Tuesday, February 14, 2006

فالنتاينكم رهش

قمت الصبح فتحت عيني
جم مسج من صاحباتي في الشغل و صاحبات امي .. عن الفالنتاين
ابتسمت .. فتحت الابجوره .. فتحت الاب توب .. قمت رحت الحمام عزكم ,,الله .. رجعت فتحت ايميلي لقيت ايميلات وايد من شركات بمناسبه الفالنتاين ..
حست امي اني قاعده ..
فطووووووووووووووووووووووومه حبيبتي خالتج تقول روحي تريقي عندها اليوم مزهبتلج الرهش الي تحبينه!
تعسرت
ما ابي رهش ابي ورد
..
قلت حق امي ماااااااامييييتا هابي فالنتاين داي ..
قالتلي استغفري ربج
روحي اكلي رهش!! بس روحي
ادخل خيمت خالتي وبما ان اليوم عرس بنت خالتي ..فصارلنا يومين ناكل بالخيمه و شبه عايشين بالخيمه لان البيت في حالت استنفاز
اصلبي شاي وحليب .. احطلي رهش و قرص عقيلي ..درابيل..
تتصل علي يدتي ..
الوووووووو منوووووووو من انتي !! يما لولوه انا فطومه
انتي متصله علي ..
اي يا روحي مدري من متصله عليه !!
عادي يما عادي امري بغيتي شي
لا والله يا بنيتي ما بغيت شي ..ماكو انتي وينج فيه ..؟؟
انا قاعده اتريق يما ...
لاااااااااا تعالي عندي قاعده بريحاتي ضايق خلقي .. ماعندي احد ما غير هالسستر مجابلتني ..تعالي عندي رهش الي تحبيييييييينه
تعالي اكلي رهش !!!
يمااااااااااااااا لولوه اليوم عيد الحب ما ياكلون رهش يشترون ورد !!!!
وووووووووي لا يصير خاطرج الا طيب تعالي اخذي فلوس يما و روحي اشتري ورد!!!!
حسييييييييييييييييييييييييييييييييييييييييييييت نفسي اهني ببجي
انشاء الله يما انشاء الله

فكل الي اقدر اقوله فالنتاينكم رهش
و فاقد الشي لا يعطيه
....

19 comments:

lawyer said...

دايفرررررررررر حياك الله
بس لا تصير مثل يدتي
فهمووووووووووووووووووووووني
القيمه مو الفلوس الي اشتري فيها ورد
القيمه في شخص يذكرني

Diver said...

ولا يا طويلة العمر الرهش في الفلانتاين أحسن من الورد
يمكن ببعض الأوقات يكون الككاو أحسن من الرهش بس تعرفين قديمك نديمك على مايقولون
و إذا مصرة على الورد هم انا اقولج تبين فلوس عشان تشترين ورد
;)

طائر بلا وطن said...

لووووووووول

والله انه يدتج اكسرت فيج كسرة محترمة

و أنا اقرا طرى علي مستر بين لما يعايد
نفسه بالكرسمس .. كان حده يكسر الخاطر


المهم نبارك لبنت خالتج
و انتي بعد معوضة خير
باللي اييب لج الورد
:
:

فكرت اليوم شنو اكتب بهالمناسبة

و أنا أفكر دزلي صديق بيتين شعر
مسكين يحب من طرف واحد

ترقبوا سالفته بليل
يكسر خاطري هالولد

سلااااااام

و هابي رهش ديي
:D

lawyer said...

حدهااااااااا
الله يطول في عمرها
كله بتحل كل شي بنفسها
كل مشكله و لها عند يدتي حل
يالله بانتظار جديدك الليله

esTeKaNa said...

هني عساه مداخيل العافيه:
رهش
درابيل
وحليب

شنو احلى من جذي بالدنيا؟
:))
يا بعد قليبي والله عسى ربي يجبر بخاطرج دور السنه تكتبين لنا بسسي ورد
مابي ورد
بس مليت من الهدايا
:Pp~

lawyer said...

هلا فيج استكاااانه
امييييييييييييييين
اجمعيييييييييين يا رب

Anonymous said...

