بطاقه عيد

عيون الناس
قلوب الناس
بين الفرحة والموال
وسط العيد
وانا اصبح وامسي
على الباب الحديد
مر أحد و أثنين
وثلاثة واربعه
مر الخميس والجمعه
والسبت بغيومه والرعيد
وانا على الباب الحديد
تمطر سما عيوني من الداخل
عذاب ... تهزني افكاري
ترسيني بعيد
والمشكلة .. بعدها نفس المشكلة
بعد الحلم نفس الحلم
وبعد العيد في عيوني
مو لابس سوى التنهيد

فايق عبدالجليل

***********

************

كل عام و انتوا بخير و الف صحه و سلامه

الله يتقبل منا و منكم طاعاتكم و يبلغكم الاعياد بفرحه يا رب

مع تمناتي لكم بعام جديد

تتحقق فيه كل امنياتكم يا رب

احبكم

اشتقت اليه

اشتقت اليه
نعم اشتقت اليه
اشتقت الى دفئ مشاعره
اشتقت الي حنيته
اشتقت الي يديه

.......
يرن الهاتف

ذلك الشاب المشاغب

هو: اشبتسوين في العطله؟
هي : و لا شي
هو : ماراح تسافرين ؟
هي : ماراح اسافر و لا بروح مطاعم و لا بروح شاليه و لا مكان ريلاكس و بس
هو: تبين افلام عندي خوش افلام بس رعب
هي : شكرا اخاف ما اطالع رعب وبعدين ماعندي ديفيدي في داري ماكو الا في صالتي و امي وياي و امي تخاف مثلي من هالشغلات
هو : اقول بنت خالتي مانتي مسافره ! ما انتي طالعه ! ما عندج شي في دارج !! ما تسهرين ! الساعه 9 تنامين ! اشرايج
انا عندي شور لج روحي انتحري وايد ابركلج !!
هي : شكرا حياتي ما قصرت ...انا عاجبتني حياتي جذي..باي تروح و ترد بالسلامه ...

تسكر السماعه..

تاخذ نفس عميق و تسرح بخيالها له
اشتقت اليه
يسألون وين بخاطرج تروحين في هالعطله
اتمنى اذهب اليه
اتمنى ان اقضي معه ايام
اتمنى اروح الرياض
اشتقت لشغبي
اشتقت لذاتي معه
اشتقت للدشداشه البيضه في عز الشتا
اشتقت لشماغه الاحمر
و كوت

PRADA

الاسود الي تغطيت فيه ايام

اشتقت لدهن العود

اشتقت لطفله كانت تتكلم بصراخ
و كان يرد عليها بوقار
اشتقت ان اعايره بان عمري 21
و عمره 34

اشتقت لرجل يحازيني باساطير خيل طرواده
و انا بكل كبرياء ازجره.... ليكون عبالك ياهل تقصلي قصه
يحضني
دائما رده فعله لشطانتي بانه يحضني
و دائما انا مصدر ازعاج له

اشتقت اضحك عليه (قول عنجري )
يرد (عنقري ) و اضحك باعلى صوتي
عنجري يا حظي مو عنقري .

اشتقت ليديه و هو يغمسها في شعري
و يقول تبارك الرحمن شعرك مرا كثير
و انا بعين قويه...اقوله .. قول ماشاء الله !!
يحضني و يقول تبارك الرحمن
باختصار
اشتقت لرجل لن يوجد
و اشتقت لانثى ذهبت بعيدا عني
اشتقت الى فكره مجنونه
اشتقت الى جريمه لم يعاقبني عليها قانون
اشتقت الى رجل يركض معي كالطفل
في شوارع باريس
و ما ان نقف متعبين
اصرخ في ويهه

كويتين
كويتين
كويتين

يحضني
يخبأني
يشتري جريده
و دخان

اشتقت اليك
اشتقت اليه
اشتقت اليها

اشتقت لقهقهه من اقصى القلب
تدمع عيني لذكرياتي
تدمع عيني شوقا لك
اشقت اليك بندر

و بعد كل هذا يسألون وين بتقضين اجازه العيد
فأي متعه هي دون رجل..

شنو حلاو في هالبرد كل يوم نسبح !!

تم بحمدلله و رعايته و فضله اني سبحت
بعد انقطاعي يومين عن السباحه لان برد موت

و هذي سبحتي مرا وحده كريسماس و عيد و راس السنه

فالرجاء كل الرجاء من الحكومه الرشيده اذا لهم نيه قطع المياه

عادي قطعوا انا سبحت

و مافي شده اسبح في هالبرد مرا ثانيه

اخر سباحه لي في 2006

لذا يرجى عدم التحرش

و عدم النغزات

لاني لن استجيب لاي مؤثرات خارجيه

يكون نهايتها سباحه


و لا راح ابذل اي مجهود رياضي

ممشى ماراح اروح

عزيمه ماني رايحه
مطبخ ما ادش



و لو انا متزوجه
عادي افتعل هووووووووشه و اروح بيت اهلي
لاني ميته برد و مالي خلق سباحه

الله يكون في عونكم ياللي في بالي




الى سلوجا :

الحمدلله ياربي اني عزوبيه ربي لك الف حمد و شكر


اليوم اشتكرت في نادي العزوبيه ابشررررررررك

تسامح ..

أيام قليله تفصلنا عن سنه جديده
ايام قليله تفصلنا عن اهم المناسبات الاسلاميه و هي عيد الاضحى

ايام فضيله نحن فيها الان

فهل هو انسب وقت للتسامح ؟؟

من منا يريد ان يقبل على سنه جديده مليئه بالشحنات

من منا لايريد تغيير النفس

اقبلو على سنه جديده تملئها سعاده

انسوا الماضي خلاص

سامح

تسامح


فالقلوب المريضه تتعب صاحبها قبل اي شخص اخر

على الهامش

ماتعبتي و انتي اتأذيني

ما تعبتي و انتي تغلطين علي

ما مليتي من كثر ما تجرحيني

لش دايما مأذيتني

ليش دايما تتكلمين فيني من وراي

وبعدين اييني خبر منهم

وخري عنها ترا اتأذيج

ليش كل مرا أسألج ليش

تسوين هالجريمه فيني

تردين علي بكل وقاحه

من قالج انا زينه؟؟

انا موزينه

!!

جربت معاج جميع انواع الطيب و التسامح

و ايني غلط اكبر

الله يسامحج

في بيتنا حرامي !!

الساعه 2.45 الفير
ينطق باب داري بطريقه تخرع
طاااااااااااااخ
طااااااااخ
طاااااااخ
وبما اني نايمه الساعه 9 و نص بالليل
فكنت في غرقه نومي
اسمع طق الباب
اصرررررخ
هاااااااا هااااااااااااااا منوووووووو
يرد علي اخوي : مسكره الشترات !؟؟
انا : بين الي قاعده و نايمه مخترعه مو مستوعبه
اي اكيييييييد مسكرتهم اصلا مانام الا و الشتر مسكر

اخوي: تاكدي
اصرخ عليه : متـــــــــــــــــــــــــــــــــــــــــــــــاكده بنام
استوعب الوضع شوي
الساعه جم الحين.؟؟
اسحب موبايلي
اشوف الساعه جم
اقوم اروح الحمام
اطلع من داري
اخوي يحس فيني
اخوي : قعدتي
انا : اشيايبك الساعه 2,45
اخوي : سمعت حس عندكم
انا : شنوووووووووووووووووووووووو
حسسسسسسسسسسسسس
منووووووووووووووووو؟؟
يسكر الباب اخوي و يروح بيته !!
و انا بريحاتي و يا اخوي الصغير !!
الثاني في خفاره
!!
و اسكر علي باب داري و اقفلها
و اقعد من الساعه 3 لي الساعه 6 الفير
و انا اتخيل لو دش الحرامي من الدريشه
بكون باب داري مقفول على ما افتحه
ذبحني !!
و اذا منخش في الكبت و الحين يطلعلي !!
اشيبي فيني الحرامي
ماعندنا شي
فلوس في البنك
التجوري في البنك
يخرعنا!!
واقعد كل دقيقتين افج الابجوره
اجيك على الدار
ما نمت الا الساعه 7 الصبح بعد ما قعدت اخوي الصغير حق المدرسه
ورديت نمت
و من شوي قاعده
!!
هذي حاله بالله !!
اييني اخوي يخرعني يقطها حجوه بارده مبرده و يروووووووح
دقيت عليه توني
الوووووو اشلونك انت زين؟؟
اي الحمدلله
انا : مكشوووووور وايد مانمت انا طول الفير
من خرعتك لي
بليز اذا طب حرامي بيتنا لا تقولولي

دامني صاااااااااااااده مدري خلووووووووني لا تعلمون

اخوي : هههههههههههههههه انشاء الله انشاء الله انا في اجتماع

most beautiful man in the world

Saki Rouva

الله يحفظك حق شبابك

و من عيون الحساد

دام اعرفوك الكويتين

فابشر في كسر بالعمود الفقري

ياويلك من شبابنا

خربت عليهم الشتا

الحين من تشتهي تطل في ويه

ريلها

عقب ما تشوف زولك

صباحكم فيروزي :)

اليوم من الصبح و انا ادندن في اغنيه فيروز

برد

موت

مدري ليش طرت هالاغنيه

لكم مني احلى اهداء

فيروز

ازعاج !!

