اطل عليه من الدريشه اشوفه و اهو يدش
ينعصر قلبي على كل الي قاعد يصير
يمر و شريط ذكرياتنا يمر وياه
ينعصر قلبي على كل الي قاعد يصير
يمر و شريط ذكرياتنا يمر وياه
منك احلى محبه عاشها قلبي و منك جرح الهوى ياما تلاعب بي
ياي ياخذ اغراضه...يجمع من غرفته آخر ما بقا له
وليته..
يوم أنه خذا من شقته ما بقى له
،ياخذ معاه ذكراه
وقلبي
واحساس عيا يرتاح في بعاده
أصد بعيني اللي عشقها
واداري فيها احساس قلب يون
ودمعه ترتجف على أطراف رمشي
لا يا عيني لا تفضحي قلبي
لا يا ضعفي لا تناديه يلمني
لا يا روحي..لا تنادين من رخص فيني
!!
دموع عيني تفضحني
واداريها عنه
في هاللحظه مابيه يشوفني
في هالضعف ابيه يكون بعيد عني
أطل عليه من فوق الدرج
تهتز خطوتي
واخفي وجودي
ويفضحني ظلي
يرفع عينه علي يحاول يدورني
آه يا عينه ..عين شفت فيها طفل عشقني
احتاج لوجودي
وروحي
عين..غمضت بحضني
وتدللت على روحي
!!
تدورني عينه وتلتفت،وانا منه انخش وابتعد
بشوف مني شي
و انا خاشه نفسي عنه
خطواته على ذاك الدري تقترب
اسمعها بقلبي وارتعد
ارتجف
ويهتز كل ما فيني
!!
ابلع ريجي
ادخل شقتي
يروح اهو شقته
يلملم مابقاله
يلملم جروحي وياه
وايامي و احلى عمري
يلم عمري
بياخذ ذكرياتي
وبياخذ اغراضي
عفوا اغراضه
اول مره بحياته يطق الباب قبل لا يدش علي
استئذانه يخوفني..يذكرني انه يوم انه خطف قلبي
ما استذن
ومن يومها ..نسيت معاه معنى الاسئذان
اهو روحي...وفي روح تستئذن من روحها؟
امسح دموعي
اقوله دش انا قاعده
مصعب: تبين شي قبل لا امشي
انا: لأ سلامتك ..ظفيت لك باجي الاغراض
و في اغراض حطيتهم لك بكرتون و خليته عندي
التيشرتات الي احبهم خذيتهم ..اسمحلي
مصعب: حلالج
يداري عيونه
مايطالعني
يلف ويه يمين وشمال
يتفقد مكاني و اهو حاس هذي اخر مره بيدش في هالمكان
يلتفت يستجمع اخر ذكرياته من مكاني
وقلبي
وكل جنوني
تهقون؟كان يبي يحفظ لي اخر صورة في ذاكره قلبه؟
ياهل بقلبي يصرخ تعلق على اطراف ثوبه يرتجيه ما يروح
اقعد وانا من لي غيرك بهالكون؟
لا تروح
بنت بداخلي تقوله كسرت حلم بنت فيني
صوت ام بداخلي تقوله هان عليك حضني
هانت عشرتي
يمشي و يروح يحاول يسكر الباب
و انا واقفه بلا حراك
وانا واقفه ...تثقل خطوتي وتتجمد حركتي
يمشي
و انا امشي للدريشه
اشوفه
برد
سنو
يساعده رفيجه في باجي الاغراض
و انا واقفه على الدريشه اراقب
اشوفه و اشوف عمري راح وياه
روحي خذاها وداعه عنده
وشريط الذكريات بين عيوني
كنت اشوفك من قريب مع جميع الناس عادي
ماتخيلت حبيب رايح بقلبي و غادي
صرت افز لشوفتك و اتحرى جيتك
انتظر حبي الجديد بعد مافكرت فيك
هل التقينا صدفه؟
عرفني من دون لا اعرفه
اعجب فيني
حاول اللعب معاي مرة و المراوغه مرة ثانيه
و يوم تقرب مني و حطني في باله
حبني
عيل هل التقينا صدفه؟ لألأ اكيد لأ
ولكن كل الي اعرفه اني يوم شفته عرفت انه قدر راح اعيشه
عشقتك قبل ما أِشوفك..وشفتك صرت كلي حلم
ابي رمشك يغطيني..وأبيك أقرب من أنفاسي
!!
