Monday, June 29, 2009

الجزء الاخير



وانا بقمه زحمه الشغل و الحوسه في المكتب ..
اطالع الساعه 12 الا ربع
اخذ جنطه الميك اب و اروح الحمام ..
امسح الميك اب و اتيدد و ارد احط السيرم و اطلع اروح مكتبي احط اغراضي و بعدها اروح اصلي..
وانا احوس بجنطتي
رفعت راسي والا جنه هذا زول مشاري ..
نزلت راسي و عقبها استوعبت وطالعته عدل
لألألأ هذا فعلا مشاري
ابتسم و راح
ابيه اشيايبه الحين !؟
وعندنا و في هالحزه
صدفه !!
اقوم من مكتبي
اروح احاول اشوف منو وياه
اها.. هذا موظف من اتش ار
بس ما اعرف شنو اسمه
ارد مكاني بسرعه
ارفع السماعه ..
اتصل على رفيجتي الي في اتش ار
و اسألها عن الموظف الي بقسمهم الي كلا اييب وياه قهوه عربيه ؟
تقولي اسمه..
ممممممم العايله غير
بس ياربي اشياب مشاري الحين ..
ادق على صالح و ابلغه في الي صار
واقعد افكر طول الوقت عن سبب وجود مشاري في شغلي ..
اخر شي وانا بروح اصلي اعصب من نفسي و اقولها بس خلاص عورتي راسي
ارجع
اشيك ايميلي ..
ايني ادد بالامسن
ويطلع مشاري مسويلي ادد !!
أأأأأأأأأأه فهمت الحين سبب وجوده

احلى سؤال ممكن يسأله شخص لبنت حدها مهتمه فيه ..
في بحياتج شخص ثاني ..؟؟
حزتها شي في القلب يرتعش و بكل عيون فرحانه ترد
لألأ
يخلص الدوام
وارد البيت واانا احس اني فراشه اطير من الوناسه ..
واخيرا ياا يوم بحياتي شكله غير

طريج الرده كل يوم زحمه و غبار
اليوم الدرب روعه

اول مره احس اني ضعت بالطريج ولكن وصلت لان السياره اهي ساقت فيني لي البيت
اشلون ما ادري
بس كل الي اعرفه اني ماكنت بوعيي كنت بعالم اخر ..
افكر هل اقول السالفه حق لميا
او امي قبل
ولاول مره بحياتي يكون عندي سر و اخاف عليه
و اتذكر المقوله الي تقول



من استعجل شي قبل اوانه عوقب بحرمانه ..
سكت و كتمت و بديت انطر ..شنو الي ممكن يكون و يصير..



********




ارجع من الدوانيه بالليل
الوالده نايمه ..
ابي اعرف شنو صار على الموضوع..
انطر لي صلاه الفير ..
احس بصوتها واهي بالدار قاعده
اطق الباب و ادش ..
انا: يما اشصار على الموضوع الي قلت لج عنه
هي : اسم الله عليك مشاري اشفيك !! شمسهرك لي هالحزه
انا : لا مو سهران .. بس توني ساري شفت ليتج مبطل قلت اسألج..
هي : هاو حمدلله و الشكر توك ساري .. !!و بتزوج بعد !
شنقول حق الناس عندنا ولدنا بياخذ بنتكم و يقطها و يسهر عند ربعه لي نص الليل هاا عسى تزوجونه !؟
انا : هاهاهاها يما اشفيج كليتيني .. انزين اشصار ..
هي : ماصار شي طبعا .. من صجك بتعطيني رقم ناس لا اعرفهم ولا ادري عنهم و ادق عليهم
انت الحين مو صارلك 6 شهور تاكل قلبي دوريلي دوريلي ..
وتوها عمتك من يومين لقت لك هذي الدكتوره الي تهبل يمدحونها اتينن يقولون خوش بنت و دقت عليهم عمتك و بتروح تشوفها السبت الياي ..لانها امس ردت من مؤتمر ..
وعمتك خلاص حددت موعد
انا : شنو !! اي موعد من قالج بدش بيوت ناس اشوف بناتهم وانا ما اعرف عنهم شي !! انا الي بتزوج والا عمتي !
هي: ربع عمتك هذول وانت قلت لنا دورولي .. خو احنا بعد اشدرانا ان حضرتك بتخطب من روانا و فجأه اتييب لنا ارقام و يالله دقو عليهم !
انا : يما تعوذي من بليس اي ناس ادش بيتهم و انا بخطب وحده ثانيه
اصلا حرام الله ما يرضى ادش بيوت ناس وانا في بالي ناس ثانين
هي : دكتوره تهبل شي شي شي تمدحها عمتك ..
انا : الله يوفقها و يرزقها الي احسن مني بعد بس انا ما اني داش بيت الناس
عيب تراا و بعدين ربي يحاسبني
يماا قولي حق عمتي ماني رايح وانتي تدرين اني ماراح اروح وخافوا من الله عندكم بنات لا اطقون بيبان ناس للطماشه و اذا انتو الشور مو بيدكم لا ادشون البيوت و تأملون بناتهم ..
اقوم وانا حدي متنرفز
مو عشان اهي مادقت عليهم لألأ
لكن على سالفه ان يكلمون من وراي ناس و يحطوني امام الامر الواقع ..
ليش الامهات مرات يتخذون قرارات بحياتنا ما يفكرن حتى يردون الشور لنا !!