التلفون سلاح ذو حدين ينفع و يضر
لاشك ان فوايدنا ماتعد
و لكن بتكلم عن جانب مساوئه
سبحان الله المتصل مرات ما يعرف شنو ظروف الشخص المستقبل
يعني وايد تصير مرات ان ترن تلفوناتنا في اوقات ازمتنا
او اوقات مصيريه و حرجه
و يكون الشخص الي على الطرف الثاني داق لشي بسيط او لخبر سار
طبعا الناس ما تعرف ظروف بعض
يعني لما انا ايي اتصل على رفيجتي
مدري ااذا رفيجتي نايمه قاعده
تبجي
متهاوشه ويا ريلها
او ايا كان و رفيجاتي نفس الشي
لما يتصلون علي مساكين ما يدرون شنو الظرف الي انا فيه
وسبحان الله الاتصال هذا شي عجيب
شيلي الي خلاني
اكتب عن موضوع التلفونات و الاتصال
ان الكل يعاني هاليومين من ان الموبايل
صار نقمه مو نعمه
لان الناس حتى لو التزمت في اصول و مواعيد الاتصال
هم وجود التلفون معانا 24 ساعه
يحملنا ضغط
و الكل صار يشتكي
الحريم صارت تشتكي لما تطلع ويا ريايلها مااصار لهم حجوه
الموبايل كل شوي يرن
و الرياييل نفس الشي
والامهات لايعه جبدهم بناتهم 24 ساعه ماسكين التلفون
المشكله ان احنا في نفس الوقت الي نشتكي منه ان التلفون يزعجنا نفسنا
24 ساعه ماسكين التلفون
فهل نحن مصدر ازعاج و في نفس الوقت ناس تزعجنا !!
يعني احنا مصدر ازعاج لي الي حوالينا

صج اتحسون ان التلفون مزعج و في نفس الوقت ما نستغنى عنه؟

دردشه

بعد تواجدنا في الدوره لمده اسبوعين
صار بينا تالف شوي..لا وايد مو شوي..
نقعد ويا بعض يوميا من الساعه 8 لي الساعه 5 العصر
ناكل ويا بعض
نشرب ويا بعض
جروب واحد
كانت الدوره عن التأمين التكافلي
و التامين التجاري
و كان كل منا له تخصصه
كان اغلبهم تخصصاتهم في المجال التجاري
الاقتصادي
المدرب سألني جدامهم كلهم
فاطمه انتي قانون ليش انضميتي لدوره مثل هذي ؟
رديت عليه
لاني انوي دراسه الدبلوما الثانيه في تخصص الشريعه و لازم اقدم بحث
في مجال اسلامي جديد
مثل التامين التكافلي
او عن اسباب التوجهه الى الاقتصاد الاسلامي
او في موضوع الاوبشن شير
واستفدت وايد من الدوره
و استفدت من المدرب
وايد
المراد اني انا كنت البنت الكويتيه الوحيده في الدوره
و كان عددنا 23 وحده مصريه ووحده سوريه
و كان كبار و ما توالفنا ويا بعض
كنت اقعد مع مجموعه من الشباب قاعدين يمي
اذا صار بريك
نسولف ويا بعض عن امور غالبيتها تهم الرجال
بورصه
سفر
شركات
صناديق اسثماريه
محافظ
صكوك
الوطنيه
استقاله مدير في الاستثمار من بيت التمويل و راح الاولى
و الحين طلع من الاولى و اخذ جماعته و فتحوا شركه
وقدرو ايمعون 16 مليون بدال ال 15
و مناقشتهم كانت بالنسبه لي شغلات يديده
اول مرا اسمعها
صج الرياييل مو تافهين نفسنا بس اشلون يقدورون يتعايشون ويانا
ربي سخرهم لنا
لو انا ريال مااتزوج
عقب مناقشات الريايل و الدواوين اروح حق مرا
سوالفها تافهه !
المهم مرا من المرات بدون اي تردد قطيت سؤال
خلاهم يسكتون
يفكرون
خلص البريك و احنا ما اتفقنا
لا اقنعوني و لا اقنعتهم
كان موضوعهم عن شرم و الدايفينج
و قلت لهم عن جو شرم الروعه في شهر 10
و ان مافيها احد خصوصا ايام الامتحانات
لكن فيها بعض الشباب الكويتين في اعمار الثلاثينات
ففتحنا نقاش عن اهداف السفر ان في شباب يروحون للراحه و الاستجمام لمجرد الدايفينج
و لمجرد الوناسه و الربع و تغير الجو
مايصير الساعه 10 الا مساكين مافيهم حيل ينامون و يخمدون
و البعض قالي ان اهم من هوات السهر في شرم لي الفير
فسألتهم سؤال غريب هل في شباب في عمر 30 يعني ما بين 30 -35
مو متزوج بس سنع و ماسك نفسه عن الخرابيط؟؟ما اتكلم عن الدينين اتكلم عن الفئه العاديه
و اذا سنع ليش مو متزوج؟؟ عمره في الثلاثينات كبير ناضج
بحاجه الى بيت زوجه سكن راحه
اشلون سنع و ما يخرربط؟ و مومتزوج
الاول قالي ان اهو تزوج عمره 28 لان سنيتن و اهو يدور و الا اهو ناوي الزواج من 26

و الثاني مو متزوج عمره 29 و دافع دفاع مستمين عن الشباب انهم سنعين و مافيها شي ان مو متزوج و اهو في هالعمر
و شنو نظره المجتمع هذي ..كل واحد حر في حياته ..و سألته ...طارق ليش ما تزوجت ..؟؟
قالي ان اهو تخرج عمره 22 و على ما اشتغل و استقر عمره 25
و الحين اهو مستانس مع الحريه و متكيف بس قاعد يدور و لكن ما يبي يتزوج وحده ما يعرفها
يبي يتزوج وحده يعرفها لكن كل بنت يتعرف عليها اتكره في الزواج اكثر
مالقى البنت الي تخليه يغير نظرته يتزوجها

الثالث عمره 32 مستانس و يقولي ان اهو مو من ضمن الفئه الي انا اتكلم عنها
لانه مرتاح مع العزوبيه لا قيد و لا حنه و لا يبي حب مرتاح و لاهي في الشغل طول الاسبوع و في الويك اند
يروح الشاليه ينعزم على حفله بسيطه يتعرف علي بنت و يقضي الويك اند معاها مو معناته ان كل ويك اند بنت
بس على الاقل يسمي نفسه ان واقعي ما يبي يتعب بنت و لا يبي يتعب مع وحده
الرابع متزوج عمره 34 حب وحده 4 سنوات و ماتت في المرض الشين
قعدت سنتين بعدها و خربط خربط لين تزوج الحين
بس كان كل منهم مختلف على سالفه ان مو ضروري ان شاب في عمر الثلاثينات
مو متزوج يكون خربوطي او راعي بنات..
صج فعلا شغله اتحيير
البعض ظروف
البعض لاهي
البعض يدور
البعض لي الحين ما حب !!
عمرك 33 ما حبيت متى بتحب؟؟؟
ستيييييين
سبعين ؟؟
انتو شرايكم ؟؟ هل تعتقدون شاب عمره في منتصف الثلاثين مو متزوج

و لا يفكر في الزواج مع انه قادر عليه سنع و محافظ على نفسه

اهداء للرقص على هالجو

بطبخ مووش حق بوكلوني تبون؟؟

ياناس حدي حدي محتره

مو قصدي اتطنز على احد بس والله شي يحر

شفتوووووو هالزين

شفتو هالقبله و هالملح كلمه زوغه شويه

قاعده بريحاتي لا لي و لا علي حاطه هالصوره في المسنجر و

كاتبه زوج المستقبل

فيهااااااا شي؟؟

دش علي صديقي الصدووق

وكان الحوار التالي:

كويتي حلي: فطييييييييم يالهوله اشعندج حاطه صورته اشتبين فيه ؟؟

انا : واااااااااااااي هذا ريلي هالسنه حطيت عيني عليه شفت بيته في كومو

و شفته قلت له يا بوكلوني اشلونك يايبتلك صوووووغه من الكويت و بطبخ لك اموشه و بي عندك في البيت

كويتي حلي:تنكتين يعني...!مو من زينه و لا حلو لا شي بس انتو خابين روحكم فيه

اشفييييييه اشفييييييييييييه !!؟؟ انا احلى منه

انا: يالله حطلي صورتك ((طبعا انا شايفته بس جذي اقوله لكن انا اعرفه ))المهم شوي و حط الصوره و الا ظيييييييييييييم

