Thursday, February 09, 2006

يوميات شاب كويتي

اعرفكم بنفسي
انا عبدالله ..عمري 32 سنه
مهندس اشتغل في شركه البترول .. قسم التسويق
شاب كويتي طموح متخرج من امريكا
و قاعد اكمل دراسات عليا في اداره الاعمال
يومي يبدي الساعه 6 الصبح ..اذا وراي شاور و تبدل و يبدي يومي الساعه 5 و نص اذا وراي حلاق
اقوم من الصبح في هالشتا و اكلم وسادتي الخاليه و اتمقط شوي
اشوف موبايلي الاقي مسج من صديقه قديمه لي
تقولي صباح الورد عبيد
اشلونك و شخبارك
انشاء الله مرتاح حبيت اسلم عليك و اسأل عنك
احط موبايلي على كتر
و اقوم واشرب ماي
اخذ باكيتي ولاعتي
ادخل الحمام
اخذ شاور
ابدل و اخلص
انزل الصاله اتصفح الجريده على عجل و اخذ كوبي و اروح احرر سيارتي
بصوت عالي .. كومار ..راجو .. يالقواد وييييينك موقايلك غسل سيارتي من الصبح انت شتسوي !!! ماعندك الا سيارتي انا من الصبح
يقطع الزف رنه التلفون
الووو .. فرح لحظه شوي اكمل زف ..
.. من بعيد صوت من الموبايل
بسم الله يا الله صباح خير عبيد اشفيك حاط دوبك دوب الصبي
.. اخووووووو اللذينه هالقواد عيزت افهمه اقوله عن السياره و اهو نايم
من الطرف الثاني ..
ويييييييييييي اذكر ربك خيولي ماعليك منه
..اوكيه انتي وينج الحين؟؟
بالطريج رايحه الشغل
قطيتي اعيالج الحضانه ؟؟
لا خليت ابوهم يوصلهم
اهااا اوكيه
.....
ادخل الباركينج
اركب الاسنسير
اروح مكتبي
افتح الكمبوتر
اجيك شغلي
ايميلي
اشرب قهوتي
اتناجر ويا اللبنانيه الي في مكتب المدير
الساعه 10 اتمرني زميلتي
نفس القصه كل يوم اهي و ريلها
الساعه 11 بخور
الساعه 12 صلاه
يالله اقزرت يا عبيد كلها جم ساعه و ترد البيت
يرن التلفون
هلا فرووح
اي والله حدي بيزي اكلمج بعدين
اخرطي لا بزي و لا شي بس مالي خلقها
يرن التلفون الداخلي
ولين ميتينج هالحزه
ياكره هالمدير ما يتسلط الا بعد الساعه 2 لما ما يبقى شي على الدوام
اطلع من الدوام الساعه 4 الا شوي
اروح الجمعيه اشتري جريده الحياه .. و اشتري باربيكان ..زقاير ..
كيت كات ..
التفت يمين و الا حمود العور يدز عربانه و معاه ياهل و مرا
اجيك على مرته ؟؟!!
و الله مو هين
حمود العور صار عنده مرا و اعيال
و انا طايح حظي للحين مو لاقي!
اتجه صوب المحاسب يفز قلبي على وحده
ياحليلها جنها حليوه !
اتهقى يا عبيد ايي منها؟؟
يالله اشورانا
جود تظبط
اوقف وراها اطل في سلتها
شغل كلا لوفات
اقول بقلبي يحليلها لا خوش صحيه
شنو هذا الي ماخذته
شامبو ...للشعر التالف المصبوغ المجعد ؟؟
بل انحااااااااش عنها ناقص اهوله انااااا!!!
الف ويهي الصوب الثاني
طاف من امه
اركب سيارتي
نفسي خايسه
ادخل كراجنا
اصوت على الخدامه
اتي تركض اتحط غداي
اتغدا اصعد فوق اتسدح على امل انام شوي
اقلب موبالي
مممممممم فروح ريلها عندها
حصو مليقه
يبيييييييييييييييله دلول اتعيير علي بصوتها شوي
ادق عليها
قوه يا كيكه ..
شخبارج اشلونج
مادقيتي علي..
ولهان عليج
اشقاعده اتسوين ؟؟
يالله نوميني ..
.......

