Monday, September 17, 2007

راحتي مع نفسي .. بس مو معناته اني انطوائيه


سفرتي هالمره على الرغم من انها كانت بس جم يوم و كانت رحله بسيطه
الا ان اختلائي مع نفسي هالمرا خلاني افكر وايد
وايد من الناس ما يقدرون يعيشون بروحهم و كلنا تقريبا نحب يكون حوالينا ناس نعيش وياهم
لكن تصدقون اني وايد ارتاح بروحي
وايد احب اقعد ويا نفسي
ووايد استمتع مع عمري
اعرف الحمدلله اشلون اونس نفسي بنفسي
رفيجتي ما قصرت وياي مستقبلتي من المطار ووصلتني لي المطار
بس في يوم راحت العصر بيتهم و ردتلي من باجر الصبح
كانت مسكينه تتصل علي 24 ساعه عبالها انها خلتني بروحي
و بضيق خلقي
قلت لها ممكن اقعد ويا نفسي شوي
عشان ابيها ترتاح و ما تحتاتيني
استانست مع عمري في الدار و خذيت شاور و قريت في البلكونه و نزلت الجم و بعدين سويت جلسه تعذيب ! مساج يعني
رحت تعشيت برا و رديت قعدت بروحي و بسرعه مر اليوم
الي اكتشفته ان اهي مستغربه ليش انا مستانسه مع نفسي و هذا شي عادي

لكن الي اانا اكتشفته في هالسفره
اني ترا بسرعه امل !!
احتاج ماي سبيس
ما اعرف انام بالدار ويا احد
اضطريت اسوي ابقريد و اخذ سويت
عشان مسكينه رفيجتي ما نامت مني طول الليل اتقلب و احوس لان ما اعرف احد وياي في الدار
مشكلتي اني عمري بصير 29 و لا عمري عشت ويا احد !
كل من يقول عني بومسامح و سهله و عشريه
لكن هذا في الصداقات بس
يمكن اجامل يوم يومين
بس كعيشه صج ما اقدر اعيش الا بروحي
و بداري
و مكاني
استاتس احط قهوتي و اتسدح و استمتع بفيلم لمده ساعتين من غير احساس باي شي وراي
ما احب التقيد
ما احب المسؤليه
ما احب الارتباط بشي
و لا احب احد يقيدني
جدولي و يومي امشيه بكيفي
و يمكن مرات اسوي نفسي طيبه و اقول براحتكم او كيفكم
بس في بالي شي انا بسويه و بنفذه في النهايه
الكل يسألني ما تعانين من الوحده
الحمدلله لألأ
اصلا اعرف رفيجاتي متزوجات و يعانون من الوحده
الوحده مو ظرف انج بروحج
الوحده احساس من الداخل
و شعور

من شوي اسألتني رفيجتي سؤال غريب
فجأه بدون مقدمات قالتلي
لي متى ماراح يكون لنا شخص بحياتنا يشاركنا يومنا
((كانت تقصد يا زوج يا بوي فريند ))
تبون الصج سكت و لا رديت عليها
و ادري انها ما راح تقرا بوستي
فعلا احساس غريب ما ابي احد يشاركني حياتي
او يغير يومي
ما احس بالوحده
ما احس لي خلق اعيش ويا احد
مالي خلق احد يتطفل على حياتي و يومي
مرتاحه
بهدوء يومي
مرتاحه الحمدلله اني عايشه لنفسي
و اقدر اعيش مع حواليني و لكن ماني فارضه على نفسي اني اتعايش قصب ويا حيات ناس ثانيه
هل انا عسره؟
هل انا انانيه !؟
و الا انطوائيه ؟
مدري بس كل الي اعرفه اني وايد استمتع مع نفسي بروحنا
هالشعور الغريب ماياني بس عقب ما سافرت
ولكن لاني لما سافرت
انخطبت ماي بست فريند
و ملجت ماي فريند الثانيه
و كلمه الفال لج صارت تخرعني
اتحسسني بتهديد لاستقرار حياتي الهاديه
ياحسرتي هل انا طبيعيه !
في النهايه
ابارك لماي بست فريند
و ابارك لماي فريند الي ملجت قبل رمضان
و موتتني من الضحك لما قالتلي
(( سألني تبين الملجه قبل رمضان ؟ جان اقول بقلبي لو تبي الحين راضيه بس بسرعه لا اطير ))
الله يوفقكم

23 comments:

PearL said...