ظيييييييييييييييييييييييييييييم .........حلي مصلع ..الراس مو راكب علىالجسم

يوم انك جذي ليشششششششششششش تطنز عليه

ليشششششششششششش تغار ليشششششششششش

ياربي ما انتحلي على الزين

نحب الزيييييييين احنا

الكويتين اكثر ناس تعيب و ما تشوف عيوبها

بس هم مع هذا و ذاااااااك اموت على بوكلوني

لوير مشتطه عشتوووو بتصير امرأه اعمال ..بس ماعندها فلوس؟؟

الله يا انا ششششششششششششطه مشتطه
و حالتي حاله و خبتي خبه
امس في المارينا ويا وحده من صاحباتي
قعدنا يمكن ساعه انا ووحده نسولف عن المشاريع و عن احنا ودنا نسوي
مشروع ..مو مكلف ومايحتاج راس مال كبير .. و مايحتاج تعقيدات كويتيه وشغل روتين و رخص
ابي مشروووووع سهل ممتع و هادف و بسيط ..
مرات افكر في عقار ..اشتري شقه تمليك على ما يمعت دفعه الا تدوبلت الاسعار مليون مرا
يعني ايمع 1000 تزيد الاسعار 100000
الواحد شنو يسوي في هالغلااااااا
و شنو يسوي مع هالمحبطات
بسسسسسسس هم ارد و اقول
انتو مثلي تتحمسون حق مشروع و تطيرون فيه تالي تحبطون؟؟
و شنو اقتراحكم حق مشروع مناسب

انهارت دموعي

في حزني معاي
في فرحي اهو دايم معاي
محد يحس فيني غيره
لاضاقت الدنيا
ارتاح معاه
يمكن ما تصدقوني اذا قلت لكم اشكثر احب راشد الماجد
و اشكثر احب اغانيه
شخصيا ما احبه لكن اعشق حنيه صوته و ذوق كلماته
يذبحني لما اسمعه يغني
من عيون الناس والله اغار يا عمري عليك
ما اتطمن و انسى خوفي الا و ايدني في ايدك
بس تحمل كل جنوني
لانك اغلى من عيوني
لو تدور ما تلاقي من هو غيري يموت فيك

اليوم وايد وايد تعبت
في عملي
في حياتي
ماكان يوم هادي بالنسبه لي
كلماته اذبحتني اليوم
لما قالي
اشتري الي شاريج و بيعي الي بايعج
28 سنه ضيعتي عمرج تنطرين تحبين و تنحبين
و كاهو عمرج راح
لا حبيتي و لا انحبيتي
الي تحبيه باعج ما قدر حبج
تنطرين واحد بايعج
الي ماعرف قدرج
رخصيه
و اغلى من شاريج
و سمعت راشد يواسيني
ودي ابكي لين ما يبقى دموع
و دي اشكي لين ما يبقى كلام
من جروح صارت بقلبي تلوع
و من هموم حرمت عيني المنام
تحطمت
بجيت لين شبت عيوني
ياطول ليلي ما بين ظلالي و مسندي
مشتاق ايدني الثنتين ضمه ايديك
تعال بموت في ايدك و انت موت في يدي
الموت لذه مادام الموت منك و فيك
شف دمعتي لك
تواصلك يا بعدي من كل دمعه معي لهفه تسلم عليك

بعرف شنو جريمتي
شنو سويت بعمري عشان اسمع هالحجي
و من منو
من اقرب الناس لي ؟؟
اشلون اكو ناس تقدر تجرح بالهطريقه
تشلون اكو ناس تطعن اليوف بالحرا
ليش ؟؟
من قال اني مظيعه عمري عشان الحب
من قال اني مسويه فيلم
اصلا قوتي
و يباسه راسي
و صمودي
الي مصبريني
و الا انا من حجي الناس
جان ميته من زمان
طعون ساجينهم تحر
تحر
اشلوووون يقتلوني في اليوم مليون مرا
ليششش
عشان انا ساكته
بس لاني ساكته
خلاص الماضي ودعته محيت ذكراه من قلبي
انا من باعني بعته و لا دربه يجي دربي
خلاص
خلاص
خلاص الماضي ودعته
بعاند كل احاسيسي
و ابدا خطوه النسيان
متى ما زارني طيفك
اقوله روح يا خوان
صبرت اكثر من الازم
صبرت و مابقى بي حيل
و عمري صار بسبابك
بقايا للسهر و الليل
خلاص
خلاص
خلاص الماضي ودعته
راح اقعد العمر كله
الناس تقطع في يلدي
عشان جريمه عمري
اني حبيتك

الله يوفقهم

معا لدعم الشباب الطموح
بصراحه انا سمعت عن شباب كويتين
عندهم مشروع وايد حلو انهم يقدمون خدمه للزبون في بيته
و الخدمه عباره عن تنظيف السيارات داخل البيت و يرجعونها كانها يديده
مو غسيل السيارات الخارجي فقط لألأ ولكن تنظيف السياره من الداخل و الخارج
لما سمعت عنهم ما حبيت اكتب الا بعد تجربتهم
و فعلا لما جربناهم كانت تجربه تستحق اني اكتب عنها
و وايد استانست لما كلمت هذا الشاب الكويتي صاحب الفكره
و كلمني باختصار عن مشروعه ((ماكس شاين ))
انصحكم انكم تستمتعون في تنظيف سياراتكم في الويك اند في بيوتكم
خصوصا ياينا موسم بر و شاليهات و امطار ...
للاستفسار :7796000
ماكس شاين
و اتمنى لكم احلى ويك اند

صبحكم الله بالخير

حاله الاستعسار المزعج الي الصبح لما اقعد 40 دقيقه

افصخ و البس و احذف الهدوم اهني و اهناك

لاني ماني عارفه شنو البس

غالبا ما اكون مخططه حق لبسي الصبح

مجرد اقوم و اغسل و ابدل

لكن اليوم الصبح ماكان يومي

شنووووو يعني اطلع كل الكبت عشان لازم اركب شي يمشي ويا بنطلون اسود

و لازم ساتر

و اذا بنطلون لازم بلوزه طويله

ياربي شالعسااره

سامحوني جني عسرتكم

من الصبح

اذا تسكرت الابواب

ماراح اقولكم هالمرا قصه و اتفنن في سرد رومانسيتها و احداثها
لان الواقع المرير و المآساه الي في قصتي ما تتحمل
ليش المرأه بعد عمر 45 و الخمسين خلاص توصل لمرحله انها كبرت
و بنت و سوت و تبي تستقر
اي الريال بعد كسره الخمسين و اذا تبون الصج ريايللنا كاسرين من المهاد
ما ينطرون عمر يختربون فيه..اي هذاا الريال يخرب بيته و يبي يهدمه
بعد ما كبروا عياله ..و بعد ما اتسقروا بناته ..و اذا فيهم بعد لي الحين ما استقر
القصه عباره عن مرا كويتيه ..تحملت بلاوي ريلها من اول يوم خذته
اعيال .بيت مسؤليه ..التزامات .. و حياتنا الصعبه و فوق كل هذا و ذاك
امه و اخته وياها في البيت ...فتخيلوا المعانات و المشاكل الي في هالبييت
الريال وين دوره؟؟
الريال فلوسه برا .. عياله كل من يصرف على عمره و يقولهم اعتمدوا على نفسكم
يبا تعال زوجنا !! انت الله مرهي عليك ..
يرد عليهم الابو لألألأ خل امكم تدفع المهر انا ربيت و كبرت ..ختزوجكم
عمر و الام ساكته و متحمله
اكثر من 35 سنه تحملت سكران
فلوسه على القمار
بخيل على بيته
شاليه كلا قعدات ووناسه
المرا مالها الا مشاكل الاولاد و بلاوي دراستهم
و الاب طاير ويا الشياطين
المشكله الحين ان كل هذا و المرأه ما شكت صابره و متحمله
متوكله على الله
مرا من بيت ناس طيبين و حموله طيبه
مثل ما يقولون بنت ايواد
اعيالها لما اكبرو وافهموا قالولها يما ابونا هذا مو ريال
اذا تبين احنا انطلقج منه
من كثر ما يشوفون المأسات الي متحملتها الام
ردت عليهم
هذا بيتي
هذا مكاني
ابوكم يروح يروح و مرده ايي
الابناء تعبانين و مضايقين على حال امهم
و الام صابره
على ريلها و بلويا
و فوق شينه و قوات عينه
ما يلمسها
لان يابلها الامراض من قبل 15 سنه فمن يومها ما يلسمها
يقولها انتي وسواسيه و اخاف ايي يمج تمرضين سنه !!
الي يوم الي صار فيه الانفجار
بكل بقاحه
ووقاحه
صارت عشيقه ابوهم تتجرأ عليهم
تتصل عليه البيت تطلبه
تروح له الشركه عند اعياله
هذاك اليوم بغت منه شي ضروري
يتله الدوانيه
و الدوانيه في البيت
و جدام الناس
و جدام زوجته
انهارت الزوجه
و ينت
ما بقى الا وصخه و حثالته اتييبهم لي البيت
تقوله زوجته: شقق سكتنا
فراشي في الشاليه بلاوي اشوف فيه و انا ساكته
قعدات سفرات بخل ما تصرف علي و الكاوليه لها كل شي
هم سكتنا لكن اقول بالسر
اما انها توصل تدخل بيتي !!
هذا الي ما ارضى فيه
و تنهار الزوجه
بعد صبر اكثر من 35 سنه
تنهار و ينهار معاها ابنائها و بناتها
الريال كائن اناني
بعيد كل البعد عن الانسانيه
لان اذا تبون الصج في كل بيت كويتي
مشاكل
و البيوت كلها مشاكل
و اغلب مشاكلنا نتيجه انانيه الزوج
مو شرط بالحرام
و لا شرط سكران
بس فيها انانيه
المرا تبي تستقر
اي الريال بيده يخرب بيته
ليش!!
تبون الصراحه اعيد و اقولكم كنت بكتبها على قصه
مو كأنها سالفه
بس ما بغيت اماطل فيها
حبيت توصلكم كسالفه اقرب لي الحقيقه
فعلا ليش الريايل ما يحقق رغباته بقليل من العدل و الحكمه

كلام العيون

يوم اقبلت...

