Friday, October 27, 2006

خراب بيوت

الزواج هو علاقه شرعيه بين رجل و امرأه
و الشرعيه يعني تحت ظل شرع الله سبحانه
و على كتاب الله و سنه رسوله

لما توصلني مسج من رفيجتي بخطبتها استانس ما اهتم للوقت او الحزه او اهي ويا اهلها
لا شعوريا اتصل و اصرخ و استانس..و يمكن مرات يوصل صراخي البيت كله
نفرح
نحتفل
نترقب الحمل
نتيمع عشان نشوف البوم الصور
و احداث شهر العسل
الي نصها جذب و خيالات بس مستانسين و احنا نسمعها

ولكن الي الاحظه سرعان ما يعكر فرحتنا خبر الطلاق

الطلاق الي صاير هاليومين بزياده
و بين جميع فئات المجتمع
يعني المعاريس و الي صارلهم اكثر من 20 سنه زواج!

المشكله على منو؟؟
الرياييل الي ما يخافون من الله
الي لما يتزوج ما يعرف يفرق بين الزوجه و الصاحيه
الي ما ياعرف يفرق بالاحترام و الحقوق الشرعيه ما بين الزوجه الي يايبها من بيت اهلها
بعلاقه شرعيه موثقه بكتاب الله!! علاقه شرعيه ...يعني اتحط الشرع امام عينك

اصحوا يا الرياييل بنات الحمايل ما يبتوهم من بيوت اهلهم عشان تطلب منها تتصرف و اتعاملها مثل الصاحبه
لألأ و الف لألألأ
في فرق كبير
عدم تحمل المسؤليه
عدم الاحترام
عدم تقدير الظروف النفسيه
عدم احترامها لا في التعامل و لا الالفاظ و لا حتى احترامها بالفراش

و منو ضحيه استهتار الازواج ! و عدم احترامهم و عدم تربيتهم
مو بس الزوجه لألأ
الزوجه و اهلها
البنت لما تطلق الي بينهار مو بس بنت
بنت مع اهلها !!
السنه الي فاتت صادفت 3 من صاحباتي تطلقوا
سألتهم ليش..؟؟
وحده قالت ماكو نصيب
و ثنتين قالوها اشكره
كرهتته في الفراش
كرهته في كل شي!!

يعني شنو!!
ليش؟؟

لانه يعاملني كحيوانه

كلمه اوجها للشباب
خافوا الله في بنات الناس
خافو الله في حريمكم
خافوا الله في نفسكم
احترم ذاتك و احترم شرعيه العلاقه

ادري بتسؤلون نفسكم شي الي خلا لوير
تفتح هالموضوع

ثاني يوم العيد
اتصلت في رفيجتي
اول ما قلت لها اشلونج
قالتلي دريتي
تطلقت !!!
قبل رمضان بسبوع


و اليوم و انا توني خالصه من الفطور و حاطه الشاي و القهوه
و قعدت انطر الفريه

و الا طلع فيلم هندي
سكرت التلفزيون و رحت الصاله فوق
و الا رفيجتي تتصل
فاطمه انتي فوق ؟؟
قلت أي

قالت أي انا تحت عند بيتكم
قلت اذا لقيت سيارتج برا بدق و ادخل و اذا مالقيت سيارتج بروح

ادخلت رفيجتي
سالفه على سالفه

قلت لها سارا اشفيج !!

كان ردها صاعقه
فاطمه انا راح اتطلق و حبيت اتكونين انتي اول من يدري
انا من ليله العيد في بيت اهلي
و احتمال باجر ارد بيتي قبل لا يردون اهلي من السفر
و انشاء الله هالاسبوع راح ننفصل في اسكات!!


ليشششششش عسى ما شر!!

ماكو قلت حق اخوي الكبير السالفه
قالي هذا ريلج ستري عليه
و ريلج ولد خالي
و لو ولد الخال طلقج
ابووووي راح يعفس امي و اخوانها
و يمكن ابوي يطلق امي وراااج

قلت لها فووووضه!!!
قوليلي شنو قصه انفصالج مو قصه الي صاير في بيتكم!

بدموع و بكاء
تقولي
ابد ماكو سلامتج
ماقدر اتحمل الحيونه الي احنا فيها

ريلي سخي
طيب
يصلي
يسمي
شهاده
بيت
فلوس
بس حقير
أي والله حقير
لا مو حقيررر حثاله
ريلي من سنه 92 يصيف في لندن و متعود على البنات الي كروتهم مقططه في كابينات التلفون

الي متعود على الحرام
طول عمره يبي الحرام
او يطلب الحرام من زوجته

في بدايه زواجي
طلب مني ان نغير و نحط شي نشوفه
ما اتسوعبت !!

