Tuesday, January 15, 2008

ابيع العمر على شانك و لا احسب عليه حساب ...(الجزء الثاني و الاخير)


ليش اذا احتجت وجوودك تبعد و تروح
ليش اذا بغيتك ما الاقيك
ليش اذا تعبانه انت لاهي ما تكون وياي

ليش ما تحب تشوف ضعفي
ليش ماتحب تسمع كلام قلبي
و ماتعبر على الشقا وياي


من اول يوم صارت شغله مصعب و هوايته
يطفرني بوجود امه و يفتح مواضيع يدري لولا وجود امه لسويت سالفه كبيره

و خالتي انسانه وايد طيبه
بس يااااااربي اهي امه ادري امه لكن اغار

لا تقولون ما ينغار من الام
اغار

خالتي مرا هاديه سوالفها قليله
ما ينسمع لها حس الا اذا تزف الخدامه
او تزف مصعب على الصلاه

و الا غيره ما احس فيها الا اني تقيدت وايد في موعد دخولي و موعد خروجي معاه
قمنا نطلع بالبوق
و انييي بالبوق

صرت اعرف في مصعب جانب من شخصيه ما كنت اعرفها
طول عمري اعرفه كحبيب كصديق
كأب لي في شدتي
و سندي

لكن اول مرا اشوفه ابن
و ابن بار في امه وايد
مو قاعد ابالغ
بس يحبها بطريقه اتخليني اغار
هل المفروض ما اغار ؟



اسرح في مصعب و اهو يهمز ريولها
كان يقعد في الارض و اهي منسدحه

كنت اسرح و اطالعه و اهو مو منتبه !!
يوديني خيالي لبعيد

ياه هذا الانسان الي احبه و اموت عليه
اشلون يداري امه

امور بتفاصيل يفخر فيها المحب اذا لقاها في حبيبه

احس بدغدغه لمشاعري
و اكون فخوره جدا فيه و كأني انا الي ربيته مو اهي

لما يمسح على راسها
لما يحب راسها قبل لا تروح تنام

لما يداريها في كل شي

يما ادق عليه و اقوله وينك يقولي في السوبر ماركت اوديها تشتري اغراض

لما اييي يشرب عندي قهوه الصبح و يقولي سلمتاي على امي اليوم؟؟

اقوله لأ توني قاعده

احسسسسسه يتعسر
والله يتعسسسسسسر
و يعتب علي
لاني ما قمت بواجبي
و سلمت فاحس فيه
و اقوله : يالله قوم عيل ليش قاعد عندي هني خنروووح نشرب القهوه هناك

يرد علي و جنه يقولي اشعقبا
ما تدرين هذي حزه صلاه الضحى !!

مرا من المرات
قعد من النوم
و ياني
عشان اسويله قهوته التركيه الي يشربها مع الزقاره
اروع احساس لي بالدنيا و انا اسويله قهوته الي ما يشربها الا من ايدي



يرن التلفون
اشيله
امي اسوووولف وياها و اسلم عليها و اطمنها
و اقولها بكل حماس اني بروح حفله ميشيل خليفه
ياي عندنا هني بوستن
و الحفله كلها ناس راقيين

اسكر التلفون من امي

اعطيه الطفايه

اقوله اني بلبس الحين و عشان البنات بمروني انروح انتريق برا اليوم

هو: وين بتروحون
انا: والله مدري البنات قالو بنتريق برا و بنتشمى
يمكن نسوي اظافرنا مادري
اليوم الاحد توقعتك بتقوم متاخر بعدين اكيد بتودي خالتي السوبر ماركت
فعشان جذي اتفقت وياهم
هو: ساكت ((ما يعجبه اتخاذ قراراتي و لو كانت بسيطه ))
انا: اي نسيييييييييييت ما قلت لك توه توه لما قالولي بمروني انتريق برا
قالووووولي بنروح حفله مارسيل خليفه الاسبوع الياي
هو: استاذنتي من صبييييييكم !!!!؟؟
انا : مصعب اشدعوه ... قالولي البنات شقولهم يعني و بعدين انا احب مارسيل
و انت ماتحب هالسوالف و بكون ويك اند انت ما تسهر وياي تكون ويا ربعك
(( طبعا حدي طخخت السالفه عشان ما تكبر و قمت اسولف جنه ماكو شي عادي عشان مالي خلق تتحول الى مشكله و تنقلب السالفه علي و ما اروح عشان ارضيه لاني بروووووووووووووووووح))

مصعب يكره تصرفاتي لما اسوي نفسي جنه ماكو شي صار
و انا بعد اعترف اني اقث لما اكون غير مباليه

يشرب قهوته و يمشي
اروح وراه

يدش داره
!!