صوت لها جرحي القديم....

يوم اقبلت...

طرنا لها انا وشوقي والنسيم...

يوم اقبلت...
....
يوم اقبلت صوت لها جرحي القديم...

يوم اقبلت طرنا لها انا وشوقي والنسيم..

وعيونها آآآآآآآآآه

عين المحتني وشهقة

وعين احضنت عيني وبكت..

يافرحتي يافرحتي الحظ الليله كريم ...

محبوبتي معزومه من ظمن المعازيم ...
.....
في زحمة الناس صعبة حالتي ...

فجأ اختلف لوني وضاعت خطوتي...

مثلي اوقفت تلمس جروحي وحيرتي..

بعيده اوقفة وانا بعيد بلهفتي ...

ماحد عرف شلي حصل وماحد لمس مثلي الامل ...

كل ابتسامه مهاجرة جات رجعت لشفتي ...

كل الدروب الضايعه مني تنادي خطوتي ...

ويارحلة الغربه وداعآ رحلتي

يافرحتي يافرحتي الحظ الليله كريم ..

محبوبتي معزومه من ضمن المعازيم
......
ياعيون الكون غضي بالنظر ....

اتركينا اثنين عين تحكي العين...

اتركينا الشوق ماخلى حذر ...

بلا خوف بنلتقى وبلا حيره بنلتقى..

بالتقى بعيونها وعيونها احلى وطن...

وكل الأمان...

كل ابتسامه مهاجرة جات رجعت لشفتي ...

كل الدروب الضايعه مني تنادي خطوتي ...

ويارحلة الغربه وداعآ رحلتي

يافرحتي يافرحتي الحظ الليله كريم ..

محبوبتي معزومه من ضمن المعازيم

اختلفنا

برا السياره

مطر
و الشوارع زحمه
داخل السياره
اثنين يعشقون بعض

داخل السياره الرؤيه معدومه من المطر

لكن ماهمهم غير عيون بعض

على صوت المطر

على صوت محمد عبده و اهو يغني اختلفنا مين يحب الثاني اكثر

كانت تغني بصوتها النشاز

كان يتحلي عليها
و يطلب منها تكمل

بعد سبع سنوات
ما بقى لها الا ذكرى
و صوت مطر

و اغنيه

عتمه شعرها

و سواد عيونها

مابقى الا ظلام

و كلمات اسير الشوق

اختلفنا من يحب الثاني اكثر

و اتفقنا

انك اكثر و انا اكثر

من عدد رمل الصحاري

من المطر اكثر و اكثر

كيف نخفي حبنا و الشوق فاضح

و في ملامحنا من اللهفه ملامح

عاشقين و نبضنا طفل حنون لو تزاعلنا يسامح

و الهوي شي مقدر

!!!

و ماكنت اصدق لما يقولون الهوى شي مقدر

لاني ادري قدري في هذه السياره

و تحت هالمطر

وبعد سبع سنين

مابقالي الا ذكرى

احتاج انام ..حرام؟؟

بليز بليز بليز

احتاج انام هالويك اند الصبح

بليز يما لا تعزمين احد على الريوق و انا الي ينعفس ويك اندي

بليز يبا لا تصرخ على الخدم من الفير

و انا الي يخترب ويك اندي

مو شرط تروح سوق السمج من الفير و يخترب ويك اندي على سمجه !!

بليز اخوي مو ذمبي بييك مدرس الساعه 9 و امي تصرخ عليك من السبع عشان المدرس و انا يخترب ويك اندي

هل اطلب شي مستحيل

اني انام بسلام و بهدوء

قلت حق ابوي ابي اروح هيلتون المنقف اخذ غرفه ليلتين

و كأني ارتكبت جريمه !!

ممكن اتهني في الويك اند

ممكن

افخ من غير صراخ

ممكن؟؟

ليش يخمون الصالات في الفاكيوم يوم الخميس ليش؟؟

وااااااااااااااي ذبحتكم حنه

تصبحون على خير

بروح انام

و بقولكم باجر اشلون فزعت من الفير

و شنو السبب

ملاحظه: الي طباخنا الداثر لا تحمس بصل من الفير

و انا اموت من الريحه

الي سواقنا لا تهذر ويا بنت الكلب فلبينيه بييت يرانا هالهبله الي تتكعكع من صبح الله خير

و انا ابتلش

الي خدامتنا لا تتصلين في اهلج يوم الخميس و تشلين فريجنا في صراخج على ابونا مكالمه !!

و اتمنى لكم ويك اند ممتع

sometimes the last person on earth you want to be with is

the one person you cant be without

المزاج

هل انا انسانه مزاجيه ؟؟
نعم و يمكن اكون اكثر انسانه في هالكون مزاجيه

هل هو طبع بايخ؟؟

وايد

ومزعج

ماعندي قاعده في الحياه

متمرده حتى على مزاجي

مالي رتم معين في الحياه

شهر اكون رومانسيه

شهر سياسيه

شهر ماديه

شهر اقتصاديه
ليش ؟؟

هل هو انفصام
طبعا لألأ


ولكن مزاج

انا ما احب اروح السينما وايد

طبعا على حسب المزاج

لكن احب اطلب افلام و اشوفها في داري
و هم طبعا على المزاج
!!

امس و قبل امس شفت افلام العصاري
لما رديت من الدوام

قبل امس شفت فيلم روعه من انتاج سنه 2006 لسلمى حايك
ask the dust

قصه وايد حلوه
الساوند تراك عجيب
الاخراج حلو

انا من الناس الي يهمني الاخراج و التصوير و الساوند تراك
اكثر من القصه

على قوله ريما انتي تتعبين على الديتيلز وايد في حياتج

بس فيلم الثاني الي شفته اليوم

pride and prejudice

رووووعه

انتاج سنه 2005

من احلى الافلام اخراجا
تصويرا

و السانودتراك من احلى مقطوعات
البيانو
لان عزف البيانو الي في الفيلم قصه بروحها

فيلم قديم

لكن انا سويت سيرج في الانترت على احلى الافلام
و اكثرها جوائر

لقيت ان هذا الفيلم رشح ل 9 جوائز
او حاصل على 9 جوائز شي جذي

لكن المناظر الطبيعيه الي صورت في الريف الانجيليزي بحياتي ماشفت اخراج جذي

مناظر تستحق ان كل قارئ فيكم يشوفها
يستمتع فيها

قصه حب الصعبه
كأي قصه في فيلم
لكن في النهايه

يبقى الاحداث و التعامل مع مزاج الرجل الصعب
و يبقى ان الريال ما ينحكم عليه شكلا

الرجل ما هو داخل هذا الرجل
و ليس شكل الرجل

اتمنى من كل قلبي
تشوفون الفيلمين
الي ارشحه لكم لهذا الويك اند

ملاحظه
فيلم سلمى حايك ما ينشاف مع العائله

الفيلم الثاني
ما ينشاف الا ويا العايله هههههههههههه
لان الفيلم الثاني نظيف بنسبه اميه في الميه
يعني الي مثلي
يحبون الافلام الصعبه

تدرون اشسويت
استشرفت
ووديت الفيلم الثاني حق امي
يما
يما تعالي انا طالبه افلام
شوفي هذا الفيلم و عطيني رايج

يا انا يا سسسسسسسسنعه

اتمنى لكم قضاء وقت ممتع
و عشان اسهل عليكم
الحصول على الفيلمين

بامكانكم زياره هذا الموقع و طلبو الفيلم
و يوصلكم خلال 24 ساعه و الدفع عند الاستلام كاش

www.macdvds.com

يسعد صباحك .. يا حبيبي

هذا انت كل ما ضاقتبي الدنيا تغيب ...

وكل ما ضاقتبك الدنيا تجيني

هذا انت ان كساك الهم صرت أوفى حبيب

وان نساك الهم تتباهى بـ أنيني

مثل منت .. دايم تجي فـ وقتك حبيبي

بعد ما وقتك يروح

عبدالرحمن بن مساعد

مع قهوه الصبح
مع هالجو الحلو

مع اغاني فيروز

و طرب راشد الماجد

ضحكات
ابتسمات
صداقات

يعطيك شعور بالراحه

بصراحه الجو الحلو
المنعش
يخلي كل شي في الدنيا حلو
يخلي نفوسنا احلا
كل شي يكون بعيني حلو
لو مو حلو
مع قهوه الصبح
و البخور
افكار غريبه اتيني
ليش افكار النهار تختلف عن الليل

مع قهوه الصبح
شنو اتفكر فيه ؟؟
سؤال اطرحه اهني
هل انا الوحيده الي اندمج مع قهوتي
و اتيني افكار اسافر معاها
و من يخلص فنجاني ارد اهبط على ارض الواقع ...