وبعد يومين ..
اروح اصلي العصر في المسيد ويا الوالد
وانرد نقعد بالدوانيه
اكلمه في الموضوع واني انشاء الله عزمت اتزوج
و قلت له من اهم و منو اهلها و كل الي اعرفه عنها
طلع الوالد يعرف عمها و ارتحت لانه عرفهم و ذكرهم بالخير ..
الحمدلله .. اكبر نعمه لما الواحد يحط في باله يرتبط في انسانه و ينذكر عنها و عن اهلها كل خير ..
وسألني اذا استرخت او لأ
واذا متأكد و معزم عالزواج او لأ
او اني فكرت عدل ..
طمنته ان مستخير من اربع شهور فيها ..
واني مرتاح و اني جاهز و متوكل على الله
واني مرتاح ولله الحمد..
وقبل لا اطلع من الدوانيه قلت له يبا عط الوالده موافقتك و انت قولها اتدق على الناس ..
طمني الوالد و قالي خل الموضوع علي ..وابشر بالاخبار الزينه



*********************



وااي مر اسبوعين او اكثر عقب ماياني مشاري الدوام
وماكو اي اخبار منه او عنه ..
اكره شعور بالدنيا الانتظار
اصلا اانا شنو قاعد انطر مدري !!؟؟
بليز بليز نوره خفي من التفكير و خليني اعيش حياتي طبيعيه ..
"قاعده اكلم نفسي وانا بالسياره بطريجي للافنيو "
انزل من السياره
ادق على لميا
انا: هاي وينكم ؟
لميا : نابكت
انا: انزين وين صاير نابكت ؟
اي صوب
لميا : انتي اصلا وينج
انا : قاعد اصعد بس مدري اي مدخل ..
لحظه لحظه
اناا الحين قبالي لينوتر ..
لميا : اولا انتي اشوداج هناك ؟
عطي لينوتر ظهرج اخذاي يمين
كملاي سيداا لي اخر شي اذا شفتاي هاجن داز صعداي فوق اهو فوقه ..
انا : اوكيه يالله باي .. دقيقه و اكون عندكم ..منو وصل؟
لميا : انا و انا و انا و انا و انا و و انا ..وايد صح !؟
انا : انتييييييييييييييييي ليش جذابه صرعتيني ساعتين يالله و يالله و البنات و تأخرتاي و اخر شي انتي بروحج بس الي واصله !
دخلت نابكت حسيت فجأه اني مو بالكويت ..
المكان هادي
رومانسي
بلاك اند وايت ورد روز
للحظه وحده حسيت اني سافرت
رحت صوب التيراس برا
نافوره و الكراسي العجيبه الي حسستني اني في شوارع باريس
نابكت شي غير طبيعي
صرت اتخيل نفسي اكون ويا مشاري هني
او ياريتنا شفنا بعض في مكان رومانسي مثل هذا
اسأل لميا خبيره الكافيهات ..
انا : متى فتح نابكت ؟
هي : من اسبوعين
انا: وااو حده بصير ناجح .. شكله اينن و القعده فظيعه
اقولكم شي بس ما تزعلون !
كلش ماودي انتو وياي



