Wednesday, April 26, 2006

كان حبيبي ..كان زوجي ..اليوم اهو بوضاري و بس

ادخل الطياره .. اخذ مقعدي المريح ..
ابني الصغير و الخادمه يجلسون في الخلف ..
اوصي الشغاله على ولدي و اقولها عطيه رضعته ونوميه
و اذا قعد بعد ساعه ميخالف هاتيه عندي و انتي ارتاحي
..
المقعد الي يمي واحد عربي الجنسيه ..مممم يمكن سوري !
اردني !!
هم ما ادري بس ليش ابي اشغل نفسي في اي شي
يقدملي حلاو بالنعناع قبل الاقلاع ..
اخذ منه ..و اتشكر له..
اسرح في كتاب الادعيه الي معاي..
حصن المسلم
يالله لك الاجر العظيم يا سعيد بن على القحطاني
على هالحصن الي في كل بيت ...
ادعي ربي ان يفتحها علي و يسخر لي من عنده
ادعي ربي ان يلهم زوجي رشده و يرجع لي بعد عشره 22 سنه
ادعي ربي ان يسخرلي ابنائي و يحفظهم
ادعوك يا ربي انك اتثبتني و تاجرني في مصيبتي
وتخلفلي خيرا منها
...
يارب ان فلانه بنت فلان تسلطت علي في زوجي و بيتي
يارب من عندك تنسفها
يارب اسألك بقدرتك عليها فانك القادر و ليس بقادر سواك يا الله
يارب اهدم و حطم حياتها مثل ما حطمت بيتي و اعيالنا
فرقها يا رب و لا تجمعها مثل مافرقتني بسحرها و شعوذتها من بيتي
يارب قدرت علي ..هذه الانسان بحول منك و بأمرك و ليس لها حول و لا قوه الا بك
يارب اسألك بعظمتك وحولك و يا مغيث اغثني و انت القائل ادعوني استجب لكم و ها انا يا رب ادعوك في سفري هذا
ان تقدر لي كل خير
...
اطالع ساعتي ..
يالله مابقى شي
اسرح في كوب الشاي ..
اتذكر ابني الي ناسيته مع الشغاله ورا
اروح اتطمن عليه
حياتي نايم بعد روحي
نومته مثل ابوه بالضط
يالله اشكثر احب ابوك على كل الي سواه فيني
امسك اصابع ابني الصغير و اسرح في اظافره
سبحان الخالق الناطق
اتذكر اول مرا كنت في شهر العسل
لما طلب مني ابوه اني اقرض اظافر ايده
واشلون عطيته مقراظه الاظافر و قلت له
راح اقضرهم لك بس بشرط
اتخليني احلق لحيتك!!
وقتها ضحك و قال مالج امل
مينووووووون انا اسلمج ارقبتي!!
حذفتها عليه
و قلت له عيل عابل بعمرك
..قاطعت افكاري المضيفه تستأذني انها تبي تمر و انا مسكره الطريج
أشيل ولدي على كتفي
وانومه بحضني
يالله اشلون اقدر اعيش 3 شهور من غير ما الم ابوك
يالله ثبتني
... ارجع مكاني
يسألني الرجل العربي
عن ابني
اقوله و كلي فخر
اي هذا الحلو ابني
طالع علي :)
يبتسم و يدعيلي ان يكون ابن صالح بار فيني و ناجح في حياته
....
العربي : عندك اولاد غيرو؟
انا : يخزي العين عندي 5 غير فهد الي في حظني
اسحب جنطي
يطيح بوكي
اخذه من بين ريولي
افتح البوك
اطلع له صور اعيالي
و انا بيني و بين نفسي
اقول اشفيني ليش انا من شفته وريته اعيالي مو مصدقه
بس توسمت فيه الخير لان رجل كبير جدا في السن و مو كويتي فماراح ينقد علي
هذا ضاري الكبير ...عمره 20 سنه
الحين اهو في بورمث في بريطانيا يروح كل صيف هناك مع اصدقائه بحجه اللغه ..
وهذا خالد ..عمره 17 سنه مع جده في مصر ..
خالد نسخه من ابوه في كل شي شكلا و مضمونا
وهذا سعود 12 سنه
وهذي حنين 11 سنه
و هذا ضرار 9 سنوات
كلهم في امريكا مع ابوهم
و انا مسافره مع فهد الصغير و الشغاله
عندنا بيت صغير هناك عندكم في الاردن ..مع بستان كبير
احب اصيف هناك اذا ابي اهرب من الناس
لان تدري في الصيف كل الدول الاوربيه مليانه خليجين
لكن في شارعنا في عمان و خصوصا في مزرعتنا و مكانا ما اشوف احد ابد
فجأه حسيت اني هذرت على راس الريال
و اهو يبتسم
... ويسألني مسغرب
و ليه منك مع جوزك؟؟