شفت بعيونه سبارك ماشفته من قبل
فزيت وقلبي ارتعش من اول لمحه
من اول شوفه و هذا كله صار من نظره بدون ما اكلمه
عيوني مع عيونه
ارواح التقت و توالفت
توالفنا اشلون مدري
كان بكل شي غير
وكنت انا اخر احلامه
كانو البنات حوله كثير
وكانو يتسابقون لارضائه
وكانو هالبنات يعشقون جنونه
كانو!!
لأ بالعكس
مازالو البنات حوله
والكل يحبه
ولكن استثناني منهم كلهم
واختارني انا دونهم
ياني دون سابق انذار و موعد
فرض علي نفسه من دون ما احس
سحبني من الدنيا عشان اعيش دنيته بدون ما احس عشته اهو
هو محور حياتي وانا حوله اعيش
كان ريال معاي بكل شي
وطفل بعض الاحيان
الي اعرفه الحين بعد ماقعدت بروحي واسترجعت كل الي صار
ان انا مالي يد في هالي صار
لا انا اخترت قربه
ولا اانا خترت الفراق!
ما كان الفراق اختياري,,ولا عمري اخترت الوصال ولقيته
وانا أعشقك عشق المطر للصحاري...مها قسا وقتك علي ما جفيته
!!
كان اهو يقرر و انا انفذ
كنت اطاوعه بكل شي
مو قصبن علي
لا والله كان كل شي برضاي
بحبي
مو عشان ضعفي ولكن قادني جنوني ورائه
يازينه من عقل اذا هذا ينون
كنت احب رجولته و خضوعي امامه
كان بالضبط اهو يفصل و انا البس
البس فرحانه بكل شي اهو اختاره لي
تعرفون احساس الأنثى لي اخضعها حبها وحولها لفراشة؟
لمخلوق آخر مرن ..مجنون..رقيق وأجمل من كل جميل؟
وفي النهايه يوم حبيته
حطيت قلبي بيدي و سلمته اياه
حطيته بقلبه وقلت له
مصعب حافظ عليه
و صونه
خلني بقلبك
وترا باجر الدنيا دواره
ابيها تدور و انا معاك وتكون انت محور كل شي
ابيك انت شمسي و انا القمر ادور حوالينك
مصعب..هالله هالله بالأمانه
يوم أمنتك بقلبي..هالله هالله بهالأمانه
كانت اول ايامي في بوستن عرفته فيها
و كانت اول و احلى ايام عمري
سنه اولى ماستر
وكان اخر سنه له هناك
بعد ماعرفته و تعلقنا في بعض
انتقلت للسكن يمه
في نفس المكان
ماكان يكفينا ان قلوبنا تسكن بعض
ماكان يكفيني انه يسكن بقلبي كنت ابي اعيش معاه صج
بيتي اهو بيته
وسكنه اهو مكاني
كان يساعدني بكل شي و ابسط شي
وكنت انا له الحب و القلب و السكن
كنت انا الحبيبه
وكنت الام
و الطبيبه حزت التعب
عشنا ويا بعض ايام لا تنسى
اللي حب انسان و ماعاش وياه
ماعرف معنى الحب
تقاسمنا الحزن قبل الفرح
يشهد علينا الليل,,,,والسهر,,,وكل شي حلو جمعنا
شاركته في كل شي و شاركني
يومي و يومه
دراستي و دراسته
اكلي و شربه
نروح و نرجع يميع
ربعه اهم اخواني
واهله اهم ناسي
اكتفيت فيه دون عن هالكون
احبك دون كل الناس و اسأل و اطيع الامر و اصغى لاستماعه
بتنساني؟
ما اظن
بتنسى وحده تقعدها نص الليل الساعه 4 الفير
تجاري جنونك؟
تنسى ريوقنا في ماك
تنسى شهوتي لشورما في منطقه تبعد ساعه و اتروح اتييبها لي؟
انا: مصعب بليييييييز ميته برد الله يخليك سكر التكييف
مصعب يحط ايده في يبهتي: ترا انتي حاره
انا: لا لا عادي مافيني شي بس سكر التكييف
يعصب على
يسكر التكييف واييب لي الادويه
و يقط على الثرو يدفيني
و يشيل الكتب من حواليني
مصعب: قوماي ارتاحي دشي الدار ارتاحي
يدخل علي بعد شوي و يايبلي فيتامين سي
و ماي
يشربني
و يقولي ارتفعت حرارتج
دشي اخذي شاور
اخذ شاور نطرني عند الباب
يوكلني الادويه و انام
كل شوي رايح و راد يتطمن
موعد دوانيته اليمعه في شقته
يخليهم و يسهر على راحتي
