هذا المفروض
!!

يا سلام ليش انا ماني ادميه
مالي قلب

!!
لا انتي ادميه بس تدرين فيني ما احب المفاجآت قايلج الف مرا لا تحطين امام الامر الواقع
انتي ما تدرين يمكن انا تعبان ضايق خلقي

اصرخ عليه
من قالك كاااااااااااااااااشخه عشانك
ترا ما ابي منك شي
ليش اتحسب عشانك
ليش اتحسب عشان هدف معين
و ليش اتحملني انا عساااااااارتك
تدخل اتلاقيني متزهلقه عشان نفسي
تعتقد اني كاشختلك
تتعسررررررر علي !!

لانك مالك خلق

ترا انت وايد اناني على فكره

يحذف الريموت
انا برووووح انام كملي اوبرتج هذي الي قاصه عليكم
و بعدين شوفي فوزيه دريع
و دقي عليها قوليلها عن مشكلتنا
و اذا خلصتي
و تذكرتي انج ام
ترا موعد المضاد الحيوي الساعه 11 لا تنسين تعطينه

يصفق الباب
اقعد شوي اخليه يقعد مع نفسه
يفكر
ادخل المطبخ
اسويله توست و جبن بالشوايه
مع كلاص لبن بارد و رطب
ادخل الدار

هي:نايم
هو:لألأ
هي :تبي عشا؟؟
هو:لا بنام خفيف
هي:بس سويتلك توست و جبن..
هو:ماني رادج عطيني اياهم
هي :بس بشرط
يرفع حاجب واحد جنه مو عاجبه
هي :بذمتك ماذكرت هالقميص
لا تتجاهلني ادري انت كلا تسوي نفسك مو حاط بالك و مثبت بس ادري تذكره
هو:اذكره و مستغرب اشلون يدش عليج عقب هالعمر
هي:لانه امريكي ون سايز وبعدين شووف من اهني سير و اهو اصلا فلوو واسع
هو:مابي التوست ..عطيني اللبن
هي:تشربه من الكلاص و الا مني؟؟
هو:لي الحين محتفظه في شريط محمد المسباح بعد؟؟
هي: لألألألألألألألأ بس اقدر اغنيها لك
هو:ذكريني في المقطع الي احبه؟
هي:احبك في صمت محد درا و حس و اشويه لي قلت انت حبيبي و بس هزتني الاشواق اول ما شفتك و القلب لك خفاق يا ليته قلبك

ســــــــرى حــــــبك