Sunday, June 03, 2007

الخوف من علاقه يديده .. او من زواج جديد

في قعده بنات
تناقشنا عن مواضيع وايد
الي لفت نظري مو في هالقعده لألأ
و حتى اكثر من مرا
بين البنات و الشباب
فكره غريبه شوي
فلانه شمصبرج على علاقه كلها مشاكل و نجره و هواش و عوار قلب
الاجابه : بس تعودت عليه صارلي وياه خمس سنين ..مالي خلق اغير
واحد اعرفه كلا يلبح على قلبي
فعلتها و تركتها
اقوله دامها معوره قلبك شاللي حادك لي الحين مستمر وياها ؟؟
هو: والله مدري تعودت عليها وين بتعرف على غيرها ؟؟ ترا صعبه عقب الثلاثين تتكيف بسرعه مع بنت!!
صج احنا نصبر على بلاوي الي عندنا لمجرد ان تعودنا
هذا السؤال اوجهه
للمتزوجين
و الي مو متزوجين
للبنات
و الشباب
تفضل علاقه كلها مشاكل و نجره و عوار قلب
او علاقه بارده لمجرد ان تعودنا على بعض
و من وين بنتعرف و ليش
و تعال تأقلم و بلا بلا بلا
و بكون انا اول من يجاوب على سؤالي
تبون الصج
كلهم اردا من الثاني
من اولهم لي اخرهم عله

25 comments:

ZoZOta said...

انا اكيد اليوم كل الحظ معاي
يعني انا القف مدونتج اول وحدة وهي حااااااااارة توها طالعة من الفرن
ياسلاااااااام

شوفي يا لوير
انا برأيي التعود من احد الأسباب اللى تقتل الحب
يعني كثر ما نتعود كثر ما تقل اللهفة والشوق
واذا ماكان في لهفة وشوف يعني ما فيه حب حقيقي
فما بالج اذا كانت النجرة متواصلة
إإإإإف لا يحوشج
وخري وخري
التغيير احسن لي
ادور على اللي يريحني
مو اللي على طول لازم اداري خاطره عشان ارتاح من حنته
يا معوده
وبعدين التغيير حلو
وانا مثل النحلة كل يوم لي ورده
ما احب اطول السالفة اذا مسخت
باختصار ابي راحة راسي وقلبي
:)

NewMe said...

أبدا ما يسوى
عمري ما اقدرت استوعب
اشلون الواحد يقدر يعيش دراما كل يوم
عن نفسي العلاقة بين الطرفين اذا ماكان يسعدني واسعده
ابدا مالنا داعي بحياة بعض
ترى العمر نعيشه مره
فعلا موضوع يثير تساؤلات عديده
بس اكيد اللي متعود هو نفسه غاوي نكد
دومي بحب
تحياتي

أبو إسحق said...

العلاقات ما تكون حلوه اذا كانت بارده او متأزمه ... خير الامور الوسط - و العلاقات مثل رحلة البحر يوم عاصف و يوم هادئ لكن المهم الوصول لبحر الامان

شكرا لج

جنون إحساس said...

بسم الله تونا كنّا نتكلم بنفس الموضوع آنا والربع المتزوجين

رايي إنه مو مسألة إن أخاف من علاقة يديدة أو ما اخاف
بس أهم شي اطرح على روحي هالسؤال
أقدر استمر؟

لو كان الحب موجود كل شي بيهون
ولو إن نادراً جداً ما نلاقي زوج ينظر للحب بأنه عامل أساسي
لاء دايماً يستمرون
لهسبب والله المره قايمه بكلشي مريحتني
تيين تسألين تقولين تحبها؟
يقولج مادري

شذنب الحريم جانب المشاعر قوي عندهم
--

لكني أقول وآنا مبتسمه
امسك مينونك

ينطيج العافياا

PearL said...

موضوعج واقعي وايد وايد وايد
في حجي وايد بقلبي لان تعبت من كثر ما اتحلطم على هالسالفة


اي شخص عايش بهالعلاقة اكيد ما عنده مقاقة انه يجابل ويعدل و يسنع شخص يديد عشان يتوالم مع طبعه
خصوصا اذا الشخص طبعه صعب

او كبير بالعمر نسبيا على العلاقات

المشكلة ماشين على مبدأ اللي اعرفه احسن من اللي ما اعرفه

غير ان الصراحة الحين وضع الشباب والبنات يخرع

اغلب الناس ماخذه السالفة لعب او سكس او مجرد فريند

فليش الواحد يعرض نفسه حق مواقف مالها داعي

انا ضد اني اعور قلبي فترة طويلة لمجرد ان " هذا الموجود"

وبرايي ان افضل الواحد يكون بروحه ومستانس على انه يكون مع شخص ثاني و مو مرتاح

TReSTeN said...