ارد عليه و قلبي يتقطع : لاني انفصلت عنه من اسبوع
حسيت في اعيونه نظره استغراب
و بالحرى عطف و شفقه و كل شي
...
احول اسوي نفسي عادي عشان ما اخليه ينحرج من سؤاله
..والله يا عمو ادري هالحياه الي يعيش فيها ياما بيشوف
بس كل شي قسمه و نصيب
يرد علي : اكيد اكيد
يتمقط ولدي
يقعد من نومه
ياختي على عقده النونه هذي
مالت بابا ..
اوري العربي عقده النونه و النظرات هذي
اقوله انه يشبه حركات والده لما يصحى من النوم
..
يبتسم
استأذن منه
اروح اخذ اغراض ولدي والشغاله عشان تساعدني في تغير الحفاظات
ارجع مره عاشره لمقعدي
كثيره الحركه انا اليوم
متوتره
....اربط حزام الامان استعدادا للهبوط
..
بعد السلام الحار من حارس المزرعه و السواق
و ابنهم الصغير اركب مع ابني
نروح البيت
يالله البيت هذا هذا من عشر سنوات
ما يتغير فيه شي
ابد
تستقبلني الاسره الي عايشه في البستان للحراسه و جني المحصول
ناس سعيدين جدا
بسيطين وايد
لما اقعد في البرنده و اسرح بجريدتي و فنجاني ..اتأمل فيهم
دايمين السمر بالليل و الضحك و البسمه ما تغيب عنهم ابد
على الرغم من انهم لا يملكون شي
صج الي يقول السعاده مو في الفلوس
السعاده في القلب
...
يتصل علي ابني الكبير ضاري
يتطمن علي
ابشره اني في احسن حال
ضاري حبيبي اكثر واحد شايل همي
الحين صرت احس اهو رجل حياتي اهو ابوي و اهو اخوي و سندي
الله لا يحرمني منك يا ضاري
انا: حياتي اشلونك مع الصلاه
ضاري : طقه و طقه ..ماقلت لج اجمع يومين بيوم واحد!!!
انا: الله يسامحك ربي باجر بحاسبني عليك
ضاري : لا يما اشفيج انا في سفر !!
انا : و اذا يعني المسافر ما يصلي..!!!
ضاري : يما شخبارج بعد اشلونج ؟؟ هالله هالله في المسجات الطيبه
انا: ضويري لا اتضيع الصقله حط بالك على نفسك و على صلاتك و بس
يالله فكني ما ابي تصير عليك مكالمات !!
ضاري: اي ميخالف انا ابي اتصير علي مكالمات عشان اطلب منج .. و اقولج ان احتاج فلوس من كثر ما صرفت على المكالمات!!
انا : حريمتك يالله روح ديربالك على نفسك ....دق على خالد و على باجي اخوانك تطمن عليهم
اسكر الخط
تدمع عيوني
انا فيالاردن
ولدي في لندن و الثاني في مصر و الباجين في امريكا
يالله اجمعنا و لا تفرقنا
يالله حكمتك ربي
يارب والله متحطمه على اعيالي
يارب ولهانه عليهم
ياااااااااااااااارب تعبانه ياربي
تقاطعني الحجه مريم(زوجه الحارس) بدك قهوه؟؟
ياريت يا حجه مريم اتيين تقعدين وياي في البرنده مع بناتج و كنتج اتسلوني شوي
ترد علي :هاله بجيبلك التين و القهوه و بجي لعندك
و اتيبلي الجوله الصغيره !!
انا : ويه يا حجه مريم من وين يبتي هالجوله
تدرين كان في الكويت قبل نفسها يسمونها بريمز !!
شكلها عجيبب
و اسهر معاهم لي اسلاعه 12 في الليل
بعد ما تعشينا و استمتعنا
ادخل غرفتي
الفراش موحش
اخر مرا كان زوجي و بنتي معاي
تدمع عيوني ولهانه على حنين
ادز مسج على موبايل سعود ولدي
((حياتي سعود الوقت مناسب اني اتصل))
طبعا انا علمت سعود اذا كانت مرت ابوه يمهم يقولي غير مناسب
و اذا كانت مو يمهم يقولي مناسب
و دايما بنتي حنين تتعمد انها تكلمني و معاها ابوها عشان تحرج ابوها يسلم علي
و تحاول هالبنت توصل ابوها فيني بكل الطرق
اتيني مسج افتحها ((يما حبيبتي انا ولهان علج وايد مع اخواني و ابوي بعد اكيد ولهان عليج تدرين يما ابوي امس نام ويانا ما نام عند زوجته ..بس للاسف الوقت مو مناسب لان حيزبونه موجوده ))
بس انا ولهانه على اعيالي اكثر