ما اقدر اروح وراه خالتي بالصاله!


اطق باب داره !

يفج باب الدار و يصرخ علي
هو: انا ما هميتيني رحتي والا قعداتي انا همني الاسلوب الي تتعاملين وياي فيه
لو انتي عرفتاي اني بالصدفه بروح حفله ويا ربعي من غير ما اقولج
و اسوي السالفه جنه ماكو شي
و تتضايقين و اتجاهل مشاعرج اشكره و اعدي السالفه جنه ماكو شي
هذا معناته يا انه انتي مو هامتني
يا ان انا ما احس
و اظن انج تحسين و انا المفروض اهمج

احتراما لخالتي ما ارد
اسكت و امشي
و اقوله الله يسامحك
انا مو مثاليه
بس اعرف اشلون اتفاهم وياه
مو جدام امه

اروح ويا رفيجاتي و اطلع
و يروح اهو يطلع

ونرد اخر الليل جنه ما صار شي

و تمر ايامنا
اسبوعين اشزينه
و فتره انتظارب
و دايما انا الي اراضيه
حتى اذا انا الي معاي الحق

اتعب نفسيا اذا زعل علي
يمكن صرت ما احس بحواليني
و يكون اهو محط تفكيري
بالي وياه
له طريقه تعتيم اعلامي اذا زعل مو طبيعيه
حتى و اهو حواليني
ما اعرف عنه شي
اشوفه يدش و يطلع بس ما اعرف

و اظل انا متكدره اصيح طول اليوم
و اشكي حق خالتي
يداد لها

ياربي احبه و لا اقدر على زعله
فيه غرور مو طبيعي
ما يقول انه غلطان
و لا يرضى يراضيني
يجرحني مرات بكلمه
بتجاهل وجودي
ولكن اذا طال البعد
اقوله

سيد جروحي شمس عمري و ظلي البعد طول و الخطا منك واضح اذا غرورك يمنعك تعتذرلي
لا تعتذرلي قول اسمي و اسامح

تنطوي الايام و تمر فينا
يكبر حبنا معانا يوم بيوم
علمني اشلون احبه
و خلاني ما اشوف في الدنيا غيره
عرف يخلي كل هالدنيا يعني مصعب

و لي غاب بكل وله اقوله
تغيب و الدنيا معك تغيب و يصبح العالم غريب

احب اهتمامه فيني
خوفه علي
احتواءه لي و لجنوني
و زعلي
و اعصابي
يعرف اشلون يدفيني في يوم بارد
و يطمني في ليل اعتم

و دايما اقوله الايام بتمر بينا
و كل شي بروح
الا حبي و حبك
يزيد
احلى الكلام الي سمعته بعمري منه اهو
احلى التصرفات الي شفتها بعمري منه اهو

ما انسى يوم اختلفنا و قالي والله ابيج
لو كل يوم نزعل و انتهاوش بس ابيج
احبج ولا اقدر استغنى عنج

ما انسى يوم قالي
انت الضعف الوحيد بحياتي وحتى ضعفي لان منج ابيه

ما انسى يوم يوم هادي سرحت انا وياه و قالي
فاطمه ابي عيالي منج و اذا مو منج ما ابي

ما انسى كل شي منه
و احلى شي منه
علمني ان الحب يحني تشتري راحه حبيبك

حياتنا ماهي روايه بقصه
او فصل من فصول شهرزاد
ولا حلم ربيع مر

اثنين طبيعين عادين نمارس حياتنا بشكل جدا طبيعي

في مرات وايد نقعد ما عندنا شي نقوله
انا بالصاله ويا لاب توبي و اهو يمي
يكفيني يكون يمي
احساس وجوده بروحه يمليني

اشوف البلوقات
المواقع
شوبينج
شات في المسنجر
و اهو لاب توبه بحضنه
بس مادري شنو يشوف