صرخت صراخ هستيري

و خذيت السيدي و كسرته و عفست الدنيا و قعدت

والحمار بعد يومين قالي اشوه انج تصرفتي جذي كنت بختبرج و بشوف رده فعلج!!!!

طبعا مبينه السالفه لا اختبار و لا بطييييخ

بس الرياييل جذي اذا توهق قال اختبار

وبعد فتره لازم يصير هواش بينه على هالمواضيع

لين طفح الكيل الحين صارلي 7 شهور ماني متحمله
بسسسسسسس
حياتي كلها صراخ
هواش

حيوان
وصخ مؤرف

رفيجتي تسولف و انا دموع و افكر
تقولي انتي مو ويااي صافنه
بس كنت ساكته
محتره
مااقدر اقولها شي بس قلت لها صبري
لازم تصبرييييين
و اتلاقون حل

لازم تلاقون حل!!
قوليله حسناتك وايد بس الخلل الي فيك مو مخليني اشوف شي زين
بعيشتي وياك
قوليله لا تهدم بيتنا عشان هالشي !!
ردت علي وقالت
انا لازم اهدم هالبيت الي انبنى مع ريال غلط!!
مو معقوله بيت ينهدم عشااااان تصرفات مثل هذي
و المأساه الثانيه سالفه الاختبار هذي الي تضيع فيها بنات وايد!!

بس يبيلها بوست بروحه !!


36 comments:

sOulvOice said...

لوير اتفضلي هالبوست



http://soulvoiceee.blogspot.com/2006/08/blog-post_26.html#comments


محتواه نفس فكرتج تقريبا



قصة رفيجتج الاخيرة مؤلمة الله يعينها على مابلاها

albandry said...

والله شي يحر فطيييم

الزواج صار اببيييزة

كلمن طق طبله قال انا قبله بتزوج بتزوج ويجيبلي مادري من وييين اي حاجة تعل امه وتاذيها ولا تفرح بولدها بعدين يكتشف انه مو من مواخيذها
وهات ياطلاق

والال البنت ابيييه ابيييه ابيييه يا ماما الولد يشرب فيه كذا فييه كذال
لا هذا ابييه
وبعدين تيجي ام المشاكل وهات ياطلاق

والا يكون البنت او الولد على نياتهم والطرف الاخر يتزوج ارضاءا اهواء الاهل وتظهر مرة اخرى المشاكل وبرضه هات ياطلاق

خبري قبل اذا قالو طلاق ياكبرها عند الله وحوسة والدنيا كلها تحجي
الحين استغفرالله اذا تطلق احد قالو ايييه عادي

لا حول ولا قوة الا بالله
الزواج يبيله مسؤولية وناس قده مستعيلين على شنو لازم الواحد يفهم شنو اهوا الزواج
فطوم طولت سوري وهذا كله بس سولفت عن الطلاق
هونت ماني مسولفة عن السالفة الثانية تحر وتبط مال تلفونات لندن قطيعة

iliveinq8 said...

والله الف حمدلله والشكر

اختبار ها؟ .. وين قاعدين

بنت الشاميه said...

الله يهداك يا فطوم قلبتي راسي فوق تحت امي كنت اكلم ولدي عن الزواج واقنعه ان يفكر جد في الموضوع ويعطيني رد بعد اسبوعين عن الزواج كاكل ولدي كبر واخاف عليه من قعدته بروحه نص ربعه تزوجوا والنص الباقي رافض الفكرة من اساسها ما ادري شسوي ..........اصك علي الموضوع دودهتيني
لان اذا كبر اكثر يكون الزواج اصعب.............مالي الا الدعاء لشباب الكويت عسي الله يحفطهم ويعينهم علي انفسهم

Unknown said...

أول شى موضوع قوى قوى قوى ممتاز فطووم
بس شوفى انا معاج بنقطة ان الواحد يحط شرع الله جدامه بس هل اغلب اللى قاعد يتزوجون يسوون هالشى
والحين اغلب اللى قاعدين يتزوجون يهال ماكو تفكير بس ابى اتزوج وخلاص
تخيلى واحد من سنتين يعنى كان تقريبا عمره 24 او 23 مو متأكد تخيلى متزوج 3 يطلق ويتزوج جنه الزواج لعبة
سالفة رفيجتج هذى المشكلة وايد انتشرت ومو عارفين شنو خطورتها الشرعية غير الخطورة الصحية يعنى الريال اللى يرضى مرته تشوف ريال بوضع مخل هذا لا يمكن يكون ريال

المشكلة من الصوبين يا فطوم هم وايد من الحريم الحين يتزوجون بس علشان يفتكون من الحجى ووايد منهم يحاولون ياخذون واحد شخصيته ضعيفة علشان تلعب وتروح وترد ولا احد يقولها وين رايحه وين رادة لان ما تبى ريال يقولها لا
وايد طولت
بس الموضوع يحتاج جلسة نقاش مو بوست
برافوا فطوم

7osen said...