افتح قناه روتانا اعلي عليها
اتصل في سعود ...ادري في سعود يسوي نفسه ما يسمع عشان يخلي ابوه يفطن ان في احد دق
يشيل التلفون ..
سعود: هلا يمااااااااااااااااااااااااااااااااااااااااا ولهان عليج حدي
يما سان فرانسيسكو من غيرج ما تسوى شي
يما اشلووووووووونج؟؟
انا : بكل هدوء ..هلا حبيبي اشلونك عطني بوسه بسرعه
شخبارك حاتي اشلون اخوانك و حنين
عطني اياها ولهانه عليها
..يما يما هاج ابوي على ما اروح اناديهم ...يحذف السماعه على بوضاري
بوضاري: الووووووووووو السلام عليكم ..هلا ام ضاري اشلونكم
انا : هلا فيك اعيالي اشلونهم انشاء الله مستانسين لا تكدرهم دللهم و ديربالك على كمام ضرار ترا ما يحس في نفسه كلا يركض و اذا صار بالليل يتعب
و اهم شي حنين تبي كورن فليكس بالليل
و لا تنسى اشترلهم كل شغل المدارس لاني ما اظن برجع الكويت من شاف الوناسه و السهر اهني شكلي بقعد لي رمضان اهني
بوضاري المطنقر : يصير خير انشاء الله اشتريلهم كل شي
تسحب حنين السماعه من ابوها
حنين: عسووووووووووووووولتي عسووووولتي اشلونها ولهانه عليج ماما
انا : اتغورق عيوني من دلعع هالبنت اتماسك او امسك نفسي شوي....هلا امي و ابوي و خلف طوايفي كلهم بسرعه حبيني
و قوليلي اشتبين اشتريلج من اهني امي؟؟ تاكلين عدل .؟؟ تفرشين اسنانج بالليل
حنين :يماااااااااااااااا ترا حيزبونه طقت ضرار و انا طقيتها و قلت لها بعلم عليج ابوي و امي
عشان امي راح تذبحج
يما الله يخليج تعالي ما نبيها الله يخليج يما
ابوي حلو يما ابوي والله صار يعطينا فلوس وايد تعالي انا عندي فلوس يما
و بأنهيار ارد عليها : عطيني ابوج بسرعه
انا: ساااااااااااااااالم هذا الامانه الي عطيتكك اياها انا اعيالي ينطقووووووووون يا سالم
انااااااااااااااااااااا اعيالي اعطيك اياهم تسفرهم و تحلفلي انك بتحطهم في عينك
اخرتها ينطقون
سالم: اشفيج الله يرضالي عليج لا طق و لا شي غشمره كانت تتغشمر معاه و انا بعدين قلت لها اعيالي مو متعودين على الغشمره الثقيله
و خلاص اوعدج ان ماراح تسمعين شكوى من احد
انا : والله يا سالم لو واحد فيهم يشتكي من شي مرا ثانيه والله بخليك اتردهم لي باول طياره
دامك مو قد المسؤليه ليش تتكرم و تاخذهم
......يسكر الخط في ويهي
اطالع الموبايل
و ابجي
الله ينتقم منج يا رب الله ينتقم منج
ربي يوريني فيج يووووووووووووم
ياللي فرقتيني من اعيالي و بيتي
اقعد ابجي على سيادتي لي الصبحادعي ربي يثبتني و ادعي عليها بالموت
ياذن الفجر
اصلي في البرنده
انطر الشروق
اروح انام
اقوم الساعه 2 الظهر
الحجه مرم تبلغني ان والدتي ووالدي اتصلوا اكثر من مرا
اتصل في امي
اتطمن عليها في مكه
الجو حار و امي تقضي الصيف كله في شقتنا الي في مركز مكه مجابله الحرم الله يهنيها
...ادق على خالد و اتطمن عليه
اسلم على ابوي
خالد ما يعبر عن مشاعرع ابد
لازم انا ازيد من جرعه العواطف
من غير ما يطلبها مني
امه و افهمه
اتحضرلي الحجه مريم الحمام الدافي
اسبح و اشرب القهوه
الحجه مريم : يالله ياربي انت عالم فيها اشرح لها قلبها يا رب
انا : اميييييييييييييين و جميع المسلمين
الحجه مريم : ما ألتيلي وينوه لابو ضاري و اشلون اجوز عليج و ليش اتطلقتي ؟؟؟؟
انا : اخذ نفس عميق و اتنهد
..اااااااااااااااااااااااااااااااااااااااااااااااااااااااااااااخ سكتي يا ام الخير سالفتي سالفه لا لها اول و لا تالي
بس حضريلي شيشه و شغليلي روتانا طرب عشان اقولج كل الي في قلبي
يتبع