نضحك كلنا و نستمتع في الهوت شوكلت ..
و فجأه يصرعنا الديجي الي مايتناسب ابدا ويا المكان
تتصل امي تسألني متى برد البيت لان الوقت تأخر ..
استأذن و ارجع



اييكم احساس فجأه بالمقص و سده النفس لما تحسون ان حوالينكم قاعد يصير شي بس ما تدرون شنو اهو..؟

ارجع البيت
عيون امي ودخول ابوي الدار
حسسني ان اكو شي
مشكله امي كل شي بحياتي تنسبه لها
نجاحي تنسبه لها
شكلي اذا احد مدحه تعتقد بسببها
اي شي يسبب لها السعاده عن طريقي تنسب الفضل لها
ياني احساس ان اهل مشاري متصلين
شي قالي
احساسي و نظرات امي ما تجذب
هل ممكن يخوني احساسي؟
تدخل علي امي الدار
وانا قاعده البس
هدومي كلها على الفراش
تشيل امي هدومي و تعلقها و تتحلطم على اني انسانه مهمله و فوضويه و عمري ماراح اتسنع واني ما طلعت عليها في الترتيب
وبدون مقدمات تقولي ..
هي : سامعه في بيت فلان الفلاني
انا : لأ
هي: ماتعرفين احد منهم ؟
انا : لأ اشفيهم ..
هي: اليوم ناس متصلين علي داقين يخطبونج.. و الام بصراحه اسلوبها سنع
وعطتني كل البيانات عن ولدها و قالت سألو عنه .. وعطتنا كل التفاصيل
انا: شنو اسم الولد؟
هي: مشاري ..



قلبي يرقع
وبلحظه عرفت ان احساسي ما يخيب



وبعد ما سمعت اسمه
اعترف اني ماسمعت كلمه من الي قالتها امي
شي يسحبني و ياخذني لي بعيد عن سوالف امي شي
يخليني اخذ شاور و انسدح بفراشي افكر ..
لاشعوريا احتاج اكتب شغله وحده في ماي دايري اليوم

"Thank u god"



دزيت مسج حق صالح و قلت له
" اول مره ادري ان المعجزات تتحقق"
وسكرت جهازي
ونمت ..
يرن الالارم و اسكره
اطالع الساعه
واقرر مع نفسي ان ماني رايحه الدوام اليوم
تطق علي الباب الخدامه و احقرها ..
تطق علي امي الباب و اقولها
بناااام انا تعبانه
امي: اشفيج ؟؟
انا: انا عروووووووس
امي: اصصصص اصصصصص وقص لسانج لاحد يسمعج
قوماي ذلفاي روحاي الدوام ..بلا دلع
اقوم افتح باب داري
انا: هذا قرار مصيري في حياتي احتاج ارتاح و انام
و اقوم وانا مرتاحه عشان اصلي استخاره و ارد عليكم وانا مرتاحه
انا طول الليل مو نايمه قاعد افكر !
امي : انزين نامي بس لا تقولين جدام احد انا عروس .. مو زين
اسكر الباب و اعيش دور اني عروس صج
احاول اتقلب بس ما يتني النومه
خذيت ورقه و قلم و كتبت ..
المرحله الاولى
صلاه الاستخاره
المرحله الثانيه
التعارف
المرحله الثالثه
التجهيز


.. ....
وبعد اسبوعين من الاتصال .. شوفه الحريم..