اتصدقيين

انا متيقن اني امر بهالمشكلة

بس اهو التعود مرات تحاول لايام تلاقي نفسك اوكي فجاة

تحس بماادري شنو شي غرريبب

ويرجع كل شي

بصرااحة

احنا ضايعيين مو عارفيين شنو نبي

zajel said...

صج والله كلهم اردا من الثاني من اولهم لي اخرهم عله وعور قلب

ما شاء الله عليك ...!

lawyer said...

صباحكم ورد

(( هذا الكومنت من رفيجتي عيزت تحن و تدز مسجات من امس كتبي و كتبي و قولي و قولي ))

لمحه بسيطه عن حيات صديقتي
متزوجه عن حب بعد علاقه دامت خمس سنوات

اول سنتين حب و هيمان
ثالث سنه بريك 8 شهور
رابع سنه هواش و خامس سنه لبحه تزوجني وو تزوجني



تزوجت رفيجتي اول شي قالها ريلها
شووووووفي انا خذيتج عشان تبطلين حنه
و لما كنت اقولج احنا ما نصلح لبعض كنتي تقزلين خلافنا الوحيد على مشكله الزواج
لما بنكون ويا بعض ماراح يكون هذا الخلاف

و من بعد شهر العسل
رجعنا عشنا في بيت واحد جنا ربع

بالظبط شعوووووووري وريلي نايم يمي جنه واحد من خواني

(( نو كومنت انا ))

و اهو عنده انا واحد من الربع

(( هم نو كومنت اتا ))


و حسيت يا ريتني ما حنيت على ريلي
لاني اول سنه زواج جنها عاشر سنه زواج من الملل



----
----

lawyer said...

زوزوتا

صباااااااااحج ورد حبي
اتصدقين انا احب التعود

يعني التعود عندي راحه
بس مو اصبر على مشاكل و انانيه

اصبر في البدايه على اطباع لاني اقول يتغير

و يمر الوقت و ما يتغير فيه شي

و يظل اهو مثل ما اهو متعبني

اهني اوخر




نيو مي

فعلا في ناس غاويه نكد

خليني اقولج شي

في يوم من الايام و في شخص ما
من كثر ما تعبني

وصل الموضوع لقلبي

ان قلبي يتعب

ولما وصلت لي مرحله تخطيط قلب و عضلات القلب

و لما قعدت بالفراش و الوايرات علي
و انا تعبانه حتى الكلام ما اقدر اتكلم

و لما سألت نفسي شي اللي حادني على هالحال

ووينه اهو فيه و انا بموت عشانه و قلبي تعبان عشانه

اهني طلعت من العياده
و اهو ميت من قلبي كليا

طلعته من قلبي

لانه يا اهو يطلع يا قلبي يطلع من مكانه

و الزم ما علي نفسي بصراحه


دمتي انت بود

ترا مو ناسيه انج مواعدتنا على الكويت
بس جونا يفشل مو مال عزيمه
لكن بيتج و مكانج ناطرينج




ابو اسحق
اشكرك انت من كل قلبي على كومنتك

فعلا الحياه مو كلها حلوه
و لا العلاقه كلها رومانسيه و حب


اصلا كبرنا عى هالشي

لان العلاقه الحين تبني على اختيارات العقل اكثر من القلب

و بما ان القلب مسوي كونترول
و العقل بعد

فراح نقدر وجود ايام بارده
ووجورد ايام عاديه
بسسسسسس مو دايما جذي





جنون احساس
بالظبط
اناااااا وايد
كنت مع مقوووله


اقظب مينونك

لين اكتشفت ان انا المينونه الي صابره على هالعاهات !!

مشكووره حبي

طمنيني اشلون امتحاناتج؟



بيرل
فعلا كلامج صح

هذي حالات يمر فيها كل الناس

صج وايد ناس مثل ما قلتي ما يبون يتعودون

و الي اعرفه احسن من الي ما اعرفه
خليني اقولج شي

بعد علاقتي الاولى الي دامت خمس سنين
قعدت بعدها سنه و نص ما اكلم

فلما بديت اتقبل اني ادش علاقه ثانيه
و لا حظي بعد 6 سنين و نص او سبع سنين !!!

