Monday, December 11, 2006

دردشه


بعد تواجدنا في الدوره لمده اسبوعين
صار بينا تالف شوي..لا وايد مو شوي..
نقعد ويا بعض يوميا من الساعه 8 لي الساعه 5 العصر
ناكل ويا بعض
نشرب ويا بعض
جروب واحد
كانت الدوره عن التأمين التكافلي
و التامين التجاري
و كان كل منا له تخصصه
كان اغلبهم تخصصاتهم في المجال التجاري
الاقتصادي
المدرب سألني جدامهم كلهم
فاطمه انتي قانون ليش انضميتي لدوره مثل هذي ؟
رديت عليه
لاني انوي دراسه الدبلوما الثانيه في تخصص الشريعه و لازم اقدم بحث
في مجال اسلامي جديد
مثل التامين التكافلي
او عن اسباب التوجهه الى الاقتصاد الاسلامي
او في موضوع الاوبشن شير
واستفدت وايد من الدوره
و استفدت من المدرب
وايد
المراد اني انا كنت البنت الكويتيه الوحيده في الدوره
و كان عددنا 23 وحده مصريه ووحده سوريه
و كان كبار و ما توالفنا ويا بعض
كنت اقعد مع مجموعه من الشباب قاعدين يمي
اذا صار بريك
نسولف ويا بعض عن امور غالبيتها تهم الرجال
بورصه
سفر
شركات
صناديق اسثماريه
محافظ
صكوك
الوطنيه
استقاله مدير في الاستثمار من بيت التمويل و راح الاولى
و الحين طلع من الاولى و اخذ جماعته و فتحوا شركه
وقدرو ايمعون 16 مليون بدال ال 15
و مناقشتهم كانت بالنسبه لي شغلات يديده
اول مرا اسمعها
صج الرياييل مو تافهين نفسنا بس اشلون يقدورون يتعايشون ويانا
ربي سخرهم لنا
لو انا ريال مااتزوج
عقب مناقشات الريايل و الدواوين اروح حق مرا
سوالفها تافهه !
المهم مرا من المرات بدون اي تردد قطيت سؤال
خلاهم يسكتون
يفكرون
خلص البريك و احنا ما اتفقنا
لا اقنعوني و لا اقنعتهم
كان موضوعهم عن شرم و الدايفينج
و قلت لهم عن جو شرم الروعه في شهر 10
و ان مافيها احد خصوصا ايام الامتحانات
لكن فيها بعض الشباب الكويتين في اعمار الثلاثينات
ففتحنا نقاش عن اهداف السفر ان في شباب يروحون للراحه و الاستجمام لمجرد الدايفينج
و لمجرد الوناسه و الربع و تغير الجو
مايصير الساعه 10 الا مساكين مافيهم حيل ينامون و يخمدون
و البعض قالي ان اهم من هوات السهر في شرم لي الفير
فسألتهم سؤال غريب هل في شباب في عمر 30 يعني ما بين 30 -35
مو متزوج بس سنع و ماسك نفسه عن الخرابيط؟؟ما اتكلم عن الدينين اتكلم عن الفئه العاديه
و اذا سنع ليش مو متزوج؟؟ عمره في الثلاثينات كبير ناضج
بحاجه الى بيت زوجه سكن راحه
اشلون سنع و ما يخرربط؟ و مومتزوج
الاول قالي ان اهو تزوج عمره 28 لان سنيتن و اهو يدور و الا اهو ناوي الزواج من 26

و الثاني مو متزوج عمره 29 و دافع دفاع مستمين عن الشباب انهم سنعين و مافيها شي ان مو متزوج و اهو في هالعمر
و شنو نظره المجتمع هذي ..كل واحد حر في حياته ..و سألته ...طارق ليش ما تزوجت ..؟؟
قالي ان اهو تخرج عمره 22 و على ما اشتغل و استقر عمره 25
و الحين اهو مستانس مع الحريه و متكيف بس قاعد يدور و لكن ما يبي يتزوج وحده ما يعرفها
يبي يتزوج وحده يعرفها لكن كل بنت يتعرف عليها اتكره في الزواج اكثر
مالقى البنت الي تخليه يغير نظرته يتزوجها

