Grosvenor House part 2

ادخل الاسنسير ولا احط عيني في عينه
ولا كأنه موجود
اهو يمي و اهي قبالي و معانا شايب و عيوز
الشايب و العيوز اعتقد انهم فرنسين من اللهجه
لوحه الارقام مضغوط عليها رقمين الدور الثاني و الدور الخامس
ومدري اي دور فيهم دوره ..

فجأه ماحس في نفسي و قلبي يرقع اكثر من اي احد
وجني انا الي وياي واحد مو اهو الي وياه وحده..

اول ما تسكر الاسنسير ..اتعبث في جنطتي كأني بطلع مفتاح الغرفه و تذكرت ان مفاتيح اوتيلي غير .. واهني كارت ممغنط..

عطيتها نظره و قلت لها : الريال الي معاك زوجي
والغرفه الي بتدخلينها غرفتي .. واعتقد ان الي قاعد يصير
جريمه خيانه

وقف فينا الاسنسير في الدور الثاني و نزل الشايب و العيوز..

بوعبدالعزيز ساكت
واهي بكل ربكه تطالعه تنطره يقول شي او تنطره يرد علي

ردت علي : سوري معليش بس هو ماقالي..

انا: مايمديه يقولج شي ..مسرع ماشافج في بوتيك ارمي و طلعتاي وياه..

اهو نزل راسه وقمت ابتسامه..

انا اطالعه و احط عيني بعينه اقوله :صارلي اكثر من ست شهور و انا متردده في موضوع انفصالنا و قبل لا انام يومياا اقول يمكن انا ظالمتك في شي اويمكن انا غلطانه في شي بس دامي شفت بعيني ..فانا الحين مرتاحه..

ينفتح الاسنسير ..
البنت تطلع ..وتتعتذر عند الباب انها ابد ماتدري انه متزوج
وانا اقولها مالا داعي تعتذرين انتي ماتدرين..

تمشي البنت بكل سرعه واعتقد انها ودها الارض تنشق و تبلعها

وظلينا انا وياه نشوف البنت تمشي بالممر .. و عرفت بعدين انها ساكنه في الدور الخامس..معاه في نفس الدور..

بصراحه اول مره اخاف منه لهذي الدرجه
او في الاحرى اخاف من رده فعله
مدري اذا كان وقتها بيسكت او بروح ورا البنت و بخليني مدري اذا بزفني جدامها او برد عليها .. كل هذا ماحسبت حسابه
لان رده فعلي اصلا يت عفويه..

هو: اندش الدار وايد احسن بلا فضايح جدام الناس..

انا: مابيني وبينك شي انتكلم فيه عشان ندش الدار..احنا متفقين على الانفصال و خالصين..اصلا انا ادري انك كلش مو معصب على سالفه البنت ..اهي اصلا مو تايبك ..ولا انت تعبان فيها..

هو: من متى انتي وراي؟

عرفت الحين ان راح يفتح وياي حوار طويل عريض.. وبيعطيني ويهه انه بتفاهم وياي .. و انا من داخلي ادري انه راح يفجر علي يومي كله بالغضب و ماراح يطوفلي السالفه ابد..
اهني اختلطت علي المشاعر.. احتريت من نفسي و احتريت على عمري
واحتريت منه اكثر.. حره المنظر الي شفته وياها .. شي كان يقتل
اشلون انا من داخلي رفضت و تبعته و تصيد له حرني اكثر
تخيلت لو اني ما دخلت الاسنسير .. وقته يكون وياها الحين..
لاشعوريا دموعي بدت تنزل و اكابر ..

انا: من يوم كنت تحت في البار ..كنت واقفه اشوفك لانه بدر قالي انه توه شايفك و مسلم عليك..
فييت اشوفك من بعيد..شوي والا تطلب الشيك.ماقدرت اروح ولا قدرت اكلمك. و مشيت وراك لي الوطني و بعدها محل ارميه........وكاني واقفه الحين وياك و ياريتني لا مشيت و لا ييت وياريتني ماشفتك اصلا.. لاني انا الي بتعب مثل كل مره
وانت الي مرتاح ..

هو: حصه ..الممر ما ينفع ..
انا : و انا اشوف جذي بعد ..

نمشي بالممر انا جدامه و اهو وراي ..
وانا اكلمه ..

انا: والله تعبت من هالاحساس الي متعلقه بين السما و الارض
تعبت من تناقضك و تعبت من تصرفاتك
طول عمري ادري انك تخوني و كنت اطوف و اسكت و اقول ادري يحبني ..
طول عمري ...

يقاطعني : هذي غرفتي ..يفتح الباب..