لقييييييت الشباب تغيروا
الناس تغيرت المفاهيم تغيرت

العلاقات نوعين

زواج و اذا باخذج بطق باب بيتكم ليش اكلمج
او سكس

و ها احنا ما انتقبله

فضعنا
بين هالرياييل

مستوا شباب مزري و بنات يخرعون

دشي الهافي فايف و الفيس بوك
و شوفي الطريقه الحديثه للتعارف

منو بأمن يعطي قلبه حق جذي اشكال

انا قبل
كلمه سكس عمرها ما مرت علي في العلاقه و لا النكت و لا حوارات

كنا قمه في الاحترام
حتى لو قالي شتشوفين و كنت اطالع سكس اند سيتي

اقوله كاري براد شو

يفهم خلاص


مدري ليش كنا بالجامعه و صغار
او الحين صار السكس شي مهم للبنات و الشباب
بطريقه مغيبه العقل

مدري

حتى الي كان عندي
ادري انه 24 ساعه يمارس السكس
بس بعيد عني
و ما يقول

و انا مسويه نفسي غبيه
و مصدقه
ان حياته وايد نظيفه لانه اخلاقه عاليه

و طل
لا السالفه جذي و لا شي
بس لاني ما ابي اسمع كلام يجرح
او احط في بالي هالانسان مو زين


بيرل
لو بتكلم بقعد لي باجر

خليني اسكت

lawyer said...

tresten


حياااااااااك الله

بتفرغ لك الحين عدل اليوم انا فيني هذره من الصبح

شاربه كوبين قهوه فمعدله راسي عدل

شوووووووف تاكد و تيقن
مو انت بروحك مريت في هالحاله
انا مريت

و رفيجاااااتي كلهم يمرون

و اغلب الناس نفس الشي

و اغلب الشباب مثلك بعد
مو عيييييييب فينا او فيك

بس مو حاله ان كل ما تعبنا بندور
لان احنا فينا عيوب

فلازم انتقبل عيوب الطرف الاخر

لكن مرات ينفجر البركان

و تصير الحاله متعبه
فاحسن شي

الابتعاد

انصحك تشوف فيلم بريك اب

وايد حلو




زاجل
حيااااااج
او حياااااك الله

اشكرك\ج انا
على مرووووووووووورك

:)

3ateeja said...

الريل ينصبر عليه ..لأن المره مو كل ساع لها ريل بس شي ثاني وركزي على شي ثاني لا والله
فمان الله
فمان الكريم
ثم
الله بالخير
الله بالنور
واحنا الحريم فوق الثلاثين تحت الخمسين ترى نحب بسرعه
ونكره بسرعه
عندج مثلا اخيتج عتيجه لا يمكن انها اتأقلم مع واحد ليششششششش؟
لأنها اتدور الكمال
وهي بالنهايه مو كامله
شفتي التناقض :)
كويتيه ماكو فايده

White Wings said...

موضوع مهم فعلا
صحيح، الكثيرين يستسلمون "للتعود" في العلاقة، البشر بطبيعتهم ما يحبون التغيير، وتلاقين الكثيرين مستمرين في العلاقة من هالباب ومن باب "اقظب مينونك" شيئ مؤسف فعلاً
المشكلة انه مجرد ما يصير زواج وييون الأولاد، تتفاقم المشاكل و طبعاً للصبر حدود وعندها يوصلون لنفس النتيجة وهي الانفصال ولكن يكون الوقت متأخر والخراب أكبر
طرح جميل
شكرا لك

Purplecious said...

صباح الخير

أنا أقول اقظب مينونك

لأن الحياة جذي
الحياة مشاكل

سواء اللي متزوج أو اللي في علاقة
يعني يهدها أو تهده لأن كله نجره و مشاكل و هواش؟

أكو حياة ما فيها نجره و هواش؟
و هذه حالته يقعد يدور او تدور اللي في بالها و اللي يتوالم معاها؟

موضوع التأقلم يعتمد على حسب كل واحد و شخصيته

في ناس تتحمل و في ناس ما تتحمل

و اللي تفكر انها بتغير واحد و بتغير أطباعه ترى غلطانه

اللي يبي الاستمرار لازم يتنازل

يعني اللي توهم متزوجين و ما يعرفون بعض يبيلهم سنتين ثلاث يالله كل واحد تبين عيوبه

بس خلاص انتوا تزوجتوا
لازم تتنازلون شوي
الا اذا كان شي جايد عاد بس انا قاعده اتكلم كفكرة

يعني اتوقع الواحد أو الواحده تفضل تعيش بنجره و هواش مع حبيبها و لا انها تعيش وحيده و تعيسه

zajel said...
This comment has been removed by the author.
zajel said...