احلى شعور بالدنيا ان تشوفين كل الي حواليج فرحانين لج
و ان الفرحه الي في هالبيت سببها انتي و مناسبه لج..
اهتم بادق التفاصيل
التيوليب الابيض
و يونفرمات السيرفس
عصاير لينوتر الي شربت نصها قبل لا اييون اهله..
بخور
وطقوس امي في تشغيل سوره البقره.. من العصر
وتذكيري بقراءه الرقيه الشرعيه الف مره بالدقيقه الواحده ..
صوت خالتي و اهي تشرف على الحلو
و المالح
وتردد
"وَأَلَّفَ بَيْنَ قُلُوبِهِمْ لَوْ أَنفَقْتَ مَا فِي الأَرْضِ جَمِيعاً مَّا أَلَّفَتْ بَيْنَ قُلُوبِهِمْ وَلَـكِنَّ اللّهَ أَلَّفَ بَيْنَهُمْ إِنَّهُ عَزِيزٌ حَكِيمٌ

صوت سيايير ..
اطل من الدريشه .. واسمع صوت الجرس
يبدا قلبي يرقع صج
و فجأه ينشف ريجي
اشرب ماي
و انطر احد اييني يبلغني في النزول
انطر شوي
دقيقه
عشر دقايق
محد ناداني
اشوف نفسي بالمرايه اكثر من الف مره
وارد اقعد بفراشي
اخاف اتعفس..
اقوم اوقف
حاله من التوتر عجيبه..
تفتح الباب علي امي و تقولي يالله
نزلاي ..
انا : منو اكو منو تحت؟؟
امي : الله يهداهم ما قالولنا قالت الام بتيي اتشوفج وياه
اثاريها يايبه العايله كلها !!
نقززززززتها قلت لها انا قايله اذا الله تمم بنسوي تعارف
بس هذي الخطبه داشه ويا عشر حريم التعارف من بتييب !
انا بنرفزه: يما منو تحت !؟؟
امي : امه و خواته وخالاته .. و يدته بس ماكو عمات كلش ولا يابت طاري الحموله شكلها متلاشطه وياهم مبين عليها قويه !
انا بصراخ :يماااااااااا مو وقتج كلش !
انا : اهو تحت؟
امي : لا اشلون يدش الحين اول انتي دشاي و اهو يدخل بعدين...
اقط العلج و اخذ حلاو
و اشرب ماي و اسمي وانزل ..
شعور النظرات و اهي تفترسني شعور محرج..
اقعد بمكان بعيد شوي
تناديني اليده اقرب عندها
و يتقاسموني خز
تختصر امي نظراتهم وتقولهم يالله نادوه يدخل ..
يدخل مشاري..
و تتجه انظار اهله صوبه و صوبي
هناك خط مستقيم متصل بين عيني و عينه
شي لايفصله لا منحى و لا خطوط عرض
شي خلاني اتواصل مع عينه لين قعد
ابستم
وابتسمت
قعد يمي و قالي شلونج بشفايفه بدون صوت
ابتسمت اكثر
و بدا قلبي يرقع اكثر
تقطع الجده تواصل عيونا و تقول: يما مشاري لا تقعد يمها اقعد قبالها عشان تشوفها و اتبصر و اهي تشوفك ..
مشاري : لا يما مرتاح جذي .. انا مو قاعد اشوفها و الكرسي ينفض جذي. يلتفت علي .. ويسلم
وارد عليه
كان طبيعي وما استحى..
قدمت له السيرفس العصير.. وطلب ماي..
التفت علي و سألني : تعرفين تسوين عصير..
ضحكت..



و نادتنا خالتي و قالت لهم عن اذنكم خلهم يقعدون بهالقاعه بعيدين شوي عنا ياخذون راحتهم..
قام اهو
وقمت انا
و رحنا..
كانت اول مره بحياتي اكلمه فيها وجهه لوجه
وكانت اول قعده لي وياه
و اول سالفه ..
مرت ساعه بدون مانحس
و
طلع من الباب
واحس ابي الايام تمر بسرعه عشان يتسكر علينا الباب..

انا اعيش فرحه لاتوصف معاه
ولكن عندي سؤال؟ ليش بالكويت الفرحه ماتكتمل الا بزعل الكل
استعد و اتجهز واهو يستعد
كنا انشارك بعض في ادق التفاصيل



جمعنا حب النظره الاولى
وحاولو الاهل يفرقونا بسخافات الحفله والتجهيزو الشبكه



وكان يردد انتي ملجتي مابي ملجه
وارد عليه انت عرسي مابي عرس
ونقرر انا وياه في نهايه المطاف
ان مانبي عرس و نكسر قوانين وقرارت امي وامه في العرس الكبير



