Sunday, August 26, 2007

هل جزاء الاحسان الا الاحسان .....ليش قلت هالايه؟؟


هل جزاء الاحسان الا الاحسان
هذي ايه في سوره الرحمن استوقفتني
لدرجه البكاء و للاسف بكيت ليس من خشوعي و لكن بكيت لاني احتريت
فعلا انقهرت و احتريت
هل جزاء الاحسان الا الاحسان
يوم كنا صغار اول ما تعلمناه وعرفنا قيمته عدل هو حبنا لهذا البلد
انا وحده من الناس لكوني اموت على شي اسمه الكويت تعلمت حب هذي البلد من الصغر و انغرس فيني بشكل مو طبيعي
لدرجه اني من انا ياهل البس 24 ساعه نفنوف على علم الكويت
و احفظ الاغاني الوطنيه كلها
و احب بابا جابر و بابا سعد حب جنوني لدرجه اني من انا ياهل معلقه بداري اعلام الكويت و بوسترات صور بابا جابر
الكويت ربتني
الكويت حبتني
الكويت علمتني
الكويت عطتني
تدرون جم كلفت انا الكويت في التعليم و الصحه
تدرون انا وجودي في هالبلد و استخدامي لمرافقه جم مكلف بلدي؟
احبها مو لاني تعلمت و نقش فيني حبها من الصغر
احبها لاني اعشقها
فردي للجميل الي لو اعيش العمر كله ما اوفيه للكويت باني احبها و اكون مخلصه لهذي البلد
هل جزاء الاحسان الا الاحسان
ايه بكتني ؟
متى؟
ليش؟
خنكون صريحين
لما نحمد ربنا و نشكره ان احنا كويتين
فهذا دليل ان احنا نحب الكويت
ولكن ليش انحبها ؟
هل عشان اهي بلد غنيه و موفره لنا كل شي فلما نسافر انحس انه احنا شيوخ و مدللين و مترفين احسن من باقي دول العالم؟؟
هل حبنا حب مصلحه و طمع؟؟
او هل لو كانت الكويت فقيره و احنا متحسرين فيها هل كنا راح نحبها؟
احنا جذابين ترا
بدليل ازمه سياسيه زعزعتنا و تفرقنا و بقنا و سوينا البلاوي
هل جزاء الاحسان الا الاحسان
يوم صار الغزو كثير منا عرف قيمه تراب الكويت
و يوم ردينا ؟؟
ناس عمرت و ناس انهبت؟
الي انهبوا
بقولهم كلمه
هل جزاء الاحسان الا الاحسان؟؟
حتى الي ينادون بالديمقراطيه جذابين؟
وين اهل المنابر السياسيه الي يصرخون من رداءه الحكومه
ما اهم اكبر بواقين في البلد؟؟
عطوني سياسي يصرخ و ينطح باعلى صوته فقير؟
اغلبهم جذابين
و اغلبهم مصالح شخصيه
بس احب اقولهم هل جزاء الاحسان الا الاحسان

في فتره الانتخابات الي فاتت كنت في اجتماع لاحد اللجان
و قلت حق احد البلوقرز
شفتوا احنا الي متيمعين 30 واحد
و نصرخ باسم الحريه
و الكويت
و الدوائر
ما يندرا باجر منو فينا بكون وزير حرامي
و مدري منو بكون فينا عضو نصاب
و مدري منو فينا بكون فقير
و مدري منو فينا بكون حكومي
كلنا في النهايه انحب الكويت؟؟
ما اظن
لان الحب تغير او نظرتنا لهذي البلد تغيرت
اكلناها
حرقناها
نهبناها
اوهمنا نفسنا بحب الكويت
و لكن شنو سوينا لها
الكل يعتقد انه يحب هالبلد
لكن وين الفعل
حادثه بشار هزت المجتمع الكويتي
و الكل طب في امن الدوله و جهاز الداخليه
و رجال جهاز هذا الامن يشوفون نفسهم يأدون الواجب
و لانهم يجبون الكويت
و لانه ما يبون يتركون بلد بيد احزاب تلعب فيها
و بشار لانه يعشق الكويت
فيرا نفسه اكبر من كل الضغوط الي تواجهه من ايا كان وراح يحب هالبلد ويستمر
ماكو كويتي ما يحب الكويت عند نفسه

بس في كثير كويتين خانوا نفسهم و اماناتهم و خانو هالبلد
هل جزاء الاحسان الا الاحسان
كلمه اخيره من قلبي
تكفون حبوا الكويت عدل
تكفون بسنا فتنه
تكفون لاعت جبدونا
بسكم مصالح
و هل جزاء الاحسان الا الاحسان
خافوا الله في هالعيوز
اي الكويت في نظري امرأه عيوز تبي من يباريها
خافوا الله فيها


21 comments:

Reflections said...

