Grosvenor House part 1

Grosvenor House

فندق الحب
فندق الخطايا
ومن منا بلا خطيئه..

افتح عيني الصبح
احاول اشوف الساعه من شاشه التلفزيون
الساعه 8 ونص ومازالت الشمس ناعسه
او الغيوم مدللتها ..
افتح الستاير
اخذ الاي فون اشوف درجه الحراره الحين في لندن
انصعق -1 و راح يطق مطر ...
اسوي قهوتي
ادندن
افتح باب الغرفه
اخذ جريده من الغرفه الي يمي ..
اطلب ريوقي و اخذ شاور
اتريق مع الجريده ..
اخطط ليومي من وين راح ابديه...
امسك كوب قهوتي الساخن
اجابل المنظر ..
باصات
وناس تمر
شارع مزدحم
و ناس تمشي في الهايدبارك..
اخذ نفس عميق و اتأمل المارة
اتمنى اني لو كنت عايشه في لندن مثل هذيك المرأه الي نزلت من الباص
او ياريتني مثل هذيك البنت الي قاعد تركض مثل الطير الحر
أ هي حره فعلا؟ ام تركض هروبا من شي مثل ما انا دائما اهرب الى هذا المكان ..

صوت مسج وصل
افتح المسج
وللاسف اعلان من سنتر بوينت يعلن عن التخفيضات
اتصل على الكويت .. للاطئمئنان على ابني ..
وبصراخ و عجل يرد ..
هو: منووو
انا: انا ماما .. حبيبي اشلونك؟
عزيز: يما متى بتيين البيت..
انا : بعد 3 ايام حبيبي .. انت اشلونك زين.؟؟
عزيز: يعني اشكثر انام و اقوم؟؟
انا : يعني تنام و تقوم و تنام و تقوم بعدين اييلك..
عزيز:بس اذا يتاي نقعد هني مانبي نروح بيتنا
انا: انزين .. شنو تبي من لندن ؟؟
عزيز : ابي كل شي كل شي
انا : وين اختك ؟؟ اشلونها داير بالك عليها؟
هو: والله ماااااااطقيتها اهي تبجي بروحها
مليقه مانبيها يما ..
انا: ليش طاقها اعترف شنو مسويه؟
هو: يما اهي بس تبجي وانا ما احب الي يبجون... فأطقها
عشان اتأدب .. يما انا قاعد اربيها
انبهر من وين اييب هالكلام و اسلوب الاقناع الي عنده اكتم ضحكه و يعورني قلبي عليها

انا : انا خلاص زعلانه وايد منك و لا يمكن اسامحك لانك مو قد الثقه
انا قلت لك انت ريال و انت كبير بخلي اختك عندك تقوم تطقها .. افا الله يسامحك انت اذا صرت كبير الله ما يعطيك شي لان ما تحافظ علي اخوانك ..
هو: باي باي باي بروح العب

حذف السماعه و راح ما اعجبه الكلام
اسكر الخط و اقعد اضحك على براءه الاطفال ..
من علمهم اسلوب الاقناع و الحيله
من علمهم الهروب من المواجهه و اذا سمعوا شي ما يحبونه يتهربون
مرات احس اني انا اتعلم منهم مو اهم المفروض الي يتعلمون مني ..

اتصل على السبا اطلب منهم موعد في اخر ساعه قبل لا يسكرون
استعد للطلعه
اوراقي
فلوسي
واطلع الخرده الي تارسه البوك و احطها بالطفايه حق الهاوس كيبينج
البس الترينش كوت
واتعطر
احط علامه التنظيف
اسكر الباب و انزل

من احلى المناظر في هذا الاوتيل التي روم الي تجذب الكل
حتى وان كنت ماتحب الشاي هذي التي روم غير
اطلع و عند الباب احتار اروح النايس بريج او المارليبون ؟
اتوكل على الله و ابلش في المارليبون قبل لا يصير زحمه ..
اتجه يسار ادخل صوب الجروفنور سكوير
اتذكر هالمكان و الناس الي كانوا معاي فيه
اتذكر من سنه كنت سعيده في الحديقه مع ابني و لعبه مع الصغار
تمنيت فعلا وجود عيالي معاي في هاللحظه
اوقف
اتلفت يسار
اعبر الشارع
اوقف مره ثانيه و التفت يمين و اعبر
وفجأه وللمره الالف
اخطر غلط في لندن
اخترع من الموقف و السياره المسرعه
اوقف التفت على الشارع و احمد ربي

صوت يناديني ..
حصه ..حصه.!
التفت عليه مخترعه
انا: بسم الله ..
هو: عسى ماشر اشفيج.!؟
انا: ابد سلامتك بس عبرت غلط ..
هو: اشلوونج واشلون العيال ..
انا: الف الحمدلله انت اشلونك و والاهل اشلونهم؟
هو: بالف خير .. عاد توني شاايف بو عبدالعزيز في شرشل..
انا : امثل ابتسامه صفراء و اقوله .. اي كاني بروح له ماتشوفيني مستعيله تأخرت عليه .. (( ابتسم بجرح كبير)) و اختم الحوار الي ما تمنيت بدايته ابد

.. انشوفك على خير ..