ماهي الافكار الي اتيكم مع قهوه الصبح؟؟

الجزء الاخير

و يروح الدوام حق ياسمين
يدش عليها ..من غير ماتدري
تنصدم ...
يسلم و اهي مبهوره ..ترد و تسأله: فيك شي ؟؟

خالد: اي ياي ابيج تقدمين اجازه

ياسمين : شنوووووو ليش ؟؟

خالد: اي اجازه مرافق زوج في بعثه دراسيه !!

ياسمين افهمت قرار خالد في زواجهم ..ابتسمت
انصدمت
بس تنحت اكثر
القلب يرقع

ياسمين : عطني فرصه افكر !

خالد: شنوووووووووووووووووووو شنوووووووو بعد بتفكرين

ياسمين : اي شنووووو عساني بنهبل في الدوام و بستانس و بطامر جدامك ..لا هذا بس جدام رفيجاتي
وبعدين لازم انطرك اسبوع اسبوعين شنووووووو بس انتي منطرني..لألألأ روح توكل على الله ماعندنا بنات للزواج

خالد: هاهاههاها والله صج ..صاجه ماكو بنات ..وين بنات

ياسمين: خوييييييييلد احترمني احنا في الدوام

خالد: مو لو انتي محترمتني جان انا من زمان ماخذج بس انتي السانج طويل

ياسمين : هاهاهاهاهاهاهاهاهاهاها يمكن صح

و تروح ياسمين تبلغ مديرتها انها بتطلع
و تروح ويا خالد في قهوه قريبه من شغلها
و تطلب منه انها تعرف ادق التفاصيل اشلون قرر انه ياخذها و ليش و اشحقه و اشلون

ويقعدون لي العصر في القهوه ..ترجع البيت
واهي طايره من الفرحه

تبشر رفيجاتها
و امها
و امها تقولها انا ماراح افرح الا لما تتصل امه تو الناس الحين
و وفعلا تتصل امه..و يحددون موعد للحريم
و الرياييل و ايون الرياييل و بعدها في جم يوم
تعارف الحريم
وبعد شهر و نص الملجه وبعدها في يومين العرس

و في عصريه الملجه ..

الرياييل متيمعين في ديوان المعرس
ياسمين تتصل 20 مرا على اخوها و على ابوها

الابو ما يرد
الاخوو يهددها لو ما بطلت تدق راح يسكر الجهاز

بس قلبها ما صبر
دقت على اخوها و الا تسمع
كلمه الملاج للمعرس قبل الملجه
تسمع كلمه
امساك بمعروف او تسريح باحسان

تقول حق اخوها خلني بسمع مراسيم الملجه

و تسمع صوت خالد يردد ورا الملاج
و تسمع صوت ابوها
و تسمع صوت عمها يطلب من الخال بطاقته
و تسمع الشهود
و فجأه صار هدوء
تسأل اخوها اشفيكم

يقولها نطري الملاج قاعد يكتب العقد
ياسمين :اشوه عبالي فيكم شي اشدرني سكتوا كلكم خمرتوا

شوي و الكل يبارك
يقولها اخوها الف مبروك ...
اهي ما تقدر تسوي كنترول على دموعها

وبعد دقايق

تسمع يباب امها و خواتها و خالتها تحت

شوي و الا خالد يتصل عليها

ياسمين ترد : ألووو..
خالد: الف مبروك ..
ياسمين: الله يبارك فيك ...
خلصتوا؟؟
خالد: خلصنا بس الناس موجوده ..الحين بيمشون ..بحركون الوالد و العمام بيروحون يباركون ليدتي

و اهلج توهم طالعين ..
..لو سامعه كلام الملاج من شوي ....تكني العرق ..بغيت اخليهم و امشي سكتي هونت الا شوي

ياسمين : هاهاهاهاا سمعت كلامه توني كنت مع عزيزان اخوي على الخط..
انا اخترعت..

خالد: سكري التلفون دقيقتين و اكون عندج ماني صابر لي الليل
ياسمين :صصصصصصصصج !!! يالله بسرعه

ياسمين توها سابحه الفوطه على راسها الكوافيره لي الحين ما وصلت و لا مالت الميك اب تو الناس موعدهم الساعه 6

تطلع من دارها تشوف امها و خالتها من المنور يباركون و لاهين في الاتصالات و التباريك

تتصل على خالد
ياسمين : خالد تعال من الباب الي ورا امي و خالاتي تحت عفسه عندهم
تعال تهريب..لحظه لحظه..كاهووووو ابوي دش و اخواني
يالله تعال بسرعه

يوصل خالد ..ينزل بسرعه اخوانها برا في الكراج
يباركون لخالد مرا ثانيه
و يدخلونه ..يبارك لوالدتها و خالاتها
و ابوها

تشوفه من المنور ..
تركض له تحت
و لما شافته

وقفت
حطت عينها في عينه
شافها و اهي في قمه سعادتها
خالاتها يتناغزون
هو هو هو خلوه نازلتله بخلاقينها يوم انه انها تدري بيلها تسنعت من الظهر
نازله جذي عروس

يبوسها على راسها

تحبه

تدخل معاه الصاله الداخليه

تلمه و يلمها حييييييييييل
تصيح بين ايده
يحب راسها

يقولها قولي وراي
بارك الله لي و لج و جمع بينا على خير دنيا و اخره
و يحفظنا لبعض
و يبعد عنا كل عين
ياسمين : امين امين امين و تلمه حيل

يدخل اخوها الملقوف

يحب راس اخته

وتبوس ابوها و امها و خالاتها

و اختلط الحابل بالنابل دموع فرح
دموع خوف الام
دموع الاب

دموعها اهي لحبيبها
دموع خالد لها
و ان الله قدره و فرحها و ارتاح

كانت عفويه في اظهارها للفرح
و كان اهو اكثر سعاده لان شاف الراحه بعيونها

يستأذن خالد مودعهم على ان انشاء الله اي ياخذها الساعه 10 بالليل يروحون يتعشون برا


و مر يومين الملجه و الثالث كان العرس

كانت ياسمين تسابق الزمن في تجهيزها
و خالد بعد

كانت تعبانه وايد تجهز للغربه و السفر و الا تجهز جهاز كويتين

كشخات و بدلات

و عفسه
و كانت محتره ان كل الي جهزته بيروح عليها بعد شهر بتقطه و بتسافر عنه

كانو الخوات يجهزون لها حاجات امريكا
و الا و الخالات و العمات للعرس

و كأي عرس كويتي
الزعلان اكثر من الراضي
و البطاقات اوصلت و ماوصلت
و على شان ترتاح ياسمين اسكنت في الفندق
قبلها بيوم
بس على شنو؟؟ 24 ساعه راده البيت عشان ناسيه اغراضها

تجنيد
و ليس تجهيز

محد يعرف لويه العرس الا اهل العرس نفسهم

و في يوم العرس
احلى يوم لياسمين و خالد

تكرس الخالات كل طاقتهم لقرائه الرقيه عليها
ويعلن الدي جي دخول العروس ياسمين

و اتوجه الكاميرات و الكشافات الي تعكس في العين
شعور مرهق
مربك
الفلاشات من صوب
الاضاءه من صوب
الصوت العالي من صوب

تاخذ نفس عميق
و بخطوات متردده
مرتجفه

تدخل و قلبها كل ماله يزيد في الضربات

تتسحب على انغام هب السعد
و من شافت امها تبجي
و اهي تدمع
تقعد في الكوشه

تصور
الدقيقه تمر ساعه

تنطر

و تسمع صوت الدي جي معلن دخول المعرس

تنقز اختها

تركض اختها اتييب لها كلاص ماي

تركز نظرها في خالد المرتبك
لما شافتها و كأنها شافت احلى منظر في حياتها

حست الحين في الراحه بدخول خالد

زادها ثقه
تألق
عدلت من قعدها
شدت ظهرها
و وبنظره وحده على خالد
و ما شافت منو معاه

يقرب خالد منها
يبوسها على راسها

يوقف
يسلم على الوالدين
الاخوان
و الاهل
و كل من زفه

و اخيرا يحب راس امه
و يقعد
يساسر ياسمين

خالد: ماعرفتج شالهزين

ياسمين : تبتسم
و تلمع عينها

خالد يسمك ايدها ..تشد ايده حيل ..حست فيه يرجف..