انا : ترا من صجي مابي عرس كيفك لازم تكون كلمتنا وحده
جدامهم ..
هو: خلاص خلاص خليها علي انا .. انا راح اقول حق امي ان مانبي عرس ولا يصير خاطرج الا طيب .. ارتحتاي الحين..
انا : لأ ..
هو: افا اشفيج بعد..
انا : يـــــــــــوعـــــــانه
هو: هاهاهاهاهاها ياحلوهم الي يتعسرون لي ياعو..
انا: اي ترا من صجي اتعسر اذا يعت اشدراك؟
هو: اطلع من الدوانيه الحين اشتريلج عشا .. شنو مشتهيه ؟؟
انا: مممممم ماك ..
هو: عشر دقايق وانا عند بابكم .. مو تلطعيني
انا: بتييييييييبلي ماك هالحزه بنص الليل؟
هو: لأ بمرج نروح نشتري..
انا: اهلي نايمين
هو: انا اهلج
انا: اخاف
هو: تخافين مني؟
انا : لأ اخاف اطلع هالحزه
هو: نوره..
انا: عيونها
هو: مابي يمر عليج يوم اتخافين فيه وانا وياج..
انا: انزين عطني ربع ساعه واطلع بعدها..
وكان المفروض يوديني ماكدونالدز السره.. بس مدري اشلون صار طريج البحر..
تمشينا و اكلنا وردينا
قطيت راسي على الكشن و قلت له ..
مشاري اتصدق عمري ماحلمت في عرس ..
طول عمري افكر في حفله بسيطه
و بدله اوسكار دي لارنتا بسيطه
ودبله شوميه و بونيه فلاور
مسك ايدي و حبها و قالي : ناقصج بس كنيسه و جرس


يبا هالحجي مو عند امي و امج هالحجي عند ام جورج و ام جون..
عسى الله يعدي هالايام على خير وانتي طوفاي وانشاء الله بصير كل الي تبينه ولا راح اخلي احد يسوي شي مو بخاطرج ..


وفعلا نملج بالطريقه الي اخترتها وبالبساطه الي بغيتها
وبتفاصيلي الي طلبتها ..
انا ومشاري في اكبر فرح بالدنيا و اهو فرح قلوبنا
انا و مشاري في يجمعنا عقد واحد
كرسي واحد
ايد وحده
يساسرني : بترقصين
انا : لايمكن ما اقدر استحي
هو: واذا قلت لج عشاني
انا : نوو واي ما اقدر اصلا ما استعديت اني ارقص..
وينادي اخته و امي و يقولهم بترقص !!
اخته : اي اغنيه
هو:
القوس قوسك
انا : اساسره اكو عروس ترقص على القوس قوسك
هو يساسرني : اي عروسي انا ترقص عليها ..


حسه لي الحين باذني و اهو يقول : عيوني ماجذبت يوم حبتج
رديت عليه : وقلبي ماخطا يوم اختارك..



نسهر الليل كله و يجمعنا النهار
و انام الظهر ..
مدري اشلون قدرت انام بس من التعب نمت..



لما فتحت عيوني
لاعرفت انا وين ولا عرفت الوقت ولا اليوم
تسحبت بسرعه للحمام
غسلت و بدلت و عدلت شعري وشكلي
سحبت موبايلي و قعدت بالحمام اصور شغله ..
كوب فيه فرشتين اسنان
دش علي يسألني شتسوين !
انا : اصور
هو: شتصورين
اوريه الصوره
أنا : صار بحياتي انسان تشارك اغراضه اغراضي
لمني من ظهري ولفني لي الباب وقالي احلى شي بالزواج ان الواحد صار يدخل الحمام يلاقي براا معلق ورا الباب


وتعاهدنا نكون زوجين
متشاركين بالحلوه و المره في كل شي
بديناها في نظره في كافيه و نهيناها في عيون بعض

و

السبب كان صدق مشاعرنا.




44 comments:

lawyer said...