التفت عليه: علي !! طول عمري اسافر معاك .. طول عمرك ماعندك اي انترست في السويت و كلا انا الي اعصب و اسوي ابقريد و نسكن في سويت !! يوم سكنت بروحك حاجز بسويت !!!

يهز راسه ..مستنكر سؤالي في هالوقت..

هو: مو انا الي حاجز لا الاوتيل و لا التذكره و لا اي شي .. الديوان مسويلي كل شي .. ..

جسمي كله يرجف من الحره .. دموعي تتسابق مع بعض..
واثار جروح لم تندمل فقط تغطت بملح حارق..

مرات من القهر و الحره الانسان ما يقدر يتكلم لانه ما يقدر يقول الي في باله و لو تكلم بجى اكثر و انا مابي ابجي اكثر ابي اطلع من هالدار راسيه على بر

امساك بمعروف او تسريح باحسان...

التفت عليه و انا امسح باجي دموعي و اقوله : والله العظيم و انا ادش الدار قاعد افكر في شي واحد اشكثر كنت مرتاحه في الست الشهور الي افترقنا فيها ..ليش مو راضي تقتنع اني طاقه و انك هلكتني خلاص ماعاد فيني لا الحب و التحمل الي انت تحتاجه..

اقعد على طرف الفراش و اكمل و اهو قاعد قبالي..

انا : بس خلاص .. مابي ارد اعيد العشر سنوات الي وياك مثل اول

تخيل اني مو موجوده قبل ساعه جان في وحده مكاني في هالفراش الحين..
ولا ابي اسألك و لا ابي اعرف شي عنها و منو اهي ..

هو يقاطعني : لا تسألين لاني فعلا ما اعرفها و لا اعرف حتى اسمها..

قولي الي في قلبج و بعدين اقولج قصتها..

انا : قلبي فيه سؤال واحد؟ دامك متعلق في الحريم و المشروب ليش متسمك فيني؟
شنو سبب وجودي معلقه في حياتك و لا تبي تطلقني اذا انت مثل ما انت ..
تعبت اعيش و انت تشرب و انا احس ان ربي يلعني كل ساعه لاني وياك
وتعبت اعيش يوم و ثاني بالخيانات

انا وياك شهر زينين و 6 شهور عذاب..
عطيتك من عمري 10 سنين و قبلها سنه مو كافي؟؟
ما يصير اروح اعيش باجي عمري مرتاحه..؟؟
اشباجي من العمر بصير عمري 40 بعد جم سنه..
وانت قزر عمرك و لا عقلت .. متى بتعقل .. ؟؟

متى بتحس ان الدنيا خلاص مو كلها وناسه و لعب و بنات و خيانات
متى اتحط راسك على المخده و تقرر قبل لا تنام ان بسك لعب وانك عندك عيال و انت مسؤل جدام الله فيني و فيهم
كلكم راعي و كلكم مسؤل عن رعيته .. و انت راعي ناسي رعيتك..
معذبهم .. انانيتك ذابحتك ..
عبالك الدنيا فلوس و دام انا مو مقصر وياج في شي خلاص ..
انت مقصر ويا نفسك وويا ربك لما تعرف ربك عدل بتخاف الله فيني..
بيصحى ضميرك يوم ولكن انا بكون وقتها مو عندك
صج الكل ضد طلاقنا و لكن لو توصل السالفه المحكمه يمكن ادشها بس ارتاح ..

اقوم من مكاني ادش اغسل ويهي لاني صج تعبت ..

يدش الحمام يغسل الغلايه .. و يترسها ماي بارد..
و يغلي الماي .. يسويلي كوب شاي .. ويسويله بلاك كوفي
وانا ساكته اطالع الارض ..
يمسك كوب القهوه و يطالعني ..

هو : اعطيج اياها من الاخر؟؟
اطالعه ..
هو: والله يا حصه لو على رقبتي .. طلاق ما راح اطلقج ..
بتحطين محامي بتحطين اهلي بتحطين الي تحطينه .. طلاق موعندي ..
يسألني .. خلصتي الي عندج ؟ تسمعيني بس ما تقاطعين
اسأله باستنكار .. اشبتقول ؟؟ شنو ممكن شي يعطيك سبب انك ما تقدر تريحني لا في وجودك ولا في بعدك..
هو: حصه حصه؟؟ سمعيني ..
الحين شنو سبب انفصالنا من ست شهور والي خلاج خلاص بتطلقين؟؟

اسكت ما ارد لان مالي خلق افج السالفه من اول ويديد لاني ادري ان هذا المخلوق ماعنده مانع ان يقعد 3 ايام يعيد و يزيد في سالفه وحده بس عشان يطلعني انا غلطانه بالنهايه...