الثالث عمره 32 مستانس و يقولي ان اهو مو من ضمن الفئه الي انا اتكلم عنها
لانه مرتاح مع العزوبيه لا قيد و لا حنه و لا يبي حب مرتاح و لاهي في الشغل طول الاسبوع و في الويك اند
يروح الشاليه ينعزم على حفله بسيطه يتعرف علي بنت و يقضي الويك اند معاها مو معناته ان كل ويك اند بنت
بس على الاقل يسمي نفسه ان واقعي ما يبي يتعب بنت و لا يبي يتعب مع وحده
الرابع متزوج عمره 34 حب وحده 4 سنوات و ماتت في المرض الشين
قعدت سنتين بعدها و خربط خربط لين تزوج الحين
بس كان كل منهم مختلف على سالفه ان مو ضروري ان شاب في عمر الثلاثينات
مو متزوج يكون خربوطي او راعي بنات..
صج فعلا شغله اتحيير
البعض ظروف
البعض لاهي
البعض يدور
البعض لي الحين ما حب !!
عمرك 33 ما حبيت متى بتحب؟؟؟
ستيييييين
سبعين ؟؟
انتو شرايكم ؟؟ هل تعتقدون شاب عمره في منتصف الثلاثين مو متزوج
و لا يفكر في الزواج مع انه قادر عليه سنع و محافظ على نفسه

22 comments:

Reflections said...

Hmmmmmmmmmm Lawyer

"و مناقشتهم كانت بالنسبه لي شغلات يديده
اول مرا اسمعها
صج الرياييل مو تافهين نفسنا بس اشلون يقدورون يتعايشون ويانا
ربي سخرهم لنا
لو انا ريال مااتزوج
عقب مناقشات الريايل و الدواوين اروح حق مرا
سوالفها تافهه !"

That was a Qoutation From ur subject that i would like to comment at.

اسمحيلي يا لوير بس انا ما اتفق معاج بهالنقطة، و السبب ان لو المرأة تتكلم بنفس اسلوب و مواضيع و تفكير الرجل ، لفقدت انوثتها بكل بساطة!
الريال راح يرد البيت و يحس انها واحد من الربع، ولكن انا ايضا مع المرأة الفاهمة المثقفة الي تعرف تتكلم مع زوجها في اهتماماته.

من وجهة نظري المرأة و الرجل مكمليـــــن لبعض.
هي لها اسلوبها و منطقها و هو كذلك، فما نقدر نتهم مواضيع النساء بالتفاهه

و سلامتج و تعيشين

shoot gun 3ala golat'hom looooool

Kwaitiyya said...

ماقدر أفتي
بس المعروف عن الرياييل انهم مايعبرون يتمون بدون زواج

مادري صج والا خرابيط

Cr8ivia said...

well lawyer .. this is very offending : " مناقشتهم كانت بالنسبه لي شغلات يديده
اول مرا اسمعها
صج الرياييل مو تافهين نفسنا بس اشلون يقدورون يتعايشون ويانا
ربي سخرهم لنا
لو انا ريال مااتزوج
عقب مناقشات الريايل و الدواوين اروح حق مرا
سوالفها تافهه "

if u think ur siwalef and sewalef all the women ang girls u've met in ur life and their thoughts are "tafheen" and not worthy for listening then its ur luck that made u surronded with silly women ! and u cant generalize this 3ala all the women :) u can say most of the women ive met/know or most kuwaiti now adays women .. but this generalization is un fair.. if u beleive that ur mind and ur friend's mind are "anzal mostawa" min the men ! that doesnt mean all women are !

and if u think that the guys u had conversations with are a "wow" super smart mentalities .. that also doesnt mean that all our guys are the same .. o doesnt mean at all that men has a good thoughts and logics ! coz fee reyayel i personally met tekremen il7aywan arfa3 min mostawa tafkerhum .. so dont generalize ba3ad ..

and if u think that talking about shares, companies, travels, options money money money work work work bla bla bla are the most important thing that shows how a man is serious and smart then u r missing alot :)
every person on this planet has his own intrests and thoughts .. and that doesnt give us the right to say about others are silly just coz they dont share the same thoughts as we do ..