خالد : سكتي اتنافض
ياسمين : حاسه فيك
خالد: انتي اشلون جذي قاعده واثقه انا حدي اتنافض
ياسمين : عادي خلك طبيعي

تقاطعهم المصوره
و التصرير

خالد يساسرها : شربيني عصير وايد حدي عطشان
ياسمين : تضحك حسبي الله على بلسيك لا تضحكني الناس تخز

خالد: الله يلعنهم هالحريم من شفتهم و اهم يخزون بغيت اطيح

ياسمين : خالد ترا صرنا مسخره اسكت

خالد: اول مرا مرا تصيرين ثقيله ..اووه موديل تزوجت انا عروس ..ديكوور

ياسمين : خالد اشفيييييييك

خالد : بطلع لاعت جبدي من الحريم

ياسمين : اول مرا ادري انك تحن

خالد: عاجبج الوضع ؟؟

شوي
و الا زميلات خالد في العمل يتوجون للكوشه بسلمون عليه

و اهو مخترع
مو عارف شالسالفه

خالد : طاعي هذيلي بنات الدوام و المديره
شكو يايين لي
اقوم؟؟
ياسمين : لألألألأ اقعد بسلمون عليك و انت خلك قاعد

خالد: اش مالا يايين يسلمون ..

ياسمين : لانهم زميلاتك ياين لك انت

و يوصلون البنات
و يسلمون و تطلب منهم ياسمين يصورون وياها

و يباركون و يردون

خالد: شفتي هذي ام الاسود هذي المينونه الي قلت لج عنها تتحرش

ياسمين : ويوم انها تتحرش ليش عازمها

خالد: و من قالج انا عازمهم ..اهم يحنون عازمين نفسهم

ياسمين : يمه منك مشتهي اتعزمهم

خالد:لا اتيبين طاري مصطلحات تأثر على الصحه في هالوقت ..الله يخلي الي اخترع البشت للمعرس

ياسمين : شحقه

خالد: بعدين اقولج

وبعد دقايق

ياسمين : يالله افراج امسك ايدي
خالد: الحين نقص الكيكه

ياسمين : اي بعدين العشا تالي نروح الدار

خالد: لج خلق كيكه انتي مشتهيه كيك ؟؟

ياسمين : هوووووو اشفيك اتحن لازم!!

خالد: بعرف منو الي أألف مراسيم العرس الغبي

ياسمين : مدري ما فكرت ...اضحك للصوره

خالد: تعسرت بروح اناااام

ياسمين : ورانا عشاااااا

خالد: خيبونه فووق

ياسمين : ايبون بوفيه الدار ؟؟
انا ميته يوع مو ماكله من 3 ايام

خالد : ياساتر و انا تعبان من 3 ايام مو نايم
هذي فزعتي من الصبح ما بقا تسليف ما بقى مدنيه
ما بقى عفسسسسه

ياسمين: كلش مو وقت هالمواضيع
استاااااااااااااااااااانس في العرس

يقربون من الكيكه يقطعونها
يصورون ياكلون
و يروحون السويت ينامون

عند الباب تقول ياسمين حق خالد ..

ياسمين : شيلني ..
خالد: يا معوووووده زين شايل عمري

ياسمين : هاهاههاهاهاهاهاهاها اشدعوه بخليك اتشيلني ما تقدر
بس بضحك حاسه انك هلكاان

خالد : بدش الحمام انا قبل اغسل و ابدل
ياسمين : لا انا بدش ابدل

خالد: خووووووو بدلي براا بروح اسبح لايعه جبدي من عمري

ياسمين: انزين انزين ..حبيب قلبي تعبان هلكان من 3 ايام مو نايم و لا ماكل

اكيد بتاخذ شاور الحين و بتنام ...انا بعد هلكانه بنام

يعطيها نظرره و ده يذبحها

خالد: انا تعبان هلكان مو نايم
نغزااااااات ما علي لو فيني المووووووت هم فيني شده

ياسمين تضحك باعلى حسها تلمه
و يلمها

الله يخليك



يقضي خالد و ياسمين شهر عسلهم في الكويت
و بعد اسبوعين يروحون امريكا
و تروح وياه
و في الطياره
يقعد ساعات يفكر في الي صار
ويحمد ربه
و يتذكر الايام الي مرت
يلتفت على ياسمين
يساسرها
اتصدقين ولهان عليها
ياسمين : على منو
خالد: على الي كانت اتأذيني في المسجات

تبتسم ياسمين و يبتسم اهو
و تمشي الحياه فيهم
و فينا

النهايه

الجزء الثاني

يسحب خالد جريده يتصفحها على ما اتيي ياسمين
خلال 20 دقيقه توصل ياسمين
بسرعه بسرعه تقط سيارتها في ممنوع الوقوف و تنزل
تدخل مهروله ..تزرق محل الشايع للعطور
ياسمين : عندك بخور كمبودي ؟؟
الهندي : اي في التوله 18 و في 30 شنو تبين؟؟
ياسمين : ثلاثين خنشمها بسرعه..
على ما يطلع البياع بخوره و ينفخ الفحم و يحضرها ..ترشرش ياسمين
سطوور ..حروف ....على شوي من الخلطه الفضيه..
تتبخر ..تفل شعرها ..تبخر شعرها .. ترد تربطه

ياسمين : سلااااااام رفيق مشكوور
..تركض تروح ستاربكس و عيونها تلمع ..تدور خالد تلاقيه مندمج في الجريده
تسحبها بسرعه...
و تصااااااافحه
يبتسممممم
يتلفلت حوالينه اغلب الموجودين من الجيش الامريكي
يبوسها على راسها
ياسمين : قرت عيني شلووووووونك ..طبعا هذي اخر مراااااا بتسافر بروحك !! من غيري ترا فراقك لو يوم يذبح لان احساس انك مو موجود
يطير النوم مني..
خالد : ثقلي ثقلي امشي السياره بسرعه ...

الله يسلمج انا زين
تمسك ياسمين ايده ...و تسحب الجيس منه
خالد: ياسمين في السياره مو جدام الناس ..
ياسمين : طززززززز في الناس ماهمووني ..
اهم شي اشلون سفرتك استانست!!؟؟
خالد : اوووووه الله يا هي ونااااسه
ما بقى ديسكو ما سهرت فيه
ما بقى مطعم ما بقى مكاان !!
و بنظرات عياره يقولها مو تعرفت على وحده هناك و حبيتها جان اخطبها
و الملجه الاسبوع الياي ..تبين اعزمج؟؟
ياسمين تحذف علييييييه الجيسسسسس
هااااااااااااااك مابي شي وده حق مرتك مالت عليييييك و عليها
خالد : ههههههههه يا حلات الي يغارون
انزين عطيني السويج ... امي تنطرني في البيت ماني مستغني عن روحي عشان تسوقين انتي..
يركبون السياره
يسووق خالد
و تفجج ياسمين جياس الدراريع
و يتعبث خالد في السي دي
ياسمين : ماعندي شي اتحبه ..
ماعندي لا عبدو و على عبدالكريم لا تخاف
خالد : اي كالعاده ماكو ذوق
ياسمين :ماتشوفني اخترتك .هاهاههاا
خالد يسحب ايدها
يبوسها
خالد:ريحتج خيال .... ياسمين تدرين من شوي ذبحتيني
تتعجب ياسمين وتفرح على كلمه ريحتج عجيبه ..

خالد : اي ذبحتيني ..لما قلتي هذي اخر مرا تسافر من غيري
لاني انشاء الله بسافر بكمل الماستر و الدكتوراه..
فتعودي اني بكون بعيد..
ياسمين : لا شعوريااااااا تشهق ..شنو بتسافر !!!!!
ليش مو في الكويت !!
تسااااافر تكون بعيد عني ...
تسافر
تقط ياسمين روحها على الكشن مهدود حيلها
نلف ويها الصوب الثاني
تغورق عيونها
دموعها تسبقها
يسحب خالد كلينكس و يمسح دموعها و يعطيها الكلينكس
خالد: تعوذي من بليس
انتي تدرين من عرفتيني اني بسافر
و هذا وقت السفر ..
ياسمين : خلاص خالد ممكن تسكر الموضوع لو سمحت حتى في طلعتي وياك و هذي احلى شي عندي بالدنيا
تبي تنكد علي
انت ما تعرف تحب و لا ترضى اتخليني استمتع في لحظاتي معاك
خالد: ترا راح ادش من الممشى وراا عشان محد يشووفناا ..