29 comments:

Яeema said...

ولا أروع من حيييك
دايما إتفاجئينا و إتعلقينا بالقصة

تصلحين حق رمضان

أنا بإنتظار باقي الأجزاء

esTeKaNa said...

!!ما ظنتي ابد هالقصه من وحي خيال

واقع وواقع مر بعد
واي عورني قلبي بالذات لما تتحلى على ولدها وعقده النونه اللي تذكرها بابوه:(

قمة الحب اعتراف المحب انه رغم الجرح ما زال يحب!!
22 سنه والله عمر
صج مالهم امان على قوله دعايه رد بول:))
بعدين ترا انا مندمجه وحابتها المرة مصليه مسمية بس يوم حطت الشييشه
جك بم
طاحت من عيني
:)

qalm-jaf said...

شفت الموضوع طويل قلت لا بنام بعدين اقرا قلت خلني اقرا اول سطرين مادريت الا انا مخلص الموضوع كله وابي الجزء الثاني بسرعه
(:
يمعوده مو كويتين هذولا مشردين واجد امريكا وبريطانيا والام الاردن والجده بمكه
وانا امجابل قرعة طائر 24 ساعه محد مرتاح سبحانه
لوير لاتضحكين على طلبي خلي الجزء الثاني قناة طرب روتانا اغنية ام كلثوم ألف ليله وليله والمعسل سلوم علشان أبكي انا مع ام ضارى

نون النساء said...