الله سبحانه و تعالى خلق المرأه مختلفه بتاتا عن الرجل .. اهتمامات و حياة مختلفه .. خل كل واحد فيهم مكمل للاخر .. لو كانوا يشتركون بنفس الاهتمامات و التوجهات لفسدت الحياة
و الله سبحانه اكيد له حكمه في هذا .. ما نقدر نقول عن المرأه الغارقة في انوثتها او سطحيتها مثل ما تشوفين انها تافهمه و لا تطاق و لا تستحق التفاته من الرجل الفذ اللي مخه اعلا من مستواها لان يفهم بالبورصة و الفلوس و السفر

مثل ما المره خلقت مختلفه عن الريال .. المره عن المره تفرق .. و الريال عن الريال يفرق .. خلق الله و تقسيمه رب العالمين

Q8LoVeR said...

شوفي الصراحه محاميه انتي وحده تدورين واحد بالثلاثينات تبينه يتزوجج ;p

انتي نطريني لما اصير 30 ويمكن تصير مومتزوج ذيك الساعه اقولج

سمعت انه الثلاثينين يدلعون ترا ;D
شوي شوي رحمي روحج

ترا موعلينا هاللف الدوران ;p

Q8LoVeR said...

بس قولي حق جم واحد منهم
اذا بوليتم فستتروا
والثانين قوليلهم عوفيي لأمتي كلها الا المجاهر

وبراي الشخصي الي يوصل 35 مومتزوج هذا مريض فيه بلا

violinist_q8 said...

شباب اعمارهم بال30 ويقولون ان احنا نسهر ونخربط ؟
ويبون يتزوجون ؟؟


يوم كنت ادخن بالثانويه ماكنت اقول لاحد اني دخنت !!

بعدين مافيها شي اذا واحد كبير ومومتزوج مولازم يكون عنده خرابيط
الي مسك نفسه طول هالعمر سهله علي يمنع نفسه من لحظات

q8y_saint said...

الوا لوير مو كل سوالفنا جد و مهمه جذيه هذولي عشان انتي وياهم وجو شغل السوالف جذيه روحي عنهم وسمعي السوالف شلون تنقلب

بعدين بموضوع الزوااااج
و الله الحريه احلى من كل زواج

انا تزوجت ٣٠ عمري و الحمد الله مرتاح بس لو رديت جان ما تزوجت صدقيني

lawyer said...

رفلكشن و كراتيفيا

صباحكم ورد :))

اشوه اني قلتها
بالنسبه لي انا

انا ما عممت ترا
فعلا المرأه وايد غير عن الرجل
انا ما قلت المرأه مثل الرجل او لازم تصير

كراتيفيا
جم وحده من رفيجاتج مثقفه نفسج
انا ادري حسيتي اني ظلمت بعض البنات في هالكلام
لكن انا ما اعني ابدا اعمم على البنات اوو اتكلم


مدلري ليش انوخذ كلامي بالمفهوم
ارد و اقولج
انهم نفسهم كانو يعانون من تفاهه حذيث صاحباتهم
عن المكياج و الصالون و الشعر

عموماا خلينا من هذا كله

لان اكيد في بنات وايد مثقفات بس اشعليه الثقافه من اداره الحوار

يعني المثقفه ما عندها مواضيع سخيفه

انا ترا بوستي عن الشباب
ليش خليتو كل البوست و النقطه الاساسيه و ييتوا على نقطه
سطحيه حوارات المراه




كويتيه
و انا احس جذي بعد





كويت لوفر
ههههههههههههههههه

ياويلك من الله انت كلا ظالمني
يا كرهك



هههههههههه ماراح اقولهم لان هذا حقهم الشخصي في الحوار
و كيفهم كل واحد يقول الي يبي يقوله
ربي ما حطني مراقبه حق كلامهم
و بعدين كانو معاي في دوره من 3 سنوات
وين ايبهم الحين؟؟

lawyer said...