بمكر النساء الي عندي اقوم و المه من ورا عشان
اشوف اشقاعد يسوي او منو يكلم
مالت علي ما احصل شي قاعد يلعب جيم!
انا: واي ياكرهي لما اشك فيك
ترا انا يايه بسوي نفسي اجكك!
و اطيح عليك اشقاعد تسوي
مصعب : هاهاهاهاهاها عاد انا لو بسوي ما اسوي و انتي موجوده
اقولج روحاي نامي يالله بنام و اسوي الي ابيه!!!!!
انا : ياااااااااسلااااااااااااام
وارد اجابل النت
انا: مصعب شفت بلوق برلماني
هو: لا اشيطلع هذا !؟
انا : واي مصعب من ادش بلوقه اسيح
هو يعطيني نظره : وايد عليج !
انا:يقتلني ريال يعرف يكتب جذي اشلون ؟
اشلون يقدر يكتبني ..تعرف الي يصير بينا
يكتبه بالظبط عليه شفرات مو طبيعيه
هموومه تكون بنفس همومنا ..يوم قال مخنوق
كنت يومها امشي بالشارع اصيح اصيح يايتني القمته الي مو طبيعيه
بليز مصعب هاك اقرا ..تروح و العذر راجع..
مصعب : ماني قاري شي ...(يسكت )
انا: واي يا كرهك لا تدقرني اقراااااا حدك بزووغ عليه
مصعب: انا لطقييييتج ترا ما انلام !!

تمر فينا الايام و اخلص امتحاني و ارد اجازه نص السنه الكويت
3 اسابيع
كل الي اذكره فيهم الجيت لاق
و اني حدي متعسره في الكويت من دونه
وقتي و ساعتي على توقيته اهو هناك مو توقيت الكويت
اقعد مع ربعي و لا اسمع كلامهم
عيني على التلفون و قلبي معاه
عاشر يوم لي في الكويت
اوصل لمرحله الانفجار من دونه
الله لا يوريكم شعوري و لا يفرقكم عن احبابكم

ادق عليه و ابجي
10 سوالف في بعض
اعصب على كل شي
يفهمني
يحسني
يعرف سبب نوحي عليه
يدري اني ولهانه

يسألني تبين لمه؟
اصييييح زياده
اتيني الشرهه
مصعب ابيييك تعال الكويت
اول مرا اجهز جنطتي قبل السفر باسبوع
اول مرا ابي ارد مكاني
واحس بغربه في داري
ابيك يابعد ناسي و هلي
ابيك لي وطن لاضاقت الدنيا فيني

ارجع بوستن

وترد حياتنا طبيعيه
تمر الايام فينا
و يضطر مصعب انه ينتقل ولايه ثانيه
كورس اخير قبل لا يرد الكويت
سافر عني فتره من الوقت
ربعه الي هناك حياتهم غير
اسلوبهم غير
كل شي تغير على مصعب
و علي انا
ماراح اقولكم اشلون راح مصعب
واشلون قالي خبر انتقاله
لاني تعبت اكثر منه
احس يوم روحته
شي انشلع من يوفي
احس احد طعني وخذاه

طبعا الي طمني اني انتقلت وياه في البدايه
ورتبت شغله
وتطمنت على كل شي
رجعت بروحي بوستن
و الشقه تاكلي من الفراغ و الوحده
احس الطوف تسأل عنه
داري
مكاني
كل من يسأل عنه
اعيش بروحي
بمكان كان مليان بحسه
وصار كل شي بارد من دونه

حتى الاكل انسى اكل
ولا اشتهي اكل
مرضت روحي
و ذبلت

قالو الشوق ظالم
قلت سيدي ماظلم
قالو يجرح عيونك و يحرمك نوم الكرى
قلت اعطف ياسيدي
لاكرمك في غيابه
لوبتجرحني اجرح
كلي فدوة لشبابه
قالو حبيبك مسافر

فجأه مع الشله اليديده
بدا يتغير
بدا يسري متأخر
ويسهر برا وايد

حسيت بدا الخوف يذبحني
والبرد يسري بمكاني
في البدايه قلت يوم يومين

مو بالعاده مصعب
ولا من تصرفاته
ولا عوايده
دايم عنده ربع
و قروب بنات و شباب
بس عادي
ما تغيير علي بشي و لا تغير معاي بشي

لكن احساس المحب دليله
اكو شي يصير هناك
انا مااعرفه

يمكن منه
او من تأثير و حنه و زنه ربعه
او يمكن الشله كلهم كل واحد وياه وحده

بس هل انا اهون؟
هل الي بينا بسرعه يروح
هل فعلا من مجرد بعد
ومعرفه بنات غير
يتغير الريال؟
مستحيل
لان اعرف الرجل اكثر من الرجل نفسه