الصراحه الموضوع هذا وايدحساس والكلام
فيه يطول ويتشعب

انا برأيي ان الفراش هو اساس العلاقه
بين الزوج وزوجته
اذا كانت العلاقه الخاصه بينهم تحت حدود الشرع والاحترام راح تكون علاقتهم بالحياه كلها صحيه واحترام متبادل
لكن شنو الفايده اذا كان الريال طيب وكريم ومحب بس بالفراش حيوان بهيمه مو بشر 0 هنيه يكون الانفصال احسن حل

وعلى فكره ترى الشرع والاسلام محللين تقريبا كل شي بالعلاقه الزوجيه
الا اشياء معينه مذكوره حتى بالقرأن

اشياء للحيوانات فقط
الصراحه موضوعج هذا يخلي الواجد ينقهر
على البشر اللى تحولت اللى بهايم
ينساقون وراء رغباتهم المريضه والشاذه مثل الحيوانات

واسف على الاطاله

طائر بلا وطن said...

بمكن مو متزوج بس من خبرة بسيطة و من واقع
للي قاعد يصير حواليني أقدر اقول ان الاحترام
اساس مهم لاستمرارية العلاقة اذا مو الاهم

الاحترام بمفهومه الواسع و العميق و المفصل


و شغلة ثانية

عمر التفاهة "آسف على هالكلمة" ما تقوَم بيوت

sologa-bologa said...

اللي مو قد الزواج لا يتزوج
سواء من الرجل او من المرأة

واللي متعود على حياة معينة
وما يقدر يغيرها او يتنازل عنها
لا يتزوج

وللشباب
اللي حياته دائما دوانية وسفر وطلعات
وشاليهات ومغامرات

لا يتزوج

وللفتاة
اللي حياتها بين رفيجاتها وشاي الضحى
واسواق وما عندها استعداد تغير هالنمط من الحياة

لا تتزوج

لان الزواج مو علاقة بين اثنين وبس
الزواج مصير جيل من االاولاد ومستقبلهم

والله يعين المتزوجين

وفي الختام ما اقول الا

اللهم اتمم علي عزوبيتي وراحة بالي


امييييييييييييين

سالفة قلب said...

دين+ اخلاق + احترام + تحمل مسؤلية +

تفاهم+ حب +عطاء وتضحيه متبادلة+

مشاركة+ حفظ الاسرار= اسرة سعيده صحيه

الرجل اللي مايحترم رجولته والمرأة اللي

ماتحترم انوثتها مايستحقون يكونون

ازواج


مااقول الا يارب ترزق كل طيب طيبه

وكل طيبه طيب

سالفة قلب said...

تابع"

الطيبه اللي اقصدها

طيب الدين وطيب الخلق وطيب المعشر

lawyer said...

سولفويس

قرييييت الي كاتبته !!!!!!

شهقت

عممممممممممممى بعينه
لووووووووووع جبدي

يبون سنعات و اذا يوووو سنعات قالو جاهلات


اكوووووووو ريال حقير
يشتكي لاهل زوجته يقولهم بنتكم جنسيا فاشله

اكووووووووووووووو ريال زباله جذي!!!!!!!

مريضضضضضضضضض
مو ريال
مو رياال




البندري
اي والله الصار لعبه
موووووضه

موعارفين انه التزام و ارتباط اسرتين




اي ليف ان كويت
ايييييييييييييي والله الف حمدلله و الشكررررر

يييييييييحر
صح؟؟

مرييييييييييييض

lawyer said...

بنت الشاميه

اذا شفتي وحده زينه
و بنت ناس
و استخارولدج

توكلوا على الله
اذا ولدج فوق ال 25
و سنع و يخاف الله
لازم يعف نفسه


يزاج الله خير على الدعاء




مشاري
هذا مو زواج يا مشاري
هذا بربسسس
بروووي

اي صح ماكو خوف من الله
لا ما طولت بس انا ما حبيت اتشعب
لان ماراح نخلص



7osen

حياك الله اخوي ما طولت
بالعكس تعليقك مريح و يثلج الصدر

يحسس الانسان ان الحمدلله
فيه فئه جدا كبيره من ريايلنا اهم نفسهم مقدرين الي قاعد يصير





طائر بلا وطن

عمر التفاهة "آسف على هالكلمة" ما تقوَم بيوت


اي والله انك صاااااااج
ماعندي رد بعد هالكلام الي قلته




سلوجا
هاااااااااااااااو
هاااااااااااو


شيش الريااييل على العزوبيييه بعد

لا لا ما عليكم منه

لا يوزكم

اي فعلا
فعلا


وللشباب
اللي حياته دائما دوانية وسفر وطلعات
وشاليهات ومغامرات

لا يتزوج

؟؟ ممكن تقولي شنو حل هالمشكله؟؟

violinist_q8 said...