هالقصه استوحيتها من قصه حب بين اثنين بلوقر التقو بالصدفه في عالم التدوين
واليوم اهم زوجين

وكتبت هالقصه لهم بمناسبه مولودهم


الله يجعله من الذريه الصالحه انشاء الله


و مشكورين انكم شاركتوني انا فرحتكم


مشكروين ان كان بلوقي ملهم لكثير من قصصكم

مشكورين على السعاده الي دخلتوها قلبي و انتو تشرحون لي اشلون كان بلوقي اهو ملتقى لكم عن طريق الكومنت

و اشلون اليوم اتدشون و انتو تتذكرون ايام حلوه جمعتكم هني


الله يتمم عليكم فرحتكم
ويسعدكم من كل قلبي

The R said...

this is the first time i write a comment, i've been reading ur blog for months now, i just finished reading it few days ago .. yr a great writer loved all ur posts, cried on some, lughed on some .. :)

and this story is just sweet, gives u hope to the better future . . keep up the good work ;)

daggero said...

فتافيت الحياة حلووووووووة

ReLaaaX said...

اهم شي انهم تزوجو آخر شي ;p

عموماً برجع اقرا القصه بس باجر لأن الحين بقوم اصلي واطلب اللي مايخلي

Mu.Sij said...

lawyer madri shagolech






teslaaaaaaaaam eydeeeeeeech ;* wayd 7ilwaaa mashalla u r talented


alla yhaneehom o yes3dhom inshala ;p

Nikon 8 said...

بالمبارك ... أحب النهايات السعيدة
وتغلب الزوجين على سخافات وعداوات ما قبل العرس
!!!
أروع شي إن بلوغك هو مكان تعارفهم
:))
الله يتمم عليهم ويديم عليهم سعادتهم
آآآآآآآآآآآآآآمين

الزين said...

قصتج انعشت احساسي

خلتني اضحك رغم التعب

خلتني اقول باجر احلى رغم القلق

خلتني اشوف الدنيا بعيون الأمل

رغم الظروف المرهقه

تدرين شكثر احبج صح

الله لا يخليني منج يا فطيم ولا يغير علينا

:*****

alala said...

من احلى و ارق ما قرأت

شكرا على النهاية السعيدة و التفاصيل الروعةةةةة ... احلى شعور لما تقرين اشياء تشبهج :)))

الله يسعد و يهني ايامج ان شاء الله

ARTFUL said...

يسلمووووووووووووووووووووو


والله فقدناج يا فاطمة

لا تقطعييين


:)

نون النساء said...

أحب النهايات السعيده




ما تتصورين شكثر حبيت هالقصة
اكثر من قصة إمرأة من شفشاون
:P




لأأني وصلت إلى درجة صرت اقول ماكو شي اسمه


" هابيلي إيفر آفتر "

:/

joy said...

واااااااااااييييييييي
قعدت اصيح
حمدالله والشكر
الله يهنيهم ويتمم عليهم ويسعدهم
ويسعد اللي يقرا ويعطيهم اللي اببالهم

chandal/danchal!! said...

حمستي جبودنا على ما خلصتي


بس أشوة النهاية سعيدة


ومبروك ما ياهم

:)

Purplecious said...

والله هقيتج بتقولين هذه القصة خياليةو
جميع الأحداث والشخصيات بالمسلسل لا تمت للواقع بصلة. أي تشابه هو محض الصدفة


its just too good to be true!


الله يهنيهم و يسعدهم و يتمم عليهم

:)

|:| DUBAI |:| said...

o5aaaaaaaaaaay nanaaa ..Krboonsh :( kekekekekek !!

Ba9eee7 Walla lool

~ هند ~ said...

الله ونااااااااااااااااااسه ..

:))))))))

شكرا فطيم ..

الله يديم عليهم السعادة ويبارك لهم في ذريتهم ،،

:*

Unknown said...

ما باغووووووووووو يتزوجووووووووووووون

صارلي اسبوعين انطر

روعة رووووووووووووعة يا لوير..انتي فنانة

وتسلم اناملج الذهبية
:p

mimi said...

7abeet elqesa 3ashan esem meshari :P :* .. elqesa 3ajeeeeeeeeeeeeba gelt 7ag kil refejaty yegroonha :)

المقوع الشرقي said...

ما بغيتى
ومبروكيين
منه المال
ومنها العيال

ReLaaaX said...

