Monday, February 06, 2006

FLORIST

بما اني فلورست
فحبيت اتكرم و اوزع عليكم .. هالورد قبل الفالنتاين .. لان الفالنتاين بدعه ! فبحتفل فيكم قبل

الورده الاولى :
سبحان الله .. في حديث عن الرسلول صلى الله عليه و سلم يقول بمعناه لو ان ابن ادم خير في القدر لاختار الي اهو فيه ..
قبل لما اتذكر هالحديث الشريف اقول اشلون؟؟
لكن بعد الي شفته امس حمدت ربي
اتصلت علي رفيجتي تشتكي من شغلها و انها مو قادره توفق بين مسؤليه البيت و الاعيال و الريال المريض ..
واسيتها في كلمتين و اقترحت عليها و سكرت التلفون و قبل لا اسكره قلت لها حمدي الله و كل شي من ربي انشوفه نحمده عليه

ولما صار العصر رحت زرت صديقتي الارمله .. وحالتها تقطع القلب من سنه متزوجه و اهي ارمله الحين وعمرها 29 سنه
قلت لها عليج في قيام الليل انتي مبتليه الحين و ربي يبي يشوف منج الرضاء على القدر

طلعت منها على طول رحت الاميري ولد رفيجتي عمره 40 يوم في المستشفى يلعبون فيه لعب
وايد عورني قلبي عليه و على رفيجتي المتحطمه
رجعت البيت حمدت ربي ان لا انا المتزوجه و لا انا الارمله و لا انا الي ضناي في المستشفى
ربي لك الف حمد و شكر يا رب

الورده الثانيه ..
اليوم الجو عجيب خيال اطلع من البت اتفاجأ في الجو الفظيه تبارك الرحمن
اركب سيارت اخوي لانه ماخذ سيارتي
اول ما اشغل السياره على هالمطر و الجو
اشتغل السي دي الاول
تتوقعون شنو الاغنيه ؟؟
راشد الماجد ..يسألوني ليه احبك حب ما حبه بشر ..
وااااااااااااااااااي الجو هذا ذكرني في لندن و الاغنيه هذي بالذااات
طول الطريج من البيت
تذكرتك وذكرت ايمنا و صيفنا في لندن
يمر علي شريط ايامنا الحلوه اشلون انت وة ربعك في الهايد بارك من تشوفنتي انا ورفيجاتي يفز قلبك
غرفتك الي يمنا
صعدتنا و نزلتنا في الانسنسير ويا بعض
براءه نظراتنا و دقات قلبنا
هل يعقل انت وياي في مكان واحد و لا كنا انتجرأ نقول كلمه وحده
الشفره الي بينا تعطيني رنه على غرفتي
يعني بتنزل اخلص بسرعه بسرعه الاقيك تنطرني في الممر و اركب وياك ..
اتذكر بالضبط
انك وراي وراي في كل مكان
و رفيجاتي ميتين غيره
و اتذكر يوم رحت ويا ربعك بلاك بول و زعلت عليك
ايااااااام
و لما رجعنا الكويت ويانا في الطياره
و شلت اغراضي و حيطتهم في الرف فوق
و رفيجاتي يطالعوني
تذكر يوم شريتلك شريط راشد الماجد هديه اول سياره شريتها و كان عمرك 16 سنه و عندك رانجلر
هههههههههههه و توقف عند باب الثانويه تنطرني و توصلني للبيت
و لما دقيت عليك عصبت على شريط راشد لانك ما تواطنه
..
واي قبل لما كنت احبك كنت احس اني ملكت الدنيا .. و اليوم لما اشوف اعيالك كل يوم توصلهم الحضانه الي يم بيتنا ودي صج احضنهم
يشوقوني
الله يخليك لهم و يخليهم لك
بس هالورده هذي لك
مني هديه و انا اسفه لان عمري ما عطيتك ورده هديه