السلام عليكم

شلونج اختي اتمنى تكونين بخير

اول شي انا متابع قديم لمواضيعج لكن

ماكنت اعرف ارد على المواضيع السابقه

لان مو عارف اسجل . .

عموما اسف على هالمقدمه

شدني الموضوع وحبيت يكون اول

رد رسمي لي فيه

مشكلة الطلاق مثل ماذكرتي منتشره بشكل

كبير ولها اسباب طبعاً

انا اشوف ان عمر الشااب او البنت

مومهم ولا له تأثير

لان هالشي راحع للشخصيه

في ناس تزوجوا اعمارهم 18 خذوا حريمهم

وتغربوا على الله وعلى مصروف

التعليم العالي وتخرجوا

وعاشوا احلى عيشه

واكو ناس تزوجوا بال26

مايعرفون يجابلون العمال الي بالبيت حتى

--

سالفة ان يشوفون افلام مع بعض استغفر الله شباقي بالدنيا ؟
شلون يصلي و ملتزم و مومراعي زوجته
للاسف هذا الاسلام عنده اسم بس

--

لما اطلع عالبحر او المجمعات واشوف
شباب هالوقت بعضهم طبعا مم اغلبهم . . تصرفاتهم تشيب الشعر منها
شايف الدنيا واهوا صغير
نت ..فيديو ..تغير الجيل الحالي
للاسوأ للاسف هذول شلون يتحملون مسؤوليه ؟؟

--

حبيت اضيف شي بالاخير
ان الزواج شراكه
لو غلط الزوج تبقى الزوجه موجوده اهوا زوجها وتقدر تغيره مايتغير بيوم
والا اثنين

بياخذ وقت طبعا

للاسف حتى الزوجات هالوقت شخصيتهم ضعيفه

الزوجه المفروض تكون شخصيتها مو بالصراخ او السب والهجر بالفراش

لاني اعرف ناس قبل زواجهم ماكو أأذى منهم

ويوم تزوج كله طالع كله مسافر
لكن مع الوقت تغير !!

ترك الخرابيط وترك سوالفه ورا ظهره
وعاش بسعاده

قلتله شهالتغيير المفاجئ ؟
مع ان كنت عارف ان محد يقدر يغيره الا زوجته

وفعلا قال زوجتي !

اتمنى اني ماطولت . . بالتوفيق

lawyer said...

سالفه قلب
اميييييين يا رب
الطيبون للطيبات
و عسى لا يبليناا يا رب


اخووي
صاحب النك الطويل :))

اسمحلي اناديك صاحب النك الطويل

فعلا كلامك صح

ولكن انا حبيت في هالبووست ما اتشعب
و اتطرق فقط لمشكله
حيونه الازواج

و شكرا لك

lawyer said...

violinist_q8

اول شي حياك الله اخوي

و تشرفت في قرائتك لي
و تدوينك
و تعليقك عندي

مشكور وايد
انك علقت عندي

و مشكوور وايد على اهتمامك في هالموضوع


كلامك هذا عين العقل
فعلا
الريال مو بالعمر
المرجله مواقف

انا خالي لما تزوج عمره 18 راح مع زوجته امريكا

و اسم الله عليه
عاش هناك 20 سنه
و اعياله و حياته من احسن الناس

ما ظر احد
فعلا

و هالشباب الي يخربطون يتزوجون فوق ال 30
مايعرف حتى اييب اغراض الجمعيه

اي والله خلها على الله بس


عسى الله يصلح
بين كل المتزوجين
و يستر علينا
و يستر على هالشباااب
و يحفظهم يا رب

مشكوووووووور
وايد اخوي

حياك الله

Cr8ivia said...

شي يحر و يغث و يفقع المرارة

الله كرمك يا بني آدم و رفع من قدرك
انت غصب غصب تبي تنزل من عمرك و تدنس كرامتك و تنزل للحيونه!!

من صغره و اهوه لا حسيب و لا رقيب
تعود على الحرام و الوسخ
يقول لي تزوج بتوب و الا اذا كبر بيعقل

بس وين؟
من شب على شي شاب عليه ! خلاص تعود على لذة الحرام
حتى لو كان بدون لذة
صار ادمان الله يجيرنا و يجير شبابنا منه

اما هذا مال السيدي يااااما سمعنا عن مشاكل مشابهه
وين مروئتهم! وين احترامهم لذاتهم جدام حريمهم! اذا انت ما تحترم نفسك على الاقل استر على عمرك جدام ام عيالك

يعني ممكن اقول ارجل الريال اللي يسوي هالشي بالظلمه بعيد عن اهله و عرضه

المجتمع و نظرته للرجل و المرأه و الحريه اللي معطيها للرجل و كلمه ريال شايل عيبه و ريال لي كبر و تزوج بيعقل و بيهد الخرابيط و عادي ريال لازم يخربط و اهوه صغير لي تزوج بيستقر و و و من تناقضات و آفات مجتماعتنا تحمل جزء كبير من ذنب هذي المشكله !!

q8y_saint said...