ادري انهم يفرقون بين الحب
والصداقه و الوناسه
وادري انهم ما يخططون يستقرون الا اذا عارفين انهم قادرين على الاستقرار

صرت نادر ما احصله
صار يرد البيت تالي الليل مو شفقان و لا ولهان
صرت اسأل عنه وايد
ولا يسأل عني

تعرفون شعور المرا لما تستقر
وترتاح
وتحس اكو بنت تسحب منها استقرارها
تعرفون شعور الانهيار

صارت حياتي جحيم
صرت اتعب من كل شي
صار الحب عذاب
و اهو ولا همه
صار يشوفني اموت في اليوم 100 مرا

وعذره الوحيد اني ألفت فيلم بروحي و عشته
وان ماكو بنات في حياته
وان المفروض اصلا ما اشك فيه

سألته
واجهته
سبب هالتغيير شنو
ماعنده رد

قمت ادوره الف عذر
قمت اجذب نفسي
ابي اخليه نظيف بعيوني لي اخر يوم بحياتي
ابي اصدقه

اواجهه
مصعب تصوني؟
مايرد
مصعب تخوني؟
مايرد
مصعب تحبني
يقولي اكيد
اشلون تسألين هالسؤال
وانتي تدرين اني احبج اكثر من روحي
واكثر بوايد من حبج لي

بس انتي جرحتيني بظلمج

وانا لازم امشي من حياتج
لانج ما تثقين فيني!!

كل الي بينا
كل الي بنيناه
كل هالعمر
يروح بسهوله

صارت علاقتي في الانسر ماشين اكثر من علاقتي فيه

ادري يحبني
بس ادري ان اكو شي يصير من وراي و انا ما ادري

احسه خلاني اسبح وياه في محيط
لي وصلت النص تعبت
لاني قادره ارد
ولا قادر يشيلني
هل راح اموت غرقانه؟

قامت مشاكلنا تزيد
غيره
شك
بعد
ولهه

صار حياته كلها ربعه
بس ربع بنات و شباب

اعتقد في مثل هذي الحال
المرأه توقف لي هني بعد كل الي سوته و عطت
وتنطر النتيجه انها تاخذ

اعتقد من حقي صار اني ارتاح
لان شقيت وعطيت بما فيه الكفايه

حسيت وصل معاي لمرحله اقول الي اقوله مايرد علي
عندي مليون سؤال ما يجاوب عليهم

اول مرا بحياتي احس انه يبيني اروح
من غير ما يقولي روحي
عشان ما تطلع مني

رجع بوستن
ياخذ باجي اغراضه
يدري في حالي
و يشوف بعينه شنو يصير فيني
اهو تعبان
وانا تعبانه

ماراح اظلمه

بس في الجم يوم الي قعد يرتب امورة
كنت معاه لي اخر لحظه
وكنت كل كلمه يقولها
اسمع و اسكت
و اقول انشاء الله

لي درجه مصعب الي ما ينطق
قالي :فاطمه ليش تسوين جذي
ليش تعامليني جذي
تدرين اني قلت بريك اب و تدرين ان مابذني ماي في الرده!!!!!

اح
شعور يقتل
ان واحد يقول حق وحده تدرين مابذني ماي في الرده!!

في هالفتره
كانو معاي صاحباتي الله يخليهم لي

تسألني رفيجتي تهقين لي الحين يحبج؟

التفت عليها و قلت : اهقى؟
انا متأكده اني اسري بدمه
واني ماي عروقه
وادري اني كل شي بحياته
انا حبه
و انا كل ناسه


تسألتي صاحبتي الثانيه اتهقين بيرجع؟

رديت عليها وقلت لها
الريال يدور كل شي و يغير كل شي
الا امانه و راحته
الكويتي لي سافر لي اخر الدنيا
او اذا سافر في الصيف 3 شهور
هل معناته ببيع بلده؟
وطنه؟
بغير جنسيته؟

طبعا لأ
الكويتي يسافر يغير جو
يستانس و يرد

انا ادرى بيني و بين نفسي
في اشياء وايد محد يدري عنها غيري
اي شي يصير بين اي اثنين محد يعرفه كثرهم اهم