الشكوى لله

كلامج يعور

بس ترى هالعيوز ما ترضى على عيالها
الي يحبونها

Mohammad Al-Yousifi said...

allah kareem

q8y_saint said...

لوير
بختصار شديد
لو الكويت فقيره
جان عدد سكان الكويت ما يتعدى 400الف اذا مو اقل
:)
بس خليها على الله

esTeKaNa said...

واي خنقتني العبره
يا ليت كل من يحس بهالكلام من قلبه
:(

بنت الكويت said...

المشاكل الي قاعده تصير الحين بالكويت سببها واحد
ان من أمن العقوبة ساء العمل
ولما اييه واحد ياخذ مكان قيادي بالواسطة واهو ما يستحقة هذا الشخص عمره ماراح يزكي واحد يستاهل راح يزكي واحد نفسه يوصل عن طريق واسطة

mo3arith said...

الكويت شكثر صرفت علينا ... !!! .. لا يا حبيبتي .. الكويت للكل ، والمال .. مال عام ... وكون الناس تعيشض على إقليم أو دولة ... فلا بد أن يكون شريك في الحقوق والواجبات .. حتى في الدين ... الناس شركاء في الماء والكلأ ؟؟!!... عجيبة والله ، إلا جان معتبرين إن الكويت ( نظام ) يصرف علينا - نحن الرعية - بقدر ولائنا له ، فهذا شي ثاني !!! ... بس ما كنت أتوقع هالكلام بصراحة منج انت بالذات ... واللي المفروض تكونين من مثقفي المجتمع ... المحامين ... للأسف ؟؟!

zajel said...

ك
و
ي
ت

بلد الديموقراطية والرأي الحر دائما منذ استقلالها،
أحبها لأنها جزء مني ... أحبها لأنها المكان الذي أبصرت فيه ابنتي النور ( رحمة الله عليك ابنتي ) ... أحبها لأنها المكان الذي كانت فيه زوجتي قبل الرحيل ( رحمة الله عليك زوجتي الحبيبة ) … .. .
الرقة ...
حرام عليكم ..غرس كل تلك الخناجر في ظهرها ....حرام
الديموقراطية ....
للأسف بدأت إساءة استعمال هذه الميزة،
في كويت هي مطرقة استخدامها الكثير ليثبت أركانا ديكتاتورية ...!
فطوم المفروض ينطلقوا منها لخدمة أبناء هذا الشعب فاذا بنا نجدهم يستغلون تلك المنابر وتلك الأبواب لبث الفرقة والمنفعة الشخصية

ما اعرف ايش أقول.......
. 'أنا كويتي أنا'. وكلي دموع.

2 u ALL said...

الله وأكبر على جمال توظيفك للمقوله ..!! نعم كلامك هو الحقيقه المره التي لابد أن نواجه أنفسنا فيها ..!! كنا على طول من صغرنا الى يومنا هذا نأخذ من هذه "العيوز" التي هي أمنا "الكويت" ..!! ولنسأل مره أنفسنا ماذا أعطينها بالمقابل ....؟؟؟؟؟؟؟؟؟؟؟؟

هذا السؤال يحتاج أجابه صريحه منا جميعا ..!! ولنحاسب أنفسنا قبل زوال النعمه ..!! ولنعلم ان النفط "سلعه ناضبه" أي زائله وفانيه ..!!؟

vancouver said...

ما ادري شاقولج يا لوير
:(

تدرين
؟
رغم انه كلامج عدل ووايد في صحة

بس احس هم الكويت
مو كارض كاشخاص
وااااايد ظلمت ناس

وايد في ناس انظلموا
انا اشوف انه حتى
الانسان الكفؤ اللي ما ينحط
بمكانه اللي يستاهله
ظظظظلم

فمابالج بالسكوت على
الحرامية ومهادنتهم
؟
مكافاة اللي ما يستاهل
؟
وغض الطرف عن اللي يفتري بالناس
؟
هذي كلها مظاهر واوجه للظلم


هذا كوووم والاوادم اللي عايشين وميتين
بنفس الوقت
البدون"
"
هذا ظلم
؟؟



احترام القوي
؟
ودوس الفقير
هذا ظلم


فقمت ما اشره عاللي
ما يحس بالوطنية
لانه البلد.. ما عطتنه جرعات منها


ما ادري شاقولج؟ بس
انتي صح ومو صح
بنفس الوقت
!