الوحده مو ظرف انج بروحج
الوحده احساس من الداخل
و شعور



صح لسانج لوير

دام انج مرتاحة مع نفسج ودام ان هذي وناستج عيل استانسي

انا احب اني اعيش تجارب بروحي
واحب اعيش بروحي

بس ماقدر
فترة قصيرة واحن لليمعة
مع اني مو وايد اجتماعية
ومع اني مو مع كل الناس اتوالم

يعني بصراحة انا وحدة ما اعرف شنو ابي

الوحدة جربتها بهونغ كونغ لما رحت بروحي

صج وناسة

صح تولهين
بس تحين نفسج مو مقيدة


دام انج مستانسة خلج مستانسة على طول انشالله :****

tweety said...

شقولج يا لوير
احنا بنفس العمر فوايد احس في اشياء مشتركة بينا
أنا اتمنى تكون لي فرصة اسافر بروحي واعيش تجربة مختلفة احس فيها اني مستقلة ومعتمدة على نفسي ابمية بالمية ولكن ما حصللي

ولأن ما عندي خوات فأحس عكسج ما احب اقعد بروحي وايد أحب اليمعات لأني كلش ما احب اظل بروحي مع اني اخاف وايد واحاتي اني ما اندمج مع الاوادم واتحملهم وايد دام اني متعودة على نظام معين فيه وحدة
مبارك عليج الشهر

lawyer said...

صباااااحكم خير

واي زحمه اليوم الطريج !

فزعت و ركضه ركضه !

مدري اشلون بداوم هالشهر
كله !


الله يعينا انشاء الله



بيرل
انا عكسج انا اعتبر اجتماعيه
و بسرعه اتكيف مع الناس
و صج احب اليمعات

لكن الي بوصله لج اني مو بسرعه اتكيف اني اعيش مع احد او وحده 24 ساعه
و يكون في شيرينج بحياتي


فكرتي هي على الرغم من اني اجتماعيه
على الرغم من ان ما احب احد يكون وياي بنسبه 24 ساعه

او ما احب احد يشاركني في مكاني






توتي
هلاااااا و غلا فيج

انا بعد ما عندي خوات

نفس الفكره احب اوصلها لج

انا احب اليمعات و احب الناس و تلاقيني اجتماعيه

لكن برا البيت

الي كنت اقصده في بوستي
ان لما انا احتاج للناس احب اروح للناس و اليمعات


لكن ماكنت احب ان اعيششش 24 ساعه في يمعه
امل

عرفتي

ماكنت مرتاحه من ان في احد وياي في الفراش مو ماخذه راحتي

وبعدها فصلت الفراش و مسكينه رفيجتي راحت نامت في الدار الثانيه


الي بوصله اني اوكيه اجتماعيه
بس عقب هالعمر
مو حابه اغير من طبع اني كل شي حقي بروحي

داري
فراشي
مكاني
كبتي

عرفتاي

نون النساء said...

تبين الصج
انا بديت أدش بهالمرحلة

:)





غشيت ضحك
على البوست اللي طاف
هاااااااااو آررررر يوووو فطوووووم؟؟



مبارك عليك الشهر بالخير والبركة يارب

kila ma6goog said...

بوست رائع

ANgEL_BaBY said...

اممممممممممممم

لوير يعني شلون ما تبين تتزوجيييين :)

نبي نشوف عيالج يكتبون بوستات عنج ويتشكون منج هههههههههههههههههههههه


اييييي على طاري الوحده صح يمكن انسان محاط بملاين الناس بس من داخله في شي فاضي

غربة نفس

انتي حمدي ربج انه ما عندج هل شي

بس مو معناته انه الجلاكسي حلو

يعني ماكو احلى منه !!!

< فهمي فهمي شقصد احم احم )

فلسفة الجوكليت ..

الله يدييم الراحه .. بس في يوم من الايام يتغير احساسج

وبتغير نظرتج للحياة ولنفسج وحتى قناعات الانسان كل شي يتغير

اما للاسوأ او الاحسن

اتمنالج كل الاحسن يا رب :)

وعئبال ما نشوفج عرووس أد الدوونياااا

Najmah said...

ربي يسعد قلبج ويريحج بكل خطوة

اتييني هالحالة احيانا .. ابي اصير بروحي

انا وقلبي وبس

The Simper said...

do elli eray7ich ;)

i like this situation.. arya7 shay :) do yoga ba3ad :D

lawyer said...