اقوم من غرقه نومي
انا: الساعه جم؟
مصعب: الساعه 10 ليش؟
انا: ماتبي تروح عند ربعك
مصعب: انتي ربعي
يقعد يمي
يقيس حرارتي
نزلت شوي
اقوله مصعب تحبني؟
يحتضني حنان عينه
ويلمني بروحه
ويهمس لي باذني
يا عيون مصعب
مو بس احبج
انا اموت عليج
يعطيني ماي
ابوس راحه ايده
الله لايحرمني منك
يطنز علي : شنسوي بعد كبرتي و قمنا نداريج
لا لا لا خلاص انا لازم اتزوج يبيلي وحده تجابلني انتي عيزتي
انا :بضحكه مريضه تعبانه منهكه :الله يسااااامحك اسم الله علي تتزوج علي
مصعب : بعد اذا صار عمرج 60 بتزوج عليج
اشتبين فيني خلاص
انا : ابييييييييييييك احبك لين امووووووووت انت مالي
أمان...احساس الأمان يخليني اغفي
وبين ايده انام
تدمع عيوني لا ذكرت حوارتنا
ايامنا
ليالينا
سفرنا
و مشاكلنا
كنا يوم و ترك انتهاوش
بسبب و بدون سبب
من كثر ما كنا انجابل بعض
عيوبي تفوق عيوبه
و اغلاطه اكبر من اغلاطي
فيني عيوب و له اغلاط
في كل مره انتهاوش يزيد حبنا اكثر من الاول
في كل مره نسافر انتعلق في بعض اكثر من الاول
كنت اغار من اي امريكيه تكلمه
و اتهمهم في انهم يبون فلوسه
و اغار من اي خليجيه تسلم عليه و اتهمهم في انهم ميتين على كويتي
كنت ارز عمري في كل مكان وياه
سوقنا
مطاعمنا
ماكنت ارضى افارقه
و كنت اتباها كل ماشافونا الناس ويا بعض
ماهمني كلام الناس
ولاهمني الحجي
ولاهمني اي شي
اهو كان محور حياتي
تركيزي
عشقي
جنوني
احبك ياكل افراحي
احبك بكل جروحي
لي تزاعلنا يمرض
وعلى المه انا اتعذب
يغلط بحقي و اسامحه
روحين بجسد ما نرفق بحقوق بعض
ولا منهو فينا بدا
لانه تعبنا واحد
و انا راده من المكتبه
ادز له مسج :وينك
يحقرني
افهم انه لي الحين زعلان
ادز له مسج ثانيه تبي عشا؟؟
يحقر
افهم انه لي الحين مطنقر
ممممم
شسوي شسوي فكري يافطيم اشلون تخلينه يرد عليج
ايه لقيتها عرفت شقوله في المسج
مصعب حياتي لقيت ناصر و عبدالله بيروحون السينما فيلم يديد بروح وياهم من الجامعه
تقدر اتيي ؟؟
يرد علي
ردي البيت بس ردي البيت
اصرخ من الوناسه
يس
يس
يس
يااااااااربي...أجمل مافي الكون
أنا وهالمجنون
اروح البيت
اتحرش فيه
قاعد بصالته
ومسكر الباب يعني لا اتيين مابيج
اطق الباب ما يرد
انا: مصعب ابييك انا ييت عشانك مارحت السينما
هو: تعرفين تخليني بروحي
انا: مايصير ادش
يفتحلي الباب
ويروح يقعد
اروح المطبخ اخذ ماي من الثلاجه
ارد امسك الريموت
اطقطق في القنوات
اروح غرفته
معفوسه كالعاده
ارتبها
يدش علي
هو: خلي اغراضي لا تسوين شي
ابيهم جذي
طبعا لازم تعرفون شي في مصعبي
ان اذا رضا عني كدش ابو امن يابتني
و اذا زعلان علي : خلي اغراضي لا تجيسينهم
دايم الزعل
و دايما اراضيه
مشكلته يغلط بس يعرف يطلعني في الاخر انا الغلطانه
والله مدري اشلون متحمل طولة الساني
و انا مدري اشلون متحمله اعصابه
تدرون شنو الشي الغريب
اخترنا نعيش و انموت في بعض
من غير ما نعرف بعض
تكفون خلّوه لا تحصون غلطاته انا ادري انه تلف حالي
خلاني امشي على كيفه و مشهاته طوّعني شلون ؟ مدري ..بس طوعني
وعلى هالحال انا وياه اشهر
وعلى هالحال انا وياه اشهر
وبعدها قالي ان الوالده بتيي انشاء الله بعد اسبوع
و تعالو شوفو خبتي وخبته
على ييتها
مو قلت لكم امه اهي امي
و اهله اهم ناسي
القط اغراضي من كل مكان في بيته
حمامه
سله ملابسه فيها هدومي ليش!!