ياسمين : الي يريحك..
و ظلوا ساكتين لين وصل البيت
نزل ياخذ اغراضه من الدبه
تنزل ياسمين و عند الدبه
ما تقدر اتحط عينها في عينه
يمسكها من حنجها و يرفع ويها
خالد: حطي عينج في عيني
مرا ثانيه ما تبجين على شي ما يسوا انزين؟
ياسمين ساكته ..
تركب سيارتها
تحرك
و في الطريج تبجي بصراخ
و بحرقه ..لين تحس نفسها وصلت لمرحله انها ما تشوف الطريج من دموعها
توقف السياره

تبجي
يرن مو بايلها
ماترد
تحرك
توصل البيت
تنزل من السياره
تنسى موبايلها في السياره
...
خالد صاق خلقه
تمنى انه ما نكد عليها و فاتحها في موضوع الدراسه
لكن هم ما قدر يسكت
يتصل في عماد
يقوله الي صار
خالد: ذبحتها ..البنت حيت و ماتت الف مرا جدامي ..تدري شنو يعني تذبح وحده و انت تحبها
و تشوفها جذي تعبانه.. و عشان شنو عشانك؟؟ و انت منت قادر تسوي شي..
عماد: لا تقدر يا خالد تريحها و ترتاح..
خالد: مو بالسهوله ...مو مثل ما انت متصور طول عمري اخطط اروح اخذ الدكتوراه تالي ارد اكون نفسي ..
احقق الي بالي .. راسم لحياتي صوره .. ستب باي ستب
بس خطواتي مافيها زواج ابدا..
مافيني شده مسؤليه انا بسافر بروحي دراسه و شغل بطلع من
الصبح لي تالي الليل .. طول يومي مو في البيت
ماقدر اكون مسؤل
انا في زحمه شغل
دراسه
مخطط حياتي مافيه زواج الحين ابد
تخيل تزوجت الحين
و تحمل
و تمرض و احنا في الغربه
اجابلها او اجابل دراستي
انا مو اناني بس انا ماني قادر اكون مسؤل
عرفتها ..هقيت السالفه شي بسيط
ماهقيت هذي الي بحبها و بتحبني
يقاطعه عماد: يمكن خيره يا خالد تعرفها الحين و الله حطها في طريجك
عشان تروح وياك و بدال ما انت تشيل مسؤليتها اهي تشيلك في غربتك
اهي الي تساعدك و تريحك ..و تخليك هناك مرتاح
لو الانسان يفكر شوي في قيمه الي عنده و شنو الي عنده و ليش
صار عنده الحين مو بعدين
جان عرف حكمه الله في العطاء و الهبه...
خالد: والله مدري شقولك انا احبها ..احترمها .. مرتاحلها ..بس زواج ما اقدر الحين هذا الي اعرفه..
عماد: لا تضغط على نفسك الي في الخير ربك يجدمه انشاء الله ..
و هذا حال خالد بين حانه و مانه
يوم يريح ياسمين.. و يوم اييب لها طاري السفر
و ياسمين مخليته على راحته
بس ما غيرهالشي في حبها و لا مسجاتها و لا اتصالاتها
الامور ماشيه طبيعيه
خالد في الدوام
يفتح ايميليه
يلاقي رد من جامعه رود ايلاند
يكلم زميله في العمل بخصوص هذي الجامعه
يقوله انطر لي اييك رد من جامعه ثانيه
و فعلا بعد اقل من اسبوع اييه رد

يدق على ياسمين ..
خالد : ياسمين وينج ؟؟
ياسمين : انا في داري
اوكيه فتحي ايميلج الحين
ياسمين: مفتووح ! ليش؟
خالد: بطرش لج موقع جامعتين
شوفيهم وياي و عطيني رايج ؟؟
ياسمين : وين هالجامعات؟
خالد: وحده في رودايلاند و هذي حيل قويه ..الثانيه كلارادو
ياسمين : اكيد كولارادو ماكو نسبه !
ليش تروح تقمت قلبك في رودايلاند
خالد: انتي شوفي و حكمي..
ياسمين تفتح المواقع..تشوف الجامعات
وتسأله ...: صليت استخاره ؟
خالد: لألألأ كلش ما طرا على بالي
ياسمين: صل احسن ..استخير ..
خالد: اي والله انا ويني عن الاستخاره ..اذا صليت الظهر بعد شوي اصلي استخاره
بس تعالي ما اعرف الدعاء ؟؟ تعرفينه ..
ياسمين : روح جوجل تلاقيه
خالد: صاجه ..الحين اسوي له برنت و اقراه ..خلاص اخليج الحين اذا طلعت دقيت لج..
و يفكر خالد في الاستخاره..اي والله ليش انا ما اصلي و استخير في ياسمين !! انا ويني عن الاستخاره
و يصلي خالد الاستخاره ..
و بعدها في اربع ايام يسأل امه..يما اذا صليتي استخاره ..اشلون تعرفين الصالح لج؟؟ تحلمين و الا اشلون؟
امه: لا يا خالد الي الله يسهله اهو الي ربك مقدره لك خير
يصفن خالد في كلام امه..
خالد: يما ترا السفره قربت انشاء الله بعد اقل من 3 شهور ..
امه: خالد ماودك تسافر و انت معرس؟؟
يخترع خالد!!
خالد: شالطاري يمه؟؟
امه: و الله ماكو طاري بس انا ام و احاتيك ..ودي انك تسافر و انت معرس تصون نفسك
ترد بيتك مرتاح..مرا ترعاك..و انت كبير منت صغير و الله منعم عليك ..و بتروح و راتبك وياك..يعني مو قاصر عليك شي
من غير ما يرد عليها خالد .. و من غير ما يحس في نفسه
يطلع الحوش
يفتر
يدخن
يصفن
وبعد يومين يقرر

يتبع

قيود رجل

عماد و خالد في الدوانيه يتناقشون بخصوص الوضع السياسي التعيس للبلد
خالد يطلب من عماد ان يطلع يتمشى وياه في السياره يشترون عشا..يقعدون ويا بعض
اكيد خالد عنده حجي ..شكله مو خالي...

خالد: عماد انا انشاء الله نويت خلاص و قاعده اراسل الجامعات بخصوص الماستر و الدكتوراه..

عماد: الله يوفقك انشاء الله و اذا تبي اي مساعده انا حاضر..

خالد: اتهقى اتزوج و اروح؟؟ و الا شسوي ..دبرني يا اخوي تراني من اسبوعين ماني قادر انام

عماد: اهي اشقالت؟؟ بتروح وياك؟؟

خالد: تبي الصج ما فاتحتها ما ابي اعطيها المجال ان يكون لها راي في حياتي
انا صاحب القرار ..اذا باخذها اخطبها و اتزوجها و اتوكل على الله و اذا ما اقدر اخذها ليش احر قلبها؟؟

عماد: والله مدري انت ابخص في روحك.. انت شتشووف؟؟ انت متعلق فيها ترا و الا جان ما فكرت فيها ابد ..
خالد: مشكلتي اني مو مبين لها شي ابد .. و لا مبين لها اي شي يريحها.. اهي تصرخ و تشيل و تشدخ و انا مخليها و ساكت
طول يومها انت ما تدري عني .انت ما تحبني .. و انا ساكت .. ماقدر اقولها حجي و ما افعل ..مو من طبعي..
ماقدر اقولها بالعكس احبج و ابيج و انتي و انتي و انا قاعد في بيت ابوي .. لاني لو قلت لها احبج يعني اكيد ابيج
و اخاف ماقدر اخذها و هذا الشي يذبحها...
انا ساكت و مخليها بس اهي تحس ..

عماد: تدري اشلون عيل ..جرب نفسك! اي جرب نفسك اطلع دوره في دوامك لدبي او البحرين او اي مكان قريب ..
سافر و سكر جهازك و اقعد هناك جم يوم ..شوف نفسك ..

و بعد يومين يكلم خالد مسؤله في العمل و يطلع القاهره لحضور مؤتمراقتصادي عربي ..
خالد ما قدر يسكر جهازه بس حول جهازه.. و خلاه مفتوح ..على ما وصل الفندق الا 4 مسجات من ياسمين .. و 6 مرات داقه ..
خالد يصبر نفسه ...ياخذ نفس عميق في وسط زحمه جسر 6 اكتوبر و في وسط زحمه و ازعاج القاهره و النيل .. الا ان صوت ياسمين
ماقدر ينساه ..
يدخل لوبي الفندق
يلقى نظره على الناس ..
ياخذ كروت الغرفه من الرسبشن
يصعد الغرفه
يدخل ياخذ شاور
و مازالت المسجات مستمره...و الاتصالات..
يطلع يطلب اكل ..
يقعد في البلكونه على انغام التلفزيون و صخب نيل القاهره
و زقاره ورا زقاره ..يسحب التلفون
يدق عليها ..
هلا ياسمين شلونج...
ياسمين : خــــــــــــــــــــــــــــــــــــــــــــــالد وينك احاتيييييك عيزت اتصل فيك ابد ما ترد خبصت قلبي عليك يا بعد قلبي
خالد: توني داش الدار زحمه الطريج تدرين توصل الكويتيه القاهره 4 العصر مع طلعه الدوامات ..و بعد تعرفين الشبكه اهني
ياسمين: حمدلله على سلامتك ....ولهت علييييييييييييييييييييييييييييييييييك
خالد: الله يسلمج ..مامداني ...سافرت يعني ما افتكيتي مني ..الحين ما احن عليج وين رايحه ووين يايه
ياسمين : ياحلوك و يا حنتتتتتتتتتتتك تسوا الدنيا و مافيها عندي..
خالد: انزين يالله تبين شي ما اقدر اطول الشباب عندي ..
ياسمين: لا حياتي انتي ابي سلامتك ديربالك على نفسك.. و رد على مسجاتي بلييييييز
خالد: انتي بعد ديربالج على نفسج..ماني راد على مسجاتج لاني على ما افكر ارد على مسج تكونين دزيتي عشر
ما الحق وياج..
ياسمين : اوكييييييه حبيبي يالله باي ..احبك يا جييييييييييييييكر
خالد: احبج يا شيفه..