لا تكدرين نفسج لوير
خلي الكدر لنا
:(


بوسيلي كل شبر فيها
في الكويت
:***

zajel said...

لا تسأل ما يستطيع بلدك أن يقدمه لك، بل إسأل ما يمكنك أن تقدم لبلدك

الرئيس جون اف كينيدي


فطوم أنت الصح ..



لدي أملْ

Kwaitiyya said...

كلامج جان زين كل من يقراه ويفهمه

لوير.. أنا وصلت مرحله ما قمت أصدق ولا نائب ولا وزير ! كلهم بدون استثناء حراميه وجذابين ومصلحجيه
وصرنا نختار أحسن السيئين !
صرنا نقول ميخالف بوق بس سنع بالديره !
شفتي ليه وين وصلنا؟؟

وين اللي يحب الأرض ويخلص لها ويخاف اللع بالديره وشعبها ؟؟

لما أتذكر أجدادنا شلون كانو مساكين عايشين وكانو يسافرون 5 شهور بالغوص ويعبرون هالبحور واللي يموت واللي يستمرض واللي مادري شيصير فيه.. كل هذا عشان بس يعيشون ! وهم عشان يرفعون اسم الكويت

شوفي احنا بهالزمن شلون ساكتين والحبربش لاعبين فيها وأهل الديره القدامى انقرضوا ما يبون يمسكون شي من هالحبربش اللي امظايقينهم وداشين بخشومهم !
والله انس منقهره على ديرتي اشوفها جذي

لو الكويت عندها حلج ، تتوقعين شبتقول؟؟؟

Anonymous said...

كنت متابع لج
من اول بوست
في موضوع الإحسان
اللي أحب أقوله أن البلد تبداء من الفرد في المجتمع
اذا صلح الفرد صلح المجتمع وصلح الوطن اللي في الاساس قائم على هذا المجتمع
مجتمع يسب ويلعن بعضه متخلف
مجتمع يختار شرار الناس متخلف
مجتمع لا ولاء له غير المال مجتمع متخلف
مجتمع ما يحترم الكبير ولا يعطف على الصغير مجتمع وقح وجاهل
المدينه الفاظله غير موجوده
لكن فيه مدينه علم وأدب وأخلاق مدينة رؤيه وهدف مدينة تكافل وتعاون
مدينه مبنيه عل العدل
مع كل هذا التخبط يتم في هذا البلد ناس عقلاء ومدركين كل الإدارك أن الكويت بلد سلم وأمان وقانون ومؤسسات
صدقني
الجانب الأسودوالمظلم جانب يثير الفضول
وتدرين ليش يثير الفضول
لأن الجانب الأبيض والناصع والمشرق كبير جدا لدرجة تخلي النقطه السوداء شئ مزعج
في مقوله اعتبرها حكمه
تقول
تسقط الأحزاب وتحيا الوطنيه
أول مره أقرء هذا العباره قبل 15 سنه
وللحين أحفظ هذي العباره
الموضوع في نظري بعيد كل البعد عن السياسه
أحسه كلام
من القلب إلى الفلب

lawyer said...

صباحكم ورد

رف رف

قبل لا ارد عليج
بقووووووولج
شخباااااااااااااااااارج حدي ميسد يووو والله

العيوز فعلا على الي قاعد تشوفه ما ترضى

صاااااااجه




مطقوق
ايييييييي والله صاج




كويتي
اللع يكافينا شر الطمع
و الاطماع



استكانه
فعلا يا ريت هالشي يصير
لان طالع من قلبي شي حارني




بنت الكويت
حياااااج الله حبيبتي

اما الواسسسسسسطه خليها على الله
هذي بروحها عافستنا

اي والله يبتيها من امن العقوبه ساء العمل





معارضين

اول شي حياك الله اخوي و نورت لمشاركتك و اكيد انت عندك بوينت بتوصله بس مدري ليش حسيتك وايد منفعل

بوستي يا اخوي مو سياسي و لا ابي اضيف شي في على الجرايد و الكتاب الي قاعدين يتكلمون بالسياسه او احلل او انتقد