لو بقول
لو بتكلم
ما اوفيه حقه
بس هم مع هذا كلنا نغلط

ترد علي رفيجتي
اذا ردلج بتردين له؟

رديت: ماراح تعرفين جوابي الا لما تتقلبين على المخده طول الليل
و تهربين من كلمه (( تدرين مابذني ماي في الرده)) حزتها راح تعرفين اذا برد او لألأ



كل هذا اذكره و انا واقفه على الدريشه
اشوفه واقف يرتب اغراضه بالسياره ويا رفيجه

برد
واحساس بداخل قلبي
يموت بكل لحظه اشوفه فيها

مادرى اذا الماي الي على الدريشه
دموعي
او مطر

يروح
و تمشى الايام
كل الي اذكره اني قلت له
مصعب لا تذكرني يوم بشين
ولاني بذكرك يوم باي شي شين
لا تقول كانت
ولا بقول كنت
قول ظروفنا كانت صعبه

اوعدك اني بظل اذكرك بكل خير

29 comments:

The Simper said...

i am the first.. i didn't read it :D

الزين said...

وااااي

بس

بس

بس

ما اقدر

عوار قلب

بعلق بعدين لما اهدا

:(

haifa said...

لوير .. صدقيني بيندم او ندم .. الاحساس بالامان والاستقرار شي موهين .. واهوا بيدرك هالشي متأخر ..


على فكرة ان من قريت الجزء الاول وانا كل شوية ادش .. أنطر التتمه ..

esTeKaNa said...

للأنثى العاشقة كاشف إحساس صادق!!
كاشف يخليها تفز بتالي الليل من نومها
وتحس بخنقة روحها
تتقلب
وتناظر سقف دارها
تغمض وتدري...في شي يصير من وراها
احساس يخليها تعرف الحقيقه من نبرة صوت
من نظرة عين
من صدة عيونه
!!
احساسها يعور اقصى ما فيها
احساسها يغني له ويغني لها:
لا تعلمني
ولا تكذب علي!!
لا تعلمني وينهدم قصر حبك فيني
ولا تكذب علي وأنا أدري إنك تكذب

اذا فارقتي شخص عادي مصيبه
اشلون لا صار فراق شخص تحبينه؟
خذا من روحج
وحياتج
وأجمل واحلى لحظاتج
مسيرة يرد
!!
بس ان رد
بيلقى قلبج اهو القلب اللي ودعه
ولا بيلقى قلب انكسر وفقد ثقته فيه؟

Najmah said...

اكره النهايات الحزينة جذي

راسي قام يعورني

ودموع متعلقه

وتنحت باللاب توب

ورفيجتي تكلمني حاقرتها =\

حسيت اني اكرهه

حسيت اني بغير الاحداث

حسيت ان مشاعرنا غااليه حيل
ووايد ناس مايقدرونها

PearL said...

عوار قلب

بروحي مريضة يا لوير

زدتي علي التعب

والله بوستج يعور

بس ليش ؟
بشنو لهى
؟

هل يسوى انه يخسرها ؟

محـــــارة said...

فطوووم هالقصه دمعة عيني الوصف والكلمات فيها صدق كبير وإحساس عميق

عورني قلبي حيييل .. ليش الحب ينغدر فيه ليش ينباع برخص التراب .. ليش ماينصان الحب

أااااخ ياقلبي لعبتي على الوتر .. شلون الدنيا سهله عندهم والأصعب أنج تدرين أن قلبهم يبحبج حيييل عيل لو مايحبونا شكانوا سووا

تصدقين ما أتخيل نفسي مع غيره برغم ظروفنا وبرغم استحالة إرتباطنا بس أحسه أهو متعتي الحقيقيه أهوه الي لامس الروح وغيره ممكن يكملون حقيقيه ورسوم إجتماعية بس مايمتعون ولا يقلبون مشاعرنا ويكونون محاور تفكيرنا

أفكر دووم على الزواج أهوه المتعه تصدقين أحس المتعه الحقيقيه بالدنيا الحب سواء نتج عنه إرتباط أو لااا .. لكن يامحلا حب ويتبلور بزواج

عسى ربي يحقق مناج يالغاليه

Kwaitiyya said...

وااي ليش !! دمعت عيوني وانا اقرا ! ليش صار جذي فيهم!!!

مالت عليه الصراحه غبي وخبل بعد !
بط جبدي ودي أكوفنه ... اهوا الخسران

`~MnO YeNSa! ~` said...

