Sunday, February 12, 2006

افلونزا المعاريس

يمكن سمعتوا في الاونه الاخيره عن افلونزا الطيور
لكن مدري اذا سمعتوا عن انفلونزا المعاريس

احداث هذه الفلونزا مبلشه معاي من مبطي يعني من زمان
ابتدائا من سنه اولى جامعه
....اذكر وقتها كنا صغار انا ورفيجتي طايرين من الفرح
اليوم هذا غير عن اي يوم اليوم يوم زواجها
و طبعا حماس الشباب الي فيني خلاني من صليت الفير و انا ادق على رفيجتي
الووووووو بشوووره اشلونج ؟؟ قاعده ؟؟
ترد علي بصوت يفظخ القلب ...انا نمت عشان اقعد
عسا ما شر اشفيييييييييييييييييج يا حافظ ؟؟
فلونزا!!!!
والله تتسلط هل الفلونزا..
طبعا نطرت الشمس تطلع شوي
و ارووووووح طايره بيت رفيجتي
ادخل من غير استأذان كالعاده
اروح دارها .. اقيس درجه حرارتها و الا ناااااااار
طبعا اهني تشتغل الدكتوره فاطمه ..
اخذها اغسلها اسويلها برتقال اعفس البيت اخليه يستنفر اطرش السواج اييب زنجبيل فرش
ادهنها بفكس
ابخرها في شاي ورق شاي
اسوي كل الي اعرفه
و اخر شي البسها دلاقات
و اخليها تنسدح
و اعطيها البرتقال مع الليمون
والبندول
...تنام رفيجتي
تقوم مخترعه .. حلمانه في عرسها
ابشرها ان تو الناس الحين الساعه 11 و نص الضحى
بس رفيجتي للحين تعبانه !! و عروووووس
اتصل في المنقذ ابره الخطييييييييييييب
اي الدكتور طاهر
يقزها ابره
....
مابقى بندول ما اعطيها
ما بقى عله ما اعطيها
و تخف شوي .. اتي الكوافيره و مالت الميك الاب
طبعا رفيجتي يومها كانت متعسره
حطت حرتها فيني و في امها و الخدم و ريلها
عفوا اقصد المعرس
كلشي يتسلط!!!

يتغير نظام العرس نظرا للظروف تضطر رفيجتي تدخل مع المعرس عشان نظمن ان في احد
ماسكها ...لانها يمكن يغمى عليها في اي وقت
فلاشات التصوير تعمي العين ...
احداث سريعه
المعازيم محد حاس
بس الكل يسأل عروووووس و مبوزه!!!
تطلع بشووره من العرس على الهادي على طوووول
تنام ليله هناك فلونزا جايده ....
مسكينه صديقتي ظلت طول عمرها و اهي تحلم في ليله عرسها
و ما استانست فيها..


صديقتي الثانيه ضحى
فطومه بقولج شي ممكن بس بيني و بينج..
اشفيييييييييج ؟؟
ما فيني شي لا تحاتين
بس انتي تدرين صاير فتره بين عرسي و ملجتي
و امي جهزت للعرس ..و استعدينا
اوكيه شنو المشكله ؟؟
المشكله اني اتنسى !!!!
وييييييييييييي حبيبتي الف مبرووووووووك حامل ..
اي والله فشله حامل و عروس ..
لا عادي تصير وايد ..ارقع لها اتعرفين فجر الي رفيجتها هنوف .. اي كانت حامل في عرسها و محد حس ..
الله يعين ..
المهم فطومه ابيكم انتو رفيجاتي كلكم تكونون موجودين في العرس مبجر عشان تشيلون العرس ..
اطمنها و اوعدها اني اول من بيكون في القاعه
و تحديدا يوم العرس ادخل الفندق
اركب الاسنسير .. اتلاقى ويا الفلبينيه ..
هاي وين مدام ضحى فووق اكو حرمه مال سوي شعر .. طبعا انا لازم كلامي و يا الخدم هندي هيروغليفي
ترد علي الخدامه
لا عندها الدكتور !!!!
يا حظي على رفيجاتي اشفيييييييييييييييكم !!
اختبص و اطلع لها الغرفه فووق
و الا قاعده تحط الميك اب اقولها اشفيج تقول خدامتكم .. عندج دكتور
ترد علي و تبجي
ذابحتني الفلونزا و النسااااااااااااااااااااااااااااااه و وايد شغلات ما اقدر اكلها و ادويه عشان حامل!!!!