الورده الثالثه
اخر مره قلت فيها كلمه احبك سنه 2001

الورده الرابعه

ادخل بيت يدتي يوم الاربعاء
من ادخل و يشوفوني اليهال يركضون يسلمووووون
اول سؤال اسأله اي بنت من تدخل الابتدائي و قبل لا احبها و اسلم عليها
اقولها يتلج الدوره ؟؟؟!!!
يستحون و يقولون لألأ
يوم الاربعا هذا غير
دخلت نونو قاعده ما قامت اتسلم علي
ناديتها نونو!!! ليش ما تبوسيني تعالي سلمي
اول ما قربت يمي
سألتها يتلج العاده !!!؟؟
استحت و قالتلي اي:\
قمت انا و شلت البيت يباااااااااااب و اغاني و ضحك و اهي مستحيه قالتلي اشدراج !!
قلت لها مكتوب عليج بس ما يابن قامت انحاشت و انخشت في دارها
ورحت لها غرفتها و انا ماسكه الطار و اغني و ايبب
و فضحتها في الفريج كله
هذي الطقوس امارسها مع كل بنت
و تعويضا عن نقص الحنان الي فاقدته نونو اليتيمه
اقووووووووم ابوس فيها بوووووس على بطنها و اروح الحماام و ابوس اغراضها
واهي تصرخ الله يخليج لا تفشليني بليز
و لا انزلت يوم الاربعاء اعتقادا منها ان الكل درا مسكينه نونو
قلت لها راح اسوي حفله كبيره
و اعزم فيها كل العايله
و اقولهم نونو ابلغت
وخوفا عليها من الانهيار قلت لها لألألألألأ بس خلاص اقص عليج
راح اسوي لج حفله نجاح
و خذيتها يوم اليمعه و غديتها برا و دخلتها السينما و شريت لها هديه

الورده الاخيره

نادتني السكرتيره المصريه و موتتني من الضحك
قالتلي يا بطه
هو بالحق انتي ما اتجوزتيش ليه ؟؟
قلت لها ماكو رياييل !!
قالتلي كل دووووووووووووووول و ما فيش
قلت لها باختصار يا عفت
انا كويتيه لكن %99
من الكويتين ما يصير اتزوجهم
استغربت
قالت ليش ؟؟
قلت لها والله مدري انولدت و لقيت اني محاصره في عادات و تقاليد
و الادهى و الامر على الرغم من تفتحي الي اني منغلقه في هالموضوع بالذات و جدا متخلفه
كانت ماسكه وورقه و قلم قالتلي ازاي كدا !!!
دريت عليها و قلت
الكويتين ينقسمون من فرعين
ناس اصولهم من السعوديه و ناس من بلد فارس
و الاغلبيه من الكويتين من بلد فارس
و عاداتنا المتخلفه لازم الزواج من شخص اصله من نجد
سألتني من السعوديه يعني
قلت لها لألألألألألأ مو كل الي اصلهم من السعوديه يصير
حتى الي من السعوديه اخذي منهم فقط %1
يعني يا عفت لو تقدملي بدوي ممنوع
و لو تقدملي من اصل سعودي لكن مو اصيل ممنوع
و لو تقدملي اصيل بدوي ممنوع
و كل شي ممنوع يا عفت شفتي عاداتنا
لازم نجدي اصيل و على فكره يا عفت لو نجدي و اصيل و ما عندوش شهاده ممنوع
و لو مش ساكن في المناطق الداخليه ممنوع
و لو لو لو لو ممنوع
يعني انشاء الله يا عفت حتفرج بعد ستين سنه
ردت عليها مبققه عيونها
طيب خودي ابن عمك
قلت لها ممنوع ما اتزوج لا ولد عم و لا ولد خال
اشفيج امراض وراثيه !!!!
ياختي عليك أطعتي البي يا اختي و اانا بأووول البنت دي مالها ما اتجوزتش ليه
دانتي عايزلك صلاه في سيدنا الحسين !!
وشكرا لكم ارجو ان الورد يازلكم

الي مو عاجبه يكلف حاله و يشتريلي ورد
ترا الورده بدينار

44 comments:

Ensan basee6 said...

ماشاءالله عليج كل هذا ورد ههه يالله فالانتاين ياي

lawyer said...

اييييييييييييي طبعا
كرييييييييييييييييييمه كريمه
ههههههههههههه
بس هذا مو معناته انككم ما تعطوووووووني ورد

طائر بلا وطن said...