لأ لأ مـــــــــــــــــو صج
مت مت مت من البجي ..
عـــــــــــــــوار قلب


المشكلة لما كل منا يفترق
والقـــــــــلب به شوق ما ينوصف
وكل منا يعرف و يجهل صاحبه ويعرف انه الحب بين هالقلبين ابد ولا مـــرة يحترق ..

مشكلة لما تدريـــــــن انا الي جدامج يجبج أكثر من نفسج و هم بالنهــــاية نفترق و كـــل منا فيه شره على الثـــــاني وده لو يلمه ويحضنه و يبجـــــــــــي الدهر كله ....

نون النساء said...

فاطمة
خفّي على البنات شوي
ترا قلوبنا ما تستحمل
:""(

ترا بإحساسج اللي خلاج تكتبين.. كلنا إنتِ


يارررررربي مو حلو البجي من الصبح
يخرررب العيووون

:(

乂♥Not.ViRGo♥乂 said...

بصراحه حب حسافة ينتهي
عورني قلبي ..
شلون قلب فاطمة؟ :(((

7osen said...

حلوة النهاية

واقعية

لأنه كان حب حقيقي لازم ينتهي هالنهاية

Fahad Al Askr said...

أحلى شي بالبوست، إني قاعد أنزل مو هامني الحجي، بعد أول خمس سطور، المهم بس بقولك شي

لو شنو بتقولين، ولو شنو كتبتي ترى ما ردج لي

وعن الجمبزة، واللغوة الزايدة

lawyer said...

اخواني خواتي

لي عوده على التعليقات

بس حبيييت اوضح شغله و اعتذر منهااااا

وصلني ايميل تقولي صاحبه الايميل انها هذي ثاني مرا تدز ايميل و ما ارد عليها

ترا والله انا صج عندي مشششششكله في الجي مييييييل

والله ما احب احقر ايميل احد

و لا اتعمد ابداااااااا احقر اي ايميل واااااصلني

سامحوني اخواني او خواتي اذا احد منكم
يوووووووم دز ايميل و مارديت عليه
لان فعلا يكون ما وصلني

فعشان جذي
غيرت الايميل من جي ميل لي هوت ميل
نفسه اهوووو ما تغير
بس صار هوتميل


و انا واييييييييييييد اسفه والله مو قصدي



و بالنسببببببه للتعليقااااااات لي عوده من دوامي باجر الصبح انشاء الله

Nachla said...

تغطين وتردين بقصة قوية شذيه
يا سلام عليك

فريج سعود said...

السلام عليكم
اول مرة ازورج
والظاهر اخر مرة
شنو لعبتي باعصابنا
انا اول البوست حبيتج وكرهت مصعب
ونص البوست حبيت مصعب وامه وكرهتج
اخر البوست كرهتكم اثنينكم
و ورى هالتعليق كرهت نفسي
باي

darkness said...

صباح الخير

لوير و بعد هالنهايه شنو صار؟؟

لانه مستحيل تكون القصه خلصت على جذي

!!

lawyer said...

سمبر

صبااااااح الخير

خووو انت طول عمرك ما تقرا شي عربي
يالله بسسسس تعيب على بوكس الكومنت الي عندي

بس سلامك هذا يكفيني :)




الزين
حياااااااااج الله يا الغاليه
كرهتوني على هالقصه صح

طويله و نهايتها تعيسه




الغاليه هيفا
اشكرررج وايد على تعليقج
الاستقرار رحه بال و من فقد الاستقرار فقد راحه البال


حبيبتي حياج الله بيتج و مكانج
:))




استكانه
كانها الفرقا طلبتك حاجتين لا تعلمني و لا تكذب علي
صاااااااحبي باموت من كثر الحنين

;)