اقوم من نومي
اروح الصاله
اتحرش في الوالده شوي
يمااا..يماااااااااااااااا
مريوووووومه الحلوه
هذي مريومه اميمتي
يازينها
اشعندك عبيد اشتبي !!
يمااااااااااااا لقيتيلي مراااااااا؟؟
انا لقيت لك مرا ؟؟
انت تبي مرا
انت بس تبي تتمنظر على بنات الناس
مفشلني ما بقى بيت ما دشيته
عشانك و كلا مو عاجبك
و تشتغل اسطوانت امي كل يوم
الي كبرك اعيالهم طولهم
و .......الخ
ادق على قتووب
ها وييينك
يالله مرني انروح القهوه
لا اليوم ماعندي كلاس
تعال مرني
اي نادي يا معوووووود مافيني حيل متكسر
باجر انروح نمشي صوب الاكويريم
بس اليوم مرني
انروح القهوه بعدين الدوانيه
..شنو لا مو خطط حق الويك اند
وين ؟؟
الهلتون ؟؟ حفله كابلز ؟
امريكان
لا يا معود مالي خلق هالمجعره
تكفى فكني والله مالي خلق
قتووووووووب هالويك اند تعال عندي الشاليه نقعد ويا الاهل و الجو حلو و لي صار بالليل
لفيت لك خوش زقاره من الي يحبها قلبك
هههههههههه لا باكستاني
بس انت تعال الحين مرني
يالله نص ساعه و اطلع لك برا
ارجع الصاله
هااااااااااااا يما لقيتيلي مرااااااااااا؟؟؟؟
اروح القهوه
اشيش لي راس سلوم
اروح الدوانيه
عاد انا اعجبكم في الدوانيه
لتحجيت الكل يسمعلي
...اطلع من الدوانيه
و انا ويا قتوب في السياره
و بالشاره تحديدا ..
قتوب بسرعه التفت يمين صوبي بس شوي شوي لاحد يحس فيك شوف منو يمنا
..
اي اهي
هذا ريلها الي طارت عليه
هذا ريلها الي سويتلي سالفه عليه
تدري عاد
لا حلو ولا شهاده و لا عمات عين
بس بناتنا بيموتون على الريل
يا تزوجني الحين !! و الا انت ولد ستين نذل
و بسوي فيك و يا الخاين يالي فيك ياللي مافيك
..
اتهقى مستانسه ؟؟
كيفها الله يهنيها
بس ماله داعي الحجي و التشهر الي طلعته علي

اقولك يا قتوب الكل تزوج الا انا و انت
مع ان موناقصنا شي
بس الحظ لاقعد
ادخل البيت
الهدوء القاتل
ادش داري
افتح الاب توب
ادش المسنجر
ماكو احد بهالليل
ادش البالتوك
مالي خلق هالهيلق
اسكره و احط راسي و انام
.. و ارد مرا ثانيه
نفس القصه
...
لاتسألوني عن الحب
و لا الزواج
و عن اي شي ثاني
كل شي في الكويت ..مقلوب
ماكو الا اتنازل عن وايد شروط
بس الشكل شي مهم في حياتي
.. و اسلوبها
ابيها قويه
و حنونه
ابيها تستحي
ابيها ملتزمه خو بناتنا الله خير حافظ لاحسه عقولهم لبنان
ماخلوهم لا حيا و لا حشيمه
..
وابيها متعلمه
...ويروح عبيد في سبات عميق

48 comments:

الأجنحة المتكسرة said...