سلام

لج

مني

وردة

ولما

ارد

البيت

بعلق

.
.

هذا

كمبيوتر

قلم

آسف

المسافة

مسلفينها

البنغالي

يسلك

بالوعة

المطبخ
:D

bo_sale7 said...

هاهاهاهاهاهاهاها

الله عليج ....الوردة الاخيرة شي :)

اقول ...سر بإذنج ...الحال من بعضه .....

lawyer said...

طاااااااااائر
هههههههههههههههههههه عاد يسلك فيها البالوعه
يا حافظ يا عقايل الله
دقو على السباك
ههههههههههه
فشلتونااااااااااااا الله يهداكم ليش ماكو مسافه اغلى كيبورد بدينارين
اششششششك انكم نياده

lawyer said...

bosale7
ماشفت شي ههههههههههه اشوه انك ضحكت بس
هههههههههههههههههه ياحسرتي ماخفي كان اعظم

lawyer said...

طائر نسيييييت اقولك من الشطه و الضحك نسيت اقولك مشكوووور على الورده

EsTeKaNa said...

وي يا عسى عمرج طويل
ما قصرتي على الورد يالله من فضلك سنعه
بس وين عاد
السنع وراحت موضته وانا اخيتج؟
ارد اقول لازم تسوين مونتاج
موتيني من الضحك وبدعتي

بس تبين الصج؟
ترا كل ورده فيها حكمه
الله لا يحرمنا من خفه الطينه
:)

Яeema said...

i love what you said , specially the last one about married, ana khatheet weld 3amety :/ ( join the club )


شكلنا نبي قصة عن بنات الكويت

ما يصير جذيه!

إذا بحب لازم يصير من 1% بالسعودية و الجد السابع لا يكون من اللي انزحوا حق العراق

Яeema said...

neseet agolich thanks , ur subject hit the heart!

طائر بلا وطن said...

رجعنا .. و قبل الكلام اعتذار مني
للبنغالي .. ما قصدت الإهانة

المسخن دايما يهذر و يخورها .. و يصير حساس
حبتين .. مو ملاحظة؟
.
.
كل شي في هالدنيا خيرة و مرات وايد
تلاقينا نستذبح على شغلة و ماتصير
و نقعد نتحلطم و ليش و ما ليش و تالي
الله يكشف لنا شي او سر كان مخفي عنا
عقبها بس نعرف ان ذيك الشغلة ما كانت
ابد في صالحنا

أنا دايما اذا بريح بالي و اخفف عن نفسي
أقول كل شي الله كاتبه لك فيه خيرة

الوردة الأخيرة

استحملي الهذرة .. مسخن
:)

شوفي و بقولج كلامي من واقع تجربة عشتها
سمعيها و لمجرد السماع و مو شرط تاخذين
فيها .. كل واحد و له ظروفه و تركيبته
الخاصة فيه

أنا واحد من الناس عانا من العادات
بغض النظر كنت من مستوى راقي او عادي
حسب معاييرنا الإجتماعية الكريهة من وجهة
نظري

عشت تجربة كانت تتطلب مني تحدي ناس
قراب مني .. البعض كان معترض من
أهلي طبعا

كنت أقدر أقول هذه عاداتنا و هالكلام اللي
له أول و ماله تالي بس ادري لو سويت
جذي ماراح اكون مرتاح و بتم طول العمر
الوم نفسي و اتحسف حتى لو كان المجتمع راضي
عني

سويت اللي يمليه عليه عقلي و قلبي و ضميري
و اللي فيها فيها .. لغاية ما الكل
استسلم .. لكن صار شي اكبر مني و استجدت ظروف الله يسامح اللي كان السبب
فيها

نصيب .. ما انكر اني زعلت و يمكن لغاية
الحين .. و ما انكر اني قلت في يوم
حرام كل شي سويته .. بس تصدقين
أنا مرتاح و ضميري مرتاح و احط
راسي على المخدة من غير ما اقول
اني قصرت او ليش سويت جذي
و ليش ما سويت جذي