شوفاي حصه محد بهد هالبيت الا انتي .. ولا احد عفس حياتج وحياتي الا انتي ..
من يوم ما غيرتاي ربعج و من يوم ما اذيتينا في سالفه تشرب ما تشرب..

تعاليي قوليلي .. فجأه عقب عشر سنين يايتني طلقني .. ليش؟ لاني ما احس اني حققت هدف حق نفسي !!
اي دكتور مينون داشه دورته قاص عليج بيهدم حياتج عشان شنو ما احس اني حققت هدفي !!
يوم صار عمرج 35 سنه يايه تقولي هالشي !!
من 15 سنه كان كل حلمج انتزوج و كانت كل اهدافج الزواج ..
تزوجتاي و يبتاي عيال و احسن بيت عندج و احسن وظيفه احسن سفر
احسن عيشه عايشتها.. بسسسس عشان رحتيلي دورات و خرابيط و اهداف و مااهدف
انتي الانانيه يوم مليتاي من البيت و الريل و العيال و صار كل شي عندج خلاص حسيتي انج ما حققتاي شي !!

كل يوم و الثاني مسويتلي صيحه انت تشرب انت تشرب..
انا اشرب قبل لا اعرفج
ليش خذيتيني ..؟ والا قبل عادي بس اهم شي اتحققين الي في بالج و تاخذين الي تبيه و بعدين يصير خير
انتي مزاجيه كل يوم افكارج اتغيير و تعال يا علي جاري افكاري
انا من عرفتيني من 15 سنه وهذا انا ما تغير فيني شي
انتي الي كل يوم تبين اتغيرين .. وتغيريني معاج ..
وتدرين اني ما راح اتغير..

غيرتاي دوامج جابلتي هالبنات الي خربوج .. يايتلي كل يوم تصيحين لعن الله جالسه و لعن الله جالسه .. الحين الله بيلعنج ليش صابره على ريلج ؟ بس قبل مو ملعونه على انج تبين تاخذين ريل يشرب؟؟
انزين قبل لا تحاسبيني انا حاسبي روحج .. والا الدين على انا بس

و قعدنا اكثر من اربع ساعات كل واحد فينا قال الي بقلبه
ولا وصلنا لحل ابد..
اهو في قناعه نفسه انه على حق ..
وانا على يقين اني على حق لاني تعبت من الصبر على زوج و ان كان اب زين و ريال زين بس معاي انا زوج متعب..

انا: علي انا تعبت وراسي يعورني..

والله والله ادري و اعرفك عدل لو بقعد لي باجر وياك بتعيد و بتزيد بنفس السالفه و انا كل مره ينهد حيلي منك و ارد اصير طبيعيه وعادي بس لاني اقتنعت انك مظلوم و توهمني اني انا الغلط وانت الصح و لان في كل مره تسويلي فيلم انك بتسنع و انك ما تلجأ للغلط الا هروبا مني و اتشككني بروووحي اصلا.. و اصدقك

بس الحين طراقات عشر سنين اعتقد خلاص تعلمت منها و اي شي بتقوله ماني متحمله اسمعه ولا عندي استعداد خلاص
انا واضحه .. انت موناوي تتغير و انا مابي اعيش وياك بطبعك الي بالنسبه لي عيب .. في نظرك ان انت واو و انك عطيتني بيت و عيال و حياه وايد زينه
بس في النهايه كل الي عطيتني اياه ماسببلي لا السعاده و لا الاستقرار
يكفيني انام مرتاحه بدون تأنيب ضمير و محاتات لك..

هو: انتي تغيرتاي وايد و مو انتي حصه الي اعرفها..
انا : الحمدلله اني تغيرت ..انت ما تتصور اشكثر اجاهد نفسي على اني اتغير
واذا الدنيا نجاحها بس انت فانا راضيه بالخساره ...

استعد للخروج واهو يحاول يفتح معاي اكثر من موضوع
و يسألني اكثر من سؤال بس عشان يعرف شنو نهايه المطاف؟

انا: علي الله يخليك اذا اتحبني صج خلني اعيش باجي عمري مرتاحه
ابي استقر مع عيالي عشان اربيهم صح ..انا ادري ان في حسابات خلق الله بكون خسرانه لو تركتك بس انا حسبتي مع ربي .. وعندي ثقه بالله دامي تركتك عشانه ولا رضيت بالحرام.. بعوضني ربي خير..