^
^
^

لوووووووووووووول

أهم شي معسل سلووم





لوير يمه منج يبه شوفي برمضان سويلنا مسلسل كل حلقة بجزئين يووبه والله محد بيجابل التلفاز مووووليه


ناطرين ام ضاري لمه اتفضفض

فارس هوى الكويت said...

الله يعطيج العافيه اختي على هذي القصه
ناطرين الجزء الثاني لوسمحتي
بصراحه روعه

تحياتي لج :)

Edward Ott said...

salam

Anonymous said...

يما سان فرانسيسكو من غيرج ما تسوى شي
^
^
ماني قادر اتخيل .. الوالدة يا منسدحة
يا متربعةبالصالة .. البيت مايسوى بدونج تمشي
هاهاهاها

ان بغيتي الصج .. عن جد جد الفلوس مو كل
شي و ان كانت مهمة و تسهل حياتنا

سرد حلو و غير ممل رغم دقة تفاصيله

و بانتظار البقية بعد اول سحبة من الشيشة
:)


قلم
:
للقرعة سحر لا يقاوم .. بس احب ستايلك
تذكرني بالقذافي
:)

طائر بلا وطن said...

^
^
^

هذا انا .. خيط و خيط قمنا نقط

يالله حسن الخاتمة

3ateeja said...

ترى بأنتظار الباجي انا والله شوقتيني
منمجه شحليلي مع حصن المسلم والنوم عالسياده والصلاة ومادري شنهو
واخرتها روتانا طرب وشيشه
هههههههههه
هااااااااه ام ضاري شالسالفه
بس دامها تبي تريح بمكان اهي ترتاح فيه
عيل خل تشييش
وروتانا طرب
واللي تبيه
كيفها ماكو ادمي يقدر يحاسبها
:)

Lord Bin Sleet said...

والله شي يقطع القلب ويقهر

Expatriate said...

see , that's the kind of drama used to manipulate story facts or even hide some while show others.

bas eb9ara7a great writing and story structure construction.

If this drama is based on a real story, i don't think the husband is the person to blame. I bet even the wife has something to do with begining the tragedy.

Bas who knows, shesha oo rotana oo talking to a foreign guy on plane this way.

lawyer said...

ريما
دوم مشجعتني

استكانه

شوفي حياتي المرأه اكثر شي تحبه في هالدنيا علاقتها بربها
و اذاا الوحده في ايطار بيتها و مكانها مافيها شي اذا اسمعت اغاني او شربت شيشه

في بيتها و بس لان اهني اهني ماتنوي اغراء احد او لفت انتبهاه احد التناقض هذا من كينونه المرأه


ناديه
هههههههههههه لا تفشليني و تقولين انا وايد اسرح
لان جذي محد بيطلع وياي بعدين
هههههههههههههههههه
بس بدام انج قلتي حق الناس اني انسانه وايد اسرح قوليلهم اشلون تصرخين علي جدام الناس و تفشليني
و تقولي بسسسسسسسسس ماني مكمله
هههههههههههههه

lawyer said...

قلم جاف
ياويلك من طائر تطنز على قرعته هههههههه
شفت اشلون يا قلم هذي الدنيا

نون النسوه
بليز اقري الكومنت مالج انا قريته مت من الضحك
اول شي كويتي بعدين تلفاز
هههههههههههههههه عجيبه سعاد حسني اتينن
اي انشاء الله ام ضاري بتقولكم عن كل تفاصيل حياتها
بس ترا الشيشه ماكنت سلوم كانت كريز


فارس هوى الكويت

ماقصرت و نورت
اشكرك على اطرائك

lawyer said...

طائر بلاوطن
الحمدلله موووووووو بس انا كبرت
اشوووووه

lawyer said...