أقسم قسم يا لوير .. و هذا شي خاص
فيني .. لو اقتنعت باللي جدامي و حسيت
اني مرتاح معاه .. ما اقولج اني باركن
عاداتي على جنب لأ .. أشوتها شووووت

اللي بقوله .. مو لازم تلبسين لابجين و تشوتينها
أو تسوين فلم مصري أو شي من هالنوع

بس الحياة مرة وحدة .. و دام ان دينج
مو معارض .. و الموضوع متطلب شوية تنازل
عن شي اصلا ماله معنى .. ليش .. حرام

لا نعقدها زيادة عن اللزوم

يمكن انتي وضعج اصعب كونج بنت

طولت ادري

بس على الطاري عفت هذه خضيرية ولا قبيلية؟
:p

مسخن
:)
سلام

Expatriate said...

خوش .. حاولي تربطين بين موضوع الورود ببعض .. وراح تتضح لج اشياء يديدة يمكن ما فكرتي فيها من قبل

على فكرة .. حسب اللي فهمته من رجعتي الاخيرة للكويت أن عوائل الكويت مقسمة الى اكثر من مجموعة ، وفي بعض المجاميع عدد الشباب في سن الزواج اكثر من البنات في سن الزواج ولذلك البنات مكفول حقهم في الزواج ، بينما في بعض المجاميع عدد البنات في سن الزواج اكثر .. ولا البنت تقدر تتزوج من خارج المجموعة ، ولا الشاب مجبور يتزوج من الكويت حتى ، خصوصا ان الشباب السرسرية زادوا بشدة في الكويت - الله يعافينا ويحفظ الجميع - و البنات خلف الله عليهم


لو ان المسلمين في الكويت طبقوا قوله عليه الصلاة والسلام
"إذا أتاكم من ترضون دينه وخلقه فزوجوه إلا تفعلوا تكن فتنة في الأرض وفساد عريض"
جان اهم بخير


الحين واحد دين وخلق وشهادة ونسب يردونه .. ليش ؟ والله ملتحي ولا متشدد ما يرضى زوجته تسافر مع رفيجاتها بدون محرم او يبيها تلبس عباة

Lord Bin Sleet said...

أول شي انا ابي وردة لي لحالي وخلينا نقول السبب لأني استاهل
:D
ثانيا: تعالي وش اللي اخر مرة تقولين احبك سنة 2001
شكلك ماخذه موقف من الكلمة... طيب اي لوف يو تمشي؟

تحياتي
لورد بن سليت

Broke said...

وردج كله حلو ..بس
الوردة الأولى و الاخيرة


تستاهلين محل ورد بكبره عليهم

@)->---

Hashemy said...

looooooool yala e7na b3ad naby ward lawyer kel ely gelteeh fe3lan wage3 ya36eech el 3afya o dayman enshofech twaz3een ward :)

lawyer said...

استكانه
عمري نورتي
بسسسسسسسس اهني ماكو مونتاج يا ناس بقول الي بقلبي و بليز تحملوني

lawyer said...

ريماااا
هههههههههههههههه ولكم تو كلاب اي ووالله
اقوووووولج احنا لازم يحنطونا
بس تدرين انا من جم يوم قلت حق امي
ان في نظريه علميه اسمها الظمور
الشي الي ما يستخدم يضمر و اخااااااف اضمر
تقولي انطمي مايصير فيج شي

اي والله بنات الكويت
و العفووووووووووو عمري تستاهلون اكثر

lawyer said...

طائر بلا وطن
باختصار
امي و ابوي و اهلي و اخواني
ما يستاهلون اضيق خلقهم
انا بنت وحده ابي اذا اتزوج ارفع راسهم
يا اتزوج زواجه تفرحهم
او انطم احسن

lawyer said...

