Tuesday, June 20, 2006

.....فايق عبدالجليل درب كلن ماشي فيه




يلاحقني الورق

تاخذني هموم الوقت من وقتي

اسكت والسكوت أنتِ

أحاول والحلول أنتِ

شسولفلك..وانت سالفة صمتي

بسمرت الشفايف

بين صمت وصمت

تحديت الزمن

حتى نساني الوقت


خطيتك على الإصرار


على التكرار

وشلتك في سكوت

الحب

حبيبة آخر المشوار

حبي فوق تعريفي

حبي فوق تحريفك وتحريفي

وأنا ملزوم اتصبر

نسيانك مهو بكيفي

وعيونك نجوم الليل

كل الليل في صيفي

أحارب عالم عيونك

أحارب ينكسر سيفي

أبحر فيك يا حلوة

تغرقني مجاديفي

أنا بصحرا سكوتي انتحر وحدي

أعاني الصمت

أعاني الخوف

أعاني وجدك ووجدي

بهاجر من جديد أبدي

بحارب بالجمر بردي

بصمم أوفي في وعدي

وأصمم أحكي ما عندي

ولما يرتفع صوتي

أحيّ حتى الورق ضدي

أنا المقسوم للسكته أنا المقسوم

أنا العايش..أنا المعدوم

أنا غيمة مطر

وأنا العطش كل يوم

كنت آكل من اشعاري

كنت أشرب من اشعاري

وكنت أعزم على المقسوم

كنت أتعاطى هم الناس

كان ( بيتي ) بيوت الناس

وياما بدفتر بيوتي

طاردني السهر والنوم

وياما بليلي ضاع الليل

في سكة قمر مهموم

وياما بشعري وأشعاري

غفت ياما كثير نجوم

أمشي في شوارع ليل

غريب حتى عن ثيابي

غريب حتى عن احساسي

عن اعجابي

أضيع في غربة الألوان

أسير الصمت وأعصابي

أضيع تحت المطر غابة

ارفضتني أصغر أعشابي

أضيع مثل الطفل في البر

حزن الليل ألعابي

أمشي..أمشي..طول الليل

الماضي يوقفني

الذكرى تصادفني

أمشي .. أمشي ..طول الليل

تتعب مني أتعابي

أمشي .. أمشي ..طول الليل

يبكي دربي وترابي






الله يرحمك يا رب

فايق عبدالجليل


على الهامش

لحظه بس عني لا تروح

فكر فيني بالالم و الجروح

انا من حبي للبلد مابغيت الا ترابها

و انت تطرد بهمك تسرح و تمرح و تروح


14 comments:

lulu said...

انه الله وانه اليه راجعون

تضايقت وايد الله يرحمة كان خوش واحد اشعاره روعه وكلمات اجمل
دقيت اعزي ابوى لانه كان صاحبه وايد وابوى كان متأثر

الله يرحمك ويسكنك فسيح جنات:(((

White Wings said...

رحمة الله عليه

3ateeja said...

:)
سعيده انج اخترتي سالفة صمتي
الله يرحمك يا فايق
كنت تعزم على المقسووم

نون النساء said...

أنا غيمة مطر

وأنا العطش كل يوم

كنت آكل من اشعاري

كنت أشرب من اشعاري

وكنت أعزم على المقسوم

.
.
.

الله يرحمك ويغفرلك يا فايق عبد الجليل
ويغمد روحك الجنه

Яeema said...

إنا لله و إنا إليه راجعون
الله يرحمه و يقمد روحة الجنة يا رب


مادري ليش
مو راضين
نستوعب إن كان ميت من زمان

ما حسيت أبد إن ميت
و روحه ويانا دايما

إدعوله بالرحمة

Al-fala7 said...

رحمة الله عليه
.. اعتقد ماراح احد يسد مكانه
لا بسلاسة الكلمة ولا بغيرها

lawyer said...

الله يرحمه يا رب رحمه واسعه

لولو عزي ابوج عني

وايت وينج
امين

عتيجه

امين يا رب



نون النساء


شكرا لاختيارك هالابيات




ريما
اي والله سبحان الله مدري ليش



الفلاح

اكيد محد بسد مكانه

Hashemy said...

alah yer7omah o thanks lawyer

3ateeja said...

http://songs.njom.net/music/gulf/ram/alrwaidshed/rwaidshed86.ram << لكي فقط

3ateeja said...

شوفيه بصفحة البوست نفسها مو صفحة الكومنت علشان تسمعينه :)

qalm-jaf said...

أحارب عالم عيونك

أحارب ينكسر سيفي

أبحر فيك يا حلوة

تغرقني مجاديفي

.
.
.
رحمة الله عليك يافايق

lawyer said...

هاشمي
ويييييييييييييين هالغيبه

امين يارب
حلو ان شفنااك

عتيييييييييجه

ااااااااااااااه يا عمري
حياتي انتي
اغنيه عجييييييييييييبه مثلج والله

خووش كلمات
و عود


قلم جاف

اشكرك على هالكلمات الروعه شكرا لاختياراك

امين يا رب

Charisma said...

الله يرحمه ويقمد روحه الجنه ويصبر اهله وياجرهم

NouNoO said...

الله يرحمه كلماته رائعه
ربي يتقبله من الشهداء يارب