00
ههههههههههههههه وين شباب لا تقصين على الريال شايب شااااايب

عتيجه
عاد يا وخيتي هذيلا الحريم شنسوي بعد بريحاتها لا حنيس و لا ونيس لا ريل لا بيت لا عيال


هورس شوز
حرقققققققققت علي القصه
بس حياك الله بيتك و مكانك اتشرف في تعليقك

ادوارد
وعليكم السلام
حياك الله
تشرفت في سلامك


لورد بن سليت
سلامتك
لا يتقطع قلبك
هذولا الحريم وحده حيزبونه تسرق الرجال و الثانيه منكسره و منخرب بيتها
الله يخرب بيت كل وحده تبي تبني بيتها على خراب اسره و تشريد ابو من اعياله

lawyer said...

اكسبا
اوووووووووووووووول مرا تمدحني في شي
حدي استانسسسسسسست

bas eb9ara7a great writing and story structure construction

هذي الجمله ببروزها عندي

ترا اهي هذرت ويا الشايب الي يمها
لان مثل ماقالت شايب و موكويتي ما ينقدعليها
بس لما عرف الرجل الكويتي الي اهو انت
نقدت عليها
عيل اهي صاااااجه
ههههههههههههههههههههه

Anonymous said...

غاليتي ..
هذه أول زياره لي لمدونتك ..لكن يبدو لي أنها ستتكرر مراراً ..
..رائع ماخطته أناملك وماجاد به خيال ، أنتظر البقية
.
.
أروى

lawyer said...

اروى
حياك الله هللت سهلا
يا هلا بهالاسم اروى
خليني اقولك شغله وايد مميزه عن اسم اروى
انا وايد احب هذا الاسم من زمان فلما خالتي جابت بنت قلت لها سميها اروى على عمت الرسول عليه الصلاه و السلام
تبين الصج ماكان قصدي ان الاسم على عمه الرسول عليه افضل الصلاه و السلام و لكن كانت هذي الوسيله لاقنع خالتي بالاسم
فقصتي مع اسم اروى شي جميل
حياج الله اختي مرا ثانيه :)
و انشاء الله ماتكون الاخيره

Nora said...

انعصر قلبي .. تعرفين شلوون العصرة اللي تعوور .. و دموووع


حسبي الله على حيزبوونة يا مال ايدها التقصص يااااااااااا رب

هذا ابتلاء من الله سبحانه .. و ربج ما يبلي الا اللي يحبه

يا حلوو المزرعة و اللي فيها .. عشت الجوو تصدقين .. مشكوورة

الله يجمعها بعيالها يا رب .. و يهنيها

انا فرحانة فيها .. مجابلة هالسيادة

جك بووم شيشة

الشيشة مو سالفة اغراء .. ناحية شرعية .. اخت التدخين

واقع .. و انسانية .. الكمال لله وحده

و اللي يسلمج نهاية سعيدة

عاوزينها كده .. مو احنا الجمهوور
:)

even though make the happy ending for me .. w ta7at-haa el true one

;D

يا حلوو اللي كاتبة القصة والله
:*

Lord Bin Sleet said...

لوير وش قصة ريما؟

cosimfree911 said...

walaa aldenyaa feyhaa balaawee wayed

bs alwa7ed lamaa eyshoof balawee 3'ayraa et'hoan 3alih balaweyaaa


wayed 7eloo alesloob oo 6aregat alrewayaaa mashalaa 3alich ;)

نون النساء said...

هااااو

اي والله تلفاز

وافشيلتاه
*^_^*


قصدي تلفزوون

lawyer said...