ما ادري بس تجربة مثيرة للحماس والرغبة.. الزواج مرة أخرى بعد الانفصال أو قصة حب فاشلة .. حيث الفرصة الأخرى... والمرأة الأخرى أو الرجل الآخر.. وحيث محاولة إثبات الذات مرة ثانية.. بعد فشل العلاقة الأولى.. إنه الزواج "كلاكيت ثاني مرة".. وكأنه فيلم سينمائي سيشاهده الإنسان مرة أخرى ولكنه يتوقع لنفسه نهاية جديدة مختلفة " سعيدة "، ليس فيها فشل.. أو لوم من الذات أو الآخرين، ليس فيها جروح نفسية، بل فيها النجاح والتعويض، ولكن نهاية هذا الفيلم مرة أخرى هي "نهاية مفتوحة".. أي متروكة تماما لتفسير وعقل وقلب من يخوض التجربة ثانية.. وبالأخرى لموقف جديد يختلف تماما عن موقف التجربة الأولى.. ولكن كيف؟!


ما شاءالله عليك

بنت الشامية said...

لوير......حبيبتى انتوا شمفكرين

الزواج....سعادة فى سعادة واناسه فى

واناسه,,,وحب وغرام.....اكيد مو جذى


الزواج شراكه بين رجل وامرأة....من

بيئتين....مختلفتين فى كل شيئ

ولازم يتكيفون ويصلون الى حلول وسط

لبناء بيئتهم الجديدة المختلطه

اول شيئ فى الزواج ينتهى الغرام و

تبداء الالفه والرحمه والموده والسكنى

ويبداء الاخذ والجذب....والمرأة الذكيه

المخلصة فى حبها...تجتاز هالمرحله باقل

الخسائر.....اما الثانيه بيدها تصل

الى نتائج غير محموده

وطبعا ياتى بعد ذلك الصبر...الصبر على

امور يتحملها الانسان مو فوق طاقته

مثلا التدريس هو ماله شغل فيه

الجمعيه ما يدخلها

الطبيب ما يودى العيال

لا لاتطلعين مع رعج

قعدى بالبيت كله تطلعين

الخ الخ الخ الخ

ترى هذى كلها امور تافهه....مو اساس

العشره.....اهم شيئ المعامله

وترى الزوج والزوجه بشر يخطؤن ويصيبون

النصيحه ان نمسك العصا من النص


وإن نقصر من طول اللسان لسانك حصانك

ان صنته صانك....مهما كان الرجل هو الاقوى

ويقال ان كل خمس سنين من الزواج

المشاكل تتغير وتختلف.......وتحتاج سعة

صدر وايد وايد وايد

بس لما يكبرون العيال ويطخ ابو العيال

تبداء حياة جديده بين الزوجين

تجنون ثمار هالصبر والتحمل وتضحكون

على خنقاتكم واختلافاتكم


ويتجدد الحب القديم....ويصل فى

بعض الاحيان الى الغرام والهيام


مو بس حب......لان كلاكما وصلتوا الى سن
النضوج.......الحياة يبيلها صبر...ثم صبر

سبحانه بني السما باسبوع جلة قدرته

الانسان ما يقدر يصبر جم سنه

بس كله مستعجل يبى النتائج بسرعه

عيل ليش سموها حياة


سامحين لوير .....وايد طولت عليج

انا اكتب لج نتائج تجربتي الشخصيه

المهم نوعية الزوج......؟؟؟؟

مجرّد... أنثى said...

افضل علاقة اساسها الحب مو التعود
ولا تقولين ما في... لا في ونص
الحب شي غالي ورائع قليل اللي حسوا فيه لان مو كل من دش بعلاقة زواج او معرفة معناته ان الحب دخل قلبه

الاحباء لا تباعدوا وفرقت بينهم الظروف يظل الحب يجمع قلبهم ويظل مثل الموج يردهم لشاطئ يجمعهم من يديد

احيانا نلتقي بانسان نقدر نقول عنه توام روحنا.. يمكن نادر هالشي يحصل ونادر ان الحب الحقيقي يجمع اثنين.. بس ترى الدنيا ما تخلى ومثل هالعلاقة موجود

lawyer said...