وااااااااااااااااي الحمدلله ياربي الحمدلله

الله يهنيهم ويوفقهم



ماغير اقرا واتغورق عيوني وارد مره ثانيه ابحلق عيوني عشان اتروح البجيه وارد مره ثانيه وبس هذي حالتي ;p


الحمدلله الحمدلله الحمدلله

:)

ماعندي شي زياده بس والله استانست لهم

Principessa said...

Wayed e3jebatni el qe9a ! o wayed a7eb ur blog!

Mariam B.D_Q8 said...

قواج الله بصراحه ونستيني على هالنهاية الحلوه
صج خليتيني ابتسم او انا اقرا قصتج احس اعيوني ودها تزرق الأسطر او تنزل لي النهاية تبي أتعرف اشصار

U know WHO said...

لووو لووو
ابداااااااااااااااااااع
ابدااااااااااااااااااااع
ابداااااااااااااااااااااع

سامحناج علـ مذلة

؛)

واي واي واي علـ ستايل
أوسكار وشوميه
ماي ستايل

؛)

حده حده الوضع عاجبني
ودي أعيد الخطبة والزواج مرة ثانية
كله أحس في شي كان في بالي ماسويته

يصير نعيد
؛)

U know WHO said...

لويراااا
أحب لوف ستوريز
كثري منهم واللي يخليج

؛)

صبا said...

وناااااسه
واخيراااا ...عرسوووو الحبايب
الفاااال لنا ياااارب

يا حلو ثمرة الحب
البي بي

:**

احلى شي

الله يخليه لهم

اهم شي النهاااايه حلوه

حلو سردج

نبي بعد
:*

Sweet Revenge said...

حلوووه القصة اندمجت فيها وايد
الله يوفقهم ويتمم عليهم
والفال لج لوير :)

mowa6en said...

فلوس الطباعة أنا أتحملها ، انتي بس قولي أوكي
:)

كانت متابعه شيقة جدا
أهنيك على قلمك الراقي

Reflections said...

مــــــــــــادري ليـــش كان عبالي انها بتتولع بأوخو رفيجتها و تهون عن مشـــاري.! لوول

أكو خوان رفيجات يسوون جذي؟ والله جان طراقها ببيزة و يحرم اخته منها بعد @@

بس يا زين النهاية السعيدة
لا أخفيج سرا اني سحت على القصة و كنت انطر الأجزاء نطرررررررة

قواج الله فطوم ;*

bhr.qadsaweya said...

رووووووعة و النهاية احلى

تسلم ايدج يالغالية

و عقبالج يوم مانفرح فيج يارب

يعطييج العافية

ولد الديرة said...

شنو سيرم
!

عــــــابره said...

اخيرااااااااااااااااااا

خلصتيها مليت وانا انطر الجزء الاخير


قصه حلوة والاحلى انها واقعيه

حيييييييييل انصدمت لما عرفت انها واقعيه وانه هالامور مازالت لها لها طريق للواقع

عشتي لوير

على نفسها جنت براقش said...

بالمبارك

عاد متى الاستقبال؟

مركبنا said...

يـــ365ـــوم على اختفاء حسين الفضاله …
ساهم بوضع البنر في مدونتك
http://3.bp.blogspot.com/_xJiMP6a3EM8/Sk0coxUQwFI/AAAAAAAAAhE/7w1Ki9T5DrU/s1600-h/alfodhalah.jpg
وشارك معنا في حملة مدونة نقاط
http://www.nqa6.com/2009/07/blog-post.html

maha said...

لوير

عسى ربي يباركلهم في البيبي ويجعله من الذرية الصالحه

اشتقنالج


ولكم باك

7osen said...

قصة ممتعة

والأجمل إنها واقعية

مع إن الواقع والخيال واحد
مايفصل بينهم شي


أسلوب ممتع ومشوق
ونهاية سعيدة

إن شاءالله دائما النهاية تكون سعيدة

Anonymous said...

وااااو !