violinst

انت من الناس الي راح اظمك لكتله المدافعين :))



q8y

هههههههههههه ادري اشدعوا ادري ان سوالفكم في الدواوين شنيييعه

قاااااااتله
ضغاط و طنازه ز بعضكم اسخف من السخيف و بعضكم بس يعايي على الغلط
ادري دري
انا يتروالي لو يحطون كاميرات في الدواوين جان ماكو بنت وافقت تتزوج
ههههههههههه

:pPPp

كل الرياييل لو يرد فيهم الزمن ما تزوجو هههههههه

Purplecious said...

صباح الخير لوير

أنا أتفق مع كلام رفلكشن و كراتيفيا

بس بما ان مو هذا الموضوع الاساسي على قولتج فخلينا بالمهم

الريال كل ما كبر كل ما صار اصعب ان يتخذ قرار التغير لان الزواج مثل ما تعرفون خطوة وايد مهمة والانسان بطبيعته يخاف من التغير

يعني واحد صارله 30 أو 35 عايش على نمط حياه معين و مرتاح مو ناقصه شي ليش يغيره؟؟

حتى لو فكر مجرد تفكير انه يتزوج الريال نظرته بعيدة يعني عنده القدرة انه يتوقع شنو ممكن يصير

غير المره اللي تربيتها من و هي صغيرة اهلها حاطين براسها انها مالها الا الزواج و مردج تتزوجين و تسوين اللي تبين مع ريلج

فشي طبيعي تكون البنت مقبلة على فكرة الزواج أكثر من الريال

و المره بطبيعتها تضحي و ما ننسى غريزة الامومة بعد لها دور

ولما البنت تشوف كل رفيجاتها تزوجوا و هي للحين قاعده شعورها مو نفس شعور الريال اللي كل ربعه تزوجوا الريال ما يهمه.. بس اكيد الحين البنت تعتمد على روحها و مو محتاجه احد بس يظل شعور قد يراودها من فترة لفترة

الريال لما يسمع سوالف المتزوجين و البلاوي و المشاكل اللي تصير أكيد بكون عنده ردة فعل و هي الاضراب عن الزواج

و اتوقع اللي قرر الزواج بعمر متأخر مو معناه انه اقتنع بالفكرة .. ولكن يخاف يكبر و محد يرضى فيه أو انه يبي عيال يشيلون اسمه

وبالنهايه المسأله نسبيه و على حسب الريال و البيئه اللي عاش فيها و الربع اللي حوالينه

Unknown said...

HaHaHaHa

Finally ya lawyer this post for me. Know you understand. I am busy now at work I will comment in more details later if you don’t mind.

The Simper said...

afaa, 3abali about me hal post :P

kitty:

shino gahwatkom? :) just wondering :D

Anonymous said...

صباح العسل يالوييير :)
موضوع حلوو نفس السؤال اللى كنت أسأله حق روحى ... ممم أنا فكرت فى الموضوع ومن وجهة نظرى ان فى الزين وفى الشين يعنى فى ريايييل فى الثلاثينات مايبوون يتحملوون كبشى لانه كلشى متوفرلهممم وكأنهم متزوجين بس بدوون مسؤوليات تامه فليشش يتزوج ويصرف
وفى بعضهم ماعندهم امكانيات ويمكن ودهم بس يبى يكوون نفسه أول ....
وفى البعض مالله كتيله نصيييب يمكن هههه
بس موكلهم اللى بالثلاثينات غرضهم خلاابيك لا بالعكس فيه بس كل واحد على حسب ظروفه وطريفة تفكيره

ويعطيج العافيه

Diver said...