اكسبا
صصصصصصصصصصصصصصصصصصصصصصصصصح السانك
انا ما بغيت اقول هالكلمه خفت الناس يردون علي ان اهلج سرسيه
بس والله العظيم شباب الاصل و الفصل و شباب الضاحيه و الشويخ و الشاميه كل واحد حاطله شقه في عمارات الوفره و المنار و طول الويك اند حفلات كابلز و الحاله حاله
و احنا البنات ناطرين على امل ولد فلان الفلاني يتسنع و يقرر الزواج

وتخيل مثلا
ياني الاصيل ولد الاصيله
ما يصلي في المسيد و يقطع الفروض .. و يمكن له ماضي عريق
يصير في اعيون اهلي شريييييف روما
و اذا ياني عادي و لد حلال كل فرض بالمسد سنع محترم شهاده طموح
هذا كله ما يشفعله

lawyer said...

لورد
هههههههههههههههه اي لاف يو والله انا وحده ثقافتي فرنسيه
شسوي يا اخووووووووووووك ماني رومانسيه ابد
رجه مسترجه

lawyer said...

ولكم بروك حبي
اييييييييييييييييي سكتي من شي فيني يا بروك

lawyer said...

هاشمي
شكراااااااااا
ماقصرت
اميييييييييين يا رب اوزع عليكم ورد

bo_sale7 said...

lawyer :
شفيج على مناطقنا يالطيبة :) ؟؟؟ ولا تظلمينا معاهم ....ما عندنا شقق وخرابيط ......
الله يهداج ...جبهاتج متعددة المحاور :)

lawyer said...

ادري ادري قصف موطبيعي لكم
بس انت ادرى في شبابنا والله يحفظك و يحفظ الشباب السنعين

amani said...

lawyer

والله انتي صريحه في كتابتك... ياسلام الان عرفت ان نجد
تصدر مشاكلها لوووووووول اقصد مشاكل الاصيل وغير
الاصيل والنجدي وغير النجدي..انتي عارفه ان معظم
النجديين اصلهم حجازي..مفاجاءه انا عارفه..لكنها
حقيقه :)

lawyer said...

ههههههههههههههههههههههههههههههههههههههههه صج اماني !!
اول مرا اسمع هالمعلومه اشلون يعني فسريها لي
قصدك يكونون قحطانين ؟؟ و ووووو....؟؟؟

Expatriate said...

Lawyer

أصلا الحين حتى مو قاعد ياخذونها على نسب الشاب اللي يخطب وأصله

الحين صاروا يدورون الفلوس والاسم والجاه والمركز الاجتماعي ، والدليل المناطق اللي ذكرتيها ، بينما ممكن تلقين في مناطق خارجية مثل هدية والرقة وفحيحيل والفنطاس ناس اصولهم من نجد ولكن مو من طبقة غنية في المجتمع و ينظر لهم بأنهم اقل من اصحاب البيزات داخل الديرة ... وكأن سعادة البنت ونجاح زواجها مرتبط فقط بالفلوس
وأبيج تشوفين البنات اللي ماخذين الشباب الأثرياء على قولتهم شلون سعادتهم وراحتهم بالزواج ...

يامعودة الكل يقص على نفسه والناس اغلبها مو صريحة .. الأم تقول انا اهم شي ريال يسعد بنتي واهي ما تفكر في داخل نفسها الا شلون تتشيحط جدام رفيجاتها وحمولاتها وانسباها شلون بنتها ماخذها ولد فلان الفلاني ..

بالله عليج شباب اعرفهم تاريخهم أسود الله يستر عليهم وعقلياتهم مادري شلون صايرة حتى مسؤولية نفسه مو عارف شلون يتحملها .. آخر شي يتزوج بسهولة ومن بنات سنعات ..ليش ؟ لأنه ولد فلان الفلاني وعندهم خير ما شاء الله

انزين والريال ؟ واخلاقه ؟ ودينه ؟ وعقليته ؟ وتفكيره ؟ شوفوا اطباعه حياته منو ربعه
لاا .. كان طايش ايام شبابه مايخالف
حتى سؤال ما يسئلون عنه مثل الناس

طبعا هذا بصوب وسالفة المغازل والحب بصوب ثاني .. والله فلان الفلاني بياخذ بنتنا .. سألوا شلون عرفها وشلون اختارها ؟ تعرفون اهله ؟ ما يهمكم انه صارله سنين يكلم بنتكم ويطلع وياها ويعرف قبلها ستين ألف وحده ..