الله يعينها
لوير
بس اتوقع من الخطا انه نقول ان كل حالات الطلاق السبه الريال ترا
المشكله مرتبطه بالطرفين الزواج
و هم الله يعينها ويهدي ريلها

elq87obi said...

الله يعينها و يهدي ريلها

بس شنو اختبار ؟ احنا وين قاعدين بالضبط ؟

سالفة رفيجتج مؤسفه :( الله يعينها

سلاامي لج :)

نون النساء said...

عندي وعندج خير

خمس بنات تزوجوا اعرفهم
تطلقوا بعد الزواج بفترة
ماتزيد عن السنتين
ثنتين منهم خرجوا من هالزواج الفاشل
بطفل واحد منهم مو راضي يعترف فيه علشان يقهر مرته وأهلها

:)

ممكن ما عرفت السبب الحقيقي للي دفع هالشخصين انهم يتطلقون

لكن الأمور واضحه جداً..
وهي طريقة المعاملة
قلة الإحترام
وقلة حيا ودين


شفتي اشلون الوضع مُشجع

:)

sologa-bologa said...

الحل بيد المرأة او الزوجة

هي بيدها تخلي ريلها ينثبر بالبيت
وبيدها تخليه هايت بس يبي ينحاش من البيت

واللي اشوفه ان ماكو حل جذري
لان الحلول فردية وتختلف حسب كل حالة


واذا تبون حل جذري

اول شي لازم نكسر حاجز الخجل من الحديث
عن امور الجنس
من مبدأ
لا حياء في العلم


للاسف الثقافة الجنسية عندنا

زيييييرووووو

لانه كل شي عيب


واكرر
اللهم اتمم علي عزوبيتي

وبس

Kwaitiyya said...

للأسف أعرف 4 بنات تطلقوا بلأقل من 5 شهور زواج ! وأعرف واحده ترجع بيت أهلها بنفس ليلة عرسها! وكله من الريال

هالمشكله كبيره وقاعده تزيد
نسمع بهالعروس مشالله واحد ورا الثاني
والسنة اليايه بنفس الوقت ثلاث أرباعهم تطلقوا

قلنا من قبل لاحد يقصب عالزواج
الأمهات يحنزن على عيالهم ! إذا الولد مايبي ما فتح الموضوع خلاص سكتي لاتقصبين!
إذا البنت ماتبي أو ما عجبها الريال خلاص لاتحنون على راسها وتجبرونها وتحاولون تقنعونها !
هذا أبسط شي و هذي بداية الغلط
والباجي عاد تشوفينه مع العشرة وتطلع البلاوي

الله يحفظنا ياربي ويرزقنا على قد نياتنا

Kwaitiyya said...

رفيجتج هاذي مسكينه! أصلان زين منها متحمله فقيره وصابرة وساكته كل هالفترة
الله يعينها بس خل تحاول تهدي الأمور وتشوف حل ثاني أو ثالث أو أي شيء
بس شكله الريال بايعها ! لو حابها جان سوى أي شي عشان ما يخسرها

ورفيجتج هاذي سالفه وحده من السوالف اللي مانعرفها بعد !
الله يكتب اللي فيه خير لها انشالله

albandry said...

انا ما علقت عالقصة لانه حزتها كنت محترة بعدين فكرت فيها
السالفة وما فيها ليست باختبار على قولته هالدثوي
اهو وده وما وده
المرأة ذكية وممكن انها تشيل هالشي من باله وبطرق اخرى ترضيه ويرضيها والحياة اسرار
لكن صدقوني السالفة فيها جانب اخر مانعرفه
البنت اساسا مافي مشاعر ناحيته ولا في اي مودة مو سالفة جنس وبس
خلنكون واقعيين
بتقولونلي انه مو قادر يلقى بره احد يطالع معاه او يسوي هالاشا المشينة
ولكن انا متاكدة انه اهوا واهيا مافي بينهم اي نوع من الالفة والمحبة وكلمن يبي يفتك من الاخر
ويعلل بان الطرف الثاني هو السبب
انزين اشدراكم الصبي شقاعد يقول سبب الطلاق ما تهقون قال شي عنها بعد
سوري فطوم رفيجتج على راسي بس قاعد احاول اضح اسباب وعلل الديرة متروسة منها ولو انه اهلنا وربعنا بس دائما ابحث عن السبب الاخر والطرف المعاكس

neelaah said...