إلى الأخ عبدالله

يقول المثل فاقد الشيء لا يعطيه

وأنا أقول خلك عزوبي وايد أبرك

لك ولبنات خلق الله

******************

إلى العزيزة لوير

هالبوست خلاني أتأكد إني ما عشت فترة الكويت الحديثة

lawyer said...

الجنحه المتكسره

اشكرج على تعليقج
اشوه انج ماعشتي
الحمدلله
...
بس انشاء الله ماتكونين مصدومه

bo_sale7 said...

هممممممممممممممممم ......فيها مبالغة وايد ...بس قصة معبرة

lawyer said...

شنو الي فيها مبالغ ؟؟ اقدر اعرف؟؟

جنة الحواس said...

Post ythayeg elkhelg wetha7ek eb nafs el wagt .. 9ij hatha el waqe3 ..


Bas Allah laaa ykather men amthala .

lawyer said...

بروك
اميييييييييين
اي والله واقع
و انشاء الله مايكثر
بس على قولتج يضحك و يضيق الخلق
ضحكني فيه شغلات بسيطه و سخيفه
مثل سالفه انه منحاش منها عشان شامبوها
ههههههه

الفكره الي ابي اوصلها
ان الشاب الكويتي يظن نفسه مثالي على الرغم من العيوب الكبيره و الكثيره الي فيه
يشوف نفسه برفت في منظاره و زاويته اهو
لكن مو في زاويه اي وحده
شخصيه عبدالله ما تبيها اي بنت
لكن اهو يسأل نفسي اشناقصني
محد احسن مني و ماكو احسن مني و ماتزوجت
يسوي كل شي و عنده كل شي و يبي كل شي

esTeKaNa said...

شخصيه عبدالله للاسف قاعد تزيد
والبنات وصولو مرحله تنازلات غريبه

!!تلقينها تدري عن كل خرابيطه وتدري انه مو خوش ريال وتعلبج فيه تزوجني
والله يحروني
تتزوج وجود انه يتسنع
ويا تصيب يا تخيب ،حقل تجارب مو زواج
:(
شي ثاني:
الشباب والبنات السنعين بينقرضون
خلصو بقو منهم شويه
اشرايج نسوي جمعيه نيمعهم؟
جمعيه الشباب والشابات السنعين؟
نلحق على الباجي وانا اخيتج
:pP~

lawyer said...

لوووووووووووووووووووول
استكانه
يالله على ايدج وييييييييين
اخذي فيني اجر
مسكوووووووووووووني
ترا انا ماسكه نفسي قصب
صرت لا اطلع لا اروح كلش مو ضامنه روحي

طائر بلا وطن said...

هالموضوع بالذات يضيق خلقي يا لوير
عن جد احس الناس مادري على وين رايحة

شخصية عبدالله منها وايد
شخصية فرح و غيرها بعد
والله لا يكثرهم
و أكيد الزينين أكثر

ترى ما في اسهل من طريج عبدالله
و بشكل عام طريج الحرام دايما سهل
و هذا اختبار للإنسان

الخوف من الله و اللعب بأعراض الناس
يمكن ما يعنون لعبدالله شي

عبدالله يفكر بدنيته و رغم هالشي بعد
الظاهر عبدالله نسى ان عنده خوات
و زوجه بالمستقبل

أنا أؤمن أن كما تدين تدان

و لأن كل من يشوف الناس بعين طبعه
صدقيني عبدالله بيتم طول عمره شكوكي
و مو مرتاح .. هذا طبعا اذا ما بلاه
الله بعرضه و شرفه

عقاب الله مو شرط يكون بالآخرة

Anonymous said...

صح لسانتج

الشينين واااااااااااااااايد

وطايحين قص على بنات خلق الله وهم ما يدلون طريج الحب ولا يعرفون شنوا معناه ...الله يحفظنا ويهديهم

--اختج اوراق ربيعية

طائر بلا وطن said...