حب دنيا ومظاهر ويقصون على نفسهم قبل لا يقصون على الناس .. ومحد ياكلها غيرهم وغير بناتهم

lawyer said...

اي والله انك صاج عقب مايطيح الفاس في الراس يقولون عين و حسد الي عفست البنت و الولد

lawyer said...

اي والله للاسف الحريم ماعندهم الا الحجي
فعلا انا امي كلا تقولي خذوهم فقراء يغنيهم الله من فضله و اذا ياني واحد بسيط تقولي يابنتي هذا راتبه مايكفي الحليب و البامبرز حق البيبي !
بس خلاص انا بسسسسسسسسسسسسسسكت
و ماراح اتكلم اكثر لاني كل ما فضفضت احس اني احتر اكثر
ماكو سنعين ماكو سنعين

طائر بلا وطن said...

هاهاها
^
^
>>> واحد بيلطف الجو :)

الشباب كفو و وفو ماشالله

بس عندي كلمة بقولها

بالنسبة للرد اللي متعلق على تعليقي
والله مادري شقولج

بس والله ترى كلنا نحب أهالينا و احنا
مو ضدهم بس احنا ضد بعض العادات المتجسدة
فيهم

ولا ترى يا لوير أنا واحد تحكمني العادات
حيل و اخضع لها وايد بس إلا في المواضيع
الحساسة و الزواج على راسهم
هذي حياتي مو حياتهم و قد يكون كل
واحد له حسبته اللي ابد ما تلتقي
مع حسبتي و تريحهم هم بالدرجة الأولى

كل يغني على ليلاه

و بالنهاية و من غير احباط و تشاؤم
بس للأسف احنا في زمن محد يتحمل أحد
و خلج من الكلام الحين
كلام الليل يمحيه النهار

ما اييب كلام من مخباتي
و اكيد صادفتي مثل ما أنا صادفت
بالدوام بنات من اسر و عوايل
حسب معايير المجتمع يصنفون ضمن النخبة

تبيني أقولج وين انتهى فيهم الحال؟

خليها على الله .. و الفلوس بروحها
ما تسوي شي و لا تييب السعادة
و أنا أقول هالكلام عن قناعة
و تجربة

و سلام يا الربع
:)

lawyer said...

طائر بلا وطن
انا مع كلامك لكن انت كلامك انا بنت ما اطبقه
انت رجل من حقك
لكن انا ما اسويه
انت اصلا لو تسويه معناته انك رجل و حر و لا تسمح للتيار يسحبك مني و مني
عرفت
و اناا فخوره اني في شباب اصلا مثلك ما يهمهم راي الناس

وفعلا الي تزوجو زواج اسم و صفقات
تبقى الفلوس و الاسماء خارج غرفه النوم و تنصدم البنت و تطلق بعد ما تنصدم في الي شفاته عندما غلقت الابواب

Ra-1 said...

KuwaityRa7al ...
latshayeshna ;p lol

Lawyer ...
elpost 3jeeb :D

طائر بلا وطن said...

^
^
^
هاهاها

من ياب طاري كويتي رحال؟
@@

الريال راح .. ما يجوز الحش
:)

لايبا مالي شغل بأحد
لوووووووووول

ezain_kilah said...

أقول لج شي؟
أموت عليج ... واااايد مو شوي ... من صج ! جذي لله في لله أحبج من أول ما قريت مدونتج وأنا حاسة إنج مو رفيجتي, حسيت إنج إختي, أنا ما أعرفج, أقصد شخصيتج وطبايعج, لكن أحبج مثل ما أحب خواتي, لأن بغض النظر عن أفكارهم ... طموحاتهم... آراءهم ... أحبهم
لول ... أدري مصيبتي بهالدنيا إني عاطفية وايد, مهما حاولت أخش هالشي ماكو فايدة, تصرفاتي تفضحني, وأنتي ما قصرتي يبتي طاري فالنتين ... شريرة

lawyer said...

ra-1
العفو من ذوقج

طائر
اشفييييييك صاير ابله املاء هههههههههه

الزين
احبج الله الي احببتيني فيه يا ربي
عاد انا والله ماعندي خوات و فعلا استانست لما قلتيلي هالشي
يا روحي والله انتي
احرجتيني

ezain_kilah said...