الحكومه على وصول
و التفتيش وارد
ولازم نقوم بازاله جميع الالغام
و في يوم الوصول
خالتي و خدامتها
و انا مسويه فيها السنعه
مربطه في الصاله ما اقدر اروح داره و لا اروح مكان
عشتو انا يارته بالصدفه
اكو ياره ادرعم على ريال !
بس هل اعبر ؟؟
اقدر امثل الدور كامل ؟ ما اظن
يتبع
20 comments:
صباح الخير :)
البوست يبيله شوية فضاوه
راح ارجع له مره ثانيه
بس اني اكون صاحب الكومنت الاول عندج
شي ما يتطوف بصراحه
:)
صباح الاحساس
:)
شوفي بعترف انا يمكن اقرى لج من سنه تقريبا اذا مو اكثر
اكثر شي احبه فيج جنونج و لو انج تزودينها مرات
بس اللي ما احبه
سالفه يتبع
:(
شنو لما اندمج يتبع؟؟
احلى المقاطع بهالبوس
نعيش و نموت بعض
انا ما اموت فيه انا احيا به
:)
بانتظار التكمله لا تطولينها ربنا يخليكي
<< اشتغل شريط الطراره
لأ .. لأ .. بروح اقراه مرة ثانية
حبيبتي يا كل الناس
ابتديت صباحي بفنجان قهوة وبوستج
لا قدرت اكمل القهوة
ولا قدرت اترك البوست
بوست مغمس بالحب والألم
بوست مبخر برائحةالعشق والإفتقاد معاً
بوست يقطع القلب
بوست يخلينى ابي احب
وما ابي احب
عوار قلب يا فطيم
حسيت فيج
عشت فاطمه بهالقصه
كنت انتي لوهلة
وفجأة اوتعيت وايدي فاضيه
وقلبي مجروح لجرحج
ابي المج
ابي احضنج حيل
ابي آخذج لدنيا احلى
ودي ودي يكون بيدي شي
تدرين ساعات لما تضيج فينى الوسيعه
وودي انحاش من كل اللي تاعبنى
احط لي زر دليت
ارعصه وابلش في بالي امسح اللي ما ابيه
لا تضحكين علي بس والله عقبها نوعا ما ارتاح
اهو صج كله خيال
بس الخيال ساعات يريح
انا بقول لج شي
نصيحه عديها من أخت لج
الدنيا ما توقف عند احد
والناس اللي تحبج يالوير وايد
اهو انا اهي اللي يعلقون عندك واللي ما يعلقون ربعج اصحابج اهلج الدوام
الفراش اللي اييب لج قهوة الصبح
واللي يروح ويودع دنياج يا فاطمة وبرغبته اهو الخسران
ما ابالغ
ما اجامل
هذا رايي
احساسي
الحب مو ريــــــال يا فطيم
الحب ام وابو
اخت واخو
صديق نصوح
حضن دافي بيوم بارد
فراشه تحط على ورده يتيمه
ايد تمسك ايد وتسندنا عند الحاجه
كلمة حلوة تطلع بدون تكلف وتكون تلقائية حيل
الحب لحظة صمت بين اثنين واحساسهم انهم مكتفين بهالصمت
لأن الكلام ما راح يضيف لهم شي
الحب لحظة هدوء وتامل وانتي على سيادتج بعد الصلاة وتدرين ان الله حاضنج
ما بينج وبينه حجاب
يسمعج
ويدري بشكوتج من غير ما تقولين
الحب طفل تشوفينه بالشارع او بمكان ما يبتسم لج واهو ما يعرفج
الحب لما تحلمين باللي راحوا وسبقوج للقبر زايرينج حاضنينج لامينج محتوينج
حتى لو ماكان صج
الحب اليوم انا وانتي واستكانه وكاريزما ومناف ومتفائل وطائر وغيرهم وغيرهم
الناس اللي تحبج وماتبي منج شي
ولا تنتظر شي
تبيج سعيده بس ومرتاحه
تبي تسمع ضحكة لوير
وتبي تشوفج مشتطه كالعاده ومستانسه :)))
البوست حلو بس يعور
هقوتي بردت
ودمعتي غسلت خدي من الصبح
ابي المج
حيل
حيل
وعلى فكره مشروع الخطبة لازال قائم
وانا قلت حق امي
وقالت الساعه المباركه
:*
احبج واحب ينونج
الحين شلوووووووون
ابي اعرف شصار مع امه
بس طلعت خوش فكره
يتتتتبع
:**
كل عام وانتي الحب
ana abe afham shy wa7ed bs????
shinoo ellee khallanee a7es belgheerah????