يتنهد خالد و يحظف الموبايل بعيد..
و يقول انا اشسويت بروحي
على الاقل في الكويت دوانيه و ربع انساها
الحين اهني في السفر
بروحي و اهي متوحده فيني في مسجاتها
يارب ريحني يارب
يقطع حبل الافكار ..رنه مسج
يفتحها ..تطلع من ياسمين
(( حبيب قلبي الغالي خالد..بما انك بخيل .. و ماتندي ..وبما انك تموت على الفلوس فوجودك في مصر فرصه انك تبحبح مخباتك و تشتريلي صوغه..
ابي منك بدلات رقص من الحسين.. اي شي على ذوقك عشان اقص عليك و اغويك و البسهم لك.. و ابي صاجات وياهم.. وابي بعد دراعتين من الدكان حقي و دراعه حق امك عشان اذا قصيت عليك و تزوجتك اعطيهم امك هديه ))
يقرا المسج
يبتسم
يصرخ على المسج و يقول
يا كلبه صدي عني شوي طخي ..طخي..
يحضر خالد المؤتمر ويخلص منه يرد الفندق يسوي جيك اوت
لاني مافيه صبر ينطر لي باجر
يطلب من السواق يروح ملحق رمسيس
يدخل محل الدكان
يدق علي ياسمين من هناك
خالد: الو ياسمين اشلونج هااج هااج كلمي البياعه طلبي منها الي تبين.. انا قلت لها اختي تبي اخر الموديلات بس انتي شرحيليها الي تبين
ياسمين ما سمعت ولا شي قاله خالد بعد كلمه اختي !! الله يا هي تجرح هالكلمه ..لما الحبيب يقول حق حبيبته اختي ..تقول في قلبها يوم انك جاذب كمل دربك و قول المدام ليش اختي ...من صجها ياسمين يضيق خلقها..
ياسمين: الوووو اهلا ازايك انا مش شايفه حاجه انتي اديلوو اي حاجه جديده الوان فاتحه مقاس ميدياام
و تسكر التلفون بسرعه ياسمين و اهي زعلانه
خالد شرا الاغراض .. حرك راح المطار على امل ان يلاقي عوده
يغير حجزه
يرد الكويت
يدق عليها
ماترد زعلانه
يدز لها مسج ..ياسمين الهبله ادري زعلتي على كلمه اختي لانجصارلج اربع ساعات ماصدعتي راسي في ولا مسج
لكن حبيت اقولج اني في الكويت توني واصل المطار
تدق عليه بسرعه
ياسمين :يااااااااااااااااااااااااااااااااااااااا جيييييييييييييييييييييييييييييييكر
ماني اختتتتتتتتتتتتتتتتتتتتتتتتتتتتتتتتتتتتتتتتتتتتتتتتتتك
اكره هالكلمه اكرهاااااااااااااااااااااا
خالد: هاهاههاهاههاهاها هلا هلا اختي ياسمين اشلونج شريتلج الدراعات يالله تعالي مريني المطار اخذيهم ماني راد فيهم البيت و بعدين تعالي وصليني البيت
بسرعه مو تبطين مو تقولين كشتي و مو كاشخه و ما يمدي .تتأخرين علي 10 دقايق اخذ تاكسي و ارد بسرعه تعالي
ياسمين: يالله يالله ...جااااااااااااااك (تسكر التلفون من الطياره)
تلبس الترينينج ..تربط شعرها بسرعه ..تسحب الجنطه ...طيران المطار
يدخل خالد ستاربكس ينطرهااااااا و قلبه معوره
بين يحبها و بين قاعد يأذيها
بين مايقدر يتزوجها و بين لازم يتزوجها
تعبان خالد و اهي تعبانه ويااه
بين هموومه يسرح
و بين مستقلبه
وبين هالحب الي ما يدري من وين طلعه


يتبع ....

التقاعد و ما ادراك ما التقاعد !!!!!!!!!

قبل لا اقولكم سالفتي ويا ابوي خلوني اعطيكم نبذه عنه
ابوي الله يسلمكم هادي جدا جدا
ماله حس بس نسمع صراخ الي يتهاوشون في الجزيره او المستقله
ابوي تقاعد بعد مرض
كان دبلوماسي ..ما يقار ب اكثر من 20 سنه
جنتل زياده عن اللزوم
زره اسم الله عليه
من تقاعد تبدل حاله مو هذا ابوي الي اعرفه
سمعوا السالفه و اخترعوا مثلي

يرن تلفوني في الدوام
و الا ابوي مو عادته يدق علي كلش
اكيد شي جايد
ارد عليه ...
انا : الوووو!! هلا يبا
ابوي : الوووووووو وين اخووج عيزت ادق عليه ما يرد علي ليش ما يشيل التلفون ؟؟ تعرفين رقم مكتبه !؟؟
انا : عسا ما شر اشفييييييك يبا ؟؟ّّ لا والله ما اعرف رقم دوامه بس ادق عليه موبالي ادوره لك و تالي ارد اكلمك!!

اسكر الخط بسرعه بسرعه
ادق على اخوي مرا مرتين ثلاث
ما يرد !
ادق على ابوي الوو يباااا ما يرد على دقيت عليه بس ما يرد !!
ابوي : اشلوووووون يعني ابيه ضروري ضرووري شي مستعيل ..دقي على مرته سأليها وينه فيه و جم رقم مكتبه بسرعه و دقي علي
ادق على مرت اخوي تنخبص مثلي
و تجاوبني انها ما تعرف رقم دوامه
ارد ادق على ابوي اقوله كلام مرت اخوي ما يصدقني!!

دقي عليها مرا ثانيه قوليلها ما تعرفين اي اداره اي قسم اي بداله
ادق على المسكينه مرا ثانيه .. تنخبص اكثر و اجاوب انها ما تدري !!

ادق على ابوي هم ما يصدقني
ابوي : انتوووووووووووو كلا ما تدرون دقي على مرت اخوج خليها تدق علي بسرعه
ادق على مرت اخوي للمرا الثالثه !!!!
انا: الووووووو بليز دقي على ابوي يبييج

تالي ارووح اكمل شغلي
ادق عليها بعد ساعه
اسألها اشفييييييييييج اشيبي ابووي قوليلي الصج امي فيها شي مغبي عني ابوي
فيهم شي اخواني !!
ترد علي مرت اخووي لألألألألألأ ما دريتااي!! عمي كل هالخبصه يبي موديل جيب طراد اخوووووووووج !!!
انا بشششششششششششششهقه قاتله !!
شنوووووووووووووووووووووووووووووووووو كل هالخبصه جيييييييييييييييب
طراااااااااااااااااااااااااااااااااااد
ترد علي مرت اخوي اي عمي هالخبصه كلها لان في شويخ قاعد يشتري قطع غيار حق الجيب !!

انا: اقووووووووووووول مرت اخووي وااااااااااااي اشوه انهم مو حموووووووووووولتي جان ذبحت ولدهم

سكرت التلفون منها
و انا مخترعه و اضحك و منبهررررررررررررررره من تصرف ابوي

يدق على اخوي المسكين
اخوي: فاطمه بليز قوليلي اشفيكم بس لا تخرعيني ما حبيت ادق على مرتي و لا ابوي و لا البيت لاني ما ابي اسمع اخترع اكثر قلت ادق عليج انتي اول !
منووووو مات !!؟؟

انا : جييييييييييييييييييييبك و طراااااااااااااااااااااااادك الي عفسوونا !! هههههههههههههههههههههه ماكو الا العافيه كل هالخبصه الي خبصنا ابوي
يبي يعرررررررررررف جيب طرادك السكراب موديل اي سنه !!
يرد علي مخترع !!
من صجج انتي !! قولي غير هالحجي !!
ايييييييييييي والله عفسنا ابوي ويا سكرابييييييك
ههههههههههههههههههههه

بصوت مخترع يقولي اخوي مدري جم موديليه جيب سكراب حلي مصدي شاريه في 200 دينار تبيني اعرف موديله
هههههههههههههههههههههه

اقول اخوي اشوه انك ما رديت على ابوي لان لو سامع هالجواب يذببببببببحك
ههههههههههههههههههههههههههههههههههه

وااااااااااي عفسنا ابوي على ابونا فااااااااااضي و متقاعد و يدور براغي في شويييييييييييييييييخ و انا ابتلش

طبعا بعد ما قلت السالفه حق كيتي
فطنتني في شغله
قالتلي بس وين امج !؟؟ لان لو امج تدري في السالفه جان مو بس دقت جان يتكم دواماتكم
هههههههههههههههههههههه
رديت البيت سألت امي
وينج فيه و ابوي يعفسنا
قالت انا طالعه و موبايلي في البيت لاني اذا طلعت الضحى ما خذ موبايلي عشاااااااان ياذيني ابوج
اخي التلفون يرررررررن عنده بالصاله ههههههههههههههههههههههه
لألألألألألألألألألألألألألأ
حالتك قاتله يبااااااااا
تكفا سااااااااااااااااااااااااااافر