وعليه كسرتي خاطري :(
أنا عندي ثلاث خوات أكبر مني, أأجرهم عليج, ولا يهمج أسويلج خصم, أحد ثاني يبي يصير أخو حق خواتي؟ عندي عيال إخت بعد, إخذوا واحد والثاني ببلاش

jawaher said...

الورده اللا خيره مو ورده الله يهديك شوكه
مادري شاقول بس الزواج اعتبريه محطه بتمرين فيها وبتعيشينها مع شخص مو شرط تحبينه بالعكس يمكن يكون اكره شخص شفتيه

عشان كذا احس اكره سيره او سالفه سيرة الزواج وسيرة الحب
ياليت الواحد مايحب احسن له عشان ماينصدم في النهايه

غالبا غالبا نهاية الحب صدمه

والزواج في مجتمعاتنا الا ماندر موت مو بداية حياة

الحياة انك تعيش مع شخص تحبه ويحبك بس من يفهم؟؟؟؟؟

سوري على التشائم بس المود حقي سيء الحين

lawyer said...

الزين كله
حراااااااااام عليج خليتيني اكسر خاطر عمري والله
هههههههههههههههه اي والله يا ريت بعد تعطينا يهال بيتنا مافيه يهال يا ريت نشوف لو ياهل واحد
ماقصرتي لا تخافين ندفع فيهم العمر كله بس انشوف يهال





جواهر
افا عليج اخذي راحتج وايد قولي الي تبي تقولين
عادي
اي والله انج صادقه شكلي جذي اخرتي جذي بعيش ويا واحد مالي شغل فيه بس اسم انه زوجي و اييب منه اعيال ومن اضمن ثلاث اطفال انفصل عنه على طول

NOUF said...
This comment has been removed by a blog administrator.
~ se3loah ~ said...

لووووووووووووووووووول

انتي تحفه .. قسم بالله ويلوموني فيك

عليك صراحه مو على احد
انا اندمجت مع سالفة لندن والسياره والشريط
أبي وحده ثانيه!!!

يعني وشلون؟ عقدة النجديين واصلتكم
يعني حتى اللي طلعوا برا ديرتهم للحين متمسكين بأصلهم؟ اقول مالت

هو صح النجدي اكشخ بس النفس شينه وحكريييين
بعديين يختي نبي نغييير وش هالحاله

lawyer said...

نوف
حياج الله حبيبتي نورتي و انا قاعده اكتب قصه الاصل و الزواج كنت ادري و على يقين انها قصه تشمل بنات مجتمعي كله
والله بصراحه وايد ونستيني و اعتز في كلامج و مشكووووووره وايد وايد

lawyer said...

اما سعلوه
انتي من جدك تتكلمين تعالي و شوفي الهبال في هالسوالف عندنا يا شيخه ماتقولين في سنه 2006 تخلف وربي شي يشيب الراس
ياختك النجدي نجدي لو عاش في امريكا مو الكويت

ياشيخه فيكينا تعالي شوفي انا تعرفت على واحد زميل لي مصر طلع يقربلي حيل بس اهو في الرياض صار في مصر كل شوي يتصل وينك فيه اقوله في المكان الفلاني
يقولي يالله ارجعي بس واتركي عنك اجل قصيميه سهرانه برا بيتهم لي هالوقت!!!!!!!!!!
اقوله هاااااااااااااي انت انا كويتيه اشعلييييييييييك مني شكوووووو شكووووووووووووووو فيني
والله حاله

Anonymous said...

الوردة الرابعة تبين اشكثر مستواك راقي و انت راقية باخلاقك

هذي سالفة؟ ابوس بطنها و اغراضها بالحمام
مات الحياء؟
لا و الاعجب الي يعلقون و ينافقون

lawyer said...

شكرا لك و حياك الله
لا تعتقد اني بتضايق او بزعل
والمثل يقول صديقك من صدقك لا من صدقك اسفه اهني ماكو حركات على الكلمه عشان احطها