LOOOOL
لوووير
بعد مافجرتي الدموع تقولين يتبع :)
لووير
ليش احس بالجرح بكل بوست تكتبينه
ليش أحس بقلب يتلوى؟
ليش يالوير ليييش؟
دنياج ماتسوى الحزن يالغاليه
دنيا زايله
وكل من عليها زايل
يكفيج الناس اللي تحبج
يكفيج ضميرج مرتااح
وربج راضي عليج
واللي راح راح
واللي يخليج لا ترتجينه
من باعنا نبييعه لو كان غاالي
لو كان غااااالي يالوير
وماضينا معاه
لا نتحسر عليه
ولا نعيش على ذكراه
الدنيا ماتوقف على أحد
الدنيا تمشي
وتاخذ من عمرنا كل يوم
بنضيع على عمرنا على شخص؟؟
بننام على دمعه ونصحى على دمعه عشان شخص؟؟
لا يالوير
لما الحين اقولج فرحي :) وفرحي .. وفرحي
غسلي قلبج ..
نفضي عنه ياقي هالجرح ..
وان كان صعب في البدايه..صدقيني ربج كفيل فيه
كفيل ان يداويج وينسيج كل همج
يكفي ان ان اهوا قدر لج كل اللي صار
وانه الوحيد اللي قادر يبدد عنج كل هالاحزان
فتحي له قلبج .. رفعي له ايدج .. ماراح يردها خالية
لا تنطرينه يراضي جروحج
ولا تنطرين منه أي شي
عيشي يومج مع اللي يستاهلونج
ربي يريحج دنيا وآخره حبيبتي
امبييه تكلمت واااايد سامحييييني
والله تعزين عليي
مانبي نشووفج الا مرتااحة :**
تعورني انا قصص الجامعه
تدفس الذكريات راسي بالمخده
وتشتغل الافلام الابيض والاسود
القديمه ..ولكنها بالذكريات
ملونه ..الله يا فطيم ..من يعيش
علاقة حب الان جذي ..ماااكو ابد
يا عونة الله ..محد منكم عني داري
ما ني قاري الفصل الثاني
ما بي يخرب مو البوست الولي
كافي علي
فمالله
شلون تركك تضيعين من ايده؟
نخرت قلوبنا
بانتظار المزيد
فطووم القصه واقعيه ولا خيال .. تكفين من يوم وطالع كتبي أخر البوست إذا خيال ولا واقع
التفاعل يكون اقوى لما تكون واقع خاصه أنج من النوع الي يكتب وكأن عن نفسه وخبرج وعلمج أنتي وحده حبيبه
فبعلق على مضمون البوست عقب ردج خيال ولا وااقع
وتسلم الأيادي وناطرين الرد واليتبع
:)
بايعتها انتي لوول
كملي خنشوف
وقولي صج ولا لا
انا ما احب هذي ال يتبع ما احبها
يالله بسرعه لاتطولين علينا لوير ترى تحمسنا
أول مره أدخل هالبلوق الرائع
بوست مؤلم .. مؤلم .. لكن عذب وصادق ..
دمتي عاشقة غاليتي
وبلييييز لاتطولين علينا
اندمجت و بتأثر بعد :(((
اسلوبج مشوق و يدش القلب :(
بانتظار البقية !
تحياتي لج
البوست اللي قبله عجيب
اليوم مصعب
أمس ماركو و اللي قبله إدواردو
يوم في نيس و اللي بعده في كان و اللي بعدهم في نيويورك
ذكرتني بمقولة محمد صبحي الشهيرة في مسرحية تخاريف
أنا اليوم بقيت إنترناثونال
Lawyerrrrrzzz
خووووووو يالللللللللله ... متنا واحنا ننطر الي بعدوووو /;
خنقتني العبرة ..
دائما كلماتك تستوفقني
بعض المرات ما يكون بيدنا شي
بس
am waiting tra... sh9aaaaar 3ala omaa :P
شكرااااااااااا لكم كلكككككككككككككم
على تواصصصصلكم ياربي ما يحرممني من تشجييييييييعكم
Post a Comment