سوري .. بس موضوعج ذكرني بسالفة
صارت من قريب و بمنطقتنا بعد

سالفة ولا بالأفلام بس عشان تعرفين
اذا الله بيعاقب الواحد شنو يقدر يسوي

فلانة متزوجة لكنها تخون زوجها مع
واحد ثاني و طبعا اكيد امثال صاحبنا
عنده غيرها الف وحدة غير السفرات

بعد فترة طويلة انكشفت العلاقة و انحاش الريال
بره الديره و الزوجة زوجها استخسر يضيع
حياته عشان أمثالها خذاها و قطها
على اخوانها و قالهم ترى بنتكم كيت
و كيت و كيت

هذا كله مو مهم و مافيه شي يديد

الريال اللي انحاش أهله تخلو عنه
و قالوله تتزوجها وريلك فوق راسك

طبعا سوى فحص على نفسه بعد ما رجع للديره
و اكتشف انه فيه ايدز من سفراته

البنت افحصوها و بعد فيها ايدز

الغريب ان الزوج الوحيد اللي ما كان
مصاب بهالمرض .. عن جد ولا بالخيال
رغم ان زوجته كانت مصابه

الله لا يبلانا و لا يبلاكم

Expatriate said...

الله يهديناويهدي شباب المسلمين من الذكور والإناث
ويثبت أهل طاعته على دينه

عبدالله شخصية منتشرة في الكويت بين شباب الكويت ، وللأسف عدد كبير من الشباب يطمحون لأن يصلون الى مستواه ووضعه
وكذلك الكثير من البنات يتمنون واحد مثل عبدالله للأسف

ii said...

بس عبدالله رجل طبيعي لحد الحين ما صدر منه شي ينقال عنه انه مثل هالشباب التعبانين ..


طائر:
قصتك تخوف ..سبحان الله ربي يمهل ولا يهمل

Expatriate said...

se3loah
---------

الظاهر انج ما فهمتي بعض العبارات بين السطور .. والنغزات (القشرة ) اللي كتبتها لوير عن شخصية عبدالله

lawyer said...

طائر

اي السالفه مو بس اللعب في اعراض بنات خلق الله
لان ترا في وايد بنات اهي الي تسهل للشباب هالشي الغلط مو بس على الشباب الجريمه من طرفين بنت و ولد
عمره ما راح ينحرف الشاب بعيد عن البنت و العكس صحيح
لكن القراده انهم ماشين في الزمن


عبدالله عمره ما يفكر في سالفه الاعراض عبدالله يفكر في ذاته كرجل
عبدالله مو جادم على الزواج عبدالله كل شي عنده بس الزوجه ماعنده فيبي يكمل باجي البرستيج
بس هم مو جادم
شرب حفلات كابلز مغازل
حشيش
كل هالبلاوي
يشفعلها
اذا كان ولد الفلان الفلاني
خريج
يشتغل في وظيفه مرموقه

اما بالنسبه للقصه
ففعلا تخووف
و يبيلها من يعتبر
لكن يا ريت البنات الي يخونون ريايلهم
يقعدون مع نفسهم و ياخذون خطوه جاده بهالشي
انا رفيجتي
كانت تخون زوجها بعد ثالث سنه زواج ؟؟
ليش ؟
لانها على قولتها ريلها ما قام يسوي الي اهي تبي في الجنس
ما قام يقولها كلام يسحرها و اهي تنام وياه
الزبده المراه المتزوجه تخون لسبب الجنس
يعني مو مثل البنت التافهه الي عمرها 16 سنه لما تغازل

الله يثبتنا

lawyer said...

اوراق ربيعيه

فعلا يبتيها ييبه مايدلون طرج الحب و لا يدرون عنه

نورتي اختي

lawyer said...

اكسبا
الي حارني في الموضوع
ان عبدالله يشوف نفسه مثال الزوج المطلوب و البنات كل من يبي ظفره

على و هابين هبه الحين
ماضي الريال حق الريال و الحاضر حقج
يعني بلعب و بسرسر و باعفس الدنيا و اذا ييت بتزوج بتسنع!!