لوير

موضوع حلو
بس انا ما احب اسوق
فكرة انه الطلاق عليه ضرر لحياة البنت و اهلها

ذاك اول

البنت الحين عادي ممكن تطلق و تعيش عادي
و تشتغل و تفتخر بنفسها خصوصا اذا ما كان سبب الطلاق له علاقه بأخلاقها او سلوكها

ما المفروض تنحرج و تحط اهي على روحها علامه تخليها اقل من الباجي

قولي حق صديقاتج الطلاق ما ينتقص منهم شي دام انهم صح

لوحات said...

الأخت لوير

هناك أشياء أكثر من طبيعة العلاقة الجنسية
مابين الزوج وزوجته قد تؤدي بهما الى الطلاق

كما يُقال المشاكل الزوجية تبدأ في الفراش وتنتهي بالفراش غير صحيحة
ولا يمكن تعميمها مع انها صحيحة تماماً

حتى يكون هناك علاقة جنسية ناجحه يجب ان يتوافر فيما بين الطرفين شيء اسمه التفاهم والمحبه

مش شرط الحب لكنها أساسيات وبدونها كل شيء سيتحول الى ...شيء مرفوض ومقرف


وكذلك الإنحطاط في التعامل مع الزوجة على انها مجرد وعاء للشهوة شيء يدمر نفسية المرأة ونظرتها لنفسها وهذا شيء غير سهل.

يجب ان يكون هناك معرفة بأوليات هذا الكائن المسمى مرأة قبل الإقدام على الزواج.

Mother Courage said...
This comment has been removed by a blog administrator.
Expatriate said...

مو لأنه ولد فلوس وشهادة وبيت ووظيفة زوجوه ورضوه فيه بدون لا يسئلون عنه عدل ويتأكدون من اخلاقه .. او رضوا وقالوا طيش شباب .. الحين وين الوحدة تلقى واحد فلوس وبيت وكشخة وشهادة

وهذي أخرتها

احس يا اما البنت ما تفكر عدل قبل الزواج وتركز بس على الاسم وجدام رفيجاتها وكلام الناس والفلوس والوظيفة
أو ان البنت ما يهمها وتقول عادي كل واحد له ماضي وتتغاضى .. أو ان البنت مسكينه ما تدري عن سوالف الشباب وخرابهم .. وتقول لا مابي واحد ديّن ومعقد وملتحي يقولي كل شي حرام

يالله هذا متحرر وفري ومخليج تسوين اللي تبينه .. وآخر شي يعاملج مثل الحيوانه

استغفر الله

مادري الناس شلون تفكر
بس قصص تعور القلب

وعيدج مبارك لوير
:)

Mother Courage said...

لا حول ولا قوة الا بالله ... عسى الله يعوضهم باللي احسن


مثل ما الزواج هو تفاهم بين الطرفين ... الطلاق هو اختلاف بين الطرفين.. مافي شي اسمة من طرف واحد... وانا أعرف وحدة طلبت الطلاق عشان أم ريلها أثثت شقتها على ذوقها

Hosno said...

اختي فطام
الموضوع مالج صحيح بس كونج امرأه ناقشتيه من وجهه نظر الحريم وحظهم العاثر و وبقولج سالفه صاحبي الدين الى يخاف الله واهوه عايش ببلاد بحركه اصبع تخلي البنات عشره وعشرين حوالينك
بس الريال يخاف الله واستحمل الغربه وما لمس ولا بنت والله ولا بنت ولا حتى فكر
المهم خلص دراسته رجع الكويت وبهالجو السعيد قرر يتزوج وبما انه مو عايش بالكويت ولا يعرف احد قرر ان اهله يختاروله البنت
صار كل هذا وتزوج ولكن شنو صار بعد اسبوع من الزواج طلق البنت
البنت من ثاني يوم تقوله لأ مو انت
فارس احلامي وهالكلام شنو قصدها فارس احلامي واهي ما تبيه مو علشان انه مو زين علشان انه يعرف دينه ومصلي ومسمي

مشكله زواج الأهل هذا افشل زواج بالعالم بكل المقاييس تتزوج من وحده
طول عمرك تشوفها مثل اختك وما فكرت فيها بأنها تكون زوجه بس التخوف من البنات الى تارسين الديره بوصاختهم
يخليك تتكل على الله وتاخذ القريب
انا ما اقصد كل البنات ولكن شايف بنات من عوائل محترمه وديينه بس تطلع من الباب تصير اوصخ من درام الزباله مكرم السامع
ما اعني ان الشباب اهمه الملأئكه لأن الشباب اخس من البنات بعد
بس المشكله هذي مشكله مجتمع
وانا هالموضوع ناقشته وحطيت كل الى ببالي ببوست
http://hosno.blogspot.com/2006/10/blog-post_11.html
اتمنى انج تلقين الوقت وتقرين ورايج مهم بالكلام

Anonymous said...