نون النساء

يمكن تسمى هالمرحله نضج؟



مطقوق
هذا بس من ذوقك صدقني

:)





انجل بيبي
واااااااااااااااااااااااي

تخيل
!!!
ادش بلوقي و الا ياهل نززززقه فاضحني
امي متهاوشه ويا الخدامه و طقت السايق و زفت ابوي !!!

و تهاوشت وياه تبي فلوس

هههههههههههههههههههه


واااااااااااااااااي
لألألألألألألألألألألألألألألألألألألألأ

كلش مو تايبي

هههههههههههههههههههه


فعلا مو في العدد
و لا في الكم

في المضمون


الله يديمها علي راحه

و اذا نعفس مودي و حسيت بالوحده

بقعد اتحلطم عليكم هني

وين بروح يعني
صح





نجمه
امين يا رب اجمعييييييييييين

يا حلات الواحد لما يقعد ويا نفسه و يصفي حساباته



سمبر

يتروالي انت اكثر انسان بالدنيا حسيييييييت بالفرق لما دشت اليوجا بحياتي

اليوم عقب صلاه المغرب قمت اسوي يوجا

و توني و انا اشوف مسلسل نمر
سويت حركات بسيطه

قمت امارس اليوجا لا شعوريااااااا

esTeKaNa said...

يه يه
اشهالبوست العاقل؟
:)
فطومه ..الانسان اذا وصل مرحله يقدر يقعد مع نفسه ويحس براحة
يقدر يتوافق مع وحدته ويحبها
هذا بحد ذاته انجاز
في ناس تتعب وايد على ما توصل هالمرحله من الوفاق النفسي
شي ثاني:
انا حسيت بهالبوست وايد
انا عشريه واحب الناس
بس رغم كل هذا تذبحيني اذا قلتي نامي بالشاليه ولا بسفر مع احد بالغرفه
!!
لابد يكون في مساحة خاصه فيني اخذ راحتي ما اقدر اجامل فيها احد ايا كان
:)

TReSTeN said...

الوحدة احسساس اروع مايكون

ليما يكون الانساان مرتااح

صدقيني كلامج عن الانعزال مع فنجان القهوة
والفيلم

كلاام روعة

احب الوحدة مثلج واااااااااااااايد

QiYaDiYa said...

والله معاج حق 100% الواحد مهما كان يحب الناس و يستانس بشوفتهم الا انه يحتاج مساحة خاصة حق نفسه ..

و هذا احلى شعور لما تحسين انج مرتاحة مع نفسج و حابتها ..

ومبارك عليج الشهر =)

Purplecious said...

شعووووووووور طبيعي جدا جدا جدا


أنا مثلج قام أحس جذي

الانسان يا لوير كل ما يكبر كل ما يهدى و يستقر و ينضج و يفكر أكثر

شاف من الدنيا وايد
الحين بدا يستوعب

الخوف من التغيير شعور طبيعي جدا
تعودتي على روتين حياة معين صارلج 28 سنه مو بسهوله تتأقلمين مع أي تغيير انتي مو مقتنعه فيه و لا حابه تقدمين عليه


تقولين:
ما احب التقيد
ما احب المسؤليه
ما احب الارتباط بشي
و لا احب احد يقيدني
جدولي و يومي امشيه بكيفي


منو فينا يحب التقييد؟؟؟؟؟

تفسيري:
بس ما تحسين انج مرات اني تكونين مقيده
نفسج بنفسج؟

المسؤؤوليه من كلامج انتي من عمر شايله
مسؤوليه و تبين تعيشين وقت ما تشيلين هم بيت و زوج و عيال... تعبتي من المسؤوليه

الارتباط فيه نوع من التقيد
و الرتباط ممكن يكون شي حلو مثل ما انتي مرتبطه بدارج و كبتج و فراشج و و و و


و اللي تحسين فيه مو أنانيه
لأنج ببساطه ليلحين مو متزوجه و لا عندج مسؤوليات انتي ملزومه فيها

تفسير ثاني:
ممكن هالشعور سببه انج قاعده تحاولين تقنعين عمرج ان هذا اللي تبينه
تعيشين وحيده
عشان اذا لا قدّر الله و ما تزوجتي ما تكتأبين

لوير الوحده و الحريه حلوه
وايد حلوه
و الزواج و المسؤوليه لها ثمن بس شنو نتيجتها
النتيجه عيال حوالينج
زوج يذكرج بالخير
أدري بتقولين و اذا الوحده ما ياها عيال ههههههه

مادري لوير بس موضوعج يعتمد عليج انتي
تقدرين تضحين بحياتج المريحه هذه في حاله واحده


و انتي الوحيده اللي تعرفين متى

:))

bo9ali7 said...