اذا انت ما خفت من ربك بتردك المرا
اهم شي الضمير و الذمه اهم شي الاخلاق
وين الدين
شاب عمره 32 للحين عايش في درب الصياعه متى ينضج؟؟

lawyer said...

سعلوه قصدك شنووووو مافي عبدالله
كل بلوه فيييييييييييييه

شرب بنات حشيش حفلات
مغازل خيانات
و كل القراده الي في الدنيا فيه
وبعده ما فيه شي

Expatriate said...

لا تعورين قلبي زيادة يا لوير

بروحي نفسيتي مو زينة هاليومين
وعقب ردة الكويت انغثيت من اللي شفته وسمعته

لا تسودين الصورة بويهي ، ترى يضيق صدري لما اسمع هالاخبارو القصص بالكويت او بأي ديرة مسلمة ..والله من صجي
والله هذي الغربة مو الدراسة بره

Anonymous said...

يا أيُّها الرجل المعلم غيرَه

‏هلا لِنفسِك كَانَ ذا التَّعْليمُ

lawyer said...

اكسبا
لا تعور قلبك خل عندك ثقه بالله
و حط في بالك دايما
الطيبون للطيبات
و ان في صحوه اسلاميه ووعي و في شباب طيب مثل البنات
و لو خليت خربت

طائر بلا وطن said...

الواحد كل ما يتعمق أكثر بهاالسوالف
بيشوف أكثر و يتعب أكثر

التيار ماشي و جارف
و الناس للأسف كل مالها و أردى

طيب شنو الحل؟

اصلحهم .. ما أقدر ولا عندي استعداد
و مو من حقي

أراقبهم .. بعد مو فاضي .. لا يكون
أول ولا آخر همي و أنا مادري

اسمع سوالفهم .. ليش يبا .. أعيش طول
عمري نظيف و آخر شي امرض و نفسيتي تتعب
عشان غيري سوى .. يعني غيري يخربط و أنا
اتحمل تبعات هالخرابيط من عوار قلب
و شك و نظرة متشائمة

الطيبون للطيبات
و الزم ما علي أهلي

و لا تعورون قلوبكم

kuwaite said...

سيناريو حلو

lawyer said...

طائر بلا وطن
اي والله لا تعور قلبك
بس تحتر لما تشوفهم يتكاثروون


كويت
شكرا على رايك اعتز فيه

lawyer said...

والله يا اخت جواهر لما كتبت القصه هذي مافكرت في الاسم طرى على بالي عبدالله و بس انشاء الله اوعدج اني احط بالي مرا ثانيه

Яeema said...

lovely story :)

lawyer said...

جواهر
ههههههههههه ترا انا بسرعه اصدق

ريما هلا و غلا
شكراااااااااا يا عمري
اهم شي بس انها يازتلج انا ادري شنو الي اعجبج و الا ماعجبج

meo said...

الخير يخص و الشر يعم

مو يعني عبدالله جذي في شباب وايد جذي
ولا هذا اللي دارج بالكويت

اللي فيهم الخير وايد و الحمدالله
ما اتكلم عن نفسي بس الرجال اللي حولي يثبتون لي هالشي
اللي معيل و مستانس ويه اهله
و اللي يدور
و اللي يقوول يله متى اخلص و اتوظف و استقر

و اللي حاط شغله في باله يبي يسويها
و اللي حاط له عمر و يتزوج مثل حالتي

عبدالله بيي يوم و يقوم ان شاء الله
و يمكن اذا صلى صلاة وحده تغير اشياء وايد

الحجي حق
Expatriate

لاتعورين قلبج اختي الزينين وايد و الله يخليهم و اللي مثل عبدالله ما يتقارنون
و امثال عبدالله لو بديرة كفره جان محد يسنعهم بس بديرتج يأذن خمس مرات و ممكن في مره من هالخمس يتنع عبدالله او اللي مثله
لا تحاتين و رفعي من معنوياتج اختي

Unknown said...