هذي قصه بقلبي
من الي قاعد اشوفه حواليني

ملينا حجي
ملينا تسويف ملينا انتأمل بالاصلاح الي يردنا لي ورا

كلامك عن مفهوم الوطن و تعريف الدوله حفظناه في ماده النظم السياسيه

و انعرفه من ايام الاجتماعيات

و لكن انت الحين بسألك سؤال بعيد عن البلوج و النقد سؤال اخت حق اخوها
معارض انت ليش اتحب الكويت؟؟

قولي ليش تحب الكويت؟؟

ليش حارق دمك على الكويت؟؟

السبب الي يخليك اتحب الكويت اكيد اهو نفس السبب الي مخلينا كلنا نحب الكويت

و مشكوووور وايد على اضافتك و تعليقك
و لا تقطع





زاجل
!!!!!!!!

اول مرا ادري انك عشت بالكويت؟




2 يو ال
المشكله يا اخوي اي الناس قامت تحسب ان ككونهك كويتين

و كأنهم يمنووون على هالديره يبون يشفطونها شفاط!!

اي لي متى ؟؟

اشحقااااا؟؟





فاكوفر
اي عاد انتي مسافره فتولهين عدل على الكويت

سكتي بقولج شي انتي لما تسافرين
عقب اشكثر تولهين ؟؟؟


عشان بعرف الي قاعد يصير فيني شي طبيعي او لألأ



زاجل
مشكووووووور

تسلم

دايما مطيب خاطري و رافع معنوياتي




الذيب
والله على هالصبح و القهوه يمي
و قريت تعليقك حدا عطاني امل
و رفع معنوياتي

انشاء الله يا رب نقوم يوم الايام بدون جانب اسود

و انشاء الله نعيش ايام مريحه بدون صراخ من عضو و تهديد باستجواب لوزير
و بدون بوق و بدون عفسه

امين يارب


صباحك مشرق يارب

Diver said...

اولا ابي اتحمدلج بالسلامة بعدين يقولون لقلوب شواهد اقري الي كتبته قبل جم يوم
http://mrdiver.blogspot.com/2007_08_26_archive.html

الزين said...

بيييييييييييييييه

كل هذا صار وانا مسافره

انا الظاهر وايد طافني

sologa-bologa said...

صح لسانج

بس الكويت مو عيوز نباريها
الكويت عروس نحوفها ونخدمها ونحميها

والله المستعان

أول مرة أقرا بوست لج يكون انفعالي
بهالطريقة وطالع من القلب

ودمتم بحب وود

ray said...

lawyer..

كلامج كله صح .

لكن في بعض المرات .. الانسان من حرصه و حبه للكويت ينتقد كل شي مو لأنه يكرهها

لا لأن يحبها ... و يحبها وايد

lawyer said...

Diver
صج والله !!

سبحان الله

يالله كاني بخلص كومنت و بروح اقرا

زوزوتا

نووووووورتي
حمدلله على السلامه

و سامحيني على االلقافه
هههههههههههه



سلوجا
حااااااااااس اشكثر الموضوع حاز بخاطري والله

اي وربي محتره




راي

طبعا النقد ضروري
لاند من النقد ولكن شنو حل هذا النقد؟؟

صح ؟
اشكرك مروووووووورج
بوستج الاخير قمه في الرقي

|:| DUBAI |:| said...

السلام عليك يا محامية

الله يخلي الكويت لأهلها : )

و يبعد عنكم الشر

* * *

تصدقين و لا ما تصدقين ..؟

اليوم 4 ساعات وقفت فيها شغلي ..و يلست أقرالج من اول بوست لين أخره

من قلبي ضحكت ..حسيت وايد انتي شفافة يعني ورقة بيضاء :)

lawyer said...

صباحج ورد اختي دبي

واي قريت اسمج حسيت بوناسه والله كمتعت كل الكويتين الي مناشبينكم في دبي

صح ؟

قوليها عادي

مشكووووره وايد على تعليقج
مشكووووووووره اكثر على انج عطيتيني من وقتج

مشكووووووووووووووووره على كل حرف قريته

يمكن انتي قريتاي و استمتعتي بسسسسس ما تتصورين اشكثر انا طايره فرحه لتعليقج و كلامج

و انشاء الله ما تكون اخر زياره لج


:)

|:| DUBAI |:| said...

هلا لوير

خخخخخخ..هاي السنة ماشاء الله ترس كويتيين و سعوديين


بس تعالوا بالشتاء مب ألحين ..حر موت ..يوم أشوفهم جي أقول لووول

تسلمين الغالية : )