تعور قلبي رفيجتي
بس الواحد ما يقدر يقول الا قدر الله و ما شاء فعل و لا اعتراض على حكمه الله
بس سبحان الله كل شي يتسلط
و اخيرا و ليس اخراااااااااااااااا
بنت خالتي
بعد يومين عرسها
ادخل عليها من شوي .. الاقاها مريضه فلونزا جايده
و محد حوالينها لان الخدم مستنفرين و خالتي مستنفره
احتاج اغراض من غرفتها
ادخل الدار ..ظلمه افتح الليت الاقي وحده غرقااااااانه من العرق و ترجف و توون ون
اخترع ..الحقها بسرعه اييب لها ماي كلينكس .. امسح ويها .. اسألها اشفيج عسى ما شر ..
ترد علي
فلونزااااااااا!!!
مسكينه بنت خالتي
تبجي من التكسر و الالم و ان نص شغلها ما خلص و انها تعبانه مو قادره ترفع راسها و درجه حرارتها مدري جم بس وايد حاره
ارجع امارس طقوووووسي
فكس بندول زنجبيل
ابخرها في بابونج و فكس و ماي حار
اخليها تاخذ شاور عشان ينزل حرارتها بعدين اغطيها و البسها دلاقات
بسسسسسسسسسسسسس هذا كله مو مهم ..
المهم انها تقوم بالسلامه
نفسيتها جدا تعبانه ..
يتصل عليها ريلها .. يقولها انه اجل السفره جم يوم لانه حدا تعبااان و فلونزا و ضغطه مرتفع مع الادويه و ما يصير يركب الطياره

الله يشافيهم
مساااكين ..
قلبي معورني
بس هذي ما تسمى ظاهره افلونزا المعاريس ..





14 comments:

طائر بلا وطن said...

الله يهداج
بيوم عرسها
فكس
و زنجبيل
و بخور بابونج

ناوية على زوالها
:)

سخونة طبيعية
و تبين الصج
لذيذة بعد

ضحكتيني على الصبح

سلام

lawyer said...

جواهر
لا انشاء الله ما تحتاجيييييييني انشاء الله في عرسج تكون باحسن شكل و باحسن حال يا رب

lawyer said...

طائر بلا وطن
انشاء الله دوم تضحك

لا اشدعوه هذي الطقوس الصبح اسويها
قبل لا نغسلها بالليل و اتبدل
خووووووووو اهي خاربه خاربه
خلينا نعميها

بس والله من شوي قاعده اقول حق صاحبتي اني كاتبه موضوع اليوم جذي
قالت حطيلهم قصتي
قلت لها ما يمدي ...
قصتها تموت ضحك نساتها كانت طول فتره حمالها 9 شهور اهي بيت اهلها ..
وبعدها الاربعييييييين
اطلعت من الاربعين
و الا البيبي وايد تعيان ..
اقعدت وياه اسبوع في المستشفى وريلها زعلاااااااااااااان
اقولها ... موتتني ضضضضحك
تقول والله زعلان ريلي ما حاجاني
الا لما خذيت البيبي و حطيته عند امي قلت لها يما عن اذنج جم يووووووووم بدش التجنيد الازامي
ههههههههههههه
سبحان الله كل شي يتسلط

kuwaite said...

lol

اكيد حوبت شخص منو مادري

:P

lawyer said...

كويت
حرااااااااااام مساكين
عاد بنت خالتي حدها فقيره لا لها و لا عليها على قولتهم ياهل من اهل الله ..
بس يمكن عيييييييين قطتهم

Hashemy said...

هاهاهاها صج ضحكتيني لوير وهذا مو غريب عليج على طول صاحبة دم خفيف مشالله عليج انتي وسوالفج هاهاها مشكوره على هالبوست العجييب اهم شي ماكو حجي عالرياييل هاهاها

kuwaite said...

lawyer

lool

والله العظيم انتي المسكين

على نياتج

قصدي انتي بالتعليق الى فوق

:P

lawyer said...

هاشمي مشكوووور من ذوقك
اي ماكو عن الريايل انطر البوست الياي بشرشح فيه الدنيا


كويت
حرااااااااااااااااام عليك عقدتني
ليش؟؟؟؟؟؟

جنة الحواس said...

Lawyer ..

Waay mesakeen esh hal 7ath !

I always tell my mom etha allah ketab o tezawajt lo sheno ma asawy 3ers .. Cause kel men yestanes bel 3ers ella el 3aroos o ahalha .. ta3ab o loya o mawaqef baykha madri shlown t9eer just like ur freinds ..wa3laya !

lawyer said...

قووووووووولي امين يا بروك
اميييييييييييييين
اميييييييييييي
امييييييييييييين
يارب الله يرزقج الي في بالج و يعطيج احسن مما تتمنين يا رب
و ايلج ريل يقولج ما ابي تسوين و لا شي و العرس يصير على الحموله انتي بس تروحين في كشختج ومستانسه
يا ربببببببببببببببببببب

متفرغ said...

شهالحظ الاقشر كلهم انفلونزا يوم العرس.... نصيحة استعمال سلاح الدمار الشامل كميات تجارية من البنادول و الماي و الانفلونزا انشالله تروح و ما ترجع :)

lawyer said...

متفرغ انا اعتقد انك دكتور كويتي
لان الدكاتره الكويتين في المستوصفات ما يصرفون غير البندول و المضاد الحيوي

3ateeja said...

خوووووووووووووش ظاهرهوفي ظاهره ثانيه اسمها يسمونها ....افلونزا ام العروس...ما تعرفينها؟؟

غريب said...

أستاذه كثير عجبني الموضوع بس جان كملتي جميلك وعالجتي ريل بنت خالتك
مع تحياتي
غريب