اسكر الباب وراي و اخليه

اطلع اروح اشرب قهوه في جيمس ستريت
ارجع الاوتيل
اخذ شاور .. اريح
انسدح لي موعد السبا ..وبعدها اسوي ريلاكس مساج و اكل بندول نايت وانام..
اقوم الفير .. على مسج من علي

يا ناعـس الطـرف خـل مواصلك منـا
واعرف حالات الهـوى وصـل بلا منـا
لا تقـول منـا وانا قـول الـدرب منـا
أخاف حسـودي يفـرق شملـنا وهلـك
تشمت بنا الناس خلق الله وهلـي وهلـك
مـا دام وهلتنـي واجـب انـا وهلـك
ليما يدور الفلـك نقضـي الوطـر منـا

ابتسم و اقوم اغسل ..
ارد الاقي التلفون يرن
ما ارد .. لان المتصل بوعبدالعزيز..

ادري فكر بالكلام و ادري ضاق خلقه و حس ان الفراق اهو الي بيننا واجب..

اقعد في الغرفه باجي اليومين يادوبك انزل تحت اللوبي

وفي التي روم استرجع شريط حياتي معاه و في هالفندق في الذات
في هذا الاوتيل تعرفنا
تصادفنا..
و في هذا الاوتيل قضينا شهر عسلنا
وفي هذا الاوتيل كنا دايما نختلف
في هذا الاوتيل عشنا احلى الخطايا و سرقنا من وقتنا الذ المتع
كانت اهدافنا بسيطه .. نلتقى في الطلعه و الدخله و نركب الاسنسير مع بعض
كنا نعيش احلى حب بالعيون
وكنا ننطر بعض عند الباب..
كنت اخلص السوق من اهلي بسرعه عشان ارد الاقيه ينطرني..
كنت اقصى ما اتمنى ابتسامه..اتحسسني في رغبه هذا الانسان فيني..
كانت اهدافي بريئه .. وكان اهو سعيد في تحقيقها لي..
اصحي من ذكرياتي.. و اتذكر ان من سنين خلفت وراي هني شابه كانت تحلم بالسعاده مع انسان .. و ردت بعد عشر سنين واهي تحلم بان تتخلص من هذا الانسان

اكمل كوب الشاي الي بديته و لا نهيته لانه برد..
اطلب تغيير الشاي..
يرن تلفوني ..
" بوعبدالعزيز "
انا : الو
هو: وينج؟
انا : الاوتيل ..
هو: ايييج؟؟
انا : لأ ماله داعي الحين ماشيه برجع الكويت..
هو: انزين اوصلج المطار.؟
انا : وياي البنات.. ماله داعي
هو: على راحتج..مابي اضايقج..بس بقولج اني فكرت في كلامج..
الي تبينه بسويه .. بس على شرط.. عطيني فرصه اخيره
رداي البيت عيشي في بيتج ويا العيال وانا بروح اسكن في شيك
قعداي في البيت .. البيت لج انتي و العيال و كل شي لج .. بس من غير طلاق
واوعدج لا بتشوفيني ولا بطب عليكم ولا راح اييكم والبيت لج
وعيالي طرشيهم لي مع السايق العصاري او في الويك اند لي الله يهديج
واخذاي وقتج.. سنه
ست شهور
سنتين.. ماراح امل .. وكل الي تبينه بسويه.. بس طلاق مستحيل
انا ما اقدر اعيش بدونج.. ولا اتخيل حيات انتي مو فيها..
انت يا حصه... الدنيا .. احد يشبع من الدنيا ..

رجعت الكويت
رجعت بيتي بدون علي..
وقعدت افكر جم شهر
لتحقيق اهداف دنيويه عاقني علي بتحقيقها
واكتشفت بعد جم شهر ان اهدافي متحققه وخالصه
وعرفت حقيقه وحده ان ليس كل ما نسمعه يمكن تحقيقه بحياتنا
وان احنا فقط الي انحدد شنو نبي..
واكتشفت ان اهدافي الباجيه في الحياه لا يمكن ان تتحقق بدون علي..
وان مهما كان زوجي به من عيوب.. فيكفيني انه يحبني و يكفيه بعدي عنه سنه
واني اذا ابي علي يترك الي يتركه و اغيره .. لابد اني اكون معاه لان البعد مامنه فايده
وقررت الرجوع الى بوعبدالعزيز...

انا : عزيز ..
عزيز: يس ماما..
انا : و صمه .. قول نعم يما..
عزيز: و صمه نعم يما..
انا: منو يايب هذا البوكيه؟
عزيز: بابا
انا : ليش ؟
عزيز: حقج يقول توداي يور بيرثداي .. وانا قلت له حرام
انا: وانت شكو !
عزيز: يما انتي تقولين حرام..
انا: اي مو شغلك .. ...
عصب عزيز و راح..
اناديه...
انا: عزيز..
عزيز: صمه نعم يمه

انا: دق على ابوك خيينا على العشا..

:)