انهد حيلي من سمعت الطاري
اقعد على حافه سور و استرجع كلامه
بوعبدالعزيز في شرشل ..
في لحظه تتغير كل خطط يومي و انسى ليش انا هني في هالشارع
اتسلل بكل هدوء اسحب وراي بقايا امرأه تبحث عن ماضي كان مرسوم بلوحه جميله الى ان اتى متطفل ,, وكسر البرواز ..
امشي صوب البورتمان سكوير وانا خايفه و ادعي ربي ان ما يشوفني ..
اسرق النظره .. من بره
اتأكد عدم وجوده من ورا الجام
احاول ادور عليه من بعيد ..
ما اشوفه
احاول ادخل و اتردد ..
مابي يشوفني ومابي ابد يدري اني هني
بس ابي اشوفه
لو من بعيد ..
شي فيني يبي يشوفه ..حتى وان كنت مابي اكون وياه
ادور عليه في اللوبي بكل هدوء
ما الاقيه..
شعور عميق بخيبه امل
ليش اهو اهني وانا ما اقدر اشوفه
ليش من شوي شافه رفيجه وانا ماشفته
اطالع و من ورا الجام
شفته !
اي شفته
كاهووووو في البار
شفته في البار
قاعد ..
اطالعه من بعيد و ابتعد اكثر عشان ما يشوفني و انا ادري اني في زاويه يستحيل انه يشوفني فيها ..
اطالع الساعه 11
انصدم الساعه 11 وفي البار !
اراقبه من بعيد
مشغول هو في موبايله
وانا اشوفه من بعيد..
لا شعوريا نسيت كل شي بالدنيا و تمنيت ان انشق نصين
نص يبقى بكرامتي و نص يرتمي بحضنه .. يقوله حياتي بدونك هلاك...

اكثر من نص ساعه و انا مجابلته اشوفه
ما تحركت من مكاني حتى البرد نسيته ..
يأشر يطلب الشيك
ابتعد شوي
استعد اني اكون بعيده بس احتار وين اروح ابي اكون في مكان ما يشوفني بس انا الي اشوفه..
شوي يطلع من باب الاوتيل..
ويمشي ..
وانا واقفه اشوفه من بعيد..
يمشي صوب البنك الوطني ..
يسحب
و يروح سلفرج ..
يدخل و اتأكد من ان محد يشوفني و ادخل وراه..
يتمشي بكل هدوء
يتلفت بطريقه الامباليه كالعاده
يدخل محله المفضل
HERMES
وانا منخشه ورا فترينه للمجوهرات
بس عشان لا يحس فيني ...
تدخل فتاه خليجيه ..
تلعب في شعرها
يلفت نظرها طوله او يمكن شكله
تحاول تلفت انتباهه في وجودها
او انا بس الي اعتقد هالشي
اتكلمه
يلتفت عليها
وانا احترق ابي اعرف شنو قالها
تبتسم
واهو يبتسم
وانا ودي اذبحه
حقيييييييير
انت حقيييييييييييير
البنت ما اتعطل وياك بثانيه ..
اراقب اكثر
تقاطعني الي تبيع و انا انسى و اكلمها كويتي
و اقولها ذلفاي عن ويهي

البنت انكسرت من التدلع
واهو واقف ولا يتحرك
تعابير ويهه دائما مثل هالتعبير
ما تبين ابد اذا كان سعيد او عادي
راضي او مستانس
يتلفت اهو و يكلمها
يطلعون ويا بعض ..
اتخيل ان قالها امشي اعزمج على قهوه
وين بيروحون !!
اعصب زياده
اتوتر
امشي وراهم..
يطلع من الستور
يروح صوب البورتمان سكوير وياها في كل هدوء
حقيييييييييييييييييييييييييييييييير انت حقيرررررررررررررر
حاولت الف مره اعرف شنو الحوار الي بدقيقتين دار بينهم و خلاه يطلع وياها يروح صوب الاوتيل
واحاول اجذب نفسي ان مو رايح صوب الاويتيل

حتى وان كان يخوني مابي اشوف صج انه يخون
مستحيل الي يصير جدام عيني
يستحيل
ماكو بنت تطلع ويا واحد بدقيقتين ..
ازيد من سرعه خطواتي
قلبي يرقع
واهو يتمشى وياها عادي ..بابتسامته و غموضه
اسرع اكثر
بيني و بينه ميتين متر تقريبا
يدخل الاوتيل
يروح وياها صوب الاسنسير ..
وانا اطالع من بعيد
يوصل الاسنسير
اسرع
قبل لا يسكر
ادخل معاهم ..

يتبع