اول شي ألف مبروك لـ البلوقرز الزواج والمولود يتربى بعزهم يا رب :-)

القصة روعة والاسلوب اينن.. حبيت تفاصيل نابكت ورقصة العرس حدي هابة فيها هاليومين ;)

وموضوع فرش الاسنان بالذات ضحكني حيل... له ذكرى حلوة :-D

فعلا سرقتني القصة لـ بعيد

ابي بعد اشياء جذي... قصة ثانية يالله ;pP~

U know WHO said...

صباحووو
أكو ريوق ولا ماكو
:)

ولهت على الترويئة

؛)

Miss-Q8 said...

أول مرة بحياتي أقرأ قصة بهالروعة
ما أمل من و لا سطر
و لا كلمة
و لا حدث
البسمة طول الوقت صاحبتني بين سطورج

أنا ما اتحسف على شي إلا لأني عرفت بلوقج متأخر
أهنيج على هالموهبة الجميلة إلي عندج اياها

و الله يحفظج
يعطيج العافية

~ هند ~ said...

ذبحتيني بالكلام اللي كاتبته بالبنر ..

"
الي بسولف وياي ..يدش باوقاتي انا مو لما رفيجته تنام و يضيق خلقه و يحوشه الجت لاق يتفرغلي
"

هاااهااههاااههااهاااهاا
>> ترا صج قلبي ضحك
:))))))))

انتي مو صج ،،
بس يستاهلون
تعطينهم كااااااااااش

الله يسعدج :)

بنت الشاميه said...

ولهانه عليج

قلت ادش و اسلم

النهايه واايد حلوه
ولكن بداية حياتهم هى الاحلي
الله يوفقهم ويبارك لهم ويسعدهم فى انفسهم واهلهم و فى عيالهم
ياحلو القرارت المتونه الناضجه
فى اغلب الاوقات تؤدي الى نتائج
باهره وسعيده
والفال ان شاء الله للكل

تحياتي يالغاليه

lawyer said...

صباااااااااحكم ورد وهناا



بررررررررررد على الكومنتااااات كلها عقب الميتينج

بس يعتمد اذا حشاتني ززززززززفه و نفسيتي اتعبت بحاربكم

لوووووووول






صباااااااااااحكم فل وياسمين

:**

lawyer said...

ريما

حياااااااج الله نورتي



داقيرو

لول





ريلاكس
اشرايج فيني



موصج

الله يسلم عمرج





نيكون

وانا بعد :*






زيون
بذمتج ماتحتاج انتعاش





الالا
ذوقج اهو الراقي :)






ارتفل
ماتفقد عزيز يارب





نون

انا اكثر





جوي
امين يارب
امين




جندل
اشوه :)







بربل
الحمدلله





دبي
وينج ولهانه عليج






هند
العفو حبي








فيصل
لووول







MM

الله يخلي لج مشاري





مقوع
الله يابرك فيج




برنس

ثانكيوووووووو




مريم

انشاء الله دوم مبتسمه




يونوهو

هذا ستايلي

سكتاي اروح وارد على دبل شوميه
شكلي اخر شي بشتري حق عمري





صبا
انشاء الله


:*

lawyer said...

سويت

ثانكيو من زوأك


مواطن
اشكرك
اطرائك يعني لي الكثيييييير








رفرف

ليش كل من عباله انها بتحب صالح؟؟







قدساويه
ثانكيو
اخجلتينا






ولد الديره
سيرم ينحط في الويه قبل لا نحط الكريم يغذي الويه
في نسبه ماي و رطوبه تساعد الويه يتنفس








عابره
عاشت ايامج








براقش
هههه المراه بتطلع من النفاس







مها
حبيبتي
:**






حسين
امين
اجمعين




ليدي رين
نطراي بوستي الياي
صورتج حلوه وايد





يونوهو

ميته يوع حدي







ميس كويت
حياج الله نورتي




هند
هذي زفتي


بنت الشاميه

بعد قلبي انتي توله عليج العافيه
اللهم امين يارب
يارب

Pearl said...

اهنيج على اناملج الذهبية و يعطيج العافية
جدا استمتعت بالقصة و الي ونسني اكثر يوم دريت انها فيها من الواقع :) ..حبيت هالشئ
و ابارك حق البلوقر و الف مبروك المولود و يتربى بعزهم ..

Anonymous said...

wonderful blog
make money at
www.theway2profits.blogspot.com