احلى انجنير


سلامت قلبج عمري
خليني اول ششي اقولج اشكثر مت مت من الضحك على تعليقج و خصوصا لما عصبتي و قلتي مو احنا الجمهوور
ههههههههههههه نبيها نهايه سعيده

صج صج ضحكت اتصلت في ناديا انزاحا و قريت عليها التعليق

كان وايد ممتع

اشكرج وايد



بلقيس
حياج الله اختي
انشاء الله بحاول
:)


ناديا
اكيييييييييييد تمونين



كوزي
شكراااااااا على الكلام الطيب الي يثلج الصدر و يشجع والله



نون النسوه
ماشفتيني مت من الضحك


we love kuwait
u make my day walla
matetsawren eshkither ana far7ana fe klamich o ur comment
للاسف المرأه الكويتيه وايد مشغوله تدرين ليش
من استقبال لي استقبال من صالون لي صالون من سوق لي سوق
موفاضيه عشان تربي اعيلها
و اتلاقينها فتره الحمل 9 شهور واهي تجهز حق استقبال يومين الولاده فعلى ما يطلع الياهل الا منهد حيلها و مستنفذه طاقتها كلها
للاسف ان الخم الي يايين من الادغال و الغجر و الغابات يربون اعيلنا و يغرسون فيهم مبادئ بالغلط
بنات هالوقت دورهم عظيم في بناء اسره الغد
من متابعه معارض بيت ديفا و كارزما من متابعه احدث القهاوي والمطاعم
و مجابل عمرها و تتزين حق الريل
و يالله وقتها يضيع على التقشير و اللزر و النادي و الشد
فتعتقدين الغلط في منو؟؟
المرأه الي بتكون عارضه ازياء حق زوجها
و الا الام الي بتكشخ اعيلها و الا الموظفه الي بتجامل مجتمع الدوام في المناسبات
ضغووط وايد في مجتمعنا مالها حل
تركيبه صعبه

3ateeja said...

اقول لوير
مطوله؟؟؟

cosimfree911 said...

testahlain akthaar walaa ;)

yalaa na6rean alpostaat elyedeydaaa ;)
have nice one

lawyer said...

بلقيس
ماقصرتي عمري :)

عتيجه
هووووووو يا اختي هذا بوست مو معدس بخمس دقايق يخلص ههههههههههه


we love kuwait


my husband and I are enjoying our parenthood and the natural ecstasy that comes with it! a child that is well cared for is a happy and healthy child.. and having a healthy happy child simply means happy days!

اهني الي احنا فاقدينه في الكويت
انتي قلتيها
انا و زوجي!!!!!!!
بس لو تلاحظين في الكويت منو تطلع ويا زوجها!؟؟
منووو ترعى اعيلها مع زوجها؟؟ منو كويتيه تدرس اعيالها مع زوجها؟؟
و الا منوووووو وحده تشتري اغراض الجمعيه مع زوجها؟؟
اقل شي منو زوجه كويتيه تتغدا و تتعشى مع زوجها كل يوم؟؟

انا اعتقد ان السبب الرئيسي في نجاحج كأم و زوجه معا هو ولله الحمد ان انتي قدرتي تخلين زوجج يحترم و يقدر الحياه الزوجيه ثاني شي اكيد انتي وايد ممتعه الي زوجج يأنس بصحبتك في رعايه اعيالج
الله يديمها عليج من نعمه و راحه نفسيه و استقرار
اكد حياتج مو مثاليه بس اكيد انتي تناضلين من اجل ان يكونون اعيلج باحسنحال و باحسن وضع مثالي

انا وايد استانست على كلماتج و تعليقج و اشكرج على انج قاعده تعطيني من وقتج تقرين و تعلقين
انتي قاعده اتغذين عقلي بخبرات انشاء الله استفيد منها في المستقبل
اشكرج وايد


كوزي
انشاءا الله
صج الواحد معاكم يتشجع

Dr. Saleh said...

قصه ممتعه
لكن في ملاحظه وحده إهني
هل إنتي متأكده إن أم ضاري راحت الأردن
لإن لهجة الحاجه مريم تدل على إنها مو أردنيه
أغلب الظن إنها سوريه أو لبنانيه
ننتظر منك التوضيح
ومن الممكن أن تستعيني بصديقه للمساعده

Anonymous said...

وين التكمله ؟؟؟؟

Яeema said...

send me sms when you post again :/