ممم مشكلة الطلاق مشكله واغلب الشباب مستسهلين هالموضووع لانه الزواج أصلا صايرر شى سهللل ,,, والله فى بنات عوايل وأخلاق قاعدين لى الحين فى بيتهم أهلهم شهاده وجمال وكلشى بس فى رياييل مايبوون جذيه واذا تزوج يبى يكوون عنده صاحبته ,, انا موضد الشباب هم فى بنات نفس الشى بس أهم شى ان الواحد يحسن الاختيااار قبل الزوااج عشان مايصيير طلاااق
والله الواحد مرات مايعرف يختاار الدنيا تغيرت وفى شباب يبوون بنت نفس أمه يعنى على زمن أمه موقادر يستوعب ان الحين الوضع تغيييير واحنا فى زمن غييير والناس كلهم تغيروااااا

lawyer said...

cra8ivia

فعلا كلامج صحيح

و صج صج صج مثل ما قلتي استر على نفسك

بس الوضع تغير

اشرايج والله بقولج سالفه ما تصدقينها

في ام اكشره تقعد عند الحريم تقول انا حاطه صبيان حق اعيالي 3 شباب
و اسم الله عليهم يحوسون في هالافلام و يعفسون الدار
و الفراش
عاد فشله جدام هالخدم
يبتلهم صبي بس حق ينظف دورهم ريال مثلهم!!!

سألتها وحده اشلون تسمحين حق اعيالج يشوفون الافلام


ردت بكل بساطه
في الافلام و لا في بنات الناس بالهتلفون !!

مفاهيم معفوسه !!





q8y_siant

اهلا اهلا اشلوووونك
نورت شخبارك

فعلا كلامك صح
انا حبيت بس اتطرق لهذه الجزئيه من حالات الطلاق :))





الكويت حبي
هلا و غلا فييييييك
حياك الله
اي والله سالفه اختبار و بكتب عنها بوست
اعرف وحده امها و خواتها اذبحوها
كل ما يقولج ريلج شي قولي انشاءالله
البنت على نياتها و خوافه
و تخاف يخترب بيتها اذا عصت ريلها
قام طلب منها ريلها في شهر العسل تقط حجابها و تسبح معاه في البحر
!!
قطت حجابها وسبحت
و تطلقت




نون النساء
تفائلي في الخير
و على نياتكم ترزقون
و ثقي تمام الثقه في ربج

انا عن نفسي موكله ربي
و انشاء الله ربي بيرزقني احسن مما اظن
دين
و خلق
الوضع مو مشجع
بس لازم ما ندعي الكمال عشان ما نطلبه





سلوجا
انت فكنا من هالعزوبيه بليييييز

توني شايفه برنامج فوزيه الدريع تقول لابد من وجود ثقافه جنسيه على اساس علمي صحيح
مو من افلام و خرابيط تلفون
و صور و انترنت

صح كلامك
و انا احمل الزوج على الخلل الجنسي
لانه اهو ربان السفيه
يا يبحر في الموج
و يغرق
او ان فعلا يتبع تحذيرات الارصاد الجويه

مثلك فاهم :))





كويتيه
امييييييين يا رب
و يعطييييييج اللي يستاهلج
و يوفقج الله

اما من ناحيه ضغط الاهل
ما ابي اعلق اخاف احش في اهلي وايد
!!


اما عن رفيجتي
المششششششكله ولد خالها
وصلت ان ولد الخال يسوا جذي في بنت خاله!!!!

مو زوجه غريبه اطلقها ترد بيت اهلها خلاص !!

لا عايشه بيننا

lawyer said...

البندري
فعلا صح كلامج

اهو قايل حق اخته اهي كارهتني اهي ما تبيني

شكلها مغصوبه !!

اي مغصوبه و اهي بنت خالك و انت حابها !!

و مستانس عليها

بس تدرين انا شنو اكشتفت
ان الواحد يخربط يخربط
تالي يدوور و كل من يرده يقولون مو زين
الحين كل شي مكشوووف و هالشباب يقعدون سنين يدورون
و اذا سألتيه ليش مو متزوج يقول ما ابي
و اهو وده ميت
عيز يدور و يردونه لانه مو زين او يشرب
مو لاقي ناس بمستواه يقبلون فيه

يقول يالله ماكو الا وحده مني و فيني
و يروح يقولها انا ابيج من زمان
و احبج من زماااان

و يخربط عليها
و تصدق
و تاخذه!!