فديتها بس يدتج ربي يحفظها ويطول بعمرها :)
أختي لوير شرايتج تكسرين العادة وتشترين إنتي حق نفسج باقة كبيييييييرة من الورد اللي يحبه قلبج وتخلين المحل يدزه لتج على مكان شغلتج ..بعد تفتح عينتج على منظر يسر القلب :) ولا تنسين كرت صغير تقولين للوير إنتج تحبنها وايد وتعزينها حييييل وفخوره فيها ...
حركه يديده سويها ما رح تخسرين شيء
موفقه الغالية
أوراق ربيعية

Lord Bin Sleet said...

ههههههههههههه
حالتك حالة انتي والرهش
اجل قاعدة في الخيمة

عليميني شبيتوا سمر؟

iliveinq8 said...

الله يرحم حالج بس

kuwaite said...

lol

يدتج قمة العفويه والله

الله يخليها لكم

بس حلوه قعدة من نوم وبطلت عيني

lol

هذي بروحها شئ

Яeema said...

hahahaha yam3awda valantine hatha e7na ensaweeh 7ag nafsa ga9ib 3ashan ye7esoon fenna, at least they know that all the word is celibrating love


ra7 aktib post esh'9ar leey bel valantine day ,,,, betgoleen ashwanna 3indy rahaash.

متفرغ said...

بصراحة ماعترف بالفالنتاين..... الله يخلي لج يدتج :) و الله ما في احلى من قرص العقيلي و درابيل و عليهم شوية شاي حليب من الصبح.... جان زين لو عندنا رهش في لندن :(

ii said...

اوكي الحين ابي شرح للرهش هذا وش يكون بالضبط؟؟؟

ياشيخه خليها على بك بس بلا فالنتاين بلا هم

بس انا قررت اخذ كورسات عند طائر بلا وطن كود كشتي تهبط

lawyer said...

اوراق ربيعيه

لا ما ابي ما ابي راح يضيق خلقي اكثر عشان راح احتفل بروووووووووووووحي ما ابي

لورد بن فليت

لااااااااا ماشبينا يادوبك فحم


ان كويت

شكراااااااااااااا


كويت
يا الظالم حرااااااااااااام علييييييييييييييك
بسسسسسسسسسسسسك كلا ماسك علي مسكه
قعدت اضحك على عمري بعدين افتشلت و تالي احتريت منك
ما يبرد قلبي لو اكفخك في كوشيات البيت كلهم



ريما رحت قريت و رديت
لا يامعووووووووده رهش اهون من الزقاير


متفرغ
افا عليييييييييك عطني عنوانك و بيوم و ليله يكوووووون عندك ما اشتهيت شي غالي



سعلوه
الرهش اهو الحلاوه الطحينيه
الي يبيعها الحلواجي

اما طائر مسببلي اكتئاب حاد بالمفاصل
بس انشاء الله يسويلك تمليييييييس للكشه

طائر بلا وطن said...

^
^
^

لوووووووول

ما هقينا

lawyer said...

ههههههههههههه
طائر اي الله يسامحك تكتب عن الحب و احنا الحريم يزووووووغ قلبنا
انا اكتب عن الرهش و سعلوه فاجه كشتها
و انت الريال اذرب واحد فيناااااا

طائر بلا وطن said...

ههههههه

ما عليج .. الرهش أحلى .. حتى شوشة نورة
أحلى

أنا بديت اثق بحكمة قلم جاف

اللي يحب امه داعية عليه

قمت اشك بأمي مع ان شكلها ما يوحي
:p

سلام

lawyer said...

طائر بلا وطن

والله صاج قلم

شغله ثانيه
لا تجااااااااااامل كشه نوره مو حلوه
يا معود انا قاعده احاول اعقد البنت عشان ابيها اتمشط شعرها اتي انت تمدحها

lawyer said...

جووووزه
شكرا حبيبتي
انشاء الله لا توصيييييييين حريص
اي والله اهي البركه و نور بيتنا
امس اتصلت علي يدتي الساعه 12 تقول تبي فرووت سلط !!!

مشكله النساااااه