"و مناقشتهم كانت بالنسبه لي شغلات يديده
اول مرا اسمعها
صج الرياييل مو تافهين نفسنا بس اشلون يقدورون يتعايشون ويانا
ربي سخرهم لنا
لو انا ريال مااتزوج
عقب مناقشات الريايل و الدواوين اروح حق مرا
سوالفها تافهه !"
اولا احب احييج على شجاعتج بطرح الفكرة المكتوبة بالفقرة السابقة بس ودي اوضح شي ان النساء مو اتفه من الرجال لان في رياييل يلوعون الجبد بس الاهتمامات تختلف و عشان جذي احنا نعتقد بان الجنس الاخر منا سخيف
و على فكرة و انا قلت هالفكرة اكثر من مرة الرجولة ليست جنس يولد به المولود الرجولة عبارة عن صفات للانسان ايا كان جنسة ذكر او انثى و احيانا امراة واحدة تملك من هذه الصفات ما يزيد عن الف ذكر


ثانيا و اجابة عن سؤالج نعم يمكن ان يكون هناك رجل بالثلاثينات مايخربط و لم يخربط و مو متزوج مرت علي من قبل بس الحين تزوج المسكين و انا متاكد انه لما تزوج كان ما لمس مرة

KQ8 said...

والله يا اختي..خن اقولج شغله..مثل ما تعرفين اصبيع ايدج ماهي سوى..مثل ما تلقين الشاب الزين تلقين الشاب الشين..اعرف وايد من اصدقائي صكو الاربعين وشي وماتزوجوا..شي منهم راعي خرابيط ومريح بالله وشي منهم من اهل الله..لكن الامر المشترك بينهم انهم مضربين عن الزواج..عندهم فكرة في بالهم وهي انهم يبون حريم ملوت اول..!!

يعني وحده حمامة مسيد تطبخ وتنفخ وتربي العيال وتسهر على راحته يمين يسار طوالة اللسان ترادده ما إيوز لهم..هو عليه ان يوفر لهم كل طلباتهم يكون موجود اي وقت يبونه..طبعا فكرتهم بالنسبة لي خيالية..جدا..لكن هاذي فكرتهم..!!

بعدين نقطه ثانية الريال اللي مايبي يتزوج مصيره يتزوج ان طال الزمن او قصر..المشكله انه لايتزوج وهو بالخمسين وفوق لأنه باجر لي ياب عيال مراح يقدر يربيهم ومراح يقدر يشوفهم يكبرون وياه ومعاه..!!

الفكره الثانية اللي في بال الشباب هالايام..انه فيه وايد بنات الله بالخير..ويخافون يطيحون بوحده من هالطقة..فيحشم نفسه ولا يتزوج علشان مايطيح بالقيل والقال..ومش عارف ايش...!!

عموما اللي له نصيب بيتزوج واللي ماله نصيب امره لله..!!

lawyer said...
This comment has been removed by a blog administrator.
lawyer said...
This comment has been removed by a blog administrator.
sologa-bologa said...

عندي تعليق على ثلاث نقاط
وراح ابتدي حسب أهمية الموضوع ومدى تعلقه بالبوست

أولا
مسألة الزواج بالنسبة للرجل
هي شخصية بحتة
اللي يبي يتزوج عمره 20 علشان يحفظ نفسه
مثل ما يقولون كيفه
واللي يبي يتزوج عمره 30 هم كيفه
واللي يرفض الزواج من حيث المبدأ
هم كيفه
ومو شرط ترتبط الشغلة بسلوك أو خرابيط أو غيره
هو قرار
متى حس الرجل انه يبي يتزوج يتخذ القرار
ويحس انه عنده القدرة على تحمل المسؤوليات
لان الزواج مو لعبة

ثانيا
نقطة لو انا ريال ما تزوجت

طبيعة تكوين عقل الرجل والمرأة
فيها نوع من التكامل
تركيبة عقل الرجل تفكر بالعموميات والأمور العامة
وتركيبة عقل المرأة تفكر بالتفاصيل الدقيقة اللي ما يشوفها الريال
مثلا
الرجل يبني البيت ويجابل العمال ويدقق على بنيان البيت
لكن المرأة تركز على ديكور البيت والأثاث
وتناسق الألوان
لأن الرجل يركز على البيت كبنيان
والمرأة تركز على الجماليات التي تكمل هذا البنيان