اول شى شخصية عبدالله موجودة 100% بس مومعناه ان هالشخصيةاهيا الاكبر بين الشباب وصدقينى لو بنات الكويت حفظوا نفسهم وماصاروا سهلين ووايد منهم مو كلهم كل يوم بحضن واحد نفس عبدالله جان الدنيا بخير
اذا كان عندج اسلوب فى الكتابة فالافضل عدم استخدام الكلمات النابية
شكرا

Unknown said...

باضيف شى عزيزتى اكو بنات على فكرة اكثر من عبدالله على الاقل عبدالله يدرس ويشتغل فى بنات حياتهم
سفرة مع الصاحب
زيحارة ملفوفة صح
حبوب خضرة وحمرة
مزرعة
شاليه
واللستة طويييييله
انا افضل انج تكتبين شنو يسون البنات متزوجه وعزوبية والا اذا تبين انا احطلج قصص صجية

Unknown said...

باضيف شى عزيزتى اكو بنات على فكرة اكثر من عبدالله على الاقل عبدالله يدرس ويشتغل فى بنات حياتهم
سفرة مع الصاحب
زيحارة ملفوفة صح
حبوب خضرة وحمرة
مزرعة
شاليه
واللستة طويييييله
انا افضل انج تكتبين شنو يسون البنات متزوجه وعزوبية والا اذا تبين انا احطلج قصص صجية شعر راسج يوقف منها

Lord Bin Sleet said...

عبدالله انسان دااااج
بكل ماتعنية الكلمة
انتي في العنوان كنك
عممتي على شباب الكويت
يوم قلتي يوميات شاب كويتي

اتمنى تراجعين العنوان

lawyer said...

meo
اي فعلا .. الخير يخص و الشر يعمم
بس انا ما شفت ان احد عمم شخصيه عبدالله على الشباب
و لا احد فينا لا انا و الا الي علقوا قالو ان عبدالله يمثل شباب الكويت
الحمدلله عبدالله ما يمثل الا نفسه

الله يوفقك انشاء الله
وايد اعجبتني كلمه الواحد الي يسمع الاذان خمس مرات
اي والله و انك صاج

lawyer said...

اخ مشاري
مدري انت ليش تعتقد اني عممت شخصيه عبدالله على الشباب

و عنواني كان يوميات شاب كويتي مو يوميات شباب الكويت
و مثلك عارف الفرق

مشكور وايد ما قصرت على التعليق

و لا كلش ما احتاج قصص
انا محاميه و اعرف وايد اشياء و اعرف كل شي
الحمدلله

بس مادري ليش حسيتك وايد اتدافع عن عبدالله
تقول على الاقل يشتغل و شايل عمره
هل الشغل و المنصب و ان كون تفسه مبرر للغلط؟؟
عبدالله ضايع
لا عدلته الشهاده و لا العمر عطاه شويه نضج
انا ما ادافع عن بنات الكويت
الشباب الكويتي لما يخترب مو قاعد يخترب مع كائنات من القمر لا بالعكس قاعد يخترب مع الكويتيات

lawyer said...

لورد بن سليت

اي فعلا عبدالله داشرررر
خلاص و لا يهمك بكتبها يوميات داشر من العليا هههههههههههه
تصلح؟؟
لا يا اخوك اخاف اذا جيت جمب الشاب السعودي يقيمون علي الحد !!

kuwaite said...

اكو جزء ثاني شئ

لاني راويت واحد اسمه عبدالله البوست وقال

*********

lol

ناطرين البوست الياي

meo said...

lawyer
جملة الخير يخص و الشر يعم
المقصود من ها ليس التعميم كما انتي قصدتي

بل حصول الشر على الاغلبية

مثال شركة فيها موظف احمق عامل العميل بشكل سيء
ردة فعل هذا العميل بان جميع او اغلبهم على حسب عقلية العميل موظفواالشركة رديئون السمتوى

او خطوط جوية عاملة شخص بشكل سيء
فسوف يأخذ فكره على الخطوط

كما طبقت على الشركات تطبق على المجتمعات

Anonymous said...