اي والله
الوحدة احساس داخلي وماله علاقة اذا كان حواليج احد ولا لأ
.
.
LOOOL
والله ما عندها سالفة اذا سكتت
جان قالت له ولا تنطر رمضان كله :P

جنون إحساس said...

عدل كلامج محتاجين نقعد بروحنا بس مو للأبد

نقعد قعده صافيه نشوف فيها شسوينا شنو نحتاج

أما مسألة الإرتباط فهي كابوس لابد منه
ما اعتقد بنت ترضى تعيش بدون اسرة خاصه فيها
بس هم ماتدرين شنو التضحيات اللي بتقدمينها؟

حياة كئيبة بقوانينها الصراحة

Fahad Al Askr said...

أحلى شي بالحياة الواحد ينام لا طالب ولا مطلوب

White Wings said...

كل عام وأنت بخير عزيزتي، ومبارك عليك الشهر
لا تخلين أحد يشكك بنفسك، الصح والمناسب لك مو شرط ما يفعله الأغلبية، قد يناسبهم ولا يناسبك
مثل ما قلت السعادة شعور داخل النفس، يأتي من الرضا، وأنا أرى أنك راضية عن نفسك، تمم الله عليك كليهما: الرضا والسعادة
محبتي

lawyer said...

استكانه

الله الهادي
احم احم

اي بالضبط صاجه مساحه خاصه لي انا بروحي




ترستن
مبارك عليك الشهر

اي فهمت شنو قصدي
موبايل مسكر

قهوه يممك
هدووء
موسيقى

فيلم
و بلكونه فيها اصوات مراكب

و انت مستجم مع نفسك

شعوووووووووووور ممتع





قياديه
علينا و عليج باجي الشهر مبارك انشاء الله

اي والله انشاء الله دوم و اجمعين مرتاحه النفس :)

مشكوره على هالطله البهيه
لا تقطعين

lawyer said...

بربل

كلامج عين العقل

من كثر ما اهو عاجبني و قمه المقنع و المنطقي مدري شقول

بس بصرااااااحه حسيتج تفكرين بصوت عالي

مثل ما انا افكر

ولكن بس حبيت اعلق على نقطه


هذا اللي تبينه
تعيشين وحيده
عشان اذا لا قدّر الله و ما تزوجتي ما تكتأبين

امي اخصائيه نفسيه و اجتماعيه و محد كثرها يفهمني

اهي الوحيده الي اقتنع في كلامها
دايما تقولي انتي ما تحبين التغيير و تخافين من المجهول

يمكن لو اانا جربت حياه المشاركه ماراح اتخلى عنها

لكن طالما ما جربتها يمكن لي الحين ما احس بقيمتهاااااا


فهمتيني؟





بوصالح


عدل كلامك

بالضبط

تعال وين الي بتبنااااااني؟؟






جنون احساس
اعجبتني كلمه كابوس










فهد
صاااااااااااااااج
والله انك صااااااااج





وايت وينج
يااااااااهلاااااااااا

علينااااااااااا و عليييييييييييج
من زماااااان عنج
وينج؟؟؟

وووووووووووووووالله ووووووووووووالله من شفت تعليقج ابتسسسسسسسسسسمت انشرح قلبي

:))))))))
تسلمين بعد قلبي

اجمعييييييييييييين انشاء الله
و يملى حيااااااتج رضا و سعااااااده

قولي اميييييييييين
:**********

الصعب said...

دوم دوم

bo9ali7 said...

لحظة
الحين منو اللي بيتبنى الثاني؟
بالنسبة لي مو فارقة :P
تبيني اتبناج ترى حاضر
واذا تبين تتبنيني هم حاضر
نقول مبروك؟

lawyer said...

الصعب

شكرا

بوصالح

لا انت قلت بتبنااااااني

ههههههههههههههههه

bo9ali7 said...

تم يا وضحى :P