عتيجه
انا وياج كلنا نبي الشي الزين حق نفسنا

لكن اذا حبينا ننسى الكمال و الشروط الي حطيناها

كلها او نتغافل عنها
لكن مع الوقت

الواحد يحس ان خلاص

تعب من كل شي و من حتى احصاء العيوب



وايت وينجز
حيااااااااج الله نورتي

كلامج و شرحج اهو الاجمل

و من بعرف ان اختياره غلط
في البدايه
الكل يسكت عشان المركب تمشي

بعيدن يوصلون لمثل ما تفضلتي
ان يكتشفون اغلاط بعض






بربل
شنو الشغلات الي ما تقديرن تتغاضين عنها؟؟

شي نسبي يختلف من واحد لي الثاني

وحده تقول ما اقدر اصبر على واحد يشرب
و الثانيه تقوا اهم شي عندي يشرب

شغلات مالها اول و تالي

لكن انا مع مسك العصا من النص





زاحل
صح يمكن
بس على قولتك محد بخسر الا احنا
لي متى التجربه
و الانسان جم مرا بعيش
نوصل لي منتصف الثلاثين و احنا انتكيف و اندور
؟؟

lawyer said...

بنت الشاميه
اذا قلت لج شي مدري بتصدقيني او لألأ

قريت كومنتج اكثر من اربع مرات

و امشي و اقول حق صاحباتي و حتى امي قريت لها الكومنت

من كثر ما عجبني


فعلا كلامج عين العقل و الصواب
انا ادري و انا مو حاطه في بالي اصلا ان بكون الزواج كله حب او وناسه


الزواج دنيا و حيات
يوم فيها حلو و 10 مر
و حياه و مسؤليه و عيال


و مشاكل

لكن يبقى التفاهم

ماكو بيت يخلى من النجره و المشاحانات

اصلا الريال بالذات اذا مرته ما حنت عليه
قالها اشفيج طاخه
اشعندج

سولفي

تحجي



وبعدين المرا العاقله اهي الي تعرف اتعدل الريال

و تمتص غضبه و تحتويه

و مع العشره بتفهمه من عيونه


بالعكس تعليقج ابد ما كان فيه اطاله
كثر مافيه خبره و فيه افاده لنا كلنا


اشكرج من كل قلبي
اشكررررررررررررج
بكل ما تحمله هالكلمه من معنى

عسى الله يخليلج عيالج و ريليج و بيتج
و يحفظج و يعطيييج احسن مما تتمنين
و الامتحانات قربت اتخلص

عسى ربي ما يخسر تعبج و تعب عيالج


الله يحفظج

lawyer said...

مجرد انثى

حيااااااااااج الله نورتي

مشكووووووووووووووووره وايد على التعليق الرائع

بس اقولج شي


هزتني هالكلمات



الاحباء لا تباعدوا وفرقت بينهم الظروف يظل الحب يجمع قلبهم ويظل مثل الموج يردهم لشاطئ يجمعهم من يديد


فعلا كلامج صح

الله يجمع كل المحبين و يديمها محبه في قلبج

zajel said...

و الانسان جم مرا بعيش
نوصل لي منتصف الثلاثين و احنا انتكيف و اندور
؟؟
طيب فطوم يعنى كيف نعيد التجربة ذاتها ولكن بنهاية سعيدة أخرى؟! وكيف نستثمر الفرصة الثانية في الحياة الزوجية، والتي قد تكون الأخيرة؟ أسئلة مهمة نطرحها على أنفسنا عندما نعطى فرصة ثانية في امتحان السعادة..
بس الزيجات الثابية لا تستمر! مما يضع تحديات صعبة أمام من يحاول أن يعوّض ما فات.


أن "الفشل " في الزواج الأول يبقى طويلا جاثما على الصدور.. وحتى عندما يحاول الإنسان تعويض ذلك الفشل في علاقة جديدة وزواج ثاني، يظل هذا "الفشل " يتردد في داخله وفي أرجاء بيته الجديد! وكأنه "شبح الأوبرا" الذي يظهر في الظلام فقط لينشر الخوف، كما تخبرنا تلك المسرحية الشهيرة.. وهكذا يظهر "شبح الفشل " الآتي من الزواج الأول في حياة الزواج الثاني.. حيث الخوف من تكرار التجربة نفسها، والخوف من تكرار نقاط الضعف نفسها أو الوقوع في المشكلات ذاتها، لكن القضاء على "شبح الفشل" الذي يطاردنا في علاقتنا الجديدة، يأتي من "مواجهة" ذلك الفشل من خلال تحديد نقاط عملية وأسلوب تفكير جديد للتعامل معه.
فإن كانت هناك أخطاء بدرت منا وتسببت في انهيار العلاقة الأولى والزواج الأول، فلا بد من "الاعتراف" بها أمام النفس بل أمام الآخرين أيضا.. لأن الاعتراف بها يعني عدم الاقتناع بها والرغبة في سلوك جديد.. فكل علاقة زوجية منهارة لا تعني أن هناك من هو مذنب بالكامل في مقابل ضحية بالكامل.. بل غالباً ما يشترك الطرفان في ذلك الانهيار، بدرجة أو بأخرى، حتى ولو كانت تلك الدرجة ضئيلة.