أتمنى تكون واضحة هالنقطة


ثاثا
نقطة مالها شغل بالموضوع الرئيسي
وهي نقطة الاقتصاد الاسلامي
وبحكم تخصصي بالاقتصاد
وأخذت مقرر اقتصاد اسلامي
توصلت الى قناعة

ان ماكو شي اسمه
اقتصاد اسلامي
واللي اطلقوا هذي التسمية بهدف التكسب السياسي
ظلموا الاسلام

لان الاسلام وضع منهج وليس نظرية قابلة للنجاح والفشل

يعني
الاسلام يقول
اختار الطريقة اللي تبيها للاقتصاد لكن لازم تحافظ على ثوابت معينة
مثلا
اذا اتبعت النظرية الرأسمالية وحرية التجارة
لا تغفل دور المجتمع وحقوق الطبقة الكادحة
واذا اتبعت النظرية الاشتراكية
فلا تغفل حرية الفرد

والموضوع طوييييل

وتحياتي

{ 13 } said...

اما خربوووطي لووووووووووول
اخذي دورة في الكتابة لووووووووووول
مادري اذا كنت فاهمة بس اعتقد والعلم عند الله انها نغزة لبدوري ..يعني انتي تحبين سنيييييييييييييييييين ولا انه يبغي يتقدم للزواج ؟؟ صح جذيه ؟؟ وانه عطاك فرصة انك تتركينه وتتزوجين غيره ؟؟ عدل مدل جذيه؟؟ خلاص يوزي عنه ليش تنغزين فيه المسكين ..مافي غيره بالبلد ؟ شوفيلك حد تحبينه وحبيه ..انا عن نفسي من المشجعات للحب " بعد " الزواج لانه أهم عشان يقدرون يقضون السنين الطويله ..اما قبل الزواج فضاااااااااااوة ..ولعب عيال ..لا تردين اذا رديتي علي ببطل اعلق لوووووووووووووووووولز

q8y_saint said...

لوير الله يسامحج الموضوع في بالي من امس الفجر
ليش الواحد يتزوج

هل مثل ما قالت كيتي عشان الدين و العيال
او بالاحرى عشان الجنس و العيال

؟؟؟؟

على افتراض اني تزوجت و موضوع الجنس ما كان حلو انفصل ؟
وهل موضوع انه يكون عندي عيال كافي اني اغير اسلوب حياتي عشانه ؟؟


ما ادري اتوقع الموضوع اكبر من جذيه و اكثر تعقيد

بالنسبه لي انا تزوجت عشان سبب واايد سخيف

المجتمع .....

Q8LoVeR said...

سمعتي بالي يتزوج عشان تيله الحريه ؟
انا اعرف واحد شخصيا يبي يتزوج عشان يصير حر

tweety said...

شوفي خل أعلق على نقطتين الاولى أن مو كل الحريم سوالفهم تافهة والموضوع ماله علاقة بجنس معين بس اللي يفرق بينا وبينهم هم المجالات اللي تجذبنا ونهتم فيها غير اللي اهم يهتمون فيها , ومع هذا تلقين مثل مافي ينات تافهين وسخيفين في رياييل اسخف وماكو اسلوب ولا منطق ولاهدف بحياتهم

الموضوع الثاني : أنا ما أعترف بعمر معين للحب والزواج , كل شخص له ظروفه ونظرته والوقت اللي يحس ان مناسب للارتباط ومو شرط وصل لي ال30 ماتزوج يعني يخربط مثل ما قالوا لج الاسباب وايد بس المشكلة ان احنا تبرمجنا على ان في عمر حق كل شي وفي اجابة وحدة لكل سؤال , مثل مافي ناس عندهم ان احنا وصلنا لي عمر 27 ما تزوجنا يعني بنموت ونتزوج وحياتنا تعيسة وهذا مو شي صحيح أنا وحدة أنظر للزواج نظرة جدية وماعندي استعداد اربط عمري بشخص مو مقتنعة العمر مش بعزئة على قولة تيستي