اشكرج وايد على تعليقج
الاروع من القصه

و اشكرج على كل شي

:**





نجمه
ببببببببببعد قلبي لا تكرهيني

بس ترا انا لما أكتتتتتب قصه مو دايماااا اخلى النهايات سعيييده

سامحوووووني

:*


بيرل
المغتربون اكثر ناس يعرفون

انا الي بسألج الحين
بشنو لهى انتي جاوبيني؟




محاااااااره
توووووووام مشاعري

حيااااااااج الله

وااااااي لما اقرا كلامج ليش احس اني قاعده اكلم روحي ؟؟
او نفسي تكلمني ليشششش؟؟

اشدرااااااج فيني
اذا انتي ماتعرفيني اشلووووووون تعرفين تقولين جذي عني

احبج تدرين؟



كويتيه
واااااااااااي ليش خسران
يمكن اهي خسرانه
شكااااااكه مينووووونه
بس تغااااار

اهي بقررررره طفششششته





منو ينسسسسسى

بعععععععععد قلبي
سامحيني

ووووووووووووالله ما قصدت في هالقصه ابجي احد

يسسسسس
فعلا كل من يروووووح
و يطالع الثاني
والود وده يقوووووله

بسسسس خلاص

ولكن لعلهاااااا خيره لهم اهم الاثنين

اهم شي اني مألفه قصه من مخي و اقول خيره لهم!






نون النسااااااء

مبيييييين ان ذابحني البرد و مكسرني
و مقعدني في البيت و مشغل احساااااسي
و أألف لكممممم هالقصص الي تشششلع القلب هااااا؟؟





نوت فيرجو
بعد روووووحي
الحلو فيه ان انتهى بالقمه

عشااااان حلاوته تظل

فاطمه بخير بس تقووول ماكو قلب
:)))




حسين
يا هلا فيك يالغالي

اشووووووووووووووة انها عجبتك

حبكتي كانت حلوة صح؟؟





فهيدان

واااااااااااااي
واااااااااااااااااي
واااااااااااااااااااااااي


انا الي الحين ببجي على عمري

انت سلمت علي بس سلااااام

تطشششششرت لابتوباتي
و العفسه عفسسسسه

هالدوور ياااااااااي عندي تعلنها لي على الملئ اني لك

تبيييييييييني ارووووووووح من جيسسسس اهلي؟؟؟


الخبله الي عندك بتسوي فيني عمليه استشهاديه و اطرششششششششني


ياحسسسرتي

شكلي بلبس بدله ضد الرصاااااااص من اليوم و رايح و السبه انت!!


وبعدييييييييييييين
انت من يقدر عليك
شبييييييييييي فيك!!


انا مردي حق واحد
وقف؟؟


انت وقف حق بنات الكويت كلها!!!!

وبعدين لا تزفني جدام الناس اشكره
انزييييييييين

برستيجي ما يسمح


خل الي بينااااااا سر
وداري على شمعتك تقييييييييد

:PppPpppPPP



نجله

هلااااااااا في الزين كله

اشووووووووووة بعد روحي
ياززززتلج القصه؟؟





فريج سعود

اذا قلت لك من الساعه 8 لي الساعه 10 و نص و انا مييييييييته ضحك على تعليقك
ارووووح ارووووووح و ارد عليه

ياااااااربي صج انت رفيييييج فهد العسكر

نفسسسس الاسلوووووب
ليش دااش تززززززفني
هههههههههههههههههههههه

كرهتج انتي و مصعب

تبي اخليييييييك تكرهني اكثر و اكثر

لو تدري ان القصه من وحي الخيااااال

و اني مألفتهااااا من مخي

و اني ماوطوطت امريكا من 9 سنيييييين

لووووووووووووووووول

عسى عقالك مو براسك؟؟

لوووووووووووووووووول

ماني قادره



و ورى هالتعليق كرهت نفسي
باي

لوووووووول
:))



داركنس
صباااااااااااح الورد

ماصار شي داركنس
كل من مشششت فيه الدنيا و راح

خلصت القصه خلاااااص

صدقيني خلصت

PearL said...

انا اقولج بشنو لهى

بالغربة الواحد يخترب بسرعة

واهوه حياته بغربته كله معاها ومع امه

كان مكرس نفسه لهم

بس لما شاف الوضع تغير لما غير الولاية
عجبه ان عنده حياة ثانية

نسى

Brilliant said...

من أجمل ما قريت على المدونات عن الحب
اسلوب حلو و خفيف و يدخل القلب
تحياتي لج

qesat_5ayal said...

هي تعبت
والنفس عزيزة
!

اجار الدين كشمش said...