إن كانت علاقة الزواج والحياة المشتركة هي قصة إنسانية جميلة.. فهذه القصة تخضع لقوانين الدراما نفسها.. فالبداية تأتي عادة مشوقة جذابة فيها رغبة في اكتشاف ومعرفة الآخر، والسكن إليه ومعه.. ثم تأتي مشاكل الحياة اليومية، ومشاكل الاختلاف بين الطباع لدى الزوجين.. وهنا تتعرض تلك القصة - قصة الحب، إلى ضغوط متعددة تشكل "العقدة" التي تعني إما حلها بشكل ناجح من طرفنا أو بانتصارها علينا في الحياة المشتركة، لذلك فالزواج الثاني كفرصة جديدة هو "قصة درامية جديدة"، لكن تركيبتها العامة ستتكرر مثل القصة الأولى أو الزواج الأول.. من بداية وعقدة.. لكن ما يجعلها تنجح هو أسلوب التعامل مع مشاكلها أو عقدتها، حيث "لحظة التنوير"- حسب التعبير الدرامي- والتي تأتي من التفكير السليم، وهي اللحظة التي فيها نستطيع إدراك الحل لمشاكلنا الزوجية.. والتعلم من أخطائنا السابقة في العلاقة القديمة..
والاستعانة بقوة خارجنا وهنا نستطيع القول ان " كل الأشياء القديمة قد مضت، وأن هذا الكل قد صار جديدا..
أي: أسلوب التفكير.. التعلم من الأخطاء.. الرغبة في مواصلة السير مع من اخترناه..

وهنا يصبح "فيلم الزواج " في العلاقة الجديدة والفرصة الثانية له نهاية جديدة سعيدة..
بعكس النهاية المأساوية للزواج الأول.


ما شاء الله عليك

بنت الشامية said...

لوير:

تصدقين دمعت عيونى من هالدعوات الحلوه


انت المشكوره...انا حبيت بس قول ان

الصبر مفتاح الفرج....وان القناعة

والرضى كنزان لايفنيان

اتركج بسلام لان ابونا توه داخل

ياويلى اذا الغدى مو على الطاوله

شيفكنا.......سلام

kila ma6goog said...

اول مرة اتفق معاج

2 u ALL said...

هناك الكثير من العلاقات الزوجيه الموجوده في مجتمعنا -للأسف- ينطبق عليها ما سطرتيه في مقالتك ..!! وهذه مشكله كبيره بحد ذاتها ..!! التعود هو جزء من مكونات الحب ولكنه لايمثل الحب كله..!! والصبر هو نوع من أنواع التضحيه في الحب وهو ليس التضحيه الوحيده ..!! فالتعود يجب أن لا يسبب الأذى لنفسك ..!!والصبر والتحمل يجب ان يكونا لشخص يستحق ذلك ولديه قابليه للتغير والتطور والتحسن ..!!؟

والناس "قدرات" فمنهم من يستطيع الصبر ومنه من لا يستطيعه ومنهم من يضحي ومنهم من لايضحي ..!! ويعتمد سلوك الأنسان كثيراً على عوامل خارجيه مثل الاطفال والمصالخ المشتركه بين الطرفين ومراعاة الأهل ونظرة المجتمع وما الى ذلك من الأمور..!! والناس في الصبر والتضحيه بين هذا وذاك ..!!؟

MANAF said...

افضل حياة تكون فيها شوية مشاكل

على شوية غيره وشوية حب وشوية ينون

وشوية عقل ورزانه


ولو مو الملح والسكر كان ما عرفنا طعم للحياة




احلى لحظه في اي علاقة حب


اهي اول مره اقول فيها

أحبك




عادتا تكون عقب الساعه 12 بالليل



:)