مشكله الحريم يصدقون الريايل




كيتي
اي انا سكت ما حبيت اقول شي
لان مرات الواحد وده يتكلم لمجرد الفضفضه مو لان يبي حل

الله يصلحه يا رب



نيله
حبيبه قلبي
مو كل الحريم بالقوه الي تتكلمين عنها
فعلا كلامج صيحح
الطلاق بدايه لحياه جديده
مو نهايه العالم

لكن ترا الريال يجرح
والله
اذا ياج شي يضرج من اهلج
تزعلين و تسكتين
من رفيجاتج
تتهاوشين
بس الريال طقته صعبه
يجرح

انا ما يهمني ريال يشوف فيلم!!
بالشيطان يحرقه
لكن انتي يمه
و مجابله شنو يعني يحط فيلم !
مو يبي يستانس
لألألألألألألألألألألألأ

يعني اشششكره كاش يعطيج اياها
انتي ما اتأثرين فيني

انتي و لا شي
انتي خشششششششششبه
سوري اشتطيت وايد
بس فعلا الريال يحررررر
و يجرح المراه في انوثتها




لوحات
فعلا انا عطيتنا المختصر المفيد
التفاهم

التفاهم
الحوار
و اعرف وحده صارلها 15 سنه تحاور ريلها و لا تغير

اذا الطرفين بينهم تفاهم
الريال اول عشره دقايق يقول انشاء الله
و بعدها ترد ريمه لعادتها القديمه




expra

شووووف اعطيك اياها مختصر مفيد
كنا قبل في الثانويه
مجموعه بنات
في منا الدين
و في منا العادي
و في الفري

بكل امانه اقولها مع اني مو دينه
رفيجاتي العاديين نصهم انفصلو
الفري اغلبهم
و حياه مفككه
الدينين
اهم تبارك الرحمن الي بينهم موده و رحمه
و عشره
و يعرفون شنو السكن
و خيركم خيركم لاهله
حتى لو ما يحبها يخاف الله فيها و لا يظلمها




brava

اهلا اهلا حياك الله

وااااااااي عاد هذي حدها سخيفه
مو هذي قصتها بس هذي جزء تقدر تقوله

lawyer said...

هوسنو

قريت الي انت كاتبه بس ما عرفنا سبب الطلاق
بس ينت !!

شنو يعني ينت ؟؟

والله
بس عسى الله يعيييييييينا على هالدنيا
والله كل شي يخرررررررع

بس لا تخاف ربك موجود




بوب كورنا

احنا نفسنا تغيرنا
الله يعينا على هالدنيااااااا

اي والله صااجه

tweety said...

اول شي بالمبارك الديكور اليديد وااااااااااااااااااااااايد أشرح

ثانيا : الطلاق سببه في الاغلب عدم التوفق او اختيار سيء لشريك الحياة

من فترة صار في عودة للزواج المبكر خوفا من العنوسة
فصارت الاهمية كلها على ان يكون الشخص شاب أو بنت في عمر معين متزوجين
المفروض الواحد او الوحدة مايتزوج من شخص بناءا على مواصفات عامة
شهادة
عايلة
مادري شنو
الاهم انه تقعد معاه وتكلمه وتشوف شنو نوعه اذا فيه شي ما ارتاحت فيه تغض النظر عن هالزواج
غلط اللي يقولج طوفي وماكو واحد كامل ولي متى بتنطرين
ما قلنا واحد بيرفكت بس على الاقل عيوبه من النوع اللي الوحدة تقبل فيها ..واللي تتقبل وحدة مو نفس اللي تتقبل غيرها
الطبع والشخصية اهم شي
انا عندي الطلاق امر من العنوسة

العين الساهرة said...

بصراحة موضوع خطير ومؤثر، الله يعين البنات اللى يطيحون بريال جذى ، بس يا ربى ليش ما يسألون عدل، ترى أعرف ناس لى شافوا الإسم قالوا إسكت سؤال ما يسألون عن الريال، مو مصدقين إن خاطب بنتهم، وهنى الخطأ البنت ما تنعطى حق أى واحد أهم شىء الأخلاق لكن للأسف في ناس وايد ما تهمها الأخلاق المهم الإسم والفلوس والنتيجة شباب يعاملون المرأة مثل الوحوش وإذا تكلمت مو إنتى تبين إسم وفلوس يلى خلصى عاد شيفكج من الشماتة، الله يستر على بناتنا وعيالنا ويصلحهم ، ترى كل هذا من قل التربية وتعليم الأبناء أصول دينهم

أُكتب بالرصاص said...

كلامك والله صحيح

ناس تلاقيها من برة هلا هلا
ومن جوة يعلم الله

وساعات الريايل بيكون عندهم انفصام في الشخصية
او بشخصيتن مثل
مستر هايد ود بارك

بصراحة معالجة جيدة لهذه المشكلة



ايه المشكلة بقى؟
:)
كل سنة وانت طيبة