فطووووووووم فطيييم

نعااام...نعاااا م

ش اللغوه مع هالصبيان ..الناس
ليل ..من تحاجين اسمع خرخشه
بدارج ..شنو ناط عليج فهيدان ؟

لا لا لا قاعده اتيدد حق صلاة الفير

انت اشقاعد اسوي ...هذا باب الاسنسير مو الحمام ..انت توك ساري ؟..مووو شغلج
يالله يالله ذلفي روحي طسي نامي
لا سوقج كف
ان سمعتج اتحاجين ولد العسكر
لا اوريج اشلون الشغل

روووح نااام بس ..لا طيح وانت تركب الدري
فطوم ..لا تعلمين احد باجر الصبح
وانت بعد سد حلجك ..فهيدان مايقدر يشعر الا بليل .. وانا قاعده اساعده
والشعر مايي موده الا في بيتنا
شنو ..احنا لا يدنا المتنبي
قمالله

Brilliant said...

توني اقرا قصتج عدل و افهمها
صج مؤلمة و الله يعينج على البريك أب
بس متأكد انه راح ترجعون.. شدة و تزول إن شاالله

lawyer said...

بيرل
مو بهالسهووووله صح؟

بريليانت

مشكوووووور وايد
حياااااااك الله

تشررررفت في وجووووودك
و مشكوووووور وايد على اطرائك

اتمنى انك استمعت فيها :))


قصه خيال
حيااااج الله منووووووره

بالظبط
قلتيها
و يبتيها صح
:))))

حاسه صح ؟



اجاااااااار

انا ماااااااااالي شغل
اناااااااا قاعده بريحاااااااتي

ماعلي من احد

اهم يعيلوووووووووون على

ييبااااااا الله يعااافيك
لا تسوي في الريال شي


خله يرووووووح

و انا ماني قاااااااااايله لاحد

لووووووووووول

و هذا ولد العكسسسسسسسر

ماني محاجييييييته
خلاص بليييييييت اذااااااااني


يااااااااااربي شالحاله

كل من بطوووووورق من صوب

ههههههههههههههههههه



يااااااااااا حبي لك يا اجاااااار
لو بس اكو منك اثنييييييييييييين والله

Lovely_Lady said...

وااااااااااااي يضرب الحب شو بيذل

تدرين فكرتها قصتج الشخصية وكنت توني بعصب عليج لكن يللا مسموحة هالمرة لكن فعلا عيشتينا جو القصة وافتكرناها حقيقية ^_^
ما شاء الله عليج مبدعه قط فكرتي تنزلين قصص بالمنتديات؟ تربحين ذهب << حلفي ههههههههههه

Selezya said...

لوول ويع ماحبيت لا البنت ولا الريال
غثوني
اللي بط جبدي شكو تزعل لما راح
خيروح شنو يعني اصلا وناسه لوول

karma said...

:(( عورتي قلبي.
-
والله بطة كبد!
خاطري مرة أشوف أحد يحب و مبسوط.
وليش كله الواحد ما يدري اش الي صار، بس يلقى نفسه طايح من سابع سما لسابع أرض. تدور هالجملة من "فوضى الحواس" لاحلام مستغانمي هاليومين في بالي : (مأساة الحب الكبير أنه يموت دائما صغيرا!)
قهر وربي.

AseeL said...

اللي يحب ما يترك... مهما صار...

اللي يحب يقدر يجتاز أعتى الجبال ويتخطى كل المصاعب...

بس مصعب هذا مو شي.. شكله كان يتسلى وحيد ويبي ونيس..

كلمة أخيرة... ليس قدرها... فللأقدار لعبة تلعبها مع قلوب البشر

vancouver said...

لوووووير
يا لوووووووووووووير
شوفي قريتها من اول ما نزلتيها بس
ما علقت لاني ما فهمت شيء
ولما اليوم قريتها مره ثانيه هم مافهمته
اشلوووون اكو رجل فيه كل هالحنيه والوفا لامه وببساااطة يقلب ويكشت باللي يحبها
ماااااااااااااااااا ترهم عندي
لا لا موواقعيه
ما اصدق
وحدة من الثنتين
يا نذل وهي مسكينه صدقت انه كان حب حقيقي بس اهو عارف بينه وبين نفسه انه في شيء ماراح يكمل بقصتهم لسبب ما
او انه مستحييييييل يكون حنون على امه
صدقيييييني اللي فيه وفا وخير باهله
هذا اكثر انسان تثقين فيه انه عمره ما يخون
الا اذا فيه سبب فوووووق القاهر
فطوووووووووووووم
يالله يالله اهوووو كتبي
جزء يديد
قولي انه رجع
والا
اثووور في مدونتج
لوووووووووووووووووووووووووووووول