الفكرة جديدة وتستاهلين الثناء عليها لكن الى خرب عليها بعض الالفاظ والقلات القوية

lawyer said...

كويت
مدري للحين
ما فكرت

بس عسى استانس عبدالله

سلم عليه


meo

اها اوصلت الفكره وشكرا على التوضيح

عبدالله
شكرا على ثنائك
و اسفه اذا جرحت مشاعركم في الفاظي
المرا اليايه بركب فلتر مع قلمي

lawyer said...

eagls wings

thanks mashkooooor
mn thooqek

Eagle's_Wings said...

you well come

متفرغ said...

قصة حلوة.... و في وايد من امثال عبدالله عندنا في الخليج... ادري الكلام اللي باقوله يمكن ما ناس بس احد الحلول هو الزواج التقليدي (عاد لازم الطرفين يناسبون بعض ).... و يعطيج العافية :)

Anonymous said...

OH MY GOD!
أنا الحين من صج أبي أمي ...
أنا شاللي خلاني أفتح بلوق؟! كنت شزيني, رفيجاتي أتنقاهم نقوة, سوالفنا كله عن الأكل, تحلطم عالدكاترة, هالفلم حلو بس اللي يمثل فيه أحلى, خلونا نتيمع عالغدا بدل بالليل علشان أهالينا ما يسولونا سالفة, إذا تشيطنا كلش ... علينا الموسيقى حدها وحفينا البحر, وإذا أحد تحرش انثولنا, ما نعرف شنسوي بعمرنا, لا ونروح نخرط على أهالينا اللي صار معانا وننزف ... أنا أول لما كنت أسمع سوالف جذي, كنت أسوي عمري ما أسمع وأغير الموضوع, ناس من هالنمونة كانوا بالنسبة لي مثل الطنطل وحمارة القايلة, الفرق الوحيد إن النوع الأول من صج مو موجودين, لكن النوع الثاني على كثر ما كنت أدري إنهم موجودين ... على كثر ماإني ما كنت أبي أصدق!
بس بكل أسف, ما أقدر أفلتر العالم من حوالي, في المدونات الواحد يقرا خلاصة بشر, بكل أحلامهم وطموحاتهم, طبايعهم واهتماماتهم, وعيوبهم ومزاياهم, ونظرتهم للعالم من حواليهم
أشخاص مثل هال عبدالله بكل اللي يرمزون له صاروا يوم عن يوم ... صج أكثر

خليني الحين أروح أخلص أوراق تخرجي أبرك لي ... حافظكم الله

Diver said...

بصراحة كان موضوع حلو و يشد
مضحك مبكي بنفس الوقت يعتمد على العمق الي تبي تنظرلا فيه
Well Done

lawyer said...

متفرغ
حياك الله
اتهقى الزواج حل

الزين كله

الحمدلله انج ماشفتي و انشاء الله ماتشوفين يا رب

مبروك التخرج

دايفر
شكرا لك اعتز في رايك
ماقصرت

Hashemy said...

قصه وايد حلوه معبره ماتخلو طبعا من الاسلوب الكوميدي اللي معروفه فيه لوير ماتخلو من الانتقادات الدايمه عالرياييل لووووول بس عجبتني وايد حتى سويتلها سيف بتكست عشان اقراها على طول مشكوره وايد

lawyer said...

هاشمي حياك الله من ذوقك
صدقني وايد استانست
من تعقليك اذا دل على شي يدل على انك انسان جدا واثق من نفسك و محترم و فاهم الدنيا صح
مو مثل الي انتقدوني عشان على راسهم البطحه

nEo said...

lol !!


nice story !!


guys guys guys !